ZÃMSGÃ YĨNGA 39
YƖƖLL 125 Bark bee nimbãan-zoɛtbã zutu
Yɩ-y kõatb tɩ rẽ la y na n paam sũ-noogo
“Kũun wata ne sũ-noog n yɩɩd reegre.”—TƲƲ. 20:35.
D SẼN NA N BÃNGE
D na n yãa bũmb toor-toor d sẽn tõe n maan n sõng d taabã, la rẽ sẽn kõt-d sũ-noogã võore.
1-2. A Zeova naana tõnd tɩ d sã n kõt d taabã kũun bɩ kõt-d sũ-noog n yɩɩda. Wãn to la rẽ nafd tõndo?
A ZEOVA naana ninsaalbã tɩ b sã n kõt b taabã kũun bɩ kõt-b sũ-noog n yɩɩd b sã n deegdẽ. (Tʋʋ. 20:35) Woto rat n yeelame tɩ d sã n deeg kũuni pa kõt-d sũ-noog bɩ? Ayo. Tõnd sã n paam tɩ b kõ-d kũuni, d sũur noomame. La sã n yaa tõnd n kõ kũuni noom-d lame n yɩɩda. Sɩd-sɩda, a Zeova sẽn naan-d woto wã yaa d nafr yĩnga?
2 A Zeova sẽn naan tõnd woto wã kɩtame tɩ tõnd mengã tõe n paas d sũ-noogã. D tõe n bao bũmb toor-toor d sẽn na n maan n sõng d taabã tɩ paas d sũ-noogã. A Zeova sẽn naan tõnd woto wã pa noom-y sɩda?—Yɩɩn. 139:14.
3. Bõe yĩng tɩ b yetẽ t’a Zeova yaa “Wẽnnaam sẽn yaa sũ-noog soaba”?
3 Biiblã sẽn yeel tɩ neb nins sẽn kõt b taabã tara sũ-noogã yĩnga, d tõe n wʋma b sẽn yeel t’a Zeova yaa “Wẽnnaam sẽn yaa sũ-noog soabã” võor nana-nana. (1 Tɩm. 1:11) A Zeova n yɩ pipi n kõ kũuni, tɩ ned kae n kõt kũun n ta-a me ye. Bala “yaa yẽ maasem yĩng la tõnd vɩya, n kẽnd la d beẽ” wa a Poll sẽn yeelã. (Tʋʋ. 17:28) Sɩd me, “kũun sẽn yaa sõma buud fãa, la kũun sẽn zems zãng buud fãa yita” a Zeova nengẽ.—Zak 1:17.
4. Bõe n na n sõng-d tɩ d sũ-noogã paase?
4 Yaa vẽeneg tɩ tõnd fãa rat n paama sũ-noog ning kũun sẽn wat ne wã. Sẽn na yɩl n paam sũ-no-kãnga, d segd n dɩka a Zeova togs-n-taar n yɩ kõatba. (Efɛɛ. 5:1) Sõs-kãngã pʋgẽ, d na n goma a Zeova sẽn kõ mak-sõng kũunã wɛɛngẽ wã yelle. D leb n na n bao n bãnga d sẽn tõe n maan to-to, d sã n wa getẽ tɩ neb a taabã pa nand bũmb nins d sẽn maand n kõt-bã. Rẽ na n sõng-d lame tɩ d ket n kõt d taabã kũun tɩ d sũ-noogã paasdẽ.
RƖK-Y-YÃ A ZEOVA TOGS-N-TAARE, N YƖ KÕATBA
5. Bõe n yaa tɩlɛ ne-d t’a Zeova kõt-do?
5 Bõe la a Zeova kõt tõnd ne sũ-noogo? Ad bũmb kẽer a sẽn maande. A Zeova kõt-d-la bũmb nins sẽn yaa tɩlɛ ne-dã. Tõe tɩ d pa vɩ naar pʋgẽ ye. La a Zeova maasem yĩnga, d paamda bũmb nins sẽn yaa tɩlɛ ne-dã. Wala makre, a kɩtdame tɩ d paamd rɩɩbo, fut la gãag zĩiga. (Yɩɩn. 4:8; Mat. 6:31-33; 1 Tɩm. 6:6-8) A Zeova pa kõt tõnd bõn-kãens a sẽn get tɩ yaa tɩlɛ ne-dã yĩng bal ye? Woto wã, bõe yĩng t’a kõt-d bõn-kãense?
