1. Wakat bʋg la a Zeezi maan a pipi yel-solemdã?

 MAMS-Y y yamẽ bũmb ning sẽn maan yʋʋmd 29 a Zeezi rogmã poorã, a sẽn wa n sɩng a koɛɛgã moonegã. Yẽ ne a ma a Maari la a karen-biis kẽer kẽnga yi-kãadem kibs Kana. Yaa tẽn-bil sẽn da be a Zeezi ba-yirã sẽn yaa Nazarɛtã rɩtg sẽnese. A Maari ra mii yi-kãadã zak rãmba. Tõe t’a ra sõngd-b lame n get sãambã yelle. La kibsã sasa, bũmb n maan n da tõe n sãam pagã ne a sɩdã ne b zakã rãmb sũuri. Divẽ wã wa n saame. b Tõe tɩ sãambã sõor yɩɩ wʋsg n yɩɩd b sẽn da tẽedã. A Maari yɩɩ tao-tao n yeel a Zeezi yaa: “B pa le tar divẽ ye.” (Zã 2:1-3) Bõe la a Zeezi maan-yã? A maana bũmb sẽn ling nebã. A maana yel-solemde, n kɩt tɩ koom lebg “divẽ-sõngo.”—Zã 2:9, 10.

2-3. a) A Zeezi talla a pãn-kãsengã n maan bõe? b) D sã n bʋgs a Zeezi yel-soalmã zugu, wãn to la rẽ tõe n naf-do?

² A Zeezi koe-moonegã sasa, a maana yel-soalem a taaba. c A talla a pãn-kãsengã n sõng neb tusa. Wala makre, ad yel-soalem a yiib a sẽn maane: A rɩlga rap tus a nu, tɩ rẽ poor t’a rɩlg rap tus a naase. D sã n naag nin-kãensã fãa taaba, n paas pagbã la kambã sẽn da be be wã, b sõorã tog  n yɩɩda neb tus pisi la a yopoe. (Mat. 14:15-21; 15:32-38) Yel-solem-kãensã a yiibã sasa, a Zeezi sãooga bãad-dãmb wʋsg me. (Mat. 14:14; 15:30, 31) Tags-y n ges-y neb kʋʋngã sũur sẽn yɩ noog to-to, b sẽn paam t’a Zeezi maan yel-solemd n sãoog b bãasã la a rɩlg-bã!

³ Rũndã-rũndã, d tõe n dɩka yam yel-soalem nins a Zeezi sẽn maanã pʋgẽ. Sõs-kãngã pʋgẽ, d na n yãa yel-solem-kãens sẽn wilgd tõnd bũmb ninga, tɩ tõe n keng d tẽebã. A Zeezi sẽn wa n maand yel-soalmã, a wilgame t’a yaa sik-m-meng soaba, la nimbãan-zoɛta. D na n yãa d sẽn tõe n dɩk a togs-n-taar to-to.

4. A Zeezi yel-soalmã wilgda tõnd bõe tɩ kengd tẽebo?

⁴ Yel-soalmã a Zeezi sẽn maanã wilgda tõnd bũmb toor-toor yẽ mengã zugu. Kengda d tẽebã, la pa rẽ bal ye. Wilgda tõnd bũmb toor-toor a Ba wã me zugu. Bala yaa a Zeova n kõ a Zeezi tõog t’a maan yel-soalmã. Tʋʋm 10:38 yetame: “Wẽnnaam zae-a-la [a Zeezi] ne vʋʋsem sõng la a kõ-a pãnga. A gilga tẽngã fãa pʋgẽ n da maand neer la a sãoogd neb nins fãa Sʋɩtãanã sẽn da namsdã, Wẽnnaam sẽn da be ne-a wã yĩnga.” Tẽeg-y t’a Zeezi rɩka a Ba wã togs-n-taar kɛpɩ, a sẽn maan la a sẽn yeel fãa pʋgẽ. Yɩɩ woto, yel-soalmã a sẽn maanã pʋgẽ me. (Zã 14:9) D gom bũmb a tãab yell a Zeezi yel-soalmã sẽn wilgd tõndo.

