M ma ne m baaba yii Ɛstoni, dũni gill zabr a yiib-n-soabã sasa n kẽng Almayn. Yaa be la mam dog-yã. Mam dogmã poore b yikame n kẽng Kanada. Tõnd pipi zakã ra bee Otawa sẽn be Kanada wã sɛɛgẽ. D roogã ra yɛga noos roogo. D ra yaa nong rãmb wʋsgo, la d ra paamda gɛl n sokd d noore.

Daar a ye, a Zeova Kaset rãmb n karem Vẽnegr 21:3, 4 tɩ m ma kelge. A sẽn wʋm bũmb ningã kẽ-a lame hal t’a sɩng yãbre. Sɩdã bõn-buud bulame, tɩ m baaba ne m ma kell n zãms Biiblã n wa reeg lisgu.

M roagdbã ra pa wʋmd Ãngilindã sõma, la b ra pa reemd ne sɩdã ye. M baaba ra tʋmda lozĩnd a ye b sẽn yẽnegd kut buud b sẽn boond tɩ nikɛll pʋgẽ. Ra yaa Sudberi, Õntario soolmẽ wã. Sibr fãa la bala, baa a sã n da sig tʋʋmã ne yʋngo, a tallda maam ne m yao bi-pugl a Sylvia tɩ d yi koɛɛgã moonego. La semen fãa, d zakã rãmb ra naagda taab n zãmsd Gũusg Gasgã. M ma ne m baaba sõnga maam tɩ m wa nong Wẽnnaam. Rẽ kɩtame tɩ m dɩk n meng n kõ a Zeova n deeg lisg yʋʋmd 1956, m sẽn wa n tar yʋʋm piiga. B sẽn da nong a Zeova ne b sũur fãa wã sõnga maam tɩ m kell n tũ a Zeova.

M sẽn wa n sa kolɛɛsã, m da pa le tũud a Zeova ne yẽesem ye. M da tagsdame tɩ m sã n lebg so-pakda, m pa na n tol n paam ligd n kẽ sɩlg n gilg n ges dũniyã ye. M wa n sɩnga tʋʋm radio a ye pʋgẽ, n yaa animatɛɛre. M da nonga tʋʋm-kãng wʋsgo. M da tʋmda yʋng-yʋngo. Rẽ kɩtame tɩ m da vaand tigissã la m da wae n be ne neb sẽn pa nong Wẽnnaam. La m sũur-kasetã wa n ningd-m-la taale, tɩ kɩt tɩ m toeeme.

M yik n tɩ zĩnda Osawa, Õntario soolmẽ wã. Beenẽ, m bãnga a Ray Norman, a yao bi-pugl a Lesli, la so-pakdb a taaba. B fãa wilgame tɩ m yell pak-b lame. M sẽn da ne b sũur sẽn noom to-to wã, kɩtame tɩ m toeem m sẽn da yãk yam n dat n maan bũmb ningã. B sagla maam tɩ m lebg so-pakda, la m sɩd lebga so-pakd yʋʋmd 1966 bõn-bɩʋʋng kiuugã. M da tara sũ-noogo, tɩ m yɛlã me ra yaa sõma. La pa kaoos la bũmb maan tɩ m vɩɩmã toeem ye.

Mam sẽn wa n ket n karemdẽ wã, m gʋlsame n kos n na n tɩ tʋm Kanada Betɛllã sẽn be  Torõnto wã. M sẽn wa n lebg so-pakdã, b bool-m lame tɩ m wa tʋm Betɛllẽ wã yʋʋm a naase. M da nonga a Lesli, n da yɛɛsdẽ tɩ m sã n sak n tɩ tʋm Betɛllẽ wã, m pa na tol n le yã-a ye. La m sẽn pelg m pʋg n pʋʋs naoor wʋsg poore, m yãka yam n sak n na n kẽng Betɛllẽ wã. M pʋʋsa a Lesli ne sũ-sãanga, n bas n looge.

