1. Bõe la a Zeova sõng a Abrahaam t’a bãng tɩ kengd raoodo?

 DAAR a yembre, Wẽnnaam tʋma malɛk t’a wa sõs ne a Abrahaam. A Abrahaam pa na n tol n yĩm sõs-kãng ye. Wẽnnaam kɩtame tɩ malɛkã yeel a Abrahaam t’a na n sãama Sodom ne Gomoore. Rẽ sãama a Abrahaam sũur wʋsgo. A sokame yaa: “Fo na n sɩd naaga nin-tɩrg ne nin-wẽng n sãam bɩ? . . . Dũniyã fãa Bʋ-kaoodã pa na n maan sẽn yaa tɩrg sɩda?” A Zeova maaga a yĩng n sõng a Abrahaam sẽn yaa a zoa wã t’a bãng bũmb sẽn nafd tõnd la kengd d raoodo. Yaa tɩ Wẽnnaam pa na n sãam nin-tɩrg a bada.—Sɩng. 18:23-33.

2. Bõe n kɩt tɩ d tõe n bas d yam t’a Zeova kaooda bʋʋd wakat fãa ne tɩrlem la nimbãan-zoeere?

² Bõe yĩng tɩ d tõe n bas d yam t’a Zeova kaooda bʋʋd wakat fãa ne tɩrlem la nimbãan-zoeere? Bala “a Zeova geta sẽn be sũurẽ.” (1 Sãm. 16:7) Sɩd-sɩda, a mii “sẽn be ninsaal fãa sũurẽ.” (1 Rĩm. 8:39; 1 Kib 28:9) Rẽ yaa bõn-kãsenga. D pa tol n tõe n wʋm a Zeova sẽn kaood bʋʋd to-to wã võor zãng ye. Tẽn-tʋmd a Poll goma a Zeova yell n yeel yaa: “Ned pa tõe n wʋm a bʋ-kaoor toor-toorã võor ye.”—Rom. 11:33.

3-4. Tõe tɩ d mi n sokda d mens sogs-bʋse, la bõe yell la d na n gom sõs-kãngã pʋgẽ? (Zã 5:28, 29)

³ Baa ne rẽ, d tõe n mi n sokda d meng sogsg sẽn wõnd a Abrahaam sogsgã. D pʋd n tõe n soka d meng yaa: ‘Neb nins a Zeova sẽn sãamã, wala makre Sodom ne Gomoor nebã yɛl saa woto bɩ, bɩ tõe tɩ b le wa vʋʋge? Kẽer na n naaga “sẽn pa-b nin-tɩrsã” Wẽnnaam sẽn na n vʋʋgã bɩ?’—Tʋʋ. 24:15.

 ⁴ D lebg n tẽeg bũmb ning d sẽn mi kũum vʋʋgrã wɛɛngẽ wã. Yʋʋmã noorã, b maneg n bilga tõnd “vʋʋg vɩɩm yĩngã” ne “vʋʋg bʋʋd yĩngã” võor sõma. a (Karm-y Zã 5:28, 29.) Rẽ kɩtame tɩ d paam vẽenem n paas bũmb kẽer wɛɛngẽ. D na n goma rẽ yell sõs-kãngã la sõsg ning sẽn pʋgdã pʋgẽ. A Zeova sẽn kaood bʋʋd to-to wã wɛɛngẽ, d na n deng n goma bũmb nins d sẽn pa mi vẽenegã yelle, tɩ rẽ poor bɩ d gom bũmb nins d sẽn mi vẽenegã yelle.

BŨMB NINS D SẼN PA MI VẼENEGÃ

5. Bõe la d ra yet tõnd sɛbã pʋsẽ, neb nins b sẽn sãam Sodom la Gomoor pʋgẽ wã wɛɛngẽ?

⁵ Pĩndã, tõnd sɛbã pʋsẽ, d gomã bũmb ning sẽn na n paam neb nins a Zeova sẽn get tɩ b pa nin-tɩrsã yelle. D ra yetame tɩ neb nins a Zeova sẽn sãamã, wala makre Sodom ne Gomoor nebã pa na n vʋʋg ye. La tʋm-tʋmd sẽn tũud sɩdã sẽn maag a yĩng n zãms Biiblã la a pʋʋs rẽ wɛɛngẽ poore, a bãngame tɩ d pa tõe n kɩs sɩd tɩ nin-kãens buudã pa na n vʋʋg ye.

