1. D sã n tags a Abrahaam tẽebã yelle, sok-bʋg la d tõe n sok d menga?

 BAA neb wʋsg sẽn zoe n wʋm tɩ b gomd a Abrahaam yellã, b pa mi bũmb wʋsg a zug ye. La yãmb mii bũmb wʋsg a Abrahaam zugu. Wala makre, y miime tɩ b boola a Abrahaam tɩ “neb nins fãa sẽn . . . yaa nin-tɩrs b tẽebã yĩngã ba.” (Rom. 4:11) Tõe tɩ y sokda y meng yaa: ‘M tõe n dɩka a Abrahaam togs-n-taar n tall a tẽebã buud bɩ?’ N-ye, y tõeeme.

2. Bõe yĩng tɩ tar yõod tɩ d zãms a Abrahaam kibarã? (Zak 2:22, 23)

² Bũmb a ye d sẽn tõe n maan n tall a Abrahaam tẽebã buudu, yaa d sẽn na n zãms a kibarã. A Abrahaam ra maanda bũmb ning fãa Wẽnnaam sẽn yeel t’a maanã. Wala makre, a sakame n yi tẽng ning a sẽn da be wã n kẽng tẽng sẽn zãre, la a zĩnd fu-rotẽ n kaoos yʋʋm wʋsgo. A sakame me n na n dɩk a bi-ribl-nongr a Izaak n maan maoong n kõ a Zeova. A Abrahaam maana bõn-kãensã fãa, a tẽebã sẽn da tar pãngã yĩnga. A tẽebã la a tʋʋm-tʋmdɩ wã kɩtame t’a ta Wẽnnaam yam, la a lebg a zoa. (Karm-y Zak 2:22, 23.) A Zeova ratame tɩ tõnd ned kam fãa paam bark a woto buudu. Rẽ n so t’a vẽneg a Poll ne a Zak tɩ b gom a Abrahaam yell Biiblã pʋgẽ. Bɩ d gom bũmb ning b sẽn yeel a Abrahaam zug tɩ be Rom dãmb sak 4 ne Zak sak a 2 pʋgẽ wã yelle. Sag-kãensã a yiibã fãa pʋgẽ, b togsa bũmb sẽn tar yõod wʋsg a Abrahaam zugu.

3. Biiblã vɛrse-bʋg goam la a Poll ne a Zak fãa lebs n togse?

³ A Poll ne a Zak fãa lebs n dɩka goam nins sẽn be Sɩngr 15:6 pʋgẽ wã. Be, b yeelame yaa: “A [Abrahaam] tẽe a Zeova, la a geelga rẽ wa tɩrlem yẽ yĩnga.” Ned sã n tat a Zeova yam, a getame t’a yaa tɩrga, n pa tar yell  ye. Ninsaal sẽn pa zems zãng n yaa yel-wẽn-maandã sẽn tõe n paam tɩ Wẽnnaam ges t’a pa tar taalã sɩd bee yamleoog wʋsgo. Sãmbg kae tɩ yãmb me ratame n yaa tɩrg Wẽnnaam nifẽ ye. Rẽ yaa bũmb sẽn tõe. Bɩ d bao n bãng bũmb ning sẽn kɩt t’a bool a Abrahaam tɩ nin-tɩrgã, la bũmb nins d sẽn segd n maan t’a ges tɩ d yaa tɩrsã.

4. Bõe n kɩt tɩ yaa toog tɩ ninsaalbã yɩ tɩrse?

⁴ Lɛtr ning tẽn-tʋmd a Poll sẽn gʋls n tool Rom kiris-nebã pʋgẽ, a yeelame tɩ ninsaalbã fãa yaa yel-wẽn-maandba. (Rom. 3:23) Woto wã, d maanda wãn n ta Wẽnnaam yam, t’a geelg-d wa nin-tɩrse, wall ned sẽn pa tar taale? Sẽn na yɩl n sõng kiris-nebã tɩ b paam sok-kãngã leoore, a Poll goma a Abrahaam mak-sõngã yelle.