M deng n tʋma Betɛllã fut pegb zĩigẽ, la m wa lebg sekertɛɛre. A Lesli me wa n lebga zall so-pakd Gatino sẽn be Kebɛk soolmẽ wã. M da mi n sokda m meng a yɛlã sẽn yaa to-to, la yam ning m sẽn yãkã sã n yaa sõma. La bũmb n wa n tiig n maan hal tɩ yɩ-m noog wʋsgo. B wa n boola a Ray sẽn yaa a Lesli kẽemã t’a wa tʋm Betɛllẽ wã. Maam ne yẽ n da gõe ro-yɛnga. Rẽ kɩtame tɩ m da tõe n le paam n sõs ne a Lesli. D kẽe kãadem yʋʋmd 1971 wao-fugdg kiuug rasem 27 wã. Yɩɩ mam sẽn da segd n tʋm Betɛllẽ wã yʋʋm a naasã saab daare.

B kɩtame tɩ maam ne a Lesli kẽng Kebɛk tiging a ye b sẽn gomd Farend pʋgẽ. Yʋʋm a wãn poore, b yãka maam tɩ m lebg tigims sull yel-gɛta, n gilgd n kaagd tigimsã, hal tɩ ling-ma. Rẽ tɩ m da tara yʋʋm 28. M da getame tɩ m yaa bi-bɩɩga, n pa tar minim wʋsg ye. La Zeremi 1:7, 8 wã kenga m raood wʋsgo. A Lesli ra maana agsɩdã-rãmb a wãn ne mobilli. Sẽn paase, a ra pa tõe n gũs sõma ye. M da sokda m meng yaa: ‘D ra na n maana a wãn n gilgd n kaagd tigimsã.’ La a Lesli yeelame yaa: “A Zeova sã n kos-d tɩ d maan bũmbu, d pa segd n mak n maan sɩda?” M sakame n lebg tigims sull yel-gɛta, tɩ d gilg n kaag tigimsã n maan yʋʋm 17.

Tigims sullã tʋʋm ra yaa wʋsgo, tɩ m ra pa tar sẽk wakat fãa a Lesli yĩng ye. M da segd n baoo yam n kõ m menga. Tẽne daar a ye yibeoog pĩnda, ned n wa n wẽ d kʋɩlengã. D sẽn pakã d pa yã ned ye. La d yãa peoog sẽn pid ne teedo. Ra yaa peende, tɩɩs biisi, formaaze, buri, divẽ la vɛɛr-dãmba. Sebr la b ra gʋls n paase, n pa ning yʋʋr ye. B ra gʋlsame yaa: “Tall f pagã tɩ y tɩ kok pemsem.” Wĩndgã ra pukame, tɩ zĩigã me bʋgsa. M yeela a Lesli tɩ m tara sõss n na n segle, la tɩ d pa na n tõog n yi ye. A sakame, la a sũurã ra pa noom zãng ye. Mam sẽn tɩ zĩnd n na n sɩng tʋʋmã, m sũur-kasetã ra ningd-m-la taale. M tagsa Efɛɛz rãmb 5:25, 28 wã yelle. M tagsa m yaamẽ t’a Zeova sẽn kɩt tɩ b gʋls vɛrse-kanga wã yaa sẽn na n tẽeg-m tɩ m segd n gesa m pagã yell t’a sũur yɩ noogo. M pʋʋsa a Zeova, la m yeel a Lesli yaa: “Wa tɩ d looge.” Rẽ yɩ-a-la noog wʋsgo. D kẽe d mobillã n kẽng kʋɩlg a ye noor sẽn da yaa zĩ-neere. D tʋɩɩ peendã n naag taab n maan bũmb toor-toor hal tɩ d fãa sũur yɩ noog wʋsgo. M wa n tõog n segla m sõssã me.

D tigims sullã ra yalma wʋsgo. Yaa sẽn sɩng ne Kolõmbi-britanik n tall n tãag Tɛɛr-neeve. Ra kõt-d-la sũ-noog wʋsgo. M sẽn da rat ne m sũur fãa  n gilgd tẽns toɛy-toɛyã pidsame. M da mi n tagsda Galaad lekollã yelle, la m da pa rat n lebg misioneer n tɩ be tẽn-zẽng ye. M da getame tɩ misioneer-dãmbã yaa neb sẽn yaa toor zalle, la tɩ m pa tõe n yɩ misioneer ye. Sẽn paase, m da yɛɛsda b na wa n yeel tõnd tɩ d kẽng Afirik sẽn yaa zĩig bãas la zab sẽn be wã. M sẽn da be Kanada wã noom-m lame.