6. Togs-y kibay sẽn wilgd a Zeova sẽn kao neb sẽn pa tɩrs bʋʋdo. Bõe la d pa mi rẽ wɛɛngẽ?

⁶ D gom kibay a wãn sẽn be Biiblã pʋgẽ yelle. Yaa kibay sẽn gomd a Zeova sẽn kao neb sẽn pa tɩrs bʋʋd yelle. Wala makre, neb ka tẽk n ki sa-kãsengã sasa. A Zeova kɩtame t’a nin-buiidã sãam buud a yopoe kãabg tẽngã pʋgẽ. A Zeova malɛk n kʋ Asiiri tãb-biis tus-koabg la pis-nii la a nu yʋn-yɛnga. (Sɩng. 7:23; Tõo. 7:1-3; Eza. 37:36, 37) Biiblã wilgda vẽeneg t’a Zeova sãama nin-kãens wakat fãa yĩnga, tɩ b pa na n tol n le vʋʋg bɩ? Ayo. Bõe yĩnga?

7. Bõe la d pa mi neb nins sẽn sãam sa-kãsengã sasa wã wɛɛngẽ, la neb nins Israyɛll nebã sẽn sãam Kanaã soolmẽ wã wɛɛngẽ? (Ges-y fotã.)

⁷ D pa mi a Zeova sẽn kao b ned kam fãa bʋʋd to-to ye. D leb n pa mi neb nins b sẽn kʋ wã sã n paama sor n da tõe n bãng a Zeova la b tek yam n kos sugr ye. Yaa sɩd tɩ Biiblã goma sa-kãsengã yelle, n yeel t’a Nowe ra yaa “tɩrlem koe-moonda.” (2 Pɩy. 2:5) La Biiblã pa yeel t’a Nowe sẽn wa n kaad koglgã sẽn yaa bed-kẽengã, a ra maoodame me n na n paam nebã fãa sẽn be tẽngã zugã n moon ye. Yɩɩ woto me ne Kanaã nebã sẽn da yaa nin-wẽnsã. D pa mi b fãa sã n paama segb n da tõe n bãng a Zeova la b toeem b tʋʋm-tʋmdɩ wã ye.

8. Sodom ne Gomoor nebã wɛɛngẽ, bõe la d pa mi?

⁸ La neb nins a Zeova sẽn sãam Sodom ne Gomoorã yẽ? Nin-tɩrg n da be tẽn-kãng tɩ b boond-a t’a Lote. La d tõe n kɩsa sɩd t’a Lot moona b fãa bɩ? Ayo. Yaa sɩd tɩ b ra yaa nin-wẽnse, la b ra mii sõma ne wẽng n bak sɩda? Tẽeg-y tɩ tẽn-kãng rapã ra rat n yõga a Lot sãambã. Biiblã yeelame tɩ ra yaa “rapa, sẽn sɩng ne kambã n tãag nin-kẽembã.” (Sɩng. 19:4; 2 Pɩy. 2:7) D tõe n kɩsa sɩd tɩ nin-kãensã fãa Wẽnnaam a Zeova sẽn yaa nimbãan-zoɛtã sẽn sãamã pa na n tol n le vʋʋg bɩ? Ayo. Yaa sɩd tɩ nin-tɩrs piig meng ra pa be tẽngã pʋgẽ ye. (Sɩng. 18:32) Rẽnd b ra yaa neb sẽn pa tɩrse, tɩ zems t’a Zeova sãam-b b tʋʋm-wẽnsã yĩnga. Woto wã, d tõe n yeelame tɩ “sẽn pa-b nin-tɩrsã vʋʋgr” sasa, a Zeova pa na n vʋʋg nin-kãens baa a yembr bɩ? Ayo. D pa tõe n yeel woto vẽeneg ye.

