D sã n wa rat n zãms Biiblã d tõe n soka d meng yaa: ‘Bõe la m dat n bãnge?’ La d segd n gũusame tɩ d sẽn saagd n na n bãngã ra wa kɩt tɩ d pa yã bũmb ning a Zeova sẽn dat n zãms-dã ye. D sã n wa zãmsd Biiblã, d maanda wãn n bãng bũmb ning a Zeova sẽn dat n zãms-dã?

Pʋʋs-y n kos-y yam. Kos-y-yã a Zeova t’a sõng-y tɩ y bãng bũmb ning a sẽn dat n zãms-y wakat kãngã. (Zak 1:5) Ra teeg-y yãmb sẽn mi wã bal ye.—Yel. 3:5, 6.

Sak-y tɩ Biiblã toeem-yã. “Wẽnnaam gomdã vɩɩme.” (Ebre. 4:12) Rẽnd d sã n wa karemd Biiblã fãa, d tõe n bãnga bõn-paalle, la bũmb sẽn na n sõng-d d vɩɩmã nens toor-toor pʋgẽ. La yaa d sã n sak n deeg tɩ bũmb nins Wẽnnaam sẽn zãmsd tõndã yaa tɩlɛ ne-d bal la na n yɩ woto.

Wilg-y tɩ y sũur nooma ne bũmb nins fãa a Zeova sẽn kõt-dã. Bũmb nins a sẽn kõt tõnd d tẽebã kengr yĩngã yaa wa “tigr dɩ-noodo.” (Eza. 25:6) Ra bas-y bũmb kẽer n pa karme, y sẽn tagsd tɩ b zãmsg pa na n yɩ-y noog yĩng ye. Y sã n zãmsd-ba y wilgdame tɩ y ratame tɩ Wẽnnaam sõng-y tɩ y bɩɩs zʋg-sõma. Y tõe n mikame me tɩ b zãmsg yaa noogo!