ZÃMSGÃ YĨNGA 33
YƖƖLL 130 D kõt taab sugri
A Zeova sẽn dat tɩ tigingã neb tall manesem ning ne sẽn maan-b yel-wẽn-kãsemsã
“Ned sã n . . . maan yel-wẽnde, tõnd tara sõangda.”—1 ZÃ 2:1.
D SẼN NA N BÃNGE
Sõs-kãngã pʋgẽ, d na n yãa b sẽn welg Korẽnt tigingã ned sẽn maan yel-wẽn-kãseng yell to-to, la yam ning d sẽn tõe n dɩk rẽ pʋgẽ.
1. A Zeova raabã yaa bõe ne ninsaalbã fãa?
A ZEOVA naana ninsaalbã tɩ b tõe n yãk b toorẽ yam. Beoog sẽn vẽeg fãa d yãkda yam bũmb toor-toor wɛɛngẽ. Yam ning ned sẽn tõe n yãk tɩ tar yõod n yɩɩd yaa a rɩk a meng n kõ a Zeova, n lebg a zakã neda. A Zeova ratame tɩ ned buud fãa maan woto. Bõe yĩnga? A nonga ninsaalbã, n dat b neere. A ratame tɩ b yɩ a zo-rãmba, n vɩɩmd wakat sẽn kõn sa.—Tõo. 30:19, 20; Gal. 6:7, 8.
2. Bõe la a Zeova rat tɩ yel-wẽn-maandbã maane? (1 Zã 2:1)
2 La a Zeova pa modgd ned baa a ye t’a tũ-a ye. A basame tɩ ned kam fãa yãk a sẽn na n maanega. La ned sẽn deeg lisg sã n kɩɩs Wẽnnaam noyã n maan yel-wẽn-kãsenga, bõe la kãsem-dãmbã segd n maane? A sã n pa tek yam n kos sugri, b segd n yiis-a-la tigingã pʋgẽ. (1 Kor. 5:13) La baa sã n wa yaa woto, a Zeova ket n data ne a sũur fãa tɩ nin-kãng tek yam n lebg n wa a nengẽ. Sɩd me, rẽ naaga bũmb nins sẽn kɩt t’a tʋm a Zeezi t’a wa ki tɩ yɩ maoongã. Yaa sẽn na n pak sor t’a tõe n kõ yel-wẽn-maandb nins sẽn tek yamã sugri. (Karm-y 1 Zã 2:1.) Tõnd Wẽnnaamã sẽn yaa nonglmã sagenda yel-wẽn-maandbã tɩ b tek yam n kos sugri.—Zaka. 1:3; Rom. 2:4; Zak 4:8.
3. Bõe yell la d na n gom sõs-kãngã pʋgẽ?
3 A Zeova wilga tõnd a tagsg sẽn yaa a soab ne yel-wẽndã la yel-wẽn-maandbã, n dat tɩ d rɩk a togs-n-taare. Sõs-kãngã pʋgẽ d na n yãa d sẽn tõe n maan dẽ to-to. Y sã n karem sõsgã y na n yãa tẽn-tʋmd a Poll sẽn yeel Korẽnt kiris-nebã tɩ b maan bũmb ninga, saam-biig sẽn wa n maan yel-wẽn-kãsenga. Y leb n na n bãnga a sẽn yeel-b bũmb ninga, saam-biigã sẽn tek yam n kos sugrã poore. Sẽn na n baase, y na n bãnga a Zeova tagsg sẽn yaa a soab ne kiris-neb nins sẽn maan yel-wẽn-kãsemsã.
TIGINGÃ NEB SẼN MAANE, SAAM-BIIG SẼN WA N MAAN YEL-WẼN-KÃSENGA
4. Yel-bʋg n da be Korẽnt tigingã pʋgẽ? (1 Korẽnt rãmbã 5:1, 2)
4 Karm-y 1 Korẽnt rãmb 5:1, 2. A Poll misioneer so-toak a tãab-n-soabã sasa, a wʋmame tɩ yel-beed n da maand Korẽnt tigingã sẽn nan lugl paalmã pʋgẽ. Saam-biig n da be tigingã pʋgẽ n yood ne a baaba paga. A sẽn da maand bũmb ningã yaa wẽng wʋsgo, hal t’a “buud pa be bu-zẽmsã sʋk meng ye.” La tigingã neb ra getame t’a sẽn maand bũmb ningã pa wẽnga, la tõe meng tɩ b ra wukda b mens rẽ yĩnga. Tõe tɩ kẽer da tagsdame tɩ b sẽn sĩnd n get-a wã, b rɩkda a Zeova sẽn zoet yel-wẽn-maandbã nimbãanegã togs-n-taare. La ned sã n be a Zeova nin-buiidã sʋk n maand yel-wẽn-kãsenga, pa noom-a ye. Raoã sẽn da tʋmd tʋʋm-dẽgdã, yaa vẽeneg t’a ra sãamda tigingã yʋʋre. Sẽn paase tõe t’a manesmã ra zoe n mada tigingã neb nins sẽn da maand tũud-n-taar ne-a wã. Woto wã, bõe la a Poll yeel tigingã neb tɩ b maane?