9. Bõe la d pa mi a Salomo wɛɛngẽ?

⁹ Biiblã pʋgẽ, kibay n wilgd tɩ nin-tɩrs  kẽer n wa n lebg neb sẽn pa tɩrse. Wala makre, rĩm a Salomo. A ra mii a Zeova sõma la a sẽn da segd n tũ-a to-to wã. A paamame t’a Zeova ning-a bark wʋsgo. La kaoosg zugẽ, a wa n sɩnga wẽn-faad pʋʋsgo. A yel-wẽnã kɩtame t’a Zeova sũur puug wʋsgo, la kɩt tɩ Israyɛll nin-buiidã fãa nams yʋʋm kobse. A Salomo kũumã poore, Biiblã yeelame t’a “kii wa a yaab-rãmbã.” (1 Rĩm. 11:5-9, 43; 2 Rĩm. 23:13) B yeela woto me neb sẽn maan sɩd ne a Zeova kũum poore. Wala makre, rĩm a Davɩɩde. La Biiblã sẽn yeel woto wã bal seka d na tags t’a Salomo na n wa vʋʋgame bɩ? Ayo. La neb kẽer tõe n yeelame yaa: “Ned sẽn ki paamame tɩ b bas a yel-wẽnã taal” wɛ? (Rom. 6:7) Yaa sɩda. La pa rat n yeel tɩ sẽn ki-bã fãa na n wa vʋʋgame tɩ yaa wa yaa tɩlɛ tɩ b lebs n vʋʋg neb nins fãa sẽn ki wã ye. Kũum vʋʋgrã yaa Wẽnnaam sẽn yaa nonglmã kũuni. A vʋʋgda neb nins a sẽn dat n kõ weer tɩ b tũ-a wakat fãa yĩngã. (Zoob 14:13, 14; Zã 6:44) A Salomo na n paamame tɩ Wẽnnaam vʋʋg-a bɩ? A Zeova n mi. Tõnd pa mi ye. La d miime t’a Zeova na n maana sẽn yaa tɩrga.

BŨMB NINS D SẼN MI VẼENEGÃ

10. A Zeova tagsg yaa wãn to ninsaalbã sãoong wɛɛngẽ? (Ezekɩyɛll 33:11) (Ges-y fotã me.)

¹⁰ Karm-y Ezekɩyɛll 33:11. A Zeova wilga tõnd a tagsg sẽn yaa a soab ninsaalbã bʋʋd kaoob wɛɛngẽ. A vẽnega tẽn-tʋmd a Pɩyɛɛr t’a lebs n togs bũmb ning no-rɛɛs a Ezekɩyɛll sẽn gʋlsã. A yeelame t’a “Zeova . . . pa rat tɩ ned baa a ye sãam ye.” (2 Pɩy. 3:9) Gom-kãensã kengda d raoodo. Bala d miime t’a Zeova pa yɩt yãg-yãg n sãam ned wakat fãa yĩng ye. A nimbãan-zoeerã yaa wʋsgo. A sã n yã bũmb a sẽn tõe n tik n zoe ned nimbãaneg fãa, a maanda woto.

11. Ãnda rãmb la b pa na n wa vʋʋge, la bõe n kɩt tɩ d mi rẽ vẽenega?

