1. Ãnd dãmb bʋʋd la b na n kao ka la bilfu?

 BÕN-KÃSEMS n na n maan ka la bilfu. A Zeezi na n kaoo nin-vɩɩsã fãa bʋʋdo. A wilga tõnd bũmb ning sẽn na n maan dũniyã zug nand tɩ bʋ-kaoorã ta wã. A kõo a karen-biisã “bãnd” sẽn na n wilg t’a sɩnga naam rɩɩbo, la “tɩ dũniyã rabda a saabẽ.” (Mat. 24:3) Bãngr-gom-kãng bee Matiye sak 24 ne 25, Mark sak 13, la Luk sak 21 wã pʋgẽ.

2. Bõe yell la d na n gome, la wãn to la rẽ na n naf tõndo?

² A Zeezi wẽe yel-bũn a tãab n na n keoog tõndo. Yaa piisã la bʋʋsã yel-bũndã, pʋg-sadb sẽn tar yam la pʋg-sadb sẽn yaa yalembã yel-bũndã, la talã-rãmbã yel-bũndã. Yel-bũnd fãa sõngda tõnd tɩ d bãng tɩ yaa ned kam fãa tʋʋm-tʋmdɩ zug la a Zeezi na n tik n kao a bʋʋdo. D na n bao n bãnga yam ning d sẽn tõe n dɩk yel-bũn-kãens pʋsẽ, la d sẽn tõe n tũ rẽ to-to. D na n sɩnga ne piisã la bʋʋsã yel-bũndã.

PIISÃ LA BƲƲSÃ

3. Wakat-bʋg la a Zeezi na n kao nebã bʋʋdo?

³ Piisã la bʋʋsã yel-bũndã pʋgẽ, a Zeezi wilga a sẽn na n tik bũmb ning n kao ned bʋʋdo. Yaa a soabã sã n kelga koe-noogã bɩ a pa kelge, la a sã n teela a ba-biisã sẽn paam vʋʋsem sõng zaeebã bɩ a pa teel-ba. (Mat. 25:31-46) Yaa to-kãsengã sasa la a na n kao nebã bʋʋdo, n welg-b wa piis la bʋʋs nand tɩ Armagedõ zabrã sɩnge. (Mat. 24:21) A Zeezi na n welga neb nins sẽn teel a ba-biisã sẽn paam vʋʋsem sõng zaeebã ne b sũur fãa wã, ne neb a taabã wa rũm-kɩɩm sẽn welgd piis ne bʋʋse.

4. Sã n yaa ne Ezayi 11:3, 4, bõe yĩng tɩ d tõe n bas d yam t’a Zeezi na n kaoo bʋʋdã ne tɩrlem? (Ges-y fotã me.)

⁴ Biiblã bãngr-goamã wilgdame t’a Zeezi sẽn yaa  Bʋ-kaood ning a Zeova sẽn yãkã na n kaoo bʋʋdã ne tɩrlem. (Karm-y Ezayi 11:3, 4.) A geta nebã manesem, b tʋʋm-tʋmdɩ wã la b no-goamã, n paas b manesem sẽn yaa to-to ne a ba-biisã sẽn paam vʋʋsem sõng zaeebã. (Mat. 12:36, 37; 25:40) A Zeezi mii neb nins sẽn teend a ba-biisã la b sõngd-b b tʋʋmdã pʋgẽ wã. a Bũmb sẽn tar yõod n yɩɩd ned sẽn tõe n maan n sõng Kiristã ba-biisã yaa a sẽn na n sõngd-b n moond koɛɛgã. A Zeezi na n yeelame tɩ neb nins sẽn teel a ba-biisã woto wã yaa “nin-tɩrse,” n tõe n paam n vɩɩmd “wakat sẽn ka sɛt” tẽngã zugu. (Mat. 25:46; Vẽn. 7:16, 17) Ad sɩd yaa keoor sẽn yaa sõma wʋsgo! B sã n kell n maan sɩd ne Wẽnnaam to-kãsengã sasa la rẽ poore, b yʋyã na n kell n gʋlsa “vɩɩm sebrã pʋgẽ.”—Vẽn. 20:15.

