M baaba ra yaa yel-gɛt Kanada tũudum a ye b sẽn boond tɩ Église Unie pʋgẽ. Hat daar fãa, a ra kɩtdame tɩ maam ne m yao-bi-pugl kẽng wẽnd-doogẽ wã n tɩ zãms Biiblã. Rẽ poore, d tũud-a lame tɩ d kẽng yibeoog wakat 11 pʋʋsgã. La zaabre, d tũuda m ma n kẽng Rĩungã roogẽ. Rẽ kɩtame tɩ d ra ne welgr ning sẽn be tũudum a yiibã sʋka.

M ma goma Biiblã yell ne a Bob la a Marion Hutcheson sẽn da yaa a zo-rãmbã, tɩ bãmb me wa sak sɩdã. Yʋʋmd 1958 wã, saam-biig a Hutcheson talla maam ne a pagã n paas a kom-dibli a tãabo, n kẽng La volonté divine tigis-kãsengã sẽn tigim tẽns toɛy-toɛy neb Niuyork soolmẽ wã. Tigis-kãsengã kaoosa rasem a nii. M sã n lebg n tagse, m neeme tɩ b modga wʋsg sẽn na yɩl n tall maam n kẽng tigis-kãsengã. La tigis-kãsen-kãng naaga bũmb nins m sẽn pa na n tol n yĩmã sʋka.

M sẽn wa n yaa bilfã, d ra tara pʋʋg n gʋʋnd rũmsi. M da nonga rũmsã yell gesgo. M da rat n karmame n wa lebg rũms logtore. M ma goma rẽ yell ne tigingã kãsem-soab a ye. A maaga a yĩng n tẽeg-m tɩ d vɩɩ “yaoolem wakatã.” A yeel-m lame tɩ m tags n ges m sã n kẽng inivɛrsite n tɩ karem n kaoose, pa tõe n wa sãam maam ne a Zeova zoodã sɩda?  (2 Tɩm. 3:1) Rẽ kɩtame tɩ m yãk yam n pa na n kẽng inivɛrsite ye.

M da sokda m meng bõe la m na n maan m bakã poore. Baa m sẽn da moond koɛɛgã wɩkɛnd fãa wã, m da pa maneg n nong koe-noogã mooneg ye. M da pa tagsd tɩ m tõe n yɩɩ so-pakd ye. M baaba ne m baaba-bil sẽn da pa tũud a Zeova wã ra sagenda maam tɩ m tɩ tʋm asirãns biru-kãseng a ye pʋgẽ Torõnto. M baaba-bil da tʋmda be, n yaa taoor soab a ye. Rẽ n so tɩ mam sak n tɩ tʋm be.

Torõnto, m da tʋmdame n yõsgd sigbã lɛɛre, la m da be ne neb sẽn pa tũud a Zeova. Rẽ kɩtame tɩ m da pa tõogd n kẽnd tigissã la m moond koɛɛgã wakat fãa ye. Sɩngrẽ wã, m da bee m yaab-raoog sẽn pa tũud a Zeova wã zakẽ. La a kaalmã poore, yɩɩ tɩlɛ tɩ m bao roogo.

Saam-biig a Hutcheson ne a pagã sẽn da tall maam n kẽng tigis-kãsengã yʋʋmd 1958 wã ra yaa wa m roagdba. B boola maam tɩ m wa zĩnd b zakẽ wã, la b sõng-m tɩ maam ne a Zeova zoodã le paam pãnga. Yʋʋmd 1960, maam ne b biig a John reega lisg daar-n-yɛnga. A John lebga so-pakda, tɩ keng m daood tɩ ma-me wɩng ne koɛɛgã moonego. Saam-biisã yãa mam modgrã, n yãk maam tɩ m lebg Wẽnnaam tʋʋmdã lekoll yel-gɛta. a

Yʋʋmd 1966, mam kẽe kãadem ne a Randi Berge. A ra yaa so-pakd sẽn tar yẽesem, n da rat ne a sũur fãa n tɩ sõng zĩig koe-moondb sẽn pa waooge. D tigims sull yel-gɛtã baoome n na n sõng tõndo. A sagl-d lame tɩ d tɩ sõng Orillia tigingã sẽn be Õntariyo wã. Rẽ n so tɩ d sag d teed n yik n tɩ zĩnd be.

