Karemdbã sogsgo
Wãn to la yʋʋmd 2020 sigr kiuug Gũusg Gasgã sõsg ning gom-zug sẽn yaa “Bɩ yãmb yʋʋr paam waoogrã” sõng tɩ d maneg n wʋm a Zeova sẽn tar sor n na n dɩ naam, la a yʋʋrã sẽn segd ne waoogrã võore?
Sõs-kãng pʋgẽ, b wilgame tɩ sɩd-sɩda, yel-kãseng n pak malɛgsã ne ninsaalbã fãa: Yaa a Zeova yʋ-kãsengã na paam waoogrã. Wilg t’a Zeova n tar sor n na n yɩ yĩngr la tẽng naabã, rat n yeel tɩ wilg t’a sẽn dɩt a naamã to-to wã la sõma n yɩɩdã naaga yel-kãseng-kãng pʋgẽ. Ninsaalbã na kell n maan sɩd ne a Zeova wã me naaga yel-kãseng-kãng pʋgẽ.
Bõe yĩng tɩ d yetẽ masã tɩ yaa a Zeova yʋʋrã n paas a yʋʋrã na paam waoogrã n yaa yel-kãseng n tɩ yɩɩda? Bɩ d gom bũmb a tãab yelle.
Kɩɩsgã sẽn zĩnd Edɛn zẽedẽ wã tɛka, a Sʋɩtãan kãnda Wẽnnaam
Pipi, a Sʋɩtãan sãama a Zeova yʋʋrã Edɛn zẽedã zĩigẽ. A Sʋɩtãan sẽn sok a Awa sokr ningã rat n yeelame t’a Zeova pa kõata, la tɩ noy nins a sẽn kõ a Ãdem ne a Awa wã pa tɩrs ye. Rẽ poore, a Sʋɩtãan kɩɩsa a Zeova goamã, tɩ yaa wa Wẽnnaam yagda ziri. A sẽn maan woto wã, a sãama a Zeova yʋʋrã. A lebga “Sʋɩtãana,” rat n yeel tɩ “munaafɩɩka.” (Zã 8:44) A Awa sẽn tẽ a Sʋɩtãan zirẽ-beedã a kɩɩsa Wẽnnaam, tɩ wilgdẽ t’a pa rat t’a yɩ a naab ye. (Sɩng. 3:1-6) Hal n tãag rũndã, a Sʋɩtãan ket n sãamda Wẽnnaam yʋʋrã, n yagd ziri a Zeova sẽn yaa Wẽnnaam ning buudã wɛɛngẽ. Neb nins sẽn tẽed ziri-kãensã wae n kɩɩsda a Zeova. Rẽ n so tɩ Wẽnnaam nin-buiidã nifẽ, b sẽn sãamd a Zeova yʋ-sõngã yaa wẽng wʋsgo. Rẽ n yaa namsgã la wẽng buudã fãa sẽn be dũniyã zugã yẽgre.
Yiibu, bõn-naandsã fãa neer yĩnga, a Zeova na n wilgame tɩ b sẽn kãnegd-a wã fãa yaa ziri, n kɩt t’a yʋʋrã paam waoogre. Rẽ n yaa bũmb ning sẽn tar yõod wʋsg n yɩɩd a Zeova nifẽ. Rẽ n so t’a yeel yaa: “Hakɩɩka, mam na n waooga m yʋ-kãsengã.” (Eze. 36:23) A Zeezi wilga bũmb ning sẽn segd n tall yõod ne neb nins sẽn tũud a Zeova wã fãa, tɩ b segd n wilgd rẽ b pʋʋsgã pʋgẽ. A yeelame: “Bɩ yãmb yʋʋr paam waoogre.” (Mat. 6:9) Biiblã pʋgẽ, b wilga naoor wʋsg t’a Zeova yʋʋrã waoogr tara yõodo. Ad makr a wãna: “Kõ-y-yã a Zeova ziir ning a yʋʋrã sẽn segd ne wã.” (1 Kib. 16:29; Yɩɩn. 96:8) “Yɩɩl-y n pẽg-y-yã a yʋʋrã sẽn tar ziirã.” (Yɩɩn. 66:2) “Mam na n pẽga yãmb yʋʋrã wakat fãa yĩnga.” (Yɩɩn. 86:12) Vugr a Zeova sẽn pa saasẽ n gom yɩɩ Zerizalɛm wẽnd-doogẽ wã, a Zeezi sẽn wa n yeele: “M Ba, waoog-y y yʋʋrã.” A Zeova leokame yaa: “Mam waoog-a lame, la m na n le waoog-a lame yɛsa.”—Zã 12:28. a