5. Bõe la a Poll yeel tigingã neb tɩ b maane, la a gomdã võor yaa bõe? (1 Korẽnt rãmbã 5:13) (Ges-y fotã me.)
5 Karm-y 1 Korẽnt rãmb 5:13. Wẽnnaam vẽnega a Poll t’a gʋls lɛtr n tool Korẽnt kiris-nebã, n wilg-b tɩ b segd n yiisa yel-wẽn-maandã sẽn pa tek yam n kos sugrã tigingã pʋgẽ. Tigingã neb manesem da segd n yɩɩ wãn ne-a? A Poll yeel-b lame tɩ b “ra le maan tũud-n-taar” ne-a ye. A gomdã võor yaa bõe? A Poll wilgame t’a gomdã rat n yeelame me tɩ b ra “rɩ ne ned a woto meng ye.” (1 Kor. 5:11) Naoor wʋsgo, d sã n zĩ ne ned n dɩtẽ d wae n sõsda ne taab noog-noogo. Rẽnd vẽenega, a Poll gomdã rat n yeelame tɩ tigingã nebã pa segd n sõs ne ned a woto, sã n pa wa n yaa tɩlɛ ye. Rẽ ra na n kogla tigingã nebã, t’a manesem-wẽngã ra mad-b ye. (1 Kor. 5:5-7) Sẽn paase b sã n lak b mens ne-a, tõe n kɩtame t’a bãng t’a zãaga a meng wʋsg ne a Zeova. Leb n tõe n kɩtame tɩ yãnd yõk-a t’a tek yam n kos sugri.
Wẽnnaam vẽnega a Poll t’a gʋls lɛtr n yeel tɩ b segd n yiisa yel-wẽn-maandã sẽn pa rat n tek yam n kos sugrã tigingã pʋgẽ (Ges-y sull a 5)
6. Tigingã nebã sẽn deeg a Poll lɛtrã poore bõe la b maan-yã, la bõe la yel-wẽn-maandã me maan-yã?
6 A Poll sẽn tool Korẽnt kiris-nebã a lɛtrã poore, a ra sokda a meng b manesem sẽn na n yɩ to-to. La a Tɩt wa n togs-a-la koe-noogo. Tigingã neb tũu bũmb ning a Poll sẽn yeel a lɛtrã pʋgẽ wã. (2 Kor. 7:6, 7) B yiisa yel-wẽn-maandã tigingã pʋgẽ. Sẽn paase, a Poll sẽn tool-b lɛtrã poore, pa yã n kaoos la yel-wẽn-maandã tek yam n bas a tʋʋm-wẽngã ye. A toeema a manesmã la a tagsa wã, n tũud a Zeova noyã sẽn yaa tɩrsã masã. (2 Kor. 7:8-11) Rẽ poore, bõe la a Poll yeel tigingã neb tɩ b maane?
TIGINGÃ NEB MANESEM SẼN DA SEGD N YƖ TO-TO NE YEL-WẼN-MAANDÃ SẼN TEK YAMÃ
7. B sẽn yiis yel-wẽn-maandã tigingã pʋgẽ wã woma bi-bʋse? (2 Korẽnt rãmbã 2:5-8)
7 Karm-y 2 Korẽnt rãmb 2:5-8. A Poll yeelame tɩ “nin-kãng sẽn paam neb wʋsg sɩbgrã sek-a lame,” rat n yeel tɩ b sẽn kibl-a wã woma biisi. Bi-bʋse? Kɩtame t’a tek yam n kos sugri.—Ebre. 12:11.
8. Yel-wẽn-maandã sẽn tek yam n kos sugrã poore, bõe la a Poll yeel tigingã neb tɩ b maane?
8 Rẽ n so t’a Poll yeel tɩ b kõ saam-biig ning sẽn da maan yel-wẽndã ‘sugr ne yamleoogo, la b bels-a.’ A paasame tɩ ‘b kɩt t’a bãng tɩ b nong-a lame.’ A Poll raabã pa tigingã neb sak tɩ sẽn da maan-a yel-wẽndã wa naag-b bal ye. A ra ratame tɩ b kɩt tɩ b no-goamã, b yel-manesmã la b tʋʋm-tʋmdɩ wã wilg tɩ b sɩd kõ-a-la sugri, la tɩ b nong-a lame. Woto, saam-biigã ra na n nee vẽeneg tɩ b sũur nooma a sẽn lebg n wa tigingã pʋgẽ wã.
