1. Bõe maaneg n pa nana ne neb wʋsgo?

 YÃMB zoe n yãka bũmb y sẽn dat n wa maan a Zeova tũudmã yĩnga, tɩ yaa toog tɩ y pids rẽ bɩ? b Sã n yaa woto, bãng-y tɩ y pa y yembr ye. Wala makre, saam-biig a ye yʋʋr sẽn boond t’a Filip yãka yam n na n paasd a pʋʋsgã sõmblem, la a pʋʋsd wakat fãa. La ra yaa toog ne-a t’a paamd sẽk n pʋʋsdẽ. A Erika ra yãka yam n na n kẽnd koɛɛgã mooneg tigissã, tɩ nan pa sɩng ye. Baasgo, koɛɛgã mooneg tigsg fãa la bal wakate, a tatame n mik tɩ zoe n sɩngame. A Toma maka naoor wʋsg n na n karem Biiblã tõre. A yeelame: “Biiblã kareng ra pa noom-m wʋsg ye. M maka hal naoor a tãabo, la wakat fãa m sã n karem n ta Maan-kʋʋr sebrã, m basdame.”

2. D sã n yãk bũmb n dat n wa maan n ket n nan pa tõog n sɩnge, bõe yĩng tɩ d pa segd n koms raoodo?

² Y sã n yãka bũmb n na n maan a Zeova tũudmã pʋgẽ, n ket n nan pa tõoge, bɩ y ra tags tɩ y ka võor ye. Baa yaa bũmb bilf la y yãk yam n na n maane, baooda sẽk la modgr wʋsgo. Y sẽn modgd n na n pids bũmb ning y sẽn yãk n na n maanã, wilgdame tɩ y sũur nooma ne y sẽn paam n yaa a Zeova zoa wã, la tɩ y tʋll n tũ-a-la wa y sẽn tõe tɛka. A Zeova sũur nooma ne y modgrã. Sɩd me, a pa baood tɩ y maan sẽn yɩɩd y pãng ye. (Yɩɩn. 103:14; Mis. 6:8) Dẽnd y segd n yãka yam n na n maan bũmb sẽn pa yɩɩd y pãnga, n zems ne y yɛlã sẽn yaa to-to wã. Y sã n yãk bũmb ning y sẽn dat n wa maanã, bõe n tõe n sõng-y tɩ y wa tõog n pids-a? Bɩ d gom bũmb a wãn yelle.

3. Bõe yĩng tɩ tar yõodo, tɩ d sã n yãk yam n na n maan bũmb bɩ d tʋlg n maan dẽ ne d sũur fãa?

³ Y sã n yãka bũmb n na maan a Zeova tũudmã pʋgẽ, tara yõod tɩ y tʋlg n maan rẽ ne y sũur fãa. Ned sã n tʋll n maan bũmb ne a sũur fãa, a modgda wʋsg sẽn na yɩl n maan bõn-kãnga. D tõe n dɩka rẽ n mak ne sobg sẽn tusd koom-koglgo, sẽn na yɩl t’a ta a sẽn dabdẽ wã. Sobgã sã n kell n tus koom-koglgã, a na n taa a sẽn dabdẽ wã. Sẽn paase, sobgã sã n tar pãnga, koom-koglgã tõe n taa a sẽn dabdẽ wã tao-tao. Woto me, d sã n tʋll n maan bũmb ne d sũur fãa, d sɩd tõogdame. Saam-biig a ye sẽn be Salvador t’a yʋʋr boond t’a Davɩɩd yeelame: “Ned sã n tʋll n maan bũmb ne a sũur fãa, a modgda wʋsg sẽn na yɩl n maan bõn-kãnga. Y modgdame n pa rat tɩ bũmb gɩdg-y tɩ y pa tõog n maan bũmb ning y sẽn yãk yam n na n maanã ye.” Dẽnd bõe la y tõe n maane, tɩ y sã n yãk yam n na n maan bũmb bɩ y tʋlg n maan dẽ ne y sũur fãa?

