1-2. Ned lisg wakate bõe n maande, la bõe la d segd n modg n maane?

 YÃMB zoe n yãa neb sẽn yas n dat n deeg lisg tigis-kãseng sasa bɩ? Y wʋma b sẽn bas b yam n zẽk b koees n leok sogsg a yiibã b sẽn sokd nebã nand tɩ b lis-ba. Y ra nee b zakã rãmb la b zo-rãmbã sũy sẽn noom ne-ba. B sã n wa lis-b n sa tɩ b yita, y wʋmda nug-pogsã la y ne b nensã sẽn wilgd tɩ b sũyã noomame. Semen fãa, neb tusa n dɩkd b meng n kõ Wẽnnaam a Zeova n deeg lisg n lebg a Kaset rãmba.

² La yãmb yẽ? Yãmb sã n yãka yam n dat n deeg lisgu, y yaa toor fasɩ ne dũni-wẽn-kãngã nebã, y sẽn “baood a Zeova” wã yĩnga. (Yɩɩn. 14:1, 2) D yaa bi-bɩɩg tɩ d yaa kãsma, sõs-kãngã yaa d fãa yĩnga. D sʋkã neb nins sẽn zoe n deeg lisgã me segd modgame n kell n tũ a Zeova wakat fãa. Bʋʋm waoog sẽn kɩt tɩ d rat n tũ a Zeova. Bɩ d gom bãmb b tãab yelle.

3. Bõe yĩng t’a Zeova nin-buiidã nong sẽn yaa sɩd la sẽn yaa tɩrga? (Yɩɩn-sõamyã 119:128, 163)

³ A Zeova yeela a nin-buiidã tɩ b ‘nong sɩda.’ (Zaka. 8:19) A Zeezi sagla a karen-biisã tɩ b bao tɩrlem. (Mat. 5:6) Woto rat n yeelame tɩ d segd n tʋlla ne d sũur fãa n maan sẽn yaa tɩrga, sẽn yaa sõma, la sẽn yaa yɩlemd a Zeova nifẽ. Yãmb nonga sẽn yaa sɩd la sẽn yaa tɩrg bɩ? D kɩsa sɩd tɩ y nonga rẽ. Yãmb kisa ziri la wẽng buud fãa. (Karm-y Yɩɩn-sõamyã 119:128, 163.) Ned sẽn yaa zirẽ-be-ned rɩkda a Sʋɩtãan sẽn yaa dũniyã naabã togs-n-taare. (Zã 8:44; 12:31) Bũmb a ye a Sʋɩtãan sẽn data, yaa a sãam Wẽnnaam a Zeova yʋʋrã sẽn yaa sõngã. A Ãdem ne a Awa sẽn kɩɩs a Zeova wã tɛka, a Sʋɩtãan yelgda ziri d Wẽnnaamã zugu. A kɩtame tɩ nebã tẽed tɩ Wẽnnaam yaa  naab sẽn yaa rat-m-ye la pʋ-lik soaba, sẽn mongd a nin-buiidã bõn-sõma. (Sɩng. 3:1, 4, 5) A Sʋɩtãan sẽn yelgd ziri ninsã kɩtame tɩ nebã tar tagsg sẽn pa sõma a Zeova zugu. Ninsaal sã n yãk yam n pa ‘nong sɩda,’ a Sʋɩtãan tõe n tusa a soabã t’a tʋm tʋʋm-kɛg la tʋʋm-wẽns buud fãa.—Rom. 1:25-31.

4. Boẽ la a Zeova maan tɩ wilgdẽ t’a yaa “sɩdã Wẽnnaam”? (Ges-y fotã.)

⁴ A Zeova yaa “sɩdã Wẽnnaam,” la a sõngd neb nins sẽn nong-a wã tɩ b bãngd sɩdã. (Yɩɩn. 31:5) A sẽn maand woto wã, a sõngda nin-kãensã tɩ b pa le tẽed a Sʋɩtãan ziri wã ye. A Zeova zãmsda a nin-buiidã a noyã sẽn na yɩl tɩ b yɩ pʋ-peelem dãmba, la nin-tɩrse. Rẽ kɩtdame tɩ b sũur noom ne b menga, la b tar sũur pʋgẽ bãane. (Yel. 13:5, 6) Yãmb sẽn sɩng Biiblã zãmsg tɛka, y yãame t’a sõngd-y-la woto bɩ? Y bãngame t’a Zeova noyã n nafd ninsaalbã n tɩ yɩɩda. (Yɩɩn. 77:13) Rẽ n so tɩ y yãk yam n na n maan sẽn yaa tɩrg Wẽnnaam nifẽ. (Mat. 6:33) Y segd n sõnga nebã tɩ b bãng sɩdã la y wilg t’a Sʋɩtãan sẽn yet bũmb ning Wẽnnaam zugã yaa ziri fasɩ. Wãn to la y tõe n maan rẽ?

