1. Sẽn na yɩl n lebg kiris-ned tẽeb sẽn bɩ, bõe la d segd n maane?

 D SÃ N get kambã sẽn bɩt tao-tao to-to wã, bee yamleoogo. Yaa wa b bɩta woto bal tɩ pa baood modgr ye. La f sã n dat n lebg kiris-ned tẽeb sẽn bɩ, yaa tɩlɛ tɩ f modge. b (1 Kor. 13:11; Ebre. 6:1) Rẽ baoodame tɩ d modg n yõg zood sõma ne a Zeova. Sẽn paase, yaa tɩlɛ tɩ d paam tɩ vʋʋsem sõngã sõng-d tɩ d bɩɩs zʋg-sõma, n paas d minimã bũmb kẽer wɛɛngẽ, la d segl d mens n wa maan bũmb kẽere.—Yel. 1:5.

2. Sɩngr 1:27 wã wilgda tõnd bõe, la bõe yell la d na n gom sõs-kãngã pʋgẽ?

² A Zeova naana ninsaalbã rap la pagba. (Karm-y Sɩngr 1:27.) F sã n ges pag ne raoa, f neeme tɩ b yaa toor-toore. La b sẽn yaa toor-toorã pa nif sẽn ne wã wɛɛngẽ bal ye. Wala makre, a Zeova naana pagbã la rapã tɩ b tar tʋʋm toor-toore, tɩ ned kam fãa segd n tall zʋg-sõma la minim sẽn na yɩl n tõog n tʋm tʋʋm nins a sẽn segd n tʋmã. (Sɩng. 2:18) Sõs-kãngã pʋgẽ, d na n yãa saam-bi-poak sẽn yaa bi-bɩɩg sẽn tõe n maan to-to n wa lebg pag tẽeb sẽn bɩ. Sõsg ning sẽn pʋgdã pʋgẽ, d na n yãa saam-biis nins sẽn yaa kom-bɩɩsã me sẽn tõe n maane.

3-4. Yɛ la saam-bi-pogs nins sẽn yaa kom-bɩɩsã tõe n paam neb sẽn yaa mak-sõng n dɩk b togs-taare? (Ges-y fotã me.)

³ Biiblã pʋgẽ, b goma pagb sẽn da nong a Zeova la b tũ-a ne b sũur fãa yelle. (Kẽ jw.org pʋgẽ n ges sõsg  ning gom-zug sẽn yaa: “Les femmes dans la Bible : que pouvons-nous apprendre d’elles ?”) B bɩɩsa zʋg-sõma nins sõsgã sẽn tik vɛrse ning zugã sẽn wilgdã. B ‘ra maanda gũusg bũmb fãa pʋgẽ,’ la b “maand sɩd bũmb fãa pʋgẽ.” Sẽn paase, tigimsã fãa pʋsẽ saam-bi-pogs tẽeb sẽn bɩ n be be, tɩ sẽn yaa-b kom-bɩɩsã tõe n dɩk b togs-n-taare.

⁴ Saam-bi-pogs sẽn yaa kom-bɩɩse, yãmb mii saam-bi-pogs tẽeb sẽn bɩ tɩ y tõe n dɩk b togs-n-taar bɩ? Ges-y zʋg-sõma nins b sẽn tarã, la y bao n bãng y sẽn tõe n bɩɩs-b to-to. Sul nins sẽn pʋgdã pʋgẽ d na n yãa zʋg-sõma a yiib saam-bi-pogsã sẽn segd n bɩɩse.

5. Bõe yĩng tɩ saam-bi-poak tẽeb sẽn bɩ segd n yɩ sik-m-meng soaba?

⁵ Sẽn na yɩl n yɩ kiris-ned tẽeb sẽn bɩ, yaa tɩlɛ tɩ d tall sik-m-menga. Pag sã n yaa sik-m-meng soaba, a na n paama zood sõma ne a Zeova la ne neb a taabã. (Zak 4:6) Wala makre, pag sẽn nong a Zeova sikda a meng n sakd noor ning a saasẽ Ba wã sẽn kõ zu-sobendã wɛɛngẽ wã. (1 Kor. 11:3) B segd n tũu no-kãng tigingã pʋgẽ la zakã pʋgẽ. c