4. Bõe la d tõe n pʋʋs n kose? (Filip rãmbã 2:13) (Ges-y fotã me.)

⁴ Pʋʋs-y-yã a Zeova t’a sõng-y tɩ y tʋlg ne y sũur fãa n maan y sẽn datã. A Zeova tõe n sõng-y-la ne a vʋʋsem sõngã maasem, tɩ y tʋlg ne y sũur fãa n pids y raabã. (Karm-y Filip rãmb 2:13.) Wakat kẽere, d yãkda yam n na n maan bũmb ninga, bala d miime tɩ d segd n maana bõn-kãnga, la tɩ yaa bõn-sõngo. La tõe tɩ d pa tolg n tar yẽesem n na n maan dẽ ye. Yɩɩ woto ne saam-bi-poak a ye sẽn be Ugãnda t’a yʋʋr boond t’a Norina. Baa a sẽn da tagsd t’a pa tar minim n tõe n zãms ned Biiblã, tɩ kɩt t’a ra pa tar yẽesmã, a yãka yam n na n bao ned a sẽn tõe n zãms Biiblã. Bõe n sõng-a? Ad a sẽn yeele: “Mam sɩngame n kot a Zeova daar fãa, t’a sõng-m tɩ m paam yẽesem n zãms ned Biiblã. M tũu bũmb ning m sẽn pʋʋs n kosã, n modg n paas m minimã. Kiuug a wãn poore, m gũus n gesame tɩ m sɩd paama yẽesem. Yʋʋmdã pʋgẽ, m sɩnga Biiblã zãmsg ne neb a yiibu.”

5. Bõe zug la d tõe n bʋgse, tɩ kɩt tɩ d tʋlg ne d sũur fãa n pids d raabã?

⁵ Tags-y bũmb nins a Zeova sẽn zoe n maan n kõ-yã yelle. (Yɩɩn. 143:5) Tẽn-tʋmd a Poll bʋgsa bark nins a Zeova sẽn kõ-a wã yelle, tɩ kɩt t’a tʋlg ne a sũur fãa n tʋm wʋsg a Zeova yĩnga. (1 Kor. 15:9, 10; 1 Tɩm. 1:12-14) Woto me, y sã n bʋgsd bũmb nins a Zeova sẽn zoe n maan kõ-yã zugu, y na n tʋlga ne y sũur fãa n pids y raabã. (Yɩɩn. 116:12) D ges bũmb ning sẽn sõng Hõnduras saam-bi-poak a ye, t’a tõog n lebg wakat fãa so-pakda. Ad a sẽn yeele: “M tagsa a Zeova sẽn nong maam wʋsgã yelle. A sõnga maam tɩ m paam n naag a nin-buiidã. A geta m yelle, la a kogend-ma. Mam sẽn bʋgs bõn-kãensã fãa zugã, sõnga maam tɩ m maneg n nong a Zeova, la m tʋll n maan m sẽn tõe fãa n na n lebg so-pakda.”

