1-2. Bõe yĩng t’a Zeova Kaset rãmbã tar sũ-noogo? (Zak 1:22-25)

 A ZEOVA ne a Bi-nongrã ratame tɩ d paam sũ-noogo. Sẽn gʋls-a Yɩɩn-sõamyã 119:2 yeelame yaa: “Sũ-noog rãmb la neb nins sẽn tũud a saglsã, sẽn baood-b yẽ ne b sũy fãa wã.” A Zeezi me yeelame yaa: “Sũ-noog rãmb la neb nins sẽn kelgd Wẽnnaam goamã la b tũudẽ wã!”—Luk 11:28.

² Tõnd a Zeova Kaset rãmbã tara sũ-noogo. Bõe yĩnga? Bũmb wʋsg n kõt tõnd sũ-noogo. La bũmb ning sẽn kɩt tɩ d tar sũ-noog n tɩ yɩɩdã yaa d sẽn karemd Wẽnnaam Gomdã daar fãa la d modgd n tũud bũmb nins d sẽn bãngdã.—Karm-y Zak 1:22-25.

3. D sã n tũud bũmb nins d sẽn bãngd Wẽnnaam Gomdã pʋgẽ wã, wãn to la rẽ nafd tõndo?

³ D sã n yaa “Wẽnnaam gomdã sakdba,” nafda tõnd bũmb wʋsg wɛɛngẽ. Wala makre, d sã n tũud bũmb ning d sẽn bãngd Wẽnnaam Gomdã pʋgẽ wã nooma a Zeova la kõt-d sũ-noogo. (Koɛ. 12:13) D sã n tũud Wẽnnaam Gomdã saglsã kɩtdame tɩ tõnd ne d zakã rãmb zemsd taab sõma, la paasd tõnd ne tigingã neb zood pãnga. Yaa vẽeneg tɩ y tõe n kõo rẽ kaseto. Sẽn paase, sõngd-d lame tɩ d gind zu-loees wʋsg neb nins sẽn pa tũud a Zeova wã sẽn paamde. Rĩm a Davɩɩd sɩd yeela woto. A yɩɩll a ye pʋgẽ, a goma a Zeova tõogã, a noyã la a bʋ-kaoor toor-toorã yelle, n yeel yaa: “Ned sã n sak-ba, a paamda keoor wʋsgo.”—Yɩɩn. 19:7-11.

4. Bõe yĩng tɩ yɩl n yɩ Wẽnnaam Gomdã sakdb pa nana?

 ⁴ Sẽn na yɩl n yɩ Wẽnnaam Gomdã sakdba, d segd n karemda Biiblã la d zãmsd-a, n bãng a Zeova sẽn dat tɩ d maanã. La sɩd-sɩda, pa wakat fãa la rẽ maaneg yaa nana, d sẽn tar bũmb wʋsg n maand daar fãa wã yĩnga. Rẽ n so tɩ d segd n baood sẽk rẽ yĩnga. Bɩ d ges sagls a wãn sẽn tõe n sõng-d tɩ d karemd Biiblã daar fãa. Sẽn paase, d na n yãa bũmb sẽn tõe n sõng-d tɩ d bʋgsd d sẽn karemdã zugu, la d sẽn tõe n tũ rẽ to-to.

YÃK-Y WAKAT TAKƖ N KAREMD WẼNNAAM GOMDÃ

5. Bõe n dɩt d sẽkã?

⁵ A Zeova Kaset rãmb wʋsg wae n pa tar sẽk ye. Yɩl n maan bũmb nins Biiblã sẽn yeel tɩ d segd n maaname wã rɩkda sẽk wʋsgo. Wala makre, d sʋkã neb wʋsg tʋmda sẽn na yɩl n ges b mensã yelle, la b zagsã rãmb yelle. (1 Tɩm. 5:8) Kiris-neb wʋsg geta b roagd sẽn kʋʋl wall sẽn bẽed yelle. D ned kam fãa me segd n gesa a laafɩ wã yelle. La rẽ baooda sẽka. Rẽ sẽn yãk a toogo, d tara tʋʋm tigingã pʋgẽ. Tʋʋmd a to sẽn tar yõod yaa koɛɛgã moonego, tɩ d segd n maan rẽ ne yẽesem. Woto wã, y maanda wãn n paamd sẽk n karemd Biiblã n pa vaandẽ, n bʋgsd bũmb ning y sẽn karemdã zug la y tũud rẽ?