D sẽn ta Orillia wã, ma-me lebga wakat fãa so-pakd wa a Randi. A sẽn da tar yẽesem to-to wã paasa ma-me yẽesmã. M sẽn da moond koɛɛgã ne m sũur fãa, n tar Biiblã n sõngd nebã tɩ b bãngd sɩdã la b wʋmd a võorã ra kõt-m-la sũ-noog wʋsgo. D sẽn tõog n sõng  pag ne a sɩd sẽn be Orillia tɩ b toeem n lebg a Zeova Kaset rãmbã sɩd yaa bark tɛkẽ.

D wa n kẽnga Torõnto, n yã saam-biig a Arnold MacNamara. A ra yaa saam-biis nins sẽn lʋɩt taoor Betɛllẽ wã nin-yende. A sok-d lame n ges d sã n dat n lebga zall so-pakdba. M leok-a-la zĩig pʋgẽ yaa: “N-ye! La d pa rat n kẽng Kebɛk ye!” Mam da tara tags-kɛg Kebɛk nebã sẽn gomd Farendã zugu, wa Kanada babg ning b sẽn gomd Ãngilindã nebã. Kebɛk nebã ra zabda ne goosneema wã n dat tɩ b soolmã welg ne Kanada n soog a menga.

A Arnold yeelame: “Masã, yaa Kebɛk bal la filyallã tʋmd zall so-pakdbã.” Zĩig pʋgẽ, m sakame tɩ d na n kẽng be. M da miime t’a Randi sũur na n yɩɩ noog ne be kẽndã. Kaoosg zugu, m yãame tɩ d sẽn yãk yam n kẽng be wã yɩɩ yam-yãkr sẽn yaa sõma wʋsgo.

D zãmsa Farendã semen a nu. Rẽ poore, maam ne a Randi n paas saam-biig a ye ne a pag kẽnga Rimuski. Rimuski bee Moreyall rɩtg sẽnese, na maan kɩlo 540. D ra ket n pa wʋmd buud-gomdã sõma ye. Rẽ yɩɩ vẽenega, daar a ye m sẽn wa n karemd koees tigsg sasa. Koeesã ra yetame tɩ tigis-kãsengã sasa, neb wʋsg n na n yi Otris n wa. La m sẽn karem to-to wã kɩtame tɩ yaa wa “nanend” wʋsg n na n wa.

D sẽn wa n be Rimuski wã, saam-bi-pogs a naas sẽn tar yẽesem la sẽn pa kẽ kãadem, n paas saam-biig a Huberdeau ne a pagã la b kom-pugli a yiib n wa n paas tõnd d naasã. Saam-biig a Huberdeau ne a pagã luwaasa ro-bedre, tɩ so-pakdb nins sẽn be be wã naagd taab n yaooda. D ra boonda roogã tɩ maison blanche bala ra yaa ro-peelle, t’a ra-lugsã me yaa pɛɛla. D ra wae n yaa 12 bɩ 14 ro-kãng pʋgẽ. Maam ne a Randi sẽn da yaa zall so-pakdbã, d ra nong n moonda koɛɛgã yibeoogo, zaabr la zĩ-sobdo. D sẽn da paam tɩ neb be wakat fãa n tõe n yãag tõnd baa waood wakatã ra noom-d-la wʋsgo.

Tõnd yõga zood sõma ne so-pakdb-kãens sẽn da maand sɩdã, hal tɩ d lebg wa zag-yɛng neba. Wakat ninga, d mi n yõgna bugum n karg n gũbg n sõsda, wall d naag taab n segl n dɩ. Saam-biig a ye n da mi yʋʋm-teed wẽebo. Rẽ n so tɩ sibr daar yʋngo, d ra wae n yɩɩndẽ la d saoodẽ.

Koe-moonegã ra womda biis Rimuski. Yʋʋm a nu pʋgẽ, d yãa Biibl karen-biis wʋsg sẽn modg n wa reeg lisgu, hal tɩ d sũur yɩ noogo. Tigingã koe-moondbã sõor wa n taa 35.

Kebɛke, b sõng-d lame tɩ d minimã paas wʋsg koɛɛgã mooneg wɛɛngẽ. Sẽn paase, d wa n nonga neb nins sẽn gomd Farendã, b buud-gomdã, la b minundã. Rẽ kɩtame tɩ d wa nong buud a taab minund me.—2 Kor. 6:13.

