1. Bõe zug la a Abrahaam tẽebã ra tik-yã?

 A ZEOVA pʋlma a zoa a Abrahaam tɩ buud fãa na n paama bark a yagensã maasem yĩnga. (Sɩng. 15:5; 22:18) A Abrahaam sẽn da tẽed Wẽnnaam ne a sũur fãa wã yĩnga, a ra kɩsa sɩd tɩ bũmb nins a sẽn pʋlmã na n pidsame. La a Abrahaam wa n taa yʋʋm koabga, t’a pagã ta yʋʋm pis-wɛ, tɩ yẽ ne a pagã sẽn maand sɩdã ket n pa tar biig ye. (Sɩng. 21:1-7) Baa ne rẽ, Biiblã yeelame yaa: “A [Abrahaam] ra kɩsa sɩd t’a na n yɩɩ buud wʋsg ba, baa sẽn da wõnd rẽ pa tõe wã. A ra tẽeda bũmb ning b sẽn yeel-a wã.” (Rom. 4:18) D miime t’a Abrahaam sẽn da saagd n na n paam bũmb ningã pidsame. A roga a Izaak sẽn yaa biig ning a sẽn da sɩng n gũud hal daar zãrã. Bõe n kɩt t’a Abrahaam ra kɩs sɩd tɩ Wẽnnaam na n pidsa a pʋlengã?

2. Bõe n kɩt t’a Abrahaam ra kɩs sɩd t’a Zeova pʋlengã na n pidsame?

² A Abrahaam ne a Zeova zoodã sẽn da tar pãngã yĩnga, a ra “kɩsa sɩd zãng-zãng tɩ Wẽnnaam tõe n pidsa bũmb ning a sẽn pʋlmã.” (Rom. 4:21) A Abrahaam ra tata a Zeova yam, t’a yeel t’a yaa tɩrg a tẽebã yĩnga. (Zak 2:23) Rom dãmb 4:18 wã wilgdame t’a Abrahaam ra tara tẽeb la saagre. Bɩ d ges bũmb ning tẽn-tʋmd a Poll sẽn yeel saagrã wɛɛngẽ Rom dãmb sak a 5 wã pʋgẽ.

3. Bõe la a Poll yeel saagrã wɛɛngẽ?

³ A Poll wilga bũmb ning sẽn kɩt tɩ d tõe n bas d yam tɩ ‘saagr pa belgd nedã.’ (Rom. 5:5) A leb n sõng-d lame tɩ d bãng d saagrã sẽn tõe n paam pãng to-to. D sã n wa gomd a Poll sẽn bilg rẽ to-to Rom dãmb 5:1-5 pʋgẽ wã, bɩ y tags sẽn yɩ to-to ne yãmb mengã. Y sã n maan woto, yaa vẽeneg tɩ y na n yãame tɩ y sẽn saagd n na n wa paam bũmb ningã lebgda vẽeneg n paasdẽ. D sẽn na n gom bũmb ning yellã na n sõng-y lame me tɩ y bãng y sẽn  tõe n maan to-to tɩ y saagrã pãng maneg n paase. Bɩ d reng n gom bũmb neb sẽn saagd n na n wa paam tɩ be yamleoog wʋsg yelle, t’a Poll yeel tɩ pa belgr ye.

4. Bõe yell la Rom dãmb 5:1, 2 gomda?

⁴ Karm-y Rom dãmb 5:1, 2. A Poll gʋlsa gom-kãensã n tool Rom kiris-nebã. Saam-biisã la saam-bi-pogsã sẽn da be be wã zãmsame n bãng a Zeova la a Zeezi, n tẽ n lebg kiris-neba. Rẽ n so tɩ Wẽnnaam yeel “tɩ [b] yaa nin-tɩrs tẽeb yĩnga,” la a zae-b ne vʋʋsem sõngã. Rẽ kɩtame tɩ b ra saagd n na n wa paam bũmb sẽn be yamleoogo, la b kɩs sɩd tɩ b na n wa paama rẽ.