5. Bõe n kɩt t’a Zeezi maan yel-soalma? (Matiye 20:30-34)

⁵ Pipi, a Zeezi ne a Ba wã nonga tõnd wʋsgo. A Zeezi sẽn wa n be tẽngã zugã, a tũnuga ne a pãn-kãsengã n sõng neb sẽn da namsde, n wilg t’a nong-b lame. Daar a ye, rap a yiib sẽn yaa zoens zẽka b koees n kos a Zeezi t’a sõng-ba. (Karm-y Matiye 20:30-34.) Tẽeg-y tɩ b “nimbãaneg yõk-a lame,” t’a sãoog-ba. Gɛrk gom-bil ning b sẽn lebg tɩ ‘nimbãaneg yõkame’ wã wilgda ned sũur sẽn sãam wʋsgo, a sẽn ne a to sẽn namsd yĩnga. Nimbãan-zoeer a woto sẽn wilgd tɩ f nonga f to wʋsgã kɩtame t’a Zeezi rɩlg neb kom sẽn da tare, la a sãoog wãoore. (Mat. 15:32; Mark 1:41) D tõe n basa d yam tɩ tõnd Wẽnnaam a Zeova, soab ning ‘nimbãan-zoeer sẽn yaa kãsengã,’ la a Bi-riblã nonga tõnd wʋsgo, la tɩ b sã n ne d sẽn namsdã, b sũur sãamda wʋsgo. (Luk 1:78; 1 Pɩy. 5:7) B tʋlla ne b sũy fãa n kɩt tɩ ãdem-biisã namsgã fãa sa!

6. Tõ-bʋg la Wẽnnaam kõ a Zeezi?

⁶ Yiibu, Wẽnnaam kõo a Zeezi tõog sẽn na yɩl t’a welg ãdem-biisã zu-loeesã fãa. A Zeezi sẽn maan yel-soalmã, a wilgame t’a tara tõog n tõe n welg d zu-loees nins fãa d sẽn pa tõe n welg d toorã. Wala makre, a tõe n menesa bũmb ning sẽn wa ne ninsaalbã namsgã, rat n yeel tɩ yel-wẽndã d sẽn dog ne wã, la bãasã ne kũumã rẽ sẽn wa ne wã. (Mat. 9:1-6; Rom. 5:12, 18, 19) Yel-soalmã a Zeezi sẽn maanã wilgdame t’a tõe n sãooga bãas “buud fãa,” la a vʋʋg kũum menga. (Mat. 4:23; Zã 11:43, 44) Sẽn paase, a tara pãng n tõe n kɩt tɩ sob-kãseng yõke, la a tõog zĩn-dãmba. (Mark 4:37-39; Luk 8:2) D sẽn mi t’a Zeova kõo a Bi-riblã pãn-kãseng woto wã, kɩtame tɩ d tar bas-m-yam!

7-8. a) A Zeezi sẽn maan yel-soalem ninsã kɩtame tɩ d tõe n bas d yam ne bõe? b) Yel-solemd bʋg la y gũud ne y sũur fãa dũni-paalgã pʋgẽ?

⁷ Tãabo, d tõe n kɩsa sɩd zãng tɩ bark nins Wẽnnaam Rĩungã sẽn na n wa ne wã pa na n vaal ye. A Zeezi sẽn maan yel-soalem  nins a sẽn wa n be tẽngã zugã sõngda tõnd tɩ d bãng t’a sẽn yaa Wẽnnaam Rĩungã sẽn be saasẽ wã Rĩmã, a na n wa maana bõn-kãsems sẽn yɩɩd rẽ. Tags-y n ges-y yɛlã sẽn na n yɩ to-to, Kiristã sã n wa sɩng naam dɩɩb tẽngã zugu. D na n paama laafɩ hakɩɩka, bala a na n menesa bãag buud fãa, la komslem buud fãa ninsaalbã sẽn tare. (Eza. 33:24; 35:5, 6; Vẽn. 21:3, 4) D pa na n tol n le yãb kom, wall d maan sũ-sãang sabab-wẽng yĩng ye. (Eza. 25:6; Mark 4:41) D sũur na n yɩɩ noog wʋsg d sẽn na n le yã d neb nins ‘sẽn be yaad pʋsẽ wã.’ (Zã 5:28, 29) Yel-solemd bʋg la y gũud ne y sũur fãa dũni-paalgã pʋgẽ?

