1-2. a) Bõe yĩng tɩ d sẽn maood ne zu-loeesã pa ling-du? b) Bõe yell la d na n gom sõs-kãngã pʋgẽ?

 TÕND sẽn yaa a Zeova nin-buiidã, d sẽn maood ne zu-loeesã pa ling-d ye. D miime tɩ Biiblã yetame tɩ “tõnd segd n paama namsg wʋsg n yaool n kẽ Wẽnnaam Rĩungã pʋgẽ.” (Tʋʋ. 14:22) D miime me tɩ sã n pa Wẽnnaam dũni-paalgã pʋgẽ, d zu-loees kẽer pa na n tol n sa ye. Sɩd me, dũni-paalgã pʋgẽ, “kũum pa na n le zĩndi, sũ-sãanga, yãbr wall toog pa na n le zĩnd ye.”—Vẽn. 21:4.

² A Zeova pa kɩt tɩ zu-loeesã pa tõe n paam tõnd ye. La a sõngd-d lame tɩ d tõogd toogo. Tẽeg-y bũmb ning tẽn-tʋmd a Poll sẽn yeel Rom kiris-nebã. A reng n togsa zu-loees yẽ ne a tẽed-n-taasã sẽn da maood ne. Rẽ poore, a yeelame yaa: “Tõnd paamda tõogr hakɩɩk bõn-kãensã fãa pʋsẽ, soab ning sẽn nong tõndã maasem yĩnga.” (Rom. 8:35-37) Woto rat n yeelame t’a Zeova tõe n sõnga tõnd tɩ d paam tõogre, baa d sã n maooda ne zu-loeese. Bɩ d ges a Zeova sẽn sõng a Zozɛf to-to, la a sẽn tõe n sõng tõnd me to-to.

3. Bõe n tiig n toeem a Zozɛf vɩɩmã pʋgẽ?

³ A Zakoob wilga vẽeneg t’a ra nonga a biig a Zozɛf hal wʋsgo. (Sɩng. 37:3, 4) Rẽ kɩtame t’a kom-dibli a taabã ra maand sũ-kiir ne b yaoã. B sẽn wa n paam segbã, b yõka a Zozɛf n koos ne Madiyã neb sẽn da yaa lɛɛbdba. Lɛɛbdb-kãens talla a Zozɛf n maan kɩlo kobs n kẽng Ezɩpt n le tɩ koos-a. So-kãnga, yaa a Farawõ soda-naab a  Potifaar n da a Zozɛfe. A Zozɛf vɩɩmã tiig n toeema zĩig pʋgẽ. A ra yaa a ba wã bi-nongr meng-menga, la masã a lebga yamb Ezɩpt tẽngẽ wã.—Sɩng. 39:1.

4. Zu-loe-bʋs la d tõe n wa maood ne, tɩ wõnd a Zozɛf zu-loeesã?

⁴ Biiblã yetame tɩ ‘yel-beed paamda ned buud fãa.’ (Koɛ. 9:11) Wakat kẽere, tõnd me maooda ne zu-loees sẽn “paamd ninsaalbã.” (1 Kor. 10:13) Bɩ tõeeme me tɩ d sẽn namsdã, yaa d sẽn yaa a Zeezi karen-biig yĩnga. Wala makre, b tõe n yaanda tõndo, n kɩɩsd tõndo, wall n pʋd n namsd tõnd d tũudmã yĩnga. (2 Tɩm. 3:12) Sẽn wa n yaa zu-loɛɛg ning fãa la y maood ne, a Zeova tõe n sõng-y lame tɩ y paam tõogre. Bõe la a maan n sõng a Zozɛfe?

5. Bõe la a Potifaar bãng a Zozɛf zugu? (Sɩngre 39:2-6)

⁵ Karm-y Sɩngr 39:2-6. A Potifaar yãame t’a Zozɛf ra yaa bi-bɩɩg sẽn tar yam wʋsgo, la sẽn tʋmd ne a sũur fãa. A ra mii bũmb ning sẽn kɩt t’a Zozɛf yaa woto wã. A Potifaar yãame t’a Zozɛf sã n dat n maan bũmbu, “Sẽn-Ka-Saab kɩtdame t’a tõogdẽ.” b Tarẽ-n-tarẽ, a Potifaar wa n kɩtame t’a Zozɛf lebg a sõangd meng-menga. A yãka a Zozɛf t’a na n get a zakã bũmb fãa yelle. Rẽ kɩtame t’a Potifaar paoongã ra tar paasgo.

