1-2. Zu-loe-bʋs la kiris-nebã maood ne rũndã-rũndã, tɩ yaa wa sẽn da yaa to-to ne a Lotã?

 TÕND sã n get dũniyã nebã sẽn tʋmd tʋʋm-dẽgd nins rũndã-rũndã wã, kɩtdame tɩ d me sũur sãamd wa a Lote. A Lot sẽn da mi t’a saasẽ Ba wã kisa tʋʋm-wẽnsã, a ra ‘sãamda a sũur wʋsg yel-wẽn-maandbã nin-yoolem tʋʋmã yĩnga.’ (2 Pɩy. 2:7, 8) A Lot sẽn da zoet Wẽnnaam la a nong-a wã yĩnga, a pa naag a wakatẽ nebã n tʋm tʋʋm-yoodã ye. Rũndã-rũndã, tõnd me vɩɩ ne neb sẽn pa sakd a Zeova tagsg sẽn yaa a soab ne yoobã ye. Baa ne rẽ, d sã n nong Wẽnnaam la d zoet-a wa sẽn segdã, d tõe n kell n yɩɩ yɩlma.—Yel. 14:2.

² Rẽ wɛɛngẽ, a Zeova kõ-d-la sagls sẽn be Yel-bũn sebrã pʋgẽ n kengd raoodo. Sagls nins sẽn be be wã sɩd tõe n nafa kiris-nebã fãa, b rap la b pagba, b kom-bɩɩs la b nin-kẽemba.

3. Sã n yaa ne Yel-bũn 17:3, bõe yĩng tɩ d segd n kogl d sũurã? (Ges-y fotã me.)

³ Sẽn yɩɩd fãa, bũmb ning sẽn kɩt tɩ d segd n kogl d sũurã yaa t’a Zeova feesda d sũyã. Woto rat n yeelame t’a getame tɩ zʋʋg bũmb nins neb a taabã sẽn tõe n yã wã, la t’a nee bũmb ning sẽn sɩd be d sũurẽ wã. (Karm-y Yel-bũn 17:3.) D sã n tagsd a saglsã sẽn tõe n sõng-d tɩ d wa paam vɩɩm sẽn kõn sa wã yell wakat fãa, a na n nong-d lame. (Zã 4:14) Woto, d pa na n bas t’a Sʋɩtãan ne a dũniyã sẽn yɛlgd ziri ningã kẽ d yamã ye. D leb n pa na n dɩk nin-wẽnsã togs-n-taar n tall manesem-wẽns ye. (1 Zã 5:18, 19) Tõnd ne a Zeova zoodã pãng sã n paasdẽ, d na n  maneg n nong-a lame la d waoogd-a. D sẽn pa rat n maan bũmb n sãam d Ba wã sũurã yĩnga, d pʋd n pa rat n tags wẽng maaneg yell ye. D yam sã n wa be wẽng maanego, d tõe n soka d meng yaa: ‘A Zeova sẽn wilg t’a nonga maam wʋsgã, m yɩta wãn n maan bũmb sẽn na n sãam a sũuri?’—1 Zã 4:9, 10.

4. Wãn to la a Zeova zoeesã sõng saam-bi-poak a ye t’a pa maan sẽn yaa wẽnga?

⁴ Saam-bi-poak a ye sẽn be Korowasi t’a yʋʋr boond t’a Marta paama makre, n da naan n yo. A yeelame: “Ra yaa toog ne-m tɩ m tags neere, la m tõog m meng n da maan sẽn yaa wẽng ye. La m sẽn da zoet a Zeova wã kogl-m lame.” b Wãn to la a Zeova zoeesã sɩd tõe n kogl neda? A Marta yeelame t’a bʋgsa yoobã sẽn tõe n wa ne yɛl ninsã zugu. Tõnd me tõe n maana woto. Sẽn yaa wẽng n tɩ yɩɩd yaa tɩ yoobã sãamda a Zeova sũuri. Tõe n kɩtame me tɩ d pa tõog n tũ-a wakat sẽn kõn sa yĩng ye.—Sɩng. 6:5, 6.