6. Bõe me n tõe n sõng-d tɩ d tʋll n maan bũmb ning d sẽn yãk yam n na n maanã ne d sũur fãa?

 ⁶ Tags-y bark nins y sẽn na n paame, y sã n tõog n pids y raabã. Gũus-y n ges-y bũmb ning sẽn sõng a Erika, t’a tõog n tat koe-moonegã zĩigẽ tɩ nan pa sɩngã. Ad a sẽn yeele: “M wa n bãngame tɩ m sẽn pa kẽnd koe-moonegã pĩndã, m bõnda bũmb wʋsgo. La m sã n ta pĩnda, m paamd n pʋʋsa saam-biisã, n sõs ne-ba, la m kelg sagls sẽn tõe n sõng-m tɩ m paam sũ-noog la minim koɛɛgã mooneg pʋgẽ.” A Erika tagsa bark ning a sẽn na n paame, a sã n modg n kẽnd koɛɛgã mooneg tigissã. La a sɩd maana woto. Bark bʋg yell la yãmb tõe n tagse? Y sã n yãka yam n na n karemd Biiblã, wall n na n wɩngd ne pʋʋsgo, bɩ y tags rẽ sẽn na n kɩt tɩ yãmb ne a Zeova zoodã pãng paasã zugu. (Yɩɩn. 145:18, 19) Y sã n yãka yam n na n bɩɩs zʋg-sõngo, bɩ y tags rẽ sẽn na n paas yãmb ne y taabã zood to-to wã zugu. (Kolo. 3:14) Y tõe n gʋlsa bũmb ning sẽn kɩt tɩ y yãk yam n na n maan bũmb kẽer a Zeova yĩngã. Wakat fãa bɩ y lebgd n get bũmb nins y sẽn gʋlsã. Saam-biig a Toma yeelame: “M sã n tags bʋʋm ning sẽn kɩt tɩ m tʋll n pids m daabã, m pa komsd raood tao-tao ye.”

7. Bõe n sõng a Julio ne a pagã tɩ b tõog n pids b raabã?

⁷ Nong-y n be-y ne neb nins sẽn tõe n keng y raoodã. (Yel. 13:20) Ad bũmb ning sẽn sõng a Julio ne a pagã, tɩ b tõog n tɩ moon zĩig koe-moondb sẽn pa waooge, wa b sẽn da yãk yam n na n maanã. A yeelame: “D baoo zo-rãmb sẽn sagl-d tɩ d modg n maan bũmb ning d sẽn yãk yam n na n maanã. La d mi n sõsda rẽ yell ne-ba. B sʋkã neb kẽer ra zoe n tʋma tʋʋm-kãng buudu. Dẽnd b ra tõe n kõ-d-la saglse. B ra mi n sok-d lame n na n bãng d sẽn magd n na n maan bũmb ning n pids d raabã. B mi kenga d raood wakat ninga.”

8. Sã n yaa d sẽn wat n tar yẽesem bal la d maand bũmb ning d sẽn yãk yam n na n maanã, na n yɩɩ wãn to? (Ges-y fotã me.)

⁸ Yaa vẽeneg tɩ ray kẽere, d pa tar yẽesem n na n maan bũmb sãnda ye. Woto rat n yeelame tɩ d pa tõe n pids d raabã bɩ? Ayo. D rɩk makre: Sobg tõe n tusa koom-koglgo, t’a ta a sẽn dabdẽ wã. La sobgã pãng mi n boogame, bɩ n pʋd n kae ye. Woto rat n yeelame tɩ koom-koglgã pa na n le tõog n yẽrg bɩ? Ayo. Wala makre, koom-kogend kẽer tara masĩni, tɩ sãnda tar gaadse. Sẽn wẽnd-a wã tõe n tʋma ne bõn-kãensã a yiibã, tɩ koglgã ta a sẽn dabdẽ wã. D tõe n maka d yẽesmã ne sobgo. Pa wakat fãa la d tar yẽesem wʋsg ye. Wakat ninga, d pʋd n pa tar-a baa bilf ye. Sã n yaa d sẽn wat n tar yẽesem bal la d maand bũmb nins d sẽn yãk n na n maan a Zeova yĩngã, d pa na n tol n tõog ye. La wa sẽn wẽnd-a koglgã sẽn na n tũnug ne bũmb a taab tɩ koglgã ta a sẽn dabdẽ wã, baa tõnd me sã n pa tar yẽesem wʋsgo, d ket n tõe n pidsa d raabã. Yaa sɩd  tɩ pa na n yɩ nana ye. La y sã n tõog n maane, y sũur na n yɩɩ noogo. Nand tɩ d gom bũmb ning y sẽn tõe n maanã yelle, d na n deng n leoka sokre.

9. Y segd n modgame n kell n pids bũmb ning y sẽn yãk yam n na n maanã, baa y yamã pa be rẽ maaneg bɩ? Wilg-y y leoorã võore.

