Yãmb karma Gũusg Gasg nins b sẽn yiis rõandã wã sõma bɩ? Bɩ y ges y sã n tõe n leoka sogs nins sẽn pʋgdã:

B sã n yeel tɩ y “maneg y yamã,” rat n yeelame tɩ bõe? (Rom. 12:2)

Woto pa rat n yeel tɩ d tʋmd tʋʋm-sõma bal ye. D segd n feesa d meng sõma n bãng d sẽn sɩd yaa ned ning buudã, la d sak n toeem sẽn na yɩl n ta a Zeova yam sõma.—w23.01, s.n. a 8-9.

Wãn to la d tõe n tall tagsg sẽn zems dũniyã yɛlã wɛɛngẽ?

D maagda d yĩng n get dũniyã yɛlã sẽn pidsd Biiblã bãngr-goamã to-to wã. D sã n wa gomd Biiblã bãngr-goam pidsg yelle, d pa togsd d meng tagsa ye. D sẽn yetã segd n tika a Zeova siglgã sẽn yeelã zugu. (1 Kor. 1:10)—w23.02, s.n. 16.

Welg-bʋg n be a Zeezi lisgã ne a karen-biisã lisgã sʋka?

A Zeezi roga buud a Zeova sẽn welg toor pʋgẽ. Ra pa tɩlɛ t’a rɩk a meng n kõ a Zeova wa tõnd ye. A ra yaa ned sẽn zems zãnga, n pa maand yel-wẽnd ye. Ra pa tɩlɛ t’a tek yam n kos sugr yel-wẽnd yĩng ye.—w23.03, s.n. a 5.

Bõe la d tõe n maan tɩ neb a taabã me paamd n leokd tigissã sasa?

D tõe n leokda koɛɛg-koɛɛga, tɩ neb a taabã me paamd n leokdẽ. D pa segd n gom bũmb wʋsg yell me ye. Woto neb a taabã na n tara b sẽn na n yeele.—w23.04, s.n. 23.

“Sõmblmã sor” b sẽn gom a yell Ezayi 35:8 pʋgẽ wã yaa bõe?

Pĩnd wẽndẽ wã, a ra makda sor ning Zʋɩf-rãmbã sẽn na n tũ n yi Babilon n leb b ba-yirã. La rũndã-rũndã yẽ? Yʋʋm kobs sẽn deng yʋʋmd 1919 wã, b manega sorã. Wala makre, b lebga Biiblã, la b ẽnpirim Biibl-dãmb wʋsgo. Wẽnnaam nin-buiidã sẽn zemsd taab wa b zoe n bee arzãnã pʋgẽ wã kẽnda “sõmblmã sor” zugu, n na n wa paam bark nins Wẽnnaam Rĩungã sẽn na n wa ne wã.—w23.05, s.n. 15-19.

Yel-bũn sak a 9 wã kõta sagls pagb a yiib wɛɛngẽ. Pʋg-kãens makda bõe?

Yel-bũn sebrã gomda “pʋg-yalem” sẽn boond neba, tɩ sẽn sakd-bã na n sig “Yaoogã” pʋgẽ yelle. A leb n gomda “yam hakɩɩk” b sẽn mak ne pag yelle, tɩ sẽn sakd-b a boollã na n ‘kẽn bãngrã sor zugu,’ n wa paam vɩɩm. (Yel. 9:1, 6, 13, 18)—w23.06, s.n. 22-24.

Wãn to la a Zeova manesem sẽn yɩ to-to ne a Lotã wilgd t’a yaa sik-m-meng soab la nimbãan-zoɛta?

A Zeova yeela a Lot t’a zoe n yi Sodom n tees tãensẽ wã. A Lot sẽn kos n na n tɩ soond Zowaarã, a Zeova sakame.—w23.07, s.n. 21.

Bõe la pag tõe n maane, a sɩdã sã n get yoob yɛla?

Pagã segd n tẽegame tɩ pa yẽ yell ye. A segd n paasda yẽ ne a Zeova zoodã pãnga, la a bʋgsd Biiblã kibay sẽn gomd pagb sẽn da tar sũ-sãams n pʋʋs a Zeova t’a bels-b yell zutu. A tõe n sõnga a sɩdã t’a gũus ne bũmb sẽn tõe n wa kɩt t’a ges yoob yɛla.—w23.08, s.n. 14-17.

Ned sã n wa rat n wẽ no-koeemd ne-d bũmb d sẽn tẽed wɛɛngẽ, wãn to la yam-vẽenemã tõe n sõng-d tɩ d leok ne bʋgsem?

D segd n tẽegame t’a sokrã bɩ a gomdã tõe n sõnga tõnd tɩ d bãng a tagsg wall bũmb ning sẽn tar yõod ne-a wã. Rẽ tõe n sõng-d lame tɩ d leok ne bʋgsem.—w23.09, s.n. 17.

Yam-bʋg la d tõe n dɩk a Maari nengẽ raoodã tallg wɛɛngẽ?

A Maari sẽn bãng tɩ yẽ n na n dog Mesi wã, a kosa sõngr n paam raoodo. A Gabriyɛll ne a Elizabɛt tika Gʋls-sõamyã n keng a Maari raoodo. Tõnd me tõe n paamame tɩ d tẽed-n-taasã keng d raoodo.—w23.10, s.n. 15.

Wãn to la a Zeova tõe n leok d pʋʋsgo?

A Zeova pʋlmame t’a na n kelga d pʋʋsgã, la a get d sẽn kot bũmb ninsã sã n zemsa ne a raabã. (Zer. 29:12) Neb tõe n pʋʋsd n kota bũmb sẽn wõnd taaba, t’a Zeova leok ne manesem toor-toore. La a na n sõng-d-la wakat fãa.—w23.11, s.n. 21-22.

Rom dãmb 5:2 goma kiris-nebã sẽn “gũud” bũmb ningã yelle. Bõe yĩng tɩ b le gomd saagr yell vɛrse a 4 pʋgẽ?

Ned sã n wʋm koe-noogã, a tõe n saagdame n na n wa vɩɩmd arzãnã pʋgẽ tẽngã zugu. La a sã n seg zu-loees n tõog toogo, n neẽ t’a tata Wẽnnaam yam, a saagrã pãng paasdame.—w23.12, s.n. 12-13.