1. D kɩsa sɩd ne bõe?

 TÕND sẽn yaa a Zeova nin-buiidã, d miime t’a nong-d lame la t’a ratame tɩ d vɩɩmã tall barka. (Rom. 8:35-39) D kɩsa sɩd me tɩ d sã n tũud Biiblã saglsã, nafda tõnd wakat fãa. (Eza. 48:17, 18) La d sã n wa paam zu-loees d sẽn da pa tẽede, d manesem segd n yɩɩ wãna?

2. D tõe n wa maooda ne zu-loe-bʋse, la rẽ tõe n kɩtame tɩ d sokd d meng sogs-bʋse?

² A Zeova nin-buiidã fãa maooda ne zu-loeese. Wala makre, d zakã ned tõe n maana bũmb n sãam d sũuri. Tõeeme tɩ d ka laafɩ, tɩ kɩt tɩ d pa tõe n tʋm a Zeova tʋʋmã wa d sẽn datã, wall yaa sabab-wẽng n maan d sẽn beẽ wã, tɩ pa nana ne-d ye. Tõe me tɩ b namsda tõnd d tũudmã yĩnga. D sã n wa maood ne zu-loees a woto buudu, d tõe n wa sokda d meng yaa: ‘Bõe yĩng tɩ yel-kãngã paam maam? Mam maana bũmb sẽn yaa wẽng bɩ? Woto rat n yeelame tɩ m pa tar a Zeova bark bɩ?’ Yãmb zoe n soka y meng sogs-kãensã bɩ? Sã n yaa woto, bɩ y ra koms raood ye. Neb wʋsg sẽn da tũud a Zeova ne b sũy fãa talla tagsa a woto buudu.—Yɩɩn. 22:1, 2; Hab. 1:2, 3.

3. Bõe la Yɩɩn-sõamyã 34:19 wã sõngd tõnd tɩ d bãnge?

³ Karm-y Yɩɩn-sõamyã 34:19. Vɛrse wã sõngda tõnd tɩ d bãng bũmb a yiib sẽn tar yõod wʋsgo. 1) Nin-tɩrsã paamda zu-loeese. 2) A Zeova fãagda tõnd d zu-loeesã pʋsẽ. Wãn to la a Zeova fãagd tõndo? Bũmb a ye a sẽn maand yaa t’a sõngda tõnd sẽn na yɩl tɩ d tall tagsg sẽn zems dũni-kãngã vɩɩmã wɛɛngẽ. Yaa sɩd t’a Zeova  pʋlmame tɩ d sã n tũud-a, d na n paama sũ-noogo. La a pa yeel tɩ d pa na n paam zu-loees ye. (Eza. 66:14) A sagenda tõnd tɩ d tagsd beoog-daarã yelle, rat n yeel tɩ wakat ning d sẽn na n wa paam n vɩɩmd wakat sẽn kõn sa ne sũ-noogo, wa a sẽn datã. (2 Kor. 4:16-18) La nananda, a sõngda tõnd tɩ d ket n tũud-a daar ne a to fãa.—Wiis. 3:22-24.

4. Bõe yell la d na n gom sõs-kãngã pʋgẽ?

⁴ Bɩ d gom wẽn-sakdb sẽn zĩnd pĩndã la rũndã-rũndã yelle, la d ges yam ning d sẽn tõe n dɩk b kibarã pʋgẽ. Wa d sẽn na n yã wã, d tõe n paama zu-loees d sẽn da pa tẽede. La d sã n teeg a Zeova, a pa na n tol n daag-d n bas ye. (Yɩɩn. 55:22) D sã n wa gomd nin-kãens yelle, bɩ y sok y meng yaa: ‘Sã n da yaa maam, m manesem ra na n yɩɩ wãna? Wãn to la kiba-kãensã kɩtd tɩ m maneg n teeg a Zeova? Yam-bʋg la m tõe n dɩk kibarã pʋgẽ?’

