1-2. Ned lisg poore bark-bʋs la a paamda?

 D SẼN deeg lisg n lebg a Zeova zakã nedã noom-d-la wʋsgo. Neb nins sẽn deeg lisgã na n sak n deegame tɩ yɩɩn-gʋlsd a Davɩɩd sẽn yeel bũmb ningã yaa sɩda. A yeelame: “Sũ-noog soab la ned ning yãmb [a Zeova] sẽn yãke, n tall-a n kolg y meng sẽn na yɩl t’a zĩnd y samanã pʋsẽ wã.”—Yɩɩn. 65:4.

² A Zeova pa talld ned yaar n wa a samanã pʋsẽ ye. Yaa wa d sẽn yã sõsg ning sẽn loogã pʋgẽ wã. A kolgda neb nins sẽn wilgd tɩ b sɩd rata a zoodã. (Zak 4:8) Y sẽn dɩk y meng n kõ a Zeova n deeg lisgã, y kolg-a lame n lebg a zoa hakɩɩka. Y tõe n basa y yam tɩ y lisgã poore, a na n kɩtame tɩ “bark sig yãmb zut hal tɩ bũmb pa paoog-y” ye.—Mal. 3:10; Zer. 17:7, 8.

3. Neb nins sẽn dɩk b mens n kõ Wẽnnaam n deeg lisg n lebg kiris-nebã segd n maana bõe? (Koɛɛg soaba 5:4, 5)

³ La lisgã yaa sɩngr bala. Rẽ poore, y na n dat n maana y sẽn tõe fãa n pids bũmb ning y sẽn pʋlem Wẽnnaam n dɩk y meng n kõ-a wã baa makr taoore, wall y sã n wa maood ne zu-loeese. (Karm-y Koɛɛg soab 5:4, 5.) Y sẽn yaa a Zeezi karen-biigã, y na n maana y sẽn tõe fãa n tũ a naoã neere, la y tũ bũmb nins fãa a sẽn zãms a karen-biisã. (Mat. 28:19, 20; 1 Pɩy. 2:21) Sõs-kãngã na n sõng-y lame tɩ y maan dẽ.

KELL-Y N ‘PƲG-Y-YÃ’ A ZEEZI BAA ZU-LOEES LA MAKR TAOORE

4. A Zeezi sẽn yeel t’a karen-biisã segd n tʋka “namsg ra-lukã” võor yaa bõe? (Luk 9:23)

⁴ Ra n tags-y tɩ y lisgã poore y vɩɩmã na n yɩɩ nana ye. Sɩd me, a Zeezi yeela vẽeneg tɩ yẽ karen-biisã segd n tʋka  “namsg ra-luka.” B segd n maana rẽ “daar fãa” menga. (Karm-y Luk 9:23.) A Zeezi gomdã rat n yeelame t’a karen-biisã na n namsda wakat fãa bɩ? Ayo. A ra rat n yeelame bal tɩ b sẽn na n paam bark toor-toorã sẽn yãk a toogo, b na n maoo ne zu-loeese. Zu-loe-kãens kẽer tõe n yɩɩ zu-loe-kɛgems menga.—2 Tɩm. 3:12.

5. Bark-bʋs la a Zeezi pʋlem neb nins sẽn mongd b mens bũmb kẽer Wẽnnaam yĩngã?

⁵ Tõe tɩ y zakã rãmb zoe n namsa yãmb y tũudmã yĩnga, wall tõe tɩ y zoe n monga y mens bũmb kẽer sẽn na yɩl n deng n bao Wẽnnaam Rĩungã. (Mat. 6:33) Sã n yaa woto, y tõe n basa y yam t’a Zeova nee bũmb nins fãa y sẽn maan a yĩngã. (Ebre. 6:10) Tõe tɩ y zoe n yãame t’a Zeezi sẽn yeel bũmb ningã yaa sɩda. A yeelame: “Ned sã n bas roog wall ba-bi-rap bɩ ba-bi-pogse, pa rẽ bɩ ba wall ma, bɩ kamb wall pʋt mam yĩnga, la koe-noogã yĩnga, masã menga, a na n paama sẽn yɩɩd rẽ naoor koabga, (roto, ba-bi-rapa, ba-bi-pogse, ma-rãmba, kamba, la pʋto, ne namsgo,) la dũni ning sẽn watã pʋgẽ, a na n paama vɩɩm sẽn ka sɛta.” (Mark 10:29, 30) Sɩd-sɩda, bark nins y sẽn paamã yɩɩda bũmb nins y sẽn mong y mengã hal zĩig sẽn zãre.—Yɩɩn. 37:4.