⁸ A Zeezi sẽn da maand yel-soalem ninsã ra yaa ne sik-m-meng la nimbãan-zoeer wʋsgo. Yɩta sõma tɩ d rɩk a togs-n-taar n bɩɩs zʋg-sõma a woto. D gom yel-soalem a yiib yelle. Pipi, d na n goma yi-kãadem kibsã sẽn zĩnd Kana wã yelle.

9. Bõe la a Zeezi maan yi-kãadmã kibs sasa? (Zã 2:6-10)

⁹ Karm-y Zã 2:6-10. Divẽ wã sẽn wa n sa yi-kãadmã kibs sasa wã, ra yaa tɩlɛ t’a Zeezi maan bũmb bɩ? Ayo. B ra pa togs bãngr-gomd n wilg tɩ Mesi wã na n tũnuga ne yel-solemd n maan divẽ ye. Mams-y n ges-y y sẽn na n maand y kãadem kibsa, tɩ bõn-yũudlã fãa wa sa. Zakã neb nimbãaneg yõka a Zeezi, sẽn yɩɩd fãa pagã ne a sɩdã. Rẽ kɩtame t’a ra rat n  maan bũmb n sõng-ba, tɩ b ra yã yãnd ye. Wa d sẽn zoe n gom tɩ loogã, a maana yel-solemde. A kɩtame tɩ koom sẽn ta litr kobs-tã la pis-wɛ lebg divẽ sẽn yaa sõma wʋsgo. Tõe t’a sẽn maan divẽ wã wʋsgã, yaa sẽn na yɩl tɩ sã n kell bɩ yi-kãadã ne a pagã tõe n le wa yũ, wall b rɩk n koos n paam ligdi. Sãmbg kae tɩ pagã ne a sɩdã sũur yɩɩ noog wʋsgo!

10. Bõe la b wilg kibarã sẽn be Zã sak a 2 pʋgẽ tɩ tar yõod wʋsgo? (Ges-y fotã me.)

¹⁰ D ges bũmb kẽer sẽn tar yõod wʋsgo, kibarã sẽn be Zã sak a 2 pʋgẽ wã. Gũus-y n ges-y tɩ pa a Zeezi a toor n pids sĩmsã koom ye. A sẽn da pa rat tɩ nebã pẽg-a wã yĩnga, a yeela tʋm-tʋmdbã tɩ b pids sĩmsã koom. (Vɛrse a 6, 7) A Zeezi sẽn kɩt tɩ koomã lebg divẽ wã poore, pa yẽ mengã n yãk n kõ kibsã yel-gɛt t’a lemb ye. Yaa tʋm-tʋmdbã la a kɩt tɩ b maan rẽ. (Vɛrse a 8) Yaa vẽeneg t’a Zeezi pa yãk divẽ wã n tees sãambã, la a wuk a meng n yeel yaa: ‘Lemb-y divẽ-kãngã n gese, yaa maam n maan-a mas-masã!’

11. A Zeezi yel-solemdã wilgdã tõnd bõe?

¹¹ A Zeezi sẽn maan yel-solemd n kɩt tɩ koom lebg divẽ wã wilgda tõnd bõe? Wilgda tõnd t’a yaa sik-m-meng soaba. A Zeezi pa wuk a menga, yel-solemdã a sẽn maanã yĩng ye. Sɩd me, a zɩ n wuk a meng bũmb a sẽn maan yĩng ye. A pʋd n sikd a menga, n wilgd wakat fãa tɩ yaa a Ba wã n tog ne ziir la pẽgre. (Zã 5:19, 30; 8:28) D sã n dɩk a Zeezi togs-n-taar n tall sik-m-menga, d pa na n wuk d meng bũmb d sẽn maan yĩng ye. Sẽn yaa bũmb ning fãa la d tõog n maan a Zeova tũubã pʋgẽ, bɩ d ra pẽg d meng ye. D wilg tɩ yaa Wẽnnaam ning d sẽn tũudã n tog ne pẽgre. (Zer. 9:23, 24) D segd n kõ-a-la waoogr ning a sẽn segd ne wã. Sẽn yaa a soab fãa, d pa tol n tõe n maan bõn-sõng tɩ pa tũ ne a Zeova sõngr ye.—1 Kor. 1:26-31.