5. Zu-loe-bʋs la a Zakoob paam-yã, a Laban yĩnga? (Ges-y sebrã pipi neng fotã.)

⁵ Pĩnd wẽndẽ wã, a Zeova nin-buiidã kẽer maoo ne zu-loees b sẽn da pa tẽede. Wala makre, a Zakoobe. A ba wã ra yeel-a lame t’a kẽng a Laban sẽn yaa a roagd n tũud Wẽnnaamã nengẽ, n tɩ peeg a bi-pugl a ye n maan a paga. A leb n yeela a Zakoob t’a Zeova na n ning-a-la bark wʋsgo. (Sɩng. 28:1-4) A Zakoob sɩd maana wa a ba wã sẽn yeelã. A yii Kanaã, n tog sor n kẽng a Laban yirã. A Laban ra tara kom-pugli a yiibu. A Leya ne a Rasɛlle. A Zakoob yamã kẽe a Laban bi-pugl a Rasɛll sẽn da yaa yaoã, n sak n na n tʋm yʋʋm a yopoe n kõ a Rasɛll ba wã, n yaool n paam n kẽ kãadem ne-a. (Sɩng. 29:18) La yɛlã pa yɩ wa a Zakoob sẽn da tẽed-a ye. A Laban zãmb-a lame, n dɩk a Leya sẽn yaa a bi-pugl kãsengã n kõ-a. Rasem a yopoe poore, a Laban sakame t’a Zakoob na n kẽ kãadem ne a Rasɛlle. La a yeela a Zakoob t’a segd n deng n tʋma yʋʋm a yopoe n paase. (Sɩng. 29:25-27) A Laban leb n zãmba a Zakoob a sẽn wa n tʋmd ne-a wã. Yaa hal yʋʋm pisi la a Laban sẽn zãmb a Zakoobã!—Sɩng. 31:41, 42.

6. Zu-loe-bʋs me la a Zakoob mao ne?

⁶ A Zakoob maoo ne zu-loees a taaba. A zakã nebã ra yaa wʋsgo, la a kom-dibli wã ra pa wʋmd taab wakat fãa ye. B pʋd n koosa b ba-biig a Zozɛf tɩ b tall-a n kẽng yembdo. A kom-dibli a yiib a Sɩmeyõ ne a Levi me maana bũmb sẽn sãam b zakã rãmb yʋʋre, la a Zeova yʋʋre. Sẽn paase, a Zakoob pʋg-nongr a Rasɛll maana kaalem a sẽn wa n dogd a biig a yiib-n-soabã. Kom-kãseng n wa n zĩndi, tɩ yɩ tɩlɛ t’a Zakoob yik n tɩ zĩnd Ezɩpti. Wakat kãng t’a ra kʋʋlame.—Sɩng. 34:30; 35:16-19; 37:28; 45:9-11, 28.

7. Bõe la a Zeova maan n wilg a Zakoob t’a sũur nooma ne-a?

⁷ Baa ne zu-loe-kãensã fãa, a Zakoob kell n tẽe a Zeova la a pʋlemsã. A Zeova wa n wilga a Zakoob t’a sũur nooma ne-a. Wala makre, baa ne a Laban zãmbã, a Zeova ninga a Zakoob bark t’a paam paoong wʋsgo. Tags-y n ges-y a Zakoob sẽn pʋʋs a Zeova bark to-to a sẽn wa n le yã a Zozɛfã, biig ning a sẽn da tagsd t’a kii hal daar zãrã! A Zakoob sẽn da tar zood sõma ne a Zeova wã yĩnga, sõng-a lame t’a tõog toogo. (Sɩng. 30:43; 32:9, 10; 46:28-30) Tõnd me sã n kell n tall zood sõma ne Zeova, d na n tõog n yalsa kãn-kãe yel-pakr sasa.

