1. Neb sã n wa tõnd tigissã pipi, bõe n yɩt-b noog n yɩɩda? (Ges-y fotã me.)

 MAMS-Y n ges-y pag ne a sɩd sẽn na n kẽng a Zeova Kaset rãmb tigsg pipi. Tigingã neb sẽn deeg-b noog-noogã, la b sẽn yã nonglem hakɩɩk sẽn be a Zeova nin-buiidã sʋkã yɩ-b-la noog wʋsgo. Tigsgã sẽn wa n sa tɩ b kuusẽ wã, pagã yeela a sɩdã yaa: ‘A Zeova Kaset rãmbã yaa toor ne neb a taabã. M nonga b zĩigẽ.’

2. Bõe yĩng tɩ neb kẽer bas a Zeova tũubu?

² Nonglem ning sẽn be a Zeova nin-buiidã sʋkã yaa toor fasɩ. Sɩda, a Zeova Kaset rãmbã pa neb sẽn zems zãng ye. (1 Zã 1:8) D sẽn modgd n na n bãng d taabã sõma wã, yaa vẽeneg tɩ d na n yãa b pãn-komsmã. (Rom. 3:23) Bʋko, neb kẽer basame tɩ b taabã pãn-komsmã kɩt tɩ b bas a Zeova tũubu.

3. Bõe n na n kɩt tɩ nebã bãng kiris-neb hakɩɩkã n welge? (Zã 13:34, 35)

³ D lebg n tẽeg vɛrse ning zug d sõsgã sẽn tikã. (Karm-y Zã 13:34, 35.) Bõe n na n kɩt tɩ nebã bãng kiris-neb hakɩɩkã n welge? Yaa d sẽn na n nong taaba, la pa d sẽn na n yɩ neb sẽn zems zãng ye. Gũus-y n ges-y t’a Zeezi pa yeel tɩ ‘yãmb sã n nong taaba, yãmb na n bãngame tɩ yãmb yaa mam karen-biis’ ye. A yeelame yaa: “Yãmb sã n nong taaba, nebã fãa na n bãngame tɩ yãmb yaa mam karen-biisi.” A Zeezi goamã wilgdame tɩ pa a karen-biisã bal n na n bãng rẽ ye. Baa neb nins sẽn pa be tigingã pʋgẽ wã na n bãnga kiris-neb hakɩɩkã, nonglem hakɩɩk sẽn be b sʋkã yĩnga.

4. Bõe la neb kẽer na n dat n bãng kiris-neb hakɩɩkã zugu?

⁴ Neb kẽer sẽn pa a Zeova Kaset rãmb tõe n sokame yaa: ‘Wãn to la nonglem tõe n sõng tɩ d bãng kiris-neb hakɩɩkã n welge? Bõe la a Zeezi maan n wilg t’a nonga a tẽn-tʋmdbã? La wãn to la d tõe n dɩk a Zeezi togs-n-taar rũndã-rũndã?’ A Zeova Kaset rãmbã me segd n bao n bãnga sogs-kãensã leoore. D sã n maan woto, na n sõng-d lame tɩ d maneg n wilg tɩ d nonga d taabã, sẽn yɩɩd fãa, b sã n wa maan bũmb tɩ sãam d sũuri, b sẽn pa zems zãngã yĩnga.—Efɛɛ. 5:2.

5. Bilg-y-yã a Zeezi goamã sẽn be Zã 15:12, 13 võore.

⁵ A Zeezi wilgame tɩ nonglem ning sẽn na n zĩnd a karen-biisã sʋkã na n yɩɩ toor fasɩ. (Karm-y Zã 15:12, 13.) Tẽeg-y t’a Zeezi yeela a karen-biisã yaa: “Bɩ y nong taab wa mam sẽn nong yãmbã.” Woto rat n yeelame tɩ bõe? Rat n yeelame tɩ d segd n nonga d to n yɩɩd d menga. Nonglem-kãng segd n kɩtame tɩ kiris-ned sak n ki a tẽed-n-taag yĩnga, sã n wa yaa tɩlɛ. b

