1. Bõe yĩng tɩ d leokd tigissã sasa?

 BÕE yĩng tɩ d kẽnd tigissã? Pipi, yaa sẽn na yɩl n waoog a Zeova. (Yɩɩn. 26:12; 111:1) Yiibu, d kẽnda tigissã sẽn na yɩl n keng taab raood d sẽn vɩ toog wakatã yĩnga. (1 Tes. 5:11) D sã n zẽk d nug tigissã sasa n leoke, d waoogda a Zeova la d kengd d tẽed-n-taasã raoodo.

2. Wakat bʋg la d tõe n paam n leok d tigissã sasa?

² Semen fãa, d paamda segb n tõe n leok d tigissã sasa. Wala makre, wɩkɛnnã tigsg sasa, d tõe n paam n kẽesa d toog Gũusg Gasgã zãmsg wakate. Kiris-nebã vɩɩm la b tʋʋma tigissã sasa, d tõe n paam n leoka D bʋgs Wẽnnaam Gomdã zug neerã sõsg sasa, Tigingã Biibl zãmsg sasa, la sõss a taab me sasa.

3. Bõe n tõe n kɩt tɩ yɩ toog tɩ d leok tigissã sasa, la wãn to la Ebre-rãmb 10:24, 25 wã tõe n sõng-do?

³ Tõnd ned kam fãa rat n waooga a Zeova, la a keng a tẽed-n-taasã raoodo. La bũmb a yiib n tõe n kɩt tɩ yɩ toog tɩ d leok tigissã sasa. 1) D tõe n yɛɛsdame n pa rat n zẽk d nugã n leok ye. 2) D tõe n mi n dat n leokame, la b pa wae n yãkd tõnd ye. Bõe la d tõe n maan tɩ sõng-do? Lɛtr ning tẽn-tʋmd a Poll sẽn tool Ebre kiris-nebã tõe n sõng-d lame. A sẽn wa n gomd tigissã yõod yellã, a yeelame tɩ sẽn yɩɩd fãa, “bɩ d kengd taab raoodo.” (Karm-y Ebre-rãmb 10:24, 25.) D sã n tẽeg tɩ baa d sã n leok koɛɛg-koɛɛg bal tigissã sasa kengda d tẽed-n-taasã raoodo, tõe n kɩtame tɩ d rabeemã booge. La b sã n pa nong n yãkd tõndo, bɩ d maan sũ-noog tigingã neb a  taabã me sẽn na n paam n leokã yĩnga.—1 Pɩy. 3:8.

4. Bõe yell la d na n gom sõs-kãngã pʋgẽ?

⁴ Sõs-kãngã pʋgẽ, d na n deng n yãa d sẽn tõe n keng taab raood to-to, d sã n be tigin-bil pʋgẽ, tɩ sẽn leokd-bã pa waoog ye. Rẽ poore, d na n yãa d sẽn tõe n keng taab raood to-to, d sã n be tigin-kãseng pʋgẽ, tɩ sẽn leokd-bã waoogẽ. Sẽn na n baase, d na n yãa d sẽn tõe n leok to-to, n keng d taabã raoodo.

5. D sã n be tigin-bil pʋgẽ, bõe la d tõe n maan n keng taab raoodo?

⁵ Tigin-bil wall sull pʋgẽ, sẽn zẽkd-b b nug n leokdẽ wã sõor pa waoog ye. Wakat kẽere, rẽnda sẽn lʋɩt-a taoor sõsgã sasa wã gũ tɩ yɩ bilf tɩ ned yaool n zẽk a nugu. Sõsgã tõe n lebga maas-maasa, tɩ yaa toog tɩ d keng taab raoodo. Bõe la y tõe n maane? Nong-y n zẽkd-y y nugã. Y sã n maand woto, na n kɩtame tɩ neb a taabã me rat n kẽesd b toogo.

6-7. Bõe la d tõe n maan tɩ d rabeemã booge, d sã n wa rat n zẽk d nug n leoke?

⁶ La yãmb mengã sã n yɛɛsda wʋsg n pa rat n leoke, bõe la y tõe n maane? Neb wʋsg yɛɛsdame. Y sẽn dat n keng y tẽed-n-taasã raoodã yĩnga, yɩta sõma tɩ y bao n bãng y sẽn tõe n maan to-to tɩ y rabeemã booge, y sã n wa rat n leoke. Wãn to la y tõe n maan dẽ?

