1. Y sẽn wa n sɩng Biiblã zãmsgã, bõe la y bãng-yã?

 YÃMB tẽra y sẽn wa n sɩng Biiblã zãmsgã bɩ? Tõe tɩ y sẽn bãng tɩ Wẽnnaam tara yʋ-peellã ling-y lame. Tõe tɩ y sẽn bãng tɩ Wẽnnaam pa sɩbgd neb bug-tẽngã yɩ-y-la noogo. Tõe tɩ y sẽn wa n bãng tɩ y na n le wa yãa y neb nins sẽn maan kaalmã, tɩ y naag taab n vɩɩmd tẽngã sẽn na n lebg arzãnã zugã me yɩ-y-la noogo.

2. Y sẽn da bãngd Biiblã n paasdẽ wã sẽn yãk a toogo, bõe la y ra maand tɩ wilgdẽ tɩ y bɩtame? (Efɛɛz rãmbã 5:1, 2)

² Y sẽn wɩng ne Wẽnnaam Gomdã zãmsgã, y sẽn da nong a Zeova to-to wã pãng ra paasdame. Nonglem-kãng kɩtame tɩ y sɩng bũmb ning y sẽn da zãmsdã tũubu. Y sɩngame n tikd Biiblã saglsã n yãkd yam sẽn yaa sõma. Y ra toeemda y manesmã la y tʋʋm-tʋmdɩ wã, y sẽn da rat n ta Wẽnnaam yamã yĩnga. Y sɩngame n dɩkd y Ba sẽn be saasẽ wã togs-n-taare, wa biig sẽn dɩkd a ba sẽn nong-a togs-n-taar to-to wã.—Karm-y Efɛɛz rãmb 5:1, 2.

3. D tõe n soka d mens sogs-bʋse?

³ D tõe n soka d meng yaa: ‘Mam sẽn nong a Zeova to-to masã wã pãng yɩɩda m sẽn wa n lebg kiris-ned paalmã bɩ? Mam lisgã tɛka, mam tagsa wã la m manesmã maneg n wõnda a Zeova rẽndã bɩ? Sẽn yɩɩd fãa, m wilgda m tẽed-n-taasã tɩ m nong-b-la wa a Zeova bɩ?’ ‘Nonglem ning yãmb sẽn da tar sɩngrẽ wã’ sã n booga bilfu, bɩ y ra koms raood ye. A buud paama pipi kiris-neb kẽere. A Zeezi pa raag-b n base, a pa na n daag tõnd me n bas ye. (Vẽn. 2:4, 7) A miime tɩ d tõe n le paama nonglem ning d sẽn da tare, d sẽn wa n bãng sɩdã paalmã.

4. Bõe yell la d na n gom sõs-kãngã pʋgẽ?

 ⁴ Sõs-kãngã pʋgẽ, d na n yãa d sẽn tõe n ket n paasd d sẽn nong a Zeova la neb a taabã to-to. Rẽ poore, d na n yãa bark nins tõnd ne neb a taabã sẽn na n paame, d sã n paas d nonglmã pãnga.

5-6. Zu-loe-bʋs la tẽn-tʋmd a Poll seg a tʋʋmdã pʋgẽ, la bõe n sõng-a t’a kell n tũ a Zeova?

⁵ Tẽn-tʋmd a Poll ra paamda sũ-noog a Zeova tʋʋmdã pʋgẽ, la a sega zu-loees wʋsgo. A Poll toga sor naoor wʋsg n zãag zĩiga, tɩ so-toak yaool n da pa nana wakat kãng ye. A Poll so-toak kẽer sasa, a “paama zu-loees kʋɩls zutu,” la a “paam zu-loees fãadb nusẽ.” Wakat n zĩnd tɩ kɩɩsdb pãb-a. (2 Kor. 11:23-27) Sẽn paase, ra pa wakat fãa la a Poll tẽed-n-taasã wilg tɩ b sũur nooma ne modgr ning a sẽn maand n sõngd-bã ye.—2 Kor. 10:10; Fili. 4:15.

⁶ Bõe n sõng a Poll t’a kell n tʋm a Zeova tʋʋmdã? Bũmb ning a Poll sẽn karem Gʋls-sõamyã pʋgẽ wã, ne bũmb ning sẽn paam-a wã sõng-a lame t’a bãng bũmb wʋsg a Zeova zugu. Kɩtame t’a kɩs sɩd tɩ Wẽnnaam a Zeova nong-a lame. (Rom. 8:38, 39; Efɛɛ. 2:4, 5) Kɩtame me t’a nong a Zeova wʋsgo. A Poll ra ‘sõngda nin-sõamyã wã la a ra ket n sõngd-ba,’ n wilgdẽ t’a nonga a Zeova.—Ebre. 6:10.