Tãabo, wakat fãa, a Zeova raabã tara loees ne a yʋʋrã. Tags-y n ges-y-yã: Yaoolem makrã sẽn na n zĩnd Kiristã naamã sẽn na n kaoos yʋʋm tusrã saabẽ wã poore, bõe n na n pʋgle? Wakat kãnga, malɛgsã ne ninsaalbã fãa manesem na n yɩɩ wãn ne a Zeova yʋʋrã? Sẽn na yɩl n paam sok-kãngã leoore, bɩ d lebg n tẽeg bũmb a yiibã yelle: Yaa ninsaalbã na maan sɩdã, la a Zeova sẽn tar sor n na n yɩ yĩngr la tẽng naabã. Wakat kãnga, pa na n le yɩ tɩlɛ tɩ ninsaalbã wilg tɩ b maanda sɩd ne a Zeova ye. Rẽ tɩ b yaa neb sẽn zems zãnga, tɩ pa le yaa tɩlɛ tɩ b mak-b me ye. B na n paama vɩɩm sẽn ka sɛta. Sẽn paase, pa na n le yɩ tɩlɛ tɩ b bao n wilg t’a Zeova sẽn dɩt a naamã to-to wã la sõma n yɩɩd ye. Wakat kãnga, sẽn be-b saasẽ wã la sẽn be-b tẽngã zugã fãa na n zemsda taaba, la b sak tɩ yaa a Zeova n tar sor n na n dɩ naam. La a Zeova yʋʋrã na n ket n yaa bũmb ning sẽn tar yõod n yɩɩd ne a nin-buiidã bɩ?
Rẽ tɩ lebga vẽeneg t’a Zeova yʋʋrã sɩd yaa sõngo, la tɩ b sẽn da kãnd-a wã fãa yaa ziri. La a Zeova yʋʋrã n na n ket n yaa bũmb ning sẽn tar yõod n yɩɩd ne sẽn be-b saasẽ la tẽngã zugã. Bõe yĩnga? Bala b na n nee a Zeova sẽn ket n maand bõn-kãsemse. Tags-y n ges-y-yã: A Zeezi sẽn na n sik a meng n lebs a Zeova naamã yĩnga, Wẽnnaam na n lebga “bũmb fãa nebã fãa yĩnga.” (1 Kor. 15:28) Rẽ poore, ninsaalbã sẽn be tẽngã zugã na n “paama Wẽnnaam kambã lohormã sẽn be ziirã.” (Rom. 8:21) A Zeova na n pidsa a sẽn sɩng n dat tɩ sẽn be-b saasẽ wã la tẽngã zugã zemsd taaba, n lebg zag-yɛng nebã.—Efɛɛ. 1:10.
Bõn-kãensã fãa sã n wa maane, a Zeova zakã rãmb sẽn be saasẽ la tẽngã zugã manesem na n yɩɩ wãna? Yaa vẽeneg tɩ d na n ket n data ne d sũur fãa n pẽgd a Zeova yʋʋrã. Wẽnnaam vẽnega yɩɩn-gʋlsd a Davɩɩd t’a yeel yaa: “Bɩ Wẽnnaam a Zeova . . . paam pẽgre. . . . Bɩ a yʋʋrã sẽn tar ziirã paam pẽgr wakat fãa yĩnga.” (Yɩɩn. 72:18, 19) D na n ket n yãta bõn-paals sẽn be yamleoog sẽn na n kɩt tɩ d rat n pẽgd-a wakat fãa yĩnga.
Togs sɩdã, a Zeova yʋʋrã bilgda bũmbã fãa a mengã zugu. Sẽn yɩɩd fãa, a yʋʋrã tẽegda tõnd t’a yaa nonglem. (1 Zã 4:8) D na n ket n tẽegda wakat fãa tɩ yaa a Zeova nonglmã yĩng n kɩt t’a naan tõndo, la a sak t’a Zeezi wa ki tɩ yɩ maoong tõnd yĩnga. D na n tẽegdame me tɩ yaa a nonglmã yĩng la a sẽn wilg t’a sẽn dɩt a naamã to-to wã la sõma n yɩɩdã. A Zeova na n ket n wilgda tõnd a nonglmã wakat fãa yĩnga. D na n dat n pẽnegd-a-la a sẽn yaa d Ba wã yĩnga, la d yɩɩnd n pẽgd a yʋ-kãsengã wakat sẽn kõn sa yĩnga.—Yɩɩn. 73:28.