9. Bõe yĩng tɩ pa yɩ nana ne kẽer tɩ b kõ yel-wẽn-maandã sẽn tek yamã sugri?
9 Neb n da be tigingã pʋgẽ tɩ b sũur pa noom ne b sẽn lebs n deeg yel-wẽn-maandã sẽn tek yam n kos sugrã bɩ? Biiblã pa gom rẽ yelle, la tõe tɩ yɩɩ woto. Sɩd me, a sẽn maan bũmb ningã waa ne zu-loees tigingã pʋgẽ, la tõe tɩ ninga neb kẽer yãnd me. Sãnda tõe n tagsdame tɩ bãmb sẽn modgd wʋsg sẽn na yɩl n kell n yɩ yɩlem a Zeova nifẽ, tɩ b yaool n deeg raoã ne nonglem woto wã pa zems ye. (Ges-y Luk 15:28-30.) La bõe yĩng tɩ tar yõod tɩ tigingã neb wilg b saam-biig ning sẽn lebg n wa wã tɩ b sɩd nong-a lame?
10-11. Kãsem-dãmbã sã n da zãgs tɩ b kõn kõ raoã sẽn tek yamã sugri, bõe n da tõe n maane?
10 Mams-y n ges-y bũmb ning sẽn da tõe n maane, kãsem-dãmbã sã n da zãgs tɩ b kõn lebs n deeg raoã tigingã pʋgẽ, a sẽn tek yam n kos sugrã poore. Pa rẽ bɩ saam-biisã la saam-bi-pogsã sã n da zãgs tɩ b kõn wilg-a tɩ b nong-a lame, b sẽn lebs n deeg-a wã poore. A Poll yeelame ‘t’a sũurã tõe sãama wʋsg t’a koms raoodo.’ A ra tõe n tagsame t’a yellã pa tar tɩɩm ye. A ra tõeeme meng n bas n pa le maood n na n maneg yẽ ne a Zeova zoodã ye.
11 Sẽn yaa wẽng n yɩɩda, tigingã neb a taabã sã n da zãgs tɩ b pa na n kõ yel-wẽn-maandã sẽn tek yamã sugri, b ra tõe n sãama bãmb ne a Zeova zoodã. Bõe yĩnga? Bala ra pa na n yɩ a Zeova sẽn kõt yel-wẽn-maandb nins sẽn tek yamã sugrã togs-n-taar la b rɩkd ye. Ra na n yɩ a Sʋɩtãan sẽn yaa wẽnem soab la sẽn pa mi nimbãan-zoeerã togs-n-taar la b rɩkda. B sã n da maan woto, b lebgda tʋʋm-teed a Sʋɩtãan sẽn na n tũnug ne n sãam raoã tẽebo.—2 Kor. 2:10, 11; Efɛɛ. 4:27.
12. Wãn to la Korẽnt tigingã neb ra tõe n dɩk a Zeova togs-n-taare?
12 Woto wã, wãn to la Korẽnt tigingã neb ra tõe n dɩk a Zeova togs-n-taare, la pa a Sʋɩtãan togs-n-taare? Yaa b sẽn na n kõt yel-wẽn-maandb nins sẽn tek yamã sugr wa a Zeova. Ges-y Biiblã gʋlsdb kẽer sẽn gom a Zeova yell n yeel bũmb ninga. A Davɩɩd yeelame: “Yãmb a Zeova yaa sõma, la y kõt sugr wʋsgo.” (Yɩɩn. 86:5) A Mise sokame yaa: “Ãnda n yaa Wẽnnaam wa yãmba? Yãmb kõta kongr sugri?” (Mis. 7:18) T’a Ezayi me yeel yaa: “Bɩ nin-wẽng bas a manesem-wẽngã, tɩ nin-yoog bas a tags-yoodã. Bɩ a lebg n wa a Zeova nengẽ, t’a na n zoee a nimbãanega. A lebg n wa tõnd Wẽnnaamã nengẽ t’a na n kõ-a-la sugr wʋsgo.”—Eza. 55:7.
13. Bõe yĩng tɩ ra zems tɩ b lebs n deeg rao ning sẽn tek yam n kos sugrã tigingã pʋgẽ? (Ges-y zĩ-gũbrã: “ Kaoosa wakat a wãn tɩ b lebs n deeg Korẽnt raoã tigingã pʋgẽ?”)