6. Wãn to la Wẽnnaam Gomdã wilgd tɩ nonglmã tara yõod wʋsgo?

⁶ Wẽnnaam Gomdã wilgdame tɩ nonglmã tara yõod wʋsgo. Neb wʋsg nonga Biiblã vɛrse-rãmb kẽer goama. Wala makre, “Wẽnnaam yaa nonglem.” (1 Zã 4:8) “Fo segd n nonga f to wa f menga.” (Mat. 22:39) “Nonglem luta yel-wẽn wʋsgo.” (1 Pɩy. 4:8) “Nonglem pa sat a bada.” (1 Kor. 13:8) Vɛrse-kãensã la vɛrse-rãmb a taab sõng-d lame tɩ d bãng tɩ tara yõod tɩ d bɩɩs nonglem, la d wilg rẽ vẽenega.

7. Bõe yĩng t’a Sʋɩtãan pa tõe n kɩt tɩ neb zemsd taaba, n nong taab ne nonglem hakɩɩka?

 ⁷ Neb wʋsg sokda b meng yaa: ‘M maanda wãn n bãng tũudum hakɩɩkã? Tũudmã fãa yetame tɩ b zãmsda nebã sɩdã, la b sẽn yaool n zãmsd nebã bũmb ning Wẽnnaam zugã yaa toor-toore.’ A Sʋɩtãan kɩtame tɩ ziri tũudum wʋsg beẽ. Rẽ kɩtame tɩ yaa toog tɩ nebã tõog n bãng tũudum hakɩɩkã. La a pa tõe tɩ neb sẽn be dũniyã gill zug naag taab n nong taab ye. Yaa a Zeova bal n tõe n maan woto. Bũmb ning sẽn kɩt tɩ d yet rẽ wã yaa tɩ nonglmã yita a Zeova nengẽ. Yaa neb nins sẽn tar a Zeova vʋʋsem sõngã la a barkã bal n tõe n nong taab woto. (1 Zã 4:7) Rẽ n so t’a Zeezi yeel tɩ yaa a karen-biisã bal n tõe n nong taab ne nonglem hakɩɩka.

8-9. Neb wʋsg sẽn yã t’a Zeova Kaset rãmbã nonga taab ne nonglem hakɩɩkã, b manesem yɩɩ wãna?

⁸ Yaa wa a Zeezi sẽn da pĩnd n togsã. Neb wʋsg bãnga a karen-biisã, nonglem hakɩɩk sẽn be b sʋkã yĩnga. Wala makre, saam-biig a ye yʋʋr sẽn boond t’a Yan tẽra pipi a sẽn kẽng tigis-kãsenga. Ra yaa a zakã sɛɛga, ɛstaad pʋgẽ. Kiis a wãn sẽn deng rẽ, a Yan tɩ gesa ɛspoor ɛstaad-kãng pʋgẽ. A yeelame: “Nebã manesem sẽn da yaa to-to wã, ne tigis-kãsengã nebã manesem sẽn yɩ to-to wã ra yaa toor fasɩ. A Zeova Kaset rãmbã ra yaa neb sẽn mi waoogre, la sẽn maneg b mens sõma. B kambã me ra zãada b mens sõma.” A paasame: “Sẽn yɩɩd fãa nin-kãensã sũur da nooma ne bũmb nins b sẽn tarã, la b nong laafɩ. M da rat n yɩɩ wa bãmba. M pa le tẽr daar-n-kãng sõssã sẽn da gomd bũmb ning yellã ye. La m pa tol n tõe n yĩm a Zeova Kaset rãmbã manesem sẽn yɩ to-to wã ye.” c D manesmã wilgda vẽeneg tɩ d nonga taab ne nonglem hakɩɩka. D sẽn nong d tẽed-n-taasã yĩnga, d maand-b-la neer la d waoogd-ba.

