Sagls sẽn tõe n sõng-y tɩ y zãmsd Biiblã n pa vaandẽ
YAA toog ne-y tɩ y tõogd n zãmsd Biiblã n pa vaandẽ, la y tõog tɩ zãmsgã yɩ-y noog bɩ? Tõe tɩ mi n yaa woto ne d fãa wakat-wakate. La tags-y bũmb kẽer d sẽn maand daar fãa yelle. Wala makre, d sooda koom wakat fãa. Koom soob rɩkda sẽka, la baood modgr me. La d sã n so n sa d sũur pa noom sɩda? D sã n zãms Biiblã, d tõe n yeelame tɩ yaa wa b sẽn ‘yɩlg-d ne Wẽnnaam gomdã tɩ yaa wa b so-d-la koom’ tɩ d sũur noome. (Efɛɛ. 5:26) Ad sagls a wãn sẽn tõe n sõng-d rẽ wɛɛngẽ:
Maan-y na-kẽndre. Biiblã zãmsgã naaga “bũmb nins sẽn tar yõod n yɩɩdã,” tɩ d pa segd n deem ne ye. (Fili. 1:10) Y tõe n baoo sebr n gʋls daar ning y sẽn yãk zãmsgã yĩngã la wakatã n bao zĩig n table. Y segd n tabl-a-la zĩig sẽn pa lilli, tɩ y sẽn wae n yãt-a wã sõng-y tɩ y ra yĩm wakatã ye. Y leb n tõe n ninga wakatã y portaablẽ wã tɩ sã n wa kolg bɩ a tẽeg-yã.
Bao-y n bãng-y y sẽn na n maan to-to tɩ bũmb ra tiis-yã. Bʋg n yaa nana ne yãmba? Yaa nana ne-y tɩ y zãms lɛɛr tõr tɩ y yamã pa yuus bɩ, bɩ yɩta nana ne-y tɩ y zãms naoor wʋsgo, tɩ zãmsg fãa yɩ koɛɛga? Y sã n tagse y bãngda sẽn yaa nana ne yãmb n yɩɩda, n bãng n sigl y zãmsgã. Wakat ning y sẽn yãkã sã n mi n ta tɩ y yamã ka be zãmsgã, y tõe n yãka yam n na n zãms minit piig bala. Y sã n zãms baa yaa minit piiga, sãoo y sẽn na n tolg n bas n pa zãmse. Sẽn paase y sã n sɩnge, zãmsgã tõe n yɩɩ noog hal tɩ y kaoos n yɩɩg rẽ.—Fili. 2:13.
Reng-y n yãk-y bũmb ning y sẽn na n zãmsã. Sã n yaa zãmsgã wakat sẽn wat n ta la y yaoond n tagsd n baood n bãng y sẽn na n zãms bũmb ningã, tõe tɩ y ‘sãamda y sẽkã.’ (Efɛɛ. 5:16) Y tõe n baoo sebr n gʋls bũmb kẽer y sẽn dat n zãmse. Y sã n tar sokr bũmb võor y sẽn pa wʋmd sõma wɛɛngẽ bɩ y gʋlse. Y zãmsg fãa saabẽ, y tõe n gʋlsa bũmb a taab n paase.
Ra yɩ-y dem-dem ye. Ra yɩ-y dem-dem y na-kẽndrẽ wã ye. Wala makre y tõe n toeemda y sẽn zãmsd n kaoosd to-to wã, wall bũmb ning y sẽn da yãk n na n zãmsã. Sẽn tar yõod n yɩɩdã pa wakat ning y sẽn zãmsdã, y zãmsgã sẽn kaoosd to-to wã wall y sẽn zãmsd bũmb ningã ye. Yaa y sã n tõogd n zãmsd n pa vaandẽ.
D sã n zãmsd Biiblã n pa vaandẽ, nafd-d-la wʋsgo. Tõnd ne a Zeova zoodã pãng na n paasdame. D na n bãngd n yãkda yam, la d paamd raood kengr me.—Zoz. 1:8.
