1. A Pɩyɛɛr kũumã sẽn wa n kolgdẽ wã, bõe la Wẽnnaam vẽneg-a t’a maane?

 TẼN-TƲMD a Pɩyɛɛr da miime tɩ ra pa na n kaoos la b kʋ-a ye. A tũu a Zeova ne a sũur fãa n kaoos yʋʋma. Wakat kãnga a pʋga a Zeezi, a moona koɛɛgã zĩis b sẽn da nan pa moone, la a yɩ siglgã taoor lʋɩtb sull neda. La a Pɩyɛɛr tʋʋmã ra nan pa sa ye. Yʋʋmd 62-64 sẽnese, Wẽnnaam vẽneg-a lame t’a gʋls lɛta a yiibu. Yaa pipi la yiib Pɩyɛɛr sɛbã sẽn be Biiblã pʋgẽ wã. A Pɩyɛɛr da saagdame tɩ lɛt-kãens na n sõnga kiris-nebã a kũumã poore.—2 Pɩy. 1:12-15.

2. Bõe yĩng t’a Pɩyɛɛr lɛta wã zems a wakate?

² Wẽnnaam sẽn wa n na n vẽneg a Pɩyɛɛr t’a gʋls a lɛta wã t’a tẽed-n-taasã ra maooda ne “zu-loees toɛy-toɛya.” (1 Pɩy. 1:6) Nin-wẽns n da maood n na n kẽes zãms-yood la tʋʋm-dẽgd tigingã pʋgẽ. (2 Pɩy. 2:1, 2, 14) Ra pa na n kaoos la kiris-neb nins sẽn be Zerizalɛmmã yã “bũmb fãa saabo,” rat n yeel tɩ Rom sodaasã sẽn na n sãam Zerizalɛm la a wẽnd-doogã ye. (1 Pɩy. 4:7) Yaa vẽeneg t’a Pɩyɛɛr lɛta wã sõnga kiris-nebã tɩ b bãng b sẽn tõe n mao ne zu-loees nins b sẽn da tarã la zu-loees nins sẽn da watã to-to. b

3. Bõe yĩng tɩ d segd n zãms a Pɩyɛɛr lɛta wã?

³ Baa a Pɩyɛɛr sẽn gʋls a lɛta wã pipi kiris-nebã yĩngã, a Zeova kɩtame tɩ b naag-b a Gomdã pʋgẽ. Rẽ n so tɩ tõnd me tõe n dɩ lɛt-kãens yõodo. (Rom. 15:4) D sẽn  vɩ neb sẽn nong tʋʋm-dẽgd sʋkã, tõnd me segda zu-loees sẽn tõe n kɩt tɩ yɩ toog tɩ d tũ a Zeova. Sẽn paase, ka la bilfu, tõnd me na n paama toog sẽn yaa kãseng n yɩɩd toog ning sẽn paam Zʋɩf-rãmbã, Zerizalɛm la a wẽnd-doogã sãoong wakatã. D paamda sagls sẽn tar yõod wʋsg a Pɩyɛɛr lɛta a yiibã pʋgẽ. Sagl-kãens na n sõng-d lame tɩ d kell n gũ a Zeova daarã, tɩ d tõog ninsaal zoeese, la d maneg n nong taaba. Sagl-kãens tõe n sõnga kãsem-dãmbã me tɩ b bãng n kɩɩm bãgrã sõma.

4. Sã n yaa ne 2 Pɩyɛɛr 3:3, 4, bõe n tõe n koms d tẽebã?

⁴ Rũndã-rũndã, neb wʋsg pa tẽed Biiblã bãngr-goamã ye. Kɩɩsdbã tõe n yaand-d lame, bala yʋʋm wʋsg la woto d sẽn gũud saabã ne d sũur fãa. Neb kẽer yetame tɩ saabã pa na n tol n wa ye. (Karm-y 2 Pɩyɛɛr 3:3, 4.) D tʋmd-n-taaga, d zakã ned wall ned d sẽn seg koɛɛgã mooneg sasa sã n yeel woto, tõe n komsa d tẽebã. A Pɩyɛɛr wilga bũmb sẽn tõe n sõng-do.