8. Bõe la rĩm a Davɩɩd ra rat n maane?

 ⁸ Rĩm a Davɩɩd pa tõog n maan bũmb nins fãa a sẽn da rat n maan a Zeova tũudmã yĩngã ye. Wala makre, a Davɩɩd ra rata ne a sũur fãa n me wẽnd-doog n kõ a Wẽnnaamã. A togsa no-rɛɛs a Natã a sẽn dat n maan bũmb ningã. La a Natã yeel-a lame yaa: “Maan-y bũmb ning fãa y sẽn date, bala Wẽnnaam bee ne yãmba.” (1 Kib. 17:1, 2) Gom-kãensã tog n kenga a Davɩɩd raood wʋsgo. Tõe tɩ tao-tao bala a sɩnga magbo, n get a sẽn na n maan to-to n tõog n tʋm tʋʋm-kãngã sẽn yaa kãsengã.

9. B sẽn taas a Davɩɩd koɛɛg sẽn sãam a sũurã, a manesem yɩɩ wãna?

⁹ La pa yã n kaoos la a Zeova no-rɛɛsã wa togs a Davɩɩd koɛɛg sẽn sãam a sũuri. “Baraar yʋng bala,” a Zeova togsa a Natã tɩ pa a Davɩɩd n na n me wẽnd-doogã, la tɩ yaa a biig n na n me. (1 Kib. 17:3, 4, 11, 12) A Davɩɩd sẽn wʋm dẽ wã, a manesem yɩɩ wãna? A toeema yam. A tigsa ligd la teed buud toor-toor a biig a Salomo sẽn na n wa tall n me roogã.—1 Kib. 29:1-5.

10. Wãn to la a Zeova ning a Davɩɩd barka?

¹⁰ A Zeova sẽn togs a Davɩɩd tɩ pa yẽ n na n me wẽnd-doogã, rẽ poor bala a maana kaool ne-a. A pʋlma a Davɩɩd t’a yageng n na n dɩ naam wakat sẽn kõn sa. (2 Sãm. 7:16) Dũni-paalgã pʋgẽ, a Zeezi naamã sẽn na n kaoos yʋʋm tusrã sasa, a Davɩɩd sũur na n yɩɩ noog wʋsgo, a sã n bãng tɩ Rĩmã sẽn yaa a Zeezi Kiristã yaa yẽ yagenga! Kiba-kãngã sõngda tõnd tɩ d bãng tɩ baa d sã n pa tõog n maan bũmb kẽer d sẽn da rat n maan a Zeova tũudmã pʋgẽ, d Wẽnnaamã tõe n ning-d-la bark tɩ yɩɩg d sẽn da tẽedã.

11. Wãn to la a Zeova ning pipi kiris-nebã barka, baa ne Rĩungã sẽn pa wa wakat ning b sẽn da tẽedã? (Tʋʋma 6:7)

¹¹ Pipi kiris-nebã maoo ne yel-pakr toor-toore. Wala makre, b raabã ra yaa Wẽnnaam Rĩungã wa. La b ra pa mi sẽn na n yɩ wakat ning ye. (Tʋʋ. 1:6, 7) Woto wã, bõe la b maan-yã? B ra ket n wɩngda ne koɛɛgã moonego. Koe-noogã sẽn da saagd zĩis wʋsgã, b ra nee vẽeneg t’a Zeova ningda b modgrã barka.—Karm-y Tʋʋm 6:7.

12. Bõe la pipi kiris-nebã maan kom-kãseng sasa?

¹² Wakat n zĩndi, tɩ kom-kãseng zĩnd “dũniyã gill zugu.” (Tʋʋ. 11:28) Komã namsa pipi kiris-nebã me. Tags-y n ges-y rɩɩbã kaalmã sẽn nams-b to-to? Yaa vẽeneg tɩ zak sobend-dãmbã ra maanda yɩɩr ne b sẽn na n maan to-to n dɩlg b zakã rãmba. La kom-bɩɩs nins sẽn da magd n na n moon koɛɛgã sõma n paasã yẽ maana wãna? Tõe tɩ b ra sokda b mens b sã n pa segd n bas tɩ komã sa tɩ b yaool n maan dẽ! Sẽn yaa a soab fãa, b maaname tɩ zems ne yɛlã sẽn da yaa to-to wã. B ra moonda koɛɛgã, la b pʋɩt b sẽn tar bũmb ninsã ne b tẽed-n-taas nins sẽn be Zide wã ne sũ-noogo.—Tʋʋ. 11:29, 30.