5. Yam-bʋg la d tõe n dɩk piisã la bʋʋsã yel-bũndã pʋgẽ, la ãnd dãmb me n segd n kelg a keoogrã?

⁵ Yɩ-y ned sẽn maand sɩd ne a sũur fãa. Sẽn yɩɩd fãa, yaa neb nins sẽn saagd n na n wa vɩɩmd wakat sẽn kõn sa tẽngã zugã yĩng la a Zeezi sẽn wẽ piisã la bʋʋsã yel-bũndã. B teenda Kirist ba-biisã koɛɛgã mooneg pʋgẽ, la b tũud tʋm-tʋmd sẽn tũud sɩd la sẽn tar yamã a Zeezi sẽn yãkã saglsã n wilgdẽ tɩ b tara tẽebo. (Mat. 24:45) La neb nins sẽn saagd n na n tɩ vɩɩmd saasẽ wã me segd n tũu keoogr ning sẽn be yel-bũndã pʋgẽ wã. Bõe yĩnga? A Zeezi geta b tʋʋm-tʋmdɩ wã, b manesmã la b no-goamã. Bãmb me segd n yɩɩ neb sẽn maand sɩda. Sɩd me, a Zeezi wẽe yel-bũn a yiib n na n keoog neb nins sẽn paam vʋʋsem sõng zaeebã. Yel-bũn-kãens me bee Matiye sak 25 wã pʋgẽ. Bɩ d gom pʋg-sadb sẽn tar yam la pʋg-sadb sẽn yaa yalembã yel-bũndã yell masã.

PƲG-SADB SẼN TAR YAM LA PƲG-SADB SẼN YAA YALEMBÃ

6. Bõe la pʋg-sadb a nu wã maan n wilg tɩ b tara yam? (Matiye 25:6-10)

⁶ Pʋg-sadbã yel-bũndã pʋgẽ, a Zeezi goma pʋg-sadb piig sẽn yi n na n seg pʋg-paal sɩd yelle. (Mat. 25:1-4) B fãa ra saagdame tɩ b na n paam n tũu pʋg-paal sɩdã n kẽ a yi-kãadmã kibsẽ. A Zeezi yeelame tɩ bãmb b nu n tar “yam” tɩ b nu wã sẽn ketã yaa “yalemba.” Sẽn tar-b yamã ra segla b mens sõma n yaa gũusdb me. B ra seglame n sa n na n gũ pʋg-paal sɩdã, baa a sẽn na n kaoos to-to. B zãa fɩtl-dãmb sẽn na yɩl n paam vẽenem sẽn yaa likã yĩnga. B zãa kaam tʋgdẽ me n paase, pʋg-paal sɩdã sẽn tõe n kaoos n yaool n wa wã yĩnga. Woto, b segla b mens sõma sẽn na yɩl tɩ b fɩtl-dãmbã ra wa ki ye. (Karm-y Matiye 25:6-10.) Pʋg-paal sɩdã sẽn wa n wa wã, pʋg-sadb nins sẽn tar yamã tũ-a lame n kẽ yi-kãadem kibsẽ wã. Woto me, kiris-neb nins sẽn paam vʋʋsem sõng zaeebã sẽn na n kell n maan sɩd la b kell n yɩ gũusdb n tãag Kiristã waoongã na n paamame tɩ b yeel tɩ b zemsa ne tũ a Zeezi sẽn yaa pʋg-paal sɩdã n kẽ a Rĩungã pʋgẽ saasẽ. b (Vẽn. 7:1-3) La pʋg-sadb a nu wã sẽn yaa yalembã yẽ?

7. Bõe n paam pʋg-sadb nins sẽn yaa yalembã, la bõe yĩnga?

⁷ Pʋg-paal sɩdã sẽn wa n wa wã, mikame  tɩ pʋg-sadb a nu wã sẽn yaa yalembã pa segl b mens n sa wa sẽn tar-b yamã ye. B fɩtl-dãmbã wa n dat n kiime, tɩ b pa tar kaam me n na n ning ye. B sẽn wa n bãng tɩ pʋg-paal sɩdã pa na n kaoos la a wa wã, b kẽng n na n tɩ raa kaam. Pʋg-paal sɩdã waame tɩ b nan pa lebg ye. Wakat kãnga, “pʋg-sadb nins sẽn segl n sa wã tũ-a lame n kẽ yi-kãadem kibsẽ wã, tɩ b pag kʋɩlengã.” (Mat. 25:10) Sẽn yɩ bilfu, pʋg-sadb nins sẽn yaa yalembã lebg n waame n dat n kẽ, la pʋg-paal sɩdã yeel-b lame yaa: “Mam pa mi yãmb ye.” (Mat. 25:11, 12) B ra pa segl b mens n na n gũ pʋg-paal sɩdã baa kaoosd to-to ye. Yam-bʋg la sẽn paam-b vʋʋsem sõng zaeebã tõe n dɩke?