¹¹ Bõe la d mi vẽeneg neb nins sẽn pa na n vʋʋgã wɛɛngẽ? Biiblã gomda kibay a wãn yell bala. b A Zeezi togsa goam sẽn wilgd tɩ b pa na n wa vʋʋg a Zida Iskariot ye. (Mark 14:21; ges-y Zã 17:12 ne notã me.) c A Zida ra mii vẽeneg t’a sẽn na n maan bũmb ningã kɩɩsda a Zeova la a Biigã raabã, la a baas n yãk yam n maan dẽ. (Ges-y Mark 3:29.) d Woto me, a Zeezi yeelame tɩ tũudmã taoor dãmb nins sẽn da kɩɩsd-a wã sã n wa ki, b pa na n paam tɩ b vʋʋg-b ye. (Mat. 23:33) Tẽn-tʋmd a Poll yeelame me tɩ sɩdã kɩɩsdbã sẽn pa tek yam n kos sugrã pa na n paam tɩ b vʋʋg-b ye.—Ebre. 6:4-8; 10:29.

12. Bõe la d mi a Zeova nimbãan-zoeerã wɛɛngẽ? Togs-y kibare.

¹² Bõe me la d mi a Zeova nimbãan-zoeerã wɛɛngẽ? Wãn to la a wilg t’a “pa rat tɩ ned baa a ye sãame”? D ges a sẽn zoe neb kẽer sẽn maan yel-wẽn-kãsems nimbãaneg to-to. Rĩm a Davɩɩd maana yel-wẽn-kãsemse. Wala makre, a yoome la a kʋ neda. La a Davɩɩd teka yam n kos sugri, t’a Zeova sẽn yaa nimbãan-zoɛtã sak n kõ-a sugri. (2 Sãm. 12:1-13) Rĩm a Manase tʋma tʋʋm-wẽns wʋsg a vɩɩmã tõr la bala. La baa ne rẽ, a sẽn tek yam n kos sugrã, a Zeova zoee a nimbãaneg n kõ-a sugri. (2 Kib 33:9-16) Kiba-kãensã tẽegd-d lame tɩ ned sã n beeg a Zeova, a Zeova  sã n yã bũmb a sẽn tõe n tik n zoe a soabã nimbãaneg fãa, a maanda woto. A na n vʋʋga neb a woto buudu, bala b sak n deegame tɩ b maana yel-wẽn-kãsemse, n tek yam n kos sugri.

13. a) Bõe n kɩt t’a Zeova zoe Niniiv nebã nimbãanega? b) Bõe la a Zeezi yeel Niniiv nebã wɛɛngẽ?

¹³ D mii a Zeova sẽn zoe Niniiv nebã nimbãaneg to-to. Wẽnnaam yeela a Zonas yaa: “Mam yãa a nebã wẽnemã.” La b sẽn tek yam n kos b yel-wẽnã sugrã, a Zeova sak n kõ-b-la sugri. A nimbãan-zoeerã yɩɩga a Zonas hal zĩig sẽn zãre. A Zonas sũurã yikame, tɩ Wẽnnaam tẽeg-a tɩ Niniiv nebã “pa mi sẽn yaa sõma ne wẽng meng n bak ye.” (Zon. 1:1, 2; 3:10; 4:9-11) Kaoosg zugẽ, a Zeezi goma rẽ yell n na n wilg tõnd a Zeova tɩrlmã la a nimbãan-zoeerã sẽn ta zĩig ninga. A Zeezi yeelame tɩ “bʋʋdã kaoob sasa,” Niniiv nebã sẽn tek yam n kos sugrã “na n vʋʋgame.”—Mat. 12:41.

14. B sẽn yeel tɩ Niniiv nebã na n “vʋʋga bʋʋd yĩngã” rat n yeelame tɩ bõe?

¹⁴ “Bʋʋdã kaoob sasa” Niniiv nebã sẽn “na n vʋʋgã” võor yaa bõe? A Zeezi goma “vʋʋg bʋʋd yĩng” yelle. (Zã 5:29) A ra gomda a naamã sẽn na n kaoos yʋʋm tusrã yelle. Wakat kãnga, “nin-tɩrsã ne sẽn pa-b nin-tɩrsã” na n vʋʋgame. (Tʋʋ. 24:15) Sã n yaa ne sẽn pa-b nin-tɩrsã, b na n “vʋʋga bʋʋd yĩnga.” Rat n yeelame tɩ b vʋʋgrã poore, a Zeova ne a Zeezi na n gesa b sã n na n tũu bũmb nins b sẽn na n zãms-bã. Niniiv ned b sẽn vʋʋg sã n pa sak n tũ tũudum hakɩɩkã, a Zeova na n sãam-a lame. (Eza. 65:20) La neb nins fãa sẽn na n yãk yam n tũ a Zeova ne b sũur fãa wã na n paam n vɩɩmda wakat sẽn kõn sa!—Dãn. 12:2.

