ZÃMSGÃ YĨNGA 19
Bõe la d tõe n maane, n maneg n tẽ tɩ dũni-paalgã a Zeova sẽn pʋlmã na n sɩd waame?
“A [Zeova] sã n yeel bũmbu, a pa na n maan-a sɩda?”—SÕD. 23:19.
YƖƖLL 142 D ra yĩm Wẽnnaam kãab-noodã ye
D SẼN NA N YÃ WÃ a
1-2. D sẽn gũud dũni-paalgã, bõe la d segd n maandẽ?
D SŨUR noomame, a Zeova sẽn pʋlem t’a na n ledga dũni-wẽn-kãngã ne dũni-paalg tɩrlem sẽn na n zĩnd a pʋgẽ wã. (2 Pɩy. 3:13) Baa d sẽn pa mi wakat ning takɩ dũni-paalgã sẽn na n wa wã, yɛlã sẽn yaa to-to dũniyã zugã wilgdame tɩ pa na n le kaoos ye.—Mat. 24:32-34, 36; Tʋʋ. 1:7.
2 La nananda, baa d sẽn kaoos sɩdã pʋgẽ to-to, d ned kam fãa segd n kell n talla tẽeb tɩ pʋlen-kãng na n pidsame. Bõe yĩnga? Bala baa tẽeb sẽn tar pãng tõe n wa komsame. Sɩd me, tẽn-tʋmd a Poll goma tẽeb kaalem yelle, n yeel tɩ yaa “yel-wẽndã sẽn gĩt tõnd nana-nana wã.” (Ebre. 12:1) Sẽn na yɩl tɩ d tẽebã ra booge, wakat fãa d segd n tẽegda bũmb nins sẽn kɩt tɩ d kɩs sɩd tɩ dũni-paalgã na n waa ka la bilfã yelle.—Ebre. 11:1.
3. D na n goma bõe yell sõs-kãngã pʋgẽ?
3 Sõs-kãngã pʋgẽ, d na n yãa bũmb a tãab d sẽn tõe n maan tɩ sõng-d tɩ d kell n tall tẽeb kãn-kãe, t’a Zeova sẽn pʋlem dũni-paalgã na n pidsame. 1) Yaa d sẽn na n bʋgsd a Zeezi sẽn ki tɩ yɩ maoongã zugu, 2) yaa d sẽn na n tagsd a Zeova pãn-kãsengã yelle, la 3) yaa d sẽn na n maand bũmb nins sẽn paasd tõnd ne a Zeova zoodã pãngã. Rẽ poore, d na n yãa koɛɛg ning a Zeova sẽn taas a Habakukã sẽn tõe n keng d tẽebã to-to rũndã-rũndã. Bɩ d reng n gom zu-loees kẽer d sẽn tõe n maood ne yelle, tɩ baoodẽ tɩ d tall tẽeb t’a Zeova sẽn pʋlem tɩ dũni-paalg n watã na n pidsame.
ZU-LOEES SẼN BAOOD TƖ D TALL TẼEB SẼN TAR PÃNGA
4. Bõe wɛɛngẽ la yaa tɩlɛ tɩ d tall tẽeb sẽn tar pãnga?
4 Beoog sẽn vẽeg fãa d yãkda yam bũmb toor-toor wɛɛngẽ, tɩ baoodẽ tɩ d tall tẽeb sẽn tar pãnga. Wala makre, d yãkda yam tũud-n-taarã wɛɛngẽ, pemsmã kokre, karengã, kãadmã, kambã, la d nug-tʋʋmã wɛɛngẽ. Yɩta sõma tɩ d sok d meng yaa: ‘Mam sẽn yãk yam n na n maan bũmb ningã wilgdame tɩ m kɩsa sɩd tɩ dũni-wẽn-kãngã pa na n pa wakat fãa, la tɩ ka la bilfu, Wẽnnaam na n ledg-a-la ne dũni-paalg bɩ? Bɩ m sẽn yãk yam n na n maan bũmb ningã yaa wa neb nins sẽn tagsd tɩ ned sã n ki saame wã?’ (Mat. 6:19, 20; Luk 12:16-21) D sã n maneg n tall tẽeb tɩ dũni-paalgã ta n saame, na n sõng-d lame tɩ d yam-yãkr fãa yɩ sõma.
5-6. Bõe yĩng tɩ yaa tɩlɛ tɩ d tall tẽeb sẽn tar pãng zu-loees sasa? Rɩk-y makre.