6. Sik-m-mengã wɛɛngẽ, yam-bʋg la saam-bi-pogs nins sẽn yaa kom-bɩɩsã tõe n dɩk a Rebeka nengẽ?

⁶ D gom a Rebeka yelle. A ra yaa pag sẽn tar yam. A vɩɩmã tõre, a bãng n yãka yam bũmb kẽer sẽn da pa nana wɛɛngẽ. (Sɩng. 24:58; 27:5-17) Baasgo, a ra mii neb waoogre, la a ra sakd saglse. (Sɩng. 24:17, 18, 65) Yãmb sã n yaa sik-m-meng soab wa a Rebeka, n teend neb nins a Zeova sẽn yãk tɩ b lʋɩt taoorã, y kõta y zakã rãmb la tigingã neb fãa mak-sõngo.

7. Wãn to la saam-bi-poak sẽn yaa bi-bɩɩg tõe n dɩk a Ɛstɛɛr togs-n-taare, n yɩ sik-m-meng soaba?

⁷ Kiris-neb nins tẽeb sẽn bɩ wã fãa segd n yɩɩ sik-m-mens rãmba. Biiblã yetame tɩ “yam bee ne sik-m-mens rãmba.”  (Yel. 11:2) A Ɛstɛɛr ra yaa pag sẽn yaa sik-m-meng soaba, la sẽn da tũud a Zeova ne a sũur fãa. A sẽn da yaa sik-m-meng soabã yĩnga, baa a sẽn wa n lebg rĩm-poakã a pa wuk a meng ye. A sak n tũu a Mardose yʋʋm sẽn da yɩɩd-a wã saglse. A Mardose ra yaa a ba wã ba-biig biiga. (Ɛst. 2:10, 20, 22) Fo-me sã n baood sagl-sõma la f tũudẽ, f tõogd n talla sik-m-meng a woto.—Tɩt 2:3-5.

8. Sã n yaa ne 1 Tɩmote 2:9, 10, wãn to la sik-m-mengã tõe n sõng saam-bi-poak t’a bãngd n yãkd yam mengã manegr wɛɛngẽ?

⁸ Bũmb a to me n wilgd t’a Ɛstɛɛr ra yaa sik-m-meng soaba. A “ra yaa neer wʋsgo,” la a ra pa tikd rẽ n maand wilg-m-meng ye. (Ɛst. 2:7, 15) Wãn to la a Ɛstɛɛr mak-sõngã tõe n naf saam-bi-pogsã? Bũmb a ye b sẽn tõe n maan bee 1 Tɩmote 2:9, 10 pʋgẽ. (Karm-y-yã.) Tẽn-tʋmd a Poll sagla saam-bi-pogsã tɩ b manegd b mens ne sik-m-meng la gũusgu. Gɛrk gom-biis nins a Poll sẽn pʋd ka wã wilgdame tɩ saam-bi-pogsã segd n yera fut sẽn be waoogre, la sẽn wilgd tɩ b pa maand b toog kae ne neb a taabã tagsg ye. D sã n get saam-bi-pogs nins tẽeb sẽn bɩ wã sẽn ningd fut sẽn zemsã, d sũur nooma wʋsgo!

9. Yam-bʋg la d tõe n dɩk a Abigayɩll kibarã pʋgẽ?

⁹ Saam-bi-pogsã fãa segd n bɩɩsa yam-vẽenem, sẽn na yɩl n lebg kiris-neb tẽeb sẽn bɩ. Ned sẽn tar yam-vẽenem yaa wãn to? Yaa ned sẽn tõe n tags sõma, n bãng sẽn yaa sõma ne sẽn yaa wẽng n bake, n yãk yam n maan sẽn yaa sõma wã. D gom a Abigayɩll yelle. Daar a yembre a sɩdã yãka yam sẽn pa zemse, tɩ ra na n wa ne yell a zakã rãmb fãa zugu. A Abigayɩll maana bũmb tao-tao. A sẽn tags sõma n bãng a sẽn segd n maanegã, a fãaga yõya. (1 Sãm. 25:14-23, 32-35) Yam-vẽenemã tõe n sõng-d lame me tɩ d bãng wakat ning d sẽn segd n gome, la wakat ning d sẽn tog n sĩndi. A leb n tõe n sõng-d lame tɩ d bãngd n wilgdẽ tɩ d taabã yell pak-d lame.—1 Tes. 4:11.