⁹ A Zeova ratame tɩ d tũ-a ne sũ-noogo, la ne yamleoogo. (Yɩɩn. 100:2; 2 Kor. 9:7) Woto wã, d segd n modgame n kell n pids bũmb ning d sẽn yãk yam n na n maan a Zeova tũudmã pʋgẽ wã, baa d yam ka be rẽ maaneg bɩ? D gom tẽn-tʋmd a Poll mak-sõngã yelle. A yeelame yaa: “Mam weoogda m yĩngã, la m kɩtdẽ t’a lebgd mam yamba.” (1 Kor. 9:25-27; vɛrse 27 notã.) A Poll modga a meng n maan sẽn yaa tɩrga, baa a yamã sã n da be bũmb a to maanego. A Zeova sũur yɩɩ noog ne a Poll bɩ? Yaa vẽenega. A Zeova keo-a-la a modgrã yĩnga.—2 Tɩm. 4:7, 8.

10. D sã n modg n maan bũmb a Zeova yĩng baa d pa tar yẽesem, bark bʋs la d tõe n paame?

¹⁰ Woto me, a Zeova sã n neẽ tɩ d modgda baa ne d sẽn pa tar yẽesmã, n na n pids bũmb ning d sẽn yãk n na n maanã, a sũur noomame. Bala a miime tɩ wakat ninga, d maanda rẽ d sẽn nong-a wã yĩnga, la pa d sũur sẽn noom ne tʋʋmdã yĩng ye. Wa a Zeova sẽn ning a Poll modgrã barkã, a na n ninga tõnd me modgrã barka. (Yɩɩn. 126:5) D sã n wa neẽ t’a Zeova ning-d-la barka, d yẽesmã me tõe n sɩnga paasgo. Saam-bi-poak a ye yʋʋr sẽn boon t’a Lucyna yeelame: “Wakat ninga, m yamã pa be koɛɛgã mooneg ye. Sẽn yɩɩd fãa m sã n wa ya. La baasgo, m sã n modg n yi, sũ-noog ning m sẽn paamdã pa tõe n bãng n bilg ye.” Bɩ d ges bũmb ning d sẽn tõe n maane, d sã n wa pa tar yẽesem.

11. Wãn to la a Zeova tõe n sõng-d tɩ d bɩɩs yõk-m-menga?

¹¹ Pʋʋs-y n kos-y yõk-m-menga. Yõk-m-mengã sõngda ned t’a tõe n gũus ne a tagsa wã la a yel-manesmã. Gom-bilã wae n bilgda ned sẽn na n tõog a menga, n pa maan sẽn yaa wẽng ye. La yaa tɩlɛ tɩ ned tall yõk-m-menga n tõog n maan sẽn yaa tɩrg me, sẽn yɩɩd fãa sã n yaa tʋʋmd sẽn yaa toogo, wall a sã n wa pa tar yẽesem. Tẽeg-y tɩ yõk-m-mengã naaga vʋʋsem sõngã biisi. Bɩ y kos a Zeova t’a kõ-y a vʋʋsem sõngã, tɩ y tõog n bɩɩs zʋg-kãngã. (Luk 11:13; Gal. 5:22, 23) Saam-biig a Davɩɩd wilga pʋʋsgã sẽn sõng-a to-to. A ra tʋll n zãmsda Biiblã n pa vaandẽ ye. Ad a sẽn yeele: “M da kota a Zeova, t’a sõng-m tɩ m bɩɩs yõk-m-menga. Ne a Zeova sõngre, m tõog n maana na-kẽndre sẽn yaa sõma Biiblã zãmsg yĩnga, la m pa vaandẽ me ye.”

12. Wãn la Koɛɛg soab 11:4 sẽn yet bũmb ningã tõe n sõng-d tɩ d tõog n maan bũmb ning d sẽn yãk yam n na n maan a Zeova tũubã pʋgẽ wã?

