1. Bõe la roagdbã rat tɩ b kambã bãnge?

 ROAGDBA, d miime tɩ y rat n sõnga y kambã tɩ b bãng a Zeova sõma la b nong-a. La ned pa tõe n yã a Zeova ne nif ye. Wãn to la y tõe n sõng y kambã tɩ b bãng tɩ Wẽnnaam sɩd beeme, la b paam n lebg a zo-rãmba?—Zak 4:8.

2. Bõe la roagdbã tõe n maan n sõng b kambã tɩ b bãng a Zeova sõma?

² Bũmb a ye sẽn tar yõod roagdbã sẽn tõe n maan n sõng b kambã tɩ b bãng a Zeova yaa b sẽn na n zãms-b Biiblã. (2 Tɩm. 3:14-17) Biiblã wilgda bũmb a to me sẽn tõe n sõng kambã tɩ b bãng a Zeova sõma. Yel-bũn sebrã pʋgẽ, ba n gomd ne a biiga, n yet-a t’a ges bũmb nins a Zeova sẽn naanã tɩ sõng-a t’a bãng-a sõma. (Yel. 3:19-21) D na n yãa bũmb kẽer roagdbã sẽn tõe n maane, n tũnug ne bũmb nins a Zeova sẽn naanã n sõng b kambã tɩ b bãng-a sõma.

3. Bõe la roagdbã segd n maan n sõng b kambã?

³ Biiblã yetame tɩ “baa ned sẽn pa tõe n yã Wẽnnaamã, hal dũniyã naaneg tɛka, ninsaal tõe n bãngame tɩ Wẽnnaam yaa pãng sẽn ka sɛt soaba, la t’a sɩd yaa Wẽnnaam, rẽ sẽn yaa vẽeneg bõn-naandsã sʋkã yĩnga.” (Rom. 1:20) Roagdba, tõe tɩ yãmb ne y kambã mi n yitame n kokd pemsem. Tũnugd-y ne segb-kãens n sõng y kambã tɩ b bãng bũmb nins a Zeova sẽn naanã sẽn tõe n sõng-b to-to tɩ b bãng a zʋg-sõma. Bɩ d ges roagdbã sẽn tõe n dɩk yam ning a Zeezi mak-sõngã pʋgẽ.

4. A Zeezi tũnuga ne bũmb nins a Zeova sẽn naanã n sõng a karen-biisã tɩ b bãng bõe? (Luk 12:24, 27-30)

 ⁴ D ges a Zeezi sẽn tũnug ne bũmb nins Wẽnnaam sẽn naanã to-to n sõng nebã tɩ b bãng bũmb wʋsgo. Daar a yembre, a yeela a karen-biisã tɩ b maag b yĩng n ges gãabdã la rulg-lɛlmã. (Karm-y Luk 12:24, 27-30.) A Zeezi ra tõe n goma rũng ning fãa wall tɩɩg ning fãa yelle. La a pa maan woto ye. A yãka yam n na n gom liuul la fɩlɛɛr a karen-biisã sẽn da mi sõma yelle. Tõe tɩ karen-biisã ra nee gãabdã sẽn da laand yĩngrã, la fɩlɛɛr-dãmbã sẽn da be pʋtẽ wã n tar puudã. Mams-y y yamẽ a Zeezi sẽn da teesd rẽ ne a nugã la a gomda, la bũmb ning a sẽn maan rẽ poorã. A sõnga a karen-biisã tɩ b bãng tɩ b saasẽ Ba wã yaa kõat la maan-neer soaba. B bãngame t’a Zeova sã n geta gãabda la fɩlɛɛr-dãmbã sẽn be weoogẽ wã yelle, rẽnd a na n gesame tɩ neb nins sẽn maand sɩd ne-a wã paam rɩɩb la futu.

5. Bũmb nins a Zeova sẽn naanã sʋka, bõe la roagdbã tõe n tũnug ne n sõng b kambã tɩ b bãng-a sõma?

⁵ Roagdba, wãn to la y tõe n dɩk a Zeezi togs-n-taare, n sõng y kambã tɩ b bãng a Zeova sõma? Y tõe n togsa y biigã bũmb ning sẽn noom yãmb n tɩ yɩɩda, bũmb nins a Zeova sẽn naanã sʋka. Wala makre, rũng wall tɩɩg ninga. Y sã n wa gomd rẽ yell ne y biigã bɩ y modg n togs-a bũmb ning rẽ sẽn wilgd yãmb a Zeova zugã. Rẽ poore, y tõe n soka y biigã, n bao n bãng rũng ning wall tɩɩg ning a sẽn nong n tɩ yɩɩda. Y sã n gomd ne y biigã bũmb sẽn noom-a yelle, a na n maaga a yĩng n kelg yãmba, y sã n wa rat n tũnug ne rẽ n sõng-a t’a bãng a Zeova sõma.