Yʋʋmd 1992, tẽns nins sẽn da naag Iniyõ Sovietikã sẽn wa n kõ-d sor tɩ d tõe n le tʋm d tũudmã tʋʋmã, b soka tõnd d sã n na n sak n tɩ zĩnda Ɛstoni n yɩ misioneer-dãmba. Linga tõnd wʋsgo, la d pʋʋsa rẽ yĩnga. D le yeela d meng yaa: ‘A Zeova sã n kos-d tɩ d maan bũmbu, d pa segd n mak n maan sɩda?’ D sakame, la m sũur da nooma b sẽn pa yeel tɩ d kẽng Afirikã.

Zĩig pʋgẽ, d sɩnga Ɛstoni buud-gomdã zãmsgo. D sẽn ta tẽngẽ wã kiis a wãn poore, b yeelame tɩ d gilgd n kaagd tigimsã. Tõnd da segd n kaaga tigims 46 la sula sẽn be Baltik tẽns a tãabã pʋsẽ ne Kaliningrad sẽn yaa Risi soolmã. Dẽnd d ra segd n zãmsa Lituani, Letoni la Risi buud-gomdã. Ra pa nana ye. D saam-biisã sũur da nooma ne d modgrã, hal tɩ b ra sõngd tõndo. Yʋʋmd 1999 wã, b paka filyall Ɛstoni, n yãk maam tɩ m naag filyallã taoor lʋɩtb sulli. Ra yaa maam ne a Toomas Edur, a Lembit Reile, ne a Tommi Kauko.

Tõnd bãnga a Zeova Kaset rãmb wʋsg b sẽn da yõk n kẽng Siberi. Baa ne sẽn yɩ toog wʋsg ne-b bãensã roogẽ wã, la b sẽn welg-b ne b zagsã rãmbã, b pa tol n lebg sũ-to-neb ye. B kell n moona koɛɛgã ne sũ-noog la yẽesem. Woto sõnga tõnd tɩ d bãng tɩ d tõe n tõoga toog ne sũ-noog baa zu-loe-kɛgems sasa.

D tʋma yʋʋm wʋsg n pa rɩk vʋʋsem ye. Rẽ kɩtame t’a Lesli ra yaad wʋsgo. D pa bãng tao-tao tɩ yaa bãag b sẽn boond tɩ fibromiyalzɩ n kɩt t’a yaad wʋsg woto wã ye. D ra tagsdame tɩ yaa tɩlɛ tɩ d leb Kanada. B sẽn wa n bool tõnd tɩ d wa Patɛrsõn sẽn be Niuyork n maan Betɛll-dãmbã taoor lʋɩtbã ne b pagbã lekollã, m da tagsdame tɩ d pa na n tõog ye. La d sẽn pelg d pʋg n pʋʋs wʋsg poore, d yãka yam n na n kẽnge. A Zeova ninga d yam-yãkrã barka. Yɩɩ lekoll-kãng sasa la b bãng a Lesli bãagã, t’a paam tɩbsgo. Rẽ kɩtame tɩ d tõog n le sɩng d tʋʋmã.

Tõnd sẽn leb Ɛstoni wã, yʋʋmd 2008 wã daar a yembr zaabre, tõnd biru-kãsengã ned n bool maam n sok-m n ges d na n sakame tɩ b tʋm-d Kõngo bɩ? Linga maam wʋsgo, sẽn yɩɩd fãa b sẽn da rat tɩ m leok sokrã vẽkembeoogã. M pa togs a Lesli zĩig pʋgẽ ye. Bala m da miime tɩ m sã n togs-a a pa na n gũs yʋn-kãng ye. La yɩɩ mam mengã n pa tõog n gũsi. Yʋngã tõre, m pʋʋsa a Zeova n togs-a bũmb nins sẽn yɛɛsd maam Afirik wɛɛngẽ wã.

