ZÃMSGÃ YĨNGA 31
YƖƖLL 12 Zeova, fo yaa Wẽnnaam sẽn ka to
A Zeova sẽn maan n na n fãag ninsaalbã ne yel-wẽndã la kũumã
“Wẽnnaam nonga dũniyã hal wʋsgo, n kõ a Bi-ribl-yendã.”—ZÃ 3:16.
D SẼN NA N BÃNGE
Sõs-kãngã pʋgẽ d na n yãa a Zeova sẽn maan bũmb ning sẽn na yɩl tɩ d tõog n sak-a baa d sẽn yaa yel-wẽn-maandbã, la a sẽn maan to-to tɩ d tõe n wa paam d mens ne yel-wẽndã, n vɩ wakat sẽn kõn sa.
1-2. a) Yel-wẽnd yaa bõe, la wãn to la d tõe n tũ a Zeova baa ne d sẽn yaa yel-wẽn-maandbã? (Ges-y “Gomdã võorã” me.) b) Bõe yell la d na n gom sõs-kãngã pʋgẽ, la Gũusg Gas-kãngã sõss a taabã pʋsẽ? (Ges-y “Karemdbã yĩnga” sẽn be seb-kãngã pʋgẽ wã me.)
YÃMB dat n bãnga Wẽnnaam a Zeova sẽn nong yãmb to-to wã sẽn ta zĩig ning bɩ? Y sã n dat n bãng rẽ, y tõe n bao n bãnga a sẽn maan bũmb ning sẽn na yɩl tɩ y tõog n paam y meng ne yel-wẽndã la kũumã. Yel-wẽndã a yaa y bɛ sẽn tar pãng wʋsgo. Yaa bɛ y sẽn pa tõe n zab ne d meng pãng n tõoge. D maanda yel-wẽn daar fãa. Yaa yel-wẽndã yĩng la d sẽn yaa kiidbã. (Rom. 5:12) La koe-noog n be. Ne a Zeova sõngre, d tõe n paama d meng ne yel-wẽndã. Sɩd me, d tõe n basa d yam tɩ d na n wa paama d mens zãng ne yel-wẽndã la kũumã.
2 Na maan yʋʋm tus a yoob pʋgẽ, Wẽnnaam a Zeova sõnga neb tɩ b tõog n yɩ a zo-rãmba, baa ne b sẽn yaa koangdbã. Bõe yĩnga? Yaa a sẽn nong tõndã yĩnga. A Zeova nonga ninsaalbã hal sɩngrẽ wã. Rẽ n so t’a maan bũmb sẽn yɩɩ toog wʋsg ne-a sẽn na yɩl sõng tõnd tɩ d paam d meng ne yel-wẽndã. Wẽnnaam miime tɩ yel-wẽndã wata ne kũum, n pa rat tɩ d ki ye. A ratame tɩ d vɩɩmd wakat sẽn kõn sa. (Rom. 6:23) A ratame tɩ yãmb me vɩɩmd wakat sẽn kõn sa. Sõs-kãngã pʋgẽ d na n leoka sogsg a tãabo: 1) Saag-bʋg la a Zeova kõ ninsaalbã sẽn yaa yel-wẽn-maandbã? 2) Pĩnd wẽndẽ wã, bõe la neb kẽer maan n tõog n ta a Zeova yam baa ne b sẽn yaa yel-wẽn-maandbã? 3) Bõe la a Zeezi maan n na n fãag ninsaalbã ne yel-wẽndã la kũumã?
SAAG-BƲG LA A ZEOVA KÕ NINSAALBÃ SẼN YAA YEL-WẼN-MAANDBÃ?
