1-2. Wãn to la y tõe n karem Biiblã la y zãms-a tɩ yɩ sõma n yɩɩda? Rɩk-y makre.

 MAMS-Y n ges-y y sẽn na n dat n da roogo. Bõe la y na n dat n bãng roogã wɛɛngẽ, n yaool n da-a? B sã n yaas roogã taoor n yõk fot-yɛng bal n wilg-yã, sekame bɩ? Sãmbg sẽn kae, y na n dat n yãa roogã ne nifu, n gilg n ges-a, n kẽ a pʋgẽ wã n ges a ro-pʋsã fãa la y ges b yalmã. Tõe tɩ y na n dat n gesa roogã pãlã menga, n bãng b sẽn me-a to-to. Yaa vẽeneg tɩ y na n bao n bãnga bũmb fãa roogã wɛɛngẽ n yaool n da-a.

² Biiblã karengã la a zãmsgã wɛɛngẽ me, d tõe n maana woto. Biibl-mit a ye maka koɛɛg ning sẽn be Biiblã pʋgẽ wã ne “ro-bedr sẽn yaa zãntga, t’a yẽbgrã me zulmẽ.” Woto wã, wãn to la d tõe n maan n bãng bũmb nins sẽn be Biiblã pʋgẽ wã sõma? Y sã n karm-a var-vare, yaa zãms-nana wã bal la y na n bãnge, rat n yeel tɩ “Wẽnnaam koeesã pipi yɛlã” bala. (Ebre. 5:12) Vaees-y Biiblã n bao n bãng yel-bõones nins fãa sẽn be a pʋgẽ wã, wa y sẽn na n maan to-to ne roogã. Bũmb sẽn na n sõng-y tɩ y zãms Biiblã sõma, yaa y sẽn na n bao n bãng a goamã sẽn tũud taab to-to wã. Ra bao-y n bãng-y bũmb nins y sẽn tẽedã bal ye. Bao-y bãng-y y sẽn tẽed bõn-kãensã võor me.

3. Bõe la tẽn-tʋmd a Poll sagl a tẽed-n-taasã tɩ b maane, la bõe yĩnga? (Efɛɛz rãmbã 3:14-19)

³ Sẽn na yɩl n wʋm Wẽnnaam Gomdã võor sõma, bũmb kẽer n be Biiblã pʋgẽ tɩ d segd n maag d yĩng n zãms-ba. Tẽn-tʋmd a Poll sagla kiris-nebã tɩ b maag b yĩng n zãms Wẽnnaam Gomdã sẽn na yɩl n “bãng sɩdã yalem, a woglem, a zãntlem la a zulum sõma.” Woto, b na n tõog n  ‘kɩɩ yẽg la b vigl sõma’ tẽebã pʋgẽ. (Karm-y Efɛɛz rãmb 3:14-19.) Tõnd me segd n maana woto. Bɩ d ges d sẽn tõe n vaees Wẽnnaam Gomdã to-to n tõog n wʋm a võor sõma.

4. Bõe la d tõe n maan n maneg n pẽneg a Zeova? Rɩk-y makre.

⁴ D sẽn yaa kiris-nebã, d pa baood n na n bãng bũmb nins sẽn be Biiblã pʋgẽ wã zugẽ-zugẽ bal ye. D rat n bãnga “baa Wẽnnaam yel-zulumsã” d sẽn tõe n zãms ne vʋʋsem sõngã sõngrã. (1 Kor. 2:9, 10) Y tõe n sɩnga ne bũmb nins sẽn na n kɩt tɩ y maneg n pẽneg a Zeova wã. Wala makre, y tõe n bao n bãnga a sẽn wilg to-to pĩnd wẽndẽ t’a nonga neb nins sẽn da tũud-a wã, la rẽ sẽn wilgd to-to t’a nonga yãmb me. Y tõe n bao n bãnga a Zeova sẽn da rat tɩ Israyɛll nebã tũ-a to-to wã, n mak rẽ ne a sẽn dat tɩ d tũ-a to-to rũndã-rũndã wã. Y leb n tõe n bao n bãnga a Zeezi sẽn pids bãngr-goamã to-to, a sẽn wa n be tẽngã zug n moond koɛɛgã.