5. Bõe la y tõe n maan tɩ wilg tɩ y nonga sẽn yaa sɩd la sẽn yaa tɩrga?

⁵ Y tõe n yãka yam n wilg ne y manesmã tɩ y zãagda y mens ne a Sʋɩtãan ziri wã, tɩ y teenda sɩdã, tɩ y ratame t’a Zeova yɩ y naaba, la y rat me n maan bũmb nins a sẽn yet tɩ yaa tɩrgã. Wãn to la y tõe n maan rẽ? Pʋʋs-y-yã a Zeova n yeel-a tɩ y rat n maana a raabã wakat fãa, tɩ rẽ poor bɩ y reeg lisg n wilg nebã fãa taoor tɩ y rɩka y meng n kõ a Zeova. Y sã n nong sẽn yaa sɩd la sẽn yaa tɩrga, na n kɩtame tɩ y yãk yam n deeg lisgu.

6. Bõe la b yeel Yɩɩn-sõamyã 45:4 pʋgẽ tɩ kɩt tɩ y nong a Zeezi Kiristi?

⁶ Bõe yĩng tɩ y nong a Zeezi Kiristi? Yɩɩn-sõamyã 45:4 pʋgẽ, b wilga bũmb a wãn sẽn kɩt tɩ d nong-a. (Karm-y.) A Zeezi nonga sẽn yaa sɩda, sik-m-menga, la tɩrelm. Y sã n nonga sẽn yaa sɩd la tɩrga, sãmbg kae tɩ y nonga a Zeezi Kirist me. Tags-y n ges-y a Zeezi sẽn tall raood to-to n gom n teel sẽn yaa sɩd la sẽn yaa tɩrgã. (Zã 18:37) La wãn to la a Zeezi wilg t’a nonga sik-m-menga?

7. Bõe n noom yãmb a Zeezi sik-m-mengã wɛɛngẽ?

⁷ A Zeezi mak-sõngã wilgdame t’a nonga sik-m-menga. Wala makre, a ra wilgda wakat fãa tɩ yaa a Ba wã n segd ne waoogr la pa yẽ ye. (Mark 10:17, 18; Zã 5:19) Y sã n tagsd a Zeezi sik-m-mengã yelle, pa kɩtd tɩ y rat n nong Wẽnnaam Biigã la y tũ-a sɩda? Yaa vẽeneg tɩ yaa woto. Bõe yĩng t’a Zeezi yaa sik-m-meng soaba? Bala, a nonga a Ba wã sẽn yaa sik-m-meng soabã la a rɩkd a togs-n-taare. (Yɩɩn. 18:35; Ebre. 1:3) A Zeezi sẽn dɩkd a Zeova togs-n-taar kɛpɩ wã pa kɩt tɩ y rat n pẽneg-a sɩda?

8. Bõe yĩng tɩ d nong a Zeezi sẽn yaa d Rĩmã?

⁸ D nonga a Zeezi sẽn yaa d Rĩmã, bala a yaa Naab sẽn ka to. A Zeova mengã a toor n zãms a Bi-riblã bũmb ning a sẽn segd n maane, la a yãk-a t’a na n dɩ naam. (Eza. 50:4, 5) Tags-y n ges-y a Zeezi sẽn mong a meng bũmb nins n wilg t’a nonga ninsaalbã. (Zã 13:1) A Zeezi sẽn yaa y Rĩmã, segdame tɩ y nong-a ne y sũur fãa. A yeelame tɩ sẽn nong-b yẽ wã, rat n yeel t’a zo-rãmbã segd n tũuda a noyã n wilg tɩ b sɩd nong-a lame. (Zã 14:15; 15:14, 15) D sẽn paam n yaa a Zeova Bi-riblã zo-rãmbã yaa zu-zẽkr tɛkẽ!

