1-2. Y sã n nan pa segl n sa n tõe n deeg lisgu, bõe yĩng tɩ y pa segd n koms raood n base? (Ges-y sebrã pipi neng fotã.)

 YÃMB sã n yãka yam n na n deeg lisgu, yaa bũmb sẽn yaa sõma wʋsgo. Y seglame n sa n tõe n deeg lisg bɩ? Y sã n tagsdame tɩ y segl n saame, tɩ kãsem-dãmbã me kõ-y sore, bɩ y modg n deeg lisg tigis-kãseng ning sẽn watã sasa. Y sã n maan woto, a Zeova na n ning-y-la barka.

² La b yeel-y lame tɩ y segd n maana modgr n paas n yaool n wa tõog n deeg lisg bɩ? Bɩ yãmb mengã getame tɩ y segd n maana modgr n paase? Sã n yaa woto bɩ y ra koms raood n bas ye. Y yaa bi-bɩɩg tɩ y yaa kãsma, y tõe n modgame n wa tõog n maan bõn-kãngã sẽn tar yõod wʋsgã, rat n yeel tɩ n deeg lisgu.

3. Bõe la Etiyopi nin-naabã sok a Filipi? La rẽ wata ne sok-bʋgo? (Tʋʋma 8:36, 38)

³ Karm-y Tʋʋm 8:36, 38. Etiyopi nin-naabã soka koe-moond a Filip yaa: “Bõe n gɩdg maam ne lisg reegre?” Raoã ra rata ne a sũur fãa n deeg lisgu. La a sɩd ra segl n saa rẽ yĩng bɩ?

4. Bõe la Etiyopi raoã maan-yã, tɩ wilg t’a ra tʋllame n bãng n paasame?

⁴ Etiyopi raoã “ra kẽnga Zerizalɛm n tɩ waoog Wẽnnaam.” (Tʋʋ. 8:27) A ra yaa bu-zẽng neda, la a tuubame n sak Zʋɩf-rãmbã zãmsgo. Sãmbg kae t’a zãmsa Biiblã babg ning b sẽn da gʋls ne Ebre wã, n bãng a Zeova. Baa ne rẽ, a ra tʋll n bãng n paasame. A Filip sẽn wa n seg nin-naabã sorã zugã, a ra maanda bõe? A ra karemda no-rɛɛs a Ezayi seb-pindmã. (Tʋʋ. 8:28) Ra yaa bãngr-goam võor wʋmb sẽn pa nana. Nin-naabã ra pa baood n bãng  Wẽnnaam Gomdã zãmsg nins sẽn yaa nana wã bal ye. A ra tʋllame n bãng bũmb a taab n paase.

5. Bõe la Etiyopi raoã maan-yã, tɩ wilg t’a ra tũuda bũmb ning a sẽn da zãmsdã?

⁵ Raoã ra yaa Etiyopi rĩm-poak a Kãndas tʋm-tʋmd-kãsenga. “Yẽ n da get a paoongã fãa yelle.” (Tʋʋ. 8:27) Dẽnd a tog n da yaa ned b sẽn bobl tʋʋm wʋsgo. La baasgo, a baoo sẽk n na n waoog a Zeova. A pa bao n na n bãng Wẽnnaam sebrã sẽn da yet bũmb ningã bal ye. A ra tũuda a sẽn da zãmsdã. Rẽ kɩtame t’a yi hal Etiyopi n kẽng Zerizalɛm wẽnd-doogẽ wã, n na n tɩ waoog a Zeova. So-toak a woto rɩkda sẽk wʋsgo, la rɩt ligd wʋsgo. Baa ne rẽ, raoã maana a sẽn tõe fãa n kẽnge, a sẽn dat n waoog a Zeova wã yĩnga.

6-7. Bõe la Etiyopi raoã maan-yã, tɩ kɩt t’a sẽn da nong a Zeova to-to wã pãng paasdẽ?

⁶ A Filip sõnga Etiyopi raoã t’a bãng bũmb sẽn da tar yõod wʋsgo, wala makre, Mesi wã sẽn sɩd yaa ned ninga. (Tʋʋ. 8:34, 35) Nin-naabã sũur yɩɩ noog wʋsg a sẽn bãng bũmb ning a Zeezi sẽn maan yẽ yĩngã. A sẽn bãng rẽ wã, bõe la a maan-yã? A ra yaa bu-zẽng ned sẽn sak Zʋɩf-rãmbã zãmsgã. Dẽnd a ra tõe n yãka yam n kell n pa woto. La a sẽn da nong a Zeova ne a Bi-riblã to-to wã pãng paasame. Rẽ kɩtame t’a maan bũmb sẽn tar yõod wʋsgo. A yãka yam n na n deeg lisg n lebg a Zeezi karen-biiga. A Filip sẽn yã tɩ raoã ra segl n saame wã, a lis-a lame.