6. Yam-bʋg la d tõe n dɩk a Kiristof ma wã mak-sõngã pʋgẽ?

⁶ Rẽ yĩnga, roagdbã segd n dɩka b sẽkã zãng n bao rũng wall tɩɩg ninga, n yaool n na n gom rẽ yell ne b kambã n sõng-b tɩ b bãng a Zeova bɩ? Pa tɩlɛ ye. A Zeezi pa bao n dɩk sẽk wʋsg n na n bilg a karen-biisã gãabdã sẽn dɩt bũmb ninsã, la rulg-lɛlmã sẽn bɩt to-to wã ye. Baa y biigã sã n nongame tɩ y gomd bũmb nins a Zeova sẽn naanã yell ne-a, wakat ninga, y sã n sok-a sokr wall y sã n yeel t’a ges bũmbu, rẽ bal seka a na bãng bũmb wʋsg a Zeova zugu. Saam-biig a ye yʋʋr sẽn boond t’a Kiristof togsa bũmb a ma sẽn da maande, yẽ sẽn wa n yaa biigã n yeel yaa: “D sã n da wa kẽng zĩig ninga, m ma ra mi n goma bũmb nins a Zeova sẽn naan tɩ be be wã yell bilfu, tɩ d sũur da noom ne rẽ. Wala makre, d sã n da wa be tãng sɛɛgẽ, a tõe n yeelame yaa: ‘Ges-y tãngã sẽn yaa bedr la sẽn yaa neer to-to. A Zeova tʋʋmã pa be rasãnd sɩda?’ Wall d sã n wa yas mogrã noore, a tõe n yeelame yaa: ‘Ges-y ko-pɛmã sẽn tar pãng to-to. A Zeova pãngã pa kãseng sɩda?’” A Kiristof paasame: “M ma goamã sẽn da yaa koɛɛg-koɛɛga, n yaool n tar yõodã sõnga tõnd tɩ d tags neere.”

7. Wãn to la y tõe n sõng y kambã tɩ b tagsd bũmb nins a Zeova sẽn naanã zugu?

⁷ Y kambã sẽn bɩtã, y tõe n sõng-b lame tɩ b tagsd bũmb nins a Zeova sẽn naanã zugu, n bãng a sẽn sɩd yaa Wẽnnaam ning buudã. Y tõe n tika bũmb a Zeova sẽn naan n sok y kambã yaa: “Bõn-kãngã sõngda yãmb tɩ y bãng bõe a Zeova zugu?” Y kambã sẽn na n yeel bũmb ningã tõe n ling-y lame, la yɩ-y noog wʋsgo.—Mat. 21:16.

8. Israyɛll nebã sã n da togd sore, bõe la b ra tõe n maane?

⁸ B ra yeela Israyɛll nebã tɩ b zãms b kambã a Zeova noyã, b sã n wa kẽnd “sor zugu.” (Tõo. 11:19) Israyɛll tẽngã ra tara soay wʋsgo. B ra tõe n yãa rũms buud toor-toore, liuuli la fɩlɛɛr-dãmba. Israyɛll nebã sã n da togd sore, b ra tõe n paam n sõnga b kambã tɩ b tags bũmb nins a Zeova sẽn  naanã zugu. Yãmb a roagdbã me tõe n tika bũmb nins a Zeova sẽn naanã, n sõng y kambã tɩ b bãng-a. D ges roagdb kẽer sẽn maan rẽ to-to.