5. Bõe la y rat n bao n wʋm a võor sõma y Biiblã zãmsg wakate?

⁵ B soka neb kẽer sẽn nong n maagd b yĩng n zãmsd Biiblã n na n ges bõe võor wʋmb sẽn pa nana la b nong n bãng sõma Wẽnnaam Gomdã pʋgẽ. B ninga bũmb nins b sẽn yeelã kẽer zĩ-gũbr ning gom-zug sẽn yaa: “ Bũmb kẽer y sẽn tõe n zãmse.” Y tõe n tũnuga ne Vaeesg sebre, a Zeova Kaset rãmbã yĩnga n zãms bõn-kãense, n paam sũ-noog wʋsgo. Y sã n zãmsd Biiblã n zulgdẽ, na n kenga y tẽebã la sõng-y tɩ y “paam Wẽnnaam bãngre.” (Yel. 2:4, 5) Bɩ d gom bũmb a wãn võor wʋmb sẽn pa nana d sẽn tõe n bao n bãng yelle.

6. a) Welg-bʋg n be pãlã ne raab sʋka? b) Bõe yĩng tɩ d tõe n yeel tɩ raab ning a Zeova sẽn tar ne ninsaalbã la ne tẽngã “ka saabo”? (Efɛɛz rãmbã 3:11)

⁶ Wala makre, d gom bũmb ning Biiblã sẽn yet Wẽnnaam daabã wɛɛngẽ wã  yelle. Welgr n be pãlã ne raab sʋka. D tõe n dɩka pãlã n mak ne sor y sẽn na n tũ n ta zĩig y sẽn date. La bũmb sã n gɩd so-kãnga, y tõeeme n pa tõog n kẽng y sẽn datẽ wã ye. La d tõe n dɩka raabã n mak ne zĩig ning d sẽn dat n kẽngã. D mii zĩig ning d sẽn dat n kẽngã takɩ, la d tõe n dɩka soay toɛy-toɛy n ta be. Sã n wa yaa tɩlɛ d tõe n toeema sore. Zu-noogo, a Zeova vẽnega a “raabã sẽn ka saabã” bilf-bilf Biiblã pʋgẽ. (Efɛɛ. 3:11) A Zeova tõe n tũnuga ne manesem buud toor-toor n pids a raabã, bala a “kɩtdame tɩ bũmb fãa pidsd a raabã.” (Yel. 16:4) A Zeova sẽn maand bũmb ninsã sẽn womd biis ninsã me na n paa wakat fãa. A Zeova raabã yaa bõe, la bõe la a toeem sẽn na yɩl n pids a raabã?

7. A Ãdem ne a Awa kɩɩsgã poore, bõe la a Zeova maan sẽn na yɩl t’a raabã pidsi? (Matiye 25:34)

⁷ Wẽnnaam yeela a Ãdem ne a Awa a raabã sẽn yaa a soab ne ninsaalbã. B ra tog n “doga kamb n lebg wʋsgo, n pid tẽngã la y soog-a,” la b soog “bõn-vɩɩs buud fãa sẽn kẽnd tẽngã zugã.” (Sɩng. 1:28) A Ãdem ne a Awa sẽn kɩɩs tɩ kɩt tɩ yel-wẽndã kẽ dũni wã, a Zeova raabã pa toeem ye. La a toeema a sẽn na n maan to-to n pids a raabã. Zĩig pʋgẽ, a yãka yam n na n lugl Rĩung saasẽ, sẽn na yɩl n pids raab ning a sẽn sɩng n tar ne ninsaalbã la ne tẽngã. (Karm-y Matiye 25:34.) Wakat ning a Zeova sẽn yãkã sẽn wa n ta wã, a tʋma a Bi-kãsengã tẽngã zug t’a wa zãms nebã Rĩungã sẽn yaa a soaba, la a kõ a vɩɩmã tɩ yɩ maoong sẽn na yɩl tɩ ninsaalbã paam d meng ne yel-wẽndã la kũumã. Rẽ poore a Zeezi vʋʋgame n leb saasẽ, n tɩ lebg Wẽnnaam Rĩungã Rĩma. La bũmb wʋsg la d tõe n bao n bãng Wẽnnaam daabã wɛɛngẽ.