5. Yam-bʋg la d tõe n dɩk bũmb ning sẽn paam a Leo wã pʋgẽ?

⁵ D sã n zoet a Zeova, d pa na n bao padems n tũ neb sẽn maand bõn-wẽns ye. A Leo sẽn be Kõngo wã bãnga rẽ. Yʋʋm a naas a sẽn deeg lisgã poore, a wa n yik n tara tũud-n-ta-wẽnse. A ra tagsdame t’a sã n pa naagd-b n tʋmd tʋʋm-wẽnsã, a pa beegd a Zeova ye. La pa yã n kaoos la a tũud-n-ta-wẽnsã kɩt t’a lebg rã-yũud la yoaad ye. A wa n tagsa bũmb ning a roagdbã sẽn yaa a Zeova Kaset rãmbã sẽn da zãms-a wã yelle, la a sẽn pa le tar sũ-noogã yelle. Rẽ puka a ninã. Ne  kãsem-dãmbã sõngre, a tõog n lebg n waa a Zeova nengẽ. Rũndã-rũndã, a yaa kãsem-soab la zall so-pakd hal t’a sũur noome.

6. D na n goma bũmb a yiib b sẽn mak ne pagb yelle. Bãmb la bʋse?

⁶ Bɩ d gom Yel-bũn sak a 9 wã yelle. Be, b gomda yam ne yalemd yelle, n dɩk-b n mak ne pagba. (Ges-y Rom dãmb 5:14; Galat-rãmb 4:24.) D sã n wa gomd b yelle, bɩ y tẽeg t’a Sʋɩtãan dũniyã neb nonga yoobo, la yoobã yɛl gesgo. (Efɛɛ. 4:19) Dẽnd yɩta sõma tɩ d ket n bɩɩsd wẽn-zoeere, la d zãag d mens ne sẽn yaa wẽnga. (Yel. 16:6) Woto wilgdame tɩ bũmb ning b sẽn gomd sag-kãngã pʋgẽ wã tõe n nafa d fãa, tɩ d yaa rao wall paga. Sag-kãng pʋgẽ, b yeelame tɩ yamã ne yalemdã b sẽn mak ne pagbã boonda sẽn pa tar-b minimã, rat n yeel tɩ “sẽn pa tar-b yamã.” Yaa wa b ned kam fãa sẽn yet yaa: ‘Wa-y mam doogẽ wã, n dɩ rɩɩbo.’ (Yel. 9:1, 5, 6, 13, 16, 17) La bũmb ning sẽn paamd sẽn sakd-b boollã yaa toor-toor wʋsgo.

7. Sã n yaa ne Yel-bũn 9:13-18 wã, bõe n paamd neb nins sẽn sakd pʋg-yalmã boollã? (Ges-y fotã me.)

⁷ D gom ‘pʋg-yalmã’ boollã yelle. (Karm-y Yel-bũn 9:13-18.) A zẽkda a koɛɛg n boond sẽn pa tar-b minimã n yetẽ yaa: ‘Wa-y ka’ tɩ d rɩ rɩ-noodo, hal tɩ yãnd pa tar-a ye. La bõe n na n paam-ba? “Neb nins sẽn ki n pa le tõe n maan bũmbã bee be.” Tõe tɩ rẽ tẽegda yãmb makr a taab sẽn be Yel-bũn sebrã pʋgẽ. B sagend-d lame tɩ d gũus d meng ne “pʋg-wɛgeng” la “pʋg-yoodre.” B paasame t’a “roogã sigda kũum zĩigẽ.” (Yel. 2:11-19) Yel-bũn 5:3-10 pʋgẽ me, b yetame tɩ d gũus ne “pʋg-wɛgeng” a to, bala “a naoã sigda kũum zĩigẽ.”

