1-2. Sã n yaa ne Yɩɩn-sõamyã 25:14, bõe la d segd n maan n paam zood sõma ne a Zeova?

 YÃMB sã n dat tɩ yãmb ne ned zood tall pãnga, yaa tɩlɛ tɩ y tall zʋg-sõn-bʋgo? Tõe tɩ y na n leokame tɩ zo-rãmb hakɩɩk segd n nonga taaba, la b teend taaba. Tõe tɩ y pa na n tags tɩ sẽn na yɩl tɩ y zoodã tall pãnga, y segd n zoee taab ye. La ned sã n dat n paam zood sõma ne Wẽnnaam, a segd n ‘zoe-a’ lame, wa sõs-kãngã gom-zugã sẽn yetã.—Karm-y Yɩɩn-sõamyã 25:14.

² Baa d sẽn tũud a Zeova wã sẽn kaoos to-to fãa, d fãa segd n kell n zoe-a lame. La zoe Wẽnnaam rat n yeelame tɩ bõe? Bõe la d tõe n maan n tõog n zoe a Zeova? Wẽnnaam zoeesã wɛɛngẽ, yam-bʋg la d tõe n dɩk yel-gɛt a Abdiyaase, maan-kʋʋdb kãsem a Zehoyada, ne rĩm a Zowas kibarã pʋgẽ?

3. Bõe n tõe n wa kɩt tɩ d zoe rabeem, la wãn to la rẽ tõe n kogl tõndo?

³ D sã n wa neẽ tɩ yell tõe n paam-d-la bũmb ning wɛɛngẽ, rabeem tõe n kẽ-d lame. Rabeem a woto buud tõe n yaa sõma, bala tõe n sõng-d lame tɩ d bãng n yãk yam. Y sã n wa kẽnd bog-kẽeng noore, y sẽn zoet y na wa n lʋɩ bokã pʋgã, y pa na n pẽneg bokã wʋsg ye. D sã n zoet yell na wa n paam-do, tõe n sõng-d lame tɩ d zãag d mens ne yell sẽn tõe n tũ ne d yõore. D sã n zoet d na wa n sãam tõnd ne ned d sẽn nong zoodo, na n kɩtame tɩ d ra maan wall n yeel bũmb sẽn pa sõma ye.

4. Wãn to la a Sʋɩtãan rat tɩ d zoe a Zeova?

⁴ A Sʋɩtãan pa rat tɩ nebã zoe a Zeova wa sẽn segdã ye.  A ratame tɩ nebã tall a Elifaaz tagsgã buudu. A wilgame t’a Zeova yaa sũ-tʋʋlem soaba, n nong neb sɩbgre, la tɩ ned pa tol n tõe n maan sẽn noom-a ye. (Zoob 4:18, 19) A Sʋɩtãan ratame tɩ d tolg n zoe a Zeova hal n wa bas a tũubu. D pa segd n zoe a Zeova woto ye. D segd n waoogd-a lame, la d zoet d na wa n sãam a sũuri.

5. Zoe Wẽnnaam rat n yeelame tɩ bõe?

⁵ Ned sẽn zoet a Zeova wa sẽn segdã nong-a lame, n pa rat n maan bũmb sẽn na n sãam a sũur ye. A Zeezi ra tara “wẽn-zoeer” a woto buudu. (Ebre. 5:7) A ra pa zoet a Zeova tɩ loog noor ye. (Eza. 11:2, 3) A ra nonga a Zeova ne a sũur fãa, n dat n sakd-a. (Zã 14:21, 31) Tõnd me yaa wa a Zeezi, n waoogd a Zeova ne d sũur fãa la d zoet-a, bala a yaa nonglem, yam soaba, tɩrg la pãn-kãseng soaba. D miime me t’a Zeova nong-d-la wʋsgo, la tɩ d sã n sakd a saglsã noom-a lame. D manesmã tõe n sãama a Zeova sũur wall noog a sũuri.—Yɩɩn. 78:41; Yel. 27:11.

