D sã n dat n ta a Zeova yam, yaa tɩlɛ tɩ d tall tẽebo. La Biiblã yeelame tɩ “pa nebã fãa n tar tẽeb ye.” (2 Tes. 3:2) Tẽn-tʋmd a Poll sẽn wa n yet woto wã, a ra gomda neb nins sẽn namsd-a wã sẽn yaa neb “sẽn yaa wẽns wʋsgã” yelle. La d tõe n yeelame tɩ yaa woto me ne neb a taaba. Baa kaset wʋsg sẽn wilgd tɩ yaa Wẽnnaam n naan bũmb fãa wã, neb kẽer pa tol n dat n tẽ rẽ ye. (Rom. 1:20) Sãnda yetame tɩ b tẽedame tɩ bũmb wall ned n be t’a pãngã yɩɩd ninsaala. La rẽ pa sek b na ta a Zeova yam ye.

D segd n kɩsa sɩd t’a Zeova beeme, la t’a yaa neb nins sẽn tẽed-a wã “roanda.” (Ebre. 11:6) Tẽeb naaga zʋg-sõma nins a vʋʋsem sõngã sẽn sõngd ned t’a bɩɩsã. D sã n dat n paam vʋʋsem sõngã, d segd n pʋʋsa a Zeova n kose. (Luk 11:9, 10, 13) Bũmb a to d sẽn tõe n maan n paam vʋʋsem sõngã yaa d sẽn na n karemd Biiblã Wẽnnaam sẽn tũnug ne a vʋʋsem sõngã n kɩt tɩ b gʋlsã. Rẽ poore d tõe n bʋgsa bũmb ning d sẽn karmã zugu, la d modg n tũ d sẽn bãngã. D sã n maand woto, a Zeova vʋʋsem sõngã na n sõng-d lame tɩ d tõog tɩ d sẽn vɩ to-to wã wilgdẽ tɩ d tara tẽeb ning sẽn tat a Zeova yamã.