6. Bõe la y tõe n maan tɩ sõng-y tɩ y karemd Biiblã n pa vaandẽ? (Ges-y fotã me.)

⁶ D sẽn yaa kiris-nebã, Biiblã kareng naaga “bũmb nins sẽn tar yõod n yɩɩdã” sʋka, tɩ d pa segd n bas tɩ bũmb tiis-d rẽ wɛɛngẽ ye. (Fili. 1:10) Yɩɩn-sõamyã pipi soabã pʋgẽ, b goma ned sẽn tar sũ-noog yelle, n yeel yaa: “A nonga a Zeova tõogã wʋsgo. A sikda a koɛɛg n karemd a tõogã wĩndg la yʋngo.” (Yɩɩn. 1:1, 2) Woto rat n yeelame tɩ d segd n yãka wakat takɩ n karemd Biiblã. Wakat-bʋg n zems ne Biiblã kareng n tɩ yɩɩda? Bee ne d ned kam fãa. La sẽn tar yõod n  yɩɩd yaa y yãk wakat takɩ n karemd-a n pa vaandẽ ye. Saam-biig a ye yʋʋr sẽn boond t’a Viktor yeelame: “Yaa yibeoog la m nong n karemd Biiblã. Baa mam sẽn pa ned sẽn nong n yikd pĩndã, m sã n yik yibeoog pĩnda, bũmb wʋsg pa tiisd-m ye. M yamã pa yuusd ye.” Tõe tɩ yaa woto ne yãmb me. Sok-y y meng yaa: ‘Wakat-bʋg n yaa sõma ne maam tɩ m tõe n karem Biiblã?’

BƲGSD-Y Y SẼN KAREMDÃ ZUGU

7-8. Bõe n tõe n kɩt tɩ d karemd Biiblã tɩ pa nafd-d sõma? Rɩk-y makre.

⁷ La d tõe n karma bũmb wʋsg tɩ yaool n pa kẽ-d ye. Yãmb zɩ n karem bũmb tɩ rẽ poor bilf bɩ y pa le tẽr y sẽn karmã sõma sɩda? A buud zoe n paama d fãa. Tõe n yɩɩ woto me ne Biiblã karengo. Tõe tɩ y yãka Biiblã sags sõor y sẽn na n karemd daar fãa. Woto yaa bũmb sẽn yaa sõma. D segd n yãka bũmb ning d sẽn dat n maanã la d modgd n tũ. (1 Kor. 9:26) Y sã n yãk yam n karemd Biiblã, yaa sõma. La rẽ bal pa sek ye. D sã n dat tɩ Wẽnnaam Gomdã d sẽn karemdã naf-d sõma, bũmb a taab me la d segd n maane.

⁸ D rɩk makre: Sẽn na yɩl tɩ kood bɩ yaa tɩlɛ tɩ b paam koom. La saagã sã n ni wʋsg wakat bilf pʋgẽ, tẽngã pa na n tõog n yũ koomã ye. Sã n yaa woto pa nafd koodã ye. Tẽn-gãongã segd n paama weer n fõog koomã tɩ koodã paam n bɩ. Woto me, d pa segd n karemd Biiblã var-vare, rat n yeel tɩ n pa yalsd n bʋgsdẽ sẽn na yɩl tɩ sõng-d tɩ d tẽeg bũmb ning d sẽn karmã yell la d tũ rẽ ye.—Zak 1:24.

9. Sã n mik tɩ y minim n karemda Biiblã var-vare, bõe la y segd n maane?

⁹ Yãmb mi n getame tɩ y karemda Biiblã var-var bɩ? Sa n yaa woto, bõe la y segd n maane? Karemd-y maasg-maasga. Modg-y n tagsd-y bũmb ning y sẽn karemdã zug karengã sasa, wall karengã poore. Rẽ maaneg pa tog n yɩ toog ye. La y sã n getẽ tɩ bʋgsgã yaa toogo, bɩ y tags bũmb ning y sẽn karemdã zug bala. Y  tõe n yãka yam n paas sẽk ning y sẽn dɩkd n karemd Biiblã sẽn na yɩl n tags bɩ n bʋgs y sẽn karemdã zugu. Y tõeeme n karem vɛrse a wãn bal la y rɩk sẽkã sẽn ketã n tags bũmb ning y sẽn karmã zugu. A Viktor sẽn yaa saam-biig ning yell d sẽn zoe n gomã paasame yaa: “M pa karemd Biiblã sags wʋsg ye. M tõe n mii karma sak a ye bala. M sẽn karemd yibeoog pĩndã yĩnga, m tõogd n bʋgsa bũmb nins m sẽn karmã zug daarã tõre.” Yaa vɛrse-rãmb wʋsg tɩ yaa vɛrse-rãmb a wãn bal la y yãk yam n na n karemdẽ, sẽn tar yõod n yɩɩd yaa y sẽn na n maagd y yĩng n karemdẽ, n tõogd n bʋgsd bũmb ning y sẽn karemdã zugu.—Yɩɩn. 119:97; ges-y zĩ-gũbrã: “ Sogsg y sẽn tõe n sok y menga.”

