1. Neb kẽer sẽn maand sɩd ne a Zeova mi n maanda sãmbs bõe wɛɛngẽ?

 D SẼN mi t’a Zeova sũur nooma ne a nin-buiidã kengda raoodo. Sɩd me Biiblã yeelame t’a “Zeova sũur nooma ne a nin-buiidã.” (Yɩɩn. 149:4) La wakat ninga neb kẽer tõe n komsa raoodo, hal n sokd b meng yaa: ‘Rẽ yĩnga a Zeova sũur nooma ne maam sɩda?’ Neb wʋsg sẽn maan sɩd ne a Zeova tɩ Biiblã gomd b yell ra mi n tara tagsa a woto buudu, tɩ komsd b raoodo.—1 Sãm. 1:6-10; Zoob 29:2, 4; Yɩɩn. 51:11.

2. Sẽn na yɩl n ta a Zeova yam, bõe la d segd n maane?

² Biiblã wilgda vẽeneg tɩ neb sẽn pa zems zãng tõe n taa a Zeova yam. Wãn to? D segd n tẽe a Zeezi Kirist la d reeg lisgu. (Zã 3:16) Woto, d wilgda neb a taabã taoor tɩ d teka yam n kos d yel-wẽnã sugri, la tɩ d pʋlma Wẽnnaam tɩ d na n maana a raabã. (Tʋʋ. 2:38; 3:19) D sã n maan bõn-kãensã sẽn na yɩl n lebg a Zeova zoa, a sũur nooma wʋsgo. D sã n maand d sẽn tõe fãa n na n pids bũmb ning d sẽn pʋlem a Zeova n dɩk d meng n kõ-a wã, d tata a yam, t’a get-d wa a zo-rãmb hakɩɩka.—Yɩɩn. 25:14.

3. Sogs-bʋs la d na n leoke?

³ La bõe yĩng tɩ neb kẽer mi n tagsdẽ tɩ b pa tat Wẽnnaam yam? Bõe la a Zeova maand n wilgd tõnd t’a sũur nooma ne-do? La bõe la kiris-ned tõe n maan n maneg n kɩs sɩd t’a tata Wẽnnaam yam?

 BÕE YĨNG TƖ KẼER MI N TAGSDẼ TƖ B PA TAT A ZEOVA YAM?

4-5. Baa d sã n getẽ tɩ d ka võore, d tõe n basa d yam ne bõe?

⁴ Tõnd sʋkã neb wʋsg sɩng n tagsdame tɩ b ka võor hal b yãadmẽ. (Yɩɩn. 88:15) Saam-biig a ye yʋʋr sẽn boond t’a Adriyẽ yeelame: “Mam sɩng n tagsdame tɩ m ka võor ye. M tẽrame tɩ m sẽn wa n yaa yãaga, m da pʋʋsdame n kotẽ tɩ tõnd zakã rãmb zĩnd arzãnã pʋgẽ, baa mam mengã sẽn da kɩs sɩd tɩ m pa zems ne arzãnã pʋgẽ vɩɩmã.” A Toni roagdbã pa a Zeova Kaset rãmb ye. A yeelame: “Mam doagdbã zɩ n yeel maam tɩ b nong-m lame, wall tɩ b sũur nooma ne-m ye. Rẽ kɩtame tɩ m da tagsdẽ tɩ bũmb kae m sẽn tõe n maan tɩ yɩ-b noog ye.”

⁵ D sã n mi n tagsdẽ tɩ d ka võore, d tõe n tẽegame tɩ yaa a Zeova meng n tak tõnd n wa a nengẽ. (Zã 6:44) A nee d zʋg-sõma wã, baa b rãmb nins tõnd mengã sẽn pa ne wã, la a mi tõnd sẽn sɩd yaa ned ning buudã n yɩɩd tõnd mengã. (1 Sãm. 16:7; 2 Kib 6:30) Rẽnd a sẽn yeel tɩ tõnd tara yõodã, d tõe n basa d yam ne rẽ.—1 Zã 3:19, 20.

