A Paul: Yʋʋmd 1985 sɩpaolg kiuugã pʋgẽ, d kẽe sɩlg n dabd Liberia sẽn be Afirik deluwɛstã. D sẽn lebg misioneer-dãmbã poore, be la b tʋm tõnd pipi tɩ d sũur da yaa noogo. Tõnd sẽn kẽ sɩlg ningã tek n siga Senegall t’a Anne yeel yaa: “Ka la lɛɛr a ye tɩ d taa Liberia.” Rẽ poore b mooname n yeele: “Sẽn dabd-b Liberia wã segd n yii sɩlgã pʋgẽ. Sodaas n dat n deeg naamã beenẽ tɩ kɩt tɩ d pa tõe n sig be ye.” D paa ne misioneer-dãmb nins sẽn da be Senegallã n maan rasem piiga. D ra kelgda Liberia kibayã tɩ b gomd kũ-rãmb b sẽn wʋkd ne kamyõ-rãmb yelle, la tɩ tẽngã taoor dãmb yiisa noor n yeel tɩ ned pa segd n yi a zakẽ yʋng ye. Ned sã n kɩɩs n yi b tãood-a-la ne bug-raoogo.

A Anne: Maam ne m sɩdã yaa neb sẽn maand gũusg wʋsgo. Sɩd me, m sẽn wa n yaa bilfã b ra boond-m lame t’a Annie Rabeema. M sã n da rat n pɩʋʋg sor menga, m yɛɛsda wʋsgo. La d ra yãka yam n na n kẽng zĩig ning b sẽn tʋm tõndã.

A Paul: Mam ne a Anne fãa roga Ãngeletɛɛr wĩndg sẽn lʋɩtẽ sẽnesã. Mam sẽn dog zĩig ningã ra zemsa kɩlo a nii ne a Anne sẽn dogẽ wã. Mam doagdbã ra sagend-m lame tɩ m kẽes m meng zãng a Zeova tʋʋmdã pʋgẽ, t’a Anne ma wã me ra maand woto. Rẽ n so tɩ d sẽn karem kolɛɛsã n sa wã bala, d fãa lebga so-pakdba. D roagdbã teel-d-la d sẽn yãk yam n na n kẽes d mens zãng a Zeova tʋʋmdã pʋgẽ d vɩɩmã tõrã. M sẽn wa n tar yʋʋm piig la a wɛ wã m paamame tɩ b bool-m Betɛllẽ wã. D kẽe kãadem yʋʋmd 1982 t’a Anne bʋʋg maam Betɛllẽ wã.

A Anne: D ra nonga Betɛllã tʋʋma, la d ra sɩng n dat n tɩ sõnga zĩig koe-moondbã sẽn pa waooge. D sẽn naag neb sẽn da yaa misioneer-dãmb n tʋm Betɛllẽ wã kɩtame tɩ d maneg n dat rẽ ne d sũur fãa. Na maan yʋʋm a tãabo, d ra pʋʋsda rẽ yĩng yʋng fãa. Yʋʋmd 1985 wã d sũur yɩɩ noog wʋsgo, b sẽn bool-d tɩ d na n tɩ maan Galaad lekollã 79 soabã. Lekollã poore, b tʋma tõnd Liberia sẽn be Afirik deluwɛstã.

A Paul: B sẽn wa n kõ sor tɩ sɩlg tõe n le kẽng Liberia wã, d kẽe pipi sɩlg ning sẽn kẽng be  wã. Rabeem ra ket n tara nebã, tɩ b ra ket n nan pa kõ sor tɩ nebã tõe n yi b zagsẽ wã yʋng me ye. Nebã ra yɛɛsda wʋsgo, hal tɩ mobill sã n da maan bʋr raag sɛɛgẽ bɩ lebg wãamb zoe n bas a biiga. Sẽn na yɩl tɩ d yam gãand bãane, d ra karemda Yɩɩn-sõamyã sebrã daar fãa yʋngo. Baa ne rẽ, d sũur da nooma wʋsg b sẽn tʋm-d Liberia wã. A Anne ra yit n moonda koɛɛgã daar fãa tɩ mam da tʋmd Betɛllẽ wã ne a John Charuk. a A minimã ne a sẽn da mi saam-biisã yɛl sẽn yaa to-to wã sõnga maam tɩ m bãng bũmb wʋsgo.