12. Bõe me la d tõe n maane, n dɩk a Zeezi togs-n-taar sik-m-mengã wɛɛngẽ? Rɩk-y makre.

¹² Ad bũmb a to me d sẽn tõe n maane, n dɩk a Zeezi togs-n-taar sik-m-mengã wɛɛngẽ. Mams-y yamẽ, kãsem-soab sẽn na n dɩk sẽk wʋsgo, n sõng bi-bɩɩg sẽn yaa kãsem-sõngda, t’a segl a meng n na n wɛgs a pipi zãma taoor sõsga. Kãsem-soabã sõngrã kɩtame t’a tõog n wɛgs a sõsgã tɩ yɩ sõma, hal tɩ tigingã neb sũy yɩ noogo. Tigsgã poore, ned n yeel kãsem-soabã yaa: ‘Saam-biig a zagl sõsgã yɩɩ sõma wʋsgo, bɩ bõe?’ Rẽ yĩnga, na n yɩɩ tɩlɛ tɩ kãsem-soabã yeel yaa: ‘Yaa sɩda, la m dɩka sẽk wʋsg n sõng-a’ sɩda? Bɩ a na n talla sik-m-meng n yeel yaa: ‘Yaa sɩda. A modga wʋsgo. M sũur nooma wʋsg ne-a.’ D sã n yaa sik-m-meng soaba, d pa na n dat tɩ b pẽg-do, d sẽn sõng ned yĩng ye. D sũur noomame, d sẽn mi t’a Zeova nee d sẽn maanã, la t’a sũur nooma ne rẽ wã. (Ges-y Matiye 6:2-4; Ebre. 13:16) Yaa vẽeneg tɩ d sã n dɩkd a Zeezi togs-n-taar n yaa sik-m-mens rãmba, nooma a Zeova.—1 Pɩy. 5:6.

13. A Zeezi sẽn wa n kolgd Nayin tẽngã, bõe la a yã-yã, la bõe la a maan-yã? (Luk 7:11-15)

¹³ Karm-y Luk 7:11-15. Mams-y y yamẽ bũmb ning sẽn maane, a Zeezi sẽn wa n be tẽngã zug n moond koɛɛgã. Daar a ye, a kẽnga Nayin sẽn yaa Galile galʋ-tẽng sẽn pẽ Sunemmã. Yaa be la no-rɛɛs a Eliize sẽn vʋʋg pag a ye bi-riblã. (2 Rĩm. 4:32-37) A Zeezi sẽn wa n kolgd tẽngã rignoorẽ, a yãa b sẽn tʋk kũum n yit tẽngã. Ra yaa sũ-sãang tɛkẽ, bala ra yaa pʋg-kõor bi-yend la sẽn maan kaalmã. La  pʋg-kõorã ra pa a yembr ye. Neb kʋʋng sẽn yi tẽngã pʋg n da be ne-a. A Zeezi kɩtame tɩ nebã sẽn da tʋk kũumã n kẽndã yalse, t’a maan bũmb n sõng pʋg-kõorã sũur sẽn da sãam wʋsgã. A vʋʋga a biigã. Evãnzill-dãmbã pʋgẽ, b goma kũ-rãmb a tãab a Zeezi sẽn vʋʋg yelle. Yãoa la pipi soaba.

14. Bõe la b togs Luk sak a 7 wã pʋgẽ tɩ tar yõod wʋsgo? (Ges-y fotã me.)

¹⁴ D gom bũmb a taab yell sẽn tar yõod wʋsg b sẽn togs tɩ be Luk sak a 7 wã pʋgẽ. Gũus-y n ges-y t’a Zeezi ‘yãa pagã’ sũur sẽn sãam wʋsgã, tɩ rẽ poor ‘t’a nimbãaneg yõk-a.’ (Vɛrse 13) Dẽnd tõe t’a Zeezi gesa pagã sẽn yɛg a biigã kũumã n kẽnd la a yãbdã, tɩ rẽ kɩt t’a nimbãaneg yõk-a. A Zeezi pa wilg bal t’a kʋmda pagã ye. A wilgame me t’a zoeta a nimbãanega. Sãmbg kae t’a goma ne-a ne bʋgsem n yeel yaa: “Da le yãb ye.” Rẽ poore, a yãka yam n na n maan bũmb n sõng-a. A vʋʋga biigã sẽn da ki wã, n “lebs-a a ma wã.”—Vɛrse 14, 15.