10. Rɩk-y makr n wilg d sẽn tõe n maan to-to n tũ bũmb ning d sẽn karemdã. (1 Tesalonik rãmbã 5:17, 18)

¹⁰ Sẽn yaa wakat ning fãa la y yãk n karemd Biiblã, wall y karengã sẽn kaoosd to-to, tags-y y sẽn tõe n tũ bũmb ning y sẽn karmã to-to. Y sã n wa karemd Biiblã bɩ y sok y meng yaa: ‘Wãn to la m tõe n tũ bũmb ning m sẽn karmã masã menga, wall beoog sẽn wate?’ D rɩk makre. Yãmb karma 1 Tesalonik rãmb 5:17, 18 wã. (Karm-y-yã.) Karengã poor bɩ y maag y yĩng n tags n ges y sã n pʋʋsda a Zeova wakat fãa, la sã n yaa ne pʋ-peelem. Sẽn paase y tõe n tagsa bũmb a wãn sẽn kɩt tɩ y sũur noom ne Wẽnnaam yelle. Y tõe n yãka yam n na n pʋʋs a Zeova bark bũmb a tãab a sẽn maan n kõ yãmb yĩnga. Baa yaa minit a wãn bal la y rɩk n tags y sẽn karmã zugu, na n sõng-y lame tɩ y yɩ Wẽnnaam Gomdã kelgd la a sakda. Tags-y n ges-y sẽn na n naf-y to-to, y sã n maan woto ne Biiblã babs a taabã y sẽn karemdã? Y na n lebga Wẽnnaam Gomdã sakda. La y sã n mik tɩ bũmb wʋsg la y segd n demse y maanda wãna?

RA BAO-Y N MAAN-Y BŨMB SẼN YƖƖD Y NUG YE

11. Bõe n tõe n wa kɩt tɩ y getẽ tɩ bũmb nins y sẽn segd n demsã yɩɩda y nugu? Rɩk-y makre.

¹¹ Y sã n karemd Biiblã la y modgd n na n tũ a saglsã, y tõe n wa getame tɩ yaa toog wʋsgo. Wala makre, tags-y y sẽn na n karem Biiblã n yã saglg sẽn yet tɩ d pa segd n bakd neb n sõngdẽ ye. (Zak 2:1-8) Y yãame tɩ y segd n demsa y manesem sẽn yaa to-to ne y taabã, tɩ y yãk yam n na n toeem bũmb kẽere. Rẽ yaa sõma wʋsgo. La vẽkembeoogã, y karma zĩig a to sẽn wilgd tɩ y segd n  gũusa ne y no-goamã. (Zak 3:1-12) Y tẽegame tɩ y mii n goma goam sẽn pa kengd raoodo, tɩ y yãk yam n na n gomd goam sẽn noogd sũur la sẽn kengd raood masã. Rasem a tãab-n-soabã, y karma zĩig a to sẽn yet tɩ y pa segd n bao dũniyã zood ye. (Zak 4:4-12) Y yãame tɩ y segd n gũusa ne bũmb nins y sẽn maand n kokd pemsmã. Rasem a naas-n-soabã y tõe n getame tɩ bũmb nins y sẽn segd n demsã yɩɩda y nugu.