5. Bõe n tõe n sõng-d tɩ d kell n tall sũ-mar n gũ saabã? (2 Pɩyɛɛr 3:8, 9)

⁵ Neb kẽer tõe n getame t’a Zeova maasa ne dũni-kãngã sãoongo. A Pɩyɛɛr goamã tõe n sõnga tõndo, bala tẽegda tõnd t’a Zeova sẽn get wakatã to-to wã yaa toor fasɩ ne ninsaalbã. (Karm-y 2 Pɩyɛɛr 3:8, 9.) Ne a Zeova, yʋʋm tusr yaa wa daar a ye. A Zeova maanda sũ-mare, n pa rat tɩ ned baa a ye sãam ye. La daar ning a sẽn yãkã sã n ta, dũni-kãngã na n saame. Wakatã sẽn ketã pʋgẽ d paamame n tõe n moon neb buud fãa koɛɛgã, tɩ rẽ yaa zu-zẽkre.

6. Wãn to la d tõe n ‘ning a Zeova daarã d yamẽ’? (2 Pɩyɛɛr 3:11, 12)

⁶ A Pɩyɛɛr sagl-d lame tɩ d ‘ning a Zeova daarã d yamẽ.’ (Karm-y 2 Pɩyɛɛr 3:11, 12.) Wãn to la d tõe n maan dẽ? Yɩta sõma tɩ d bʋgsd bark nins d sẽn na n paam dũni-paalgã pʋgẽ wã zugu. Sã n tõe bɩ d maand rẽ daar fãa. Mams-y y yamẽ y sẽn be dũni-paalgã pʋgẽ n vʋʋsd pems-noogo, n dɩt rɩɩb sẽn kõt laafɩ, tɩ y neb nins sẽn maan kaalmã vʋʋgdẽ tɩ y reegd-ba, la y wilgd neb nins sẽn vɩɩmd pĩnd wẽndẽ wã Biiblã bãngr-goamã sẽn pids to-to. Rẽ na n sõng-y lame tɩ y maan sũ-mar n gũ saabã, la y kell n kɩs sɩd tɩ yaa yaoolem wakatã la woto. Tõnd “sẽn pĩnd n bãng bõn-kãensa” beoog-daarã wɛɛngẽ wã, d pa na n bas tɩ zirẽ-be-karen-saam-dãmbã kɩt tɩ d “menem” ye.—2 Pɩy. 3:17.

7. Ninsaal zoees tõe n kɩtame tɩ d maan bõe?

⁷ D sẽn ning a Zeova daarã d yamẽ wã kɩtame tɩ d rat n maan d sẽn tõe fãa n moon neb a taabã koe-noogã. Baa ne rẽ, d mi n yɛɛsdame n pa rat n moon ye. Bõe yĩnga? Tõe n yɩɩ ninsaal zoees yĩnga. A buud paama a Pɩyɛɛre. A Zeezi yõkrã yʋngo, a Pɩyɛɛr pa tõog n wilg t’a yaa a Zeezi karen-biig ye. A kɩɩsa naoor wʋsg meng t’a pa mi-a ye. (Mat. 26:69-75) La a Pɩyɛɛr wa n tõoga a rabeemã, n yeel a lɛtrã pʋgẽ yaa: “Ra zoe-y bũmb ning neb a taabã sẽn zoetã, la y ra maan yɩɩr me ye.” (1 Pɩy. 3:14) A Pɩyɛɛr goamã wilgdame tɩ d tõe n tõoga ninsaal zoeese.

8. Bõe n tõe n sõng-d tɩ d bas ninsaal zoeese? (1 Pɩyɛɛr 3:15)

⁸ Bõe n tõe n sõng-d tɩ d bas ninsaal  zoeese? A Pɩyɛɛr yeelame: “Bɩ y sak n deeg y sũyã pʋsẽ tɩ Kiristã yaa Zu-soaba, la t’a yaa sõngo.” (Karm-y 1 Pɩyɛɛr 3:15.) Woto baoodame tɩ d bʋgsd Kirist Zeezi sẽn yaa tõnd Zu-soab la d Rĩmã naamã la a pãngã sẽn ta zĩig ningã zugu. Y sã n wa paam segb n tõe n moon koɛɛgã tɩ rabeem tar-yã, bɩ y tags tõnd Rĩmã yelle. Mams-y-yã a sẽn be saasẽ n dɩt naam tɩ malɛgs ka tɛk gũbg-a wã. Tẽeg-y tɩ b kõ-a-la ‘noor t’a ges bũmb fãa yell saasẽ la tẽngã zugu,’ la t’a na n kell n zĩnda ne “yãmb daar fãa, hal tɩ ta dũniyã saabo.” (Mat. 28:18-20) A Pɩyɛɛr sagl-d lame tɩ ‘d segl d mens wakat fãa’ sẽn na yɩl n gom n teel bũmb nins d sẽn tẽedã. Yãmb dat n moonda koɛɛgã y tʋʋmã zĩigẽ, lekollẽ wã, wall segb y sẽn paam fãa bɩ? Tags-y n ges-y wakat ning y sẽn tõe n maan dẽ, la y segl y sẽn na n yeel bũmb ninga. Pʋʋs-y-yã a Zeova n kos raoodo, n bas y yam t’a na n sõng-y lame tɩ y tõog ninsaal zoeese.—Tʋʋ. 4:29.