6. Tõe tɩ yaa bõe la a Zozɛf ra rat n tɩ yɩɩda?

⁶ Ning-y y meng a Zozɛf zĩigẽ. Bõe la a ra rat n tɩ yɩɩda? Yaa a Potifaar ges t’a tʋmda sõma la a keo-a bɩ? Tõe t’a Zozɛf sẽn da rat n tɩ yɩɩda, yaa b bas-a t’a lebg n kuil a ba-yirã. Baa ne b sẽn da kõ-a sor t’a tõe n yãk yam n maan bũmb kẽerã, a ra ket n yaa yamba, n be a zu-soab a Potifaar sẽn da pʋʋsd wẽn-faadã zakẽ. La a Zeova pa kɩt t’a Potifaar bas a Zozɛf t’a loog ye. A Zozɛf zu-loeesã pʋd n wa n paasame.

7. Bõe n wilgd t’a Zozɛf zu-loɛɛgã ra tara kengre? (Sɩngre 39:14, 15)

⁷ Wa Sɩngr sak 39 wã sẽn wilgdã, a Potifaar pagã ra rata a Zozɛfe. A baoo  naoor wʋsg sẽn na yɩl t’a Zozɛf gãand-a. La wakat fãa, a Zozɛf ra zãgsdame. Baasgo, a sũurã wa n yika wʋsg ne a Zozɛfe, t’a rõd-a t’a baoome n na n yõg-a. (Karm-y Sɩngr 39:14, 15.) A Potifaar sẽn wʋm rẽ wã, a kɩtame tɩ b kẽes a Zozɛf bãens roogo, t’a pa be n kaoos yʋʋma. (Sɩng. 39:19, 20) Bãensã roogã ra yaa wãn to? Ebre gom-bil ning a Zozɛf sẽn pʋd tɩ ‘bi-bees roogã’ võor tõe n yɩɩ “bulga,” bɩ “boko,” tɩ wilgdẽ tɩ b sẽn kẽes-a zĩig ningã tog n da yaa lika, la t’a tog n da tagsdame tɩ tɩɩm kae ye. (Sɩng. 40:15, MN, notã.) Sẽn paase, Biiblã wilgame tɩ wakat n zĩnd tɩ b ra balg a Zozɛf naoã ne bãense, la b sog a yublã ne kutu. (Yɩɩn. 105:17, 18) A Zozɛf zu-loɛɛgã ra tara kengre. Sɩngrẽ wã, a ra yaa yamb b sẽn nande, la a wa n lebga nimbãan-neda, n be bãens roogẽ n namsdẽ.

8. Baa y zu-loɛɛgã sã n tar kengre, y tõe n basa y yam ne bõe?

⁸ Yãmb zoe n paama zu-loɛɛga, n pʋʋs a Zeova n kos sõngre, tɩ baa ne rẽ bɩ zu-loɛɛgã tar kengr bɩ? Tõe n wa yɩɩ woto. A Zeova pa kɩt t’a Sʋɩtãan dũniyã zu-loeesã pa tat tõnd ye. (1 Zã 5:19) Baa ne rẽ, y tõe n basa y yam t’a nee yɛl nins fãa sẽn paamd yãmbã, la tɩ y yell pak-a lame. (Mat. 10:29-31; 1 Pɩy. 5:6, 7) A pʋlmame yaa: “Mam pa na n loog n bas foom a bada, la m pa na n tol n daag-f n bas ye.” (Ebre. 13:5) A Zeova tõe n sõng-y lame tɩ y tõog toogo, baa sã n wõnda y yellã ka tar tɩɩm ye. Bɩ d ges sẽn yɩ to-to ne a Zozɛfe.