13. Wãn to la a Zeova ning pipi kiris-nebã bark kom-kãsengã sasa?

¹³ Wãn to la a Zeova ning kiris-nebã bark komã sasa? Neb nins sẽn paam sõngr wakat kãngã yãame tɩ yaa a Zeova n da sõngd-ba. (Mat. 6:31-33) Rẽ kɩtame tɩ b ra neẽ tɩ bãmb ne b tẽed-n-taas nins sẽn wa n sõng-bã zood paasame. Neb nins sẽn kõ b taabã ligdi, wall n sõng n tʋm tʋʋm kẽerã paama sũ-noog ning kũun sẽn wat ne wã. (Tʋʋ. 20:35) A Zeova ninga b fãa barka, bala b kell n  tʋma b tʋʋmã tɩ zems ne b yɛlã sẽn da yaa to-to wã.

14. Bõe n paam a Barnabaas ne a Polle, la baasa wãna? (Tʋʋm 14:21, 22)

¹⁴ B ra wae n namsda pipi kiris-nebã b tũudmã yĩnga. Mi n yaa sasa b sẽn pa tẽed menga. D gom bũmb ning sẽn paam a Barnabaas ne tẽn-tʋmd a Pollã yelle, b sẽn wa n moond Listr tẽngã. Sɩngrẽ wã, nebã reeg-b-la neer n sak n kelg b koɛɛgã. La rẽ poor bilfu, bɛɛb n “tõg kʋʋngã,” tɩ neb kẽer sẽn da kelg a Poll lob-a kuga, n da tẽed t’a kiime. (Tʋʋ. 14:19) La a Barnabaas ne a Poll kẽnga zĩig a to n da ket n moond koɛɛgã. Baasa wãna? B sõnga “neb wʋsg tɩ b lebg karen-biisi.” B goamã ne b mak-sõngã me kenga b tẽed-n-taasã raoodo. (Karm-y Tʋʋm 14:21, 22.) A Barnabaas ne a Poll sẽn pa koms raood n bas baa ne b sẽn da namsd-b koɛɛgã mooneg yĩngã, nafa neb wʋsgo. Tõnd me sã n ket n tʋmd tʋʋmd ning a Zeova sẽn yeel tɩ d tʋmã n pa koms raood n base, a na n ning-d-la barka.

15. Yam bʋg la d tõe n dɩk saam-biig a Makmilan mak-sõngã pʋgẽ?

¹⁵ Yʋʋmd 1914 sẽn wa n kolgdẽ wã, a Zeova nin-buiidã ra tẽedame tɩ bũmb kẽer n na n maane. Wala makre, d gom saam-biig a Makmilan yelle. Yẽ me ra tagsda wa neb wʋsg tɩ pa na n kaoos la a kẽng saasẽ ye. Yʋʋmd 1914 bõn-bɩʋʋng kiuugã, a wɛgsa sõsga. A sõsgã pʋga, a yeelame yaa: “Tõe tɩ yaa mam yaoolem sõsg la woto.” La pa yɩ a yaoolem sõsg ye. Kaoosg zugẽ, saam-biig a Makmilan wa n yeelame yaa: “Tõnd sʋkã neb wʋsg ra yãgdame, n tagsdẽ tɩ b na n kẽnga saasẽ zĩig pʋgẽ.” A paasame yaa: “Tõnd sẽn da segd n maan yaa d ket n wɩngd ne Zu-soabã tʋʋmdã.” Sɩd me, saam-biig a Makmilan wɩnga ne Zu-soabã tʋʋmdã. A ra moonda koɛɛgã ne yẽesem. A paam n kenga saam-biis wʋsg raoodo. Yaa saam-biis b sẽn da kẽes bãens roogo, b sẽn zãgs tɩ b pa na n kẽ sodaarã yĩnga. A ra kẽnda tigissã wakat fãa n pa vaandẽ, baa a sẽn wa n kʋʋl wʋsgã. Saam-biig a Makmilan sẽn da wɩngd ne a Zeova tʋʋmdã la a gũud wakat ning a sẽn na n kẽng saasẽ wã, wãn to la naf-a? Nand t’a maan kaalem yʋʋmd 1966, a yeelame yaa: “Mam tẽebã ket n tara pãng wa pĩndã.” A yaa mak-sõng tɛkẽ, tɩ d tõe n dɩk a togs-n-taare. Sẽn yɩɩd fãa d sã n maooda ne zu-loees sẽn kaoosd n yɩɩd d sẽn da tagsdã.—Ebre. 13:7.