⁷ Y sã n dɩk Etiyopi raoã togs-n-taare, yãmb me tõe n segla y meng n wa tõog n deeg lisgu. Yãmb me na n tõog n yeela ne y sũur fãa yaa: “Bõe n gɩdg maam ne lisg reegre?” Bɩ d ges bũmb a tãab Etiyopi raoã sẽn maane, tɩ yãmb me tõe n dɩk a togs-n-taare. A ra wɩngda ne Wẽnnaam Gomdã zãmsgo, a ra tũuda bũmb nins a sẽn zãmsdã, la a ra modgdẽ t’a sẽn nong Wẽnnaam to-to wã pãng paasdẽ.

8. Zã 17:3 yetame tɩ y segd n maana bõe?

⁸ Karm-y Zã 17:3. A Zeezi gom-kãensã n sõng yãmb tɩ y yãk yam n na n zãms Biiblã bɩ? Vɛrse-kãngã sõnga neb wʋsgo. La rẽ yĩnga, vɛrse wã wilgdame me tɩ d segd n wɩnga ne Wẽnnaam Gomdã zãmsg bɩ? N-ye. D pa tol n tõe n “bãng Wẽnnaam sɩd-sɩdã” n sa ye. (Koɛ. 3:11) D na n ket n baood n bãngda bũmb toor-toor Wẽnnaam zug wakat sẽn kõn sa yĩnga. D sã n ket n baood n bãngd Wẽnnaam, d na n kolgd-a lame n paasdẽ.—Yɩɩn. 73:28.

9. D sã n bãng Wẽnnaam Gomdã zãmsg nins sẽn yaa nana wã, bõe la d segd n maan rẽ poore?

⁹ Yaa vẽeneg tɩ d sã n dat n bãng a  Zeova, d sɩngda ne zãmsg nins sẽn pa toogã. Lɛtr ning tẽn-tʋmd a Poll sẽn tool Ebre kiris-nebã pʋgẽ, a goma zãms-kãens yell n yeel tɩ yaa “Wẽnnaam koeesã pipi yɛlã.” A ra pa rat n yeel tɩ “bũmb nins d sẽn zãms pipi” Wẽnnaam zugã pa tar yõod ye. A rɩka rẽ n mak ne bĩisim b sẽn kõt bi-pɛɛlga. (Ebre. 5:12; 6:1) La a yeela kiris-nebã fãa tɩ b sẽn zãmsd bũmb nins Wẽnnaam zugã pa segd n tek zãmsg nins sẽn yaa nana wã bal ye. D segd n zãmsa bũmb nins võor wʋmb sẽn yaa toogã me. Yãmb tʋlla ne y sũur fãa n zãms bũmb nins võor wʋmb sẽn yaa toogã bɩ? Yãmb datame n ket n baood n bãngd a Zeova la a raabã, tɩ y tẽebã pãng paasdẽ bɩ?

10. Bõe yĩng tɩ sebr zãmsg yaa toog ne neb kẽere?

¹⁰ D sʋkã neb wʋsg getame tɩ sebr zãmsg yaa toogo. Yaa woto ne yãmb bɩ? Lekollẽ wã, yãmb bãnga kareng la sebr zãmsg sõma bɩ? Sebr zãmsg ra noom-y lame bɩ? Bɩ y ra ninga y yamẽ tɩ b sã n wa gomd sebr zãmsg yelle, nebã fãa sãoo yãmba? Sã n yaa woto, y pa y yembr ye. A Zeova tõe n sõng-y lame. A zemsa zãnga, n leb n yaa karen-saamb sẽn ka to.