8-9. Yam-bʋg la sẽn paam-b vʋʋsem sõng zaeebã tõe n dɩk pʋg-sadbã yel-bũndã pʋgẽ? (Ges-y fotã me.)

⁸ Segl-y y meng sõma la y yɩ gũusda. A Zeezi pa yeel tɩ sẽn paam-b vʋʋsem sõng zaeebã na n yɩɩ sul a yiibu, tɩ sull a ye wã neb segl b mens sõma n na n gũ n tãag dũni-kãngã saabo, tɩ sull a to wã neb pa segl b mens sõma ye. A wilga bũmb ning sẽn na n paam sẽn paam-b vʋʋsem sõng zaeebã, b sã n pa segl b mens sõma n na n kell n maan sɩd n tãag saabã. B sã n pa segl b mens sõma, b pa na n paam keoorã ye. (Zã 14:3, 4) Pa reem yell ye! D saagdame n na n tɩ vɩɩmd saasẽ tɩ yaa tẽngã zug me, d fãa segd n kelga pʋg-sadbã yel-bũndã keoogrã neere. D ned kam fãa segd n segla a meng sõma la a kell n yɩ gũusda, sẽn na yɩl n tõog toog hal n tãag saabã.—Mat. 24:13.

⁹ A Zeezi sẽn wẽ pʋg-sadbã yel-bũndã n na n wilg tɩ d segd n segla d mens sõma la d yɩ gũusdbã poore, a wẽe talã-rãmbã yel-bũndã. Yel-bũn-kãng wilgdame tɩ d segd n tʋma ne yẽesem.

TALÃ-RÃMBÃ

10. Bõe la tʋm-tʋmdb a yiibã maan n wilg tɩ b maanda sɩda? (Matiye 25:19-23)

¹⁰ Talã-rãmbã yel-bũndã pʋgẽ a Zeezi goma tʋm-tʋmdb a yiib sẽn maan sɩd  ne b zu-soab yelle, la a to sẽn pa maan sɩd yelle. (Mat. 25:14-18) Tʋm-tʋmdb a yiibã tʋma wʋsg n kẽes b zu-soabã yõodo, tɩ wilg tɩ b maanda sɩd ne-a. Nand t’a tog sor n kẽng tẽn-zẽnga, a kõ-b-la talã-rãmba. Talã yaa ligd wʋsgo. Tʋm-tʋmdb a yiibã tʋma ne b sũur fãa la ne yam. Rẽ n so tɩ b zu-soabã sẽn wa n na n lebg n wa wã tɩ b paama yõod sẽn zem ligd ning a sẽn da kõ-bã. B zu-soabã pẽg-b lame n yeel tɩ b wa ‘naag-a n maan sũ-noogo.’ (Karm-y Matiye 25:19-23.) La tʋm-tʋmd a tãab-n-soabã yẽ? Bõe la a maan ne ligd ning a zu-soabã sẽn kõ-a wã?

11. Bõe la b maan tʋm-tʋmd ning sẽn yaa “kʋɩɩmã,” la bõe yĩnga?

¹¹ B kõo tʋm-tʋmd a tãab-n-soabã talã a ye. La a ra yaa “kʋɩɩma.” A zu-soabã ra ratame t’a tall talã wã n tʋm ne yam. La a tuu bok n bus talã wã. Zu-soabã sẽn wa n lebg n wa wã, a mikame tɩ tʋm-tʋmdã pa paam yõod ye. Sẽn paase a ra pa tar yam-sõng ye. A zãgsa a na bõos a zu-soabã sugr a sẽn pa tõog t’a paoongã paasã yĩnga, n dõd-a t’a yaa “ned yell sẽn yaa toogo.” Zu-soabã sũur yika wʋsg ne-a. A pʋd n deega a talã wã la a rig-a n yiis a zakẽ wã.—Mat. 25:24, 26-30.