8. Tõe n wa yɩɩ tɩlɛ tɩ d yãk yam bõe wɛɛngẽ?

⁸ Neb nins sẽn wʋmd ‘pʋg-yalmã’ boollã segd n yãka b sã n na n sakame bɩ n zãgse. Tõe n wa yɩɩ tɩlɛ tɩ tõnd me yãk yam a woto buudu. B sã n wa pẽdgd tõnd n dat tɩ d yo, wall d sã n wa yã yoob yɛl ẽntɛrnetã pʋgẽ wall zĩig a to, bõe la d na n maane?

9-10. Bõe yĩng tɩ d segd n zãag d mens ne yoobo?

⁹ Bũmb nins sẽn kɩt tɩ d segd n zãag d mens ne yoobã waoogame. B wilgame tɩ ‘pʋg-yalmã’ yetame yaa: “Wagdem koom yaa noogo.” Wagdem koomã yaa bõe? Biiblã pʋgẽ, b rɩka pag ne rao sẽn kẽ kãadem sẽn tõe n kẽ ne taab n paam sũ-noog ningã n mak ne ko-maasga. (Yel.  5:15-18) Pag ne rao sẽn kẽ kãadem tɩ zems laloa wã tara sor n tõe n kẽ ne taaba, n paam sũ-noogo. La yaa toor fasɩ ne “wagdem koom.” Tõe tɩ yaa yoob yell la b sẽn gomdã. Naoor wʋsgo b soosd n maanda rẽ, wa wagdr sẽn soosd n zuudã. “Wagdem koom” tõe n wõnda a yaa noog wʋsgo, sẽn yɩɩd fãa, neb nins sẽn maand woto wã sã n tagsd tɩ b pa na n bãnge. B belgda b mense, bala a Zeova nee bũmb fãa. Bũmb kae n sãamd sũur n yɩɩd d sẽn na n kong a lohormã ye. Dẽnd bũmb kae n yaa “noog” yel-kãngã pʋgẽ ye. (1 Kor. 6:9, 10) Rẽ wata ne zu-loees a taab me.

¹⁰ Ned sã n yo, a tõe n ninga a meng yãnde, tõe n kɩtame t’a tagsdẽ t’a ka võore, a tõe n dɩka pʋg tɩ pa tũ ne a raabo, wall a wã a zakã. Vẽenega, d sã n zãag d meng ne pʋg-yalmã ‘roog’ la a rɩɩbã, yaa yam bũmbu. Neb nins sẽn yoodã sẽn sãamd bãmb ne a Zeova zoodã sẽn yãk a toogo, b wʋsg lʋɩta bãas n kiid pẽba. (Yel. 7:23, 26) Sak a 9 vɛrse 18 wã baasgẽ b yeelame yaa: “Neb nins sẽn sig pagã yirã bee Yaoogã zĩ-zulumsẽ.” La bõe yĩng tɩ neb wʋsg sakd pagã boollã sẽn wat ne yɛl wʋsgã?—Yel. 9:13-18.

11. Bõe yĩng tɩ yoobã yɛl gesg yaa wẽng wʋsgo?

¹¹ Bũmb sẽn wae d sẽn segd n zãag d mens ne yaa yoobã yɛl gesgo. Neb kẽer tagsdame tɩ yoob yɛl gesg pa wẽng ye. La rẽ tõe n wãa neda, n kɩt t’a pa le nand a meng la neb a taabã, t’a basg me yaa toogo. F sã n ges yoob yɛla paada f yamẽ, tɩ yɩl n yĩm b yell yaa toogo. Sẽn yɩɩd fãa, yoobã yɛl gesg pa kʋʋd tʋls-wẽnsã ye. A kɩtdame tɩ b paamd pãnga. (Kolo. 3:5; Zak 1:14, 15) Sɩd me, neb wʋsg sẽn ges yoobã yɛl wa n baas n yoome.