6. Tẽn-tʋmd a Poll tagsg ra yaa wãn ne a menga, a sẽn da maan yel-wẽnã yĩnga?

⁶ Nand tɩ tõnd sʋkã neb kẽer bãng sɩdã, b maana bũmb toor-toor n ket n ningd b mens taal rẽ yĩnga. (1 Pɩy. 4:3) Baa kiris-neb sẽn maand sɩd ne a Zeova ket n maooda ne pãn-komsem kẽere. Yãmb sũurã ningd-y-la taal bɩ? Sã n yaa woto, y sẽn mi tɩ neb a taab sẽn maan sɩd ne a Zeova me maoo ne tagsa a woto buudã tõe n bels-y lame. Wala makre, tẽn-tʋmd a Poll sã n da tags a pãn-komsmã yelle, a ra getame t’a yaa nimbãan-neda. (Rom. 7:24) Yaa sɩd t’a Poll teka yam n kos a yel-wẽnã sugri, n deeg lisgu. Baasgo a ra getame tɩ yẽ la “tẽn-tʋmdbã yao-zʋʋga,” la tɩ yẽ n yaa “yel-wẽn-maand n yɩɩda.”—1 Kor. 15:9; 1 Tɩm. 1:15.

7. Bõe la d pa segd n yĩm d pĩnd yel-wẽnã wɛɛngẽ?

⁷ Tõnd saasẽ Ba wã pʋlmame tɩ d sã n tek yam n kos sugri, a kõt-d-la sugri. (Yɩɩn. 86:5) Rẽnd d sã n sɩd teka yam n kos d yel-wẽnã sugri, d tõe n basa d yam t’a Zeova sẽn yeel bũmb ningã yaa sɩda. A kõ-d-la sugri.—Kolo. 2:13.

8-9. D sã n tagsdẽ tɩ d pa tol n tõe n ta a Zeova yam, bõe n tõe n sõng-do?

⁸ D fãa rat n tʋma a Zeova tʋʋmã wa d sẽn tõe tɛka. La kẽer tõe n tagsdame tɩ b pa tol n tõe n tʋm a tʋʋmã wʋsg tɩ sek b na ta a yam ye. Saam-bi-poak yʋʋr sẽn boond t’a Amanda yeelame: “Mam wae n tagsdame tɩ maan f sẽn tõe fãa a Zeova yĩngã rat n yeelame tɩ f tʋmd wʋsg wakat fãa. Rẽ n so tɩ m mi n modgd n dat n maan sẽn yɩɩd m pãnga. La m sã n wa pa tõog n maan m sẽn da magdã, m tagsdame t’a Zeova sũur sãama ne maam, wa mam sũur sẽn sãam ne m mengã.”

⁹ D sã n tagsdẽ tɩ d pa tol n tõe n ta a Zeova yam, bõe n tõe n sõng-do? D segd n tẽegame t’a Zeova pa dem-dem ye. A zɩ n yeel tõnd tɩ d maan bũmb sẽn yɩɩd d pãng ye. A sũur nooma ne bũmb nins d sẽn maand n kõt-a wã, sã n mik tɩ d maanda d sẽn tõe. D leb n tõe n tagsa neb nins sẽn tũ Wẽnnaam ne b sũy fãa tɩ b gomd b yell Biiblã pʋgẽ wã yelle. Tẽeg-y-yã a Poll yelle. Yʋʋm wʋsg pʋgẽ, a tʋma Wẽnnaam tʋʋmã ne yẽesem. A toga sor n zãag zĩiga, n lugl tigims wʋsgo. La a yɛlã sẽn wa n toeem t’a pa le tõe n moon koɛɛgã wa pĩndã, a Zeova sũur sãama ne-a bɩ? Pa yɩ woto ye. A ra ket n maanda a sẽn tõe, t’a Zeova ningd-a barka. (Tʋʋ. 28:30, 31) Woto me, tõnd sẽn tõe n tʋm a Zeova tʋʋmã to-to wã tõe n wa toeemame. La sẽn tar yõod n yɩɩd yaa bũmb ning sẽn kɩt tɩ d tũud-a wã. Masã, bɩ  d ges bũmb kẽer a Zeova sẽn tũnugd ne n wilgdẽ t’a sũur nooma ne-do.

