1. Bõe yĩng tɩ Babilon nebã yã tɩ no-rɛɛs a Dãniyɛll yaa toor ne neb a taabã?

 BABILON nebã sẽn wa n na n tall no-rɛɛs a Dãniyɛll n kẽng yembd Babilon t’a zãag ne a ba-yirã, rẽ t’a yaa bi-bɩɩga. Baa a Dãniyɛll sẽn da yaa bi-bɩɩgã, Babilon nebã yãame t’a yaa toor ne neb a taabã. B ‘gesa nif sẽn ne’ wã, n yã t’a Dãniyɛll ‘pa tar zanga, n yaa rasãnga,’ la t’a ra yita nin-kãsems zakẽ. (1 Sãm. 16:7) Rẽ n so tɩ Babilon nebã zãms-a bũmb toor-toore, sẽn na yɩl t’a wa tʋm na-yirã.—Dãn. 1:3, 4, 6.

2. A Zeova tagsg ra yaa wãn ne a Dãniyɛlle? (Ezekɩyɛll 14:14)

² A Zeova ra nonga a Dãniyɛlle, la pa a yalẽ wã wall tʋʋmd ning a sẽn da tʋmd na-yirã yĩng ye. Yaa a sẽn da yãk yam n na n yɩ ned ning buudã yĩnga. Sɩd me, a Zeova yeelame t’a Dãniyɛll yaa nin-tɩrg wa a Nowe ne a Zoob sẽn yɩ neb sẽn maan sɩd ne-a yʋʋm wʋsgã. A sẽn wa n yeel woto wã t’a Dãniyɛll zemsa yʋʋm 20. (Sɩng. 5:32; 6:9, 10; Zoob 42:16, 17; karm-y Ezekɩyɛll 14:14.) A Dãniyɛll vɩɩmã sẽn yɩ wok la sẽn tall yamleoogã tõre, a Zeova ra nong-a lame.—Dãn. 10:11, 19.

3. Bõe yell la d na n gom sõs-kãngã pʋgẽ?

³ Sõs-kãngã pʋgẽ, d na n yãa a Dãniyɛll zʋg-sõma a yiib sẽn kɩt t’a ra tar yõod wʋsg a Zeova nifẽ wã. Pipi, d na n goma zʋg-sõng fãa yelle, la a Dãniyɛll sẽn wilg to-to t’a tara zʋg-sõng-kãnga. Rẽ poore, d na n yãa bũmb ning sẽn sõng a Dãniyɛll t’a bɩɩs zʋg-sõma-kãensã. Sẽn na n baase, d na n yãa d sẽn tõe n dɩk a togs-n-taar to-to. Baa sẽn yaa kom-bɩɩsã yĩng la b gʋls sõs-kãnga wã, tõnd ned kam fãa tõe n dɩka yam a Dãniyɛll mak-sõngã pʋgẽ.

4. Wãn to la a Dãniyɛll wilg t’a tara raoodo? Rɩk-y makre.

⁴ Rabeem tõe n yõka ned sẽn tar daoodo, la a pa basd tɩ rẽ kɩt t’a pa maan sẽn yaa tɩrg ye. A Dãniyɛll ra yaa bi-bɩɩg sẽn tar daood wʋsgo. D ges zu-loees a yiib taoor a Dãniyɛll sẽn wilg t’a tara raoodo. Pipi wã yɩɩ Babilon nebã sẽn sãam Zerizalɛmmã yʋʋm a yiib poore. Babilon rĩm a Nebukadnezaar zãmsa zãmsd n yã bõn-naandg sẽn yaa kãsenga, hal tɩ kẽes-a rabeem. A yeelame t’a na n kʋʋ a yam dãmbã fãa, baa a Dãniyɛlle, b sã n pa wilg-a a zãmsdã la a võorã. (Dãn. 2:3-5) A Dãniyɛll ra segd n maana bũmb tao-tao. Sã n pa rẽ, b ra na n kʋʋ neb wʋsgo. A “kẽngame n tɩ kos rĩmã t’a kõ-a weere, t’a wa bilg-a zãmsdã võore.” (Dãn. 2:16) Rẽ ra baooda raood la tẽebo. Biiblã pʋgẽ, b pa wilg zĩig baa a ye t’a Dãniyɛll ra zoe n bilga zãmsd võor ye. A kosa a Sadrak ne a Mesak la a Abɛɛdnego sẽn yaa a zo-rãmbã tɩ “b pʋʋs saasẽ Wẽnnaamã t’a zoe b nimbãaneg n vẽneg-b yel-soalgdgã.” (Dãn. 2:18) A Zeova leoka b pʋʋsgã. Ne Wẽnnaam sõngre, a Dãniyɛll tõog n bilga a Nebukadnezaar zãmsdã võore. Rẽ kɩtame tɩ b pa kʋ a Dãniyɛll ne a zo-rãmbã ye.

