1. Boe la bi-ribl a ye maan-yã, tɩ wilgd t’a kɩsa sɩd ne kũum vʋʋgrã?

 BI-RIBL a ye yʋʋr sẽn boond t’a Matiye ra bẽeda bã-kɛgenga, hal tɩ yɩ tɩlɛ tɩ b woper-a naoor wʋsgo. A sẽn wa n tar yʋʋm a yopoe, daar a ye, yẽ ne a roagdbã ra zĩ n geta JW Teledifiziyõ sẽn yit kiuug-fãa wã. Teledifiziyõ wã baasgẽ, b wilga mizik sẽn gomd kũum vʋʋgrã yelle. b Sẽn wa n sa wã, a Matiye kolga a roagdbã n gãd b nusã n yeel yaa: “Yãmb miime m baaba ne m ma, baa mam sã n ki, kũum vʋʋgrã sasa, m na n vʋʋgame. D na n le yãa taaba. Na n zemsame.” Tags-y n ges-y a roagdbã sũur sẽn yɩ noog to-to, b sẽn bãng tɩ b biigã kɩsa sɩd tɩ sẽn ki-bã na n vʋʋgame wã.

2-3. Bõe yĩng tɩ d segd n tagsd kũum vʋʋgrã yelle?

² Yɩta sõma tɩ d mi n tagsd Biiblã sẽn pʋlem tɩ sẽn ki-bã na n vʋʋgame wã zugu. (Zã 5:28, 29) Bõe yĩnga? Bala d pa mi wakat ning d sẽn na n tiig n lʋɩ bã-kɛgenga, wall d ned sẽn na n tiig n maan kaalem ye. (Koɛ. 9:11; Zak 4:13, 14) D sẽn tẽed kũum vʋʋgrã tõe n sõng-d lame tɩ d tõog toog zu-loees a woto sasa. (1 Tes. 4:13) Biiblã wilgdame tɩ d Ba sẽn be saasẽ wã mii tõnd sõma, la t’a nong-d-la wʋsgo. (Luk 12:7) Tags-y n ges-y-yã, a Zeova sẽn mi tõnd sõma wã, a tõe n vʋʋg-d lame tɩ d ket n tar d pʋ-tẽerã, tɩ d zʋgã ne d manesmã me pa toeem ye. A Zeova nong-d-la wʋsgo, la a kɩt tɩ d tõe n vɩɩmd wakat sẽn kõn sa. Dẽnd baa d sã n ki, a na n vʋʋg-d lame!

 ³ Sõs-kãngã pʋgẽ, d na n yãa bũmb kẽer sẽn kɩt tɩ d tõe n tẽ tɩ sẽn ki-bã na n vʋʋgame. Rẽ poore, d na n yãa Biiblã kibar sẽn kengd raoodo. Sõs-kãngã gom-zugã sẽn yaa: “Fo tãoã na n vʋʋgame” wã yita kiba-kãng pʋgẽ. (Zã 11:23) Sẽn na n baase, d na n bãnga d sẽn tõe n maane, n maneg n kɩs sɩd tɩ sẽn ki-bã na n vʋʋgame.

4. D sã n dat n tẽ pʋlenga, d segd kɩsa sɩd ne bõe? Rɩk-y makre.

⁴ Sẽn na yɩl n tẽ pʋlenga, d segd n kɩsa sɩd tɩ sẽn pʋlm-a wã tʋllame n pids a pʋlengã, la t’a tara pãng bɩ tõog n tõe n maan dẽ. D rɩk makre, mams-y n ges-y sob-kãseng sẽn na n sãam y roogo, tɩ y zoa wa pʋlm-y yaa: ‘M na n sõng-f lame n lebs n me f roogã.’ Y zoa wã yaa ned sẽn togsd sɩda. Sẽn paase, y kɩsa sɩd t’a tʋll n sõng-y lame. A sã n tar minim rotã meeb wɛɛngẽ la tʋʋm-teedo, y miime t’a tara tõog n tõe n sõng-yã. Yaa wãn to yẽ ne Wẽnnaam sẽn pʋlem t’a na n vʋʋga sẽn ki-bã? Rẽ yĩnga, a sɩd tʋll n maana woto, la a tar tõog n tõe n maan dẽ bɩ?

5-6. Bõe yĩng tɩ d tõe n kɩs sɩd t’a Zeova tʋllame n vʋʋg sẽn ki-bã?