9. Bõe la a Pɩyɛɛr maan tɩ pa yɩ nonglem tʋʋmde? (Ges-y fotã me.)

⁹ A Pɩyɛɛr wa n bãnga a sẽn na n wilg to-to t’a nonga neb a taabã. A Pɩyɛɛr da bee ne a Zeezi, wakat ning a sẽn yeel yaa: “Mam kõta yãmb tõ-paalga: Bɩ y  nong taaba. Nong-y taab wa mam sẽn nong yãmb to-to wã.” (Zã 13:34) Baa ne rẽ, ninsaal zoeesã wa n kɩtame t’a Pɩyɛɛr zãgs t’a kõn naag a tẽed-n-taas nins sẽn yaa bu-zẽms nebã n dɩ ye. Tẽn-tʋmd a Poll boola bũmb ning a Pɩyɛɛr sẽn maanã tɩ “pʋ-lik tʋʋmde.” (Gal. 2:11-14) A Pɩyɛɛr saka tẽn-tʋmd a Poll kiblgã, n dɩk yam a pʋgẽ. A lɛta a yiibã fãa pʋgẽ, a pa yeel tɩ d segd n nonga d tẽed-n-taasã bal ye. A yeelame tɩ d segd n wilgdame tɩ d nong-b lame.

10. Bõe n tõe n kɩt tɩ d nong d tẽed-n-taasã ne “nonglem sẽn pa naag ne pʋ-lika”? Wilg-y y leoorã võore. (1 Pɩyɛɛr 1:22)

¹⁰ A Pɩyɛɛr yeelame tɩ d segd n nonga d tẽed-n-taasã ne “nonglem sẽn pa naag ne pʋ-lika.” (Karm-y 1 Pɩyɛɛr 1:22.) D sã n nong taab woto, d wilgdame tɩ ‘d sakda sɩdã.’ Wala makre, Biiblã yetame tɩ “Wẽnnaam pa bakd ned” ye. (Tʋʋ. 10:34, 35) D sã n nong neb kẽer tigingã pʋg la d yãk sãnda n pa nongẽ, d pa tõe n yeel tɩ d tũuda a Zeezi noorã ye. Yaa sɩd tɩ d tõe n nonga sãnda n yɩɩd wa sẽn yɩ to-to ne a Zeezi wã. (Zã 13:23; 20:2) La a Pɩyɛɛr tẽeg-d lame tɩ d segd n modgame n tall “saam-biir nonglem,” rat n yeel tɩ n nong d tẽed-n-taasã wa d zakã neba.—1 Pɩy. 2:17.

11. “Nong taab wʋsg ne nonglem sẽn yit sũurẽ” wã baoodame tɩ d maan bõe?

¹¹ A Pɩyɛɛr sagl-d lame tɩ d “nong taab wʋsg ne nonglem sẽn yit sũurẽ.” Vɛrse-kãngã pʋgẽ, b sẽn yeel tɩ “nong taab wʋsgã” rat n yeelame tɩ d nong nebã fãa, baa neb nins d sẽn get tɩ yaa toog tɩ d nong-bã. Wala makre, saam-biig sã n maan bũmb n beeg tõnd wall n sãam d sũuri, d maanda wãna? Tõe tɩ d na n dat n maaname n lebse, n pa wilg nonglem ye. La a Zeezi sõnga a Pɩyɛɛr t’a bãng tɩ maan n lebs pa noom Wẽnnaam ye. (Zã 18:10, 11) A Pɩyɛɛr yeelame: “Bɩ y ra lebs wẽng wẽng yĩnga, wall tʋʋr tʋʋr yĩng ye. Y segd n ningda barka.” (1 Pɩy. 3:9) Y sã n nong neb a taabã wʋsgo, y na n maand-b-la neere, baa neb nins sẽn maan bũmb n beeg yãmbã.

