• “M da getame tɩ yaa wa mam sɩdã yooda wakat fãa.”

• “M da getame t’a paoogd-m lame, tɩ m pa le tat a yam, la tɩ m ka võor ye.”

• “M da pa tõe n gom rẽ yell ne ned ye. M da namsdame tɩ ned pa miẽ ye.”

• “M da getame tɩ yaa wa m yell pa pak a Zeova ye.”

Goam nins sẽn be yĩngrã wilgda pag sẽn namsd to-to a sɩd sã n get yoob yɛla. A sɩdã sã n soosd n get yoobã yɛl n maan kiis wall yʋʋma, tõe n yɩɩ toog ne-a t’a le kɩs-a sɩda. Pag a yembr yeelame yaa: ‘M da sokda m meng n get m sɩdã sẽn sɩd yaa ned ninga. Bũmb a taab la a solgd maam bɩ?’

B yiisa sos-kãngã n na n sõng pabg nins sɩdb sẽn get yoob yɛlã. a D na n yãa Biiblã sagls sẽn tõe n bels pagã, n sõng-a t’a kɩs sɩd t’a Zeova teend-a lame, la sõng-a t’a paam sũur pʋgẽ bãan la a maneg n pẽneg a Zeova. b

Baa y sẽn pa tõe n bãng bũmb nins fãa y sɩdã sẽn maandã, bũmb kẽer la y tõe n maan tɩ boog y yɩɩrã la kõ-y sũur pʋgẽ bãane. D gom bũmb a wãn yelle.

Ra ningd-y y meng taal ye. Pag tõe n wa tagsdame t’a sɩdã sẽn get yoob yɛlã yaa yẽ yelle. A Alis c ra getame t’a pa le tat a sɩdã yam ye. A ra sokda a meng yaa: ‘Bõe yĩng tɩ mam sɩdã nong pagb a taab gesg n yɩɩd maam?’ Pagb kẽer ningda b mens taal b manesem sẽn yaa to-to ne b sɩdã, n tagsdẽ tɩ rẽ kɩtdame tɩ yɛlã zẽnda. Pag a ye yʋʋr sẽn boond t’a Dãniyela yeelame: “M da getame tɩ m yaa pag sẽn yaa sũ-to-neda, la tɩ m sũurã sẽn wae n yikdẽ wã, m sãamda d kãadmã.”

Yãmb me tagsg sã n yaa woto, bãng-y t’a Zeova pa ningd-y taal y sɩdã tʋʋm-tʋmdɩ wã yĩng ye. Zak 1:14 yetame: “Ned kam fãa paamda makr a mengã ratem sẽn tusd-a la a belgd-a wã yĩnga.” (Rom. 14:12; Fili. 2:12)  A Zeova pa ningd-y taal ye. A pʋd n nanda y sẽn maand sɩd ne-a wã.—2 Kib. 16:9.

Yɩta sõma tɩ y bãng tɩ rao sã n get yoob yɛla, pa rat n yeel t’a pagã ka võor ye. Bãngdbã wilgame tɩ rao sã n nong n get yoobã yɛla, pag baa a ye pa tõe n pids a ratmã pag ne rao lagengã wɛɛngẽ ye.

Ra maan-y yɩɩr tɩ loog noor ye. A Katerine yeelame t’a ra maanda yɩɩr tɩ loog noore, a sɩdã sẽn da get yoob yɛlã yĩnga. A Farãnsɛs yeelame: “M sã n wa pa mi m sɩdã sẽn beẽ fãa, m maanda yɩɩre. Daarã tõre, m maanda yɩɩr wʋsgo.” Pagb kẽer yeelame tɩ b sã n wa be ne b tẽed-n-taas b sẽn tagsd tɩ b mii b sɩdã zu-loɛɛgã, yãnd n tar-ba. Pagb a taab me getame tɩ b yaa b yembre, b sẽn tagsd tɩ neb a taabã pa wʋmd b yellã võorã yĩnga.

Y pa tõe n pa tall tagsg a woto ye. La y sã n tagsd yellã zug wakat fãa, na n paasa y yɩɩrã bala. Paasd-y yãmb ne a Zeova zoodã pãnga. Y sã n maan woto, y na n paama pãng n tõog n mao ne y zu-loɛɛgã.—Yɩɩn. 62:2; Efɛɛ. 6:10.