5 Wakat ninga d maooda ne zu-loeese, tɩ baoodẽ tɩ d tall tẽeb sẽn tar pãnga. Tõe tɩ b namsd-d-la d tũudmã yĩnga, wall d bẽeda bã-kɛgenga, bɩ n maood ne zu-loɛɛg a to sẽn tõe n koms d raoodo. Sɩngrẽ wã, d tõe n tagsame tɩ d tõe n maoo ne d zu-loɛɛgã n tõoge. La sã n wa kaoosdẽ tɩ zu-loɛɛgã pa satẽ, wat n yɩɩ tɩlɛ tɩ d tall tẽeb sẽn tar pãnga, n tõog toog n ket n tũud a Zeova ne sũ-noogo.—Rom. 12:12; 1 Pɩy. 1:6, 7.
6 D zu-loɛɛgã sã n wa paamd pãnga, d tõe n wa tagsdame t’a Zeova dũni-paalgã pa na n tol n wa ye. Woto rat n yeelame tɩ d tẽebã pa tar pãng bɩ? Ayo. D rɩk makre. Tʋʋlgã sã n wa zabd wʋsgo, d tõe n wa tagsdame tɩ waoodã wakat pa na n tol n ta ye. La waoodã wat n baas n waame. Woto me, d sũurã sã n wa sãam wʋsg tɩ d koms raoodo, d tõe n wa tagsdame tɩ dũni-paalgã pa na n tol n wa ye. La d tẽebã sã n tar pãnga, d na n kɩsa sɩd tɩ Wẽnnaam pʋlemsã na n pidsame. (Yɩɩn. 94:3, 14, 15; Ebre. 6:17-19) Woto sõngd-d lame tɩ d kell n lʋɩɩs a Zeova tũubã taoor d vɩɩmã pʋgẽ.
7. D segd n gũusa d meng ne bõe?
7 D gom bũmb a to me wɛɛngẽ d sẽn tog n tall tẽeb sẽn tar pãnga. Yaa koɛɛgã moonego. Neb wʋsg d sẽn moond koɛɛgã tagsdame tɩ ‘koe-noog’ ning d sẽn togsd Wẽnnaam dũni-paalgã wɛɛngẽ wã yaa belgre. (Mat. 24:14; Eze. 33:32) D segd n gũusame n da wa tol n maan sãmbs wa nin-kãens ye. Sẽn na yɩl n da yɩ wa bãmba, d segd n ket n paasda d tẽebã pãnga. D ges bũmb a tãab d sẽn tõe n maan tɩ sõng-do.
BƲGSD-Y A ZEEZI SẼN KI TƖ YƖ MAOONGÃ ZUGU
8-9. D sã n bʋgsd a Zeezi sẽn ki tɩ yɩ maoongã zugu, wãn to la tõe n keng d tẽebã?
8 Bũmb a ye d sẽn tõe n maan tɩ paas d tẽebã pãnga, yaa d sẽn na n bʋgsd a Zeezi sẽn ki tɩ yɩ maoongã zugu. A Zeezi sẽn ki tɩ yɩ maoongã yaa kaset tɩ Wẽnnaam pʋlemsã na n pidsame. D sã n maag d yĩng n tags bũmb ning sẽn kɩt t’a Zeezi wa ki tɩ yɩ maoongã zugu, la rẽ sẽn tog n nams a Zeova to-to wã, kɩtdame tɩ d maneg n tẽed tɩ Wẽnnaam sẽn pʋlem vɩɩm sẽn ka sɛt dũni-paalg pʋgẽ wã na n sɩd pidsame. Bõe yĩng tɩ d yet woto?
9 Bõe n kɩt tɩ pa yɩ nana ne a Zeova, a sẽn sak t’a Zeezi wa ki tɩ yɩ maoongã? A Zeova tʋma a Bi-nongrã sẽn yaa a tʋmd-n-taag meng-mengã, t’a yi saasẽ n wa tẽngã zug tɩ b rog-a, t’a yaa ned sẽn zems zãnga. A Zeezi sẽn wa n be tẽngã zugã, a maoo ne zu-loees buud toor-toore. A namsame la a ki kũ-toaaga. A Zeova sɩd yaoo yaood sẽn yaa kãsenga! A Zeova sẽn nong tõndã, a pa na n tol n sak t’a biigã wa nams la a ki, sẽn na yɩl tɩ d paam vɩɩm sẽn yaa sõma wakat bilf pʋgẽ bal ye. (Zã 3:16; 1 Pɩy. 1:18, 19) A Zeova sẽn yao yaood sẽn yaa kãseng woto wã, a sɩd na n pidsa a sẽn pʋlem t’a na n kɩtame tɩ d wa vɩɩmd wakat sẽn kõn sa dũni-paalgã pʋgẽ wã.