11. Bõe n wilgd t’a Zeova n yaa tõnd “Karen-saam-kãsengã”?

¹¹ A Zeova yeelame t’a yaa “yãmb Karen-saam-kãsengã.” (Eza. 30:20, 21) A yaa karen-saamb sẽn tar sũ-mare, n yaa wʋmda, la maan-neer soaba. (Yɩɩn. 130:3) A geta a karen-biisã sẽn maand tɩ yaa sõma wã n tɩ yɩɩda. A pa baood tɩ d maan sẽn yɩɩd d pãng ye. Ra yĩm-y tɩ yaa yẽ n naan yãmb kalkõtã ye. Yaa kũun sẽn yaa sõma wʋsgo. (Yɩɩn. 139:14) A naan-d lame tɩ d tʋll n zãms bũmb toor-toore. D Naandã raab yaa d ket n zãmsd bũmb wʋsg wakat sẽn kõn sa yĩnga, tɩ d sẽn zãmsd bũmb ningã me noom-do. Dẽnd yɩta sõma tɩ d “tʋlg” sɩdã sẽn be Biiblã pʋgẽ wã masã menga. (1 Pɩy. 2:2) Yãk-y bũmb sẽn pa yɩɩd y pãng n maane, la y yãk wakat n karemd Biiblã la y zãmsd-a n pa vaandẽ ye. (Zoz. 1:8) Ne a Zeova sõngre, y na n wa nonga Biiblã kareng la y baood n bãngd a Zeova wakat fãa.

12. Bõe yĩng tɩ d segd n bao n bãng a Zeezi vɩɩmã ne a koe-moonegã sẽn yɩ to-to wã?

¹² Nong-y n bʋgsd-y a Zeezi vɩɩmã la a koe-moonegã sẽn yɩ to-to wã zugu. Yaa d sã n tũud a Zeezi naoã neer la d na n tõog n tũ a Zeova, sẽn yɩɩd fãa wakat kãensã sẽn yaa toog wakatã. (1 Pɩy. 2:21) A Zeezi yeela a karen-biisã vẽeneg tɩ b na n paama zu-loeese. (Luk 14:27, 28) A ra kɩsa sɩd t’a karen-biis hakɩɩkã na n tõog n maana sɩd ne Wẽnnaam wa yẽ. (Zã 16:33) Zãms-y Biiblã sẽn wilgd a Zeezi vɩɩmã sẽn yɩ to-to wã, la y yãk yam n na n dɩk a togs-n-taar y sẽn maandã fãa pʋgẽ.

13. Bõe la y segd n ket n kot a Zeova, la bõe yĩnga?

¹³ Y sã n tar bãngre, rẽ bal pa sek ye. Y sã n zãms Biiblã n paam bãngre, na n sõng-y lame tɩ y bãng bũmb wʋsg a Zeova zugu, la y bɩɩs zʋg-sõma. Wala makre, y na n nong-a lame la y tẽed-a. (1 Kor. 8:1-3) Y sẽn ket n zãmsd Biiblã, kos-y-yã a Zeova t’a sõng-y tɩ y tẽebã pãng paase. (Luk 17:5) A leokda pʋʋsg a woto buudã. Y sã n zãms Biiblã n bãng Wẽnnnaam sõma tɩ kɩt tɩ y tẽed-a, na n sõng-y lame tɩ y tũud bũmb ning y sẽn zãmsdã.—Zak 2:26.

14. Bõe la tẽn-tʋmd a Pɩyɛɛr yeel tɩ wilgdẽ tɩ tara yõod tɩ d tũud bũmb nins d sẽn zãmsdã? (Ges-y fotã.)

¹⁴ Tẽn-tʋmd a Pɩyɛɛr wilga vẽeneg tɩ tara yõod tɩ Kiristã karen-biisã ket n tũud bũmb nins b sẽn zãmsdã. A goma a Nowe kibarã sẽn be Biiblã pʋgẽ wã yelle.  A Zeova yeela a Nowe t’a na n kɩtame tɩ sa-kãseng ni n sãam nin-wẽnsã sẽn da be wakat kãnga. A Nowe ne a zakã rãmb sẽn da mi tɩ sa-kãseng n na n wa wã bal pa sek na sõng-b tɩ b põs ye. Tẽeg-y t’a Pɩyɛɛr yeelame tɩ “b sẽn wa n kaad koglgã,” tɩ wilgdẽ t’a ra gomda wakat ning sẽn deng sa-kãsengã yelle. (1 Pɩy. 3:20) A Nowe ne a zakã rãmb tũu Wẽnnaam sẽn yeel tɩ b maan bũmb ningã, n ka koom-kogl-kẽenga. (Ebre. 11:7) Rẽ poore, a Pɩyɛɛr rɩka a Nowe sẽn maan bũmb ningã n mak ne lisgu, n yeel yaa: “Koomã lisg sẽn mamsd rẽ wã fãagda yãmba.” (1 Pɩy. 3:21) Rẽnd d tõe n dɩka yãmb sẽn maand bũmb nins masã n segend y meng n na n wa reeg lisgã, n mak ne tʋʋm nins a Nowe la a zakã rãmb sẽn tʋm yʋʋm wʋsg n ka koglgã. Bõe la y segd n maan n segl y meng n wa reeg lisgu?

