BABILON raboogẽ wã, tẽn-vaeesdbã tu n bugsa tãn-koɛɛm wʋsg b sẽn tall n me tẽngã. Yaa tãn-koɛɛm b sẽn wʋme. Tẽn-vaeesd a Robert Koldewey yeelame tɩ b ra wʋmda tãn-koeem-kãens “tẽngã kɩrenga, zĩig tãnd sẽn yaa sõma la raad . . . wʋsg sẽn be, tɩ b tõe n tall n yõgen bugum.”

Tẽn-vaeesdbã yãa bũmb toor-toor sẽn wilgd tɩ Babilon nanambsã ra tara wʋmsã n tʋmd tʋʋm-beed me. A Paul-Alain Beaulieu sẽn yaa Torõnto inivɛrsite karen-saambã yeelame: “Sɛb wʋsg b sẽn gʋls ne Babilon buud-gomdã pʋsẽ, b wilgame tɩ rĩmã ra mi n kõo noor tɩ b yõog ned a sẽn yaa tõata, wall a sẽn paoog Babilon wẽnnaam-dãmbã yĩnga.” Gʋlsem b sẽn gʋls rĩm a Nebukadnezaar wakatẽ wã yeelame: “Sãam-y-ba. Yõog-y-ba. Sẽ-y-b . . . wʋngã pʋgẽ. . . . Kɩt-y tɩ b bug-zõosã ruki. Kɩt-y tɩ bugmã rɩ b sũ-puugrã zãnga.”

Rẽ kɩtdame tɩ neb nins sẽn karemd Biiblã tẽegd kibar ning sẽn be Dãniyɛll sak a 3 pʋgẽ wã. Be, b yeelame tɩ rĩm a Nebukadnezaar maana sãnem bõn-naandg sẽn yaa bedr Duura tẽn-nabrẽ wã, Babilon tẽngã kɩrenga. A Sadrake, a Mesak la a Abɛɛdnego sẽn yaa Ebre kom-bɩɩs a tãabã sẽn zãgs tɩ b kõn wõgemd bõn-naandgã taoorã, a Nebukadnezaar sũurã puugame t’a yeel tɩ b wɩng wʋngã “naoor a yopoe n yɩɩd raasenkamã,” n dɩk kom-bɩɩs a tãabã “n lob wʋngã sẽn wɩng wʋsgã pʋgẽ.” Malɛk sẽn tar pãng n fãag-b tɩ b pa ki ye.—Dãn. 3:1-6, 19-28.

Babilon tãn-koɛɛmã me wilgdame tɩ Biiblã sẽn yet bũmb ningã yaa takɩ. Tãn-koɛɛm kẽer zutu, b gʋlsa goam sẽn kilsd rĩmã. Wala makre, a ye zugu, b gʋlsame yaa: “Maam a Nebukadnezaar sẽn yaa Babilon rĩmã . . . Na-yirã maam a rĩm-kãsengã sẽn me wã . . . Bɩ m kambã la m yagensã pa a pʋgẽ wakat fãa yĩnga.” Gom-kãensã wõnda goam nins sẽn be Dãniyɛll 4:30 pʋgẽ wã. Be, a Nebukadnezaar wuka a meng n yeel yaa: “Pa Babilon sẽn yaa kãsengã mam mengã sẽn me na-yirã yĩngã la woto sɩda? Mam me-a-la ne m meng pãng la m tõogo, mam naamã ziir yĩnga.”