10-11. F sã n zãms kareng la gʋlsgo, wãn to la na n naf foo la neb a taabã? (Ges-y fotã me.)

¹⁰ Saam-bi-poak segd n zãmsa bũmb kẽer maanego. Bũmb sãnda bi-pugl sẽn na n zãms a yãadmẽ wã na n kell n naf-a-la a vɩɩmã tõre. Ad bõn-kãens kẽere.

¹¹ Zãms kareng la gʋlsgo. Zĩis kẽere, b yetame tɩ pa tɩlɛ tɩ pag zãms kareng la gʋlsg ye. La rẽ yaool n tara yõod wʋsg ne kiris-ned buud fãa. d (1 Tɩm. 4:13) Woto wã, ra bas tɩ bũmb gɩdg-f tɩ f ra  zãms kareng la gʋlsg ye. Wãn to la rẽ na n naf-fo? Tõe n sõng-f lame tɩ f wa paam tʋʋma. Sẽn paase, na n yɩɩ nana ne-f tɩ f zãms Wẽnnaam Gomdã, la f rɩk-a n zãms neb a taaba. Sẽn yɩɩd fãa, f sẽn na n karemd Wẽnnaam Gomdã la f bʋgsd a zugã na n sõngame tɩ foo ne a Zeova zoodã pãng paase.—Zoz. 1:8; 1 Tɩm. 4:15.

12. Yel-bũn 31:26 zãmsda foo bõe?

¹² Zãms kelgr la goama. Kiris-ned segd n maagda a yĩng n kelgdẽ, la a gomd ne bʋgsem. Zĩ-kãng wɛɛngẽ, karen-biig a Zak kõ-d-la sagl-sõngo. A yeelame: “Ned buud fãa segd n wɩnga ne kelgre, la a maag ne goama.” (Zak 1:19) F sã n maagd f yĩng n kelgd f taabã f wilgdame tɩ f ‘kʋmd-b lame.’ (1 Pɩy. 3:8) F sã n pa wʋmd bũmb ned sẽn yeel võore, wall a tagsg sẽn yaa a soab bũmb ning wɛɛngẽ, bɩ f sok-a sogsg sẽn zemse. Rẽ poore, bɩ f tags n yaool n leoke. (Yel. 15:28, notã.) Sok f meng yaa: ‘Bũmb ning m sẽn na n togsã yaa sɩda, la kengd raood bɩ? Na n yɩɩ ne bʋgsem, la wilgdẽ tɩ m waoogda a soabã bɩ?’ Rɩk yam saam-bi-pogs nins sẽn wɩngd ne kelgr la sẽn gomd ne bʋgsmã nengẽ. (Karm-y Yel-bũn 31:26.) Gũusd n get b sẽn gomd to-to wã. F sã n zãms goam la kelgre, foo ne neb a taabã moor na n noomame.

13. Wãn to la f tõe n zãms zak zãabo? (Ges-y fotã me.)

¹³ Zãms zak zãabo. Zĩis wʋsgo, yaa pagbã n tʋmd zakã tʋʋm n tɩ yɩɩda. F ma wall saam-bi-poak a to tõe n wilg-f-la bõn-kãensã sẽn maand to-to. Saam-bi-poak a ye yʋʋr sẽn boond t’a Sĩndi yeelame: “Bũmb a ye sẽn yaa sõma wʋsg m ma sẽn sõng maam tɩ bãng yaa tɩ m sã n wɩsg m meng tʋme, wata ne sũ-noogo. A sẽn zãms maam rɩɩb seglgo, roog manegre, fut sẽeb la ligdã zãabã kɩtame tɩ m tõe n ges m meng yelle, la m tʋm a Zeova tʋʋmã wʋsgo. M ma zãmsa maam sãamb reegr me, tɩ yɩ sabab tɩ m bãng saam-biis la saam-bi-pogs sẽn tar zʋg-sõma, n tõe n dɩk b togs-n-taare.” (Yel. 31:15, 21, 22) Pag sẽn nong tʋʋma, sẽn nong sãamb reegr la sẽn mi zak zãab nafda a zakã rãmb wʋsgo, la tigingã nebã.—Yel. 31:13, 17, 27; Tʋʋ. 16:15.