6. Y lisgã poore, bõe yĩng tɩ y segd n kell n mao n da sak “yĩngã ratem”?

⁶ Y lisgã poore, y segd n kell n maoome n da sak “yĩngã ratem” ye. (1 Zã 2:16) Bala y ket n yaa a Ãdem yageng sẽn pa zems zãnga. Wakat ninga y tõe n tagsda wa tẽn-tʋmd a Polle. A yeelame yaa: “Mam sũurã pʋgẽ, mam sɩd nonga Wẽnnaam tõogã, la mam yãta tõog a to mam yĩngã pʋgẽ, sẽn zabd ne tõog ning sẽn be mam yamẽ wã, n kɩtdẽ tɩ mam lebgd yel-wẽndã tõogã sẽn be mam yĩngẽ wã yamba.” (Rom. 7:22, 23) Y sẽn ket n tar tʋls-wẽnsã tõe n komsa y raoodo. La y sã n tagsd bũmb ning y sẽn pʋlem a Zeova n dɩk y meng n kõ-a wã yelle, na n kõ-y-la raood tɩ y kell n mao ne y tʋls-wẽnsã. Sɩd-sɩda y sã n wa be makr taoore, y sẽn dɩk y meng n kõ a Zeova wã na n sõng-y-la wʋsgo. Wãn to?

7. Y sã n dɩk y meng n kõ a Zeova, wãn to la rẽ na n sõng-y tɩ y kell n maan sɩd ne-a?

⁷ Y sã n dɩk y meng n kõ a Zeova, y kɩɩsa y meng raabo. Woto rat n yeelame tɩ y yãka yam n na n bas tʋlsem buud fãa la magb buud fãa sẽn pa na n yɩ a Zeova noogo. (Mat. 16:24) Woto y sã n wa be makr taoor wall y sã n wa tar zu-loeese, y pa na n sokd y meng bũmb ning y sẽn na n maan ye. Rẽ tɩ y zoe n yãka y sẽn na n maanega, rat n yeel tɩ y na n kell n maana sɩd ne a Zeova. Y na n kell n yãka yam n maan sẽn noom a Zeova. Y na n yɩɩ wa a Zoobe. Baa a sẽn wa n maood ne zu-loe-kɛgemsã, a yeela vẽeneg yaa: “Mam kõn bas m burkĩndã ye!”—Zoob 27:5.

8. Y sã n tags bũmb ning y sẽn pʋlem a Zeova n dɩk y meng n kõ-a wã yelle, wãn to la rẽ tõe n sõng-y tɩ y yals kãn-kãe makr taoore?

⁸ Y sã n tags bũmb ning y sẽn pʋlem a Zeova n dɩk y meng n kõ-a wã yelle, na n kõ-y-la raood tɩ y kell n maan sɩd ne-a makr buud fãa taoore. Wala makre, y na n maanda wala y rooda ned a to pag wall a sɩd bɩ? A bada! Y zoe n yãka yam n pa na n tol n maan a buud ye. Rẽ n so tɩ y pa na n bas tɩ tʋls-wẽns kɩ yẽg y sũyẽ wã, tɩ y yaool n maood n na n yiis-b ye. Y na n lak n basa “nin-wẽnsã sore.”—Yel. 4:14, 15.

9. Y sã n tagsd bũmb ning y sẽn pʋlem a Zeova n dɩk y meng n kõ-a wã yelle, wãn to la na n sõng-y tɩ y kell n lʋɩɩs a raabã taoore?

⁹ La ned sã n kõ yãmb tʋʋmd sẽn tõe n kɩt tɩ y vaand tigissã, y manesem na n yɩɩ  wãna? Y zoe n mii y sẽn na n maanega. Nand t’a kõ-y tʋʋmdã, y zoe n yãka yam hal daar zãr n pa na n sak tʋʋmd a woto buud ye. Rẽnd y pa na n sak tʋʋmd a woto buudu, n yaool n maood n na n lʋɩɩs a Zeova raabã taoor ye. Y sã n bʋgs a Zeezi mak-sõngã zugu, tõe n sõng-y lame. A ra yãka yam ne a sũur fãa n na n noog a Ba wã sũuri. Bɩ yãmb me yɩt tao-tao n zãagd y meng ne bũmb ning fãa y sẽn mi tɩ pa na n yɩ Wẽnnaam ning y sẽn dɩk y meng n kõ wã noogã.—Mat. 4:10; Zã 8:29.