9. Zĩ-bʋs wɛɛngẽ la kiris-nebã lisgã ne a Zeezi lisgã yaa a yembre?

⁹ Bũmb a ye a Zeezi sẽn dat t’a karen-biisã maan yaa b reeg lisgu. (Mat. 28:19, 20) Yẽ mengã kõo mak-sõng rẽ wɛɛngẽ. Bũmb kẽer wɛɛngẽ, a Zeezi lisgã yaa toor ne a karen-biisã rẽndã. (Ges-y zĩ-gũbrã: “ Welgr ning sẽn be a Zeezi lisgã ne a karen-biisã lisgã sʋka.”) La bũmb sãnda wɛɛngẽ, yaa a yembre. A Zeezi sẽn deeg lisgã, a wilgame t’a rat n maana a Ba wã raabo. (Ebre. 10:7) Woto me, Kirist karen-biisã sẽn deegd lisgã, b wilgda nebã taoor tɩ b rɩka b meng n kõ Wẽnnaam a Zeova. Lebga a Zeova raabã la b lʋɩɩsd taoore, la pa bãmb mensã raabã ye. Dẽnd b rɩkda b karen-saambã togs-n-taare.

10. Bõe yĩng tɩ y sẽn nong a Zeezi wã segd n kɩt tɩ y reeg lisgu?

¹⁰ Y kɩsa sɩd t’a Zeezi la a Zeova Bi-ribl yendã, la tɩ yẽ la rĩm ning Wẽnnaam sẽn yãk t’a na n dɩ naam d zugã. Y miime me t’a Zeezi yaa sik-m-meng soaba, la t’a rɩkda a Ba wã togs-n-taar kɛpɩ. Y bãngame t’a rɩlga neb kom sẽn da tare, n bels sũ-sãang rãmba, la a sãoog bãad-rãmb menga. (Mat. 14:14-21) Y nee a sẽn lʋɩt taooor n get a tigingã yell to-to rũndã-rũndã. (Mat. 23:10) Y miime t’a sẽn yaa Wẽnnaam Rĩungã rĩmã, a na n wa maana sẽn yɩɩd rẽ ka la bilfu. Bõe la y tõe n maan n wilg tɩ y nong-a lame? Yaa y sẽn na n dɩkd a togs-n-taare. (Zã 14:21) Wala makre, y sã n dɩk y meng n kõ a Zeova la y reeg lisgu, wilgdame tɩ y sɩnga a Zeezi togs-n-taar rɩkre.

11. D sã n wa yãk yam n na n deeg lisgu, segd n yɩɩ bõe yĩng n tɩ yɩɩda? La bõe yĩng tɩ yaa woto?

¹¹ Bʋʋm waoog sẽn kɩt tɩ d segd n deeg lisgu, la sẽn yɩɩd fãa segd n yɩɩ bõe yĩnga? A Zeezi wilga Wẽnnaam noor ning sẽn yaa kãseng n tɩ yɩɩdã, n yeel yaa: “Yãmb segd n nonga a Zeova sẽn yaa yãmb Wẽnnaamã ne y sũurã fãa, ne y sɩɩgã fãa, ne y yamã fãa, la ne y pãngã fãa.” (Mark 12:30) Yãmb me nonga Wẽnnaam woto bɩ?

12. Bõe yĩng tɩ y nong a Zeova? (Ges-y fotã.)

¹² Bũmb wʋsg n kɩt tɩ d segd n nong a Zeova. Wala makre, yãmb bãngame tɩ vɩɩmã yita yẽ nengẽ, la tɩ “kũun sẽn yaa sõma buud fãa, la kũun sẽn zems zãng  buud fãa yita yĩngri.” (Yɩɩn. 36:9; Zak 1:17) Sɩd me, bõn-sõma nins fãa d sẽn paamdã yita d Wẽnnaamã sẽn yaa kõata, la sẽn nong-dã nengẽ.