A Anne: Pa yã n kaoos la d sũur yɩ noog ne d sẽn kẽng Liberia wã ye. Bõe yĩnga? Yaa d tẽed-n-taasã yĩnga. B ra nonga neba, n maand sɩd me. D ra nong-b-la wʋsgo. B lebga wa d zakã neba. B ra kõt-d-la sagl-sõma la b kengd d raoodo. Koɛɛgã mooneg ra nooma wʋsgo. D sã n da kẽ ned zakẽ n pa zĩnd n kaoose, a soab sũur pa noom ye. Nebã ra nong n gomda Biiblã yell soayã noya. D ra tõe n tɩ naag-b lame n sõs nana-nana. D ra tara Biibl karen-biis wʋsgo, hal tɩ ra yaa toog tɩ d tõogd n zãmsd-b fãa. Koɛɛgã mooneg be ra nooma wʋsgo!

A Paul: Bãan zĩnda tẽngã pʋgẽ n maan yʋʋm a naase. La yʋʋmd 1989 wã yɛlã toeemame. Zabr n yik tẽngã pʋgẽ. Yʋʋmd 1990 sẽoog kiuug rasem a yiibã, tõatb sull n deeg tẽngã babg ning Betɛllã sẽn be wã. Kiuug a tãab pʋgẽ, d ra pa tõe n taas d zakã rãmb la d biru-kãsengã d kibar ye. Zĩig fãa ra yaa zũnd-zãnde, tɩ rɩɩb me kae ye. B ra yõgda pagb wʋsgo. Zabrã kaoosa yʋʋm piig la a naase, n ta tẽngã zĩig fãa.

A Anne: Buud kẽer neb ra kisa buud a taab neba, n kʋʋd-ba. Neb n da ningd fut sẽn kẽesd rabeem n zãad zab-teed wʋsg n gilgd soayã zutu. B ra kẽeda nebã zagsẽ n wʋkd b sẽn date. B sʋkã kẽer da getame tɩ ned kʋʋb yaa wa noaag kodgre. Kũ-rãmbã ra zama zĩis nins tõatbã sẽn gɩd sorã. Kẽer da be Betɛllã sɛɛga. D tẽed-n-taas sẽn da maand sɩd la b kʋ-yã, tɩ bãmb b yiib ra yaa misioneer-dãmba.

Tõatbã sã n da yã buud nins b sẽn kisã nebã, b kʋʋd-b lame. D saam-biis n gẽneg b yõyã n solg b tẽed-n-taas sẽn na yɩl tɩ b ra paam-b n kʋ ye. Misioneer-dãmb la Betɛllẽ tʋm-tʋmd me n solg b tẽed-n-taase. D tẽed-n-taas nins sẽn zoe n wa Bɛtellẽ wã kẽer da gãe tẽngr doogẽ wã, tɩ sãnda gãe yĩngr doogẽ wã ne Betɛllẽ tʋm-tʋmdbã b ro-gãasã pʋsẽ. Neb a yopoe sẽn yaa zag-yɛng neb n da be ne tõnd d ro-gãagẽ wã.

 A Paul: Daar fãa, tõatbã ra makd n na n kẽe Betɛllẽ wã n ges d sã n pa solg neba. B sã n da wa, tõnd sʋkã neb a yiib n kẽngd rig-noorẽ wã, tɩ neb a yiib be fenetrẽ wã n getẽ. Sẽn da be-b rig-noorẽ wã sã n da kalemd b nusã taoore, wilgdame tɩ yell kae ye. La b sã n da lebs b nusã poorẽ, wilgdame tɩ tõatbã sũur yikame. Saam-biisã a yiibã sẽn be fenetrẽ wã bãngdame tɩ b segd n solga d tẽed-n-taasã tao-tao.

