1. D vɩɩmã yõod yaa wãn to a Zeova nifẽ?

 MAMS-Y n ges-y y zoa sẽn na n kõ yãmb zaka, tɩ roogã rat manegr bilfu. Baa ne rẽ, zakã ligd yaa milyõ-rãmba. Sãmbg kae tɩ y sũur na n yɩɩ noog ne roogã, la y na n gesa a yell sõma. A Zeova me kõo tõnd kũun sẽn tar yõod wʋsgo: Yaa vɩɩmã. A Zeova wilgame t’a nand-d-la wʋsgo, a sẽn sak t’a Bi-riblã wa ki tɩ yɩ maoong tõnd yĩngã.—Zã 3:16.

2. Wa 2 Korẽnt rãmb 7:1 sẽn wilgdã, bõe la a Zeova rat tɩ d maane?

² A Zeova n yaa vɩɩmã kõatã. (Yɩɩn. 36:10) Tẽn-tʋmd a Poll sak n deega rẽnda. A yeelame yaa: “Yaa bãmb maasem yĩng la tõnd vɩya, n kẽnd la d beẽ.” (Tʋʋ. 17:25, 28) Tõnd me tõe n yeelame tɩ vɩɩmã yaa Wẽnnaam kũuni. A sẽn nong-dã yĩnga, a kõt-d-la bũmb nins fãa sẽn yaa tɩlɛ ne d vɩɩmã. (Tʋʋ. 14:15-17) La a Zeova pa maand yel-soalem n kogend d vɩɩmã ye. A ratame tɩ d maand d sẽn tõe fãa n kogend d yĩnsã laafɩ wã la d tẽebã. (Karm-y 2 Korẽnt rãmb 7:1.) Bõe yĩng tɩ d segd n kogl d laafɩ wã la d vɩɩmã, la wãn to la d tõe n maan rẽ?

3. Bõe yĩng tɩ d segd n maan d sẽn tõe fãa n kogl d laafɩ wã?

³ Bũmb a ye sẽn kɩt tɩ d segd n kogl d laafɩ wã, yaa sẽn na yɩl n tõog n tall d keelmã n tũ a Zeova. (Mark 12:30) D sẽn dat n kõ d ‘yĩnsã tɩ yɩ maoong sẽn vɩ, sẽn yaa sõma, sẽn noom Wẽnnaamã’ yĩnga, d pa maand bũmb sẽn tõe n kẽes d vɩɩmã yell pʋgẽ ye. (Rom. 12:1) La yaa sɩd tɩ baa ne d sẽn maand bũmb nins fãa n kogend  d mensã, bãag tõe n baas n yõk-d lame. La d maanda d sẽn tõe fãa n na n kogl d laafɩ wã, bala d rat n wilga d saasẽ Ba wã tɩ d sũur nooma ne vɩɩmã a sẽn kõ-dã.

4. Bõe la rĩm a Davɩɩd da rata?

⁴ Rĩm a Davɩɩd wilga bũmb ning sẽn kɩt t’a nand vɩɩmã sẽn yaa Wẽnnaam kũunã, n yeel yaa: “Mam zɩɩm daagr nafda yãmb ne bõe? Mam yaoogẽ sigb yõod ne yãmb yaa bõe? Tẽng tom tõe n leb n pʋʋsa yãmb bark sɩda? Tẽng tom tõe n leb n kɩsa yãmb sɩdã kaseto?” (Yɩɩn. 30:10) Tõe tɩ yaa a Davɩɩd sẽn wa n kolg kũumã la a gʋls gom-kãense. La a ratame n kell n vɩɩmd n kaoose, sẽn na yɩl n paam n pẽgd Wẽnnaam. Sãmbg kae tɩ tõnd fãa me rata woto.

5. D kʋʋlame wall d bẽedame, bõe la d ket n tõe n maane?

⁵ Bãag la kʋʋlem tõe n kɩtame tɩ d pa le tõe n maan bũmb wʋsg d sẽn da maand pĩndã ye. Woto tõe n sãama d sũur hal wʋsgo. La d pa segd n bas n pa le get d laafɩ wã yell ye. Bõe yĩnga? Bala baa d sã n kʋʋlame wall d bẽedame, d ket n tõe n pẽgda a Zeova wa rĩm a Davɩɩde. D sẽn mi tɩ d Wẽnnaamã nong-d-la baa ne d sẽn pa zems zãngã, noom-d-la wʋsgo! (Mat. 10:29-31) Baa d sã n wa maan kaalem, a rata ne a sũur fãa n vʋʋg-do. (Zoob 14:14, 15) Dẽnd d sẽn ket n vɩ wã, d segd n maanda d sẽn tõe fãa n kogend d laafɩ wã la d vɩɩmã.