⁷ Y tõe n lebg n gesa sagls kẽer b sẽn togs Gũusg Gasgã pʋgẽ tɩ tõe n sõng-yã. b Wala makre, reng-y n segl-y tigsg fãa sõma. (Yel. 21:5) Tigsgã sasa, y sã n mi bũmb ning yell b sẽn gomdã sõma, na n yɩɩ nana tɩ y zẽk y nugã n leoke. Sẽn paase, leokd-y koɛɛg-koɛɛga. (Yel. 15:23; 17:27) Rẽ na n kɩtame tɩ y ra yɛɛsd wʋsg ye. Y sã n leok koɛɛg-koɛɛga, tõe n yɩɩ nana tɩ y tẽed-n-taasã wʋm bũmb ning y sẽn yeelã võor sõma, n yɩɩd y sẽn na n gom bũmb wʋsg yelle. Y sã n leok koɛɛg-koɛɛg ne y meng goama, wilgdame tɩ y segla y meng sõma, la tɩ y wʋmda bũmb ning yell b sẽn gomdã võor sõma.

8. Wãn to la a Zeova get tõnd modgrã?

⁸ La y sã n tũ sagl-kãensã kẽer tɩ ket n yaa toog tɩ y tõog n leok tɩ yɩɩg vugr wall naoor a yiibu, bõe la y tõe n maane? Bãng-y t’a Zeova nanda modgr ning y sẽn maandã. (Luk 21:1-4) A Zeova pa baood tɩ d maan bũmb sẽn yɩɩd d pãng ye. (Fili. 4:5) Bao-y n bãng-y bũmb ning y sẽn tõe n maane, y sẽn tõe n maan rẽ to-to, la y pʋʋs a Zeova t’a kõ-y sũur pʋgẽ bãane. Sɩngrẽ wã, y tõe n yãka yam n na n leokd koɛɛg-koɛɛga.

9. D sã n be tigin-kãseng pʋgẽ, zu-loɛɛgã tõe n yɩɩ bõe?

⁹ Koe-moondbã sã n yaa wʋsg yãmb tigingã pʋgẽ, y zu-loɛɛgã tõe n yaa toore. Tõe tɩ neb wʋsg mi n zẽkda b nug n na n leoke, tɩ kɩt tɩ sẽn lʋɩt-a taoor sõsgã sasa wã pa paamd n yãkd yãmb ye. Wala makre, saam-bi-poak a ye yʋʋr sẽn boond t’a Dãniyɛllã nong n leokda tigissã sasa. c A getame tɩ rẽ  naaga bũmb nins a sẽn maand n waoogd a Zeova wã, la tɩ yaa segb a sẽn paam n na n keng a tẽed-n-taasã raoodo. Sẽn paase, paasda a tẽebã pãnga. La a wa n toeema tiginga, n kẽng tigin-kãseng pʋgẽ. Be, a ra pa paamd tɩ b nong n yãkd-a t’a leokdẽ ye. Wakat ninga tigsgã satame t’a pa tol n paam n leok ye. A yeelame: “Ra sãamda m sũuri. M da getame tɩ yaa wa m konga zu-zẽkr bũmbu. F sã n pa paamd n leokdẽ tɩ yaa woto wakat fãa, f wat n getame tɩ yaa wa pʋ-toogo.”