⁵ A Zeova tʋll n vʋʋga sẽn ki-bã bɩ? Sãmbg kae t’a tʋll n maana woto. A vẽnega neb wʋsg tɩ b gʋls Biiblã, n gom a sẽn pʋlem t’a na n wa vʋʋga sẽn maan-b kaalmã yelle. (Eza. 26:19; Ooze 13:14; Vẽn. 20:11-13) Sẽn paase, a sã n pʋlem bũmbu, a pidsd-a-la wakat fãa. (Zoz. 23:14) Sɩd-sɩda, a Zeova rata ne a sũur fãa n vʋʋg sẽn ki-bã. Bõe yĩng tɩ d yet woto?

⁶ Tẽeg-y-yã a Zoob sẽn da yeel bũmb ningã. A ra kɩsa sɩd tɩ baa a sã n ki, a Zeova na n yãgdame n dat n le yã-a. (Zoob 14:14, 15) A Zeova yãgdame n na n vʋʋg wẽn-sakdb nins fãa sẽn maan kaalmã. La yaa wãn to ne neb milyaar-dãmb sẽn maan kaalem, n pa paam n zãms Biiblã n bãng a Zeova wã? D Wẽnnaamã sẽn nong-dã rat n vʋʋga nin-kãens me. (Tʋʋ. 24:15) A ratame tɩ bãmb me paam n yɩ a zo-rãmba, n vɩɩmd wakat sẽn kõn sa tẽngã zugu. (Zã 3:16) Sãmbg kae t’a Zeova tʋll n vʋʋga sẽn ki-bã.

7-8. Bõe yĩng tɩ d tõe n kɩs sɩd t’a Zeova tara pãng la tõog n tõe n vʋʋg sẽn ki-bã?

⁷ A Zeova tara pãng n tõe n vʋʋg sẽn ki-bã bɩ? N-ye! Yẽ la “Sẽn-tõe-a-fãa wã.” (Vẽn. 1:8) Dẽnd a tara pãng n tõe n tõog bɛ buud fãa, baa kũumã. (1 Kor. 15:26) D sẽn mi rẽ wã belsda tõndo, la kõt-d pãnga. Yɩɩ woto ne saam-bi-poak a ye yʋʋr sẽn boond t’a Emma Arnold. Dũni gill zabr a yiib-n-soabã sasa, yẽ ne a zakã rãmb paama namsg wʋsg b tẽebã yĩnga. A belsa a bi-pugla, neb a sẽn nong sẽn maan kaalem Nazi kã de kõnsãntrasiõ pʋgẽ wã yĩnga. A yeel-a lame yaa: “Sẽn ki-bã sã n pa na n le vʋʋge, dẽnd kũumã sẽn yaa bɛ wã tara pãng n yɩɩd Wẽnnaam wɛ?” Yaool n pa woto ye. Yaa vẽeneg tɩ bũmb kae t’a pãngã ta a Zeova ye! Wẽnnaam sẽn yaa Sẽn-tõe-a-fãa wã, soab ning sẽn naan ninsaal n kõ-a vɩɩmã tõe n le vʋʋga sẽn ki-bã, n le kõ-b vɩɩm.

⁸ Bũmb a to sẽn kɩt tɩ d miẽ tɩ Wẽnnaam tõe n vʋʋga sẽn ki-bã, yaa t’a pʋ-tẽerã ka koak ye. A boonda ãdg fãa ne a yʋʋre. (Eza. 40:26) Sẽn paase, a tẽra neb nins sẽn ki wã yelle. (Zoob 14:13; Luk 20:37, 38) A tẽra bũmb fãa sẽn ki-bã zugu, wala makre, b zʋgã, b yel-manesmã, b yalẽ wã, b sẽn da maand bũmb nins b vɩɩmã pʋgẽ wã, b pʋ-tẽerã, la baa yel-bõonesã fãa.

9. Bõe yĩng tɩ y kɩs sɩd t’a Zeova na n wa vʋʋga sẽn ki-bã?

 ⁹ Yaa vẽeneg tɩ d tõe n tẽe a Zeova sẽn pʋlem t’a na n wa vʋʋga sẽn ki-bã, bala d miime t’a tʋll n maana woto, la t’a tara pãng la tõog n tõe n maan dẽ. Bũmb a to sẽn kɩt tɩ d tõe n tẽ kũum vʋʋgrã, yaa t’a Zeova zoe n vʋʋga neb sẽn ki. Pĩnd wẽndẽ wã, a kõo wẽn-sakdb a wãn tõogo, a Zeezi sẽn naage, tɩ b vʋʋg neb sẽn ki. Bɩ d gom a Zeezi sẽn vʋʋg kũum yelle, tɩ b gom rẽ yell Zã sak 11 wã pʋgẽ.