A Anne: Semen a wãn poore, tõatb sũy sẽn yik n wa tɩ saam-biisã pa tõog n gɩdg-b tɩ b pa kẽ Betɛllẽ wã ye. Mam tɩ paga m meng ne saam-bi-poak a ye ko-soalsgẽ wã. Teed bĩngr zĩig n da be be n tar zĩig ned sẽn tõe n solge. Saam-bi-poakã kẽe be n solge. La ra yaa sẽk wʋsgo. Tõatbã rʋ n bʋʋga tõnd yĩngr doogẽ wã ne bug-ra-bɛda. B ra wẽeda kʋɩlengã ne sũ-puugri. A Paul sẽn da pa rat tɩ b kẽ wã yĩnga, a yeelame: “Mam pagã bee ko-soalsgẽ wã.” Mam sẽn pag zĩig ning saam-bi-poakã sẽn solgã maana bʋʋre. Rẽ poore m lebs n manega teedã, la rɩka sẽk wʋsgo. M da miime tɩ tõatbã sokda b mens bũmb ning m sẽn maandã. Rẽ n so tɩ m yɛɛs wʋsg hal tɩ m yĩngã fãa ra rigda. M da na n maana wãn tɩ m sã n pak kʋɩlengã bɩ b ra yã tɩ m yɛɛsame? M pʋʋsa a Zeova m sũurẽ n kos-a t’a sõng-ma. Rẽ poore m paka kʋɩlengã, n maag m yĩng n pʋʋs-ba. B ned a ye tusa maam n lak n kẽ ko-soalsgẽ wã n vaees teedã. A sẽn pa yã nedã ling-a-la wʋsgo. Rẽ poore, yẽ ne a tũud-n-taasã tɩ vaeesa ro-pʋs a taabã, hal n lak plafõ wã n gese. La b pa yã ned ye.

A Paul: Na maan kiisi, rɩɩbã paoong ra yaa toogo. Tẽebã rɩɩb n da zãad tõndo. Daar vɛrse wã b sẽn da wɛgsd Betɛllẽ wã n da yaa d no-soaka. D fãa sũur da nooma ne rẽ sẽn kõt-d pãng tɩ d tõogd toog daar fãa wã.

Rɩɩbã la koomã sã n da sa tɩ lebg tɩlɛ tɩ d yi n tɩ bao, b ra tõe n kʋʋ saam-biis nins d sẽn solgã. Wakat ninga, a Zeova sẽn kɩt tɩ d paam bũmb nins sẽn yaa tɩlɛ wã tɩ zems ne a wakatã yɩɩ yel-solemde. A Zeova gesa d yelle, la a sõng-d tɩ d tõog d rabeemã.

Tẽngã yɛlã ra tara zẽneb n paasdẽ tɩ saagr kae ye. La sɩdã ra paamda pãnga. Naoor wʋsgo, yɩɩ tɩlɛ tɩ d tẽed-n-taasã zoe sẽn na yɩl n kogl b yõya. La b tẽebã ra ket n tara pãnga, tɩ b yamã gãe bãan baa ne zu-loeesã. Kẽer yeelame tɩ b manesem sẽn yɩ to-to zabrã sasa wã segl-b-la to-kãsengã yĩnga. Kãsem-dãmb la saam-biis sẽn yaa kom-bɩɩs n tall raoodo, n maan b sẽn tõe fãa n sõng b tẽed-n-taasã tẽebã wɛɛngẽ. D tẽed-n-taasã sã n da zoe n keng zĩig a to, b kelld n bee ne taaba. Zĩ-kãng n lebgd b mooneg zĩiga. B ra maanda Rĩung roog ne bũmb nins b sẽn tõe n paam weoogẽ wã, n maand tigissã n pa vaandẽ ye. Baa yɛlã sẽn da pa nana wã, saam-biisã la saam-bi-pogsã sẽn da tigimd taab n maand tigissã la b moond koɛɛgã ra kengda b raood wʋsg la kɩt tɩ b tẽed manegre. D sã n da kẽng n na n tɩ kõ d saam-biisã rɩɩb la teedo, wʋsg yet-d lame tɩ pa fut la b rat ye. Yaa kord  sẽn na n tall n moon koɛɛgã. Rẽ ra kengda d raood wʋsgo. Neb nins sẽn yã yel-beed la sũur sẽn sãam wʋsgã ra kelgda koe-noogã. B sẽn da ne t’a Zeova Kaset rãmbã sũur noomame, la tɩ b tẽeda manegrã ra lingd-b lame. B ra neeme tɩ b yãgda wa vẽenem sẽn be lik pʋgẽ. (Mat. 5:14-16) Saam-biisã la saam-bi-pogsã sẽn da tar yẽesem wʋsgã kɩtame meng tɩ tõatb kẽer wa lebg saam-biisi.