TAGSD-Y A ZEOVA PÃN-KÃSENGÃ YELLE
10. Wa Efɛɛz rãmb 3:20 wã sẽn wilgdã, bõe la a Zeova tõe n maane?
10 Bũmb a yiib-n-soab d sẽn tõe n maan tɩ keng d tẽebã, yaa d sẽn na n tagsd a Zeova pãn-kãsengã yelle. A tara pãng n tõe n pids a sẽn pʋlem fãa. Sɩda, neb wʋsg tagsdame t’a Zeova sẽn pʋlem tɩ d na n wa vɩɩmda wakat sẽn kõn sa dũni-paalg pʋgẽ wã yaa bũmb sẽn pa tõe. La a Zeova pʋlemda bũmb toor-toor ninsaalbã sẽn pa tõe n pidsi. Baasgo, yẽ la Wẽnnaam sẽn tõe-a fãa wã. (Zoob 42:2; Mark 10:27) Dẽnd a sẽn pʋlem t’a na n maana bõn-kãsemsã pa ling tõnd ye.—Karm-y Efɛɛz rãmb 3:20.
11. Togs-y bũmb a Zeova sẽn pʋlme, tɩ wõnd ra pa tõe n pids ye. (Ges-y zĩ-gũbrã, “ Pʋlen-kãsems sẽn pidsi.”)
11 D ges bũmb a wãn a Zeova sẽn da pʋlem a nin-buiidã pĩnd wẽndẽ wã, tɩ wõnd ra pa tõe n pids ye. Baa ne a Abrahaam ne a Saara yʋʋmã sẽn da vẽsgã, a yeel-b lame tɩ b na n paama biiga. (Sɩng. 17:15-17) Sẽn paase, a yeela a Abrahaam t’a yagensã na n wa sooga Kanaã tẽngã. Israyɛll nebã sẽn da yaa a Abrahaam yagensã sẽn zĩnd yembd Ezɩpt tẽngã n maan yʋʋm wʋsgã, ra wõnda a Zeova sẽn yeel bũmb ningã pa na n tol n pids ye. La pidsame. Pipi kiris-nebã wakatẽ wã me, a Zeova yeela pʋg-yãang a Elizabɛt t’a na n paama biiga. A leb n yeela a Maari me sẽn da pa mi raoã, t’a na n doga Wẽnnaam Bi-riblã, soab ning waoong a sẽn da pʋlem yʋʋm tusa sẽn looge, Edɛn zẽedã zĩigẽ wã. Pʋlen-kãng me pidsame. (Sɩng. 3:15) Wakat fãa a Zeova pidsda bũmb ning a sẽn pʋlem t’a na n maaname.
12. Bõe la Zozuwe 23:14; Ezayi 55:10, 11 yet a Zeova pãn-kãsengã wɛɛngẽ?
12 D sã n tagsd bũmb nins a Zeova sẽn pʋlem la a sẽn pidsã zugu, na n kɩtame tɩ d maneg n tẽ t’a tara pãn-kãseng n na n pids a sẽn pʋlem tɩ dũni-paalg n watã. (Karm-y Zozuwe 23:14; Ezayi 55:10, 11.) Sõngda tõnd tɩ d tõe n segl d meng sõma n sõng neb a taab tɩ b bãng tɩ dũni-paalgã a Zeova sẽn pʋlmã pa zãmsdo, bɩ belgr ye. A Zeova mengã goma sa-paalgã la tẽn-paalgã a sẽn pʋlmã yell n yeel yaa: “Gom-kãensã yaa sɩda, n yaa goam b sẽn tõe n tẽ.”—Vẽn. 21:1, 5.
MAAND-Y BŨMB NINS SẼN PAASD YÃMB NE A ZEOVA ZOODÃ PÃNGÃ
TIGISSÃ
Wãn to la bõn-kãensã maaneg paasd y tẽebã pãnga? (Ges-y sull 13)