⁹ Saam-biig a ye yʋʋr sẽn boond t’a Zã me sũur yɩɩ noog wʋsgo, a sẽn wa n kẽng a Zeova Kaset rãmbã tigsg pipi wã. A yeelame: “B sẽn da zemsd taab to-to wã ra nooma maam wʋsgo. Ra yaa wa b fãa yaa neb sẽn zems zãnga. Nonglem hakɩɩk sẽn da be b sʋkã kɩtame tɩ m kɩs sɩd tɩ b yaa tũudum hakɩɩkã neba.” d Kiba-kãensã la kibay a taab wilgdame t’a Zeova nin-buiidã yaa kiris-neb hakɩɩka.

10. Sẽn yɩɩd fãa, wakat-bʋg la d tõe n paam n wilg d tẽed-n-taag tɩ d nong-a-la ne nonglem hakɩɩka? (Ges-y notã me.)

¹⁰ Wa d sẽn zoe n togs sɩngrẽ wã, d tẽed-n-taasã baa a ye pa zems zãng ye. Wakat ninga, d tẽed-n-taag tõe n goma gomd wall a maan bũmb n sãam d sũuri. e (Zak 3:2) Sã n wa yaa woto, yaa segb d sẽn paam n na n wilg ne d manesmã tɩ d nonga d tẽed-n-taagã ne nonglem hakɩɩka. Rẽ wɛɛngẽ, yam-bʋg la d tõe n dɩk a Zeezi mak-sõngã pʋgẽ?—Zã 13:15.

11. Manesem-bʋg la Zak ne a Zã ra tara, tɩ pa sõma? (Ges-y fotã me.)

¹¹ A Zeezi ra pa baood t’a karen-biisã yɩ neb sẽn zems zãng ye. A pʋd n sõng-b lame tɩ b toeem b tʋʋm-tʋmdɩ wã sẽn na yɩl n paam n ta a Zeova yam. Daar a ye, a Zak ne a Zã sẽn yaa a Zeezi tẽn-tʋmdbã  kɩtame tɩ b ma tɩ kos a Zeezi, t’a kõ-b zĩig sẽn tar ziir Wẽnnaam Rĩungã pʋgẽ. (Mat. 20:20, 21) A Zak ne a Zã manesmã wilgdame tɩ b ra yaa wuk-m-mens rãmba, la neb sẽn dat n lʋɩ b taabã taoore.—Yel. 16:18.

12. Rẽ yĩnga, yaa a Zak ne a Zã bal n tall manesem sẽn pa sõma bɩ? Wilg-y y leoorã võore.

¹² Pa a Zak ne a Zã bal n tall manesem sẽn pa sõma wakat kãng ye. Gũus-y n ges-y tẽn-tʋmdb a taabã me manesem sẽn yɩ to-to. “Piigã sẽn kellã sẽn wa n wʋm dẽ wã, b sũyã yika ne ba-biis a yiibã.” (Mat. 20:24) D tõe n yeelame t’a Zak ne a Zã la tẽn-tʋmdb a taabã goma taab gom-kãse. Tõe tɩ tẽn-tʋmdb a taabã yeelame yaa: ‘Yãmb tagsdame tɩ yãmb sãoo tõnd la, n dat tɩ b kõ yãmb zĩig sẽn tar ziir Rĩungã pʋgẽ? Pa yãmb bal n naag a Zeezi n tʋm wʋsg ye. Segdame tɩ tõnd me paam zĩig sẽn tar ziir wa yãmba!’ Sẽn yaa a soab fãa, wakat kãnga, tẽn-tʋmdbã basame tɩ yel-kãngã kɩt tɩ b yĩm tɩ b segd n nonga taab wakat fãa.