6. Matiye 6:25, 26 goamã sõngd-d lame tɩ d bãng bõe?
6 Koɛɛg-koɛɛga, a Zeova kõt-d-la bũmb nins sẽn yaa tɩlɛ ne-dã a sẽn nong-dã yĩnga. Tẽeg-y bũmb ning a Zeezi sẽn yeel tɩ be Matiye 6:25, 26. (Karm-y-yã.) A Zeezi goma bõn-naandsã yelle. Wala makre, a goma bõn-yɩgdɩ wã yell n yeel tɩ “bãmb pa bʋte, b pa kẽebde, la b pa tigsd bao pʋsẽ me” ye. La ges-y bũmb ning a sẽn paasã: “Yãmb Ba sẽn be saasẽ wã rɩlgd-b lame.” Rẽ poore a sokame yaa: “Yãmb yõod pa yɩɩd bõn-yɩgdɩ wã sɩda?” Bõe la a Zeezi rat tɩ d bãnge? A Zeova nifẽ neb nins sẽn tũud-a wã yõod yɩɩda bõn-yɩgdɩ wã la rũmsã hal zĩig sẽn zãre! A Zeova sã n geta bõn-yɩgdɩ wã la rũmsã yelle, d tõe n kɩsa sɩd t’a na n gesa tõnd yell n yɩɩda. A Zeova geta a zakã rãmb yell ne nonglem wa rao sẽn nong a zak rãmb sẽn get-b yell sõma to-to wã.—Yɩɩn. 145:16; Mat. 6:32.
7. Bõe la d tõe n maan n dɩk a Zeova togs-n-taar n yɩ kõatba? (Ges-y fotã me.)
7 Tõnd me tõe n dɩka a Zeova togs-n-taar n sõngd d taabã tɩ b paamd bũmb nins sẽn yaa tɩlɛ ne-bã, d sẽn nong-bã yĩnga. Wala makre, yãmb mii y tẽed-n-taag sẽn dat sõngr sẽn na yɩl n paam rɩɩb la fut bɩ? A Zeova tõe n tũnuga ne yãmb n sõng ned a woto. Neb wʋsg miime t’a Zeova nin-buiidã nong n sõngda taab sabab-wẽns sasa. Wala makre, koronavirisã bã-loangdgã sasa, saam-biis la saam-bi-pogs kõo b tẽed-n-taas rɩɩbo, fut la bũmb a taaba. D tẽed-n-taas kẽer me kõo kũun n teel tʋʋmdã d sẽn tʋmd dũniyã gill zugã. Rẽ kɩtame tɩ d tõog n sõng d tẽed-n-taas dũniyã gill zug sabab-wẽns sasa. B tũuda Ebre-rãmb 13:16 sẽn yet bũmb ningã. Be b yetame yaa: “Bɩ y ra yĩm tɩ maan sẽn yaa neere, la y ra yĩm tɩ pʋɩ y sẽn tarã ne neb a taab ye. Bala Wẽnnaam sũur nooma ne maan-kãensã buudu.”