15. A Zeezi sẽn maan yel-solemdã wilgda tõnd bõe?

¹⁵ A Zeezi sẽn maan yel-solemd n vʋʋg pʋg-kõorã biigã wilgda tõnd bõe? Wilgdame tɩ d segd n zoee neb nins neb sẽn maan kaalmã nimbãanega. Yaa sɩd tɩ d pa tõe n vʋʋg kũum wa a Zeezi ye. La wa a Zeezi, tõnd me tõe n maaga d yĩng n ges d sẽn tõe n kʋm neb nins neb sẽn maan kaalmã to-to. D tõe n goma gomd wall d maan bũmb n sõng-ba, sẽn na yɩl n bels-ba. d (Yel. 17:17; 2 Kor. 1:3, 4; 1 Pɩy. 3:8) Gomd wall bũmb sẽn pa zem baa fʋɩ ne tõnd tõe n sõng-b-la wʋsgo.

16. Wa b sẽn bilg fotã zugã, saam-bi-poakã bi-pugl sẽn maan kaalem sẽn nan pa kaoosã kibarã wilgda tõnd bõe?

¹⁶ Ad ned kibare: Yʋʋm a wãn sẽn looge, tigsg yɩɩll sasa, saam-bi-poak a ye n yã saam-bi-poak a to sẽn yãbda. Yɩɩllã ra  gomda kũum vʋʋgrã yelle. Pag ning sẽn da yãbdã bi-pugl n da maan kaalem sẽn nan pa kaoose. Saam-bi-poakã sẽn yã rẽ wã, a tɩ kogla pagã tɩ b naag taab n yɩɩl yɩɩllã n baase. Kaoosg zugẽ, pagã yeelame yaa: “M da neeme tɩ m tẽed-n-taasã nong-m-la wʋsgo.” A sũur yɩɩ noog wʋsg a sẽn kẽng tigsgã daar-n-kãngã. A paasame: “Yaa Rĩungã roogẽ la d paamd sõngre.” D tõe n kɩsa sɩd t’a Zeova nee bũmb nins d sẽn maand n na n wilg tɩ d kʋmda ‘neb nins raood sẽn komse,’ b ned sẽn maan kaalem yĩngã, la t’a nanda rẽ.—Yɩɩn. 34:18.

17. Bõe la d yã sõs-kãngã pʋgẽ?

¹⁷ D sã n zãms Evãnzill-dãmbã sẽn gomd yel-soalem nins a Zeezi sẽn maanã yellã, tõe n kenga d tẽebã. Sõngda tõnd tɩ d bãng t’a Zeova ne a Zeezi nong-d-la wʋsgo, t’a Zeezi tara tõog n na n welg ninsaalbã zu-loeesã, la tɩ d tõe n basa d yam tɩ ka la bilfu, Wẽnnaam na n pidsa a pʋlemsã ne a Rĩungã maasem. D sã n vaees kiba-kãense, d tõe n bʋgsa d sẽn na n maan to-to n dɩk a Zeezi togs-n-taar n tall a zʋg-sõma wã buudu. Y sã n wa zãmsd Biiblã y yembre, wall y zak pʋgẽ Biibl zãmsgã sasa, y tõe n vaeesa yel-soalem a taab a Zeezi sẽn maane. Bao-y n bãng-y yam ning y sẽn tõe n dɩke, la y gom y sẽn bãngã yell ne neb a taaba. Y sã n maand woto, y na n tõog n sõsa ne neb wʋsgo, n gom goam sẽn kengd raoodo.—Rom. 1:11, 12.

18. Bõe yell la d na n gom sõsg ning sẽn pʋgdã pʋgẽ?

¹⁸ Sẽn wa n ket bilf tɩ b kʋ a Zeezi wã a vʋʋga kũum a tãab-n-soaba. Rẽ n yaa yaoolem kũum a sẽn vʋʋg tɩ b gomd a yell Biiblã pʋgẽ. La vʋʋg-kãng pa wõnd a taabã ye. Yaa a zoa a Lazaar vʋʋgrã, la yɛlã ra pa wa sẽn yɩ to-to ne a taabã ye. Evãnzillã sẽn gom yel-solem-kãng yellã wilgda tõnd bõe? Bõe la d tõe n maan n paas d tẽebã pãnga, kũum vʋʋgrã wɛɛngẽ? Sõsg ning sẽn pʋgdã pʋgẽ, d na n leoka sogs-kãense.