15. a) Bõe yĩng tɩ d pa segd n yeel tɩ neb nins b sẽn sãam Sodom ne Gomoorã baa a ye pa na n vʋʋge? b) Wãn to la d segd n wʋm goam nins sẽn be Ziid vɛrse a 7 pʋgẽ wã võore? (Ges-y zĩ-gũbrã: “ A Ziid sẽn yeel bũmb ningã võor yaa bõe?”)

¹⁵ A Zeezi goma Sodom ne Gomoor nebã yell n yeel tɩ “bʋ-kaoorã daare,” b yɛlã na n yɩɩ nana n yɩɩd neb nins sẽn pa tẽ-a la b sak a zãmsgã. (Mat. 10:14, 15; 11:23, 24; Luk 10:12) A gomdã võor yaa bõe? D tõe n tagsame t’a Zeezi goma Sodom ne Gomoor nebã yelle,  n na n wilg neb nins sẽn pa tẽ-a wã wẽnemã sẽn ta zĩig ningã bala. La d sã n ges a sẽn yeel bũmb ning Niniiv nebã zugã, d tõe n yeelame tɩ pa woto ye. Wõnda a Zeezi goamã rat n yeelame tɩ Sodom ne Gomoor neb n na n vʋʋge. Yaa vẽeneg tɩ “bʋ-kaoorã daar” ning yell a sẽn gom zĩis a yiibã fãa yaa bõn-yɛnga. Sodom ne Gomoor nebã me tʋma tʋʋm-wẽns wa Niniiv nebã. La Niniiv nebã paama segb n tõog n tek yam n kos sugri. Sẽn paase, tẽeg-y bũmb nins a Zeezi sẽn yeel sẽn na n ‘vʋʋg-b bʋʋd yĩngã’ wɛɛngẽ wã yelle. Neb “sẽn tʋm tʋʋm-wẽns” me n na n naage. (Zã 5:29) Wõnda d tõe n tẽeme tɩ Sodom ne Gomoor neb n na n vʋʋge. Tõe tɩ b sʋkã neb kẽer n na n vʋʋge, tɩ d paam n sõng-b tɩ b bãng a Zeova ne a Zeezi.

16. A Zeova sẽn na n maan to-to n bãng a sẽn na n vʋʋg b rãmbã wɛɛngẽ, bõe la d mi vẽenega? (Zeremi 17:10)

¹⁶ Karm-y Zeremi 17:10. Vɛrse-kãngã wilgda bũmb d sẽn mi vẽeneg a Zeova sẽn kaood bʋʋd to-to wã wɛɛngẽ. D miime tɩ wakat fãa, “a Zeova feesda sũuri, n vaeesd tagsa nins sẽn zulmã.” Kũum vʋʋgrã sẽn watã wɛɛngẽ me, a na n maana woto. A na “n keo ned kam fãa wa sẽn zems a manesem.” A Zeova pa na n vʋʋg ned sẽn pa segd ne rẽ ye. La bũmb sã n bee a sẽn tõe n tik n zoe ned nimbãanega, a zoeta a soabã nimbãaneg n vʋʋg-a. Dẽnd d pa na n yeel tɩ b pa na n vʋʋg neda, sã n pa d mii rẽ vẽenega, Biiblã sẽn yeel woto yĩng ye.