12. Y sã n karem Biiblã n yã tɩ y segd n toeema bũmb kẽere, bõe yĩng tɩ y pa segd n koms raoodo? (Ges-y fotã me.)

¹² Y sã n yã tɩ y segd n toeema bũmb wʋsg bɩ y ra koms raood ye. Wilgdame tɩ y yaa sik-m-meng soaba, la tɩ y tara yam-sõngo. Ned sẽn yaa sik-m-meng soab la pʋ-peelem soab sã n wa karemd Biiblã, a baooda bũmb nins a sẽn tõe n maneg tɩ yɩ sõma n paase. a Tẽeg-y tɩ nin-paalgã yeelgr pa daar a ye tʋʋmd ye. (Kolo. 3:10) Bõe n na n sõng-y tɩ y kell n yɩ Wẽnnaam Gomdã sakda?

13. Wãn to la y tõe n tũ bũmb nins y sẽn zãmsdã tɩ yɩ sõma n yɩɩda? (Ges-y fotã me.)

¹³ Ra n bao-y n dems-y bũmb nins fãa y sẽn segd n demsã wakat-yɛng ye. (Yel. 11:2) Y tõe n sɩnga ne a ye bɩ a yiibu. Ad bũmb y sẽn tõe n maane: Gʋls-y bũmb nins y sẽn segd n demsã, n sɩng ne a ye bɩ a yiibu, la y bas a taabã n wa maan poorẽ. Y na n sɩnga ne bʋg remsgo?

14. Y tõe n sɩnga ne bõe remsgo?

¹⁴ Y tõe n sɩnga ne bũmb maaneg sẽn yaa nana ne yãmba, pa rẽ bɩ n sɩng ne bũmb ning sẽn dat remsg n tɩ yɩɩdã. Y sã n yãk bũmb ning y sẽn dat n demsã bɩ  y maan vaeesg d sɛbã pʋsẽ. Wala makre, Index des publications des Témoins de Jéhovah wã bɩ Vaeesg sebre, a Zeova Kaset rãmbã yĩnga pʋgẽ. Pʋʋs-y bũmb ning y sẽn yãk yam n na n maanã wɛɛngẽ n kos a Zeova t’a kõ-y “raab la tõogo.” (Fili. 2:13) Rẽ poor bɩ y tũ bũmb ning y sẽn bãngã. Y sã n tõog n toeem bũmb ning y sẽn da yãk yam n na n toeemã, na n kenga y raood tɩ y le rat n toeem bũmb a to n paase. Y sã n yã tɩ y tõog n toeemame wall y bɩɩsa zʋg-sõngo, na n yɩɩ nana tɩ y tõog n deems bũmb a taab me.

BAS-Y TƖ ‘WẼNNAAM GOMDÃ TƲM YÃMB PƲSẼ’

15. Bõe n kɩt t’a Zeova Kaset rãmbã yaa toor ne neb wʋsg sẽn karemd Biiblã? (1 Tesalonik rãmbã 2:13)

¹⁵ Neb kẽer karma Biiblã naoor wʋsgo. La b sɩd tẽeda Biiblã sẽn yetã bɩ? B tũuda a noyã la b basdẽ t’a toeemd-b sɩda? Bʋko, pa wae n yaa woto ye. Rẽ yaa toor fasɩ ne a Zeova nin-buiidã. D yaa wa pipi kiris-nebã. D saka Biiblã “wa a sẽn sɩd yaa bũmb ningã, wa Wẽnnaam gomde.” Sẽn yɩɩd fãa d modgd n tũuda a saglsã d vɩɩmã nens fãa pʋsẽ.—Karm-y 1 Tesalonik rãmb 2:13.

16. Bõe n tõe n sõng-d tɩ d yɩ Wẽnnaam Gomdã sakdba?

¹⁶ Wẽnnaam Gomdã kareng la a tũub pa nana wakat fãa ye. Tõe tɩ yaa toog tɩ d paamd sẽk n karemd-a, wall d wae n karemd-a-la var-vare, tɩ d sẽn karemdã pa kẽed-d sõma ye. Pa rẽ bɩ d getame tɩ bũmb nins d sẽn segd n demsã yaa wʋsgo. Sẽn yaa bũmb ning fãa n kɩt tɩ pa nana ne-yã, pa bũmb sẽn yɩɩd y nug ye. Ne a Zeova sõngre, y na n tõogame. Bɩ d fãa sak a sõngrã, n yɩ Wẽnnaam Gomdã sakdba, la d ra yɩ neb sẽn kelgd n yĩmdẽ ye. Yaa vẽeneg tɩ d sã n karemd Wẽnnaam Gomdã la d tũud bũmb ning d sẽn bãngdã, d sũ-noogã na n paasdame.—Zak 1:25.