12. Tʋm-tʋmdb a yiibã sẽn maan sɩdã makda ãnda rãmb rũndã-rũndã?

¹² Tʋm-tʋmdb a yiibã makda kiris-neb nins sẽn paam vʋʋsem sõng zaeeb n maand sɩdã. A Zeezi sẽn yaa Zu-soabã na n yeel-b lame tɩ b wa ‘naag yẽ n maan sũ-noogo.’ B na n paama b keoorã saasẽ, rat n yeel tɩ pipi kũum vʋʋgrã. (Mat. 25:21, 23; Vẽn. 20:5a) La a Zeezi sẽn gom tʋm-tʋmd sẽn yaa kʋɩɩmã yellã yaa sẽn na n keoog sẽn paam-b vʋʋsem sõng zaeebã. Bõe yĩng tɩ d yet woto?

13-14. Talã-rãmbã yel-bũndã wilgda sẽn paam-b vʋʋsem sõng zaeebã bõe? (Ges-y fotã me.)

¹³ Tʋm-y ne yẽesem. A Zeezi sẽn wẽ talã-rãmbã yel-bũndã ne pʋg-sadbã yel-bũndã pa sẽn na n wilg tɩ sẽn paam-b vʋʋsem sõng zaeebã na n wa lebga kʋɩɩmb ye. Yaa sẽn na n wilg bũmb ning  sẽn na n paam-ba, b sã n bas tɩ b yẽesmã booge. B sã n bas tɩ b yẽesmã booge, b pa na n tõog n wilg tɩ b zemsa ne ‘Wẽnnaam boollã la b yãkrã’ ye. B pa na n sak tɩ b kẽ Rĩungã pʋgẽ saasẽ me ye.—2 Pɩy. 1:10.

¹⁴ A Zeezi wẽe pʋg-sadbã yel-bũndã ne talã-rãmbã yel-bũndã n na n wilg vẽeneg tɩ kiris-neb nins sẽn paam vʋʋsem sõng zaeebã fãa segd n segla b mens n yɩ gũusdba, la b tʋm ne yẽesem. La a Zeezi togsa bũmb a to n na n keoog sẽn paam-b vʋʋsem sõng zaeebã. A sẽn yeel bũmb ning Matiye 24:40, 41 wã me gomda sẽn paam-b vʋʋsem sõng zaeebã yaoolem bʋ-kaoorã yelle.

ÃND DÃMB LA B NA N ‘DƖKE’?

15-16. Bõe yĩng tɩ d tõe n yeel tɩ Matiye 24:40, 41 wilgdame tɩ sẽn paam-b vʋʋsem sõng zaeebã segd n yɩɩ gũusdba?

¹⁵ Nand t’a Zeezi wẽ yel-bũn a tãabã a wilga sẽn paam-b vʋʋsem sõng zaeebã yaoolem bʋ-kaoorã sẽn na n yɩ to-to, tɩ b bãng sẽn tat-b Wẽnnaam yamã n bake. A goma rap a yiib sẽn tʋmd pʋʋgẽ yelle, la pagb a yiib sẽn be neerẽ n werd me yelle. Zĩis a yiibã fãa yaa neb a yiib sẽn tʋmd tʋʋm-yɛnga, la a Zeezi yeelame tɩ “b rɩka a yembr n bas a to wã.” (Karm-y Matiye 24:40, 41.) Rẽ poore a sagla a karen-biisã n yeel yaa: “Woto wã, bɩ y kell n gũ, bala yãmb pa mi yãmb Zu-soabã sẽn wat daar ning ye.” (Mat. 24:42) Pʋg-sadbã yel-bũndã baasgẽ, a Zeezi yeela goam sẽn wõnd woto. (Mat. 25:13) A goamã yekda taab bɩ? D tõe n yeelame tɩ yekda taaba. Yaa neb nins sẽn sɩd paam vʋʋsem sõng zaeeb n maand sɩdã bal la b na n ‘dɩke,’ t’a Zeezi reeg-b Wẽnnaam Rĩungã pʋgẽ saasẽ.—Zã 14:3.

¹⁶ Yɩ-y ned sẽn yaa gũusda. Ned ning fãa sẽn paam vʋʋsem sõng zaeebã n pa kell n yɩ gũusd pa na n paam tɩ b naag-a “nin-tũusdsã” sʋk ye. (Mat. 24:31) Neb nins sẽn saagd n na n wa vɩɩmd wakat sẽn kõn sa tẽngã zugã me segd n kell n yɩɩ gũusdba, la b kell n maan sɩda.