 Vẽkembeoogã m togsa a Lesli, la d wa n baas n yeelame yaa: “Yaa a Zeova n tʋm-d Afiriki. D sã n pa kẽnge d na n maana wãn n bãng tɩ d pa na n tõog tʋʋmdã, la tɩ d sũur pa na n yɩ noogo?” D rɩka sɩlg n kẽng Kõngo Kĩnsasa. Rẽ tɩ d sẽn zĩnd Ɛstoni wã taa yʋʋm 16. D sẽn ta wã, d mikame tɩ Betɛllã tara tɩɩs wʋsgo, tɩ zĩigã yaa neere, n le yaa sɩddd. Bũmb nins a Lesli sẽn ning d roogã pʋgẽ pipi wã sʋka, kart a sẽn sɩng n tar hal tõnd sẽn yi Kanada wã n naage. B ra gʋlsa kartã zug yaa: “F sẽn be zĩig ning fãa, bɩ f maan sũ-noogo.” D sẽn bãng saam-biisã poore, n paam Biibl karen-biisi, la d bãng misioneer tʋʋmdã sẽn yaa noog to-to beenẽ wã, d sũ-noogã maneg n paasame. D wa n paamame n tɩ kaag filyall-dãmb 13 sẽn be Afirik tẽns a taab pʋgẽ. Rẽ kɩtame tɩ d bãng buud toɛy-toɛy neba. M sẽn da zoet rabeemã saame. M pʋʋsda a Zeova bark a sẽn tʋm-d Afirikã yĩnga.

Kõngo wã, d rɩɩ rɩɩb buud toor-toor d sẽn da pa tẽed tɩ d na n tõog n dɩɩme ye. La d sẽn da ne d saam-biisã sẽn dɩt rẽ ne sũ-noogã, tõnd me makame n dɩ hal tɩ yɩ-d noogo.

Tẽngã wĩndgã sẽn pukdẽ babgã, tõatb sul n da zabd ne tẽngã nebã n namsd pagbã la kambã. La d tõogame n sõng d saam-biisã tɩ b paam sõngr buud toor-toor b tẽebã kengr yĩnga, la bũmb a taaba. D tẽed-n-taasã wʋsg nug ra pa zãad ye. La b sẽn da tẽed kũum vʋʋgrã, n nong a Zeova ne b sũur fãa, la b maand sɩd ne a siglgã to-to wã yɩ-d-la noog wʋsgo. B mak-sõngã kɩtame tɩ d fees d menga, la d paas d tẽebã pãnga. Saam-biis kẽer bõna b zags la b koodo. Rẽ kɩtame tɩ m tẽeg tɩ d tõe n bõna d paoongã zĩig pʋgẽ la tɩ tõnd ne a Zeova zoodã n tar yõod n yɩɩda. Baa ne zu-loe-kãensã fãa, saam-biisã pa wae n yẽgemdẽ ye. B manesmã kɩtame tɩ d bãng tɩ d tõe n talla raood n mao ne d laafɩ wã zu-loees la zu-loees a taaba.

La bũmb a to n wa n maan tɩ ling-du. B kos-d lame tɩ d yik n kẽng Hõng Kõng Betɛllẽ wã. D ra zɩ n tags tɩ d na n wa tɩ zĩnda Aazi ye. La d sẽn yã a Zeova sẽn ges d yell ne nonglem to-to tʋʋm nins fãa b sẽn kõ-dã pʋgẽ wã, d sakame n na n kẽnge. Yʋʋmd 2013, d looga ne sũ-sãams n bas d  zo-rãmbã la Afirik bõn-neebã, n pa mi bũmb ning sẽn gũud tõndã ye.