Filyallã wa n yeelame tɩ d yik n kẽng Trakadi hal tɩ ling-du. Trakadi bee Nouveau-Brunswick yaang sẽnese. Rẽ pa yɩ nana ye. Bala d ra luwaasa roog sẽn nan pa kaoose, tɩ ma-me ra kos lekoll a ye taoor soab n na n zãmsd kambã wakat-wakate. Sẽn paase, d Biibl karen-biis kẽer ra lebga koe-moondb sẽn nan pa kaoose, tɩ d ra sɩng Rĩung roog meeb me n ta pʋɩ-sʋka.

 Wɩkɛnnã tõre, d pʋʋsa d sẽn da segd n yik n tɩ zĩnd Trakadi wã yĩnga. D tɩ gesa tẽngã sẽn yaa toor ne Rimuski wã. La d yeelame t’a Zeova sẽn dat tɩ d kẽng be wã, d na n kẽngame. D maka a Zeova, n yã a sẽn sõng-d to-to tɩ d tõog n welg zu-loees buud fãa. (Mal. 3:10) So-kãngã yɛsa, a Randi tẽebã sẽn da tar pãngã, a sẽn da mongd a meng bũmb kẽerã, la a sẽn da mi n maand laadã sõngame tɩ d loogrã pa yɩ toog wʋsg ye.

Yaa a Robert Ross bal n da yaa kãsem-soab d tigin-paallã pʋgẽ. Yẽ ne a pag a Linda ra yaa so-pakdb be. B pipi biigã rogem poore, b yãka yam n na n kell n pa be. Baa ne b sẽn da get b biigã yellã, b sẽn deeg tõnd to-to wã, ne yẽesem ning b sẽn da tar koɛɛgã mooneg pʋgẽ wã kenga d raood wʋsgo.

Tõnd sẽn yɩ so-pakdb Trakadi yʋʋm a yiib poore, b kõ-d-la tʋʋmd hal tɩ ling-du. B yãka maam tɩ m lebg tigims sull yel-gɛta. D gilg n kaaga Ãngilind tigims yʋʋm a yopoe. Rẽ poore, b kɩtame tɩ d leb Kebɛke, n tɩ kaagd Farend tigimsi. A Léonce Crépeault sẽn da yaa distrik yel-gɛtã ra mi n pẽga maam m sõssã yĩnga. La kaoosg zugẽ, a ra wae n sokda maam yaa: “La fo sã n da wilg nebã bũmb ning takɩ b sẽn tõe n maane, pa são sɩda?” b A sẽn maan woto wã sõng-m lame tɩ m modg tɩ m sẽn zãmsd nebã to-to wã lebg takɩ, tɩ b wʋmd a võorã me nana-nana.

Tʋʋmd la b kõ maam tɩ m pa na n tol n yĩm a yell ye. Yɩɩ yʋʋmd 1978 Moreyall tigis-kãseng sẽn tigim tẽns toɛy-toɛy neb t’a gom-zugã yaa “La foi victorieuse” sasa. M da naaga neb nins sẽn segend rɩɩbã. D ra tagsdame tɩ neb tus-pis-nii n na n wa. Sẽn paase, b ra toeema bũmb wʋsg rɩɩbã seglg wɛɛngẽ. Bũmb fãa ra toeemame. Wala makre, ragendã teedo, rɩɩbã, la d sẽn na n segl to-to wã. D ra tara sẽn ta firgo-bɛd bãmb 20, la wakat ninga b ra pa tʋmd sõma ye. Tigis-kãsengã ket tɩ beoogã, d ra pa tõe n kẽ ɛstaadẽ wã tɩ sã n pa yʋn-sʋkã n ta ye. Bala ball la b ra tãood be daar-n-kãnga. La d ra segd n yõgna fuur-dãmbã n segl no-soakã nand tɩ beoogã vẽege. D ra yaame, la mam dɩka yam m tʋmd-n-taasã nengẽ. B ra tʋmda wʋsgo, n tar zʋg-sõma, la b maand laado. D  yõga zoodo, hal tɩ d zoodã kaoos n tãag rũndã. M sẽn naag n tʋm tʋʋm-kãngã sẽn tar yõod wʋsg Kebɛk tigis-kãsengã sasa wã kõ-m-la sũ-noogo. Kebɛk soolmẽ wã, b namsa d tẽed-n-taasã b tũudmã yĩnga, yʋʋmd 1940 ne yʋʋmd 1950 wã sʋka.

M dɩka yam wʋsg yel-gɛtb a taabã nengẽ, Moreyall tigis-kãsemsã sasa. Yʋʋmd n zĩnd t’a David Splane sẽn yaa Siglgã taoor lʋɩtb Sull ned rũndã-rũndã wã ra yaa tigis-kãseng yel-gɛta. Tigis-kãseng a to sasa, yɩɩ maam la b yãk-yã, t’a David sõng maam wʋsgo.