3. Bõe n kɩt t’a Ãdem ne a Awa maan yel-wẽndã?
3 A Zeova sẽn wa n naan a Ãdem ne a Awa wã, a ra ratame tɩ b vɩɩmã yɩ noogo. A ning-b-la zĩ-neer pʋgẽ. A kõ-b-la sor tɩ b kẽ kãadem ne taaba, la a kõ-b tʋʋmd sẽn be yamleoogo. B ra segd n doga kamb n pid tẽngã, la b kɩt tɩ tẽngã tõr lebg arzãn wa Edɛn zẽedã zĩig sẽn da yaa to-to wã. Bũmb a ye bal la a yeel-b tɩ b ra maane. A yeel-b lame tɩ b sã n yãk yam n kɩɩs yẽ noorã, b na n kiime. D mii bũmb ning sẽn maan rẽ poorã. Malɛk a ye sẽn da pa nong Wẽnnaam la ninsaalbã n mak a Ãdem ne a Awa, n dat tɩ b kɩɩs Wẽnnaam noorã. A Ãdem ne a Awa saka a raabã. B sẽn da pa kɩs b Ba wã sẽn nong-bã sɩdã yĩnga, b maana yel-wẽnde. A Zeova sẽn yeel bũmb ningã pidsame. A Ãdem ne a Awa kɩɩsgã tɛka, b namsame. B sɩnga kʋʋlgo, n wa baas n ki.—Sɩng. 1:28, 29; 2:8, 9, 16-18; 3:1-6, 17-19, 24; 5:5.
4. Bõe yĩng t’a Zeova kis yel-wẽndã, la a sõngd tõnd sẽn na yɩl tɩ d ra maan yel-wẽnde? (Rom dãmbã 8:20, 21)
4 A Zeova kɩtame tɩ b gʋls kiba-kãngã Biiblã pʋgẽ tõnd yĩnga. Kibarã sõngda tõnd tɩ d bãng a sẽn kis yel-wẽndã wʋsgã võore. Yel-wẽndã welgda tõnd ne d Ba wã la a wat ne kũum. (Eza. 59:2) Yaa rẽ yĩng la a Sʋɩtãan sẽn yaa malɛg-wẽng ning sẽn wa ne yel-kãensã fãa wã sẽn nong yel-wẽndã, n pirsd nebã n dat tɩ b maan yel-wẽnã. Rẽnd a Ãdem ne a Awa sẽn wa n maan yel-wẽndã, tõe t’a Sʋɩtãan tagsame t’a tõogame tɩ raab ning a Zeova sẽn tar ne ninsaalbã pa na n tõog n pids ye. La a ra pa mi t’a Zeova nonglmã yaa kãseng wʋsg ye. Wẽnnaam pa toeem raab ning a sẽn tar ne a Ãdem ne a Awa kambã la b yagensã ye. A nonga ninsaalbã. Rẽ n so t’a yɩ tao-tao n pʋlem-b bũmb b sẽn tõe n saage. (Karm-y Rom dãmb 8:20, 21.) A Zeova ra miime t’a Ãdem ne a Awa kambã la b yagensã sʋka, kẽer n na n nong-a la b sakd-a. A sẽn yaa b Ba la b Naandã yĩnga, a paka sor tɩ b tõe n paam b meng ne yel-wẽndã, la b lebg a zo-rãmba. Wãn to la a maan dẽ?
5. Wakat-bʋg la a Zeova kõ ãdem-biisã sẽn yaa yel-wẽn-maandbã saagre? Wilg-y y leoorã võore. (Sɩngre 3:15)
5 Karm-y Sɩngr 3:15. Zĩig pʋgẽ a Zeova yeelame t’a na n wa sãama a Sʋɩtãana, tɩ kõ ãdem-biisã saagre. Wẽnnaam pĩnd n togsame tɩ “yageng” n na n wa fãag ãdem-biisã. Yagen-kãng na n wa bedsa a Sʋɩtãana, la a welg zu-loees nins fãa a sẽn yɩ sabab tɩ sɩng Edɛn zẽedẽ wã. (1 Zã 3:8) La pa na n yɩ nana ne yagengã me ye. A Sʋɩtãan na n pogl-a lame, rat n yeel t’a na n kɩtame tɩ b kʋ-a. Rẽ na n sãama a Zeova sũur wʋsgo. La a Zeova saka rẽ, la a sak tɩ b nams yagengã bala paka sor tɩ neb ka tɛk na n wa paam b mens ne yel-wẽndã la kũumã.
BÕE LA PĨND WẼNDẼ NEB MAAN N TA A ZEOVA YAM, BAA B SẼN DA PA ZEMS ZÃNGÃ?
