Bõe yĩng tɩ rao ning b sẽn bool t’a “Zaglã” yeel t’a sã n kẽ kãadem ne a Ruti a na n “bõna” a meng pʋɩɩre? (Rut 4:1, 6)

Pĩnd wẽndẽ wã, rao sẽn kẽ kãadem sã n da maan kaalem n pa paam biiga, ra tõe n kɩtame tɩ nebã sokd b mens yaa: Ãnd n na n soog a paoongã? A yʋʋrã pa na n menem sɩda? Sogs-kãensã leoor da bee a Moyiiz Tõogã pʋgẽ.

Rao sã n da ki n bas a pʋʋgo, wall a sã n lebg naong soab n dɩk a pʋʋg n koose, bõe n maand rẽ poore? A ba-biig wall a zakã ned ra tõe n yao n deega pʋʋgã. Woto, pʋʋgã na n kell n yɩɩ zakã neb rẽnda.—Maan. 25:23-28; Sõd. 27:8-11.

Bõe la b ra maanda, sẽn na yɩl tɩ raoã sẽn maan kaalmã yʋʋr da meneme? Sã n yaa ne a Moyiiz Toogã, raoã ba-biig ra tõe n deega sẽn ki-a wã paga. Woto, b ra tõe n paama kamba, tɩ sẽn ki-a wã yʋʋrã la a paoongã pa menem ye. Ra kɩtdame me tɩ pʋg-kõorã paam tɩ b ges a yelle.—Tõo. 25:5-7; Mat. 22:23-28.

D ges sẽn yɩ to-to ne a Naomi. A ra kẽe kãadem ne rao yʋʋr sẽn boond t’a Elimelɛke. A sɩd a Elimelɛk ne b kom-dibli a yiibã wa n maana kaalem, t’a Naomi lebg pʋg-kõore, n da pa tar ned sẽn na n ges a yell ye. (Rut 1:1-5) A Naomi sẽn leb Zida wã, a yeela a bi-pag a Rut t’a kos a Bowaaz t’a yao n deeg b pʋʋgã. A Bowaaz ra yaa a Elimelɛk roagda. (Rut 2:1, 19, 20; 3:1-4) La a Bowaaz ra miime tɩ rao a ye Biiblã sẽn bool t’a ‘Zagl’ ra kĩi ne a Elimelɛk n yɩɩd yẽ. Yẽ n da yaa pipi ned sẽn tar sor n tõe n yao n deeg-ba.—Rut 3:9, 12, 13.

Sɩngrẽ wã, Biiblã sẽn bool a soab t’a “Zaglã” sakame n na n yao n deeg-ba. (Rut 4:1-4) A ra miime t’a segd n yiisa ligd n da pʋʋgã, la a miẽ me t’a Naomi ra kʋʋla wʋsgo, n pa le tõe n paam biig sẽn na n wa soog a Elimelɛk pʋʋgã ye. Rao ning Biiblã sẽn bool t’a Zaglã ra na n paama a Elimelɛk pʋʋgã n paas yẽ rẽndã. Dẽnd a ra tõe n paama yõod wʋsgo.

La b sẽn bool a soab t’a Zaglã sẽn bãng t’a sã n da pʋʋgã, yaa tɩlɛ t’a kẽ kãadem ne a Rutã, a yeelame yaa: “Mam pa tõe n yao n deeg-a ye. Bala m tõe n wa bõna m meng pʋɩɩrã.” (Rut 4:5, 6) Bõe yĩng t’a toeem yam?

Biiblã sẽn bool a soab t’a Zaglã bɩ ned a to sã n da kẽ kãadem ne a Rut n paam bi-ribla, bi-kãng n na n wa soog a Elimelɛk pʋʋgã. La wãn to la rẽ ra na n kɩt tɩ b sẽn bool a soab t’a Zaglã ‘bõn a pʋɩɩre’? Biiblã pa togs ye. La tõe tɩ yaa bʋʋm kẽer yĩng la raoã sẽn toeem yamã.

• Wala makre, pipi, a ra na n bõna ligdã a sẽn na n yiis n da a Elimelɛk pʋʋgã, bala kaoosg zugẽ, pʋʋgã pa na n le yɩ yẽ rẽnd ye. Ra na n wa lebga a Rut bi-riblã pʋʋgo.

• Yiibu, yẽ n da na n dɩlgd a Rut ne a Naomi, la a get b yelle.

• Tãabo, yẽ ne a Rut sã n da paam kamb a taaba, yẽ kambã ne a Rut kambã ra na n wa pʋɩɩ yẽ paoongã.

• Naase, a sã n da pa tar kamb a taaba, tɩ yaa biig ning a sẽn da na n paam ne a Rutã bal n na n yɩ b biiga, bi-kãng n na n wa soog a Elimelɛk pʋʋgã, ne yẽ pʋʋgã fãa. Dẽnd b sẽn bool a soab t’a Zaglã sã n wa maan kaalem, a yʋʋrã na n menemame t’a Elimelɛk yʋʋrã pa, bala yaa a Elimelɛk yageng n na n wa soog pʋtã. Raoã pa sak n na n bõn a pʋɩɩrã sẽn na yɩl n sõng a Naomi ye. A foosa a nusi, n bas tɩ ned ning sẽn pʋgd yẽ wã yao n deeg-ba, rat n yeel t’a Bowaaze. La a Bowaaz sakame, bala a ra ratame n sõng tɩ “kiidã yʋʋrã kell n pa a pʋɩɩrẽ wã.”—Rut 4:10.

Wõnda bũmb ning sẽn da pak b sẽn bool a soab t’a Zaglã yaa a mengã yʋʋrã, la a paoongã ra menem ye. A ra yaa rat-m-yembr soaba. Baa ne ra-kãngã sẽn maan a sẽn tõe fãa sẽn na yɩl t’a yʋʋrã ra menemã, hal ne rũndã, d pa mi a yʋʋrã ye. Sẽn paase, a bõna lohorem-kãseng ning a Bowaaz sẽn paamã. A Bowaaz paam n naaga Mesi wã, bɩ a Zeezi Kirist yaab-rãmbã sʋka. B sẽn bool a soab t’a Zaglã sẽn pa sak n sõng ned sẽn da be raab pʋgẽ wã yĩnga, sɩd yɩɩ kaeto ne-a!—Mat. 1:5; Luk 3:23, 32.