9. Yam-bʋg la d tõe n dɩk a Punita ne a Katiya kibarã pʋgẽ?

⁹ Pag a ye yʋʋr sẽn boond t’a Punita sẽn be Ẽnd galʋ-tẽn-bedr a ye pʋgẽ yeelame: “D sã n wa yi d sẽn beẽ wã n na n kẽng tẽn-bilẽ n tɩ ges d zakã neba, d getame tɩ yaa segb d sẽn paam n na n sõng d kambã tɩ bãng bũmb wʋsg a Zeova sẽn naan tɩ be rasãndã zugu. Mam gũus n gesame tɩ m kambã sã n wa yi galʋ-tẽngã sẽn pid ne neb wʋsgã n kẽng tẽn-kɩrengẽ, b bãngda bũmb wʋsg a Zeova sẽn naanã zug n tɩ yɩɩda.” Roagdba, y sã n tall y kambã n kẽng zĩig sẽn be rasãnde, yaa vẽeneg tɩ b pa na n tol n yĩm dẽ ye. Saam-bi-poak a ye yʋʋr sẽn boond t’a Katiya, n yit Moldavi yeelame: “Mam yãadmẽ, bũmb sẽn yɩ maam noog wʋsg tɩ m ket n tẽrẽ, yaa maam ne m roagdbã sã n da yi galʋ-tẽngã n kẽng kɩrenga. M sũur nooma wʋsg b sẽn sõng maam hal m yãadmẽ, tɩ m mi n maag m yĩng n ges bũmb nins a Zeova sẽn naanã n tags b zug neer n bãng a sẽn yaa Wẽnnaam ningã.”

10. Bõe la roagdbã tõe n maane, sã n yaa toog ne-b tɩ b tog sor n kẽng kɩrenga? (Ges-y zĩ-gũbrã: “ Sõngre, roagdbã yĩnga.”)

¹⁰ La sã n yaa toog ne yãmb tɩ y yi galʋ-tẽngã n kẽng tẽn-kɩrengẽ? Saam-biig a ye yʋʋr sẽn boond t’a Amol n be Ẽnd yeelame: “Mam sẽn beẽ wã, yaa tɩlɛ tɩ roagdbã tʋm lɛɛr-dãmb wʋsgo. Sẽn paase, b sã n na n tog sor n kẽng zĩig a to, baooda ligd wʋsgo. La park wall pemsem kokr zĩis n be, tɩ b sã n kẽng be bɩ b tõe n yã bũmb a Zeova sẽn naane, n gom a zʋg-sõma wã yelle.” Y sã n maag y yĩng n ges yãmb babgẽ wã, y tõe n yãa bũmb toor-toor a Zeova sẽn naane, tɩ y tõe n tik rẽ n sõng y kambã tɩ b bãng bũmb wʋsgo. (Yɩɩn. 104:24) Y tõe n yãa liuuli, pilimpigdu, tɩɩse, la bũmb a taaba. Pag a ye sẽn yit Alemayn t’a yʋʋr boond t’a Karina  yeelame: “M ma nonga fɩlɛɛr-dãmba. M sẽn wa n yaa bi-bilfã, d sã n da tũud taab n kẽnd n yã fɩlɛɛr neer fãa a gomda a yelle.” Roagdba, y tõeeme me n tũnug ne video-rãmba, wall sɛb d siglgã sẽn yiis tɩ gomd bũmb nins a Zeova sẽn naanã yelle, n sõng y kambã tɩ b bãng bũmb wʋsgo. Sɩd-sɩda, baa y yɛlã sẽn yaa to-to fãa, y tõe n sõnga y kambã tɩ b maagd b yĩng n get bũmb nins Wẽnnaam sẽn naanã. Masã, bɩ d gom a Zeova zʋg-sõma kẽer yell y sẽn tõe n sõng y kambã tɩ b bãnge.

11. Wãn to la roagdbã tõe n sõng b kambã tɩ b bãng t’a Zeova yaa nonglem?

¹¹ Sẽn na yɩl n sõng y kambã tɩ b bãng t’a Zeova yaa nonglem, y tõe n goma rũms wʋsg sẽn maagd b yĩng n get b kambã yell to-to wã. (Mat. 23:37) Y tõeeme me n gom bũmb kẽer a Zeova sẽn naan tɩ yaa toor-toore, tɩ noom tõnd hal wʋsgã yelle. A Karina sẽn yaa pag ning yell d sẽn gom tɩ loogã yeelame: “Maam ne m ma sã n da tũud taab n kẽnd n wa yã fɩlɛɛre, a kɩtdame tɩ m yals n maag m yĩng n ges a sẽn yaa toor to-to ne a taabã, la a neermã sẽn wilgd to-to t’a Zeova yaa nonglmã. Hal n tãag masã, m ket n mi n maagda m yĩng n get fɩlɛɛr-dãmbã, wala makre, b sẽn yaa buud toor-toorã, la b kulɛɛr-dãmbã sẽn pa wõnd taabã, tɩ ket n tẽegd maam a Zeova sẽn nong tõnd to-to wã.”