5. Bõe n le maan tɩ yɩ tɩlɛ t’a Dãniyɛll tall raoodo?

⁵ A Dãniyɛll sẽn bilg zãmsdã sẽn gomd bõn-naandg sẽn yaa kãsengã yellã poore, bũmb n le maan tɩ yɩ tɩlɛ t’a tall raoodo. A Nebukadnezaar le zãmsa zãmsd a to sẽn kẽes-a rabeem. A zãmsame n yã tɩ-kẽenga. A Dãniyɛll talla raood n bilg rĩmã a zãmsdã võore. A yeelame tɩ rĩmã na n lebga gãeenga, la tɩ b na n deega a naamã n bas-a wakat bilf pʋgẽ. (Dãn. 4:25) Rĩmã ra tõe n tagsame t’a Dãniyɛll yaa tõata, n kɩt tɩ b kʋ-a. La a Dãniyɛll talla raoodo, n taas-a koɛɛgã.

6. Tõe tɩ bõe n sõng a Dãniyɛll t’a tall raoodo?

⁶ Tõe tɩ bõe n sõng a Dãniyɛll t’a tall raood a vɩɩmã tõre? Yaa vẽeneg t’a Dãniyɛll sẽn wa n yaa bi-bɩɩgã, a ba wã ne a ma wã kõ-a-la mak-sõngo. Sãmbg sẽn kae, b tũu noy nins a Zeova sẽn kõ Israyɛll neb nins sẽn da tar kambã, n zãms b biigã Wẽnnaam Tõogã. (Tõo. 6:6-9) Pa tõod piigã bal la a Dãniyɛll ra mi ye. A  ra mii bũmb wʋsg Israyɛll nebã sẽn da tõe n dɩ la b sẽn da pa segd n dɩ wã wɛɛngẽ. b (Maan. 11:4-8; Dãn. 1:8, 11-13) A Dãniyɛll ra mii Wẽnnaam nin-buiidã kʋdemdã yɛl me, la bũmb ning sẽn paam-b wakat ning fãa b sẽn pa sak a Zeova noyã. (Dãn. 9:10, 11) A Dãniyɛll sẽn seg zu-loees ninsã kɩtame t’a kɩs sɩd tɩ sẽn wa n yaa a soab fãa, a Zeova ne a malɛgsã sẽn tar pãngã na n sõng-a lame.—Dãn. 2:19-24; 10:12, 18, 19.