5. Bõe la a Zeova tik n yeel t’a Abrahaam yaa nin-tɩrga? (Rom dãmbã 4:2-4)

⁵ Yaa a Abrahaam sẽn wa n be Kanaã tẽngẽ wã la a Zeova yeel t’a yaa tɩrga. Bõe yĩng t’a Zeova yeel t’a yaa tɩrga? Yɩɩ a Abrahaam sẽn da tũud a Moyiiz Tõogã sõma yĩng bɩ? Yaa vẽeneg tɩ pa woto ye. (Rom. 4:13) A Zeova sẽn yeel t’a Abrahaam yaa nin-tɩrgã, yɩɩ yʋʋm kobs-naas la zak poor la a yaool n kõ Israyɛll nebã Tõogã. Woto wã, bõe la a Zeova tik n yeel t’a Abrahaam yaa nin-tɩrga? A Zeova barkã yĩnga, a yeelame t’a Abrahaam yaa nin-tɩrg a tẽebã yĩnga.—Karm-y Rom dãmb 4:2-4.

6. Bõe n tõe n kɩt t’a Zeova ges tɩ yel-wẽn-maand yaa nin-tɩrga?

⁶ A Poll yeelame tɩ ned sã n tẽed Wẽnnaam, “b geelgda a tẽebã wa tɩrlem.” (Rom. 4:5) A Poll paasame yaa: “Yaa wa a Davɩɩd me sẽn wilg tɩ ned ning Wẽnnaam sẽn ges t’a yaa tɩrg tɩ pa tũ ne tʋʋmã tara sũ-noogã. A yeelame: ‘Sũ-noog rãmb la neb nins sẽn paam tɩ b kõ-b sugr b tʋʋm-wẽnsã yĩnga, la b lud b yel-wẽnã. Sũ-noog soab la ned ning a Zeova sẽn bas a yel-wẽnd taalã.’” (Rom. 4:6-8; Yɩɩn. 32:1, 2) Wẽnnaam kõta neb nins sẽn tẽed yẽ wã yel-wẽnã sugri. A kõt-b-la sugr zãng-zãnga, n pa le tẽegd b yel-wẽnã yell baa bilf ye. A getame tɩ nin-kãens yaa neb sẽn pa tar taal la nin-tɩrse, b tẽebã yĩnga.

7. Bõe yĩng tɩ d tõe n yeel tɩ neb nins sẽn maan sɩd ne Wẽnnaam pĩnd wẽndẽ wã yɩɩ nin-tɩrse?

⁷ Baa ne b sẽn yeel t’a Abrahaam, a Davɩɩd la wẽn-sakdb a taab yaa nin-tɩrsã, b ra ket n yaa yel-wẽn-maandba. La b tẽebã yĩnga, Wẽnnaam gesame tɩ b yaa neb sẽn pa tar taale, sẽn yɩɩd fãa, a sã n mak-b ne neb nins sẽn pa tũud-a wã. (Efɛɛ. 2:12) A Poll wilga vẽeneg a lɛtrã pʋgẽ tɩ sẽn na yɩl n paam Wẽnnaam zoodo, yaa tɩlɛ tɩ d tall tẽebo. Yɩɩ woto ne a Abrahaam la a Davɩɩde. Leb n yaa woto ne tõnd me.

8-9. Bõe la neb kẽer yeel a Poll ne a Zak sẽn gʋls bũmb ningã wɛɛngẽ tɩ pa zemse, la bõe yĩnga?