16. Bõe yell n paam saam-biig a Jennings ne a pagã, tɩ b ra pa tẽeda? (Zak 4:14)

¹⁶ A Zeova Kaset rãmb wʋsg maooda ne bãas b sẽn da pa tẽede. Wala makre, saam-biig a Herbert Jennings b vɩɩmã kibar pʋgẽ, a wilga yẽ ne a pagã vɩɩmã sẽn da noom to-to, b sẽn da paam n yaa misioneer-dãmb n be Gãna wã. La daar a ye, logtoɛɛmbã wa n yeelame t’a bẽeda bã-kɛgenga (trouble bipolaire de l’humeur). Saam-biig a Jennings tika Zak 4:14 zugu, n bool yell ning sẽn paam-a wã tɩ “‘beoog’ sẽn ling-du.” (Karm-y.) A yeelame yaa: “Rẽ kɩtame tɩ yɩ tɩlɛ tɩ d yi Gãna, n bas d zo-rãmbã fãa n leb Kanada tɩbsg yĩnga.” A Zeova sõnga saam-biig a Jennings ne a pagã tɩ b kell n tũ-a ne b sũy fãa, baa sẽn da pa nana ne-bã.

17. Wãn to la saam-biig a Jennings mak-sõngã naf a tẽed-n-taasã?

¹⁷ Saam-biig a Jennings sẽn togs bũmb  ning ne pʋ-peelem a vɩɩmã kibar pʋgẽ wã sõnga neb wʋsgo. Saam-bi-poak a ye goma rẽ yell n yeel yaa: “Kibar nan zɩ n kẽ maam n ta saam-biig a Jennings kibarã ye. . . . Mam sẽn karem a kibarã n bãng t’a sak n basa tʋʋmd ning a sẽn da tʋmd a Zeova siglgã pʋgẽ sẽn na yɩl n tɩbs a mengã, sõnga maam tɩ m tall yam-sõng zu-loeesã wɛɛngẽ.” Saam-biig a ye me yeelame: “Mam yɩɩ kãsem-soab tigingã pʋgẽ n kaoos yʋʋm piiga. Rẽ poore, yɩɩ tɩlɛ tɩ m base, m sẽn da bẽed bãag sẽn kɩt tɩ m yam ka m mengã yĩnga. M da getame tɩ m ka võore, tɩ rẽ mi n sãam m sũur hal tɩ m pa tõe n karem neb a taabã vɩɩm kibay ye. . . . La saam-biig a Jennings sẽn pa koms raood n basã kenga m raood wʋsgo.” Woto tẽegda tõnd tɩ d sã n wa maood ne zu-loees d sẽn da pa tẽede, n kell n tõog toogo, tõe n kenga neb a taabã raoodo. Baa yɛlã sã n pa yɩ wa d sẽn da ratã, d mak-sõngã tõe n sõnga neb a taabã tɩ b kell n tall b tẽebã kãn-kãe la b toog toogo.—1 Pɩy. 5:9