7. Bõe me n sõng a Dãniyɛll t’a paam daoodo? (Ges-y fotã me.)

⁷ A Dãniyɛll zãmsa Wẽnnaam no-rɛɛsdbã sẽn gʋls bũmb ninsã, wala makre, no-rɛɛs a Zeremi sɛbã. Rẽ kɩtame t’a Dãniyɛll bãng tɩ Zʋɩf-rãmbã sẽn be Babilonnã yembdã ra na n saa ka la bilfu. (Dãn. 9:2) A Dãniyɛll sẽn yã Biiblã bãngr-gomdã sẽn pidsã kɩtame t’a maneg n kɩs a Zeova sɩda. Neb nins sẽn kɩs Wẽnnaam sɩdã tõe n talla raoodo. (Ges-y Rom dãmb 8:31, 32, 37-39.) Sẽn tar yõod n yɩɩda, a Dãniyɛll ra wae n pʋʋsda a saasẽ Ba wã. (Dãn. 6:10) A vẽnega a yel-wẽnã n togs a Zeova, la a togs-a bũmb ning sẽn be a sũurẽ wã. A Dãniyɛll kosa sõngre. (Dãn. 9:4, 5, 19) A Dãniyɛll sẽn da yaa ninsaal wa tõndã, a pa rog ne raood ye. Yaa a sẽn da zãmsd Wẽnnaam Gomdã, n pʋʋsdẽ, la a kɩs a Zeova sɩdã n sõng-a t’a bɩɩs zʋg-sõng-kãngã.

8. Bõe la d tõe n maan n paam daoodo?

⁸ D sã n dat n paam daoodo, bõe la d segd n maane? D roagdbã tõe n sagend-d lame tɩ d tall raoodo, la b pa tõe n kõ tõnd raoodo, baa bãmb mengã sã n tara raood ye. Raoodã bɩɩsg yaa wa bũmb ning zãmsgo. D sã n dat n paam minim bũmb wɛɛngẽ, d segd n geta karen-saambã sẽn maand to-to wã, n dɩkd a togs-n-taare. Woto me, d sã n dat n paam daoodo, d segd n maagda d yĩng n get neb a taabã sẽn wilgd to-to tɩ b tara raoodã, n dɩkd b togs-n-taare. Woto wã, yam-bʋg la d tõe n dɩk a Dãniyɛll nengẽ? Tõnd me segd n bãnga Wẽnnaam Gomdã sõma wa a Dãniyɛlle. D segd n pelgda d pʋg n gomd ne a Zeova wakat fãa, tɩ paasd tõnd ne yẽ zoodã pãnga. D segd n kɩsa a Zeova sɩda, la d bas d yam t’a teend-d lame. Dẽ, d tẽebã sã n wa paam makre, d na n talla raoodo.

9. D sã n tar daoodo, wãn to la nafd tõndo?

⁹ D sã n tar daoodo, naf-d-la bũmb toor-toor wɛɛngẽ. D gom a Bɛn yelle. A bee Alemayn lekoll a ye pʋgẽ, tɩ nebã fãa tagsdẽ tɩ bũmb fãa wa n bee woto tɩ pa tũ ne Naand sababo, la tɩ Biiblã sẽn yet bũmb ning naanegã wɛɛngẽ wã yaa soalma. Daar a ye, b yeela a Bɛn t’a lʋɩ karen-biisã taoore, n wilg bũmb ning sẽn kɩt t’a tẽed tɩ Naand n be wã. A talla raoodo, n gom a sẽn tẽed bũmb ningã yelle. Bõe n maan rẽ poore? A Bɛn yeelame: “Tõnd karen-saambã maaga a yĩng n kelge, la a fotokopiye sebr ning mam sẽn tik n gomã, n kõ karen-biig fãa.” A Bɛn karen-bi-taasã manesem yɩɩ wãna? A Bɛn yeelame: “B wʋsg maaga b yĩng n kelg mam goamã, la b yeel tɩ b nand-m lame.” A Bɛn kibarã wilgdame tɩ f sã n tar daoodo, naoor wʋsgo neb a taabã nand-f lame. Tõe n kɩtame me tɩ neb kẽer bao n bãng a Zeova. Vẽenega, bũmb wʋsg n be n wilgdẽ tɩ d segd n talla raoodo.

10. Maan-sɩd yaa bõe?

¹⁰ Biiblã pʋgẽ, b sã n gomd “maan-sɩd” yelle, bilgda nonglem sẽn tar pãng wʋsgo. Naoor wʋsgo, a bilgda a Zeova sẽn nong a nin-buiidã to-to wã. B mi n pʋda gom-bi-kãnga, tɩ bilgd Wẽnnaam nin-buiidã sẽn nong taab to-to wã me. (2 Sãm. 9:6, 7) D maan-sɩdã pãng tõe n paasda bilf-bilfu. D ges a Dãniyɛll sẽn maan to-to t’a maan-sɩdã pãng paase.