¹² Ra gũud-y yɛlã sẽn na n wa zems zãng ye. Dũni-kãngã pʋgẽ, d yɛlã pa tol n tõe n zems zãng ye. D sã n zĩ n gũud wakat kãnga, d pa na n tol n maan d sẽn yãk yam n na n maan a Zeova yĩngã ye. (Karm-y Koɛɛg soab 11:4.) Saam-biig a ye yʋʋr sẽn boond t’a Dãniyɛll yeelame: “Wakat sẽn zems zãng kae ye. Wakat sẽn zems yaa d sẽn na n sɩng bala.” Saam-biig a ye sẽn be Ugãnda t’a yʋʋr boond t’a Poll bilga bũmb a to me sẽn kɩt tɩ d pa segd n viig wakat ning d sẽn yãk n na n maan bũmb kẽerã, n yeel yaa: “D sã n modg n sɩnge, baa yɛlã pa nana, d kõta a Zeova bũmb a sẽn tõe n tik n ning-d barka.”—Mal. 3:10.

13. D sã n sɩng bũmb maaneg bilf-bilfu, nafa wã tõe n yɩɩ bõe?

¹³ Sɩng-y bilf-bilfu. Y sẽn yãk yam n na n maan bũmb ningã sã n wõnd yaa toog wʋsgo, y yẽesmã tõe n boogame. Sã n yaa woto, bɩ y sɩng bilf-bilfu. Y sã n yãka yam n na n bɩɩs zʋg-sõngo, y tõe n modg n wilgda  rẽ yel-bõones pʋsẽ. Sã n yaa Biiblã tõr la y rat n karme, y tõe n sɩngame n karemd-a minit a wãn daar fãa. A Toma sẽn yaa saam-biig ning yell d sẽn gom sɩngrẽ wã ra rat n dɩka yʋʋmd n karem Biiblã tõre, la pa yɩ nana ne-a ye. Ad a sẽn yeele: “M wa n bãngame tɩ m sẽn yãk yam n na n maan bũmb ningã yɩɩda m pãnga. M leb n sɩnga Biiblã karengo, la so-kãngã, m yãka yam n na n karemd vɛrse a wãn bal daar fãa la m bʋgsd a zugu. Rẽ kɩtame tɩ m sã n wa karemd Biiblã bɩ m sũur noome.” Biiblã kareng sẽn wa n lebg noog ne a Toma wã, a sɩngame n paasd a karengã woglem, la a wa n baas n karma Biiblã tõre. c

14. Bõe n tõe n wa kɩte, tɩ lebg toog tɩ y tõog n maan bũmb ning y sẽn da yãk yam n na n maanã?

¹⁴ Bʋko, baa d sã n tar yẽesem, wall d sigl d yɛlã sõma, bũmb tõe n wa tiis-d lame tɩ d pa tõog n pids d raabã ye. Wala makre, “yel-lingdem” tõe n dɩɩ d sẽkã zãnga. (Koɛ. 9:11) D tõe n wa paama zu-loɛɛg me tɩ koms d raood wʋsgo. (Yel. 24:10) D sẽn pa zems zãngã, tõe kɩtame tɩ d wa maan bũmb sẽn pa zemse, tɩ gɩdg-d tɩ d pa tõog n pids d raabã ye. (Rom. 7:23) Yaamsã tõe n wa loog-d lame me. (Mat. 26:43) Bõe n tõe n sõng-y tɩ y ra bas tɩ yel-lingdem tiis-yã?

15. Bũmb sã n tiis-y tɩ y pa tõog n pids y raabã, rat n yeelame tɩ y pa tol n tõe n le maan dẽ bɩ? Wilg-y y leoorã võore. (Yɩɩn-sõamyã 145:14)