6. Bõe la a Abɛlle, a Nowe la neb a taab maan n na n lebg a Zeova zo-rãmba?
6 Yʋʋm kobs pʋgẽ, a Zeova wilga ninsaalbã sẽn pa zems zãngã sẽn tõe n maan to-to n tõog n lebg a zo-rãmbã bilf-bilfu. A Abɛll n yɩ pipi ninsaal n tẽ a Zeova kɩɩsgã sẽn zĩnd Edɛnnã poore. A yɩɩ a Ãdem ne a Awa yiib-n-soab biigã. A Abɛll sẽn da nong a Zeova n dat n ta a yam la a yɩ a zoa wã yĩnga, a maana maoong n kõ-a. A Abɛll ra yaa pe-kɩɩma. Rẽ n so t’a yãk a pe-bi wã kẽere, n kʋ n maan maoong n kõ a Zeova. A Zeova tagsg yɩɩ wãn ne rẽ? A “sũur yɩɩ noog ne a Abɛll la ne a maoongã.” (Sɩng. 4:4) A Zeova wilgame t’a sũur nooma ne neb a taab sẽn da nong-a la b kɩs-a sɩd maoongo. Wala makre, a Nowe. (Sɩng. 8:20, 21) A Zeova sẽn deeg nin-kãens maandã wilgdame tɩ ninsaalbã sẽn pa zems zãngã tõe n paama a lohorem la b yɩ a zo-rãmba. b
7. A Abrahaam sẽn sak n na n dɩk a bi-roakã n kõ tɩ yɩ maoongã wilgda tõnd bõe?
7 A Zeova kosa a Abrahaam sẽn yɩ ned sẽn da tar tẽeb sẽn tar pãngã t’a maan bũmb sẽn da yaa toog wʋsgo. A kos-a lame t’a rɩk a bi-roak a Izaak n maan maoongo. Yaa vẽeneg tɩ rẽ maaneg yɩɩ toog wʋsg ne a Abrahaam. Baa ne rẽ, a segla a meng n na n maan bũmb ning a Zeova sẽn yeel-a wã. La a Abrahaam sẽn wa n segl n sa n na n kʋ a biigã, a Zeova gɩdg-a lame. Baasgo, a Abrahaam sẽn maan bũmb ningã sõngda tõnd tɩ d wʋm bũmb a Zeova sẽn da na n wa maan võor sõma. A Zeova wa n sak n kõo a Bi-nongrã tɩ yɩ maoongo. A sɩd nonga ninsaalbã hal wʋsgo.—Sɩng. 22:1-18.
8. A Moyiiz Tõogã sẽn da kɩt tɩ b maand maand ninsã ra wilgda bõe? (Maan-kʋʋre 4:27-29; 17:11)
8 Yʋʋm kobs poore, a Zeova sẽn wa n na n kõ Israyɛll nebã Tõogã, a wilg-b-la rũms maand b sẽn tõe n kõ n paam b yel-wẽnã sugri. (Karm-y Maan-kʋʋr 4:27-29; 17:11.) Maan-kãens ra wilgdame tɩ maoong sẽn yaa sõma n yɩɩd n da yaa tɩlɛ, maoong sẽn na n kɩt tɩ ninsaalbã paam b mens zãng ne yel-wẽndã. Wẽnnaam vẽnega no-rɛɛsdb tɩ b wilg tɩ yageng ning a sẽn da pʋlmã na n namsame, la tɩ b na n kʋ-a lame. B wa n bãngame tɩ yagengã yaa Wẽnnaam Bi-ribl-nongre. A ra na n yɩɩ wa pesg b sẽn kʋ n maan maoongo. (Eza. 53:1-12) Tags-y n ges-y-yã: A Zeova sakame t’a Bi-nongrã yɩ maoong sẽn na yɩl n fãag ãdem-biisã ne yel-wẽndã la kũumã. A sẽn maan woto wã yaa yãmb me yĩnga.
BÕE LA A ZEEZI MAAN N NA N FÃAG ÃDEM-BIISÃ?
9. Bõe la a Zãmbatiis yeel a Zeezi wɛɛngẽ? (Ebre-rãmbã 9:22; 10:1-4, 12)
9 Daar a ye, wẽn-sakd a Zãmbatiis yãa Nazarɛt rao a Zeezi n yeel yaa: “Ad Wẽnnaam Pe-bilã sẽn yiisd dũniyã yel-wẽndã!” (Zã 1:29) Gom-kãensã Wẽnnaam sẽn vẽnegã wilga vẽeneg t’a Zeezi la yageng ning b sẽn da pʋlem hal daar zãrã. A Zeezi n da na n kõ maoong ning Wẽnnaam sẽn da pʋlmã. Wakat kãnga, ninsaalbã ra tõe n basa b yam tɩ b na n paama b mens zãng ne yel-wẽndã.—Karm-y Ebre-rãmb 9:22; 10:1-4, 12.