15. Sɩd tek yam n kos d yel-wẽnã sugrã rat n yeelame tɩ bõe?

¹⁵ Sɩd tek yam n kos d yel-wẽnã sugrã naaga bũmb nins d sẽn segd n maan pipi wã. (Tʋʋ. 2:37, 38) Yaa d sã n sɩd tek yam n kos sugr la d na n tõog n toeeme. Yãmb basa bũmb nins a Zeova sẽn kisã bɩ? Wala makre, yoobo, dorgã la sɩgaarã yũubu, wall gom-dẽgd bɩ gom-põaasã. (1 Kor. 6:9, 10; 2 Kor. 7:1; Efɛɛ. 4:29) Y sã n nan pa tõog n bas bõn-kãensã bɩ y ket n maand modgre, sẽn na yɩl n toeeme. Gom-y ne sẽn zãmsd-a yãmb Biiblã, wall y kos tigingã kãsem-dãmbã sõngre, la saglse. Y sã n yaa bi-bɩɩg n ket n vɩ ne y roagdbã bɩ y kos-b sõngre, n tõog n bas minim-wẽns nins sẽn tõe n gɩdg-y tɩ y pa tõog n deeg lisgã.

16. Bõe la y tõe n maan tɩ paas yãmb ne a Zeova zoodã pãnga?

¹⁶ Tara yõod tɩ y maand sẽn paasd yãmb ne a Zeova zoodã pãngã n pa vaandẽ ye. Wala makre, n kẽnd tigissã la y kẽesd y toog sõssã sasa. (Ebre. 10:24, 25) Y sã n wa paam tɩ b kõ-y sor tɩ y tõe n moon koɛɛgã bɩ y moondẽ n da vaandẽ ye. Y sã n wɩngd ne koɛɛgã mooneg sẽn yaa tʋmd sẽn fãagd yõyã, y sũ-noogã na n paasdame. (2 Tɩm. 4:5) Y sã n yaa bi-bɩɩg n ket n be ne y roagdbã, bɩ y sok y meng yaa: ‘Yaa m roagdbã n yet maam wakat fãa tɩ m kẽnd tigissã la m yit koe-moonegã  bɩ? Bɩ mam mengã n maand rẽ m toore?’ Y sã n maand woto y toore, wilgdame tɩ y tara tẽebo, tɩ y nonga a Zeova, la tɩ y sũur nooma ne a sẽn maand bũmb nins n kõt yãmbã. Woto yaa “wẽn-sakr tʋʋma,” n yaa wa kũun y sẽn kõt a Zeova. (2 Pɩy. 3:11; Ebre. 13:15) D sã n kõ Wẽnnaam kũun ne yamleoog la pa b sẽn modg-d yĩnga, a sũur noomame. (Ges-y 2 Korẽnt rãmb 9:7.) D sã n maand woto, n kõt a Zeova d sẽn tar tɩ yaa sõma n yɩɩdã, kõt-d-la sũ-noogo.

17-18. Bõe la y tõe n maan tɩ sõng-y tɩ y wa tõog n deeg lisgu, la bõe yĩnga? (Yel-bũnã 3:3-6)

¹⁷ Bãng-y tɩ y sẽn modgd n na n wa reeg lisgã, pa na n yɩ nana ne-y ye. Neb kẽer tõe n yaand-y-la y sẽn sɩng a Zeova tũubã yĩnga. B tõe n nams-y lame menga. (2 Tɩm. 3:12) Tõe tɩ y modgdame n na n bas y minim-wẽnga, n mi n wa salg n le n lʋɩ a pʋgẽ. Tõe tɩ y sũur sãamdame, sẽn wõnd y lisgã reegr kaoosdame wã yĩnga. Bõe n tõe n sõng-y tɩ y ra koms raood n base? Yaa y sã n nong a Zeova.

¹⁸ Y sẽn nong a Zeova wã yaa bũmb sẽn tar yõod hal wʋsgo. (Karm-y Yel-bũn 3:3-6.) Y sã n nong Wẽnnaam wʋsgo, na n sõng-y lame tɩ y tõog n mao ne vɩɩmã zu-loeesã. Biiblã gomda a Zeova sẽn nong a nin-buiidã to-to wã yelle, n yetẽ tɩ yaa ne nonglem-kãsenga. Rat n yeelame t’a na n kell n nong-b-la wakat fãa, n pa tol n daag-b n bas ye. (Yɩɩn. 100:5) Wẽnnaam naana yãmb n wõneg a menga. (Sɩng. 1:26) Wãn to la yãmb me tõe n wilg tɩ y nonga a Zeova a woto?