⁸ Yʋʋm kobs pʋgẽ, tũudmã taoor dãmb wẽe no-koɛɛm tẽebã ne tʋʋmã sẽn tũud taabã wɛɛngẽ. Tũudum taoor dãmb kẽer yetame tɩ sẽn na yɩl n paam fãagre, yaa f tẽ Zu-soab a Zeezi Kirist bala. Tõe tɩ y mi n wʋma b sẽn yeel yaa: “Tẽ a Zeezi, n paam fãagre.” Kẽer lebsd n dɩka a Poll goamã n yeel yaa: “Ned ning Wẽnnaam sẽn ges t’a yaa tɩrg  tɩ pa tũ ne tʋʋmã tara sũ-noogo.” (Rom. 4:6) La sãnda yetame tɩ f sã n dat n paam fãagre, f segd n kẽnd n kaagda zĩis nins b tũudmã neb sẽn get tɩ yaa zĩ-sõamyã wã, la f tʋmd tʋʋm-sõma. Tõe tɩ b tikda bũmb ning sẽn be Zak 2:24 n yet woto. Be, b yetame yaa: “Yaa tʋʋm la b tikd n yeel tɩ ned yaa tɩrga, la pa tẽeb bal ye.”

⁹ Nebã tagsg sẽn yaa toor-toor yel-kãngã wɛɛngẽ wã kɩtame tɩ Biibl-mitb kẽer tagsdẽ t’a Poll ne a Zak ra kɩɩsda taaba, bũmb ning d sẽn tog n maan n ta Wẽnnaam yamã wɛɛngẽ. Tũudmã taoor dãmb kẽer yetame t’a Poll wilgame tɩ ned tõe n yɩɩ tɩrg ne tẽeb maasem bal tɩ pa tũ ne tʋʋma, t’a Zak wilg tɩ sẽn na yɩl n ta Wẽnnaam yam, yaa tɩlɛ tɩ tʋʋm naage. Ned a ye sẽn zãmsd neb tũudmã yɛl yeelame yaa: “A Zak ra pa wʋmd bũmb ning sẽn kɩt t’a Poll yeel tɩ f sã n dat n yɩ tɩrga, yaa ne tẽeb bal tɩ pa tũ ne tʋʋmã võor ye.” La yaa a Zeova n vẽneg a Poll ne a Zak fãa tɩ b gʋls bũmb ning b sẽn yeelã. (2 Tɩm. 3:16) Rẽnd bũmb segd n beeme, tɩ d tõe n tik n wʋm bũmb ning b sẽn yeelã võore. Yaa d sẽn na n bao n bãng bũmb ning yell b ned kam fãa sẽn da gomdã.

10. Yaa bõe “tʋʋm” yell la a Poll ra gomd n yɩɩda? (Rom dãmbã 3:21, 28) (Ges-y fotã me.)

¹⁰ Yaa bõe “tʋʋm” yell la a Poll sẽn gom Rom dãmb sak a 3 ne a 4 pʋgẽ wã? Bũmb ning yell a sẽn da gomd n tɩ yɩɩdã, yaa ‘tõogã sẽn dat tɩ d tʋm tʋʋm ninsã,’ rat n yeel t’a Moyiiz Tõogã Wẽnnaam sẽn kõ Sinayi tãngã zugã. (Karm-y Rom dãmb 3:21, 28.) Wõnda a Poll wakatẽ wã, kiris-neb kẽer sẽn yaa Zʋɩf-rãmb ra ket n tẽedame tɩ yaa tɩlɛ tɩ  b tũud a Moyiiz Tõogã. Rẽ n so t’a Poll tũnug ne a Abrahaam kibarã n wilg tɩ sẽn na yɩl n yɩ tɩrg Wẽnnaam nifẽ, pa tũud ne ‘tõogã sẽn dat tɩ d tʋm tʋʋm ninsã’ ye. Tũuda ne tẽebo. Woto kengda d raoodo, bala d tõe n basa d yam tɩ d sã n tẽed Wẽnnaam ne Kiristã, d tõe n taa Wẽnnaam yam.