12. Bõe la d tõe n maan tɩ wilg tɩ d gũusda d mens ne fot-rãmb sẽn tõe n nek tʋlsem?

¹² D sẽn yaa kiris-nebã, fot wall video sẽn wilgd yoob yɛl sã n wa tiig n puk d ordinatɛɛr wall d portaabl zugu, bõe la d segd n maane? D segd n yɩɩ tao-tao n pag ordinatɛɛrã wall portaablã. D sã n tẽeg tɩ bũmb ning sẽn tar yõod n tɩ yɩɩd yaa tõnd ne a Zeova zoodã, na n sõng-d lame tɩ d tõog n maan dẽ. Baa fot-rãmb kẽer sẽn pa maneg n yaa yoob yɛl tõe n neka tʋlsem. Bõe yĩng tɩ d segd n zãag d mens ne-ba? Bala d pa rat n maan baa yaa bũmb bilf sẽn tõe n wa kɩt tɩ d yo d sũurã pʋgẽ ye. (Mat. 5:28, 29) Kãsem-soab a ye sẽn be Tayland t’a yʋʋr boond t’a Davɩɩd yeelame: “M sokda m meng yaa: ‘Baa fot-rãmbã sẽn pa maneg n wilgd yoob yɛlã, m sã n ket n getẽ a Zeova sũur na n yɩɩ noog ne-m sɩda?’ Sokr a woto sõngda maam tɩ m tʋm ne yam.”

13. Bõe n tõe n sõng-d tɩ d tʋm ne yam?

¹³ D sã n zoet a Zeova n pa rat n maan bũmb n sãam a sũuri, na n sõng-d lame tɩ d tʋm ne yam. Wẽnnaam zoees yaa “yam sɩngre,” bɩ a yẽgre. (Yel. 9:10) B goma rẽ yell Yel-bũn sak a 9 wã sɩngrẽ. Be, b maka “yam hakɩɩkã” me ne paga.

14. Yel-bũn 9:1-6 pʋgẽ, b boonda nebã tɩ b maan bõe?

¹⁴ Karm-y Yel-bũn 9:1-6. Vɛrse-kãensã pʋsẽ, boollã yita a Zeova sẽn yaa d Naandã, soab ning nengẽ yam buud fãa sẽn yitã nengẽ. (Yel. 2:6; Rom. 16:27) Ka wã b gomda ro-bedr sẽn tar ra-lugs a yopoe yelle. Woto wilgdame t’a Zeova yaa kõata, la t’a sakd n deega neb nins  fãa sẽn dat t’a zãms-b tɩ b lebg yam dãmbã.

15. Bõe la a Zeova boond tõnd tɩ d wa maane?

¹⁵ A Zeova yaa kõat wʋsgo. B sẽn gom ‘yam hakɩɩkã’ b sẽn mak ne pagã yell to-to Yel-bũn sak a 9 pʋgẽ wã wilgdame t’a Zeova yaa kõata, la t’a kõta tõnd bõn-sõma wʋsgo. Kibarã wilgame tɩ yam hakɩɩkã b sẽn mak ne pagã rʋga a nemd tɩ bɩ sõma, n kalem a divẽ la a maneg a taable. (Yel. 9:2, notã) Sẽn paase, vɛrse a 4 ne a 5 wã pʋgẽ, “a [yam hakɩɩkã] yeta sẽn pa tar-b yamã yaa: ‘Wa n dɩ-y mam dɩɩbã.’” Bõe yĩng tɩ d segd n kẽng yam hakɩɩkã roogẽ n tɩ rɩ a rɩɩbã? A Zeova ratame t’a kambã tall yam la b zĩnd bãane. A pa rat tɩ d bao yɛl n kõ d mense, n wa maand d bãngẽ n yaool n dɩk yam ye. Rẽ n so t’a ‘bĩng yam nin-tɩrsã yĩnga.’ (Yel. 2:7) D sã n zoet a Zeova wa sẽn segdã, d na n dat n taa a yam. D na n kelgda a saglsã la d tũudẽ, tɩ d sũy noome.—Zak 1:25.