11. Wãn to la a Dãniyɛll wilg t’a ra maanda sɩd ne Wẽnnaam a kʋʋlmã wakate? (Ges-y sebrã pipi neng fotã.)

¹¹ A Dãniyɛll vɩɩmã tõre, bũmb toor-toor n maan tɩ yɩ tɩlɛ t’a wilg a sã n na n kell n maana sɩd ne a Zeova. Yaa a sẽn wa n tar yʋʋm 90 la zakã la a paam makr ning sẽn yaa kãseng n yɩɩdã. Wakat kãng tɩ Meed-dãmbã ne Pɛrs-rãmbã zab n tõoga Babilonne, tɩ yaa rĩm a Daryuus n dɩt naam. Naabã tʋm-tʋmdbã ra kisa a Dãniyɛlle, la b ra maand b toog kae ne Wẽnnaam ning a sẽn tũudã. Rẽ n so tɩ b maan sɩlem n na n kɩt tɩ b kʋ a Dãniyɛlle. B kɩtame tɩ rĩmã yiis noore, tɩ lebg tɩlɛ t’a Dãniyɛll wilg a sã n na n kell n maana sɩd ne Wẽnnaam, bɩ ne rĩmã. Bũmb ning a Dãniyɛll sẽn da segd n maan n wilg t’a bee rĩmã poorẽ la sẽn na yɩl tɩ b ra sɩbg-a, yaa a bas a Zeova pʋʋsg rasem 30. La a Dãniyɛll yãka yam n na n kell n maan sɩd ne a Zeova. Rẽ kɩtame tɩ b lob-a gɩgma bokẽ. La a Zeova keoo a Dãniyɛll a maan-sɩdã yĩnga, n fãag-a tɩ gɩgma wã pa wãb-a ye. (Dãn. 6:12-15, 20-22) Bõe la d tõe n maan n kell n maan sɩd ne a Zeova wa a Dãniyɛlle?

12. Bõe la a Dãniyɛll maan tɩ sõng-a t’a kell n maan sɩd ne a Zeova?

¹² Sẽn na yɩl n kell n maan sɩd ne a Zeova, d segd n nong-a-la ne d sũur fãa. A Dãniyɛll maana sɩd ne a Zeova, a sẽn da nong a saasẽ Ba wã ne a sũur fãa wã yĩnga. Sãmbg sẽn ka be, yaa a Dãniyɛll sẽn da baood sẽk n tagsd a Zeova zʋg-sõma wã yelle, la a sẽn wilgd zʋg-sõma-kãens to-to wã n kɩt t’a ra nong-a wʋsgã. (Dãn. 9:4) Sẽn paase, a Dãniyɛll bʋgsa bõn-sõma nins fãa a Zeova sẽn maan n kõ yẽ la Israyɛll nin-buiidã zugu, t’a sũur da noom ne rẽ.—Dãn. 2:20-23; 9:15, 16.

13. a) Zu-loe-bʋs la kom-bɩɩs nins sẽn yaa a Zeova Kaset rãmbã segda? Togs-y kibare. (Ges-y fotã me.) b) Ned sã n sok yãmb n dat n bãng a Zeova Kaset rãmbã sã n teenda pag ne pag wall rao ne rao sẽn kẽed ne taaba, y na n leokame tɩ bõe wa video wã sẽn wilgdã?