12. a) D sã n nong d tẽed-n-taasã wʋsgo, na n kɩtame tɩ d maan bõe? b) Bõe la y rat n maane, wa Préservons l’unité, un cadeau précieux video wã sẽn wilgdã?

¹² A Pɩyɛɛr pipi lɛtrã pʋgẽ, a yeelame tɩ d “nong taab wʋsgo.” Nonglem a woto pa lut yel-wẽn bilf bal ye. A “luta yel-wẽn wʋsgo.” (1 Pɩy. 4:8) Tõe t’a Pɩyɛɛr tẽega a Zeezi sẽn sõng-a t’a bãng bũmb ning sugrã kũun wɛɛngẽ yʋʋm wʋsg sẽn loogã. Wakat kãnga, tõe t’a Pɩyɛɛr tagsame t’a sẽn yeel t’a na n kõo a saam-biig sugr “hal naoor a yopoe” wã wilgdame t’a yaa sug-kõata. La a Zeezi wilga a Pɩyɛɛr ne tõnd fãa tɩ d segd n kõo taab sugr “hal naoor pis-yopoe la a yopoe,” rat n yeel tɩ pa tar tɛk ye. (Mat. 18:21, 22) Y sã n getẽ tɩ sagl-kãngã tũub yaa toogo, bɩ y ra koms raood ye. Neb nins sẽn tũud a Zeova wã sẽn pa zems zãngã yĩng kɩtame tɩ wakat ninga, yaa toog tɩ b kõ sugri. Bũmb ning sẽn tar yõod masã yaa y maan bũmb ning fãa y sẽn segd n maanã sẽn na yɩl n kõ y saam-biigã sugri, la y modg tɩ laafɩ le zĩnd y sʋka. c

13. Bõe n tõe n kɩt tɩ yɩ toog ne kãsem-dãmbã tɩ b ges b tẽed-n-taasã yelle?

¹³ Yaa vẽeneg t’a Pɩyɛɛr zɩ n yĩm goam nins a Zeezi sẽn togs-a a vʋʋgrã poorã  ye. A yeel-a lame yaa: “Kɩɩm mam pe-bi wã.” (Zã 21:16) Y sã n yaa kãsem-soaba, y miime tɩ yãmb me segd n tũu gom-kãensã. La tõe n yɩɩ toog ne kãsem-soab t’a paam sẽk n tʋm tʋʋm-kãngã sẽn tar yõod wʋsgã. Kãsem-dãmbã segd n deng n gesame tɩ b zagsã rãmb paam bũmb nins sẽn yaa tɩlɛ ne-bã, n wilg tɩ b nong-b lame, la b sõng-b tɩ b tẽebã kell n tall pãnga. Sẽn paase b lʋɩta taoor koɛɛgã mooneg pʋgẽ, la b segend sõss tigissã la tigis-kãsemsã yĩnga. Kãsem-dãmb kẽer naaga Seɛlasã (CLH) wall Ɛldese (LDC) wã. Kãsem-dãmbã sɩd tara tʋʋm wʋsgo!

14. Bõe n tõe n kɩt tɩ kãsem-dãmbã rat n ges b tẽed-n-taasã yelle? (1 Pɩyɛɛr 5:1-4)

¹⁴ A Pɩyɛɛr yeela neb nins sẽn yaa kãsem-dãmb wa yẽ wã tɩ b “kɩɩm Wẽnnaam bãgrã.” (Karm-y 1 Pɩyɛɛr 5:1-4.) Yãmb sã n yaa kãsem-soaba, d miime tɩ y nonga y tẽed-n-taasã, n dat n ges b yelle. La wakat ninga y tõe n getame tɩ y tʋʋmã yaa wʋsgo, wall y yaame n pa tõe n ges y tẽed-n-taasã yell sõma ye. Sã n yaa woto bõe la y tõe n maane? Togs-y-yã a Zeova bũmb ning sẽn be y sũurẽ wã. A Pɩyɛɛr yeelame: “Ned sã n sõngd neb a taaba, bɩ a teeg pãng ning Wẽnnaam sẽn kõtã n sõnge.” (1 Pɩy. 4:11) Y saam-biisã la y saam-bi-pogsã tõe n maooda ne zu-loees sẽn pa tar tɩɩm rũndã-rũndã. La tẽeg-y t’a Zeezi Kirist sẽn yaa “pe-kɩɩm-kãsengã” tõe n sõng-b lame n yɩɩd yãmba. A tõe n maana rẽ rũndã-rũndã, la dũni-paalgã pʋgẽ. Wẽnnaam sẽn dat bal yaa kãsem-dãmbã nong b tẽed-n-taasã, n get b yelle, la b yɩ “mamsg bãgrã yĩnga.”