A ZEOVA SẼN WILGD TO-TO T’A SŨUR NOOMA NE-DO

10. Bõe la d tõe n maan n “wʋm” a Zeova sẽn yet tõnd tɩ d tata a yam? (Zã 16:27)

¹⁰ A tũnugda ne Biiblã. A Zeova tũnugda ne bũmb toor-toor n wilgd neb nins sẽn tũud-a wã t’a nong-b lame, la tɩ b tata a yam. Biiblã wilga naoor a yiib t’a Zeova yeela a Zeezi t’a yaa a Bi-ribl sẽn ta a yam, la a sẽn nong a soabã. (Mat. 3:17; 17:5) Y nongẽ lame n wʋm a Zeova sẽn yet yãmb tɩ y tata a yam bɩ? A Zeova pa gomd ne tõnd vẽeneg-vẽenega, la a tũnugda ne Biiblã n gomd ne tõndo. D sã n karemd goam nins a Zeezi sẽn togs a karen-biisã ne nonglmã, yaa wa d sẽn kelgd a Zeova sẽn togsd tõnd gom-kãense. (Karm-y Zã 16:27.) A Zeezi rɩka a Ba wã togs-n-taar kɛpɩ. A togsa a karen-biisã sẽn da pa zems zãng la b maand sɩd ne-a wã goam sẽn wilgd tɩ b tata a yam. Rẽnd tõnd sã n wa karemd gom-kãense, d tõe n mamsame tɩ yaa wa a Zeova n gomd ne tõndo.—Zã 15:9, 15.

11. Bõe yĩng tɩ d tõe n yeel tɩ d sã n tar zu-loeese, pa rat n yeel tɩ d pa le tat a Zeova yam? (Zak 1:12)

¹¹ A maanda bũmb toor-toor n sõngd tõndo. A Zeova rat n sõnga tõndo. Wala makre, n sõng tõnd tɩ d paam bũmb nins sẽn yaa tɩlɛ ne-dã. Wakat ninga a Zeova tõe n basame tɩ zu-loees paam-do, wa sẽn yɩ to-to ne a Zoob sẽn da yaa nin-tɩrgã. (Zoob 1:8-11) D sã n tara zu-loeese, pa rat n yeel tɩ d pa le tat Wẽnnaam yam ye. Zu-loeesã yaa segb d sẽn paam n tõe n wilg Wẽnnaam tɩ d nong-a-la ne d sũur fãa, la tɩ d kɩs-a-la sɩd zãng-zãnga. (Karm-y Zak 1:12.) D zu-loeesã sasa d na n neeme t’a nong-d-la wʋsgo, la t’a sõngd-d lame tɩ d tõogd toogo.

12. Yam-bʋg la y tõe n dɩk bũmb ning sẽn paam a Dimitri wã pʋgẽ?

¹² D ges bũmb sẽn paam Aazi saam-biig a ye yʋʋr sẽn boond t’a Dimitri. A tʋʋmã sãamame, tɩ maan kiis wʋsg t’a nan pa paam tʋʋmd a to ye. A yãka yam n na n moon koɛɛgã wʋsg n paase, n wilg t’a kɩsa a Zeova sɩda. La maana kiis t’a ket n nan pa paam tʋʋmd ye. A wa n lʋɩɩ bã-kɛgenga, n pa le tõe n yi ye. A wa n tagsdame t’a pa le get a pagã la a kambã yell sõma, la a sãmbd a sã n ket n tata a Zeova yam. Daar a ye zaabre, a bi-puglã baoo sebr n ẽmpirim goam sẽn be Ezayi 30:15 pʋgẽ. B yetame: “Yaa y sã n  kell n pa sɩɩ la y teeg maam, la y na n paam pãnga.” A talla sebrã n tɩ kõ a ba wã a gãagẽ wã, n yeel yaa: “Papa, f sũur sã n wa sãame, bɩ f tẽeg goam nins sẽn be vɛrse-kãngã pʋgẽ wã.” A Dimitri bãngame t’a Zeova maasem yĩnga a zakã rãmb ket n paamda rɩɩb tɩ sekdẽ, futu, la gãag zĩiga. A yeelame: “Bũmb ning m sẽn da segd n maan bal yaa m kell n pa sɩɩ, la m teeg m Wẽnnaamã.” Y sã n tara zu-loees a woto buudu, y tõe n basa y yam t’a Zeova geta y yelle, la t’a na n sõng-y lame tɩ y tõog toogo.

13. Ãnd dãmb la a Zeova tõe n tũnug ne n wilg t’a sũur nooma ne-do, la wãn to la a maand rẽ?