 ¹³ Rũndã-rũndã, kom-bɩɩs nins sẽn yaa a Zeova Kaset rãmbã segda zu-loees wa a Dãniyɛlle. B bee ne neb sẽn maand b toog kae ne a Zeova la a noyã. Neb a woto tõe n kisa ned ning fãa sẽn yet t’a nonga Wẽnnaam. Kẽer meng pẽdgda kom-bɩɩsã, n dat tɩ b ra le maan sɩd ne a Zeova ye. Wala makre, d ges bũmb ning sẽn paam a Grayam sẽn yaa bi-bɩɩg n be Ostrali wã. A sega zu-loɛɛg a sẽn wa n be kolɛɛsã. B karen-saambã soka karen-biisã n ges b zoa sẽn yaa rao sã n wa yeel-b t’a kẽeda ne rapa, bɩ sẽn yaa pag sã n wa yeel-b t’a kẽeda ne pagba, b manesem na n yɩɩ wãna? Karen-saambã yeelame tɩ neb nins fãa sẽn na n teel zoa a woto tɩ yals karen-doogã kɩreng a ye, tɩ sẽn pa na n teel-bã yik n tɩ yals karen-doogã kɩreng a to wã. A Grayam yeelame yaa: “Karen-biisã fãa tɩ yalsa zĩig ning sẽn wilgd tɩ b teend-b lame wã, sã n pa maam ne a Zeova Kaset soab a to bala.” Bũmb ning sẽn maan dẽ poorã kɩtame t’a Grayam ra segd n wilg a sã n na n kell n maana sɩd ne a Zeova. Ad a sẽn yeele: “Karen-biisã fãa, la baa karen-saambã tʋʋ tõndo, hal n tãag karengã yiib lɛɛre. M maana m sẽn tõe fãa n sik m meng n na n wilg bũmb ning m sẽn tẽedã, la b pa bao n na n kelg m sẽn da yetã ye.” A Grayam tagsg yɩɩ wãn ne rẽ? A yeelame: “M sũur pa yɩ noog m karen-bi-taasã sẽn tʋ-mã ye. La m sũur yaa noog wʋsg m sẽn kell n maan sɩd ne a Zeova, n gom n teel m tẽebã.” c

14. Bõe la d tõe n maan tɩ sõng-d tɩ d kell n maan sɩd ne a Zeova?

¹⁴ Tõnd me sã n nong a Zeova ne d sũur fãa wa a Dãniyɛlle, d na n tõogd n maanda sɩd ne-a. D sã n baood n bãngd a Zeova zʋg-sõma wã, d sẽn nong-a to-to wã pãng na n paasdame. Wala makre, d tõe n bʋgsa bũmb nins a sẽn naanã zugu. (Rom. 1:20) Y sã n dat n maneg n nong a Zeova la y waoogd-a, y tõe n kẽe jw.org n karem sõss nins sẽn be zĩig ning b sẽn gʋls tɩ “Évolution ou conception ?” wã, wall y ges video-rãmbã. Y leb n tõe n karma La vie a-t-elle été créée ? borsiirã la Cinq questions à se poser sur l’origine de la vie borsiirã. Ad bũmb ning saam-bi-poak a ye sẽn yaa bi-bɩɩg n be Danemark t’a yʋʋr boondẽ t’a Ɛstɛɛr sẽn yeel seb-kãensã wɛɛngẽ: “B sẽn bilgd yɛlã to-to wã bee yamleoogo. B pa wilgd yãmb y sẽn segd n tẽ bũmb ning ye. B bilgda yɛlã sẽn yaa to-to wã bala, tɩ y tõe n yãk y toorẽ yam.” A Bɛn sẽn yaa saam-biig ning yell d sẽn zoe n gomã yeelame: “Seb-kãensã kengda tẽeb wʋsgo. B sõnga maam tɩ m kɩs sɩd tɩ Wẽnnaam n naan bũmb fãa.” Y sã n zãms seb-kãensã, yaa vẽeneg tɩ y na n sak n deega bũmb ning Biiblã sẽn yetã. Biiblã yeelame yaa: “Tõnd Wẽnnaam a Zeova, yãmb n zems tɩ reeg ziir la waoogr la pãnga, bala yãmb n naan bũmb fãa.”—Vẽn. 4:11. d