6. Bõe la a Zeova rat tɩ d maan rɩɩbã la rãamã yũub wɛɛngẽ?

⁶ Yaa sɩd tɩ Biiblã pa sebr sẽn kõt sagls laafɩ wã wall rɩɩbã wɛɛngẽ ye. La a wilgda tõnd a Zeova tagsg sẽn yaa a soab rẽ wɛɛngẽ. Wala makre, a sagend-d lame tɩ d “zãag d meng ne wẽngã” sẽn tõe n wa sãam d yĩnsã laafɩ wã. (Koɛ. 11:10) Biiblã gɩdga yão-beedã la rã-tɩgrã sẽn tõe n tũ ne d yõorã. (Yel. 23:20) A Zeova ratame tɩ d sã n wa yãk yam n na n dɩ wall d yũ rãam, bɩ d tall yõk-m-menga.—1 Kor. 6:12; 9:25.

7. Wãn to la Yel-bũn 2:11 saglgã tõe n sõng tõnd tɩ d kogl d laafɩ wã?

⁷ D sã n tagsd neere, d na n tõogd n yãkda yam sẽn wilgd tɩ d sũur nooma ne vɩɩmã sẽn yaa Wẽnnaam kũunã. (Yɩɩn 119:99, 100; karm-y Yel-bũn 2:11.) Wala makre, d na n maanda gũusg bũmb nins d sẽn dɩtã wɛɛngẽ. D sã n mi tɩ d sã n dɩ rɩɩb ninga na n kɩtame tɩ d bẽ, d na n gũusame n da rɩ rɩ-kãng ye. D wilgdame me tɩ d tara yam, d sã n gũsdẽ tɩ sekdẽ, n maand yĩn-wɩsgre, n modgd n yaa yɩlem wakat fãa, la d modg me tɩ d zakã yɩ yɩlemde.

8. Bõe la Biiblã yeta, tɩ wilgdẽ tɩ Wẽnnaam ratame tɩ d gũusdẽ sẽn na yɩl tɩ sãmpogr da wa zĩndi?

⁸ A Zeova ra kõo Israyɛll nebã noy la saglse, sẽn na yɩl n sõng-b tɩ b ra wa maan bũmb sẽn tõe n wa ne sãmpogr b zakẽ wã la b tʋʋma zĩigẽ ye. (Yik. 21:28, 29; Tõo. 22:8) Ned sã n da kʋ a to, baa pa yɩ ne pʋ-toogo, ra tõe n waa ne yell meng-menga. (Tõo. 19:4, 5) Tõogã ra wilgdame tɩ ned sã n da maan tɩ biig sẽn ket a ma pʋgẽ paam yelle, baa sã n pa yɩ ne pʋ-toogo, a segd n paama sɩbgre. (Yik. 21:22, 23) Dẽnd Biiblã wilgdame t’a Zeova ratame tɩ d gũusd  wakat fãa sẽn na yɩl tɩ sãmpogr da wa zĩnd ye.

9. Bõe la d tõe n maane, sẽn na yɩl tɩ sãmpogr da wa zĩndi? (Ges-y fot-rãmbã me.)

⁹ D wilgdame tɩ d sũur nooma ne vɩɩmã sẽn yaa Wẽnnaam kũunã, d sã n gũusdẽ sẽn na yɩl tɩ sãmpogr da wa zĩnd d zakẽ wã, wall d tʋʋma zĩigẽ ye. Wala makre, d tõe n baoo zĩig n bĩng teed nins sẽn tõe n wa ne yellã. Tõe n yɩɩ bũmb sẽn tõe n wãag neda, bũmb ned sẽn tõe n yũ bɩ n dɩ tɩ wa ne yelle, tɩto, la d gũus me tɩ kom-bõonegã ra wa sɩɩs-b ye. D segd n maana gũusg me tɩ bugum, koom bɩ kaam sẽn tʋʋle, la teed sẽn sog ne kʋʋrã ra wa wa ne yell ye. D sã n dɩka tɩɩm, bɩ d yũu rãam wall d pa gũs tɩ sek tɩ kɩt tɩ d yamã pa vẽene, d pa segd n wẽn mobil wall montɛɛr ye. D pa segd me n tõgd telefõn la d wẽnd mobil ye.