8. a) Biiblã gom-zugã yaa bõe? b) Sã n yaa ne Efɛɛz rãmb 1:8-11 wã, bõe me la a Zeova na n maane? (Ges-y sebrã pipi neng fotã.)

⁸ Biiblã gom-zugã yaa a Zeova yʋʋrã na paam waoogre, t’a raabã pids tẽngã zug ne a Rĩungã a sẽn bobl Kiristã maasem. Bũmb pa tõe n toeem a Zeova raabã ye. A pʋlmame tɩ bũmb fãa na n yɩɩ wa a sẽn yeelã. (Eza. 46:10, 11, not-rãmbã; Ebre. 6:17, 18) Tẽngã na n wa lebga arzãna, t’a Ãdem ne a Awa kamb la b yagens sẽn zems zãng la sẽn yaa nin-tɩrs vɩɩmd a zug “wakat sẽn kõn sa.” (Yɩɩn. 22:26) La pa woto bal la a Zeova rat n maan ye. A ratame tɩ malɛgsã sẽn be saasẽ wã ne ninsaalbã sẽn be tẽngã zugã fãa naag taab n waoogd-a. Dẽ, bõn-vɩɩsã fãa na n sakd-a lame la b teend a naamã. (Karm-y Efɛɛz rãmb 1:8-11.) Y sũur pa noom ne bũmb nins fãa a Zeova sẽn maand sẽn na yɩl n pids a raabã sɩda?

9. D sã n karem Biiblã, bõe la d na n bãng beoog-daarã wɛɛngẽ?

⁹ D gom bãngr-gomd ning a Zeova sẽn togs Edɛn zẽedẽ wã tɩ be Sɩngr 3:15 pʋgẽ wã yelle. b A gomda bũmb toor-toor sẽn na n maan yʋʋm tusa poor t’a Zeova raabã pids yelle. Wala makre, Wẽnnaam yeela a Abrahaam tɩ yʋʋm wʋsg poore, a yageng a ye n na n lebg Kiristã. (Sɩng. 22:15-18) Yʋʋmd 33 wã, bãngr-gomdã sẽn da yeel tɩ b na n pogla yagengã nao-kãsenkãarã pidsa a Zeezi zugu. (Tʋʋ. 3:13-15) Bãngr-gomdã yaoolem babgã sẽn yet tɩ “yagengã na n bedsa” a Sʋɩtãan  zugã na n pidsa ka la yʋʋm tusr la zaka. (Vẽn. 20:7-10) Sẽn paase, Biiblã wilgda bũmb ning sẽn na n maane, beem ning sẽn be a Sʋɩtãan dũniyã ne a Zeova siglgã sʋkã sã n wa ta a zug tẽn-sʋka.

10. a) Bõe n na n maan ka la bilfu? b) Wãn to la d tõe n segl d menga? (Ges-y notã.)