18. Wa b sẽn bilg fotã zugã, Nizeria pʋg-kõorã mak-sõngã sõnga yãmb tɩ y bãng bõe?

¹⁸ Yel-lingdem wala koronaviriisã bã-longdgã namsa a Zeova Kaset rãmb wʋsgo. Wala makre, pʋg-kõor a ye sẽn be Nizeria ra wa n pa le tar rɩɩb la ligd ye. Daar a ye yibeoogo, a bi-puglã sok-a lame tɩ b sã n segl b muiyã sẽn ketã n dɩ tɩ sa, rẽ poore, bõe la b na n dɩ? Saam-bi-poakã yeela a bi-puglã tɩ b pa le tar ligd la rɩɩbo, la tɩ b segd n dɩka Sarfat pʋg-kõorã togs-n-taare, n segl b yaoolem dɩɩbã n dɩ, la b teeg a Zeova zãng-zãnga. (1 Rĩm. 17:8-16) Nand meng tɩ b tags n ges b sẽn na n dɩ a soab baraar midi wã, b tẽed-n-taas n wa n kõ-b korg sẽn pid ne rɩɩbo. Yɩɩda semen a yiib rɩɩbo. Saam-bi-poakã yeelame t’a pa mi t’a Zeova ra maaga a yĩng n kelgd bũmb ning a sẽn da  yet a biigã ye. Sɩd-sɩda, d sã n teeg a Zeova, yell d sẽn da pa tẽed sã n paam-do, tõe n kɩtame tɩ tõnd ne yẽ zoodã pãng paase.—1 Pɩy. 5:6, 7.

19. Wãn to la b nams a Aleksi Yersov a tũudmã yĩnga?

¹⁹ Yʋʋma noorã, b namsda saam-biis la saam-bi-pogs wʋsg b tẽebã yĩnga. Ra yaa bũmb b sẽn da pa tẽede. D gom saam-biig a Aleksi Yersov sẽn be Risi wã yelle. A sẽn wa n deeg lisg yʋʋmd 1994, rẽ tɩ b ra pa namsd a Zeova Kaset rãmbã beenẽ ye. La yʋʋm a wãn poore, yɛlã toeema Risi. Yʋʋmd 2020 wã, polɩɩs-rãmbã wa n vaeesa a roogã, la b wʋk a teed wʋsg n looge. Yʋʋm wʋsg rẽ poore, goosneemã kaoo a bʋʋdo, n yeel t’a yaa bi-bɛɛga. Bũmb sẽn zẽn yellã yaa tɩ ned a ye n maan ãrezistrema video, tɩ b tik rẽ n kao bʋʋdã. Nin-kãng ra maanda wa a zãmsda Biiblã hal n maan yʋʋmde. Ad a sɩd yaa zãmb soaba!

20. Bõe la saam-biig a Yersov maan-yã, tɩ paas yẽ ne a Zeova zoodã pãnga?

²⁰ B sẽn nams saam-biig a Yersovã woma bi-sõma bɩ? N-ye. Yẽ ne a Zeova zoodã pãng paasame. Ad a sẽn yeele: “Maam ne m pagã nong n naagda taab n pʋʋsdẽ. M bãngame tɩ sã n da pa tũ ne a Zeova sõngre, m da pa na n tõog toog ye.” A paasame yaa: “Mam sẽn da zãmsd Biiblã sõng-m lame tɩ m pa koms raood ye. Mam bʋgsa neb sẽn zĩnd pĩnd n maan sɩd ne a Zeova kibay zugu. Kibay wʋsg n be Biiblã pʋgẽ, n wilgdẽ tɩ tara yõod tɩ d kell n pa sɩɩ, la d teeg a Zeova.”

21. Bõe la d bãng sõs-kãngã pʋgẽ?

²¹ Bõe la d bãng sõs-kãngã pʋgẽ? Dũni-kãngã pʋgẽ, d mi n paamda zu-loees d sẽn da pa tẽede. Baa ne rẽ, a Zeova sõngda a nin-buiidã wakat fãa b sã n teeg-a. Wa vɛrse ning zug sõs-kãngã sẽn tikã sẽn wilgdã, “nin-tɩrg zu-loees yaa wʋsgo, la a Zeova fãagd-a-la b fãa pʋsẽ.” (Yɩɩn. 34:19) Bɩ d ra tagsd d zu-loeesã yell wʋsg ye. D tagsd a Zeova sẽn tar pãng n tõe n sõng-dã yell n yɩɩda. D sã n maan woto, tõnd me na n tõog n yeela wa tẽn-tʋmd a Poll yaa: “Bũmb fãa pʋgẽ, mam tara pãnga, sẽn kõt-a maam pãngã maasem yĩnga.”—Fili. 4:13.