15. Bõe la d tõe n maan tɩ paas tõnd ne a Zeova zoodã pãnga?

¹⁵ Bũmb a to d sẽn tõe n maan n maneg n nong a Zeova, yaa d sẽn na n zãms a Biig a Zeezi vɩɩmã sẽn yɩ to-to wã. Saam-bi-poak sẽn yaa bi-bɩɩg t’a yʋʋr boondẽ t’a Samiira n be Alemayn maana woto.  Ad a sẽn yeele: “Mam sẽn zãms a Zeezi vɩɩmã kibarã, m bãnga a Zeova sõma n paase.” A Samiira sẽn wa n yaa bi-bilfã, a ra pa wʋmd b sẽn mi n yeel tɩ bũmb tõe n sãama a Zeova sũur wall noog a sũurã võor ye. La sã n yaa a Zeezi yell la b gomda, a ra wʋmda a võore. A yeelame: “M da nonga a Zeezi, bala a ra nonga kamba. A pẽnegr me ra yaa nana.” A sẽn da baood n bãngd a Zeezi n paasdẽ wã, a sẽn da nong a Zeova to-to wã me pãng ra paasdame. Bõe yĩnga? A yeelame: “Bilf-bilfu, m wa n bãngame t’a Zeezi rɩkda a Ba wã togs-n-taar kɛpɩ. B wõnda taab sõma. M bãngame tɩ yaa rẽ yĩng la a Zeova sẽn tʋm a Zeezi tẽngã zugu, sẽn na yɩl tɩ ninsaalbã tõe n bãng yẽ wã.” (Zã 14:9) Y sã n dat n paas yãmb ne a Zeova zoodã pãnga, bɩ y bao sẽk n zãms bũmb wʋsg a Zeezi zugu. Y sã n maan woto y na n maneg n nonga a Zeova, la y kell n maan sɩd ne-a.

16. D sã n yaa ned sẽn maand sɩda, wãn to la na n naf-do? (Yɩɩn-sõamyã 18:25; Mise 6:8)

¹⁶ Neb nins sẽn maand sɩd ne taabã zood wae n kaoosdame, n leb n yaa zood hakɩɩka. (Rut 1:14-17) Sẽn paase, neb nins sẽn maand sɩd ne a Zeova wã tõe n gãnega b yam. Bõe yĩnga? Bala a Zeova pʋlmame t’a na n maana sɩd ne neb nins sẽn maand sɩd ne-a wã. (Karm-y Yɩɩn-sõamyã 18:25; Mise 6:8.) Tags-y n ges-y-yã! Baa tõnd sẽn pa zem baa fʋɩ Naandã sẽn tõe fãa wã taoorã, a pʋlmame t’a na n nong-d-la wakat fãa. D sã n paam a zood me, zu-loɛɛg baa a ye, bɛya, la baa kũumã meng pa tõe n sãam d zoodã ye. (Dãn. 12:13; Luk 20:37, 38; Rom. 8:38, 39) Rẽnd sɩd tara yõod tɩ d rɩk a Dãniyɛll togs-n-taare, n kell n maan sɩd ne a Zeova!

17-18. Bõe me la d tõe n bãng a Dãniyɛll zugu?

¹⁷ Sõs-kãngã pʋgẽ, d goma a Dãniyɛll zʋg-sõma a yiib bal yelle. La bũmb wʋsg n ket d sẽn tõe n zãms a Dãniyɛll nengẽ. Wala makre, a Zeova vẽnega a Dãniyɛll t’a yã bũmb toor-toore, la a zãms zãmsdo. A leb n kõ-a-la tõog t’a bilg bãngr-goam võore. Bãngr-gom-kãens wʋsg zoe n pidsame. La kẽer wilgda yɛl sẽn na n maan beoog-daare, dũniyã gill zugu.

¹⁸ Sõsg ning sẽn pʋgdã pʋgẽ, d na n goma a Dãniyɛll bãngr-goam a yiib yelle. D yaa bi-bɩɩg tɩ d yaa kãsma, d sã n wʋm bãngr-gom-kãens võore, na n sõng-d lame tɩ d bãngd n yãkd yam masã menga. Na n sõng-d lame tɩ d segl d mens bũmb nins sẽn wat ka la bilfã yĩnga, bala na n paasa d raoodã, la kɩt tɩ d maneg n maan sɩd ne a Zeova.