13 Sẽn na yɩl n dɩk a Zeova togs-n-taare, Korẽnt tigingã neb ra segd n wilgame tɩ b nonga rao ning sẽn tek yam n kos sugrã, la tɩ b sũur yaa noog a sẽn lebg n wa a Zeova nengẽ wã. A Poll yeelame tɩ b sã n kõ rao ning sẽn tek yamã sugri, b “na n wilgame tɩ [b] yaa sakdb bũmb fãa pʋgẽ.” (2 Kor. 2:9) Yaa sɩd tɩ b sẽn yiis-a tigingã pʋgẽ wã yaa kiuug a wãn bala, la b sẽn kibl-a wã kɩtame t’a tek yam n kos sugri. Rẽnd bʋʋm ra kae kãsem-dãmbã sẽn tõe n tik n pa lebs n deeg-a tigingã pʋgẽ ye.
D RƖK A ZEOVA TOGS-N-TAAR TƖRLMÃ LA NIMBÃAN-ZOEERÃ WƐƐNGẼ
14-15. B sẽn welg yell ning sẽn zĩnd Korẽnt tigingã pʋgẽ wã to-to wã wilgda tõnd bõe? (2 Pɩyɛɛr 3:9) (Ges-y fotã me.)
14 B kɩtame tɩ b gʋls b sẽn welg yell ning sẽn zĩnd Korẽnt tigingã pʋgẽ wã to-to wã Biiblã pʋgẽ “tõnd zãmsg yĩnga.” (Rom. 15:4) Kibarã wilgda tõnd t’a Zeova pa na n bas ned sẽn maand yel-wẽn-kãsems n pa rat n tek yam n kos sugr t’a kell n pa a nin-buiidã sʋk ye. Neb kẽer tõe n tagsdame t’a Zeova sẽn yaa nimbãan-zoɛtã yĩnga, a na n basa ned sẽn maan yel-wẽnd n pa rat n tek yam n kos sugr t’a kell n pa tigingã pʋgẽ. La a Zeova nimbãan-zoeerã pa woto ye. A Zeova yaa nimbãan-zoɛta, la a pa basd nebã tɩ b maand yaar ye. A noyã me pa toeemd ye. (Ziid 4) A Zeova sã n da basdẽ-la yel-wẽn-maandb nins sẽn pa rat n tek yam n kos sugrã tigingã pʋgẽ, ra pa na n yɩẽ nimbãan-zoeer ye. Bala ra na n wãa tigingã tõre.—Yel. 13:20; 1 Kor. 15:33.
15 Baasgo, d bãngame t’a Zeova pa rat tɩ ned baa a ye sãam ye. A ratame tɩ sã n tõe fãa bɩ a fãag nebã. A zoeta neb nins sẽn tek yam n dat n le paam a zoodã nimbãanega. (Eze. 33:11; karm-y 2 Pɩyɛɛr 3:9.) Rẽ n so tɩ Korẽnt raoã sẽn wa n tek yam n bas a tʋʋm-wẽngã, a Zeova kɩt t’a Poll yeel tigingã neb tɩ b segd n kõ-a-la sugri, la b lebs n deeg-a tigingã pʋgẽ.
D sã n wilgdẽ tɩ d nonga neb nins b sẽn lebs n deeg tigingã pʋgẽ wã la d maand-b neere, d rɩkda a Zeova togs-n-taar nonglmã la nimbãan-zoeerã wɛɛngẽ (Ges-y sull 14-15)
16. B sẽn welg Korẽnt raoã yellã to-to wã kɩtame tɩ y tagsg yaa wãn ne a Zeova?
16 D sẽn yã b sẽn welg yell ning sẽn zĩnd Korẽntã to-to wã kɩtame tɩ d maneg n neẽ t’a Zeova yaa nonglem la tɩrga. (Yɩɩn. 33:5) Pa kɩt tɩ d maneg n dat n pẽg a Zeova n paas sɩda? D sũur yaa noog wʋsg a sẽn yaa nimbãan-zoɛtã, bala d fãa yaa yel-wẽn-maandba, n dat t’a kõ-d sugri. D sũur yaa noog me a Zeova sẽn kɩt t’a Zeezi wa ki tɩ yɩ maoongo, n pak sor t’a tõe n kõ-d d yel-wẽnã sugrã. D sẽn mi t’a Zeova nonga a nin-buiidã, n dat b neerã kengda raood wʋsgo.
17. Bõe yell la d na n gom sõss nins sẽn pʋgdã pʋsẽ?
17 Ned sã n maan yel-wẽn-kãseng rũndã-rũndã, wãn to la kãsem-dãmbã tõe n dɩk a Zeova togs-n-taar nimbãan-zoeerã wɛɛngẽ, n sõng-a sẽn na yɩl t’a tek yam n kos sugri? Kãsem-dãmbã sã n yãk yam n yiis ned tigingã pʋgẽ, wall b lebs n deeg ned b sẽn da yiisi, tigingã neb manesem segd n yɩɩ wãna? Sõss nins sẽn pʋgdã pʋsẽ d na n leoka sogs-kãense.
YƖƖLL 109 Bɩ d nong taab ne d sũyã fãa