10. Bõe la d tõe n maan tɩ sõng-d tɩ d paam n leok tigissã sasa?

¹⁰ Yãmb me maooda ne a Dãniyɛlla zu-loɛɛgã buud bɩ? Sã n yaa woto, y tõe n wa basame n pa le zẽkd y nugu, n zĩ n kelgdẽ bala. La ra koms-y raood n bas ye. Bõe la y tõe n maane? Y tõe n mi n segla leoor wʋsg tigsg fãa yĩnga. Woto, y sã n pa paam n leok sõsgã sɩngrẽ, y ket n tõe n paam n leokame, nand tɩ tigsgã sa. Y sã n wa segend Gũusg Gasgã zãmsgo, bɩ y gũus n ges sull fãa sẽn tar loees ning ne sõsgã gom-zugã. Y sã n maan woto, sõsgã fãa sasa, y na n tara y sẽn tõe n leoke. Sẽn paase, y tõe n segla sul nins võor wʋmb sẽn yaa toogã, sẽn na yɩl tɩ sã n wa ta be bɩ y tõog n leoke. (1 Kor. 2:10) Bõe yĩnga? Bala neb wʋsg tõeeme n pa zẽk b nug n na n leok wakat kãng ye. Y sã n tũ sagl-kãensã fãa n ket n pa tõe n paam n leok tigsg sasa, y maanda wãna? Nand tɩ tigsgã sɩnge, y tõe n goma ne sẽn na n lʋɩ-a taoor sõsgã sasa wã, n togs-a sokr ning y sẽn dat n leokã.

11. Filip rãmb 2:4 wilgdame tɩ d segd n maana bõe?

¹¹ Karm-y Filip rãmb 2:4. Wẽnnaam vẽnega tẽn-tʋmd a Poll t’a yeel kiris-nebã tɩ b bao b taabã nafr me. Wãn to la d tõe n tũ sagl-kãngã tigissã sasa? D tẽeg tɩ neb a taabã me rat n kẽesa b toog wa tõndo.

12. Bõe la d tõe n maan n keng d taabã raood tigissã sasa? (Ges-y fotã me.)

¹² Tags-y n ges-y-yã. Y sã n wa sõsd ne y zo-rãmba, y na n sooga sõsgã hal tɩ b pa tõe n paam n gom bɩ? Sãmbg kae tɩ yaa ayo. Y na n datame tɩ b  kẽes b toog sõsgã pʋgẽ. Sã n pa rẽ, b na n getame tɩ y toog kae ne-b ye. Woto me, tigissã sasa, d ratame tɩ neb a taabã me paam n leoke. Bũmb a ye sẽn tar yõod wʋsg d sẽn tõe n maan n keng d tẽed-n-taasã raoodo, yaa d sẽn na n bas tɩ bãmb me paam n gom bũmb nins b sẽn tẽedã yell tigissã sasa. (1 Kor. 10:24) D ges d sẽn tõe n maan dẽ to-to.

13. Bõe la y tõe n maan tɩ sõng neb a taabã tɩ bãmb me paam n leoke?

¹³ Bũmb a ye y sẽn tõe n maan yaa y sẽn na n leokd koɛɛg-koɛɛga. Rẽ na n kɩtame tɩ neb wʋsg me paam n leoke. Kãsem-dãmbã la koe-moondb nins sẽn tar minimã tõe n kõo mak-sõng rẽ wɛɛngẽ. Sullã leoorã sã n yaa koɛɛg-koɛɛga, bɩ y ra gom bũmb wʋsg yell ye. Y sã n lebs n kʋms sullã goamã fãa, neb a taabã pa na n le tar b sẽn na n yeel ye. Wala makre, sul-kãngã pʋgẽ, b goma bũmb a yiib d sẽn tõe n maan yelle. Yaa tɩ d sã n na n leok bɩ d modg tɩ yɩ koɛɛg-koɛɛga, la d ra gom bũmb wʋsg yell ye. Sã n yaa yãmb la pipi n na n leok sul-kãngã sokrã, y tõe n goma bũmb a yembr bal yelle.

14. Bõe n tõe n sõng-d tɩ d bãng wakat ning d sẽn na n zẽk d nugã? (Ges-y fotã me.)

¹⁴ Tags-y neere, n bãng wakat ning y sẽn na n zẽk y nug n leoke. Y sã n wɩngd n zẽkd y nugã, tõe n yɩɩ wa y sẽn modgd sẽn lʋɩt-a taoorã t’a yãk yãmba, baa ne neb a taabã sẽn nan pa paam n leokã. Tõe n komsa neb a taabã raoodo, tɩ b pa le rat n zẽk b nugã ye.—Koɛ. 3:7.

15. a) B sã n pa yãk tõnd tɩ d leok tigsg sasa, d manesem segd n yɩɩ wãna? b) Bõe la sẽn lʋɩt-a taoor tigsgã sasa wã tõe n maane, tɩ wilg tɩ neb a taabã yell pak-a lame? (Ges-y zĩ-gũbrã, “ Y sã n wa lʋɩ taoor sõsg sasa.”)