A Paul: Wakat ninga, yɩɩ tɩlɛ tɩ d yi tẽngã. Naoor a tãab la d yi tɩ pa kaoos tɩ d lebg n wa. Naoor a yiib la d yi n maan yʋʋmd tõr n yaool n le lebg n wa. Saam-bi-poak a ye sẽn yaa misioneer n yeel bũmb tɩ wilgd d tagsg sẽn yaa a soaba. A yeelame yaa: “Galaad lekollẽ wã b yeelame tɩ b sã n tʋm-d zĩiga, d segd n nonga be saam-biisã ne d sũur fãa. Yaa woto la d maan-yã. Rẽ n so tɩ yɩl n loog n bas d tẽed-n-taasã zu-loees a woto pʋgẽ wã pa yɩ nana baa bilf ye.” Zu-noogo, wakat fãa d ra bee tẽng sẽn pa zãr ne be, n da tõe n ket n sõngd d tẽed-n-taasã la d teend koɛɛgã mooneg tʋʋmde.

A Anne: Yʋʋmd 1996 sig-noy kiuugã, tõnd d naas n kẽ Betɛllã mobill ne Betɛllã sɛb sẽn tar yõod wʋsg n na n looge. D ra segd n kẽna kɩlo piig la a yoob n kẽng zĩig a to zabrã sẽn pa ta. D sẽn yi wã bala, d tɩ kẽe tẽn-dãmbg sʋka. Tõatb sũy sẽn yik n yek tõnd n wẽ b bug-raadã yĩngr n kɩt tɩ tõnd yalse. B yiisa tõnd d tãab mobillã pʋgẽ, n deeg mobillã n loog t’a Paul ket pʋgẽ. D ra yasame n pa mi d sẽn maandg ye. La d wa n nee a Paul sẽn pasgd kʋʋngã n kẽnd n watẽ tɩ zɩɩm sodgd a rĩirẽ wã. Sɩngrẽ wã, d tagsame tɩ b tão-a-la ne bug-raoogo. La d tẽegame tɩ sã n da yaa woto, a ra pa na n tõog n kẽn ye. Yɩɩ tõat a ye n wẽ-a la a tus-a n yiis mobillẽ wã. Zu-noogo, a pa pogl wʋsg ye.

Sodaas mobill n da be yambẽ, tɩ neb wʋsg be a pʋgẽ tɩ rabeem tar-ba. D yãka yam n na n tɩ kẽ mobillã la vɩʋʋg ra pa be ye. D kong n gãda yɩngã bal tɩ mobillã looge. Sofɛɛrã looga ne tʋʋlem wʋsg hal tɩ kellẽ bilf tɩ d lʋɩ. D kos-a lame t’a yalse, la a sẽn da yɛɛsd wʋsgã kɩtame t’a pa kelg tõnd ye. D tõog n gãdame n pa lʋɩ ye. La d taa mobillã sẽn da rabdẽ wã ne yaams la rabeem wʋsgo.