13. Wãn to la tigissã paasd d tẽebã pãnga?
13 Bũmb a tãab-n-soab d sẽn tõe n maan tɩ d tẽebã pãng paase, yaa d sẽn na n maand bũmb nins sẽn paasd tõnd ne a Zeova zoodã pãngã. Wala makre, tags-y d tigissã sẽn nafd tõnd to-to wã yelle. Saam-bi-poak a ye yʋʋr sẽn boond t’a Ana b kẽesa a meng zãng a Zeova tʋʋmdã pʋgẽ, n tʋm tʋʋm toor-toor yʋʋm wʋsgo. A yeelame: “Tigissã sõngda maam tɩ m tẽebã ket n tar pãng sõma. Baa sõsdã sã n pa tar minim wʋsgo, wall a sẽn yet bũmb ningã pa bõn-paalle, naoor wʋsgo, m paamda bũmb sẽn sõngd-m tɩ m wʋmd Biiblã goam võor sõma, tɩ paasd m tẽebã pãnga.” Sãmbg kae tɩ d n sã kelgd d tẽed-n-taasã sẽn leokd tigissã sasa wã, paasda d tẽebã pãnga.—Rom. 1:11, 12; 10:17.
KOƐƐGÃ MOONEGO
Wãn to la bõn-kãensã maaneg paasd y tẽebã pãnga? (Ges-y sull 14)
14. Wãn to la koɛɛgã mooneg paasd d tẽebã pãnga?
14 D sã n kẽesd d toog koɛɛgã mooneg pʋgẽ me, paasda d tẽebã pãnga. (Ebre. 10:23) A Barbara sẽn tũud a Zeova yʋʋm pis-yopoe la zak masã wã yeelame: “Mam gũus n gesame tɩ koɛɛgã mooneg paasda tẽeb pãnga. M sã n gomd a Zeova pʋlemsã sẽn tar yamleoogã yell ne nebã, paasda m tẽebã pãnga.”
BIIBLÃ ZÃMSGO
Wãn to la bõn-kãensã maaneg paasd y tẽebã pãnga? (Ges-y sull 15)
15. Wãn to la Biiblã zãmsg paasd d tẽebã pãnga? (Ges-y fotã me.)
15 D gom bũmb a to me sẽn paasd d tẽebã pãng yelle. Yaa Biiblã zãmsgo. Saam-bi-poak a ye yʋʋr sẽn boond t’a Suzan yãame t’a sẽn yãk wakat takɩ zãmsgã yĩngã, sõngd-a lame. Ad a sẽn yeele: “Hat daar fãa mam segenda Gũusg Gasgã sõsg ning d sẽn na n zãms semen ning sẽn watã. Tẽne la Talaato, mam segenda Kiris-nebã vɩɩm la b tʋʋma tigsga. La ray a taabã, mam yãkda bũmb mam mengã sẽn date, n zãmse.” A Suzan sẽn tũud na-kẽndrã a sẽn maan zãmsgã yĩnga, paasda a tẽebã pãnga. A Irɛn sẽn tʋm yʋʋm wʋsg d biru-kãsengẽ wã gũus n gesame t’a sẽn zãmsd Biiblã bãngr-goamã, paasda a tẽebã pãnga. A yeelame yaa: “Mam sẽn ne t’a Zeova goamã pidsda kɛpɩ, baa yel-bõonesã fãa wã, noogda m sũur wʋsgo.” c
“A NA N PIDSAME N PA VAAL YE”
16. Bõe yĩng tɩ goam nins a Zeova sẽn togs a Habakukã tar yõod ne tõnd rũndã-rũndã? (Ebre-rãmbã 10:36, 37)
16 A Zeova Kaset rãmb kẽer sɩng n gũuda dũni-wẽn-kãngã saabã hal daar zãra. Sã n yaa ne ninsaalbã, yaa wa a Zeova sẽn pʋlem bũmb ninsã kaoosda pidsgu. A Zeova miime tɩ pa nana ne a nin-buiidã ye. Rẽ n so t’a yeel no-rɛɛs a Habakuk yaa: “Fo sẽn na n yã bũmb ningã na n pidsa a wakate. A pidsgã wakat wata tao-tao. A pa na n vaal ye. Baa a sã n kaoosdame, bɩ f kell n gũ-a. Bala a na n pidsame n pa vaal ye. A na n pidsa a wakatã bal kɛpɩ.” (Hab. 2:3) Wẽnnaam sẽn yeel woto wã yaa sẽn na n keng a Habakuk a ye bal raood bɩ? Bɩ a sẽn yeel bũmb ningã tõe n nafa tõnd me rũndã-rũndã? Wẽnnaam vẽnega tẽn-tʋmd a Poll t’a togs kiris-neb nins sẽn da gũud dũni-paalgã goam a woto buudu. (Karm-y Ebre-rãmb 10:36, 37.) Baa sã n wõnda Wẽnnaam sẽn pʋlem t’a na n fãag-d lame wã kaoosda pidsgu, d kɩsa sɩd tɩ “na n pidsame n pa vaal ye. A na n pidsa a wakatã bal kɛpɩ.”
