YAA vẽeneg tɩ y sũur nooma ne kũun toor-toorã a Zeova sẽn kõ-dã. Wala makre, a sẽn kõ-d sor tɩ d tõe n yãk d sẽn na n dɩ kũun-kãens yõod to-to wã. Biiblã wilgame tɩ divẽ yaa Wẽnnaam kũuni, n yeel yaa: “Rɩɩb maana laad yĩnga, tɩ divẽ paasd vɩɩm noosem.” (Koɛ. 10:19; Yɩɩn. 104:15) La sãmbg kae tɩ y neeme tɩ kẽer tara zu-loees rãamã yũub wɛɛngẽ ye. Sẽn paase, dũniyã gill zugu, nebã tara tagsg toor-toor rãamã yũub wɛɛngẽ. Woto wã, bõe n tõe n sõng kiris-ned t’a bãng n yãk yam sẽn zems rãamã wɛɛngẽ?

D sã n wa segd n yãk yam, d segd n tũu Wẽnnaam saglsã, la d ra tũ d babgẽ wã nebã sẽn tagsd to-to wã ye. D sã n maand woto la d vɩɩmã na n yɩ noog n yɩɩda.

Tõe tɩ y gũus n gesame tɩ dũniyã gill zugu neb wʋsg wae n yũuda rãam, tɩ kẽer yũud wʋsgo. Tõe tɩ sãnda yũuda rãamã, a sẽn kõt-b sũ-noogã yĩnga. Kẽer yũuda b sẽn dat n yĩm b zu-loees yĩnga. Tẽns sãnda pʋsẽ, nebã geta ned sẽn tõe n yũ rãam wʋsg wa gãndaoogo.

Kiris-nebã yẽ tara sagl-sõma, d Naandã sẽn nong-dã sẽn kõ-do. Wala makre, a yeela tõnd tɩ rãamã yũ tɩ loogã wata ne zu-loe-kɛgemse. Tõe tɩ y karma Yel-bũn 23:29-35 wã sẽn bilgd ned sẽn yũ rãam manesem sẽn yaa to-to, la zu-loees nins rãamã sẽn wat ne wã. a A Dãniyɛll sẽn yaa kãsem-soab n be Eropã tẽega a vɩɩmã sẽn da yaa to-to nand t’a lebg kiris-nedã yell n yeel yaa: “Mam da minim n yũuda rãamã tɩ loogdẽ. Rẽ kɩtame tɩ mam yãk yam n maan bũmb kẽer tɩ pa yɩ sõma ye. M sã n mi n tẽeg bõn-kãens sãnda yelle, m sũurã ket n sãamdame.”

Wãn to la d tõe n yãk yam sẽn yaa sõma rãamã yũub wɛɛngẽ, n gil zu-loees nins rãamã yũ tɩ loogã sẽn wat ne wã? Yaa d sẽn na n tũud Wẽnnaam noyã d yam-yãkr la d sẽn maand fãa pʋgẽ.

Bɩ d ges Biiblã sẽn yet bũmb ning rãamã wɛɛngẽ, la bũmb ning sẽn kɩt tɩ kẽer yũudã.

Wẽnnaam Gomdã pa gɩdg rãamã yũ tɩ zemsã ye. Sɩd me, Biiblã sak n deegame tɩ rãam tõe n kõo ned sũ-noogo. A yeelame yaa: “Kẽng n tɩ rɩ f rɩɩbã ne kɩdengo, la f yũ f divẽ wã ne sũ-noogo.” (Koɛ. 9:7) A Zeezi yũu rãam wakat kẽere. Neb a taab sẽn maan sɩd ne a Zeova me yũu rãam.—Mat. 26:27-29; Luk 7:34; 1 Tɩm. 5:23.

La baa Wẽnnaam Gomdã sẽn pa gɩdg rãamã yũubã, a gɩdga rãamã yũ tɩ loogã. A yeela vẽeneg yaa: “Da yũ-y divẽ n tɩg ye.” (Efɛɛ. 5:18) A yetame meng tɩ “rã-yũud-kãasã . . . pa na n paam Wẽnnaam Rĩungã ye.” (1 Kor. 6:10) Yaa vẽeneg t’a Zeova gɩdga rãamã yũ tɩ loogã. Rẽnd d pa na n tikd d babgẽ wã nebã tagsg n yãkd yam rãamã wɛɛngẽ ye. D na n tikda Wẽnnaam noyã.

Neb kẽer yetame tɩ b tõe n yũu rãam wʋsg tɩ pa loog-b ye. La rẽ yaool n tõe n waa ne zu-loeese. Biiblã yetame tɩ ned ‘sã n yaa divẽ yamba,’ tõe n wa kɩtame t’a maan yel-wẽn-kãsenga, n sãam yẽ ne a Zeova zoodã. (Tɩt 2:3; Yel. 20:1) A Zeezi yeelame meng tɩ “rã-yũurã” tõe n kɩtame tɩ ned pa kẽ Wẽnnaam dũni-paalgã pʋgẽ ye. (Luk 21:34-36) Woto wã, bõe n tõe n sõng kiris-ned t’a gil rãamã yũ tɩ loogã bẽdsã?