7. Bõe la y tõe n maan n paas y sẽn nong a Zeova to-to wã pãnga?

⁷ D sã n maagd d yĩng n zãmsd Wẽnnaam Gomdã, d sẽn nong-a to-to wã pãng na n paasdame. Y sã n wa karemd Biiblã, bɩ y bao n bãng y sẽn karemdã sẽn sõngd yãmb tɩ y bãng bũmb ning a Zeova zugu. Sok-y y meng yaa: ‘Wãn to la kiba-kãngã wilgd t’a Zeova nong-m lame? Bõe n be kibarã pʋgẽ n wilgdẽ tɩ m segd n nonga a Zeova?’

8. Wãn to la pʋʋsgã tõe n sõng tõnd tɩ d maneg n nong Wẽnnaam?

⁸ Bũmb a to d sẽn tõe n maan n paas d sẽn nong a Zeova to-to wã pãnga, yaa d sẽn na n pelgd d pʋg n pʋʋsd-a wakat fãa. (Yɩɩn. 25:4, 5) Woto, a Zeova na n leokda d pʋʋsgã. (1 Zã 3:21, 22) Aazi saam-bi-poak yʋʋr sẽn boond t’a Kan yeelame: “Sɩngrẽ wã, yaa bũmb nins m sẽn bãng a Zeova zugã n kɩt tɩ m nong-a. La m sẽn wa n yã a sẽn leokd m pʋʋsgã to-to wã, kɩtame tɩ m maneg n nong-a. Rẽ kɩtame tɩ m tʋll n maan sẽn noom-a.” b

9. Wãn to la a Tɩmote wilg t’a nonglmã pãng ra paasdame?

⁹ Yʋʋm a wãn a Poll sẽn lebg kiris-nedã poore, a bãnga bi-bɩɩg a ye yʋʋr sẽn boond t’a Tɩmote. A Tɩmote ra nonga a Zeova la nebã. A Poll yeela Filip kiris-nebã yaa: “Mam pa tar ned a to sẽn tar yam-sõng wa [a Tɩmote] sẽn na n ges yãmb yell sõma ye.” (Fili. 2:20) Vɛrse-kãngã pʋgẽ, a Poll pa gomd a Tɩmote sẽn tar minim n tõe n sigl yɛl sõma, bɩ n tõe n wɛgs sõsg zãma taoor sõma yell ye. La a Poll da nee vẽeneg t’a Tɩmote nonga saam-biisã la saam-bi-pogsã wʋsgo. Sãmbg sẽn kae, tigims nins a Tɩmote sẽn da kaagdã neb ra gũuda a waoongã ne yãgbo.—1 Kor. 4:17.

10. Bõe la a Ana ne a sɩdã maan n wilg tɩ b nonga b tẽed-n-taasã?

¹⁰ Tõnd me baooda d sẽn tõe n maan to-to, n sõng d tẽed-n-taasã. (Ebre. 13:16) D  gom a Ana sẽn yaa saam-bi-poak ning yell d sẽn gom sõsg ning sẽn loogã pʋgẽ wã yelle. Sob-kãseng sẽn fug poore, yẽ ne a sɩdã tɩ kaaga b tẽed-n-taase, n mik tɩ sobgã fõka b roogã. Rẽ kɩtame tɩ zakã rãmb pa le tar fu-yɩlem ye. A Ana yeelame: “D wʋka b futã n tɩ peke, n paas la d kʋ n wa kõ-ba. Tõnd ra getame tɩ d sẽn maanã pa zem baa fʋɩ, la rẽ kɩtame tɩ d zoodã paam pãng hal n tãag masã.” A Ana ne a sɩdã sẽn nong b tẽed-n-taasã kɩtame tɩ b maan bũmb takɩ n sõng-ba.—1 Zã 3:17, 18.

11. a) D sã n wilgdẽ tɩ d nonga d taabã, wãn to la b get rẽ? b) Sã n yaa ne Yel-bũn 19:17 wã, d sã n wilgdẽ tɩ d nonga d taabã, wãn to la a Zeova get rẽ?