6. Bõe la d tõe n maan n zãms Wẽnnaam zoeese? (Yɩɩn-sõamyã 34:11)

⁶ D pa rogd ne a Zeova zoees ye. Yaa bũmb d sẽn segd n zãmse. (Karm-y Yɩɩn-sõamyã 34:11.) Bũmb a ye d sẽn tõe n maan tɩ sõng-d rẽ wɛɛngẽ, yaa d sẽn na n get bũmb nins a sẽn naanã. D sã n yã ‘bũmb nins a Zeova sẽn naanã’ sẽn wilgd a nonglmã to-to wã, a pãngã la a sẽn nong tõnd to-to wã, na n kɩtame tɩ d maneg n waoogd-a la d nong-a. (Rom. 1:20) Saam-bi-poak yʋʋr sẽn boond t’a Adriyɛn yeelame: “M sã n get a Zeova sẽn naan bũmb ninsã, n ne rẽ sẽn wilgd a yamã sẽn yaa kãseng to-to wã, sõngda maam tɩ m bãng t’a mii bũmb ning sẽn yaa sõma ne-m n yɩɩdã.” A Adriyɛn sẽn nong n bʋgsd rẽ zugã yĩnga, a yeelame yaa: “M pa tol n dat n maan bũmb sẽn na n sãam maam ne a Zeova zoodã sẽn yaa m vɩɩmã yẽgrã ye.” Bao-y sẽk semen kãngã n bʋgs bũmb a Zeova sẽn naan zugu. Y sã n maand woto, na n kɩtame tɩ y maneg n nong a Zeova la y waoogd-a.—Yɩɩn. 111:2, 3.

7. Wãn to la pʋʋsgã tõe n sõng tõnd tɩ d zoe a Zeova wa sẽn segdã?

⁷ Bũmb a ye d sẽn tõe n maan n paas d wẽn-zoeerã yaa d sẽn na n pʋʋsd a Zeova wakat fãa. Woto, d bãngd-a lame n paasdẽ. Wakat ning fãa d sẽn na n pʋʋs a Zeova n kos t’a kõ-d pãng tɩ d mao ne d zu-loɛɛga, tẽegda tõnd a pãngã sẽn yaa kãseng to-to wã. D sã n pʋʋs a Zeova bark a sẽn sak n kõ-d a Bi-riblã, tẽegd-d lame t’a nong-d-la wʋsgo. Sẽn paase, d sã n kos a Zeova t’a sõng-d tɩ d welg d zu-loɛɛga, tẽegda tõnd t’a yamã yaa kãsenga. Pʋʋsg a woto kɩtdame tɩ d maneg n waoogd a Zeova. Leb n kɩtdame, tɩ d maneg n yãk yam n pa na n maan bũmb sẽn na n sãam d zoodã ye.

8. Bõe la d tõe n maan n kell n yɩ wẽn-zoɛtba?

⁸ D sã n zãmsd Biiblã sẽn na yɩl n dɩk yam neb nins sẽn kõ mak-sõng la sẽn pa kõ-b mak-sõng t’a gomd b yellã nengẽ, tõe n sõnga tõnd tɩ d kell n yɩ wẽn-zoɛtba. D gom neb a yiib sẽn maan sɩd ne a Zeova yelle. Yaa rĩm a Akaab yel-gɛt a Abdiyaas ne maan-kʋʋdb kãsem a Zehoyada. Rẽ poore, d na n yãa yam ning d sẽn tõe n dɩk Zida rĩm a Zowas nengẽ. Sɩngrẽ wã, a ra tũuda a Zeova, la a wa n basa a Zeova tũubu.

9. Wãn to la a Abdiyaas sẽn da zoet a Zeova wã sõng-a? (1 Rĩm-dãmbã 18:3, 12)

⁹ Biiblã sẽn na n gom a Abdiyaas b yell pipi wã, b yeelame yaa: “A Abdiyaas ra yaa ned sẽn zoet a Zeova wʋsgo.” (Karm-y 1 Rĩm-dãmb 18:3, 12.) Wãn to la a Abdiyaas sẽn da zoet Wẽnnaam wa sẽn segdã sõng-a? Sõng-a lame t’a ra yaa pʋ-peelem soaba, la ned b sẽn tõe n teege. Rẽ kɩtame tɩ rĩmã yãk-a t’a ra get na-yirã neb yelle. (Ges-y Neemi 7:2.) Sẽn paase, a Abdiyaas wẽn-zoeerã kɩtame t’a paam raood wʋsgo. Ra yaa tɩlɛ t’a tall raood a woto. A vɩɩmda rĩm-wẽng a Akaab wakatẽ wã. “A Akaab yɩɩ nin-wẽng a Zeova nifẽ n yɩɩg rĩm-dãmb nins fãa sẽn deng yẽ wa.” (1 Rĩm. 16:30) A pag a Zezabɛll sẽn da waoogd wẽn-faoog a baallã me ra kisa a Zeova wʋsgo, hal n bao n na n menes tũudum hakɩɩkã rɩtg soolmã pʋgẽ. A kʋʋ Wẽnnaam no-rɛɛsdb wʋsg menga. (1 Rĩm. 18:4) Sãmbg kae t’a Abdiyaas tũu a Zeova toog wakat ye.