10. Wãn to la a Zeezi wilg t’a “waame n na n bool yel-wẽn-maandba”?
10 Neb nins sũy sẽn da sãamd b sẽn yaa yel-wẽn-maandbã yĩngã la a Zeezi ra sõngd n tɩ yɩɩda. A ra boond-b lame tɩ b wa lebg a karen-biisi. A ra miime tɩ yel-wẽndã la ãdem-biisã namsgã yẽgre. Rẽ n so t’a ra sõngd pagb la rap nins nebã sẽn da get wa yel-wẽn-maandbã. A rɩka makr n gom rẽ yell n yeel yaa: “Pa neb nins sẽn tar laafɩ wã n baood tɩp ye. Yaa bãad-rãmb n baood tɩpa.” A paasame yaa: “Mam pa wa n na n bool nin-tɩrs ye. M waame n na n bool yel-wẽn-maandba.” (Mat. 9:12, 13) Sɩd yaa woto la a Zeezi ra maanda. Daar a ye, pag n madg a Zeezi naoã ne a nintãm, n yẽes ne a zoobdo. A Zeezi goma ne-a noog-noogo, n kõ-a a yel-wẽnã sugri. (Luk 7:37-50) A zãmsa Samari pag a ye bũmb toor-toor sẽn tar yõod wʋsgo, baa ne a sẽn da mi t’a ra bee ne rao sẽn pa a sɩdã. (Zã 4:7, 17-19, 25, 26) Wẽnnaam kõo a Zeezi tõog meng t’a tõe n kɩt tɩ kũumã sẽn yaa bũmb ning yel-wẽndã sẽn wa ne tɩ yaa wẽng n yɩɩdã sa. Wãn to? A Zeezi vʋʋga neb buud toor-toore: Pagba, rapa, kamb la kãsemba.—Mat. 11:5.
11. Bõe yĩng tɩ yel-wẽn-maandbã ra nong a Zeezi zĩigẽ?
11 Pa lingr la baa yel-wẽn-maandbã sẽn da nong a Zeezi zĩigẽ wã ye. A ra kʋmd-b lame la a maand-b neere. B sã n da gomd ne a Zeezi, b yam gãee bãane. (Luk 15:1, 2) A Zeezi ra pẽgda nin-kãens b sẽn da wilgd tɩ b tara tẽebã yĩnga, n da keoogd-ba. (Luk 19:1-10) A Zeezi ra yaa nimbãan-zoɛt wa a Ba a Zeova bal kɛpɩ. (Zã 14:9) Ne a no-goamã la a tʋʋm-tʋmdɩ wã, a wilgame t’a Ba wã sẽn yaa nimbãan-zoɛtã nonga ninsaalbã baa b sẽn yaa yel-wẽn-maandbã, n dat n sõng-ba. A Zeezi sõnga neb sẽn yaa yel-wẽn-maandb tɩ b tʋll n toeeme, n tũ-a.—Luk 5:27, 28.
12. Bõe la a Zeezi yeel a karen-biisã a kũumã wɛɛngẽ?
12 A Zeezi ra mii bũmb ning sẽn na n paam-a wã. Naoor wʋsgo a yeela a karen-biisã tɩ b na n zãmb-a lame, n kʋ-a ra-luk zugu. (Mat. 17:22; 20:18, 19) A ra miime t’a sẽn na n ki tɩ yɩ maoongã na n yiisa dũniyã yel-wẽndã wa a Zã sẽn togsã, la wa no-rɛɛsdbã sẽn da pĩnd n togsã. A Zeezi me yeelame t’a sã n kõ a vɩɩmã poore, a na n ‘taka neb buud fãa tɩ b wa yẽ nengẽ.’ (Zã 12:32) Ninsaalbã sẽn pa zems zãngã sã n dat n ta a Zeova yam, b segd n tẽe a Zeezi la b rɩk a naoore. B sã n maan woto, b paamdame tɩ b ‘yiis-b yel-wẽndã yembdẽ.’ (Rom. 6:14, 18, 22; Zã 8:32) Rẽ n so t’a Zeezi tall raoodo, n sak n ki kũ-toaag tõnd yĩnga.—Zã 10:17, 18.