¹⁵ Neb wʋsg sã n zẽkd b nugã sõsg sasa, d tõeeme n pa paam n leok wʋsg  wa d sẽn datã ye. Wakat ning menga, sẽn lʋɩt-a taoorã tõeeme n pa paam n yãk-d ye. Tõe n sãama d sũuri, la d pa segd n tags t’a sẽn pa yãk tõndã yaa pʋ-toog ye.—Koɛ. 7:9.

16. Bõe la d tõe n maane, n keng neb nins sẽn leokã raoodo?

¹⁶ Y sã n pa tõe n paam n leok naoor wʋsg wa y sẽn datã, y tõe n maaga y yĩng n kelg neb a taabã leoore, tɩ tigsgã poor bɩ y pẽg-ba. Y sẽn na n pẽg y tẽed-n-taasã na n kenga b raoodo, wa y sẽn da na n leok tigsgã sasa wã. (Yel. 10:21) D sã n pẽgd d taabã, rẽ me yaa bũmb a to d sẽn maand n kengd taab raoodo.

17. a) Wãn to la roagdbã tõe n sõng b kambã tɩ b segl leoor sẽn zemse? b) Wa video wã sẽn wilgã, bũmb a naas la d tõe n maan d sã n wa segend leoore. Bãmb la bʋse? (Ges-y notã me.)

¹⁷ Bõe me la d tõe n maan n keng taab raood tigissã sasa? Y sã n yaa roagda, bɩ y sõng y kambã tɩ b segl leoor sẽn zems ne b yʋʋmã. (Mat. 21:16) Wakat ninga, zãmsgã sasa b mi n gomda yɛl kẽer sẽn pa pak kambã yelle, wala makre, kãadmã pʋgẽ zu-loeese, la yɛl a taaba. La sull a ye bɩ a yiib n tõe n beẽ, tɩ kambã tõe n paam n leoke. Sẽn paase, sõng-y y kambã tɩ b bãng tɩ pa b sã n zẽk b nug fãa la b na n yãk-b ye. Y  sã n deng n togs-b woto, na n kɩtame tɩ b sã n wa zẽk b nug n na n leok tɩ b pa yãk-ba, bɩ ra sãam b sũur ye.—1 Tɩm. 6:18. d

18. D sã n wa leokd tigissã sasa, bõe la d tõe n maan tɩ ra wa yaa d meng yell bal la d gomda? (Yel-bũnã 27:2)

¹⁸ D ned kam fãa tõe n segla leoor sẽn na n waoog a Zeova la keng a tẽed-n-taasã raoodo. (Yel. 25:11) Wakat ninga, d tõe n leokame n gom d meng yell koɛɛg-koɛɛga. La d pa segd n nong n maand rẽ ye. (Karm-y Yel-bũn 27:2; 2 Kor. 10:18) D segd n nong n gomda a Zeova yelle, a Gomdã, la a nin-buiidã yell n yɩɩda. (Vẽn. 4:11) La sullã sokrã sã n baoodame tɩ d gom d meng yelle, d tõe n maana woto. D ges d sẽn tõe n tũ sagl-kãngã to-to sull ning sẽn pʋgdã pʋgẽ.

19. a) Tigissã sasa d sã n wilgdẽ tɩ d taabã yell pak-d lame, wãn to la na n naf-do? (Rom dãmbã 1:11, 12) b) Leoorã kũun wɛɛngẽ, bõe n noom yãmb mengã?

¹⁹ B pa kõ noy takɩ d sẽn segd n leok to-to wã wɛɛngẽ ye. La d ned kam fãa segd n modgame t’a sẽn leokd to-to wã kengd a taabã raoodo. Woto rat n yeelame tɩ d segd n modg n kẽesda d toog sõssã sasa. Rat n yeelame me tɩ d bas tɩ neb a taabã me paam n leok tigissã sasa, la d wilg tɩ d sũur nooma ne rẽ. Tigissã sasa, d sã n getẽ tɩ yaa d taabã yell n pak tõnd n yɩɩda, d “ned kam fãa tẽeb na n kenga a to raoodo.”—Karm-y Rom dãmb 1:11, 12.