16. Wãn to la wẽn-zoeerã sõng a Alẽ t’a bãng n yãk yam, la rẽ woma bi-bʋse?

¹⁶ D ges wẽn-zoeerã sẽn sõng a Alẽ to-to t’a bãng n yãk yam. A Alẽ yaa kãsem-soab n le yaa lekoll karen-saamba. A yeelame yaa: “Mam karen-saam-taasã wʋsg geta yoob yɛla, n yetẽ tɩ yaa sẽn na yɩl n paas b bãngre.” La a Alẽ pa bas tɩ b belg-a ye. A paasame: “Mam sẽn zoet Wẽnnaamã yĩnga, m zãgsa fasɩ tɩ m kõ ges film-kãens ye. Sẽn paase, m togs-b-la bũmb ning sẽn kɩt tɩ m pa na n maan dẽ wã.” A tũu ‘yam hakɩɩkã’ saglgã sẽn yet tɩ d ‘kẽn bãngrã sor zug tɩrgã.’ (Yel. 9:6) A Alẽ sẽn zãgs fasɩ t’a kõn maan wa a karen-saam-taasã yɩɩ kẽer noog hal tɩ b sɩng Biiblã zãmsgo, la b wat tigissã.

17-18. Bark-bʋs la neb nins sẽn sakd yam hakɩɩkã boollã paamda, la bõe la b na n wa paam beoog sẽn wate? (Ges-y fotã me.)

¹⁷ A Zeova sẽn dɩk makr n gom pagb a yiibã yellã, a wilga tõnd d sẽn tõe n maan n wa paam bark beoog sẽn wate. Neb nins sẽn sakd ‘pʋg-yalmã’ boollã maanda b sẽn tõe fãa n na n paam sũ-noog yoobã pʋgẽ. B tagsda sũ-noog ning b sẽn na n paam zĩig pʋgẽ wã yelle, n pa tagsd beoog yell ye. B na n baasa “Yaoogã zĩ-zulumsẽ” wã.—Yel. 9:13, 17, 18.

¹⁸ Neb nins sẽn sakd yam hakɩɩkã boollã yɛlã na n yɩɩ toor fasɩ. Nin-kãens paamda rɩɩb sẽn segl sõma la sẽn kõt laafɩ masã menga, rat n yeel tɩ bũmb nins sẽn paasd bãmb ne a Zeova zoodã pãngã. (Eza. 65:13) A Zeova tũnuga ne no-rɛɛs a Ezayi n yeel yaa: “Kelg-y maam  neere, tɩ y na n dɩɩ rɩɩb sẽn yaa sõma, la y sũur na n yɩɩ noog wʋsg ne bũmb ning sẽn sɩd tar barkã.” (Eza. 55:1, 2) D modgame n nong a Zeova sẽn nongã, la d kis a sẽn kisã. (Yɩɩn. 97:10) D boonda neb a taabã ne sũ-noogo, tɩ b wa rɩ ‘yam hakɩɩkã’ yõodo. Yaa wa d sẽn be “tẽngã zĩ-zãntsẽ wã n moondẽ yaa: ‘Bɩ sẽn pa tar-b minimã wa ka.’” Bark nins tõnd ne sẽn na n sak-b boollã sẽn na n paamã pa na n naf tõnd rũndã-rũndã bal ye. B paada wakat fãa, n na n sõng-d tɩ d kell n ‘kẽn bãngrã sor zug tɩrga,’ n wa paam vɩɩm sẽn pa satã.—Yel. 9:3, 4, 6.

19. Sã n yaa ne Koɛɛg soab 12:13, 14, bõe la d segd n yãk yam n maane? (Ges-y zĩ-gũbrã me: “ Wẽnnaam zoees nafda tõndo.”)

¹⁹ Karm-y Koɛɛg soab 12:13, 14. Bɩ wẽn-zoeerã kell n kogl d sũyã, la a sõng-d tɩ d kell n yɩ yɩlem d yel-manesmã wɛɛngẽ la Wẽnnaam tũubã wɛɛngẽ, dũni-kãngã yaoolem wakatã sasa. Wẽn-zoeer a woto na n sõng-d lame tɩ d bool neb wʋsg wa d sẽn tõe tɛk tɩ b sak ‘yam hakɩɩkã’ boollã, la b rɩ a yõodo.