¹³ A tũnugda ne d tẽed-n-taasã. A Zeova tũnugda ne d saam-biisã la d saam-bi-pogsã, n wilgd tõnd tɩ d tata a yam. Wala makre, a tõe n kɩtame tɩ d taabã togs-d goam sẽn kengd raoodo, d sẽn wat n dat raood kengr sasa. A maana woto ne Aazi saam-bi-poak a ye, a sẽn wa n tar zu-loees wʋsgo. A tʋʋmã sãamame, t’a lʋɩ bã-kɛgeng me. Rẽ poore a sɩdã maana yel-wẽn-kãsenga, tɩ kɩt t’a pa le yaa kãsem-soab ye. A yeelame: “Mam da pa wʋmd yel-kãensã sẽn paamd maamã võor ye. M da tagsdame tɩ tõe tɩ m maana bũmb sẽn pa sõma, t’a Zeova sũur pa le noom ne-m ye.” Saam-bi-poakã pʋʋsa a Zeova, n kos t’a sõng-a t’a bas a yam t’a sũur ket n nooma ne-a. Bõe la a Zeova maan n leok a pʋʋsgã? Saam-bi-poakã yeelame: “Kãsem-dãmbã sõsa ne maam, n sõng-m tɩ m bãng t’a Zeova ket n nong-m lame.” Rẽ poor bilfu, a le wa n pʋʋsa a Zeova n kos sõngre. A yeelame yaa: “Daar-n-kãng bala, tigingã saam-biis la saam-bi-pogs n gʋls lɛtr n kõ-ma. Mam sẽn wa n karemd b goamã sẽn kengd raoodã, m da neeme t’a Zeova reega m kosgã.” Vẽenega, a Zeova wae n tũnugda ne neb a taab goam sẽn kengd  raoodo, n wilgd tõnd t’a sũur nooma ne-do.—Yɩɩn. 10:17.

14. A Zeova tũnugda ne bõe me n wilgdẽ t’a sũur nooma ne-do?

¹⁴ A Zeova leb n tũnugda ne d tẽed-n-taasã n kõt tõnd sagls d sẽn wat n dat saglse, tɩ wilgdẽ tɩ d tata a yam. Wala makre pipi kiris-nebã wakatẽ, a Zeova vẽnega tẽn-tʋmd a Poll t’a gʋls lɛta piig la a naas n tool a tẽed-n-taasã. Lɛt-kãens pʋsẽ a Poll pelga a pʋg n sagl a tẽed-n-taasã, la a maana rẽ ne nonglem. Bõe yĩng t’a Zeova vẽneg a Poll t’a kõ sagls a woto? A Zeova yaa Ba sẽn get a kamb yell sõma, n kibind a kambã “a sẽn nongã.” (Yel. 3:11, 12) Woto wã, b sã n wa kõ tõnd saglg sẽn tik Biiblã zugu, pa rat n yeel tɩ d pa le tat Wẽnnaam yam ye. Yaa kaset t’a ket n nong-d lame. (Ebre. 12:6) Bõe me n wilgd t’a Zeova sũur nooma ne-do?

BŨMB A TAAB SẼN WILGD TƖ D TATA A ZEOVA YAM

15. Nin-bʋs buud la a Zeova kõt a vʋʋsem sõngã, la bõe yĩng tɩ rẽ tõe n keng y raoodo?

¹⁵ Yaa neb nins sẽn tat a Zeova yamã la a kõt a vʋʋsem sõngã. (Mat. 12:18) D tõe n soka d meng yaa: ‘Mam tara zʋg-sõma nins vʋʋsem sõngã sẽn sõngd ned t’a bɩɩsã kẽer bɩ?’ Y neeme tɩ y maanda sũ-mar ne neb a taabã masã n yɩɩd nand tɩ y lebg a Zeova Kaset soabã bɩ? Sɩd-sɩda, y sã n bɩɩsd zʋg-sõma nins vʋʋsem sõngã sẽn sõngd ned t’a bɩɩsã, y tõe n kɩsa sɩd t’a Zeova sũur nooma ne-yã.—Ges-y zĩ-gũbrã: “ Vʋʋsem sõngã biis yaa . . . ”