10. Bõe la d tõe n maan nand tɩ yel-lingdem maane, la yel-lingdem sasa?

¹⁰ Wakat ninga, d pa tõe n gɩdg yɛl kẽer  tɩ pa maan ye. Wala makre, sabab-wẽnse, bã-longdse, la zaba. Yɛl a woto buud sasa, d tõe n kogla d mens wall d põse, d sã n sak n tũ noy nins tẽngã taoor dãmb sẽn na n kõ rẽ wɛɛngẽ wã. Wala makre, b sã n yeel tɩ d pa d zagsẽ, wall tɩ d yi d sẽn beẽ wã. (Rom. 13:1, 5-7) Naoor wʋsgo, d tõe n segla d mens sabab-wẽng yĩnga. Rẽ n so tɩ d segd n tũud noy nins tẽngã taoor dãmb sẽn yiisd n na n sõng-d tɩ d segl d mens sabab-wẽng yĩngã. D tõe n baoo koom, tɩto, la bũmb a taab sẽn pa sãamde, n bĩngi.

11. Bã-longdg sã n wa sɩng d sẽn beẽ wã, bõe la d segd n maane?

¹¹ Bã-longdg sã n wa sɩng d sẽn beẽ wã, bõe la d segd n maane? D segd n tũu tẽngã taoor dãmb sẽn na n yiis noy ninsã. Wala makre, nusã pɛgb wɛɛngẽ, ra pẽneg taab wʋsgã, no-limã ningri, la bũmb a taab wɛɛngẽ. D sã n wɩngd ne no-kãens tũubu, d wilgdame tɩ d nanda vɩɩmã sẽn yaa Wẽnnaam kũunã.

12. Wãn to la saglg ning sẽn be Yel-bũn 14:15 wã sõngd tõndo, kibay nins nebã sẽn yelgd yel-lingdem sasa wã wɛɛngẽ?

¹² Yel-lingdem sã n wa maane, d zo-rãmba, d yagse, la kiba-kɩtbã tõe n yelgda kibay sẽn pa sɩda. Yɩta sõma tɩ d kelg tẽngã taoor dãmb la logtoɛɛmbã sẽn na n yeel bũmb ningã, la d ra tẽ ‘bũmb ning fãa d sẽn wʋm’ ye. (Karm-y Yel-bũn 14:15.) Nand tɩ siglgã taoor lʋɩtb sullã la filiyal-dãmbã yiis noy n wilg d sẽn segd n maan to-to tigissã la koɛɛgã mooneg wɛɛngẽ, b rengd n maana b sẽn tõe fãa n paam kibay sẽn yaa sɩda. (Ebre. 13:17) D sã n tũud noy nins b sẽn kõtã, d kogenda d mens la neb a taabã. Sõngdame me tɩ tigingã nebã ket n tar yʋ-noog sakã pʋgẽ.—1 Pɩy. 2:12.

13. Zɩɩmã wɛɛngẽ, bõe la d maand tɩ wilgdẽ tɩ d nonga vɩɩmã sẽn yaa Wẽnnaam kũunã?

¹³ Neb wʋsg miime t’a Zeova Kaset rãmbã getame tɩ zɩɩmã yaa bũmb sẽn yaa sõng Wẽnnaam nifẽ. D pa sakd tɩ b ning-d zɩɩm baa yel-pakr sasa, tɩ wilgdẽ tɩ d tũuda noor ning a Zeova sẽn kõ zɩɩmã wɛɛngẽ wã. (Tʋʋ. 15:28, 29) Woto pa rat n yeel tɩ d rat n kiime ye. D nonga vɩɩmã sẽn yaa Wẽnnaam kũunã. D sã n wa ka laafɩ, d baooda logtoɛɛmb sẽn mi b tʋʋmd sõma, n na n sak n tɩp-d n pa ning-d zɩɩm ye.

14. Bõe la d tõe n maan n gil yɛl sẽn tõe n wa kɩt tɩ b wopeer-do?

¹⁴ D sã n tũud sõs-kãngã pʋgẽ saglsã, n kogend d mens la d laafɩ wã, na n kɩtame tɩ d gil yɛl sẽn tõe n wa kɩt tɩ b rat n ning-d zɩɩm. D sã n zoe n tar keelem, b sã n wa wopeer-do, d na n le paama laafɩ tao-tao. D sã n modg n pa maand bũmb sẽn tõe n wa ne sãmpogr d zakã pʋgẽ la d tʋʋma zĩigẽ, la d tũud noy nins b sẽn lugl sor zug kẽnã yĩnga, na n sõng-d lame tɩ d gil yɛl sẽn tõe n wa kɩt tɩ b wopeer-do.