11. Yaa ‘tʋʋm-bʋs’ yell la a Zak ra gomda?

¹¹ “Tʋʋm” nins yell b sẽn gom Zak sak a 2 pʋgẽ wã pa tʋʋm nins a Poll sẽn gomã, rat n yeel tɩ ‘tõogã sẽn dat tɩ d tʋm tʋʋm ninsã’ ye. A Zak gomda tʋʋm nins kiris-nebã sẽn tʋmd daar fãa wã yelle. Tʋʋm-kãens wilgda kiris-ned sã n sɩd tẽeda Wẽnnaam bɩ a pa tẽeda. D ges bũmb a yiib yell a Zak sẽn gome.

12. Bõe la a Zak yeel tɩ wilgdẽ tɩ tẽeb ne tʋʋm tũuda taaba? (Ges-y fotã me.)

¹² Pipi, a Zak wilgame tɩ kiris-nebã pa tog n bakd neb n sõngdẽ ye. A rɩka makr n gom ned sẽn maan arzɛk soab neere, la a paoog naong soab yelle. A Zak wilgame tɩ nin-kãng tõe n yetame t’a tara tẽebo, la a tʋʋm-tʋmdɩ wã pa wilgd rẽ ye. (Zak 2:1-5, 9) Yiibu, a Zak goma ned sẽn yã ‘saam-bi-raoog wall saam-bi-poak sẽn pa tar fuug la sẽn pa tõe n paam dɩɩb tɩ sek-a’ n pa maan bũmb takɩ n sõng-a yelle. Baa nin-kãng sã n yetẽ t’a tara tẽebo, a pa wilgd rẽ ne a tʋʋm-tʋmdɩ wã ye. Rẽnd a tẽebã pa tar yõod ye. A Zak paasame: “Tẽeb sã n pa lagem ne tʋʋma, a yaa kɩɩnga.”—Zak 2:14-17.

13. Mak-bʋg la a Zak rɩk sẽn na yɩl n wilg tɩ d tẽebã segd n lagma ne tʋʋma? (Zak 2:25, 26)

¹³ A Zak goma a Rahaab sẽn wilg ne a tʋʋm-tʋmdɩ wã ta tara tẽebã yelle. (Karm-y Zak 2:25, 26.) A Rahaab wʋmame tɩ b gomd a Zeova yelle, n kɩs  sɩd t’a Zeova sõngda Israyɛll nebã. (Zoz. 2:9-11) A wilga ne a tʋʋm-tʋmdɩ wã t’a tara tẽebo. A kogla Israyɛll tẽn-gũusdb a yiibã tɩ b pa paam-b n kʋ ye. Rẽ kɩtame tɩ b yeel tɩ pʋg-kãngã sẽn pa zems zãngã, la sẽn pa Israyɛll nedã yaa tɩrga, wa sẽn yɩ to-to ne a Abrahaamã. A kibarã wilgdame tɩ tara yõod tɩ d tẽebã lagem ne tʋʋma.

14. Bõe n wilgd t’a Poll ne a Zak goamã pa kɩɩsd taaba?

¹⁴ Bũmb ning yell a Poll ne a Zak sẽn gom tẽebã la tʋʋmã wɛɛngẽ wã yaa toor-toore. A Poll ra wilgda kiris-neb nins sẽn da yaa Zʋɩf-rãmbã t’a Moyiiz Tõogã tũub pa tõe n kɩt tɩ b ta Wẽnnaam yam ye. La a Zak ra wilgdame tɩ kiris-nebã fãa segd n maanda b taabã neere, tɩ wilg tɩ b tara tẽebo.