Tõnd fãa tõe n dɩka a Zeova togs-n-taare, n yɩ kõatba (Ges-y sull a 7)
8. Wãn to la a Zeova sẽn kõt tõnd pãngã nafd tõndo? (Filip rãmbã 2:13)
8 A Zeova kõta pãnga. A Zeova pãngã ka koak ye. A kõta neb nins sẽn tũud-a ne b sũy fãa wã pãnga. (Karm-y Filip rãmb 2:13.) Yãmb zoe n pʋʋsa a Zeova n kos t’a kõ-y pãng tɩ y tõog n kell n sak-a makr taoore, wall t’a kõ-y pãng tɩ y tõog toog zu-loɛɛg taoor bɩ? Tõe me tɩ y zoe n kos-a lame t’a kõ-y pãng tɩ y tõog n tʋm tʋʋm nins y sẽn segd n tʋmã. Y sã n yã t’a Zeova leoka y pʋʋsgã n kõ-y pãnga, y tõe n yeela wa tẽn-tʋmd a Poll yaa: “Bũmb fãa pʋgẽ, mam tara pãnga, sẽn kõt-a maam pãngã maasem yĩnga.”—Fili. 4:13.
9. Bõe la d tõe n maan ne d pãngã tɩ wilg tɩ d rɩkda a Zeova togs-n-taare? (Ges-y fotã me.)
9 Baa tõnd sẽn yaa neb sẽn pa zems zãngã, d tõe n dɩka a Zeova togs-n-taar n sõngd d taabã ne d pãngã. Yaa sɩd tɩ tõnd pa tõe n kõ neb a taabã pãng wa a Zeova ye. La d tõe n tũnuga ne d pãngã n sõng-ba. Wala makre, d tõe n tɩ raa bũmb n kõ d tẽed-n-taag sẽn kʋʋl wall sẽn yaa koamsa, pa rẽ bɩ d sõng-a n tʋm a zakã tʋʋma. Sã n tõe bɩ y sõngd ne Rĩungã roog yɩlgr la a yell gesgo. D sã n tũnugd ne d pãngã n maand woto, nafda d tẽed-n-taasã wʋsgo.
D tõe n tũnuga ne d pãngã n sõng neb a taabã (Ges-y sull a 9)
10. Wãn to la d tõe n tũnug ne d no-goamã n paas d taabã pãnga?
10 Tẽeg-y me tɩ y tõe n tũnuga ne y no-goamã n paas ned pãnga. Yãmb mii ned y sẽn na n pẽg tɩ naf-a bɩ? Yãmb mii ned sẽn dat belsg bɩ? Sã n yaa woto, bɩ y wilg a soabã t’a yell pak-y lame. Y tõe n tɩ kaag-a lame, n bool-a ne telefõnne, n gʋls lɛtr n tool-a, pa rẽ bɩ n gʋls-a imell wall mesaaze. Pa tɩlɛ tɩ y gom wʋsg ye. Y sã n pelg y pʋg n togs-a goam a wãn bala, tõe n kenga a raood t’a kell n maan sɩd ne a Zeova, wall kɩt t’a tẽed manegre.—Yel. 12:25; Efɛɛ. 4:29.
11. D sã n kos a Zeova yam, a manesem yaa wãn to?
11 A Zeova kõta yam. Karen-biig a Zak yeelame yaa: “Ned sã n be yãmb sʋkã tɩ yam paoog-a bɩ a kell n kos Wẽnnaam t’a na n kõ-a lame. Bala a kõta nebã fãa ne yamleoog n pa ningd taal ye.” (Zak 1:5.) Woto wilgdame t’a Zeova pa solgd a yamã n pa rat tɩ ned paam ye. A kõta a yamã ne sũ-noogo. A Zak yeelame t’a Zeova sã n na n kõ a yamã, a kõtame “n pa ningd taal ye.” A pa rat tɩ d tags tɩ d sẽn dat a saglsã yaa d sẽn ka võor yĩng ye. A pʋd n datame tɩ d bao sagls a nengẽ.—Yel. 2:1-6.