¹¹ D sã n nong d taabã la d maand-b neere, b na n neeme tɩ d modgdame n dɩkd a Zeova togs-n-taare. B sũur na n yɩɩ noog ne d sõmblmã, baa d sã n pa miẽ. A Kan sẽn yaa saam-bi-poak ning yell d sẽn zoe n gomã mi n tẽega neb nins sẽn sõng-a wã yelle, hal t’a sũur noomẽ. A yeelame: “Mam sũur nooma ne saam-bi-pogs nins fãa sẽn da mi n tall maam tɩ d tɩ moon koɛɛgã. B ra mi n wa rɩk-m lame tɩ d tɩ rɩ, la b lebg n wa sik-m ne laafɩ. Masã m miime tɩ rẽ maaneg ra pa nana ne-b ye. La b ra maanda rẽ ne sũ-noogo.” Yaa sɩd tɩ pa nebã fãa n na n pʋʋs tõnd bark bũmb nins d sẽn maan n kõ-bã yĩng ye. A Kan goma neb nins sẽn sõng-a wã yell n yeel yaa: “Mam sẽn dat yaa m maan-b neer n lebse, bõn-sõma nins fãa b sẽn maan n kõ maamã yĩnga. La m pa mi b fãa sẽn be zĩig ning rũndã-rũndã ye. La a Zeova miime. M pʋʋsd-a lame n kotẽ t’a keo-b n kõ-ma.” A Kan goamã yaa sɩda. A Zeova nee bõn-sõma nins d sẽn maand d taabã yĩngã, baa sã n yaa bilfu. A geta rẽ wa maoong sẽn tar yõod wʋsgo, la wa samd a sẽn na n yao.—Karm-y Yel-bũn 19:17.

12. Wãn to la saam-biisã tõe n wilg tɩ b nonga tigingã nebã? (Ges-y fot-rãmbã me.)

 ¹² Yãmb sã n yaa saam-biiga, wãn to la y tõe n wilg tɩ y nonga y taabã, la y bao n sõng-ba? Bi-bɩɩg a ye yʋʋr sẽn boond t’a Zordan soka kãsem-soab n na n bãng a sẽn tõe n maan to-to n maneg n sõng tigingã nebã. Kãsem-soabã pẽg-a-la bũmb nins a sẽn zoe n maandẽ wã yĩnga, la a kõ-a sagls a wãn a sẽn tõe n maan n paasã wɛɛngẽ. Wala makre, kãsem-soabã sagla a Zordan t’a tat pĩnd Rĩungã roogẽ n pʋʋsd neb a taabã, t’a zẽkd a nug n kõt leoore, t’a naagd a koe-moonegã sull n moond n pa vaandẽ, la a tags n ges bũmb takɩ a sẽn tõe n maan n sõng neb a taabã. A Zordan sẽn tũ saglgã a bãnga a sẽn tõe n maan bũmb kẽer to-to, la a yãame me t’a sẽn nong a tẽed-n-taasã to-to wã pãng paasame. A Zordan bãngame tɩ pa saam-biig sẽn wat n lebg kãsem-sõngd la a sɩngd neb a taabã sõngr ye. A kelld n sõngd-b lame.—1 Tɩm. 3:8-10, 13.

13. Wãn to la nonglmã kɩt tɩ saam-biig yʋʋr sẽn boond t’a Kirisiyã sak n le yɩ kãsem-soaba?

¹³ La y sã n da yaa kãsem-sõngd wall kãsem-soaba, tɩ b reeg y tʋʋmdã n bas-y yẽ? A Zeova tẽra tʋʋm nins y sẽn tʋm pĩndã, la nonglem ning sẽn kɩt tɩ y tʋm tʋʋm-kãensã. (1 Kor. 15:58) A nee y sẽn ket n tar nonglem ningã me. Saam-biig yʋʋr sẽn boond t’a Kirisiyã ra yaa kãsem-soaba, tɩ b reeg tʋʋmdã n bas-a hal t’a sũurã sãam wʋsgo. Baa ne rẽ a yeelame: “M yãka yam n na n maan m sẽn tõe fãa a Zeova tũudmã pʋgẽ ne nonglem, m yaa kãsem-soab tɩ m pa kãsem-soaba.” B le wa n yãk-a lame t’a lebg kãsem-soaba. A Kirisiyã yeelame: “B sẽn wa n le yãk maamã, m da maanda yɩɩr bilfu. La m yeela m meng yaa: A Zeova sẽn yaa  nimbãan-zoɛtã sã n dat tɩ m le yɩ kãsem-soaba, m na n saka m sẽn nong yẽ la m tẽed-n-taasã yĩnga.”