9. Bõe n wilgd t’a Zeova ra bee ne a Zozɛfe, b sẽn wa n pag-a bãens roogã? (Sɩngre 39:21-23)

⁹ Karm-y Sɩngr 39:21-23. Baa ne b sẽn da pag a Zozɛf bãens roog tɩ yɛlã pa nana ne-a wã, a Zeova sõng-a lame t’a paam tõogre. Wãn to? A Zozɛf wa n paamame tɩ bi-beesã roog gũudbã naab kɩs-a sɩd la a nand-a, wa sẽn da yaa to-to ne a Potifaarã. Rẽ poore, bi-beesã roog gũudbã naab wa n yãka a Zozɛf tɩ yaa yẽ n get bi-bees a taabã yelle. Biiblã pʋd n yeelame tɩ “bi-bees roog gũudbã naab rag n ka leb n get a Zozɛf sẽn maand bũmb ningã baa yembr yell yɛs ye.” A Zozɛf ra paamame masã n tʋmd tʋʋmd sẽn kõt-a sũ-noogo. Sɩd yɩɩ toeeng sẽn ling-a! Maana wãn tɩ yamb b sẽn dõd t’a rat n yõga soda-naab pag wa lebg ned sẽn tar tʋʋmd sẽn tar yõod woto? D tõe n yeelame bal tɩ yaa a Zeova nugu. Sɩd me, Sɩngr 39:23 yetame yaa: “Sẽn-Ka-Saab rag n bee ne a Zozɛfe. Sẽn-Ka-Saab kɩtame t’a Zozɛf paamd tõogr ne bũmb nins fãa a sẽn maandã.”

10. Wilg-y bũmb ning sẽn kɩt t’a Zozɛf ra tõe n tags t’a pa paamd tõogr bũmb fãa pʋgẽ wã.

¹⁰ Leb-y n ning-y y meng a Zozɛf zĩigẽ. B sẽn dõd-a n pag-a bãens roogã poore, yãmb tagsdame t’a ra tẽedame t’a paamda tõogr bũmb fãa pʋgẽ bɩ? Bõe la a Zozɛf da rat n tɩ yɩɩda? Yaa a paam tɩ bãensã roog gũudbã naab nand-a bɩ? Tõe t’a sẽn da rat yaa b yiis-a bãensã roogẽ, t’a le paam a menga. A pʋd n kosa ned a ye b sẽn da na n yiis bãensã roogẽ t’a gom ne a Farawõ sẽn na yɩl tɩ yẽ me paam n yi bãensã roogẽ. (Sɩng. 40:14) La b sẽn yiis raoã, a pa tɩ gom ne a Farawõ ye. Rẽ kɩtame t’a Zozɛf pa bãensã roogẽ n kaoos yʋʋm a yiib n paase. (Sɩng. 40:23; 41:1, 14) Baa ne rẽ, a Zeova kell n sõnga a Zozɛf t’a paam tõogre. Wãn to?

11. Bõe la a Zeova sõng a Zozɛf t’a tõog n maane, la wãn to la rẽ sõng-a t’a tõog n pids a Zeova raabã?

¹¹ A Zozɛf sẽn wa n ket bãens roogẽ  wã, a Zeova kɩtame t’a Farawõ sẽn yaa Ezɩpt rĩmã zãms zãmsd a yiib sẽn da namsd-a wʋsgo. A Farawõ da rata ne a sũur fãa n bãng zãmsdã võore. A sẽn wa n bãng t’a Zozɛf tõe n bilga a zãmsdã võorã, a tʋmame tɩ b tɩ tall-a n wa. Ne a Zeova sõngre, a Zozɛf tõog n bilga a Farawõ a zãmsdã võore. A Farawõ sũurã yɩɩ noog ne a Zozɛf sẽn yeel-a t’a maan bũmb ningã. A sẽn bãng t’a Zeova ra bee ne a Zozɛfã, a yãk-a lame t’a na n lʋɩ taoor n ges rɩɩbã yell Ezɩpt soolmã fãa pʋgẽ. (Sɩng. 41:38, 41-44) Rẽ poore, kom-kãseng n zĩnd Ezɩpt la Kanaã sẽn yaa tẽng ning a Zozɛf zakã rãmb sẽn da beẽ wã. Masã, a Zozɛf paamame n tõe n kogl a zakã rãmba, tɩ buud ning pʋgẽ Mesi wã sẽn na n dogã ra menem ye.