5. Sẽn paam-b vʋʋsem sõng zaeebã saagdame n na n wa paam bõe?

⁵ Kaoosg zugẽ, a Poll gʋlsa kiris-neb nins sẽn paam vʋʋsem sõng zaeeb n be Efɛɛzã, n gom saagr ning Wẽnnaam sẽn kõ-bã yelle. B na n wa paama keoor ning b “sẽn bĩng nin-sõamyã wã yĩng tɩ yaa rogem-pʋɩɩrã.” (Efɛɛ. 1:18) A Poll wilga Kolos kiris-nebã me zĩig ning b sẽn na n paam b keoorã. A boola saag-kãng tɩ “bũmb nins b sẽn bĩng yãmb saasẽ wã.” (Kolo. 1:4, 5) Dẽnd kiris-neb nins sẽn paam vʋʋsem sõng zaeebã saagdame n na n wa vʋʋg n kẽng saasẽ n tɩ vɩɩmd wakat sẽn kõn sa. Be, b na n naaga Kiristã n dɩ naam.—1 Tes. 4:13-17; Vẽn. 20:6.

6. Bõe la saam-biig a ye sẽn paam vʋʋsem sõngã zaeeb yeel a sẽn saagd n na n wa paam bũmb ningã wɛɛngẽ?

⁶ Kiris-neb nins sẽn paam vʋʋsem sõng zaeebã sũur nooma ne b sẽn saagd n na n wa paam bũmb ningã. Saam-biig a Frederick Franz sẽn yaa b nin-yendã pelga a pʋg n yeel yaa: “D sẽn saagd n na n wa paam bũmb ningã pidsg yaa waaziba. Bãg-bilã neb 144000 ned kam fãa na n paama bũmb ning Wẽnnaam sẽn pʋlem-dã. D keoorã na n yɩɩ sõma n yɩɩd d sẽn tagsdã hal zĩig sẽn zãre.” Saam-biig a Franz sẽn tũ Wẽnnaam ne a sũur fãa n maan yʋʋm wʋsg poore, a yeela  yʋʋmd 1991 wã yaa: “D ket n nanda bũmb ning d sẽn saagd n na n wa paamã wʋsgo. D sẽn gũud n kaoosdẽ wã, kɩtame tɩ d maneg n nand-a. Yaa bũmb sẽn sek d na gũ, baa sã n yaa tɩlɛ tɩ d gũ-a yʋʋm milyõ. Masã, m sũur nooma ne d sẽn saagd n na n wa paam bũmb ningã n yɩɩd pĩndã.”

7-8. Bõe la neb wʋsg saagd n na n wa paame? (Rom dãmbã 8:20, 21)

⁷ Neb nins sẽn tũud a Zeova rũndã-rũndã wã wʋsg sẽn saagd n na n wa paam bũmb ningã yaa toore. Yaa bũmb ning a Abrahaam sẽn da saagd n na n wa paamã. B saagd n na n wa vɩɩmda wakat sẽn kõn sa tẽngã zugu, Wẽnnaam Rĩungã naam sasa. (Ebre. 11:8-10, 13) A Poll goma bũmb ning nin-kãens sẽn saagd n na n wa paam tɩ be yamleoogã yelle. (Karm-y Rom dãmb 8:20, 21.) Yãmb sẽn wa n wʋm tɩ b gom bũmb ning Biiblã sẽn pʋlem beoog-daarã wɛɛngẽ wã yellã, bõe n yɩ yãmb noog n yɩɩda? Yaa b sẽn yeel tɩ daar n wat tɩ y na n zems zãng n pa le maand yel-wẽndã bɩ, bɩ yaa y sẽn bãng tɩ y neb nins sẽn maan kaalmã na n wa vʋʋgame n vɩɩmd tẽngã sẽn na n lebg arzãnã zugã? Wẽnnaam sẽn pʋlem ‘bũmb d sẽn tõe n saagã’ yĩnga, y tara bõn-sõma wʋsg y sẽn yãgd tɩ pidsi.

⁸ D saagd n na n wa tɩ vɩɩmda saasẽ wakat sẽn kõn sa tɩ yaa tẽngã zug me, d sẽn saagd n na n wa paam bũmb ningã bee rasãnde, tɩ d tõe n maan sũ-noogo. Sẽn paase, d tõe n modgame n maneg n kɩs sɩd ne bõn-kãnga. A Poll goamã wilgda d sẽn tõe n maan rẽ to-to. Bɩ d ges a sẽn yeel bũmb ning d saagrã wɛɛngẽ wã. A sẽn yeelã tõe n sõng-d lame tɩ d maneg n kɩs sɩd tɩ d sẽn saagd n na n wa paam bũmb ningã na n pidsame.