15. a) Bõe yĩng tɩ tar yõod tɩ d gʋls tɩbsg ning d sẽn datã sebr zugu? (Ges-y fotã me.) b) Wa b sẽn wilg video wã pʋgẽ wã, bõe la d tõe n maan tɩ logtoɛɛmbã bãng d raabã sẽn yaa a soab tɩbsgã wɛɛngẽ?

¹⁵ D sẽn nong vɩɩmã sẽn yaa Wẽnnaam kũunã yĩnga, d gʋlsda sebr sẽn na n wa sõng logtoɛɛmbã tɩ b bãng d yam-yãkr sẽn yaa a soab tɩbsgã  wɛɛngẽ, la d suiid sebrã n kẽnd wakat fãa. b Ne seb-kãng maasem, d wilgda d raabã sẽn yaa a soab zɩɩmã la tɩbsg a taab wɛɛngẽ. Kibay nins sẽn be yãmb sebrã zugã zemsame bɩ? Sã n mikame tɩ y segd n gʋlsa sebrã, wall n toeem bũmb kẽer y sebrã zugu, bɩ y maan rẽ tao-tao. D sã n deng n gʋls sebr zug vẽeneg n wilg d raabã sẽn yaa a soab tɩbsgã wɛɛngẽ, na n sõngame tɩ tõnd ne logtoɛɛmbã ra wa kɩɩsd taab zaalem, tɩ kɩt tɩ d pa paam tɩbsg tao-tao ye. Leb n na n sõnga logtoɛɛmbã tɩ b ra wa yãk tɩbsg d sẽn pa rate, n tɩp-d ye. c

16. Y sã n pa mi y sẽn tõe n gʋls kart DPA wã to-to, bõe la y tõe n maane?

¹⁶ Baa d yaa bi-bɩɩga, wall d tara keelem, d fãa tõe n paama sãmpogre, wall n bẽ. (Koɛ. 9:11) Woto yĩnga, yɩta sõma tɩ d gʋls sebr sẽn wilgd d raabã sẽn yaa a soab tɩbsgã wɛɛngẽ. Y sã n pa mi y sẽn na n gʋls seb-kãng to-to, bɩ y kos y tigingã kãsem-dãmb tɩ b sõng-yã. B na n sõng-y lame tɩ y  tõog n gʋls sebrã, la pa bãmb n na n yãk yam tɩbsgã wɛɛngẽ n kõ-y ye. Yaa yãmb mengã n segd n maan rẽ. (Gal. 6:4, 5) B na n sõng-y lame tɩ y wʋm sebrã sẽn gomd bũmb ning yellã sõma, tɩ y tõog n wilg y raabã sẽn yaa a soab tɩbsgã wɛɛngẽ.

17. Wãn to la d tõe n wilg tɩ d pa dem-dem laafɩ wã wɛɛngẽ?

¹⁷ Naoor wʋsgo, d sẽn yãkd yam ning d laafɩ wã la tɩbsgã wɛɛngẽ wã tika Biiblã sẽn yet bũmb ningã zugu. (Tʋʋ. 24:16; 1 Tɩm. 3:9) D sã n yãk yam tɩbsg ning wɛɛngẽ, la d sã n wa gomd rẽ yell ne d taabã, d segd n tẽega Filip rãmb 4:5 sẽn yet bũmb ningã. B yeta be yaa: “Bɩ y kɩt tɩ nebã fãa yã tɩ y yaa neb sẽn pa dem-dem ye.” D sã n yaa neb sẽn pa dem-deme, d pa na n maand yɩɩr wʋsg d laafɩ wã wɛɛngẽ, wall n pẽdgd d taabã n dat tɩ b maan wa tõndo, tɩbsgã wɛɛngẽ ye. D nonga d tẽed-n-taasã la d nand-ba, baa b yam-yãkrã sã n yaa toor ne tõnd dẽndã.—Rom. 14:10-12.

18. Wãn to la d tõe n wilg tɩ d sũur nooma ne vɩɩmã Wẽnnaam sẽn kõ-dã?

¹⁸ D sã n kogend d vɩɩmã la d tũud a Zeova ne d sũur fãa, d wilgdame tɩ d sũur nooma ne-a, a sẽn yaa vɩɩmã kõatã yĩnga. (Vẽn. 4:11) Masã menga, d maooda ne bãas la yɛl a taaba. Pa woto la d Naandã ra rat tɩ d vɩɩmã yɩ ye. Ka la bilfu, a na n kõ-d-la vɩɩm sẽn kõn sa, tɩ toog la kũum ka le beẽ ye. (Vẽn. 21:4) La nananda, d sũur nooma d sẽn paam n vɩ n tũud d saasẽ Ba a Zeova sẽn nong-dã.