“DŨNIYà FÃA BƲ-KAOODÔ NA N “MAANA SẼN YAA TƖRGA”

17. Yɛlã na n yɩɩ wãn ne neb nins sẽn ki wã?

¹⁷ A Ãdem ne a Awa sẽn naag a Sʋɩtãan n kɩɩs Wẽnnaam a Zeova wã tɛka, neb milyaar-dãmb n ki. “Kũumã” sẽn yaa d “bɛ” wã tʋmame tɩ nare. (1 Kor. 15:26) Yɛlã na n yɩɩ wãn ne nin-kãens fãa? Neb nins sẽn tũ Kiristã ne b sũur fãa wã sʋka, neb bilf n na n vʋʋg n tɩ vɩɩmd saasẽ n pa tol n tõe n le ki ye. Yaa neb tus-koabg la tus pis-naas la a naase. (Vẽn. 14:1) Rap la pagb ka tɛk sẽn maan sɩd ne a Zeova la sẽn da nong-a na n vʋʋga nin-tɩrsã vʋʋgr sasa. B sã n kell n yɩ nin-tɩrs Kirist naamã sẽn na n kaoos yʋʋm tusrã  sasa la yaoolem makrã sasa, b na n vɩɩmda wakat sẽn kõn sa tẽngã zugu. (Dãn. 12:13; Ebre. 12:1) A Zeezi naamã sẽn na n kaoos yʋʋm tusrã sasa me, b na n vʋʋga “sẽn pa-b nin-tɩrsã,” n kõ-b weer tɩ b tõe n toeem manesem n lebg wẽn-tũudb hakɩɩka. Neb sẽn zɩ n bãng a Zeova wall “sẽn tʋm tʋʋm-wẽns” meng na n naaga sẽn pa-b nin-tɩrsã sʋka. (Luk 23:42, 43) La neb kẽer da yaa wẽns wʋsgo, n da pa tol n dat n sak a Zeova ye. B kɩɩsa a raabã ne yamleoogo, t’a yãk yam n pa na n vʋʋg nin-kãens ye.—Luk 12:4, 5.

18-19. a) Bõe yĩng tɩ d tõe n kɩs sɩd t’a Zeova na n kaoo sẽn ki-bã bʋʋd tɩrga? (Ezayi 55:8, 9) b) Bõe yell la d na n gom sõsg ning sẽn pʋgdã pʋgẽ?

¹⁸ D tõe n kɩsa sɩd zãng-zãng t’a Zeova sã n na n kao bʋʋdo, a maanda sẽn yaa tɩrg wakat fãa bɩ? N-ye. A Zeova yaa “dũniyã fãa Bʋ-kaood” sẽn zems zãnga, yam sẽn ka koak soaba, la nimbãan-zoɛt wa a Abrahaam sẽn bãng vẽenegã. A Zeova zãmsa a Biigã bʋʋd sẽn kaood to-to, n yãk-a t’a na n kao nebã fãa bʋʋdo. (Zã 5:22) Ba wã ne Biigã fãa tõe n bãnga sẽn be ned sũurẽ. (Mat. 9:4) Ned kam fãa bʋʋd kaoob wɛɛngẽ, b na n maana “sẽn yaa tɩrga.”

¹⁹ Bɩ d modg n kɩs a Zeova sɩda, la d bas d yam ne a yam-yãkr buud fãa. D miime tɩ tõnd bãngrã pa sek bʋʋd kaoob ye. La a Zeova bãngrã sekame! (Karm-y Ezayi 55:8, 9.) Rẽ n so tɩ d bas d yam t’a Zeova ne a Biigã na n kaoo bʋʋdã fãa tɩrga. D miime me t’a Zeezi sẽn yaa d Rĩmã na n dɩka a Ba wã togs-n-taar kɛpɩ tɩrlmã la nimbãan-zoeerã wɛɛngẽ. (Eza. 11:3, 4) La bõe la d tõe n yeel a Zeova ne a Zeezi sẽn na n kao nebã bʋʋd to-to to-kãsengã sasa wã wɛɛngẽ? Bõe la d pa mi vẽenega, la bõe la d mi vẽenega? Sõsg ning sẽn pʋgdã na n leoka sogs-kãensã.