9-10. Kiris-nebã miime tɩ bõe n tõe n paam-ba, wa sẽn yɩ to-to ne a Pollã? (Rom dãmbã 5:3) (Ges-y fot-rãmbã me.)

⁹ Karm-y Rom dãmb 5:3. A Poll yeelame tɩ namsgã tõe n kɩtame tɩ d maneg n kɩs sɩd ne d sẽn saagd n na n wa paam  bũmb ningã. A sẽn yeel bũmb ningã tõe n linga tõndo. Sɩd-sɩda, Kirist karen-biisã fãa miime tɩ b tõe n wa nams-b lame. D gom a Poll mengã yelle. A yeela Tesalonik kiris-nebã yaa: “Tõnd sẽn wa n be ne yãmbã, d ra pĩnd n togsda yãmb tɩ d na n paama toogo, la . . . yaa bõn-kãng la sẽn maanã.” (1 Tes. 3:4) A yeela Korẽnt kiris-nebã me yaa: “M saam-biisi, tõnd pa rat tɩ yãmb zɩ namsg ning d sẽn paamã . . . ye.” A paasame: ‘Tõnd da yɛɛsdame tɩ na n tũu ne d yõore.’—2 Kor. 1:8; 11:23-27.

¹⁰ Rũndã-rũndã kiris-nebã me tõe n paama namsg buud toor-toore. (2 Tɩm. 3:12) Yɩɩ woto ne yãmb me bɩ? Yãmb sẽn tẽ a Zeezi n sɩng a tũubã, y paama zu-loees rẽ yĩng bɩ? Tõe tɩ y zo-rãmb wall y roagdb yaal-y lame. Tõe tɩ b nams-y lame menga. Yãmb sẽn dat n pelg y pʋg bũmb fãa pʋgẽ wã, kɩtame tɩ y paam zu-loees y tʋʋmã zĩigẽ bɩ? (Ebre. 13:18) Tẽngã taoor dãmb namsa yãmba, y sẽn moond koɛɛgã n gomd bũmb ning y sẽn saagd n na n wa paamã yellã yĩng bɩ? La sẽn wa n yaa namsg ning fãa la d segda, a Poll yeelame tɩ d segd n maana sũ-noogo. Bõe yĩnga?

11. Bõe yĩng tɩ d segd n segl d meng n sa n na n tõog toog zu-loɛɛg buud fãa taoore?

¹¹ B sã n wa namsd tõndo, d tõe maana sũ-noogo, bala d miime tɩ rẽ tõe n sõng-d lame tɩ d bɩɩs zʋg-sõng sẽn tar yõodo. “Namsg kɩtdame tɩ ned tõogd toog” wa Rom dãmb 5:3 sẽn yetã. Kiris-nebã fãa na n paama namsgo. Dẽnd kiris-nebã fãa segd n tõoga toogo. Yaa tɩlɛ tɩ d segl d meng n sa tɩ sẽn wa n yaa zu-loɛɛg ning fãa la d segda, bɩ d tõog toogo. Yaa d sẽn na n tõog toog n kell n tũ a Zeova bal la d na n wa paam d keoorã. D pa rat n yɩ wa neb nins yell a Zeezi sẽn da tagsde, a sẽn wa n gomd bõn-buud sẽn lʋɩ kug zĩigẽ wã yellã ye. B sakda koɛɛgã zĩig pʋgẽ ne su-noogo, la b “sã n wa paam zu-loɛɛg wall namsgo,” b lʋɩtame. (Mat. 13:5, 6, 20, 21) Yaa sɩd tɩ d sã n wa segd namsg wall zu-loeese, pa nana ye. La d sã n tõog toog n kell n tũ a Zeova, na n naf-d lame. Wãn to?