D sã n tikd tõnd babgẽ wã nebã tagsg sẽn yaa a soab rãamã wɛɛngẽ wã n yãkd yam, tõe n waa ne yelle. Rɩɩbã la bõn-yũudlã wɛɛngẽ, kiris-nebã maanda sẽn noom a Zeova, tɩ rẽ yaa yam bũmbu. Biiblã tẽegda tõnd yaa: “Yãmb sã n dɩtẽ wall y sã n yũuda, wall y sẽn maand bũmb ning fãa, bɩ y maan fãa Wẽnnaam waoogr yĩnga.” (1 Kor. 10:31) Ad sogsg a wãna, la Biiblã sẽn yet rẽ wɛɛngẽ:

Mam yũuda rãamã sẽn na yɩl n wõneg m taabã bɩ? Yikr 23:2 yetame: “Fo pa segd n tũ kʋʋngã ye.” Vɛrse-kãngã pʋgẽ, a Zeova keoogda Israyɛll nebã tɩ b ra maan wa neb nins sẽn pa tat yẽ yamã ye. La kiris-nebã me segd n tũu no-kãngã rũndã-rũndã. D tagsgã la d yam-yãkrã rãamã wɛɛngẽ wã sã n tika neb a taabã sẽn get yɛlã to-to wã, bilf-bilfu d tõe n wa basa a Zeova noyã tũubu, tɩ sãam tõnd ne yẽ zoodã.—Rom. 12:2.

Mam yũuda rãam n na n wilg tɩ m yaa gãndaoog bɩ? Tẽns kẽer pʋsẽ, nebã wae n yũuda rãam, la b yũud wʋsgo, n getẽ tɩ pa wẽng ye. (1 Pɩy. 4:3) La ges-y 1 Korẽnt rãmb 16:13 sẽn sagend tõnd tɩ d maan bũmb ningã: “Ra gũs-y ye. Yals-y kãn-kãe tẽebã pʋgẽ. Kell-y n yɩ-y rapa. Lebg-y neb sẽn tar pãnga.” Rãam sɩd tõe n sõnga ned t’a paam raood bɩ? A bada. Rãam tõe n menesa ned yam nana-nana, n kɩt t’a pa le tõe n tags sõma n yãk yam n maan sẽn yaa tɩrg ye. Rẽnd rãam yũ tɩ loog pa wilgd tɩ ned tara raood ye. Wilgdame t’a tara pãn-komsem. Ezayi 28:7 wã goma ned sẽn kẽed moog rãam yĩng yelle, n yeel t’a langdame n pa tõe n maan sẽn yaa tɩrg ye.

Yaa a Zeova n kõt raood hakɩɩka. La rẽ baoodame tɩ d ra gũsi, la d yals kãn-kãe tẽebã pʋgẽ. (Yɩɩn. 18:32) D sã n dat n maan rẽ, d segd n gũusdame n gind zu-loeese, la d gũusdẽ tɩ d yam-yãkr toor-toorã ra wa sãam tõnd ne a Zeova zoodã ye. A Zeezi sẽn wa n be tẽngã zugã, a talla raood a woto buud tɩ neb wʋsg ra nand-a, b sẽn ne t’a yaa raood soaba, la ned sẽn maand sɩd ne a sũur fãa wã yĩnga.

 Mam yũuda rãam m sẽn dat n yĩm m zu-loeesã yĩng bɩ? Wẽnnaam vẽnega yɩɩn-gʋlsd a ye t’a yeel yaa: “Yɩɩrã sẽn wa n loog maamã, yãmb [a Zeova] belsa maam la y kɩt tɩ m yam gãand bãane.” (Yɩɩn. 94:19) Zu-loees sã n wa kɩt tɩ y maand yɩɩr bɩ y teeg a Zeova t’a bels-yã, la pa rãamã ye. Bũmb a ye d sẽn tõe n maan tɩ d yɩɩrã boog yaa d sẽn na n wae n pʋʋsd a Zeova. Sẽn paase, neb wʋsg yãame tɩ b sã n kos b zoa tẽeb sẽn bɩ saglse, tõe n sõng-b lame. Sɩd-sɩda, ned sã n yũud rãam a sẽn dat n yĩm a zu-loees yĩnga, tõe n kɩtame t’a pa le rat n maan sẽn yaa tɩrg ne a sũur fãa ye. (Ooze 4:11) A Dãniyɛll sẽn yaa saam-biig ning yell d sẽn zoe n gomã yeelame: “M da maanda yɩɩr la m ningd m meng taal hal tɩ namsd-ma. M da yũuda rãamã sẽn na yɩl tɩ m yɩɩrã booge, la rẽ waa ne zu-loees a taaba. Sãama maam ne m zo-rãmb kẽer zoodo, la kɩt tɩ m pa le nand m meng ye.” La bõe n sõng a Dãniyɛlle? A yeelame: “Mam bãngame tɩ yaa a Zeova n tõe n sõng maam, pa rãamã ye. Ne a Zeova sõngre, m wa n tõog welga m zu-loeesã.” Sɩd me, a Zeova segl n saame n na n sõng-do, baa d yellã sã n wõnda a pa tar tɩɩm.—Fili. 4:6, 7; 1 Pɩy. 5:7.