10. Bõe la a Abdiyaas maan tɩ wilgd t’a ra tara raood wʋsgo?

¹⁰ Bõe la a Abdiyaas maan tɩ wilg t’a ra tara raood wʋsgo? A Zezabɛll sẽn wa n gẽesd Wẽnnaam no-rɛɛsdbã n na n kʋ wã, a Abdiyaas solga no-rɛɛsdb koabga, “sul pis-nu-nu tãng bogdẽ n da kẽnd n kõt-b rɩɩb ne koom.” (1 Rĩm. 18:13, 14) A Zezabɛll sã n da bãnge, yaa vẽeneg t’a ra na n kʋʋ a Abdiyaas sẽn da tar daoodã. Sãmbg sẽn kae, a Abdiyaas me ra zoeta kũum wa nebã fãa. La a ra nonga a Zeova ne neb nins sẽn tũud-a wã n yɩɩd a mengã yõore.

11. Bõe yĩng tɩ d tõe n yeel tɩ rũndã-rũndã wẽn-sakdb kẽer yaa wa a Abdiyaase? (Ges-y fotã me.)

¹¹ Rũndã-rũndã, a Zeova Kaset rãmb wʋsg vɩɩ tẽns b sẽn gɩdg d tũudmã pʋgẽ. D tẽed-n-ta-kãens d sẽn nong wʋsgã waoogda tẽngã taoor dãmb wa sẽn segdã. La b maanda wa a Abdiyaase, n kõt a Zeova bũmb ning sẽn yaa yẽ rẽndã, rat n yeel tɩ b sakda yẽ a ye tãa. (Mat. 22:21) B sakda Wẽnnaam la pa ninsaalbã,  tɩ wilgdẽ tɩ b yaa wẽn-zoɛtba. (Tʋʋ. 5:29) Rẽ n so tɩ b ket n moond koɛɛgã, la b soosd n tigimd taaba. (Mat. 10:16, 28) B modgdame sẽn na yɩl tɩ b tẽed-n-taasã paamd bũmb nins sẽn na n keng b tẽebã. D gom saam-biig a ye yʋʋr sẽn boond t’a Ãari yelle. A bee Afirik tẽng a ye b sẽn da gɩdg d tũudmã pʋgẽ. Gɩdgrã sasa, a Ãari saka ne yamleoog n na n gilgd n kõt a tẽed-n-taasã siglgã sɛba. Ad a sẽn yeele: “M yaa yãn-zoɛta. Rẽ n so tɩ m kɩs sɩd tɩ yaa m sẽn nand a Zeova wʋsgã n kõ-m raood tɩ m tõog n maan dẽ.” Y tagsdame tɩ y tõe n talla raood wa a Ãari bɩ? Y sã n zoet a Zeova wa sẽn segdã, yãmb me na n paama raood a woto.

12. Wãn to la maan-kʋʋdb kãsem a Zehoyada ne a pagã wilg tɩ b maanda sɩd ne a Zeova?

¹² Maan-kʋʋdb kãsem a Zehoyada ra zoeta a Zeova, tɩ rẽ kɩt t’a ra yaa ned sẽn maand sɩda, la sẽn teend tũudum hakɩɩkã ne a sũur fãa. Rẽ yɩɩ vẽenega, a Zezabɛll bi-pugl a Atali sẽn wa n deeg Zida naamã ne pãngã. Nebã ra tara bʋʋm n na n zoe a Atali. A ra yaa nin-wẽng sẽn dat naam ne a sũur fãa, hal n bao n na n kʋ rĩmã kambã sẽn yaa yẽ meng yagensã fãa. (2 Kib. 22:10, 11) Kom-kãens sʋka, biig a ye yʋʋr sẽn boond t’a Zowas bal n põse, bala a Zehoyada pag a Zosebat fãag-a lame. A Zosebat ne a sɩdã baoo zĩig n solg biigã, n ges a yelle. B sẽn maan woto wã kɩtame tɩ naamã kell n pa a Davɩɩd pendẽ wã. A Zehoyada maana sɩd ne a Zeova, n pa zoe a Atali ye.—Yel. 29:25.