15. Wãn to la kãsem-soab a ye get a Zeova bãgrã yelle? (Ges-y fotã me.)

¹⁵ A Wilyam sẽn yaa kãsem-soab hal sẽn kaoosã bãngame tɩ tigingã neb yell gesgã tara yõod wʋsgo. Koronavirisã bã-loangdgã sɩngr poore, yẽ ne tigingã kãsem-dãmb a taabã yãka yam tɩ semen fãa, bɩ kãsem-soab fãa modg n paam a koe-moonegã sull ned kam fãa kibare. A wilga bũmb ning sẽn kɩt tɩ b maan woto wã n yeele: “Koe-moondb wʋsg bee b zagsẽ wã b yembre, n tõe n wa tall tags-kɛga.” Saam-biig wall saam-bi-poak sã n wa maood ne zu-loɛɛga, a  Wilyam maagda a yĩng n kɛlg-a n bao n bãng bũmb ning sẽn pak-a wã, la a sẽn tõe n sõng-a to-to. Rẽ poore a baooda sɛba, wall video-rãmb sẽn be tõnd sɩtã pʋgẽ a sẽn tõe n tall n sõng a tẽed-n-taagã. A yeelame: “Yaa masã meng la d segd n ges d tẽed-n-taasã yell n yɩɩd pĩndã. D modgda wʋsg sẽn na yɩl n sõng nebã tɩ b bãng a Zeova. D segd n modga wʋsg woto me n sõng d tẽed-n-taasã tɩ b kell n pa sɩdã pʋgẽ.”

16. Wãn to la d tõe n tũ yam ning d sẽn paam a Pɩyɛɛr lɛta wã pʋgẽ wã?

¹⁶ D goma bũmb a wãn bal sẽn be a Pɩyɛɛr lɛta a yiibã pʋgẽ yelle. Tõe tɩ y yãa bũmb kẽer y sẽn dat n demse. Wala makre, y rat n wae n bʋgsda bark nins d sẽn na n paam dũni-paalgã pʋgẽ wã zug bɩ? Y yãka yam n na n moond koɛɛgã y tʋʋmã zĩigẽ, lekollẽ wã, wall segb y sẽn paam fãa sasa bɩ? Yãmb yãa bũmb toor-toor y sẽn tõe n maane, n maneg n wilg tɩ y nonga y tẽed-n-taasã wʋsg bɩ? Kãsem-dãmba, y yãka yam n na n ges a Zeova piisã yell ne yamleoog la ne y sũur fãa bɩ? Y sã n fees y meng ne pʋ-peelem, tõe tɩ y na n yãame tɩ bũmb kẽer la y segd n demse, la ra koms-y raood ye. “Zu-soabã yaa sõmblem soaba,” n na n sõng-y tɩ y tõog n demse. (1 Pɩy. 2:3) A Pɩyɛɛr yet-d lame yaa: “Wẽnnaam . . . na n baasa yãmb zãmsgã. A na n kɩtame tɩ y yals kãn-kãe. A na n kõo yãmb pãnga. A na n kɩtame tɩ y kɩ yẽg sõma.”—1 Pɩy. 5:10.

17. D sã n tõog toogo, la d bas t’a Zeova zãms-do, bark-bʋs la d na n paame?

¹⁷ Wakat n zĩnd t’a Pɩyɛɛr da getẽ t’a pa zems tɩ zĩnd ne Wẽnnaam Biigã ye. (Luk 5:8) La ne a Zeova la a Zeezi sõngre, a Pɩyɛɛr tõog n tũu Kiristã ne a sũur fãa. Rẽ n so t’a Pɩyɛɛr paam tɩ b kõ-a sor t’a “kẽ tõnd Zu-soab la d Fãagd a Zeezi Kirist Rĩungã sẽn ka sɛtã pʋgẽ.” (2 Pɩy. 1:11) Ad sɩd yaa keoor tɛkẽ! Yãmb me sã n tõog toog wa a Pɩyɛɛre, n bas t’a Zeova zãmsd-y-yã, y na n wa paama vɩɩm sẽn kõn sa tɩ yɩ y keoore. “Y tẽebã na n waa ne yãmb fãagre.”—1 Pɩy. 1:9.