14. Yam-bʋg la y rɩk Zorzi saam-bi-poakã sẽn yeel bũmb ningã pʋgẽ?

¹⁴ A Zeova Kaset rãmbã wilgdame tɩ b nonga neb a taabã me. (Mat. 22:37-39) Wala makre, Zorzi saam-bi-poak yʋʋr sẽn boond t’a Elena yeelame: “Sɩngrẽ wã, m da moonda koɛɛgã m sẽn nong a Zeova wã yĩng bala. La m sẽn da nong m saasẽ Ba wã to-to wã pãng sẽn da paasdã, m sẽn da nong neb a taabã to-to wã me pãng ra paasdame. M maagda m yĩng n tags n ges zu-loees nins b sẽn segdã, la m bao n bãng bũmb ning yell m sẽn na n gom tɩ yɩ-b noogo. M sã n tagsd b yell woto, kɩtdame tɩ m maneg n dat n sõng-ba.”—Rom. 10:13-15.

15-16. D sã n wilgdẽ tɩ d nonga d taabã bark-bʋs la d na n paame, wa fot-rãmbã sẽn wilgdã?

¹⁵ D sã n wilgdẽ tɩ d nonga d tẽed-n-taasã, pa bãmb bal la nafd ye. Koronavirisã bã-loangdgã sɩngr poore, saam-biig yʋʋr sẽn boond t’a Paolo ne a pagã sõnga saam-bi-pogs wʋsg sẽn kʋʋle, tɩ b bãng b sẽn tõe n tũnug ne b portaabl-dãmbã la b ordinatɛɛr-dãmbã to-to n moon koɛɛgã. Saam-bi-poak a ye sẽn da get tɩ yaa toog t’a tũnug ne a portaablã bɩ a ordinatɛɛrã n moon koɛɛgã wa n tõogame. A tõog n boola a roagdb tɩ b wa  a Zeezi kũumã tẽegre. B sʋkã, bãmb pis-yoob n tũnug ne videokõnferãns maasem n kelg sõsgã! A Paolo ne a pagã modgrã nafa saam-bi-poakã ne a roagdbã fãa. Saam-bi-poakã wa n gʋlsa a Paolo n yeel yaa: “Y bark wʋsg y sẽn zãms tõnd a sẽn kʋʋl-bã. M pa na n tol n yĩm a Zeova sẽn ges d yell to-to wã, la y sẽn modg wʋsg n sõng-dã ye.”

¹⁶ Bũmb ning sẽn maanã sõnga a Paolo t’a bãng bũmb sẽn tar yõod wʋsgo. Tẽeg-a lame tɩ nonglem tara yõod n yɩɩd bãngr wall minim. A yeelame: “Mam da yaa tigims sull yel-gɛta. Rũndã-rũndã, m bãngame tɩ baa koe-moondbã sã n yĩma sõss nins m sẽn wɛgsã, b ket n tẽra bũmb nins m sẽn maan n sõng-bã yelle.”

17. D sã n wilgdẽ tɩ d nonga d taabã, nafda ãnda me?

¹⁷ D sã n wilgdẽ tɩ d nonga d taabã, tõe n nafa tõnd mengã. A Zonatã sẽn be Nuvɛll Zelãndã kɩsa sɩd ne rẽ. Sibr a ye zaabr zĩigã sẽn da tʋʋl bilfu, a yãa so-pakd sẽn moond sorã noore. A Zonatã yãka yam n na n naagd so-pakdã n moond sibr zaabr fãa. Wakat kãnga, a ra pa mi a maan-neerã sẽn na n naf yẽ mengã to-to wã ye. A Zonatã yeelame yaa: “Hal n tãag wakat kãnga, m da pa nong koe-moonegã woto ye. La m sẽn da kelgd so-pakdã sẽn moond to-to wã, la m ne a koe-moonegã sẽn womd biisã, kɩtame tɩ ma-me wa nong koɛɛgã moonego. Sẽn paase a lebga m zoa hakɩɩka, n sõng maam tɩ m wa nong koe-moonegã, la m kolg a Zeova n paase.”

18. Bõe la a Zeova rat tɩ d maane?

¹⁸ A Zeova ratame tɩ d fãa maneg n nong yẽ la d nong d taabã. D yãame tɩ d sã n karemd a Zeova Gomdã la d bʋgsdẽ, la d pʋʋsd-a wakat fãa, d na n paasa d sẽn nong-a to-to wã pãnga. D sã n maand bũmb toor-toor n sõngd d tẽed-n-taasã, d na n maneg n nong-b lame. D nonglmã pãng sã n paasdẽ, d na n kolgda a Zeova la d tẽed-n-taasã n paasdẽ. Sẽn paase, d zoodã na n paa wakat sẽn kõn sa!