13. A Zowas sẽn wa n tar yʋʋm a yopoe wã, wãn to la a Zehoyada le wilg t’a maanda sɩd ne a Zeova?

¹³ A Zowas sẽn wa n tar yʋʋm a yopoe wã, a Zehoyada le wilgame t’a maanda sɩd ne a Zeova. A maana bũmb toor-toor sẽn na yɩl t’a Zowas lebg rĩma. A Zowas n da tar sor n na n deeg a Davɩɩd naamã. La a Zehoyada magbã sã n da pa zemse, yaa vẽeneg tɩ b ra na n kʋ-a lame. La ne a Zeova sõngre, yãka nenga. Nanambsã ne Levi buudã neb sõnga a Zehoyada, tɩ b tõog n kɩt t’a Zowas lebg rĩma, la b kʋ a Atali. (2 Kib. 23:1-5, 11, 12, 15; 24:1) Rẽ poore, a Zehoyada “kɩtame tɩ rĩmã ne nin-buiidã maan kaool ne a Zeova, n yeel tɩ b na n kell n yɩɩ a Zeova nin-buiidu.” (2 Rĩm. 11:17) A Zehoyada “kɩtame me tɩ rigno-gũudbã yas a Zeova roogã rignoyẽ, sẽn na yɩl tɩ ned ning fãa sẽn yaa rẽgd ra kẽ ye. Baa sẽn yaa rẽgd ning fãa.”—2 Kib. 23:19.

14. Wãn to la b waoog a Zehoyada a sẽn waoog a Zeova wã yĩnga?

¹⁴ A Zeova ra yeelame yaa: “Ned ning sẽn waoogd maam, mam na n waoog-a lame.” Sɩd me, a keoo a Zehoyada. (1 Sãm. 2:30) Wala makre, a kɩtame tɩ b gʋls bõn-sõma nins maan-kʋʋdb kãsmã sẽn maanã tõnd zãmsg yĩnga. (Rom. 15:4) Sẽn paase, a Zehoyada sẽn wa n ki wã, b waoog-a-la wʋsgo. “B mum-a-la a Davɩɩd tẽngẽ wã ne rĩm-dãmbã. Bala yẽ maana neer Israyɛlle, Wẽnnaam la a roogã wɛɛngẽ.”—2 Kib. 24:15, 16.

15. Yam-bʋg la d tõe n dɩk a Zehoyada kibarã pʋgẽ? (Ges-y fotã me.)

¹⁵ A Zehoyada kibarã tõe n sõnga tõnd fãa tɩ d maneg n zoe Wẽnnaam. Kãsem-dãmbã tõe n dɩka a Zehoyada togs-n-taare, b sẽn na n yaa gũusdba, la b kogend Wẽnnaam piisã ne b sũy fãa. (Tʋʋ. 20:28) A Zehoyada kibarã sõngda sẽn kʋʋl-bã tɩ b bãng tɩ b sã n zoet a Zeova la b maand sɩd ne-a, a tõe n  tũnuga ne-b n pids a raabã. A Zeova pa get tɩ b ka tar yõod ye. Kom-bɩɩsã tõe n dɩka yam a Zeova sẽn keo a Zehoyada to-to wã pʋgẽ. B tõe n dɩka a Zeova togs-n-taare, n waoogd neb nins sẽn ket n maand sɩd ne Wẽnnaamã, sẽn yɩɩd fãa, sẽn sɩng-b n tũud Wẽnnaam hal yʋʋm sẽn kaoosã. (Yel. 16:31) Sẽn na n baase, d fãa tõe n dɩka yam nanambsã la Levi buudã neb sẽn teel a Zehoyada wã nengẽ. Bɩ d kell n teel “sẽn lʋɩt-b taoorã” ne d sũy fãa, n sakd-ba.—Ebre. 13:17.

