Tẽn-tʋmd a Poll gʋlsa kiris-neb nins sẽn da be Tesalonikã n yeel yaa: “Ned sã n pa rat n sak tõnd sẽn yet bũmb nins seb-kãngã pʋgẽ wã, bɩ y ning a soabã bãnde.” (2 Tes. 3:14, notã) Pĩndã d ra tagsdame tɩ yaa kãsem-dãmbã la b ra gomd ne. D ra yetame tɩ kãsem-dãmbã sã n sagl ned naoor wʋsg bũmb a sẽn maand tɩ pa sõma wɛɛngẽ t’a pa kelgdẽ, b segd n wɛgsa sõsg n keoog tigingã nebã. Rẽ poore, koe-moondbã segd n laka b mens ne ned ning b sẽn ning bãndã.

La d segd n toeema d sẽn da bilgd gom-kãensã võor to-to wã. Yaa vẽeneg t’a Poll gomdã rat n yeelame tɩ yaa bũmb kiris-ned kam fãa sẽn tõe n yãk yam n maane, yɛl kẽer taoore. Rẽnd pa le yaa tɩlɛ tɩ kãsem-dãmbã wɛgs sõsg n keoog tigingã neb ye. Bõe yĩng tɩ d toeem d sẽn da wʋmd 2 Tesalonik rãmb 3:14 goamã võor to-to wã? D ges bũmb ning sẽn kɩt t’a Poll wa yeel woto wã.

A Poll bãngame tɩ neb n be tigingã pʋgẽ n “vɩ yaare.” A tika Wẽnnaam Gomdã n kõ nin-kãens saglse, la b pa kelg ye. Sẽn deng rẽ, a tɩ kaaga tigingã n yeel yaa: “Ned ning fãa sẽn pa rat n tʋme, bɩ a ra rɩ me ye.” La neb kẽer n da ket n pa rat n tʋm n ges b mens yelle, baa ne b sẽn da tõe n maan dẽ wã. Sẽn paase, b ra kẽesda b toog neb a taabã yɛlẽ. Kiris-nebã manesem da segd n yɩɩ wãn ne nin-kãens sẽn vɩ yaarã?—2 Tes. 3:6, 10-12.

A Poll yeelame: “Bɩ y ning a soabã bãnde.” Gɛrk gom-bilã rat n yeelame tɩ d segd n bãnga neb nins sẽn vɩ yaarã n bake, la d gũus tɩ b manesmã ra wa mad-d ye. Yaa tigingã tõr la a Poll sẽn saglã, pa kãsem-dãmbã bal ye. (2 Tes. 1:1; 3:6) Rẽnd kiris-ned sã n wa yã t’a tẽed-n-taag pa tũud Wẽnnaam Gomdã saglsã, a tõe n yãka yam n pa na n “le maan lagem-n-taar ne” a soabã ye.

Woto rat n yeelame tɩ d na n geta a soabã wa ned b sẽn yiis tigingã pʋgẽ bɩ? Ayo. Bala a Poll paasame yaa: “Ket-y n sagend-y-yã-a a sẽn yaa y saam-biigã yĩnga.” Rẽnd kiris-ned tõe n ket n naagda ned a sẽn ning bãnd n maand tigissã la a moond koɛɛgã. La a yãka yam n pa na n naag-a n deem wall n kok pemsem ye. Bõe yĩnga? A Poll yeelame tɩ yaa sẽn na yɩl “tɩ yãnd yõk-a.” D sã n ning kiris-ned sẽn vɩ yaar bãnd n lak d meng ne-a woto, yãnd tõe n yõk-a lame t’a toeeme.—2 Tes. 3:14, 15.

Wãn to la kiris-nebã tõe n tũ sagl-kãng rũndã-rũndã? Pipi, d segd n bao n bãnga a soabã sã n sɩd “vɩɩ yaar” wa a Poll sẽn yeelã. A ra pa gomd neb nins yam-yãkr sẽn yaa toor ne tõnd bũmb nins sẽn yaa ned kam fãa n kelgd a sũur-kaset n yãkã, wall neb nins sẽn nong bũmb kẽer tõnd sẽn pa nongã yell ye. A leb n da pa gomd neb sẽn maan bũmb n sãam d sũur bal yell ye. A Poll ra gomda neb b sẽn tik Wẽnnaam Gomdã n sagl tɩ b yãk yam n kɩɩs yelle.

Rũndã-rũndã d sã n wa mik tɩ d tẽed-n-taag n tar manesem a woto buudu, a d na n yãka yam n pa na n le naagd-a n deemdẽ wall n kokd pemsem ye. Sẽn mik tɩ yaa tõnd meng yam-yãkrã, d pa na n gom rẽ yell ne neb a taab sẽn pa d zakã neb ye. La d na n ket n naagd-a lame n maand tigissã la d moond koɛɛgã. A sã n toeem a manesmã, d na n le naagd-a lame n maand bũmb fãa wa pĩndã.