13. Bõe n kɩt t’a Zeezi sẽn ki tɩ yɩ maoongã yaa kũun sẽn ka to?

¹³ A Zeezi sẽn ki tɩ yɩ maoongã yaa kũun sẽn ka to a Zeova sẽn kõ-do. Bõe yĩng tɩ d yet woto? Tags-y n ges-y zems-n-taar ning sẽn be a Zeova ne a Bi-riblã sʋkã. A Zeezi yeelame tɩ ‘Ba wã nonga yẽ,’ la tɩ yẽ me “nonga Ba wã.” (Zã 10:17; 14:31) Yʋʋm ka tɛkã b sẽn be ne taabã, b zems-n-taarã tara paasgo. (Yel. 8:22, 23, 30) Tags-y n ges-y a Zeova sũur sẽn sãam to-to, a sẽn sak t’a Bi-riblã nams la a ki wã. A Zeova nonga ninsaalbã wʋsgo, yãmb me sẽn naage, hal n sak t’a Bi-riblã a sẽn nongã wa ki tɩ yɩ maoongo, tɩ kɩt tɩ yãmb ne nebã fãa tõe n wa paam n vɩɩmd wakat sẽn kõn sa. (Zã 3:16; Gal. 2:20) Bũmb nins sẽn kɩt tɩ d nong a Zeova wã sʋka, yãoã la kãseng n yɩɩda.

14. Bõe la y segd n yãk yam n maan tɩ yaa sõma n tɩ yɩɩda?

¹⁴ Y sẽn bãng bũmb wʋsg a Zeova zugã kɩtame tɩ y maneg n nong-a. Yaa vẽeneg tɩ y rat n maneg n pẽnega Wẽnnaam masã menga, la wakat fãa yĩnga. Y sɩd tõeeme. A sagend-d lame tɩ d maan t’a sũur yɩ noogo. (Yel. 23:15, 16) Pa ne y no-goamã bal la y tõe n maan rẽ ye. Yaa ne y  tʋʋm-tʋʋmdɩ wã me. Y sẽn vɩ to-to wã n na n wilg y sã n sɩd nonga a Zeova. (1 Zã 5:3) Dẽnd y sã n yãk yam n maand sẽn noom a Zeova, rẽ la sõma n yɩɩda.

15. Bõe la y tõe n maan n wilg tɩ y nonga a Zeova?

¹⁵ Bõe la y tõe n maan n wilg tɩ y nonga a Zeova? Pipi, y segd n pʋʋsame n dɩk y meng n kõ Wẽnnaam sɩd-sɩdã. (Yɩɩn. 40:8) Rẽ poore, y segd n deega lisgu, n wilg nebã taoor tɩ y rɩka y meng n kõ a Zeova. Wa d sẽn yã sõs-kãngã sɩngrẽ wã, woto yaa bõn-kãseng sẽn kõt sũ-noogo, la sẽn tar yõod wʋsg y vɩɩmã pʋgẽ. Rẽ tɛka, y sẽn vɩ to-to wã pa le yaa y meng yĩng ye. Yaa a Zeova yĩnga. (Rom. 14:8; 1 Pɩy. 4:1, 2) Woto maaneg tõe n wõnda bũmb sẽn pa nana. Sɩd me, pa nana ye. La kɩtdame tɩ y tõe n wa paam vɩɩm sẽn tar barkã. Wãn to?

16. Wa Yɩɩn-sõamyã 41:12 sẽn wilgdã, bõe la a Zeova na n maan n keo neb nins sẽn dɩk b mens n kõ-a n na n maan a raabã?

¹⁶ A Zeova yaa kõat sẽn ka to. Sẽn yaa bũmb ning fãa la y kõ-a, a na n lebs-y-la sẽn yɩɩd rẽ hal zĩig sẽn zãre. (Mark 10:29, 30) A na n kõ-y-la keoor sẽn yaa kãsenga, la a kɩt tɩ y vɩɩmã tall bark masã menga, baa ne y sẽn vɩ dũni sẽn yaa wẽng wʋsg pʋgẽ wã. La rẽ na n yɩɩ reng-n-lɛmbga. Bark nins y sẽn na n paam y lisgã poorã pa na n tall saab ye. Y tõe n kell n tũu y Ba wã y sẽn nongã wakat sẽn kõn sa yĩnga. Yãmb ne yẽ nonglmã pãng na n ket n tara paasgo. Y na n wa paam n vɩɩmda wakat sẽn kõn sa, wa a Zeova.—Karm-y Yɩɩn-sõamyã 41:12.