10. A Zeezi sẽn wa n be Zʋrdẽ kʋɩlgã rʋʋnd n moond koɛɛgã, bõe n maane, la bõe la a maan-yã? (Zã 11:1-3)

¹⁰ Karm-y Zã 11:1-3. Tags-y n ges-y bũmb ning sẽn maan Betani, yʋʋmd 32 baasgẽ. A Zeezi ra tara zo-rãmb tẽn-kãng pʋgẽ. Yaa a Lazaar ne a tãop a yiibã, a Maari ne a Marte. (Luk 10:38-42) La a Lazaar wa n lʋɩɩ bãaga, t’a tãopã maand yɩɩre. B tʋmame tɩ b tɩ togs a Zeezi. A Zeezi ra bee Zʋrdẽ kʋɩlgã rʋʋnde. Beenẽ ne Betani zemsa rasem a yiib kẽnde. (Zã 10:40) Bʋko, koe-taasdã sẽn wa n ta a Zeezi nengẽ wã, t’a Lazaar zoe n maana kaalem. Baa a Zeezi sẽn da mi t’a zoa wã maana kaalmã, a kell n paa a sẽn da beẽ wã n maan rasem a yiib n paase, n yaool n dɩk Betani sore. A sẽn wa n ta be wã t’a Lazaar kaalmã taa rasem a naase. A Zeezi yãka yam n na n maan bũmb sẽn na n sõng a zo-rãmbã, la sẽn na n waoog Wẽnnaam.—Zã 11:4, 6, 11, 17.

11. Kiba-kãngã wilgda tõnd bõe zoodã wɛɛngẽ?

¹¹ Kiba-kãngã wilgda tõnd bũmb sẽn tar yõod wʋsg zoodã wɛɛngẽ. Tẽeg-y t’a Maari ne a Mart sẽn tʋm tɩ b tɩ togs a Zeezi wã, b pa kos-a t’a wa Betani ye. B yeel-a lame bal t’a zo-nongrã pa keem ye. (Zã 11:3) A Lazaar sẽn maan kaalmã, a Zeezi ra tõe n paa yɩɩg n vʋʋg-a. Baasgo, a yãka yam n kẽng Betani, n tɩ yã a Maari ne a Mart sẽn yaa a zo-rãmbã. Yãmb tara zoa sẽn na n sak n wa sõng-yã, baa y pa kos-a bɩ? Sã n yaa woto, y miime tɩ yaa ned y sẽn tõe n teeg “yel-pakr wakate.” (Yel. 17:17) Bɩ tõnd me rɩk a Zeezi togs-n-taare, n yɩ zo-rãmb a woto buudu. Masã, bɩ d le gom kibarã yelle, n ges bũmb ning sẽn maanã.

12. Bõe la a Zeezi pʋlem a Marte, la bõe yĩng tɩ pa pʋlen-vɩɩdo? (Zã 11:23-26)

¹² Karm-y Zã 11:23-26. A Mart wʋmame t’a Zeezi kolga Betani, t’a zoe n kẽng n tɩ seg-a n yeel yaa: “Zu-soaba, yãmb sã n da zĩndẽ ka, mam tãoã ra kõn kiẽ ye.” (Zã 11:21) Sɩd me, a Zeezi ra tõe n sãooga a Lazaare. La a yãka yam n na n maan bũmb sẽn na n ling-b wʋsgo. A pʋlma a Mart n yeel-a yaa: “Fo tãoã na n vʋʋgame.” Sẽn paase, a togs-a a Mart bũmb sẽn kɩt t’a tõe n tẽ a sẽn pʋlmã. A yeelame: “Mam yaa kũum vʋʋgrã la vɩɩmã.” Sɩd me, Wẽnnaam kõo a Zeezi tõog t’a tõe n vʋʋg kũum. Sẽn deng rẽ, a vʋʋga bi-pugl sẽn maan  kaalem tɩ ra nan pa kaoos ye. Bi-bɩɩg a ye me n da maan kaalem, t’a vʋʋg-a daar-n-kãng bala. (Luk 7:11-15; 8:49-55) La rẽ yĩnga, a ra na n tõog n vʋʋga ned sẽn maan kaalem sẽn ta rasem a naase, t’a yĩngã sɩng põogr sɩda?