Y sã n karemd Biiblã kibay sẽn gomd pagb sẽn da tar sũ-sãams n pʋʋs a Zeova t’a bels-b yelle, la y bʋgs b zutu tõe n sõng-y lame. Pa wakat fãa la a Zeova kɩt tɩ b zu-loeesã sa zĩig pʋgẽ ye. La a sõng-b lame tɩ b yam gãand bãane. Wala makre, “sũ-toog n da tar a Ann wʋsg” a zu-loɛɛgã yĩnga. La a sẽn pʋʋs a Zeova n kaoosã poore, a paama sũur pʋgẽ bãane, baa a sẽn da pa mi a yellã sẽn na n baas to-to wã.—1 Sãm. 1:10, 12, 18; 2 Kor. 1:3, 4.

Bao-y tigingã kãsem-dãmb sõngre. B tõe n “yɩɩ wa zĩ-soalgdg sobg wakate, wa soondg zĩig sa-kẽeng wakate.” (Eza. 32:2) B tõe n wilg-y-la saam-bi-poak y sẽn tõe n pelg y pʋg n togs y zu-loɛɛgã, la sẽn tõe n bels-yã.—Yel. 17:17.

Y tõe n sõnga y sɩdã t’a bas yoobã yɛl gesg bɩ? Y tõe n sõng-a lame. Biiblã wilgdame tɩ sẽn na yɩl n welg zu-loɛɛga, wall n zab ne bɛ n tõoge, “neb a yiib n são nin-yende.” (Koɛ. 4:9-12) Bãngdbã wilgame  tɩ pag ne a sɩd sã n naag taab n mao, tõe n sõngame tɩ sẽn da get-a yoobã yɛlã base, la kɩt me tɩ b le kɩs taab sɩda.

Yaa vẽeneg tɩ bee ne y sɩdã sã n data ne a sũur fãa n bas yoobã yɛl gesgo. Rẽ yĩnga a kosa a Zeova t’a kõ-a pãnga, la a bao kãsem-dãmbã sõngr bɩ? (2 Kor. 4:7; Zak 5:14, 15) A maanda a sẽn tõe fãa n na n zãag a meng ne bũmb sẽn tõe n wa kɩt t’a ges yoob yɛl bɩ? Wala makre, a gũusda a meng ne a sẽn tʋmd ne ẽntɛrnetã la tele wã to-to wã, la ne bũmb a taab sẽn tõe n wa kɩt t’a ges yoob yɛl bɩ? (Yel. 27:12) A sakdame tɩ y sõngd-a, la a pelgd a pʋg ne-y bɩ? Sã n yaa woto y na n tõog n sõng-a lame.

Wãn to? D gom a Felisiya ne a sɩd a Etan yelle. A Etan sɩnga yoobã yɛl gesg hal a yãadmẽ. A Felisiya kɩtame tɩ yaa nana ne a Etan t’a tõe n gom ne-a, a yamã sẽn mi n be yoobã yɛl gesgã wɛɛngẽ. A Etan yeelame: “M pelgda m pʋg n gomd ne m pagã. A sõngd-m lame tɩ m zãagd m meng ne bũmb kẽere, n sokd-m m sẽn maood ne yellã to-to, la a sõngd-m tɩ m gũusd ne m sẽn tʋmd ne ẽntɛrnetã to-to wã.” Yaa vẽeneg t’a Etan yamã sẽn mi n be yoobã yɛl gesgã sãamda a Felisiya sũuri. A yeelame: “Mam sũurã sẽn mi n yikd ne a Etannã, pa sõngd-a t’a maood ne a minim-wẽngã ye. La d sã n sõs a zu-loɛɛgã zugu, m neeme t’a rat n sõng-m lame tɩ m sũ-sãangã booge.”

Sõs-kãensã buud tõe n sõnga raoã t’a kell n zãag a meng ne yoobã yɛl gesgo, la sõng pagã me t’a le kɩs-a sɩda. Sẽn yɩɩd fãa, raoã sã n togsd a pagã a tʋlsmã, bũmb nins a sẽn maandã, zĩis nins a sẽn be wã, na n yɩɩ nana t’a pagã kɩs-a sɩda, a sẽn ne t’a pa le solgd-a bũmbã yĩnga.