12. Bõe la a Zeova maan n sõng a Zozɛf t’a paam tõogr a sẽn da maandã fãa pʋgẽ?

¹² Tags-y n ges-y bũmb nins fãa sẽn maan a Zozɛf vɩɩmã pʋgẽ hal tɩ ling-a wã! Ãnd n kɩt t’a Potifaar wa nand a Zozɛfe, baa ne a sẽn da yaa yamb balã? Ãnd n kɩt tɩ bãensã roog gũudbã naab sũur yɩ noog ne a Zozɛfe, baa ne a sẽn da yaa nimbãan-ned n be bãens roogẽ n namsdẽ wã? Ãnd n kɩt t’a Farawõ zãms zãmsdã sẽn nams-a wʋsgã, la a kɩt t’a Zozɛf tõog n bilg-a a zãmsdã võore? Ãnd n yɩ sabab t’a Farawõ yãk a Zozɛf tɩ yaa yẽ n na n ges rɩɩbã yell Ezɩpt soolmã fãa pʋgẽ? (Sɩng. 45:5) Yaa vẽeneg tɩ yaa a Zeova n kɩt t’a Zozɛf ra paamd tõogr a sẽn da maandã fãa pʋgẽ. A Zeova kɩtame t’a Zozɛf ba-biisã mag-wẽngã lebg bũmb sẽn sõng t’a raabã paam pidsgu.

13. A Zeova tũnugda ne bũmb nins fãa sẽn paamd tõndã n pidsd a raabã bɩ? Wilg-y y leoorã võore.

¹³ A Zozɛf kibarã wilgda tõnd bõe? A Zeova sõngda tõnd d zu-loɛɛg buud fãa pʋgẽ bɩ? Yẽ n wẽnd yɛlã d vɩɩmã pʋgẽ sẽn na yɩl n tũnug ne yel-beed nins sẽn paamd tõndã n pids a raabã bɩ? Ayo, Biiblã pa yet tɩ yaa woto ye. (Koɛ. 8:9; 9:11) Sẽn paase, d miime tɩ d sã n wa maood ne zu-loeese, a neeme, la a wʋmda d sẽn kelemd n kot sõngrã. (Yɩɩn. 34:15; 55:22; Eza. 59:1) Sẽn yɩɩd  fãa, a Zeova tõe n sõng-d lame tɩ d tõog toog d zu-loeesã sasa. Wãn to?

14. D sã n wa maood ne zu-loeese, wãn to la a Zeova sõngd tõndo?

¹⁴ Bũmb a ye a Zeova sẽn maand n sõngd tõnd yaa a sẽn teend tõnd la a kengd d raoodo, d sẽn wat n dat sõngr wakatã. (2 Kor. 1:3, 4) Yɩɩ woto ne Tirkmenistã saam-biig a ye yʋʋr sẽn boond t’a Eziz. B kao-a-la bʋʋd n ning-a taal a tũudmã yĩnga, n kẽes-a bãens roog yʋʋm a yiibu. A yeelame yaa: “Mam zu-loeesã sɩngrẽ, saam-biig a ye wilga maam Ezayi 30:15, MN wã. Be, b yetame: ‘Yaa y sã n kell n pa sɩɩ la y teeg maam, la y na n paam pãnga.’ Vɛrse wã sõnga maam tɩ m kell pa sɩɩ la m teeg a Zeova bũmb fãa pʋgẽ. Mam sẽn bʋgs a zugã sõnga maam wakat nins fãa m sẽn zĩnd bãens roogẽ wã.” Y ket n tẽra wakat y vɩɩmã pʋgẽ, y sẽn da rat teelg la sõngr n tɩ yɩɩda, t’a Zeova kell n maan rẽ n sõng-y bɩ?

15-16. Yam-bʋg la d tõe n dɩk a Toori kibarã pʋgẽ?