13. Wa Zã 11:32-35 sẽn wilgdã, a Zeezi sẽn yã a Maari ne neb a taabã sẽn yãbdã, a manesem yɩɩ wãna? (Ges-y fotã me.)

¹³ Karm-y Zã 11:32-35. Tags-y n ges-y bũmb ning sẽn maan rẽ poorã. A Lazaar tão a Maari me yiime n tɩ seg a Zeezi. Yẽ me togsa a Zeezi a Mart sẽn yeel bũmb ningã. A yeelame: “Zu-soaba, yãmb sã n da zĩndẽ ka, mam tãoã ra kõn kiẽ ye.” Yẽ ne neb nins sẽn da be ne-a wã sũy ra sãama wʋsgo. A Zeezi sẽn da ne b sẽn yãbdã, a sũurã sãama hal wʋsgo. A zo-rãmbã nimbãaneg yõk-a lame, hal t’a raag nintãm. A miime tɩ ned d sẽn nong sã n maan kaalem, zabdame. Sɩd me, a yãgdame n na n menes bũmb ning sẽn da kɩt tɩ b yãbdã!

14. A Maari yãbrã sẽn kɩt t’a Zeezi tall manesem ningã sõngda tõnd tɩ d bãng bõe a Zeova zugu?

¹⁴ A Maari yãbrã sẽn kɩt t’a Zeezi tall manesem ningã wilgdame tɩ Wẽnnaam a Zeova nimbãan-zoeerã yaa kãsenga. Bõe yĩng tɩ d yet woto? Wa d sẽn yã sõsg ning sẽn loogã pʋgẽ wã, a Zeezi tagsa wã la a yel-manesmã wilgdame t’a rɩkda a Ba wã togs-n-taar bal kɛpɩ. (Zã 12:45) A Zeezi sẽn yã a zo-rãmbã sũy sẽn sãamã, kɩtame t’a raag nintãm. Rẽ kɩtame tɩ d tõe n yeel t’a Zeova me sũur sãamda wʋsgo, a sã n ne d sẽn daagd nintãm sũ-sãang yĩngã. (Yɩɩn. 56:8) Woto pa kɩt tɩ y rat n pẽneg tõnd Wẽnnaamã sẽn yaa nimbãan-zoɛtã sɩda?

15. Wa Zã 11:41-44 sẽn wilgdã, bõe la a Zeezi maan a Lazaar yaoogẽ wã? (Ges-y fotã me.)

¹⁵ Karm-y Zã 11:41-44. A Zeezi taa a Lazaar yaoogẽ wã, n kos tɩ b lak kugrã sẽn da pag yaoogã noorã. A Mart zãgsame, n yeel tɩ segd n lebga yũug masã. T’a Zeezi yeel yaa: “Mam pa yeel foo tɩ fo sã n tẽ, f  na n yãa Wẽnnaam ziirã sɩda?” (Zã 11:39, 40) A Zeezi zẽka a neng yĩngri, n pʋʋs nebã sʋka. A ra ratame tɩ bũmb ning yẽ sẽn na n maan rẽ poorã yɩ a Zeova waoogr yĩnga. Rẽ poore a zẽka a koɛɛg n yeel yaa: “Lazaare, wa yi!” La a Lazaar sɩd yii yaoogẽ wã! A Zeezi maana bũmb neb kẽer sẽn da tagsd tɩ pa tõe ye.—Ges-y Zã 11:17 notã, farendã Bible d’étude pʋgẽ.

16. Wãn to la kibar ning sẽn be Zã sak 11 wã sõngd tõndo, tɩ d maneg n tẽ tɩ sẽn ki-bã na n vʋʋgame?

¹⁶ Kibarã sẽn be Zã sak 11 wã sõngda tõndo, tɩ d maneg n tẽ kũum vʋʋgrã. Wãn to? Tẽeg-y bũmb ning a Zeezi sẽn pʋlem a Martã. A yeelame: “Fo tãoã na n vʋʋgame.” (Zã 11:23) A Zeezi me tʋllame n pids a sẽn pʋlem bũmb ningã wa a Ba a wã, la a tar tõog me n tõe n maan dẽ. A Zeezi sẽn daag nintãmã wilgdame t’a yãgda ne a sũur fãa n na n menes kũumã, la sũ-sãams nins fãa rẽ sẽn wat ne wã. A Lazaar sẽn yi yaoogẽ wã, wilgdame me t’a Zeezi tara tõog n na n vʋʋg kũum. Tẽeg-y-yã a sẽn da yeel a Mart bũmb ningã. A yeelame: “Mam pa yeel foo tɩ fo sã n tẽ, f na n yãa Wẽnnaam ziirã sɩda?” (Zã 11:40) D tara bʋʋm sẽn sek d na tẽ tɩ Wẽnnaam sẽn pʋlem tɩ sẽn ki-bã na n vʋʋgame wã na n pidsame. La bõe la d tõe n maane, tɩ pʋlengã maneg n yɩ vẽeneg d yamẽ?