12. D sã n tõog toog zu-loees taoore, wãn to la nafd tõndo?

¹² Karen-biig a Zak wilga tõog toog zu-loɛɛg sasa sẽn nafd ned to-to. A yeelame: “Bɩ tõog-toog tʋm a tʋʋmd n baas tɩ yãmb pid zãnga, n yɩ sõma bũmb fãa pʋgẽ, tɩ baa fʋɩ ra paoog-y ye.” (Zak 1:2-4) A Zak gomame tɩ yaa wa tõog-toogã tara tʋʋmd a sẽn segd n tʋme. Tʋʋm-bʋg la tõog-toogã sẽn segd n tʋmã. A tõe n sõng-y lame tɩ y maneg n bɩɩs zʋg-sõma wala sũ-mare, tẽebo, la y maneg n teeg Wẽnnaam. La d sã n tõog toogo, d paamda bũmb a to sẽn tar yõod wʋsgo.

13-14. D sã n tõogd toogo, wãn to la nafd tõndo, la wãn to la rẽ paasd d saagrã pãnga? (Rom dãmbã 5:4)

¹³ Karm-y Rom dãmb 5:4. A Poll yeelame tɩ tõog-toogã sõngdame “tɩ d tat Wẽnnaam yam.” Y sẽn tõogd toogã kɩtdame tɩ y tat a Zeova yam. La woto pa rat n yeel tɩ y sã n segd zu-loeese, a Zeova sũur noomame ye. Bũmb ning sẽn noom a Zeova wã yaa y sẽn tõogd toog n ket n maand sɩdã. D sẽn mi tɩ d sã n tõogd toogo nooma a Zeova wã kengda d raoodo.—Yɩɩn. 5:12.

¹⁴ Tẽeg-y t’a Abrahaam tõoga toog zu-loees taoore, tɩ kɩt t’a ta a Zeova yam. A Zeova bool-a lame t’a zoa, la a yeel t’a yaa nin-tɩrga. (Sɩng. 15:6; Rom. 4:13, 22) Tõe n yɩɩ woto ne tõnd me. Pa tõnd sẽn  tʋmd wʋsgo, wall tʋʋm nins d sẽn tar Wẽnnaam siglgã pʋgẽ wã n kɩt tɩ d tat a yam ye. Yaa d sẽn tõogd toog n ket n maand sɩd ne-a wã n noom-a. D fãa tõe n tõoga toogo, baa d yʋʋmã, d yɛlã, wall d minimã sẽn yaa a soaba. Yãmb maooda ne zu-loɛɛg masã meng bɩ? Sã n yaa woto, bɩ y tẽeg tɩ y noogda a Zeova sũuri. D sã n miẽ tɩ d tata Wẽnnaam yam, kɩtdame tɩ d maneg n kɩs sɩd tɩ d na n wa paama keoor ning a sẽn pʋlmã.

15. Bõe me yell la a Poll gom-yã, la bõe yĩng tɩ neb kẽer tõe n pa wʋm rẽ võore?

¹⁵ D sã n tõogd toog baa ne zu-loeesã n ket n maand sɩd ne a Zeova, d tata a yam wa a Poll sẽn wilgã. A Poll yeelame me yaa: ‘D sã n tat Wẽnnaam yam, kɩtdame tɩ d saagd tɩ manegr n wate. La saagr pa belgd ned ye.’ (Rom. 5:4, 5) Neb kẽer tõeeme n pa wʋmd gom-kãensã võor ye. Bõe yĩnga? Bala Rom dãmb 5:2 pʋgẽ, a Poll yeelame tɩ Rom kiris-nebã zoe n tara saagre. ‘B gũuda ziir ning Wẽnnaam sẽn na n kõ-bã.’ Neb kẽer tõe n soka b mens yaa: ‘Sẽn mik tɩ kiris-nin-kãensã zoe n tara saagrã, bõe yĩng t’a Poll le gom saagr yelle?’

16. Bõe n kɩtd tɩ ned saagr paamd pãnga? (Ges-y fot-rãmbã me.)

¹⁶ D sã n tẽeg tɩ saagr yaa bũmb sẽn bɩte, d wʋmda a Poll gomdã võore. D rɩk makre. Yãmb tẽra y tagsg sẽn da yaa to-to, y sẽn wa n wʋm tɩ b gomd bõn-sõma nins Wẽnnaam sẽn pʋlem tɩ be a Gomdã pʋgẽ wã yellã bɩ? Tõe tɩ y ra tagsdame tɩ paam n vɩɩmd wakat sẽn kõn sa tẽngã sẽn na n lebg arzãnã zugã na n yɩɩ bõn-sõngo, la y ra pa kɩs sɩd ne rẽ ye. La y sẽn wa n bãngd a Zeova la Biiblã pʋlemsã n paasdẽ wã, y kɩsa sɩd tɩ pʋlen-kãens na n pidsame.