A Paul: D ned kam fãa fut ra yaa rẽgd n leb n pãrse. D gesa taab n sokd d meng d sẽn maan to-to n pa ki wã. Elikoptɛɛr n da be be tɩ bug-ra-vẽen po-a zĩis wʋsgo. D gãanda zĩ-vɩʋʋgẽ wã be n gũudẽ tɩ beoogã vẽeg tɩ Elikoptɛɛrã rɩk tõnd n kẽng Siera Leon. D sũur ra nooma d sẽn pa ki wã. La d ra maanda yɩɩr wʋsg d tẽed-n-taasã yĩnga.

A Anne: D sẽn ta Siera Leon Betɛllã sẽn be Firitawonnã, b gesa d yell sõma. Baasgo, m wa n tẽegda yel-beed nins sẽn paam tõndã yell hal tɩ namsd-ma. Wĩndga, m da yɛɛsda yel-beed na wa n maane. M da pa tõe n tags sõma ye. M sã n da get bũmb nins sẽn gũbg maamã, yaa wa m sẽn gãe n zãmsdẽ. Yʋngo, m sã n da gãe, m mi n wa nekame tɩ m tʋʋlgã kaoogdẽ, tɩ m digd rabeem n tagsdẽ tɩ yel-beed n na n paam-ma. Vʋʋsmã meng ra yaa toogo. Sã n mii n yaa woto, a Paul mobgda maam tɩ d naag taab n pʋʋse. D yɩɩnda Rĩungã yɩɩl hal tɩ m wa bas yɩɩre. M da tagsdame tɩ m zugã na n lebgame, la tɩ m pa na n tõog n kell yɩ misioneer ye.

M pa na n tol n yĩm bũmb ning sẽn maan rẽ poorã ye. Semen-kãng bala d paama periodik-rãmb a yiibu. Pipi soabã yaa yʋʋmd 1996 sigr kiuug rasem a 8 Réveillez-vous ! wã. A pʋgẽ wã sõsg n da be be n wilgd d sẽn tõe n maan to-to rabeem sã n loog-do. Mam sẽn karm-a wã, m bãnga bũmb ning sẽn da tar maamã. Periodik a yiib-n-soabã yaa yʋʋmd 1996 sig-noy kiuug rasem 15 Gũusg Gasgã. A pʋgẽ wã sõsg n da be be n wilgd a Zeova sẽn kõt a nin-buiidã pãng to-to. Pilimpik sẽn pogl fot n da be be. Sõsgã pʋgẽ, b wilgame tɩ baa pilimpik pɩgs sã n pogl wʋsgo, a ket n tõe n yɩgdame n baood rɩɩbo. Woto me, baa yel-beed sã n paam-d tɩ d getẽ tɩ d pa le tar pãnga, ne a Zeova vʋʋsem sõngã sõngre d tõe n ket n sõngda d taabã. A Zeova tũnuga ne sõs-kãensã n kõ maam bũmb ning m sẽn datã tɩ zems a wakate. (Mat. 24:45) M maana vaeesg bũmb ning sẽn da namsd maamã wɛɛngẽ, n bao sõss sẽn gomd rẽ yell n bĩng n mi n karemdẽ tɩ sõngd-ma. Tar-n-tarẽ, yɛlã wa n pa le namsd-m wʋsg wa pĩndã ye.

A Paul: D sã n da paam n leb Liberia fãa, d sũur da nooma wʋsgo. Yʋʋmd 2004 baasgẽ, rẽ tɩ d sẽn  be Liberia wã kolga yʋʋm 20. Rẽ tɩ zabrã saame. B ra magdame n na n me rot Betɛllẽ wã. La b tiig n kos-d-lame tɩ d keng zĩig a to.

Yɩɩ makr tɛkẽ. Tõnd ne d tẽed-n-taasã ra nooma ne taab wʋsgo, tɩ kɩt tɩ d ra pa rat n loog n bas-b ye. D sẽn bas d zakã rãmb n kẽng Galaad lekollã, d yãa a Zeova sẽn ning-d bark to-to. Rẽ kɩtame tɩ d sake. B sẽn tʋm tõndã yaa Gãna sẽn pa zãr ne Liberia wã.