Yãmb sã n minim n yũuda rãam, y tõe n feesa y meng n ges y sã n pa segd n toeem y sẽn yũud to-to wã. Sok-y y meng yaa: ‘Mam zakã ned wall m zoa zoe n goma m sẽn yũud rãamã to-to wã yell bɩ?’ Sã n yaa woto, tõe tɩ y sẽn yũud rãamã to-to wã pa sõma, tɩ y pa miẽ ye. ‘M yũuda wʋsg masã n yɩɩd pĩndã bɩ?’ Ned sẽn yũud rãamã to-to wã sã n paasdẽ, tõe n dat n yeelame t’a lebgda rãamã yamba. ‘Yaa toog ne-m tɩ m maan rasem a wãn n pa yũ rãam bɩ?’ Sã n yaa woto, rẽnd rãamã yũub lebga minung ne-yã, wall y lebga rãamã yamba. Tõe tɩ rat n yeelame tɩ yaa tɩlɛ tɩ y paam logtor sõngre, n tõog n bas rãamã.

Rãamã yũub sẽn tõe n wa ne zu-loees wʋsgã yĩnga, kiris-neb kẽer yãka yam n pa na n tol n yũ rãam baa bilf ye. Sãnda yãka yam n pa yũud rãam, b sẽn pa nong rãamã  yĩnga. Y zoa ning sã n yãk yam a woto, y segd n saka a yam-yãkrã, n da sãbs-a ye.

Y tõe n wa getame tɩ yaa sõma tɩ y lugl noy y meng yĩnga. Kiris-ned tõe n yãka rãam sẽn zem to-to a sẽn pa segd n yũ tɩ looge. A leb n tõe n yãka a sẽn na n yũud wakat ninga, wala makre vugr semen fãa, wall a yũud bilf-bilf rɩɩbã sasa. Neb kẽer yãka rãam ning buud b sẽn tõe n yũ. Wala makre, sãnda yãka yam n na n yũud divẽ wall biyɛɛr bilfu, la tɩ b pa na n tol n yũ rã-toose, baa b sã n kalem-b ne bõn-yũudl a to ye. Ned sã n lugl noy a meng yĩng rãamã yũub wɛɛngẽ, tõe n yɩɩ nana t’a tũ no-kãense. Kiris-ned tẽeb sẽn bɩ sã n yãk yam yel-kãensã wɛɛngẽ n tũudẽ tɩ neb a taabã yaand-a, a pa segd n zoe yãnd ye.

Bũmb a to me d sẽn segd n ning d yamẽ yaa neb a taabã tagsgo. Rom dãmb 14:21 yetame: “Sẽn são yaa fo ra wãb nemd wall f yũ divẽ, bɩ n maan bũmb baa a ye sẽn kɩtd tɩ f saam-biig lak n lʋɩ ye.” Wãn to la y tõe n tũ sagl-kãngã? Wilgd-y tɩ y nonga y tẽed-n-taasã. Y sã n wa neẽ tɩ y sã n yũ rãam na n sãama ned sũuri, y sẽn nong a soabã pa na n kɩt tɩ y ra yũ, baa y sẽn tar sor n na n maan dẽ wã sɩda? Y sã n maand woto, y wilgdame tɩ y taabã yell pak-y lame, la tɩ y nand-b lame n baood b nafre, la pa y meng nafr ye.—1 Kor. 10:24.

Sẽn paase, goosneema wã tõe n yiisa noy rãamã yũub wɛɛngẽ. Kiris-nebã segd n tũu no-kãense. Wala makre b tõe n yãka yʋʋm takɩ tɩ ned sã n pa ta woto bɩ a pa tar sor n na n yũ rãam ye. B leb n tõe n gɩdgame tɩ ned ra yũ rãam n wẽn mobill wall masĩn sãnda ye.—Rom. 13:1-5.

A Zeova kõo tõnd bõn-sõma wʋsgo. Wala makre a naan-d lame tɩ d tõe n yãk d toorẽ yam bũmb nins d sẽn na n dɩ wall d sẽn na n yũ wã wɛɛngẽ. Bɩ d modg tɩ d yam-yãkr toor-toorã yɩ d saasẽ Ba wã noogo, tɩ wilg tɩ d sũur nooma ne lohorem ning a sẽn kõ-dã.