¹⁰ D gom bõn-kãsems nins sẽn na n maan ka la bilf tɩ Biiblã pĩnd n gom b yellã yelle. Pipi, buud toɛy-toɛyã na n yeelame tɩ “laafɩ la bãane!” (1 Tes. 5:2, 3) “Zĩig pʋgẽ,” to-kãsengã na n sɩnga wakat ning buud toɛy-toɛyã sẽn na n yik n zab ne ziri tũudmã fãa wã. (Vẽn. 17:16) Rẽ poore tõe tɩ yel-solemd n na n maane, tɩ b yã “Ninsaal biigã t’a zao sawatã sẽn be saasẽ wã n wat ne pãng la ziir sẽn yaa kãsenga.” (Mat. 24:30) A Zeezi na n kaoo ãdem-biisã bʋʋdo, n welg piisã ne bʋʋsã. (Mat. 25:31-33, 46) La wakat kãnga, a Sʋɩtãan pa na n kalemd a nus n zĩẽ ye. A sẽn kis Wẽnnaam nin-buiidã ne a sũur fãa wã yĩnga, a na n kɩtame tɩ buud toɛy-toɛy sẽn lagem taaba, tɩ Biiblã boondẽ tɩ Goog sẽn yit Magoog soolmẽ wã yik n na n zab ne tũudum hakɩɩkã nebã. (Eze. 38:2, 10, 11) Wakat kãnga, b na n tigma sẽn paam-b vʋʋsem sõngã zaeeb n ket tẽngã zugã saasẽ, tɩ b naag Kiristã ne a tãb-biisã sẽn be saasẽ wã n zab Armagedõ zabrã sasa. Rẽ n na n yɩ to-kãsengã baasgo. c (Mat. 24:31; Vẽn. 16:14, 16) Yaa rẽ poor la Kiristã naamã sẽn na n kaoos yʋʋm tusrã na n sɩnge.—Vẽn. 20:6.

11. Y sã n wa vɩ wakat sẽn kõn sa, bõe la y na n tõog n maane? (Ges-y fotã me.)

¹¹ Tags-y y vɩɩmã sẽn na n yɩ to-to yʋʋm tusrã poore. Biiblã yeelame tɩ d Naandã “ninga wakat sẽn pa sat tagsg [d] sũurã pʋgẽ.” (Koɛ. 3:11) Tags-y rẽ sẽn na n naf yãmb la sẽn na n paas yãmb ne a Zeova zoodã pãng to-to wã yelle. Goam sẽn be yamleoog n be Approchez-vous de Jéhovah sebrã neng 319 wã pʋgẽ. B yeela be yaa:  “D sã n wa vɩɩmd yʋʋm kobse, tusa, milyõ-rãmb wall milyaar-dãmb menga, d na n bãnga Wẽnnaam a Zeova sõma n yɩɩd d sẽn mi-a to-to rũndã-rũndã wã hal zĩig sẽn zãre. Baasgo, d na n ket n neeme tɩ bũmb ka tɛk la d tõe n bãng a Zeova zugu. . . . Arzãnã pʋgẽ vɩɩm na n yɩɩ noog hal tɩ d pa tõe n bãng n bilg ye. La bũmb ning sẽn na n yɩ noog n yɩɩd yaa d sẽn na n pẽnegd a Zeova n paasdẽ wã.” La nananda, d sẽn ket n zãmsd Wẽnnaam Gomdã, bõe me võor la d tõe n bao n wʋme?

12. Bõe n tõe n sõng-d tɩ d ges bũmb nins sẽn be saasẽ wã? Rɩk-y makre.

¹² Wẽnnaam Gomdã bilgda zĩig ning a Zeova sẽn be “hal yĩngrã” bilfu. (Eza. 33:5) Biiblã bilgda bũmb toor-toor sẽn be yamleoog a Zeova la a siglgã babg ning sẽn be saasẽ wã zugu. (Eza. 6:1-4; Dãn. 7:9, 10; Vẽn. 4:1-6) Wala makre, b gʋlsa bõn-kãsems nins a Ezekɩyɛll sẽn yã wakat ning ‘saasã sẽn pake, t’a sɩng n na n yã vẽnegr toor-toor sẽn yit Wẽnnaam nengẽ’ wã.—Eze. 1:1.