17. D sã n wa karemd kibay sẽn gomd kũum vʋʋgr yell Biiblã pʋgẽ, bõe yell la d segd n tagse?

¹⁷ Karm-y kibay sẽn gomd neb b sẽn vʋʋg yelle, la y bʋgs rẽ zugu. Biiblã gomda kũum vʋʋgr a nii sẽn zĩnd tẽngã zug yelle. c Maag-y y yĩng n karem kiba-kãense. Y sã n wa karemdẽ, bɩ y tẽeg tɩ yaa rap la pagb la kamb sẽn sɩd zĩndi. Bao-y n bãng-y yam ning y sẽn tõe n dɩk kibarã pʋgẽ. Tags-y n ges-y kibar fãa sẽn wilgd to-to, tɩ Wẽnnaam tʋll n vʋʋga sẽn ki-bã,  la t’a tara tõog n tõe n maan dẽ. Sẽn yɩɩd fãa, tags-y kũum vʋʋgr ning sẽn tar yõod n yɩɩdã yelle, rat n yeel t’a Zeezi vʋʋgrã. Tẽeg-y tɩ yɩɩ neb kobs n maan kaset ne a Zeezi vʋʋgrã, tɩ rẽ yaa bũmb sẽn tõe n paas d tẽebã pãnga.—1 Kor. 15:3-6, 20-22.

18. Wãn to la d tõe n maane, tɩ Rĩungã yɩɩl nins sẽn gomd kũum vʋʋgr yellã naf-do? (Ges-y notã me.)

¹⁸ Zãms-y Rĩungã yɩɩl nins sẽn gomd kũum vʋʋgr yellã, la y nong n yɩɩndẽ. d (Efɛɛ. 5:19) Yɩɩn-kãens kɩtdame tɩ kũum vʋʋgrã yaa vẽeneg d yamẽ, la sõngdẽ tɩ d maneg n tẽ pʋlen-kãnga. Kelgd-y yɩɩn-kãense. Zãms-y b sẽn yɩɩnd to-to, la y sõs a gom-biisã zug y zak pʋgẽ Biibl zãmsgã sasa. Rɩk-y yɩɩllã ne zugu, tɩ gom-biisã pa y yamẽ wã la y sũurẽ wã. Woto, y sã n wa paam zu-loɛɛg sẽn tõe n tũ ne y yõore, wall y ned sã n maan kaalem, a Zeova vʋʋsem sõngã na n sõng-y lame tɩ y tẽeg yɩɩn-kãens goamã, tɩ bels-yã, la keng y raoodo.

19. Bõe la d tõe n mams d yamẽ kũum vʋʋgrã wɛɛngẽ? (Ges-y zĩ-gũbrã: “ Bõe la y na n sok-ba?”)

¹⁹ Mamsd-y y yamẽ. A Zeova kõo tõnd tõog tɩ d tõe n mams d yamẽ tɩ d bee dũni-paalgã pʋgẽ. Saam-bi-poak a yembr yeelame: “Mam dɩka sẽk wʋsg n mams tɩ m bee dũni-paalgã pʋgẽ, hal n da tol n wʋmd fɩlɛɛr-dãmbã puudã yũugu.” Mams-y n ges-y y sẽn na n le yã rap la pagb sẽn zĩnd pĩnd wẽndẽ wã n yɩ wẽn-sakdba. Ãnda la y yãgd n na n yã? Sogs-bʋs la y na n sok-a? Mams-y n ges-y y sẽn na n le paam n yã y neb nins sẽn maan kaalmã. Mams-y n ges-y sẽn na n yɩ to-to wã, y sẽn na togs-b bũmb ningã, y sẽn na n mobg taabã, la y sẽn na n daag nintãm sũ-noogã yĩngã!

20. Bõe la y segd n modg n maane?

²⁰ D sũur yaa noog wʋsg ne a Zeova sẽn pʋlem tɩ sẽn ki-bã na n vʋʋgame wã. D tõe n basa d yam tɩ pʋlengã na n pidsame, bala a Zeova tʋll n maana woto, la a tar tõog n na n maan dẽ. Bɩ d modg n ket n tẽed pʋlen-kãngã sẽn tar yõod wʋsgã. D sã n maan woto, d na n paam n pẽnega tõnd Wẽnnaamã, soab ning sẽn pʋlemd tõnd ned kam fãa tɩ: ‘Fo nebã na n vʋʋgame’ wã.