17. Y sẽn dɩk y meng n kõ a Zeova n deeg lisgã poore, wãn to la y saagrã pãng paas-yã?

¹⁷ Baa y sẽn dɩk y meng n kõ a Zeova n deeg lisgã poore, y sẽn kell n paas y bãngrã la y tẽebã pãngã, y maneg n kɩsa sɩd ne bũmb ning y sẽn saagd n na n wa paamã. (Ebre. 5:13–6:1) Yaa vẽeneg tɩ y  yãame tɩ Rom dãmb 5:2-4 sẽn yet bũmb ningã yaa sɩda. Y sega zu-loees buud toor-toore, la y tõoga toogo, n neẽ tɩ y tata Wẽnnaam yam. Y sẽn kɩs sɩd tɩ y tata Wẽnnaam yamã yĩnga, y tara bʋʋm-tɩrg n na n bas y yam tɩ y na n paama bũmb ning a sẽn pʋlmã. Y saagrã paama pãng n yɩɩd pĩndã. Maneg n lebga vẽeneg ne-yã. A toeema bũmb wʋsg y vɩɩmã nens fãa pʋgẽ. Wala makre, y manesem sẽn yaa a soab ne y zakã rãmba, y yam-yãkr toor-toorã, la y sẽn dɩkd y sẽkã n maand bũmb ninsã.

18. Bõe la a Zeova yeel tɩ kɩt tɩ d kɩs sɩd tɩ bũmb ning d sẽn saagd n na n wa paamã yaa waaziba?

¹⁸ Tẽn-tʋmdã paasa bũmb a to sẽn tar yõod wʋsg saagrã wɛɛngẽ. Yaa bũmb y sẽn paamd y sẽn wat n kɩs sɩd tɩ y tata Wẽnnaam yam. A yeelame tɩ y bas y yam tɩ y sẽn saagd n na n wa paam bũmb ningã na n pidsame. Bõe n kɩt tɩ y tõe n kɩs sɩd ne rẽ? Wẽnnaam vẽnega a Poll t’a yeel kiris-nebã yaa: “Saagr pa belgd ned ye. Bala b pʋdga Wẽnnaam nonglmã tõnd sũyã pʋsẽ ne vʋʋsem sõngã b sẽn kõ tõndã maasem.” (Rom. 5:5) Bũmb wʋsg n kɩt tɩ y tõe n bas y yam t’a Zeova pʋlemsã na n pidsame.

19. Y tõe n kɩsa sɩd ne bõe y sẽn saagd n na n wa paam bũmb ningã wɛɛngẽ?

¹⁹ Bʋgs-y-yã a Zeova sẽn pʋlem a Abrahaam bũmb ningã, la a sẽn maan to-to n ta Wẽnnaam yam t’a bool-a t’a zoa wã zugu. A Abrahaam tẽebã pidsame. Biiblã yeelame yaa: “A Abrahaam sẽn maan sũ-marã poore, a paama pʋlen-kãnga.” (Ebre. 6:15; 11:9, 18; Rom. 4:20-22) Yaa vẽeneg t’a sẽn da saagd n na n paam bũmb ningã pa yɩ belgr ye. Yãmb me tõe n kɩsa sɩd tɩ y sã n kell n maan sɩd ne Wẽnnaam y na n wa paama keoorã. Y saagrã pidsg yaa waaziba. Y tõe n maana sũ-noog rẽ yĩnga. Pa belgr ye. (Rom. 12:12) A Poll yeelame yaa: “Bɩ Wẽnnaam sẽn sõngd tõnd tɩ d saagd manegrã pids yãmb sũyã ne sũ-noog la laafɩ, yãmb sẽn kɩs-a sɩdã yĩnga, sẽn na yɩl tɩ ne vʋʋsem sõngã pãnga, yãmb tõe n saag manegr ne y sũy fãa.”—Rom. 15:13.