13. A Zeezi manesem yɩɩ wãna, a tẽn-tʋmdbã sẽn wa n tall manesem sẽn pa sõma wã? (Matiye 20:25-28)

¹³ Wãn to la a Zeezi welg yellã? A sũur pa yik ne a tẽn-tʋmdbã ye. A Zeezi pa yeel t’a na n tɩ baoo tẽn-tʋmdb a taab sẽn são-ba, rat n yeel tɩ neb sẽn tar sik-m-meng wʋsgo, la sẽn na n nong taab wakat fãa ye. A pʋd n maanga a yĩng n gom ne-ba, bala a miime tɩ b yaa pʋ-peelem  dãmba. (Karm-y Matiye 20:25-28.) A Zeezi kell n wilg-b lame t’a nong-b lame, baa b sẽn wẽ no-koɛɛm naoor wʋsg n na n bãng b sʋkã ned ning sẽn yaa kãseng n yɩɩdã.—Mark 9:34; Luk 22:24.

14. A Zeezi tẽn-tʋmdbã wakatẽ wã, nebã manesem ra yaa wãn to?

¹⁴ Sãmbg kae t’a Zeezi tagsa a tẽn-tʋmdbã sẽn da tũud minund ninsã yelle. (Zã 2:24, 25) B wakatẽ wã, tũudmã taoor dãmb ra nonga naam la ziir hal wʋsgo. (Mat. 23:6; Ges-y Bible d’étude pʋgẽ, Matiye 23:6 video ning gom-zug sẽn yaa: “Les premiers sièges dans les synagogues.”) Sẽn paase, Zʋɩf-rãmbã tũudmã taoor dãmb me ra tagsdame tɩ b sãoo b taabã. f (Luk 18:9-12) A Zeezi ra miime tɩ b wakatẽ nebã manesmã ra tõe n wa kɩtame t’a tẽn-tʋmdbã me wa tagsd wa bãmba. (Yel. 19:11) A ra pa dem-dem ne a karen-biisã ye. B sã n da kong me, a pa yikd a sũur ne-b ye. A ra miime tɩ b rat n maana sẽn yaa tɩrga. Rẽ n so t’a maag a yĩng n sõng-b tɩ b maneg n bɩɩs sik-m-menga, la b wilg tɩ b nonga taaba, n pa baood n na n wilg tɩ b yɩɩda b taabã ye.

15. Bũmb ning sẽn zĩnd a Zak ne a Zã la tẽn-tʋmdb a taabã sʋkã wilgda tõnd bõe?

¹⁵ Bũmb ning sẽn zĩnd a Zak ne a Zã la tẽn-tʋmbd a taabã sʋkã zãmsda tõnd bũmb wʋsgo. A Zak ne a Zã sẽn kos a Zeezi zĩig sẽn tar ziir Wẽnnaam Rĩungã pʋgẽ wã pa zems ye. Tẽn-tʋmdb a taabã me sẽn bas tɩ yel-kãngã sãam zems-n-taar ning sẽn da be b sʋkã pa zems ye. Baasgo, a Zeezi welga yellã sẽn da be tẽn-tʋmdb piig la a yiibã sʋkã ne bʋgsem la ne nonglem. Woto zãmsda tõnd bõe? Pa ned sã n wa maan bũmb n sãam d sũurã la yellã ye. Yaa d sẽn na n tall manesem ning yel-kãng taoorã n tar yõod n yɩɩda. Bõe n tõe n sõng-do? D tẽed-n-taag sã n wa maan bũmb n sãam d sũuri, d tõe n soka d meng yaa: ‘Bõe yĩng tɩ bũmb ning a sẽn maanã sãamd m sũur wʋsgo? Wilgdame tɩ m tara pãn-komsem m sẽn segd n mao ne bɩ? Ned ning sẽn kɩt tɩ m sũurã sãamã maooda ne zu-loees bɩ? Baa m sã n bee bʋʋm n na n yik m sũuri, rẽ yĩnga m pa tõe n wilg tɩ m nonga m tẽed-n-taagã n kell n bas yellã tɩ sa sɩda?’ D sã n wilgdẽ tɩ d nonga d tẽed-n-taasã, d manegd n wilgame tɩ d sɩd yaa a Zeezi karen-biisi.