12. Wãn to la roagdbã tõe n sõng b kambã tɩ b bãng t’a Zeova tara yam? (Yɩɩn-sõamyã 139:14) (Ges-y fotã me.)

¹² Sõng-y y kambã tɩ b bãng tɩ Wẽnnaam tara yam. Yaa vẽeneg t’a Zeova yamã yɩɩda tõnd hal zĩig sẽn zãre. (Rom. 11:33) Wala makre, y tõe n goma sawatã sẽn pid ne koom, n yaool n be yĩngr n saad tɩ yaa wa bũmb pa be b pʋgẽ wã yelle. (Zoob 38:36, 37) Y tõeeme me n gom Wẽnnaam sẽn naan ninsaal yĩngã tɩ be rasãndã yelle. (Karm-y Yɩɩn-sõamyã 139:14.) Ad bũmb ning rao a ye yʋʋr sẽn boond t’a Vladimiir sẽn maane. A yeelame yaa: “Daar a ye, d biigã lʋɩɩ ne a weefã n pogle. Rasem a wãn poore, nodrã maagame. Maam ne m pagã sõng-a lame t’a bãnge, t’a Zeova naana ninsaal yĩngã t’a tõe n sãoog a toore. D yeel-a lame tɩ bũmb nins fãa ninsaalbã sẽn naanã sʋka, bũmb sẽn wõnd woto kae ye. Wala makre, mobill sã n tɩ fão n sãame, a pa tõe n maneg a toor ye. D tũnuga ne  bũmb ning sẽn paam d biigã n sõng-a t’a bãng t’a Zeova yamã ka to ye.”

13. Wãn to la roagdbã tõe n sõng b kambã tɩ b bãng tɩ Wẽnnaam tara pãn-kãsenga? (Ezayi 40:26)

¹³ A Zeova yet-d lame tɩ d zẽk d nengã n ges saasã, la d tags a pãn-kãsengã sẽn kɩt tɩ kiuugã, wĩntoogã la ãdsã be b zĩisẽ wã yelle. (Karm-y Ezayi 40:26.) Y tõe n yeela y biigã t’a zẽk a nengã n ges saasã, la a tags bũmb nins a sẽn ne wã zugu. Saam-bi-poak a ye sẽn yit Taiwan t’a yʋʋr boond t’a Tingting tẽega bũmb sẽn maan a sẽn wa n yaa bi-bilfã. A yeelame: “Vugri, m ma talla maam tɩ d tɩ zĩnd zĩig weoog sẽn beẽ rasem a wãna. Zĩigã sã n da sobge, d nee ãdsã wʋsgo, galʋ-tẽngã vẽenemã sẽn pa tat be wã yĩnga. Wakat kãnga, m da maanda yɩɩr ne m sã n na n tõog n kell n maana sɩd ne a Zeova, m karen-bi-taasã sẽn da weoogd maamã yĩnga. M ma yeela maam tɩ m tags pãng ning a Zeova sẽn tall n naan ãd-kãensã fãa wã yelle, la m tẽeg t’a tõe n tũnuga ne pãn-kãng n sõng maam tɩ m tõog n mao ne zu-loɛɛg buud fãa. D sẽn wa n be be tɩ m maag m yĩng n ges bũmb nins a Zeova sẽn naanã, m tʋlgame n na n bãng-a sõma n paase, la m maneg n yãk yam n na n kell tũ-a ne m sũur fãa.”

14. Wãn to la roagdbã tõe n tik bũmb nins a Zeova sẽn naanã n sõng b kambã tɩ b bãng t’a yaa sũ-noog soaba?

¹⁴ Bũmb nins a Zeova sẽn naanã wilgdame t’a maanda sũ-noogo, la t’a ratame tɩ tõnd me tall sũ-noogo. Bãngdbã gũus n gesame tɩ rũmsã wʋsg nonga reem, baa liuuli wã la zĩmã. (Zoob 40:20) Yãmb zoe n yãa rũms sẽn deemd tɩ maand y kambã laad bɩ? Wala makre, yũug sẽn deemd ne balle, wall ba-bil sẽn deemd ne a meng zʋʋre. Y biig sã n wa get rũms sẽn deemd tɩ maand-a laado, y tõe n tẽeg-a lame tɩ Wẽnnaam ning d sẽn tũudã yaa sũ-noog soaba.—1 Tɩm. 1:11.

