Biiblã pa yet bũmb rẽ wɛɛngẽ ye. La a wilgda bũmb kẽer sẽn tõe n sõng-d tɩ d wʋm b yam-yãkrã võore.

Malɛk n wa n yeel a Maari t’a na n dɩka pʋg n dog biiga. Malɛkã sẽn wa n na n taas koɛɛgã, rẽ t’a Maari ne a Zozɛf bee Nazarɛt sẽn yaa Galile tẽngã. (Luk 1:26-31; 2:4) Kaoosg zugẽ, b sẽn wa n yi Ezɩpt n lebg n wa wã, b lebg n leba Nazarɛte. Yaa be la a Zeezi bɩ-yã, tɩ b ra boond-a tɩ Nazarɛt neda. (Mat. 2:19-23) Rẽ n so tɩ b sã n gomd a Zeezi, a Zozɛf ne a Maari yell bɩ d tagsd Nazarɛt yelle.

A Maari ra tara roagd a ye yʋʋr sẽn boond t’a Elizabɛt sẽn da be Zida soolmẽ wã. A Elizabɛt ra yaa maan-kʋʋd a Zakari paga, la a Zãmbatiis ma. (Luk 1:5, 9, 13, 36) A Maari tɩ kaag-a lame, n zĩnd ne-a Zida kiuug a tãabo. Rẽ poore, a Maari lebg n leba Nazarɛte. (Luk 1:39, 40, 56) Dẽnd a Maari ra mii Zida soolmã sõma.

Kaoosg zugẽ, a Zozɛf sakame tɩ b na n sõd-a wa sẽn zems noor ning b sẽn da yiisã. Rẽ n so t’a yi Nazarɛt n kẽng Betlehɛm sẽn yaa a “Davɩɩd tẽngã,” la tẽng ning pʋgẽ bãngr-gomdã sẽn da yeel tɩ Mesi wã na n dogame wã. (Luk 2:3, 4; 1 Sãm. 17:15; 20:6; Mis. 5:2) A Maari sẽn dog a Zeezi wã poore, a Zozɛf pa kɩt t’a tall bi-pɛɛlgã n tog so-wok n leb Nazarɛt ye. B kell n paa Betlehɛm sẽn da be kɩlo a wɛ zĩigẽ ne Zerizalɛmmã. Woto, ra na n yɩɩ nana tɩ b tall biigã n kẽng wẽnd-doogẽ wã, n tɩ kõ maand nins b sẽn da segd n kõ wã.—Maan. 12:2, 6-8; Luk 2:22-24.

Wẽnnaam malɛkã ra yeela a Maari t’a biigã na n wa reega ‘a Davɩɩd geerã n yɩ Rĩma, n dɩ naam.’ Tõe t’a Zozɛf ne a Maari ra tagsdame t’a Zeezi sẽn dog a Davɩɩd tẽngẽ wã tara yõod wʋsgo. (Luk 1:32, 33; 2:11, 17) Tõe tɩ b ra tagsdame tɩ yɩta sõma tɩ b kell n pa be, n gũ tɩ Wẽnnaam wa kõ-b noy a taaba.

D pa mi b sẽn zĩnd Betlehɛm n kaoos to-to tɩ ãds-bagbã yaool n wa kaag-bã ye. La wakat kãng t’a Zozɛf ne a zakã rãmb bee roog pʋgẽ, tɩ b “biigã” pa le yaa bi-pɛɛlg ye. (Mat. 2:11) Wõnda b pa lebg n leb Nazarɛt ye. B kell n paa Betlehɛm n kaoose, hal n paam zaka.

A Erood wa n yiisa noor n yeel tɩ b kʋ “Betlehɛm . . . kom-dibli nins fãa sẽn zems yʋʋm a yi n tar n sigdã.” (Mat. 2:16) Malɛk n togs a Zozɛf no-kãnga, t’a Zozɛf ne a Maari tall a Zeezi n zoe n kẽng Ezɩpt n tɩ zĩnd be n tãag a Erood kũumã. A Zozɛf wa n talla a zakã rãmb n kẽng Nazarɛte. Bõe yĩng tɩ b pa lebg n wa Betlehɛm? Yaa a Zozɛf sẽn da zoet a Erood biig a Arkelayuus sẽn yaa nin-toaag n da be Zide wã yĩnga, n paas a sẽn tũ Wẽnnaam keoogrã yĩnga. Be, a ra tõe n wuba a Zeezi t’a yɩ wẽn-tũud hakɩɩka.—Mat. 2:19-22; 13:55; Luk 2:39, 52.

Wõnda a Zozɛf kii nand t’a Zeezi pak sor tɩ ned tõe n kẽng saasẽ. Dẽnd a Zozɛf na n vʋʋg n vɩɩmda tẽngã zugu. Neb wʋsg na n tõog n yã-a lame, n sok-a sogsg n bãng bũmb ning sẽn kɩt tɩ yẽ ne a Maari kell n pa Betlehɛm a Zeezi rogmã poorã.