14. Yam-bʋg la f tõe n dɩk a Kiristall kibarã pʋgẽ, la bõe la f segd n lʋɩɩs taoore?

¹⁴ Zãms f meng yell gesgo. Tara yõod tɩ kiris-ned fãa zãms a meng yell gesgo. (2 Tes. 3:7, 8) Saam-bi-poak yʋʋr sẽn boond t’a Kiristall yeelame: “M sẽn wa n ta kolɛɛsã, m roagdbã sagla maam tɩ m zãms bũmb sẽn na n sõng-m m vɩɩmã tõre. M baaba sagla maam tɩ m zãms ligdã gɛɛla. Rẽ nafa maam wʋsgo.” Tʋʋm paoong yaa sõma, la yɩta sõma tɩ f  zãms ligd zãab me sẽn na yɩl n da sãam ligd ning f sẽn na n paamã ye. (Yel. 31:16, 18) Ra kẽ sam sẽn pa tɩlɛ, la f ra bao teed wʋsg me, tɩ sõng-f tɩ f tõog n lʋɩɩs a Zeova tʋʋmã taoore.—1 Tɩm. 6:8.

15-16. Wãn to la saam-bi-pogs nins sẽn nan pa kẽ kãadmã nafd neb a taabã? (Mark 10:29, 30)

¹⁵ F sã n bɩɩs zʋg-sõma la f paam minim bũmb kẽer wɛɛngẽ, tõe n sõng-f lame tɩ f wa tõog n tʋm tʋʋm sãnda. Ad bũmb kẽer f sẽn tõe n wa maane.

¹⁶ F tõe n yãka yam n pa kẽ kãadem tʋʋll ye. Saam-bi-pogs kẽer tũu a Zeezi saglgã n yãk yam n pa na n kẽ kãadem, baa nebã sã n pa nand pag sẽn pa kẽ kãadem bãmb babgẽ wã. (Mat. 19:10-12) Sãnda yɛl sẽn yaa to-to wã kɩtame tɩ b pa kẽ kãadem ye. Bãng-y t’a Zeova ne a Zeezi nanda kiris-neb nins sẽn pa kẽ kãadmã. Dũniyã gill zugu, saam-bi-pogs sẽn pa kẽ kãadem nafda b tigimsã neba. B sẽn nong neb a taabã la b get b yellã yĩnga, b lebga wa b ba-bi-pogs la b ma-rãmba.—Karm-y Mark 10:29, 30; 1 Tɩm. 5:2.

17. Wãn to la saam-bi-poak sẽn yaa bi-bɩɩg tõe n segl a meng n wa kẽes a meng zãng a Zeova tʋʋmdã pʋgẽ?

¹⁷ F tõe n wa kẽesa f meng zãng Wẽnnaam tʋʋmdã pʋgẽ. Dũniyã gill zugu, saam-bi-pogsã tʋmda wʋsg koɛɛgã mooneg pʋgẽ. (Yɩɩn. 68:11) Fo tõe n wa kẽesa f meng zãng Wẽnnaam tʋʋmdã pʋgẽ bɩ? Wala makre, n yɩ so-pakda, n sõngd n met siglgã roto, wall f yɩ Betɛllẽ tʋm-tʋmd bɩ? Pʋʋs bũmb ning f sẽn dat n wa maanã yĩnga. Sõs ne neb sẽn tõog n maan bũmb ning f sẽn magd n na n wa maanã, n bao n bãng fo-me sẽn tõe n maan dẽ to-to. Rẽ poor bɩ f mag n ges f sẽn na n maan dẽ to-to. F sã n tõog n kẽes f meng zãng a Zeova tʋʋmdã pʋgẽ, na n paka sor tɩ f tõog n maan bũmb wʋsgo.