¹⁵ Naoor wʋsgo, yaa d zu-loɛɛgã sã n wa sa la d yaool n ne a Zeova sẽn sõng tõnd to-to zu-loɛɛgã sasa. Yɩɩ woto ne saam-bi-poak a ye yʋʋr sẽn boond t’a Toori. A bi-ribl a ye yʋʋr sẽn boond t’a Mezõn maoo ne kãnsɛɛrã bãag n kaoos yʋʋm a yoobe, la a wa n baas n maana kaalem. A Toori sũurã sãama wʋsgo, la a ra bee bʋʋm. Ad a sẽn yeele: “Mam pa tagsd tɩ m zoe n maoo ne zu-loɛɛg sẽn nams maam n ta yel-kãngã ye.” A paasame yaa: “Mam kɩsa sɩd tɩ roagdb a taabã me na n sak n deegame tɩ fo meng sẽn namsd n são f sẽn na n get f biig sẽn namsde.”

¹⁶ Baa ne yellã sẽn nams a Toori wʋsgã, a wa n tẽega a Zeova sẽn maan bũmb  ning n sõng-a t’a tõog toogã. A yeelame: “M sã n wa lebg n tẽeg wakat kãng yelle, m nee a Zeova sẽn sõng maam to-to m bi-riblã bãagã sasa wã. Wala makre, a Mezõn bãagã sẽn wa n keng wʋsg t’a ra pa le tõe n yã neb nins sẽn wat n get-a wã, saam-biis la saam-bi-pogs toga so-wok n wa logtorã yir n na n ges-a. Wakat fãa, neb n da be logtorã yir n dat n maan bũmb n sõnge. Sẽn paase, d tẽed-n-taasã ra getame tɩ d paamd bũmb nins sẽn yaa tɩlɛ ne-dã. Baa ne yɛlã sẽn wa n zẽnã, bũmb pa paoog-d ye.” A Zeova kõo a Toori bũmb nins fãa sẽn na n sõng-a t’a tõog toogã, la a maana woto me ne a Mezõn.—Ges-y zĩ-gũbrã: “ A Zeova sõnga tõnd tɩ d paam sẽn da yaa tɩlɛ ne-dã.”

17-18. Bõe n na n sõng-d tɩ d bãng t’a Zeova sõngda tõnd d zu-loeesã sasa, la d wilg tɩ d sũur nooma ne rẽ? (Yɩɩn-sõamyã 40:6)

¹⁷ Karm-y Yɩɩn-sõamyã 40:6. Ned sã n wa rʋʋd tãnga, yaa a sẽn dat n ta a zugẽ wã. La a sã n wa rʋʋda, zĩis n be a sẽn tõe n mi n yals n tool n get zĩ-neeba. Woto me, baa y sẽn ket n maood ne zu-loeesã, mi n yals-y n tags-y bũmb nins a Zeova sẽn maand n sõngd yãmb tɩ y tõogdẽ wã yelle. Daar fãa zaabre, bɩ y sok y meng yaa: ‘Bõe la a Zeova maan n sõng maam rũndã daarã? Baa ne m zu-loɛɛgã sẽn nan pa sa wã, bõe la a Zeova maand n sõngd maam tɩ m tõogd toogo?’ Modg-y n tẽeg-y baa yaa bũmb a yembr a Zeova sẽn maan n sõng-y tɩ y tõoge.

¹⁸ Yaa sɩd tɩ tõe tɩ y pʋʋsdame n dat tɩ y zu-loɛɛgã sa. Woto pa wẽng ye. Pʋd n zemsame. (Fili. 4:6) La d pa segd n yĩm bark nins d sẽn zoe n tarã yell ye. A Zeova yeelame meng t’a na n kõ-d-la pãnga, la a sõng-d tɩ d tõog toogo. Wilgd-y wakat fãa tɩ y sũur nooma ne bũmb nins a Zeova sẽn maand n sõngd yãmbã. Y sã n maand woto, y na n yãame tɩ wa sẽn yɩ to-to ne a Zozɛfã, a Zeova sõngda yãmb tɩ y paamd tõogre, baa y sẽn ket n maood ne zu-loeesã.—Sɩng. 41:51, 52.