12. Wãn to la d sõngd neb a taabã tɩ bãmb me bãngd bũmb nins tõnd sẽn mi wã?
12 La tõnd yẽ? D tõe n dɩka a Zeova togs-n-taar n kõt d taabã yam bɩ? (Yɩɩn. 32:8) A Zeova Kaset rãmbã paamda segb toor-toor n tõe n sõng neb a taabã tɩ bãmb me bãng bũmb nins b sẽn mi wã. Wala makre, d wae n sõngda neb nins sẽn nan sɩng koɛɛgã mooneg paalmã tɩ bãmb me paamd minim. Kãsem-dãmbã maagda b yĩng n sõngd kãsem-sõngdbã la saam-biis a taabã tɩ b bãngd b sẽn tõe n tʋm tʋʋm nins b sẽn kõt-b tigingã pʋgẽ wã sõma to-to. Sẽn paase, sẽn tar-b minim meebã la rotã yell gesg wɛɛngẽ wã zãmsda sẽn pa tar-b minimã, tɩ b sõngd n met siglgã rot la b get b yelle.
13. D sã n wa segd n sõng neb a taab tɩ b paam minim, wãn to la d tõe n dɩk a Zeova togs-n-taare?
13 Y sã n wa segd n sõng neb a taab tɩ b bãng bũmb nins yãmb sẽn mi wã, bɩ y modg n dɩk a Zeova togs-n-taare. Tẽeg-y tɩ yaa ne sũ-noog la a Zeova kõt yam. Tõnd me segd n sõnga neb a taabã ne yamleoog tɩ b paam minim. D pa na n solg bũmb kẽer d sẽn mi n pa rat n wilg nebã, d sẽn yɛɛsd tɩ ned ning d sẽn zãmsdã na wa n deeg d zĩig yĩng ye. D leb n pa na n yeel yaa: “Ned baa a ye pa zãms maam ye. Bɩ yẽ me zãms a toore.” Tagsg a woto pa segd n zĩnd a Zeova nin-buiidã sʋk ye. Yaa ne sũ-noog la d wilgd neb a taabã bũmb nins fãa d sẽn mi wã la d maand d sẽn tõe fãa b zãmsgã yĩnga. (1 Tes. 2:8) D saagdame tɩ bãmb me na paam minim sõma n tõog n zãms neb a taaba. (2 Tɩm. 2:1, 2) D sã n sõngd neb a taabã ne sũ-noog tɩ b paamd bãngre, tõnd ne bãmb fãa na n paama yam la sũ-noogo.
SÃ N WA WÕND NEB A TAABÃ PA NAND D KŨUNÃ
14. Neb wʋsg manesem yaa wãn to, d sã n maan bũmb n sõng-ba?
14 D sã n kõ ned kũun wall yaa bũmb la d maan n sõng-a, sẽn yɩɩd fãa sã n yaa d tẽed-n-taaga, a wae n pʋʋs-d-la barka. A tõe n gʋlsa lɛtr n pʋʋs-d barka, wall a maan bũmb a to n wilg t’a sũur nooma ne kũunã. (Kolo. 3:15) Ned sã n maan bũmb a woto n pʋʋs-d barka, paasda d sũ-noogã.
15. D sã n kõ ned kũun t’a pa wilg t’a nandame, bõe la d tõe n tẽege?
15 La d tõe n maana bũmb n kõ ned t’a pa pʋʋs-d bark ye. Wakat ninga, tõe n wõnda neb a taabã pa nand bũmb nins d sẽn maand n kõt-bã, pa rẽ bɩ yaa wa b pa mi tɩ rẽ rɩɩ sẽk la ligdi, la tɩ d maana modgr wʋsg ye. Sã n wa yaa woto, bõe n tõe n kɩt tɩ d sũ-noogã ra booge, wall tɩ d ra wa lebg sũ-to-neba? Tẽeg-y Tʋʋm 20:35 sẽn yaa vɛrse ning zug d sõsgã sẽn tikã sẽn yet bũmb ningã. D sã n kõ ned kũuni, pa a soabã manesmã n kõt tõnd sũ-noogã ye. D tõe n ket n kõta ne sũ-noogo, baa sã n wõnd neb a taabã pa nand d kũunã. Wãn to? D gom bũmb a wãn yelle.