17. Bõe la a Zeova pa tare, tɩ y tõe n kõ-a?

¹⁷ Y sã n dɩk y meng n kõ a Zeova la y reeg lisgu, yaa kũun sẽn yaa kãseng wʋsg la y kõ y Ba wã t’a sũur noom ne rẽnda. A kõ-y-la bõn-sõma buud fãa, rat n yeel tɩ vɩɩm sẽn tar bark y sẽn da nan zɩ n paame. Yãmb me tõe n kõo sẽn so-a saasã la tẽngã bũmb a sẽn pa tare, rat n yeel tɩ y sẽn yãk yam n na n tũ-a ne y sũur fãa wã. (Zoob 1:8; 41:11; Yel-bũnã 27:11) Hakɩɩka, woto la y tõe n maan tɩ y vɩɩmã tall bark n yɩɩda. Sãmbg kae tɩ y sẽn nong  a Zeova wã yaa bʋʋm-kãseng sẽn sek y na reeg lisgu. Bʋʋm kae sẽn yɩɩd rẽ ye.

18. Sogs-bʋs la y tõe n sok y menga?

¹⁸ B sã n sok yãmb yaa: ‘Y na n deega lisg masã bɩ?’ Y na n leokame tɩ bõe? Yaa yãmb y ye bal n tõe n leok sok-kãngã. La bũmb sẽn tõe n sõng-yã, yaa y sẽn na n sok y meng yaa: ‘Bõe n gɩdg maam ne lisg reegre?’ (Tʋʋ. 8:36) Tẽeg-y bũmb a tãabã yell d sẽn gomã. Pipi, y nonga sẽn yaa sɩd la sẽn yaa tɩrga. Sok-y y meng yaa: ‘Mam dat n yãa wakat ning nebã fãa sẽn na n togsd sɩd la b maand sẽn yaa tɩrgã bɩ?’ Yiibu, y nonga a Zeezi Kirist. Sok-y y meng yaa: ‘Mam datame tɩ Wẽnnaam Bi-riblã yɩ mam Rĩma, la m dat me n dɩk a togs-n-taar bɩ?’ La sẽn yɩɩd fãa, tãabo, y nonga a Zeova. Sok-y y meng yaa: ‘Mam dat n tũu a Zeova sẽn na yɩl n noog a sũur bɩ?’ Y sã n leok sogs-kãensã fãa tɩ n-ye, dẽnd bõe yĩng tɩ y pa na n deeg lisgu? Bõe n gɩdg yãmb tɩ y pa tõe n deeg lisg masã menga?—Tʋʋ. 16:33.

19. Bõe yĩng tɩ y pa segd n maand sãmbs lisgã reegr wɛɛngẽ? Rɩk-y makre. (Zã 4:34)

¹⁹ Y sã n maanda sãmbs lisgã reegr wɛɛngẽ, bɩ y tags bũmb a ye a Zeezi sẽn yeel zugu. (Karm-y Zã 4:34.) A Zeezi rɩka a Ba wã raabã maanegã n mak ne rɩɩbo. Bõe yĩnga? Rɩɩb tara yõod ne tõnd ned kam fãa. A Zeezi miime tɩ bũmb ning fãa a Zeova sẽn yet tɩ d maane, yaa tõnd neer yĩnga. A pa na n yeel tõnd tɩ d maan bũmb sẽn na n wã tõnd ye. A Zeova raab y yĩng yaa y reeg lisg bɩ? N-ye. (Tʋʋ. 2:38) Dẽnd y tõe n basa y yam tɩ y sã n tũ a raabã n deeg lisgu, na n naf-y lame. Y sã n pa sãmbd y sã n na n dɩɩ rɩɩb y sẽn nong ne y sũur fãa, bõe yĩng tɩ y na n sãmb ne lisgã reegre?

20. Bõe yell la d na n gom sõsg ning sẽn pʋgdã pʋgẽ?

²⁰ Bõe n kɩ tɩ y nan pa tõe n deeg lisgu? Neb wʋsg yetame yaa: “M nan pa segl n sa ye.” Rɩk f meng n kõ a Zeova, la lisgã reegr yaa yam-yãkr ning sẽn tar yõod n tɩ yɩɩd y vɩɩmã pʋgẽ wã. Dẽnd yɩl n tõog n maan rẽ baooda sẽka. Baoodame tɩ y tags neere, la y modg wʋsg me. La y sã n dat ne y sũur fãa n deeg lisgu, bõe la y tõe n maan masã meng n segl y menga? D na n bãnga rẽ sõsg ning sẽn pʋgdã pʋgẽ.