D sẽn ta Hõng kõngã, d mikame tɩ yɛlã yaa toor fasɩ. Tẽngã nebã yaa wʋsgo, n yit dũniyã zĩis fãa. Sɩnoaamdã zãmsgã yɩɩ toog wʋsg ne tõndo. La saam-biisã reeg-d-la ne sũ-noogo. Sẽn paase, d nonga b rɩbdã wʋsgo. Tʋʋm nins d sẽn da tʋmd Betɛllẽ wã ra tara paasgo, tɩ zĩisã me ligd ra tar rʋgbo. Rẽ n so tɩ Siglgã taoor lʋɩtb Sull yãk yam n na n koos filyallã zĩisã fãa la bala. Rẽ poor bilfu, yʋʋmd 2015 wã, d yikame n kẽng Kooredisiid. Yaa be la d ket n be. Ka me d segd n zãmsa Kooreyẽemdã sẽn yaa buud-gomd sẽn pa nana wã. La baa d sẽn ket n pa tõe n gom buud-gomdã sõma wã, saam-biisã la saam-bi-pogsã kengda d raoodo, n yetẽ tɩ d modgdame.

Zo-rãmb paoong pa nana wakat fãa ye. La d bãngame tɩ d sã n boond neb a taabã tɩ b wat d zakẽ wã, pa yãt n kaoos la d bãng-b ye. D yãame tɩ baa d tẽed-n-taasã sẽn yaa toor-toorã, b yɛl wʋsg wõnda taaba, la t’a Zeova naana tõnd tɩ d tõe n pak d sũurã yalenga, n wilg neb wʋsg tɩ d nong-b lame.—2 Kor. 6:11.

D yãame tɩ d segd n nonga neb a taabã wa a Zeova sẽn nong-b to-to wã, la tɩ d segd n baooda kaset sẽn wilgd t’a Zeova nong-d lame, la t’a wilg-d-la sore. D sã n wa koms raoodo, pa rẽ bɩ d sã n wa maand sãmbs d taabã sã n nong-d lame, d lebgd n karma kart-rãmb wall lɛta d zo-rãmb sẽn gʋls n keng d raoodo. Hakɩɩka, d yãa a Zeova sẽn leok d pʋʋsg naoor wʋsgo, n sõng-d tɩ d bas d yam t’a nong-d lame, la a keng d raood a tʋʋmdã pʋgẽ.

Maam ne a Lesli sẽn zĩnd ne taab yʋʋm wʋsgã pʋgẽ, d bãngame tɩ tara yõod tɩ d ned kam fãa baood sẽk a to yĩnga, baa d sã n wa tar tʋʋm wʋsgo. D bãngame me tɩ tara yõod tɩ d la d meng d sã n wa tudgi, sẽn yɩɩd fãa sã n yaa buud-gomd la d zãmsda. Yʋng fãa, d tagsda bũmb sẽn yɩ-d noog yelle, n pʋʋs a Zeova bark rẽ yĩnga.

Sɩd-sɩda, m da tagsdame tɩ m pa tol n tõe n yɩ misioneer wall m tɩ vɩɩmd tẽn-zẽng ye. La m bãngame tɩ ne a Zeova sõngre m tõe n maana bũmb fãa, hal tɩ yɩ-m noogo. Tẽegda maam no-rɛɛs a Zeremi goamã. A yeelame: “Zeova, yãmb belga maam.” (Zer. 20:7) N-ye. A kõ-d-la bõn-sõma wʋsgo, la bark toor-toor d sẽn da pa tẽede. A kɩtame meng tɩ m paam n kẽ sɩlg naoor wʋsg n tog sore, wa m sẽn da sɩng n datã. D kẽe sɩlg n kẽng tẽns wʋsg dũniyã ween-vɩɩs a naasã pʋsẽ, n tɩ kaag filyall-dãmba. Rẽ yaa bũmb m sẽn da pa tẽed tɩ m na n tõog n maaname, m sẽn wa n yaa bi-bilfã. M sũur yaa noog wʋsg me ne a Lesli, a sẽn sak n teel maam tʋʋm-kãensã fãa pʋgẽ wã.

D tẽegda wakat fãa tɩ d maanda bũmb fãa d sẽn nong a Zeova wã yĩnga. Bark nins d sẽn paamd rũndã-rũndã wã yaa vɩɩm sẽn ka sɛtã reng-n-lɛmbga, wakat ning a Zeova sẽn na n ‘puk a nugã n kõ bõn-vɩɩg buudã fãa a sẽn dat tɩ sekã.’—Yɩɩn. 145:16.