19. Bõe la y tõe n maan n wilg tɩ y sũur nooma ne bũmb nins fãa a Zeova sẽn maand n kõt yãmbã? (Galat-rãmbã 2:20)

¹⁹ Wilg-y Wẽnnaam tɩ y yaa sõm-mita. (1 Tes. 5:18) Daar fãa bɩ y sok y meng yaa: ‘Bõe la a Zeova maan n wilg t’a nonga maam?’ Rẽ poore, y sã n wa pʋʋsdẽ bɩ y tẽeg n togs-a bũmb takɩ a sẽn maan n kõ yãmba, n pʋʋs-a bark rẽ yĩnga. Wa tẽn-tʋmd a Polle, bɩ yãmb me bãng tɩ bũmb nins fãa a Zeova sẽn maand n kõt yãmbã wilgdame t’a sɩd nong-y lame. (Karm-y Galat-rãmb 2:20.) Sok-y y meng yaa: ‘Ma-me maanda bũmb n wilgd a Zeova tɩ m nong-a lame bɩ?’ Y sã n nong a Zeova, y na n kell n yalsa kãn-kãe n da wa maan bũmb n kɩɩs-a, baa y sã n wa maood ne zu- loeese. Na n sõng-y lame tɩ y ket n maand bũmb nins sẽn paasd yãmb ne a zoodã pãngã, la y ket n wilgd daar ne a to fãa tɩ y sɩd nonga y saasẽ Ba wã.

20. Bõe la y segd n maan tɩ wilg tɩ y rɩka y meng n kõ a Zeova, la bõe yĩng tɩ rẽ yaa yam-yãkr sẽn tar yõod wʋsgo?

²⁰ Bilf-bilfã, y sẽn nong a Zeova wã yĩnga, y na n wa pʋʋs-a lame n wilg tɩ y rat n maana a raabã. Y na n dɩka y meng n kõ-a. Bãng-y tɩ y sã n dɩk y meng n kõ a Zeova, yaa bark meng-menga. Y na n paam n lebga a rẽnd wakat sẽn kõn sa yĩnga. Y sã n dɩk y meng n kõ a Zeova, y pʋlm-a lame tɩ y na n kell n maana a raabã wakat fãa, noog wall toog wakate. Pʋleng a woto yaa bũmb sẽn maand vugri. La yaa yam-yãkr sẽn pa reem yell ye. Tags-y n ges-y-yã: Y na n yãka yam n maan bũmb wʋsg y vɩɩmã pʋgẽ. Kẽer yaa sõma wʋsgo. La baa a ye yõod pa ta y sẽn na n yãk yam n dɩk y meng n kõ a Zeova ye. (Yɩɩn. 50:14) A Sʋɩtãan na n makame sẽn na yɩl tɩ y ra le nong y saasẽ Ba wã, hal n wa bas a tũubu. Ra bas-y t’a tõog a bada! (Zoob 27:5) Y sẽn nong y saasẽ Ba a Zeova ne y sũur fãa wã yĩnga, a na n sõng-y lame tɩ y kell n tũ-a wakat fãa yĩng wa y sẽn pʋlm-a wã, tɩ yãmb ne yẽ zoodã pãng tar paasgo.

21. Bõe yĩng tɩ d tõe n yeel tɩ lisgã reegr nan yaa a Zeova tũubã sɩngr bala?

²¹ Y sã n dɩk y meng n kõ a Zeova, rẽ poor bɩ y wilg tigingã kãsem-dãmb tɩ y rat n deega lisg masã. Y sã n wa reeg lisgu, tẽegd-y wakat fãa tɩ pa sa ye. Nan yaa sɩngre. Yaa y sẽn yãk yam n na n tũ a Zeova wakat sẽn kõn sa yĩngã sɩngr la woto. Rẽ wã, modg-y masã menga, tɩ y sẽn nong y saasẽ Ba wã to-to wã pãng paasdẽ. Yãk-y yam n maan bũmb takɩ sẽn na n kɩt tɩ yãmb ne a nonglmã paasd daar ne a to fãa. Woto na n sõng-y lame tɩ y wa tõog n deeg lisgu. Na n sɩd yɩɩ sũ-noog daare! La nan yaa sɩngr bal la woto. Bɩ yãmb sẽn nong a Zeova ne a Bi-riblã to-to wã tar paasd wakat fãa!