Yʋʋmd 2011 wã, b yãka maam tɩ m lebg tigimsã kãsem-dãmb lekoll karen-saamba. Rẽ tɩ d sẽn sɩng tigimsã kaagr taa yʋʋm 36. Yʋʋm a yiib pʋgẽ, maam ne a Randi gãanda rot 75 pʋsẽ. La d modgrã pa yɩ zaalem ye. Semen fãa baasgẽ, kãsem-dãmbã ra wilgdame tɩ b sũy nooma wʋsgo, b sẽn ne tɩ Siglgã taoor lʋɩtb Sullã geta b tẽebã yell sõma wã.

Rẽ poore, m lebga Rĩungã koe-moondb lekoll karen-saamba. Karen-biisã ra mi n yaame, n maand yɩɩr tʋʋmã sẽn yaa wʋsgã yĩnga. Daar fãa b ra segd n zĩnda karen-doogẽ wã n maan lɛɛr a yopoe la bala, tɩ zaabr fãa bɩ b karem lɛɛr a tãabo. Semen fãa, b ra kõta karen-biig fãa sõss a naas bɩ a nu. Maam ne karen-saamb a to wã yeel-b lame tɩ sã n pa tũ ne a Zeova sõngre, b pa na n tõog ye. M pa na n tol n yĩm karen-biisã sũy sẽn da noom to-to, b sẽn ne tɩ b sẽn teeg a Zeova wã, b tõogd n maanda sẽn yɩɩd b sẽn da tẽedã ye.

M ma sẽn da wilgd tɩ neb a taabã yell pak-a lame wã, sõnga a Biibl karen-biis tɩ b tẽebã pãng paase, la sõng m baaba me t’a bʋk bilfu. M ma sẽn maan kaalmã rasem a tãab poore, m baaba waa Rĩungã roogẽ n kelg sõsga, hal tɩ ling-du. Rẽ poore, a kell n waa tigissã yʋʋm 26. Baa ne m baaba sẽn pa tol n deeg lisgã, kãsem-dãmbã yeela maam tɩ semen fãa, yẽ n da tat Rĩungã roogẽ pipi.

Mam tãp a tãabã ne b sɩdbã fãa tũuda a Zeova ne b sũy fãa. A yiib n tʋmd Betɛllẽ wã. A ye yaa Portigalle, t’a to wã yaa Haiti.

Rũndã-rũndã, maam ne a Randi yaa zall so-pakdb n be Hamilton sẽn be Õntariyo wã. Mam sẽn wa n yaa tigims sull yel-gɛtã, d ra yãagda d tẽed-n-taasã, tɩ b kẽnd n maand lebg-n-tɩ-ges-rãmb la Biibl zãmsgo. La masã, d sũy nooma wʋsg d sẽn ne d meng Biibl karen-biisã tẽeb sẽn bɩtã. D sẽn wa n baood n bãngd d tigin-paallã nebã, n ne a Zeova sẽn sõngd-b to-to noog la toog wakatã, kenga d raoodo.

D sã n tags sẽn loogã yelle, d sũur nooma wʋsgo, neb wʋsg sẽn wilg tɩ d yell pak-b lame wã. Tõnd me wilgdame tɩ d tagsda d taabã yelle, n kengd b raood sẽn na yɩl tɩ b tʋm a Zeova tʋʋmã wa b sẽn tõe tɛka. (2 Kor. 7:6, 7) Wala makre, zak a ye pʋgẽ, pagã, bi-riblã la bi-puglã yaa wakat fãa so-pakdba. M soka zakã soab n ges a sã n zoe n tagsa so-pakrã yelle, t’a yeel t’a zoe n teenda so-pakdb a tãabo. M sok-a lame yaa: “Fo tõe n teel-b lame n yɩɩd a Zeova sɩda?” M sagl-a lame t’a bao n paam sũ-noog ning b sẽn tarã. Kiuug a yoob poore, a lebga so-pakda.

Maam ne a Randi na n kell n goma a Zeova “tʋʋm-kãsemsã” yell ne “zãmaan ning sẽn pʋgdã,” la d saagdẽ tɩ b na n paama sũ-noog a Zeova tʋʋmdã pʋgẽ wa tõndo.—Yɩɩn. 71:17, 18.