18. Bõe yĩng tɩ saam-bi-poak segd n maag a yĩng n bao sɩd-sõngo? (Ges-y fotã me.)

¹⁸ F tõe n wa yãka yam n kẽ kãadem. Bũmb nins yell d sẽn gomã tõe n sõng-f lame tɩ f wa yɩ pʋg-sõngo. La f sã n wa rat n kẽ kãadem, yɩta sõma tɩ f maag f meng n bao sɩd-sõngo. Yaa yam-yãkr sẽn tar yõod wʋsgo. Tẽeg tɩ rao ning f sẽn na n kẽ kãadem ne wã na n lebga f zu-soaba. (Rom. 7:2; Efɛɛ. 5:23, 33) Woto wã, sok f  meng yaa: ‘Yaa kiris-ned tẽeb sẽn bɩ sɩda? A lʋɩɩsda tũudmã yɛl taoor bɩ? A yãkda yam sẽn yaa sõma bɩ? A sakd n deega a kongr bɩ? A nanda pagbã bɩ? A na n tõog n sõng-m lame tɩ m kell n tall zood sõma ne a Zeova, n ges m yell la a yɩ m zoa hakɩɩk sɩda? A tʋmda tʋʋm nins b sẽn kõt-a wã sõma bɩ? Wala makre, tʋʋm-bʋs la a tar tigingã pʋgẽ, la wãn to la a tʋmd tʋʋm-kãense?’ (Luk 16:10; 1 Tɩm. 5:8) La yaa vẽeneg tɩ f sã n dat n wa paam sɩd-sõngo, f segd n yɩɩ pʋg-sõngo.

19. Bõe yĩng tɩ b sẽn yeel tɩ pag yaa “sõangdã” yaa zu-zẽkre?

¹⁹ Biiblã yeelame tɩ pʋg-sõng yaa a sɩdã “sõangd sẽn zems ne-a.” (Sɩng. 2:18) B sẽn yeel woto wã paoogda pagã bɩ? Ayo! Sɩd-sɩda, b sẽn yeel tɩ pag yaa sõangdã yaa zu-zẽkre. Sɩd me, Biiblã wae n yetame t’a Zeova yaa “sõangda.” (Yɩɩn. 54:4; Ebre. 13:6) Yaa pag sã n teend a sɩdã la a yaa sõangd hakɩɩka. Wala makre a sɩdã sã n yãk yam zakã rãmb fãa yĩnga, a sõngd-a lame sẽn na yɩl t’a sẽn yãk yam ningã yãk nenga. Sẽn paase a sẽn nong a Zeova wã yĩnga, a modgdame t’a sɩdã tar yʋ-noogo. (Yel. 31:11, 12; 1 Tɩm. 3:11) F tõe n segla f meng n wa yɩ pʋg-sõngo, f sẽn na n modg n nong a Zeova, la f sõngd neb a taabã yãmb zakẽ wã la tigingã pʋgẽ.

20. Bõe la pag tõe n maan tɩ naf a zakã rãmba?

²⁰ F tõe n wa roga kamba. F sã n kẽ kãadem, foo ne f sɩdã tõe n doga kamba. (Yɩɩn. 127:3) Dẽnd yɩta sõma tɩ f reng n segl f menga. Bũmb nins yell d sẽn gom sõs-kãngã pʋgẽ wã tõe n sõng-f lame, f sã n wa kẽ kãadem n dog kamba. F sã n bɩɩsd nonglem, sõmblem la sũ-mare, na n wa sõngame tɩ y zakã rãmb sũur noome, tɩ f kambã yam gãe bãane, la b neẽ tɩ b nong-b lame.—Yel. 24:3.

21. D tagsg yaa wãn ne d saam-bi-pogsã, la bõe yĩnga? (Ges-y sebrã pipi neng fotã.)

²¹ Saam-bi-pogse, d nong-y lame, bũmb nins fãa y sẽn maand a Zeova la a nin-buiidã yĩngã yĩnga. (Ebre. 6:10) Yãmb modgdame n bɩɩsd zʋg-sõma la y zãmsd bũmb toor-toor sẽn nafd yãmb la neb a taabã, la y segend y meng beoog-daar yĩnga. Y tara yõod wʋsg a Zeova siglgã pʋgẽ!