16. A Zeezi mak-sõngã leb n wilgda tõnd bõe?

¹⁶ A Zeezi mak-sõngã leb n wilgda tõnd tɩ d segd n bao n wʋma d tẽed-n-taasã yɛlã võore. (Yel. 20:5) Yaa sɩd t’a Zeezi tõe n bãnga sẽn be ned sũurẽ, la tõnd pa tõe ye. D tẽed-n-taag sã n wa maan bũmb n sãam d sũur a sẽn pa zems zãngã yĩnga, bɩ d tall sũ-mar n da yɩ tao-tao n ning-a taal ye. (Efɛɛ. 4:1, 2; 1 Pɩy. 3:8) D sã n modg n bao n bãng-a sõma, na n yɩɩ nana tɩ d tõog n maan woto. Ad kibar sẽn wilgd rẽ.

17. Tigims sull yel-gɛt sẽn modg n bao n bãng saam-biig a ye sõma wã, wãn to la rẽ naf-a?

¹⁷ Tigims sull yel-gɛt a ye ket n tẽra saam-biig a ye sẽn be Afirikdelɛst tiging a ye a sẽn tɩ kaag pʋgẽ yelle. Sɩngrẽ wã, tigims sull yel-gɛtã ra getame tɩ saam-biigã pa nong a zĩigẽ ye. Tigims sull yel-gɛtã manesem yɩɩ wãna? Ad a sẽn yeele:  “Mam pa bao n na n zãag m meng ne saam-biigã ye. M yãka yam n na n bãng-a sõma n paase.” Tigims sull yel-gɛtã sẽn maan woto wã, a bãnga bũmb kẽer saam-biigã zugu. Wala makre, a bãngame tɩ yaa b sẽn wub saam-biigã to-to wã n kɩt t’a yaa woto. Tigims sull yel-gɛtã paasame yaa: “Mam sẽn wa n bãng tɩ yɩɩ toog ne saam-biigã t’a tõog n toeem bũmb kẽere, la a sẽn zoe n modg n toeem bũmb sãnda wɛɛngẽ wã, m sũur yɩɩ noog wʋsg ne-a. D wa n lebga zo-rãmb meng-menga.” Dẽnd d sã n modg n bao n bãng d tẽed-n-taasã sõma, na n yɩɩ nana tɩ d wilg tɩ d nong-b lame.

18. D tẽed-n-taag sã n wa maan bũmb n sãam d sũuri, sogs-bʋs la d tõe n sok d menga? (Yel-bũnã 26:20)

¹⁸ Wakat ninga, d tõe n getame tɩ d segd n tɩ goma ne d saam-biig a sẽn maan bũmb n sãam d sũur yĩnga. Pipi, yɩta sõma tɩ d sok d meng yaa: ‘Mam wʋmda yɛlã vɩʋʋg sõma bɩ?’ (Yel. 18:13) ‘A sẽn maan bũmb ning n sãam m sũurã yɩɩ ne pʋ-toog bɩ?’ (Koɛ. 7:20) ‘Ma-me pa zoe n maan a buud sɩda?’ (Koɛ. 7:21, 22) ‘M sã n tɩ gom ne-a, pa na n maneg n keng yellã sɩda?’ (Karm-y Yel-bũn 26:20.) D sã n maag d yĩng n bʋgs sogs-kãensã zugu, d sẽn nong d tẽed-n-taagã tõe n kɩtame tɩ d kell n bas yellã tɩ sa.

19. Bõe la y na n modg n maane?

¹⁹ A Zeova Kaset rãmbã wilgdame tɩ b sɩd yaa a Zeezi karen-biisi, b sẽn nong taabã yĩnga. D ned kam fãa tõe n wilgame t’a yaa kiris-ned hakɩɩka, a sã n kell n nong a tẽed-n-taasã baa ne b sẽn pa zems zãngã. D sã n maan woto, d na n sõnga neb a taabã tɩ b bãng tũudum hakɩɩkã, la b wa naag tõnd n waoog Wẽnnaam a Zeova sẽn yaa nonglmã. Bɩ d fãa modg n nong taaba, tɩ wilg tɩ d yaa kiris-neb hakɩɩka.