13. Wãn to la b kʋ a Zeezi, la a kũumã kɩtame tɩ d bãng bõe Wẽnnaam a Zeova zugu? (Ges-y fotã me.)
13 B zãmba a Zeezi, n yõk-a, n yaal-a, n dõd-a, n kao a bʋʋd n ning-a talle, la b nams-a menga. Sẽn na n baase sodaas n ka a Zeezi ra-luk zug sẽn na yɩl t’a ki. A Zeezi tõoga toog yel-kãensã fãa pʋgẽ n kell n maan sɩd ne Wẽnnaam. La a Zeova sẽn wa n get a Biigã sẽn namsdã, ra sãamda yẽ mengã sũur n yɩɩda. A ra tara tõog n tõe n kɩt t’a Biigã namsgã sa. La a pa maan woto ye. Baa a Zeova sẽn da nong a Biigã hal wʋsgã, bõe yĩng t’a bas t’a nams woto fãa? Yaa a sẽn nong tõndã yĩnga. A Zeezi yeelame yaa: “Wẽnnaam nonga dũniyã hal wʋsgo, n kõ a Bi-ribl-yendã sẽn na yɩl tɩ ned ning fãa sẽn tẽed yẽ ra sãame, la a wa paam vɩɩm sẽn ka sɛtã.”—Zã 3:16.
A Zeova sẽn sak t’a Biigã nams la a ki n na n fãag tõnd ne yel-wẽndã la kũumã, pa yɩ nana ne yẽ mengã ye (Ges-y sull 13)
14. A Zeezi sẽn ki tɩ yɩ maoongã wilgda yãmb bõe?
14 A Zeezi sẽn ki tɩ yɩ maoongã n yaa kaset sẽn yaa kãseng sẽn tɩ yɩɩda, n wilgdẽ t’a Zeova nonga a Ãdem ne a Awa kambã la b yagensã. Wilgdame t’a Zeova nonga yãmb hal wʋsgo. A sakame t’a Bi-nongrã ki tɩ yɩ maoong baa sẽn yɩ toog wʋsg ne yẽ mengã, n na n fãag yãmb ne yel-wẽndã la kũumã. (1 Zã 4:9, 10) A rat n sõnga tõnd ned kam fãa tɩ d tõog n tũ-a baa ne d sẽn yaa koangdbã. A ratame tɩ d wa paam d meng zãng ne yel-wẽndã.
15. D sã n dat t’a Zeezi sẽn ki tɩ yɩ maoongã naf-do, bõe la d segd n maane?
15 Wẽnnaam kõo a Bi-ribl-yendã tɩ yɩ maoongo, n pak sor tɩ tõnd tõe n paam d yel-wẽnã sugri. La sẽn na yɩl n paam tɩ Wẽnnaam kõ-d sugri, bũmb la tõnd me segd n maane. Bõn-kãng yaa bõe? A Zãmbatiis ne a Zeezi meng wilga d sẽn segd n maanã. B yeelame: “Tek-y yam n kos sugri, bala saasẽ Rĩungã kolgame.” (Mat. 3:1, 2; 4:17) Tõnd sẽn yaa koangdbã yĩnga, sẽn na yɩl n tõog n kell n tũ a Zeova n yɩ a zo-rãmba, d segd n teka yam n kos sugr d sã n wa maan yel-wẽnde. La tek yam n kos sugrã võor yaa bõe, la wãn to la rẽ sõngd tõnd tɩ d ta a Zeova yam baa d sẽn yaa yel-wẽn-maandbã? Zãmsgã sõsg ning sẽn pʋgdã pʋgẽ, d na n paama sok-kãng leoore.
YƖƖLL 18 Bark pʋʋsgo, Kiris maoongã yĩnga
a GOMDÃ VÕORE: Biiblã pʋgẽ b sã n gomd “yel-wẽnd” yelle, tõe n yaa bũmb bũmb d sẽn maan tɩ pa sõma a Zeova nifẽ, wall d sẽn pa tõog n maan bũmb a Zeova sẽn yeel tɩ d segd n maaname yell la b gomda. La gom-bil ning sẽn yaa “yel-wẽndã” leb n tõe n bilga d sẽn pa zems zãnga, wall d sẽn dogd ne yel-wẽndã d sẽn yaa a Ãdem yagensã yĩngã. Yaa d sẽn dogd ne yel-wẽndã yĩng la d fãa sẽn yaa kiidbã.