17. Wãn to la saam-bi-poak a ye tũ saglg ning a Zeova sẽn kõ a Habakukã?
17 A Zeova Kaset rãmb wʋsg tũuda a Zeova na maan yʋʋm wʋsg n ‘ket n gũudẽ,’ wa a sẽn yeel-bã. Wala makre, saam-bi-poak a ye yʋʋr sẽn boond t’a Loyiiz sɩnga a Zeova tũub yʋʋmd 1939 wã. A yeelame: “Wakat kãnga, m da tagsdame tɩ m pa na n karem inivɛrsite wã n sa la Armagedõ wa ye. La pa yɩ woto ye. M da karemda kibay sẽn be Biiblã pʋgẽ n gomd neb sẽn gũ a Zeova, n yaool n na n wa paam t’a ning-b bark wa a sẽn da pʋlem-bã. Mam wa n boonda kiba-kãens tɩ ‘gũudbã kibaya.’ Wala makre, a Nowe, a Abrahaam, a Zozɛfe, la neb a taaba. Wa neb a taabã, mam sẽn ket n gũudẽ wã sõng-m lame tɩ m maneg n kɩs sɩd tɩ dũni-paalgã ta n saame.” Neb wʋsg sẽn tũ a Zeova n kaoos yʋʋm wʋsg sak n deega rẽ!
18. D sã n get bũmb nins a Zeova sẽn naanã, wãn to la sõngd tõnd tɩ d tall tẽeb tɩ dũni-paalgã na n sɩd waame?
18 Yaa sɩd tɩ dũni-paalgã nan pa wa ye. La tags-y bũmb nins sẽn zoe n be wã yelle, wala makre, ãdsã, tɩɩsã, rũmsã la ninsaalbã. Ned kae n na n maand sãmbs tɩ bõn-kãensã beeme ye. La wakat n zĩnd tɩ b yaool n da kae ye. Yaa a Zeova sẽn naan-bã yĩng n kɩt tɩ b beẽ. (Sɩng. 1:1, 26, 27) Tõnd Wẽnnaamã pʋlmame me t’a na n waa ne dũni-paalga. A na n pidsa a pʋlengã. Dũni-paalgã pʋgẽ, ninsaalbã na n vɩɩmda wakat sẽn kõn sa, ne laafɩ hakɩɩka. Wakat ning Wẽnnaam sẽn yãkã sã n ta, dũni-paalgã na n waame, n yaa vẽeneg wa bũmb nins d sẽn ne rũndã-rũndã wã.—Eza. 65:17; Vẽn. 21:3, 4.
19. Bõe la y tõe n maan n paas y tẽebã pãnga?
19 Nananda, tũnugd-y ne segb buud fãa y sẽn paame, n keng y tẽebã. Wilgd-y wakat fãa tɩ y sũur nooma ne a Zeezi sẽn ki tɩ yɩ maoongã. Tagsd-y-yã a Zeova pãn-kãsengã yelle. Wɩngd-y ne bũmb nins sẽn paasd yãmb ne a Zeova zoodã pãngã. Y sã n maand woto, y na n naaga “neb nins sẽn tall tẽeb la b maan sũ-mar n paam pʋlemsã.”—Ebre. 6:11, 12; Rom. 5:5.
YƖƖLL 139 Tags dũni-paalgã yelle
a Rũndã-rũndã, neb wʋsg pa tẽed tɩ Biiblã sẽn yet tɩ dũni-paalg n watã yaa sɩd ye. B yetame tɩ yaa belgre, la tɩ pa tol n tõe n yɩ sɩd ye. La tõnd yẽ kɩsa sɩd t’a Zeova na n pidsa bũmb nins fãa a sẽn pʋlmã. Baa ne rẽ, d segd n ket n modgdame n paasd d tẽebã pãnga. Wãn to la d tõe n maan rẽ? D na n goma rẽ yell sõs-kãngã pʋgẽ.
b D toeema yʋy kẽere.
c Sõss wʋsg sẽn gomd Biiblã bãngr-goam yell n be Index des publications des Témoins de Jéhovah wã pʋgẽ, zĩig ning b sẽn gʋls tɩ “Prophéties” wã. Wala makre, ges-y sõsg ning gom-zug sẽn yaa: “Les prédictions de Jéhovah s’accomplissent.” Bee yʋʋmd 2008 yʋʋm-vẽkr kiuug pipi daar Gũusg Gasgã pʋgẽ.