17. A Zeova sã n yãk ned rũndã-rũndã n zae-a ne a vʋʋsem sõngã, bõe yĩng tɩ pa sãamd d sũuri?

¹⁷ D sẽn mi a Zeova sõma wã, d miime t’a na n kaoo bʋʋdã tɩrga. A Zeova sã n yãk neb sẽn maand-b sɩdã sʋk n zae ne a vʋʋsem sõngã rũndã-rũndã, pa sãamd d sũur ye. c D tẽegda a Zeezi sẽn yeel bũmb ninga, a sẽn wa n wẽ yel-bũnd n gom tʋm-tʋmdb sẽn tʋmd viyn pʋʋgẽ yellã. A yeelame tɩ kẽer sɩnga tʋʋmã zaabr wakat a nu. (Mat. 20:1-16) Neb nins b sẽn bool tɩ b sɩng tʋʋmã yaoolmã yaoodã ne sẽn sɩng-b pipi wã yɩɩ bõn-yɛnga. Woto me, sẽn wa n yaa wakat ning fãa la b yãk ned n zae-a ne vʋʋsem sõngã, a sã n kell n maan sɩd n tãag saabã a na n paama keoorã saasẽ.

KELG-Y KEOOGRÃ

18-19. Bõe la d bãng-yã?

¹⁸ Bõe la d bãng-yã? Piisã la bʋʋsã yel-bũndã wilgdame tɩ sẽn saagd-b n na n wa vɩɩmd wakat sẽn kõn sa tẽngã zugã segd n kell n maana sɩd ne a Zeova masã menga, la to-kãsengã sẽn watã sasa. Wakat kãng sã n ta a Zeezi na n yeelame tɩ sẽn maan-b sɩd ne yẽ wã segda ne “vɩɩm sẽn ka sɛtã.”—Mat. 25:46.

¹⁹ D leb n yãa yel-bũn a yiib sẽn keoogd sẽn paam-b vʋʋsem sõng zaeebã. Pʋg-sadbã yel-bũndã a Zeezi sẽn wẽ wã pʋgẽ,  a wilgame tɩ bãmb b nu n tall yam. B ra yaa gũusdba, n segl b mens sõma n na n gũ pʋg-paal sɩdã, baa a sẽn na n kaoos to-to fãa. La pʋg-sadb nins sẽn yaa yalembã pa segl b mens sõma ye. Rẽ n so tɩ pʋg-paal sɩdã pa sak tɩ b kẽ a yi-kãadem kibsẽ wã ye. Tõnd me segd n segla d mens n na n gũ hal t’a Zeezi wa kɩt tɩ dũni-kãngã sa, baa sẽn na n kaoos to-to. D yãame me t’a Zeezi talã-rãmbã yel-bũndã pʋgẽ, tʋm-tʋmdb a yiib n tʋm ne yẽesem. B wɩsga b mens n tʋm n kõ b zu-soabã t’a sũur yɩ noog ne-ba. La b riga tʋm-tʋmd ning sẽn yaa kʋɩɩmã. Wilgda tõnd bõe? D segd n kell n tʋma a Zeova tʋʋmdã n tãag saabã. Sẽn na n baase, d yãa sẽn paam-b vʋʋsem sõng zaeebã sẽn segd n kell n yɩ gũusdb to-to n wa paam t’a Zeezi ‘rɩk-b’ tɩ b tɩ reeg b keoorã saasẽ. B gũuda wakat ning b sẽn na n ‘tigim-b’ a Zeezi nengẽ saasẽ wã ne b sũur fãa. Armagedõ zabrã poore, b na n zĩnda Pe-bilã yi-kãadmẽ wã n yɩ a Zeezi pʋg-paala.—2 Tes. 2:1; Vẽn. 19:9.

20. Bõe la a Zeova na n maan n kõ neb nins sẽn kelgd a keoogrã?

²⁰ Baa bʋ-kaoorã daar sẽn kolgd tao-tao wã, d pa segd n yɛɛs ye. D sã n kell n maan sɩda d Ba sẽn be saasẽ wã sẽn nong-dã na n kõ-d-la “pãng ning sẽn yɩɩd ninsaal rẽndã” tɩ d tõog n “yals Ninsaal biigã taoore.” (2 Kor. 4:7; Luk 21:36) D saagd n na n tɩ vɩɩmda saasẽ tɩ yaa tẽngã zug me, d sã n kelg keoogr ning a Zeezi sẽn tũnug ne a yel-bũnã n taas tõndã, d na n taa d Ba wã yam. A Zeova maan-neerã sẽn yaa kãsengã yĩnga, a na n gʋlsa d yʋʋrã “vɩɩm sebrã pʋgẽ.”—Dãn. 12:1; Vẽn. 3:5.