16. Bõe n tõe n sõng-d tɩ d ket n kõt ne sũ-noogo?
16 Tẽeg-y tɩ y rɩkda a Zeova togs-n-taare. A kõta nebã fãa bõn-sõma, baa neb nins sẽn pa nand rẽ wã. (Mat. 5:43-48) A Zeova pʋlmame tɩ tõnd me sã n kõt nebã n “pa gũud tɩ b wa lebs tõnd baa fʋɩ,” d “keoorã na n yɩɩ kãsenga.” (Luk 6:35) “Baa fʋɩ” wã tõe n yɩɩ bark pʋʋsg me. B pʋʋs-y-la bark tɩ b pa pʋʋs-y me, a Zeova na n keo-y-la y sẽn maand y taabã neerã yĩnga, bala y ‘kõta ne sũ-noogo.’—Yel. 19:17; 2 Kor. 9:7.
17. Sẽn yɩɩd fãa bõe yĩng tɩ d rat n kõt neb a taabã kũuni? (Luk 14:12-14)
17 Bũmb a to sẽn tõe n sõng-d tɩ d rɩk a Zeova togs-n-taar kũunã wɛɛngẽ, yaa d sẽn na n tũ saglg ning a Zeezi sẽn kõ tɩ be Luk 14:12-14. (Karm-y-yã.) Yaa sɩd tɩ d sã n bool neb sẽn tõe n wa bool tõnd n lebse, pa rẽ bɩ d maan bũmb n kõ neb sẽn tõe n wa maan a buud n kõ-do, pa wẽng ye. La d tõe n wa mikame tɩ d wae n kõta neb a taabã kũuni, d sẽn saagd tɩ bãmb me na wa n maan bũmb n lebs-dã yĩnga. D sã n wa mik tɩ yaa woto, d maanda wãna? Yɩta sõma tɩ d tũ a Zeezi saglgã. D tõe n baoo kũun n kõ ned d sẽn mi t’a pa tõe n wa maan-d neer n lebs ye. Rẽ la d na n paam sũ-noogo, bala d miime tɩ d rɩkda a Zeova togs-n-taare. D sã n kõt kũun n pa gũudẽ tɩ b wa maan-d neer n lebse, d sũur na n yɩɩ noogo, baa d sã n kõ ned kũun t’a pa pʋʋs-d barka.
18. Bõe la d segd n ket n maandẽ, la bõe yĩnga?
18 Ra tags-y tɩ neb a taabã yaa sõm-zɩtb ye. (1 Kor. 13:7) D sã n kõ ned kũun t’a pa wilg a sũ-noogo, d tõe n soka d meng yaa: ‘A sũur sɩd pa noom ne kũunã bɩ, bɩ a yĩmame bal n pa pʋʋs barka?’ Tõe tɩ yaa bũmb kẽer yĩng la a sẽn pa tõog n pʋʋs-d bark wa d sẽn da tagsdã. Neb kẽer sũur tõe n yɩɩ noog ne kũuni, la yaa toog ne-b tɩ b wilg rẽ. B tõe n sõnga nina t’a getẽ tɩ yaa yãnde, sẽn yɩɩd fãa a sã n da tara tõog n sõngd neb a taabã, n pa le tar tõog masã. La d sã n sɩd nong d tẽed-n-taasã, d pa na n tall tags-kɛg b zut ye. D na n ket n kõta ne sũ-noogo.—Efɛɛ. 4:2.
19-20. Yɩ kõatbã wɛɛngẽ, bõe yĩng tɩ yaa tɩlɛ tɩ d tall sũ-mare? (Ges-y fotã me.)