15. Bõe la roagdbã tõe n maane, n sõng b kambã tɩ b togs-b bũmb ning sẽn be b sũurẽ? (Yel-bũnã 20:5) (Ges-y fotã me.)

¹⁵ Wakat ninga, yaa toog tɩ raogdbã paam tɩ b kambã togsd-b zu-loees nins b  sẽn segdã. Sã n yaa woto ne yãmba, y tõe n maana bũmb toor-toor sẽn na n sõng y kambã tɩ b togsd-y sẽn be b sũurẽ. (Karm-y Yel-bũn 20:5.) Roagdb gũus n gesame tɩ b sã n wa naag b kambã tɩ b get bũmb nins a Zeova sẽn naanã, yaa nana ne b kambã tɩ b togs bũmb ning sẽn be b sũurẽ. Bõe yĩng tɩ yaa woto? Yaa tɩ wakat kãnga, bũmb wʋsg kae n tiisd roagdbã la kambã ye. Saam-biig a ye sẽn yit Taiwan t’a yʋʋr boond t’a Masahiko me yeelame yaa: “Maam ne m pagã la d kambã sã n wa yi n na n kok pemsem, wala makre, d sã n be tãng zug wall mogrã noore, naoor wʋsgo b yam gãeeme. Dẽnd yaa nana tɩ d sõng-b tɩ b togs-d bũmb nins yell b sẽn tagsdã.” A Katiya sẽn yaa saam-bi-poak ning yell d sẽn gom tɩ loogã yeelame: “Lekollã sigb poore, m ma ra nong n tallda maam n kẽnd park sẽn yaa neer pʋgẽ. Sẽn mik tɩ zĩigã yaa neer la sɩddd wã, ra yaa nana ne maam tɩ m togs-a bũmb ning sẽn maan lekollẽ wã, la bũmb ning sẽn namsd maam.”

16. Bõe la zagsã rãmb tõe n maane, n tũnug ne bũmb nins a Zeova sẽn naanã n kok pemsem?

¹⁶ Bũmb nins a Zeova sẽn naanã tõe n sõnga zagsã rãmb tɩ b naagd taab n kokd pemsem, tɩ paas b zems-n-taarã pãnga. Biiblã yeelame tɩ “laad wakat” beeme, tɩ “yɩgb wakat” me beẽ. (Koɛ. 3:1, 4, notã.) A Zeova naana zĩis toor-toor tẽngã zug tɩ be rasãnde, tɩ d tõe n zĩnd be n maan bũmb sẽn kõt-d sũ-noogo. Zags wʋsg neb nong n naagda taab n kokd pemsem zĩig b sẽn nags tɩ be rasãnde, weoogẽ, tãens zut wall mogrã noore. Kamb kẽer sã n wa be parkẽ, b nong n zoetame n deemdẽ, wall b get rũmsã. Sãnda me nong n kẽnda zĩig koom sẽn beẽ, n tɩ reem koomã. A Zeova naana bũmb wʋsgo, tɩ d tõe n tũnugd ne rẽ n kokd pemsem!

17. Bõe yĩng tɩ roagdbã segd n sõng b kambã tɩ b maan sũ-noog ne bũmb nins a Zeova sẽn naanã?

¹⁷ Dũni-paalgã pʋgẽ, roagdbã la b kambã na n tõog n maana sũ-noog ne bũmb nins a Zeova sẽn naanã n yɩɩd rũndã-rũndã. Wakat kãnga, d pa na n le zoet rũmsã, rũmsã me pa na n le zoet tõnd wa sẽn yaa to-to rũndã-rũndã wã ye. (Eza. 11:6-9) D na n tõog n maana sũ-noog ne bũmb nins a Zeova sẽn naanã, wakat sẽn kõn sa yĩnga. (Yɩɩn. 22:26) La roagdba, ra gũ-y wakat kãng n yaool n na n bao n sõng y kambã tɩ b maan sũ-noog ne bũmb nins a Zeova sẽn naanã ye. Y sã n tũnugd ne bũmb nins a Zeova sẽn naanã n sõngd y kambã tɩ b bãng-a, bãmb me na n yeela wa rĩm a Davɩɩde. A yeelame yaa: “Zeova,  . . . yãmb tʋʋmã ka to ye.”—Yɩɩn. 86:8.