15. Bõe ne bõe la d tõe n maan n wilg ne d tʋʋmã tɩ d tara tẽebo? (Ges-y fotã me.)

¹⁵ A Zeova pa yeel tɩ d sã n dat n ta a yam, d segd n maana bũmb ning a Abrahaam sẽn maanã takɩ ye. Sɩd me, bũmb toor-toor la d tõe n maane, n wilg ne d tʋʋmã tɩ d tara tẽebo. D tõe n deega neb nins sẽn nan wa tõnd tigingã pʋgẽ wã sãando, d tõe n sõnga d tẽed-n-taas nins sẽn dat sõngrã, la d maan d zakã rãmb neere. Woto fãa yaa bũmb sẽn tat Wẽnnaam yam, t’a na n ning barka. (Rom. 15:7; 1 Tɩm. 5:4, 8; 1 Zã 3:18) Sẽn yɩɩd fãa, tʋʋm-sõng sẽn wilgd tɩ d tara tẽebo, yaa d sẽn na n moond koɛɛgã ne yẽesem. (1 Tɩm. 4:16) Tõnd ned kam fãa tõe n wilga ne a tʋʋm-tʋmdɩ t’a kɩsa sɩd tɩ bũmb nins fãa a Zeova sẽn pʋlmã na n pidsame, la t’a noyã n yaa sõma n  yɩɩda. D sã n maand woto, d tõe n basa d yam tɩ Wẽnnaam na n geelg-d-la wa nin-tɩrse, la a bool-d t’a zo-rãmba.

16. Bõe la a Abrahaam da saagd n na n wa paame, n da tẽed rẽ ne a sũur fãa?

¹⁶ Rom dãmb sak a 4 wilgda bũmb a to a Abrahaam kibarã sẽn tõe n sõng tõnd tɩ d bãnge. Yaa tɩ saagr tara yõod wʋsgo. A Zeova ra pʋlmame tɩ “buud wʋsg” na n paama bark a Abrahaam maasem yĩnga. Mams-y n ges-y bũmb ning a Abrahaam sẽn da saagd n na n wa paamã sẽn be yamleoog to-to! (Sɩng. 12:3; 15:5; 17:4; Rom. 4:17) La a Abrahaam wa n kolga yʋʋm koabga, t’a Saara kolg yʋʋm pis-wɛ tɩ biig ning Wẽnnaam sẽn pʋlmã ket n nan pa rog ye. Ninsaal nifẽ, a Abrahaam ne a Saara ra pa le tõe n paam biig ye. Ra pa nana ne a Abrahaam ye. Baasgo, “a ra kɩsa sɩd t’a na n yɩɩ buud wʋsg ba, baa sẽn da wõnd rẽ pa tõe wã.” (Rom. 4:18, 19) A sẽn da saagd bũmb ningã wa n pidsame. A wa n doga a Izaake, biig ning a sẽn da sɩng n gũud ne a sũur fãa wã.—Rom. 4:20-22.

17. Bõe n wilgd tɩ d tõe n paamame tɩ Wẽnnaam geelg-d wa tɩrse, n bool-d t’a zo-rãmba?

¹⁷ Tõnd me tõe n taa Wẽnnaam yam, n paam t’a geelg-d wa nin-tɩrse, la a bool-d t’a zo-rãmb wa a Abrahaam. Sɩd me, a Poll goma rẽ yell n yeel yaa: “Goam nins sẽn yeel tɩ ‘b geelga a [Abrahaam] tẽebã wa tɩrlem yẽ yĩngã’ pa gʋls yẽ yĩng bal ye. La yaa tõnd yĩng me. Wẽnnaam na n geelga tõnd tẽebã wa tɩrlem, d sẽn tẽed a sẽn vʋʋg tõnd Zu-soab a Zeezi n yiis kũ-rãmb sʋkã yĩnga.” (Rom. 4:23, 24) D segd n dɩka a Abrahaam togs-n-taar n tall tẽebo, n tʋm tɩ zems ne bũmb nins d sẽn tẽedã, la d kɩs sɩd t’a Zeova sẽn pʋlem bũmb ninsã na n pidsame. A Poll kell n goma d sẽn saagd n na n wa paam bũmb ningã yell Rom dãmb sak a 5 wã pʋgẽ. Yaa rẽ yell la d na n gom sõsg ning sẽn pʋgdã pʋgẽ.