¹⁵ Tẽeg-y tɩ bũmb sã n wa maan tɩ y pa tõog n pids y raabã, pa rat n yeel tɩ y pa na n tol n tõog ye. Biiblã wilgame tɩ d na n mi n paamda zu-loees buud toor-toore. La a wilgame me tɩ d tõe n modg n pidsa d raabã, sẽn yɩɩd fãa, ne a Zeova sõngre. (Karm-y Yɩɩn-sõamyã 145:14.) Saam-biig a Filip yeelame: “Pa wakat ning m sẽn pa tõog n pids bũmb ning b sẽn yãk yam n na n maanã la m get n yɩɩd ye. Sẽn pak maam n yɩɩd yaa m sẽn na n lebs n sɩnge.”  Saam-biig a Davɩɩd le yeelame: “Bũmb sã n maan tɩ m pa tõog n pids m daabã, m pa get tɩ yaa kug-lakdg ye. M getame tɩ yaa segb m sẽn paam n na n wilg a Zeova tɩ m sɩd nong-a lame.” Y sã n pa komsd raood n bas baa ne zu-loeesã, y wilgda a Zeova tɩ y rat n nooga a sũuri. A Zeova sã n yã tɩ y modgdame n na n maan bũmb ning y sẽn yãk yam n na n maan a yĩngã, noom-a-la wʋsgo.

16. Bũmb sã n wa maan tɩ d pa tõog n pids d raabo, yam bʋg la d tõe n dɩk rẽ pʋgẽ?

¹⁶ Bũmb sã n gɩdg-y tɩ y pa tõog n pids y raabã, bɩ y rɩk yam a pʋgẽ. Tags-y bũmb ning sẽn maanã yelle, la y sok y meng yaa: ‘Bõe la m tõe n maane, tɩ bõn-kãngã ra le paam-a?’ (Yel. 27:12) Wakat ninga, zu-loɛɛgã y sẽn paamã tõe n kɩtame tɩ y bãng tɩ y sẽn yãk yam n na n maan bũmb ningã yɩɩda y nugu. Sã n yaa woto, bɩ y lebg n tags y yam-yãkrã yell neere, n ges yãmb sã n ket n tõe n maana bõn-kãnga. d Y sã n yãk yam n na n maan bũmb n wa mik tɩ yɩɩda y nugu, a Zeova pa na n ges tɩ y ka võor ye.—2 Kor. 8:12.

17. Bõe yĩng tɩ d segd n tẽegd bũmb nins d sẽn zoe n tõog n maanã yelle?

¹⁷ Tẽegd-y bũmb nins y sẽn zoe n tõog n maanã yelle. Biiblã yetame yaa: “Wẽnnaam yaa tɩrlem soaba, n pa na n yĩm yãmb tʋʋmdã” ye. (Ebre. 6:10) Dẽnd yãmb me pa segd n yĩm rẽ ye. Leb n tẽegd-y bũmb nins y sẽn tõog n maanã yelle. Wala makre, y sẽn modg n lebg a Zeova zoa wã, y sẽn gomd a yell ne neb a taabã, wall y sẽn tõog n deeg lisgã. Y sẽn zoe n tõog n maan bũmb wʋsg a Zeova tũudmã pʋgẽ wã, y tõe n kell n modgame, n wa tõog n maan bũmb ning y sẽn yãk n na n maan masã wã.—Fili. 3:16.

18. Y sã n wa modgd n na n pids bũmb ning y sẽn yãk yam n na n maanã, bõe la y pa segd n yĩmi? (Ges-y fotã me.)

¹⁸ Ne a Zeova sõngre, y na n tõog n pidsa bũmb ning y sẽn yãk yam n na n maanã, wa ned sẽn wẽnd koom-koglg sẽn na n tõog n ta a sẽn dabdẽ wã ne sũ-noogã. La tẽeg-y me tɩ ned sẽn wẽnd koom-koglg sã n wa rɩk sore, a sũur nooma ne a so-toakã me. Woto me, bɩ y tagsd a Zeova sẽn sõngd yãmb to-to, tɩ y tõogd n maand bũmb nins y sẽn yãk yam n na n maanã. Rẽ na n sõng-y lame tɩ y tõog y tʋʋmdã ne sũ-noogo. (2 Kor. 4:7) Y sã n pa koms raood n base, y na n paama bark wʋsgo.—Gal. 6:9.