Y tagsdame tɩ yãmb me tõe n sõnga y sɩdã woto bɩ? Sã n yaa rẽ, y tõe n naaga taab n karem sõs-kãngã, la y sõs a zugu. A raabã tog n yɩɩ a bas yoobã yɛl gesgo, la a maan bũmb toor-toor sẽn na yɩl tɩ y le kɩs-a sɩda. A sũurã pa tog n yik y sẽn dat n gom a zu-loɛɛgã yellã yĩng ye. A pʋd n segd n bao n wʋma yellã sẽn namsd-y to-to wã. Y raabã yaa y sõng-a t’a bas a minim-wẽngã, la a maan bũmb sẽn na n kɩt tɩ y le kɩs-a sɩda. Yãmb y yiibã fãa tog n bao n bãnga bũmb ning sẽn kɩtd tɩ ned yam wa be yoob yɛl gesgã, la y sẽn tõe n mao ne yel-kãng to-to. d

 Y sã n yɛɛsda y sõsgã na wa n lebg zabre, bɩ y kos kãsem-soab yãmb y yiibã sẽn minim sõma, t’a wa zĩnd ne yãmb sõsgã sasa. Ning-y y yamẽ tɩ baa y pagã wall y sɩdã sã n bas yoobã yɛl gesgo, tõe n kaoosa bilf tɩ y yaool n le wa kɩs-a sɩda. Woto wã, ra koms-y raood ye. Bao-y n bãng-y bũmb kẽer sẽn wilgd tɩ y zems-n-taarã le paamda pãnga. Kɩs-y sɩd tɩ yãmb y yiibã sã n tall sũ-mare, bilf-bilfu y kãadmã na n le wa paama pãnga.—Koɛ. 7:8; 1 Kor. 13:4.

La y sɩdã sã n bas yoobã yɛl gesg n le wa gese, rat n yeelame t’a pa tek yam n kos sugri, wall t’a yellã pa tar tɩɩm bɩ? Pa woto ye. Sẽn yɩɩd fãa a sã n da lebga yoobã yɛl gesg yamba, tõe n yɩɩ tɩlɛ t’a mao ne rẽ a yõor tɛka. Baa a sã n tõog n maan yʋʋm n pa ges yoob yɛla, a tõe n le wa salg n gesame. Sẽn na yɩl n da le wa lʋɩ yoobã yɛl gesg pʋgẽ, a segd n yɩɩ dem-dem ne a menga, la a kell n maan woto, baa sã n wa wõnd a tõog n basa zãnga. (Yel. 28:14; Mat. 5:29; 1 Kor. 10:12) A ‘segd n manegda a tagsa wã tɩ lebgd paalse,’ la a ‘kisg sẽn yaa wẽnga,’ rat n yeel tɩ yoob yɛl gesg la tʋʋm-dẽgd buud fãa, wala makre raoolmã salengo. (Efɛɛ. 4:23; Yɩɩn. 97:10; Rom. 12:9) A sã n yãka yam n na n modg a woto, rat n yeelame t’a yellã tõe n paama tɩɩm. e

La y sɩdã sã n pa modgd sẽn na yɩl n bas a minim-wẽngã yẽ? Yaa vẽeneg tɩ wakat fãa y na n getame t’a zãmbd-y lame, tɩ y sũurã yikdẽ. Bas-y y yɩɩrã ne a Zeova, tɩ rẽ na n sõng-y lame tɩ y yamã gãande. (1 Pɩy. 5:7) Ket-y n zãmsd-y Biiblã, n bʋgsd a zug la y pʋʋsd a Zeova tɩ sõngd-y tɩ y pẽnegd-a n paasdẽ. Y sã n maand woto, bɩ y bas y yam tɩ yẽ me na n pẽnegd-y lame. A Zeova bee ne neb nins “sũy sẽn sãam la sẽn yaa sik-m-mens rãmbã” wa Ezayi 57:15 sẽn wilgã, n sõngd-b sẽn na yɩl tɩ b le paam sũ-noogo. Maan-y y sẽn tõe fãa n kell n yɩ kiris-ned hakɩɩka. Bao-y kãsem-dãmbã sõngre, la y saagdẽ tɩ y sɩdã tõe n wa toeema ne a sũur fãa.—Rom. 2:4; 2 Pɩy. 3:9.