A Anne: D sẽn wa n na n yi Liberia wã, d raaga nintãm wʋsgo. A Frank sẽn yaa saam-biig sẽn kʋʋl sẽn tar yam wʋsgã yeel-d-la bũmb sẽn ling-du. A yeelame: “Yãmb segd n yĩma tõnd yelle.” Rẽ poore a paasame yaa: “D miime tɩ y pa na n tol n yĩm tõnd yell ye. La y segd n nonga saam-biis nins sẽn be Gãna wã ne y sũur fãa. Yaa a Zeova n tʋm yãmb be. Ges-y saam-biisã la saam-bi-pogsã yell sõma.” A sẽn yeel bũmb ningã sõnga tõnd tɩ d bao zo-rãmb Gãna, baa neb wʋsg sẽn da pa mi tõnd tɩ bũmb fãa me ra yaa paals ne tõnd be wã.

A Paul: Pa yã n kaoos la d tẽed-n-taasã sẽn be Gãna wã lebg wa d zak rãmb ye. A Zeova Kaset rãmbã ra yaa wʋsg be. B sõng-d lame tɩ d bãng bũmb wʋsg maan-sɩdã la tẽebã wɛɛngẽ. D sẽn zĩnd Gãna yʋʋm 13 poore, b tʋm-d-la zĩig a to hal tɩ ling-du. B yeel-d lame tɩ d keng Afirik delɛst Betɛllã sẽn be Kenya wã. Baa ne d sẽn ket n tagsd d zo-rãmb nins sẽn be Liberia ne Gãna wã yell wʋsgã, d sẽn ta Kenya wã pa yãa n kaoos la d yõg zood ne d tẽed-n-taasã sẽn be be wã ye. Sẽn paase, be me yaa zĩig b sẽn dat koe-moondb n paase.

A Anne: Yʋʋmã sẽn loogã pʋgẽ, bũmb wʋsg n maan n kẽes-m rabeem. Yɛl a woto tõe n nams-d-la wʋsgo, la kɩt tɩ d maand yɩɩre. A Zeova pa maand yel-soalem sẽn na n yɩl tɩ yɛl a woto ra paam-d ye. Mam sã n wʋm bug-raad rãamde, mam pʋgã gudgdame tɩ m nusã ki. Mam bãngame tɩ m segd n teega a Zeova t’a kõ-m pãnga. Wala makre, a tũnugda ne m tẽed-n-taasã n kengd m raoodo. M bãngame me tɩ d sã n zãmsd Biiblã n pa vaandẽ, n pʋʋsdẽ, n kẽnd tigissã la d moond koɛɛgã, a Zeova tõe n sõng-d-lame tɩ d kell n tʋm d tʋʋmdã.

A Paul: Kẽer mi n soka tõnd yaa: “Yãmb nonga zĩig ning b sẽn tʋm yãmbã bɩ?” Tẽng tõe n yaa tẽn-neere, la yɛlã tõe n tiig n toeemame hal tɩ vɩɩmã lebg toogo. Woto wã, bõe la d segd n nong n yɩɩd tẽngã? Yaa d saam-biisã la d saam-bi-pogsã sẽn yaa wa d zakã neba. Baa d sẽn yaa toor-toorã, d bõn-daabã yaa a yembre. D ra tagsdame tɩ b tʋm-d lame tɩ d tɩ keng b raoodo. La sɩd-sɩda, yaa bãmb n keng tõnd raoodo.

D sã n toeem tẽng fãa, d yãta bũmb sẽn yaa yel-solemde. D yãta d tẽed-n-taasã sẽn nong taab wa zag-yɛng nebã. D sã n be tiging pʋgẽ fãa, d tara zak rãmb la zĩig d yam sẽn gãe bãane. D kɩsa sɩd tɩ d sã n kell n teeg a Zeova, a na n kõ-d-la pãng tɩ d mao ne zu-loɛɛg ning fãa d sẽn na n paame.—Fili. 4:13.