16. Bõe n wilgd t’a Zowas yɩɩ rĩm-wẽnga?

¹⁶ A Zehoyada sõnga rĩm a Zowas sẽn na yɩl t’a yɩ rĩm-sõngo. (2 Rĩm. 12:2) Rẽ n so t’a ra maand sẽn noom a Zeova, a sẽn wa n yaa bi-bɩɩgã. La a Zehoyada kũumã poore, a Zowas kelga nanambs nins sẽn da yaa wẽn-kɩɩsdbã. Rẽ waa ne bõe? Yẽ ne a nin-buiidã “sɩnga ra-lugsã ne bõn-naandsã pʋʋsgo.” (2 Kib. 24:4, 17, 18) Rẽ sãama a Zeova sũur wʋsgo, t’a ra “tʋmd no-rɛɛsdb n na n kɩt tɩ b lebg n wa a nengẽ . . . , la b pa sak n kelg ye.” B zãgsame meng n pa kelg a Zehoyada biig a Zakari ye. A Zakari ra pa a Zeova no-rɛɛs la maan-kʋʋd bal ye. A ra yaa a Zowas pʋgdb biig me. Baasgo, a Zowas kɩtame tɩ b kʋ a Zakari, baa ne a Zakari roagdbã sẽn sõng-a wʋsgã.—2 Kib. 22:11; 24:19-22.

17. A Zowas yɛlã baasa wãna?

¹⁷ A Zowas pa zoe a Zeova wa sẽn segdã ye. Rẽ kɩtame t’a yɛlã pa baas sõma  ye. A Zeova ra yeelame yaa: “Ned ning sẽn paoogd maam, mam na n paoog-a lame.” (1 Sãm. 2:30) Siiri tãb-biis sõor sẽn pa waoog n tõog a Zowas “tãb-biis kʋʋngã,” la b “pogl-a wʋsgo.” Siiri tãb-biisã sẽn loogã poore, a Zowas mengã tʋm-tʋmdb n kʋ-a a sẽn kʋ a Zakari c wã yĩnga. Nin-buiidã gesame tɩ pa zems tɩ b mum rĩm-wẽn-kãngã “rĩm-dãmbã yaadẽ ye.”—2 Kib. 24:23-25.

18. Sã n yaa ne Zeremi 17:7, 8 sẽn yet bũmb ningã, bõe la d tõe n maan n da yɩ wa a Zowase?

¹⁸ Yam-bʋg la d tõe n dik a Zowas kibarã pʋgẽ? A Zowas ra yaa wa tɩɩg yẽg sẽn pa tar pãnga, tɩ b rɩk raoog n teeg-a. Sẽn da yaa-a wa raoog n teeg a Zowasã sẽn wa n ka le be wã, sɩdã kɩɩsdb sẽn wa wa sobgã, a Zowas basa a Zeova tũubu. Kiba-kãngã wilgdame tɩ d sẽn sakd Wẽnnaamã, pa segd n yɩ d zakã ned wall tigingã neb a taab sẽn kõt-d mak-sõng yĩng bal ye. Sẽn na yɩl tɩ d tẽebã kell n tall pãnga, d segd n zãmsda Biiblã wakat fãa, n bʋgsdẽ la d pʋʋsdẽ, tɩ d sẽn nong Wẽnnaam la d zoet-a to-to wã pãng paasdẽ.—Karm-y Zeremi 17:7, 8; Kolo. 2:6, 7.

19. Bõe la a Zeova rat tɩ tõnd maane?

¹⁹ A Zeova pa baood tɩ d maan sẽn yɩɩd d pãng ye. Koɛɛg soab 12:13 pʋgẽ, b kʋmsa a sẽn dat tɩ d maan bũmb ningã n yeel yaa: “Zoe Wẽnnaam la f sak a noyã. Yaa ninsaal sẽn segd n maanã la woto.” D sã n zoet Wennaam, d na n tõog n kell n maana sɩd ne a Zeova wa a Abdiyaas ne a Zehoyada, baa sẽn wa n yaa a soaba. Baa fʋɩ pa na n tõog n sãam tõnd ne a Zeova zoodã ye.