16. Nin-bʋs buud la a Zeova yeel tɩ b moon koe-noogã, la bõe yĩng tɩ rẽ segd n keng d raoodo? (1 Tesalonik rãmbã 2:4)

¹⁶ Yaa neb nins sẽn tat a Zeova yamã la a yeel tɩ b moon koe-noogã. (Karm-y 1 Tesalonik rãmb 2:4.) Ges-y saam-bi-poak yʋʋr sẽn boond t’a Zoselin sẽn naf to-to, a sẽn moond koe-noogã. Daar a yembre, a Zoselin yikame t’a sũurã pa noom baa bilf ye. A yeelame: “Mam da getame tɩ m pa tar pãng n na n maan bũmb ye. La m da yaa so-pakda, tɩ leb n yaa daar m sẽn yãk n moond koɛɛgã. Rẽ n so tɩ m pʋʋs a Zeova, la m modg n yi koe-moonegã.” Daar-n-kãng yibeoogo, a Zoselin moona pag yʋʋr sẽn boond t’a Maari koɛɛgã, t’a sak n na n zams Biiblã. Kiuug a wãn poore, a Maari yeelame t’a Zoselin sẽn wa n wẽ yẽ kʋɩlengã, rẽ tɩ yẽ ra pʋʋsda Wẽnnaam n kot sõngre. Kiba- kãngã sõnga a Zoselin t’a bãng bõe? A yeelame: “Mam yamẽ ra yaa wa a Zeova sẽn yet maam yaa: ‘Fo taa mam yam.’” Yaa sɩd tɩ pa nebã fãa n na n sak n kelg koɛɛgã d sẽn moondã ye. La d tõe n kɩsa sɩd tɩ d sã n maand d sẽn tõe fãa sẽn na yɩl n taas neb a taabã koe-noogã, nooma a Zeova.

17. A Viki sẽn yeel bũmb ning a Zeezi maoongã wɛɛngẽ wã sõnga yãmb tɩ y bãng bõe? (Yɩɩn-sõamyã 5:12)

¹⁷ A Zeova kɩtame tɩ neb nins sẽn tat a yamã rɩt a Zeezi maoongã yõodo. (1 Tɩm. 2:5, 6) La baa d sẽn tẽed a Zeezi maoongã la d yaa neb sẽn deeg lisgã, sã n ket n yaa toog ne tõnd tɩ d kɩs sɩd tɩ d tata a Zeova yam, bõe la d tõe n maane? Tẽeg-y tɩ pa wakat fãa la d tõe n teeg d sũurã tagsgo, la d tõe n teega a Zeova. A getame tɩ neb nins sẽn tẽed a Zeezi maoongã yaa tɩrse, n pʋlem t’a na n ning-b-la barka. (Karm-y Yɩɩn-sõamyã 5:12; Rom. 3:26) A Viki sẽn bʋgs a Zeezi sẽn ki tɩ yɩ maoongã zugã, naf-a-la wʋsgo. Daar a yembre, a sẽn bʋgs a Zeezi maoongã zug poore, a yeelame: “A Zeova maana sũ-mar ne-m n kaoose. . . . La baa a sẽn maan woto fãa wã, yaa wa mam da yetame yaa: ‘Fo nonglmã ka wʋsg n sek na ta maam ye. Fo Biigã maoongã pa tõe n dol mam yel-wẽnã ye.’” A sẽn bʋgs a Zeezi maoongã zugã, a kɩsa sɩd t’a Zeova nong-a lame. D sã n bʋgs a Zeezi sẽn ki tɩ yɩ maoongã zugu, tõnd me na n neeme t’a Zeova nong-d lame, la tɩ d tata a yam.

18. D sã n nong d saasẽ Ba wã, d tõe n basa d yam ne bõe?

¹⁸ Baa d sã n modgd n tũud sagls nins d sẽn yã sõs-kãngã pʋgẽ wã, wakat ninga d tõe n wa komsa raoodo, n sãmbd d sã n tata a Zeova yam. Sã n wa yaa woto, bɩ d tẽeg t’a Zeova sũur nooma ne “neb nins sẽn nong-a wakat fãa wã.” (Zak 1:12) Woto wã, bɩ y ket n pẽnegd a Zeova, la y gũusd n get bũmb nins fãa sẽn wilgd tɩ y tata a yamã. Ra n tol-y n yĩm-y t’a Zeova “pa zãr ne tõnd ned baa a yembr ye.”—Tʋʋ. 17:27.