13. Bõe n noom yãmb tʋʋm nins a Zeezi sẽn tʋmd saasẽ wã pʋgẽ, wa Ebre-rãmb 4:14-16 sẽn bilgdã?

¹³ Tags-y n ges-y-yã a Zeezi sẽn maand bũmb nins tõnd yĩng saasẽ, a sẽn yaa d Rĩm la maan-kʋʋdb kãsem sẽn yaa nimbãan-zoɛtã. Ne yẽ maasem, d tõe n tũnuga ne pʋʋsgã n “kolg Wẽnnaam bark geerã” n kos t’a zoe d nimbãanega, la d kos sõngr “d sẽn wat n dat sõngr wakate.” (Karm-y Ebre-rãmb 4:14-16.) D pa segd n bas baa daar-n-yɛng n pa tags bũmb nins a Zeova ne a Zeezi sẽn be saasẽ wã sẽn maan tõnd yĩnga, la b sẽn ket n maandẽ wã yell ye. B sẽn wilgd to-to tɩ b nonga tõndã segd n yɩ-d- la noog wʋsgo, la kɩt tɩ d tall yẽesem a Zeova tũudmã pʋgẽ.—2 Kor. 5:14, 15.

14. Bõe la d tõe n maan n pʋʋs a Zeova ne a Zeezi barka? (Ges-y fotã me.)

¹⁴ Bũmb a ye d sẽn tõe n maan n wilg tɩ d sũur nooma wʋsg ne d Wẽnnaamã la ne a Bi-riblã, yaa d sẽn na n maan d sẽn tõe fãa n sõng neb a taabã tɩ b lebg a Zeova Kaset rãmb la a Zeezi karen-biisi. (Mat. 28:19, 20) Yɩɩ woto la tẽn-tʋmd a Poll maan sẽn na yɩl n pʋʋs Wẽnnaam la Kiristã barka. A ra miime t’a Zeova raabã “yaa tɩ nebã buud fãa paam fãagre, la b paam bãngr hakɩɩk sɩdã zugu.” (1 Tɩm. 2:3, 4) A tʋma wʋsg koɛɛgã mooneg pʋgẽ n sõng neb wʋsg wa a sẽn tõe tɛka, sẽn na yɩl n “fãag neb kẽere.”—1 Kor. 9:22, 23.

15. Sã n yaa ne Yɩɩn-sõamyã 1:2, bõe n tõe n kɩt tɩ d paam sũ-noogo?

¹⁵ Yɩɩn-gʋlsdã yeelame tɩ ned ning sẽn “nong a Zeova tõogã wʋsgo,” la sẽn “bʋgsd a tõogã zug wĩndg la yʋng” yaa sũ-noog soaba, la tɩ bũmb ning fãa a sẽn maand yãkda nenga. (Yɩɩn. 1:1-3; notã.) Biibl-lɛbgd a Joseph Rotherham goma vɛrse-kãensã yell a sebr a yembr (Études sur les Psaumes) pʋgẽ. A yeelame tɩ ninsaal segd n “data Wẽnnaam saglsã ne a sũur fãa tɩ kɩt t’a baood-ba, n zãmsd-b la a tagsd b yell wʋsgo.” A paasame tɩ ned sẽn karemd Biiblã “sã n bas tɩ daar loog t’a pa karem Biiblã, a tõe n gesame tɩ daar-n-kãng yaa bõne.” Y tõe n paama sũ-noog Biiblã zãmsg pʋgẽ, y sã n gũusd n get a sẽn bilgd baa yel-bõonesã to-to tɩ be yamleoogã, la bõn-kãens sẽn yekd taab to-to wã. D sã n baood n wʋmd Wẽnnaam Gomdã võor sõma, kõta sũ-noog wʋsgo!

16. Bõe yell la d na n gom sõsg ning sẽn pʋgdã pʋgẽ?

¹⁶ Sɩdã a Zeova sẽn zãmsd tõnd a Gomdã pʋgẽ wã võor wʋmb pa yɩɩd d nug ye. Sõsg ning sẽn pʋgdã pʋgẽ, d na n bao n bãnga bũmb võor wʋmb sẽn pa nana: Yaa a Zeova ro-kãsengã sẽn pa ninsaalb nus n me wã, roog ning yell a Poll sẽn gom lɛtr ning a sẽn tool kiris-neb nins sẽn da yaa Ebre-rãmbã pʋgẽ wã. Bɩ d sẽn na n gom rẽ yellã kõ-y sũ-noog wʋsgo.