19 Tall-y sũ-mare. Rĩm a Salomo sẽn yɩ yam soabã yeelame yaa: “Lob f bur koom zugu, bala rasem wʋsg poore f na n le paam-a lame.” (Koɛ. 11:1) Gom-kãensã wilgdame tɩ wakat ninga, f sã n kõ ned kũuni tõe n kaoosa “rasem wʋsg” t’a yaool n wa wilg tɩ yɩ-a-la noogo. Ad kibar sẽn wilgd rẽ.
20 Yʋʋm a wãn sẽn looge, tigims sull yel-gɛt a ye pag n gʋls lɛtr n na n keng saam-bi-poak sẽn nan deeg lisg paalem raoodo. Lɛtrã pʋgẽ a wilg-a lame tɩ tara yõod tɩ d kell n maan sɩd ne a Zeova. Na maan yʋʋm a nii poore, saam-bi-poakã gʋlsa lɛtr n leok-a. Lɛtrã pʋgẽ a yeelame yaa: “Mam tagsame tɩ yɩta sõma tɩ m gʋls n wilg-f tɩ baa fo sẽn pa mi wã, yʋʋmã sẽn loogã pʋgẽ fo sõnga maam wʋsgo.” A paasame: “[Fo goamã] ra kengda raood wʋsgo, la yaa vɛrse wã n kẽ maam n yɩɩda. M pa tol n yĩm-a ye.” a Saam-bi-poakã wilg-a-la zu-loees kẽer a sẽn mao ne, la a yeel yaa: “Wakat ninga, m da mi n komsa raoodo, n dat n bas fãa tɩ sa, n pa le yɩ a Zeova Kaset soab meng ye. La wakat fãa m da tẽegda vɛrse ning fo sẽn ning f lɛtrã pʋgẽ wã, tɩ sõngd-m tɩ m pa komsd raood n bas ye.” A paasame: “Yʋʋm a nii wã pʋgẽ, baa fʋɩ pa keng mam daood n ta fo lɛtrã la vɛrse ning fo sẽn gʋls be wã ye.” Mams-y n ges-y tigims sull yel-gɛtã pag sũur sẽn yɩ noog to-to a sẽn deeg lɛtr-kãngã “rasem wʋsg” poorã. Tõnd me tõe n maana ned neer tɩ kaoos t’a yaool n wa wilg tɩ yɩ-a-la noogo.
D tõe n kõo ned kũun tɩ kaoos t’a yaool n wa pʋʋs-d barka (Ges-y sull 20) b
21. Bõe yĩng tɩ y rat n kell n dɩk a Zeova togs-n-taar n yɩ kõata?
21 A Zeova naana tõnd tɩ d sã n kõt kũun bɩ kõt-d sũ-noog n yɩɩd d sẽn na n deege, wa d sẽn zoe n yã wã. D sã n sõngd d tẽed-n-taasã d sũur nooma ne d menga. B sã n pʋʋs tõnd barka, d sũ-noogã paasdame. La baa sẽn deeg-a kũunã sã n pa pʋʋs barka, d sũur tõe n yɩɩ noogo. Bala d miime tɩ d maana sẽn yaa tɩrga. Ra tol-y n yĩm-y tɩ sẽn wa n yaa bũmb ning fãa la y kõ-yã, “a Zeova tõe n kõo yãmb sẽn yɩɩd rẽ” ye. (2 Kib 25:9) D pa tol n tõe n yɩ kõat n yɩɩg a Zeova ye. Sẽn paase, ned pa tõe n keo tõnd tɩ ta a Zeova ye. Woto wã, bɩ d ket n dɩkd d Ba sẽn be saasẽ wã togs-n-taare.
YƖƖLL 17 D sõng nebã ne yamleoogo
b FOT-RÃMBÃ BILGRI: Wilgda tigims sull yel-gɛtã pag sẽn maan bũmb ningã. A gʋlsa lɛtr n kõ saam-bi-poak n na n keng a raoodo. Yʋʋm wʋsg poore, saam-bi-poakã tool-a-la lɛtr n na n wilg t’a sũur nooma ne a sẽn maan bũmb ningã.