10. Y lisgã poore, wãn to la a Zeova na n sõng-y tɩ y kell n “pʋg” a Zeezi?

¹⁰ Y sã n wa tar zu-loeese, wall y sã n wa be makr taoore, bũmb ning y sẽn na n maanã tõe n wilga y sã n sɩd rat n “pʋga” a Zeezi. Sẽn paase, y tõe n basa y yam t’a Zeova na n sõng-y lame tɩ y kell n pʋg a Zeezi. Biiblã yeelame: “Wẽnnaam yaa sɩd soaba. A pa na n bas tɩ y paam makr sẽn yɩɩd y pãng ye. La makr sã n wa wa, a na n tuka sor tɩ y tõog toogo.”—1 Kor. 10:13.

Y SẼN TÕE N MAAN N KELL N PƲG A ZEEZI

11. Bũmb a ye sẽn tar yõod y sẽn tõe n maan n kell pʋg a Zeezi la bʋgo? (Ges-y fotã me.)

¹¹ A Zeezi ra tʋmda a Zeova tʋʋmã ne a sũur fãa, la a ra pʋʋsd-a wakat fãa. (Luk 6:12) Sɩd me, bũmb a ye y sẽn tõe n maan tɩ sõng-y wʋsg tɩ y kell n tũ a Zeezi y lisgã poore, yaa y sẽn na n minim n maand bũmb nins sẽn paasd yãmb ne a Zeova zoodã pãngã. Biiblã yeelame: “Baa d sẽn bɩ to-to fãa, bɩ d kell n kẽn sõma woto.” (Fili. 3:16) Wakat-wakate, y na n wʋmda kibay sẽn wilgd y saam-biis la y saam-bi-pogs sẽn yãk yam n na n maneg n tʋm  a Zeova tʋʋmã n paase. Tõe tɩ b kẽnga Rĩungã koe-moondb lekolle, wall b yik n kẽnga zĩig koe-moondb sẽn pa waooge. Y sã n tõe n yãka bũmb a woto n wa maane, bɩ y modg n maane. Neb nins sẽn tũud a Zeova wã maanda b sẽn tõe fãa sẽn na yɩl n tʋm a tʋʋmã n paase. (Tʋʋ. 16:9) La y sã n nan pa tõe n maan dẽ yẽ? Ra tags-y tɩ neb nins sẽn tõe n maan dẽ wã sãoo yãmb ye. Sẽn tar yõodã yaa y sẽn na n kell n tõog toogo, n maand a Zeova raabã. (Mat. 10:22) Ra yĩm-y tɩ yaa y sẽn na n maand y sẽn tõe fãa a Zeova tʋʋmdã pʋgẽ la a sũur noom ne-y ye. Woto yaa bũmb a ye sẽn tar yõod y sẽn tõe n maane, n kell n pʋg a Zeezi y lisgã poore.—Yɩɩn. 26:1.

12-13. Y yẽesmã sã n sɩng boogre, bõe la y tõe n maane? (1 Korẽnt rãmbã 9:16, 17) (Ges-y zĩ-gũbrã: “ Kell-y n wɩng-y ne zoeesã.”)

¹² Y sã n wa getẽ tɩ y pa le pʋʋsd a Zeova ne y sũur fãa, wall tɩ koɛɛgã mooneg pa le kõt-y sũ-noog wa pĩndã, bõe la y tõe n maane? La Biiblã kareng sã n wa pa le noom-y wa pĩndã yẽ? Y lisgã poore y sã n wa getẽ tɩ yaa woto, ra tags-y t’a Zeova pa le kõt yãmb a vʋʋsem sõngã ye. Y yaa neb sẽn pa zems zãnga, tɩ y sẽn get yɛlã to-to wã tõe n toeemdẽ. Y yẽesmã sã n wa sɩng boogre, bɩ y tags tẽn-tʋmd a Poll yelle. Baa a sẽn da modgd n dɩkd a Zeezi togs-n-taarã, a ra miime tɩ pa wakat fãa la a na n tʋll n maan bũmb nins a sẽn segd n maanã ye. (Karm-y 1 Korẽnt rãmb 9:16, 17.) A yeelame: “Mam sã n pa maan dẽ ne yamleoogo, ket n yaa tʋʋmd Zu-soabã sẽn kõ maam.” Woto rat n yeelame t’a Poll ra yãka yam n na n moond koɛɛgã, baa a sã n wa pa tʋll n maan dẽ.

¹³ Woto me, ra tikd-y y sẽn get yɛlã to-to wã n yãkd yam ye. Yãk-y yam ne y sũur  fãa n na n kell n maan sẽn yaa tɩrga, baa y yamã sã n wa pa be rẽ maanego. Y sã n modgd n maand sẽn yaa tɩrga, y sẽn get yɛlã to-to wã tõe n wa toeemame. Sẽn yaa a soab fãa, y sã n kell n modg ne tũudmã tʋʋma, na n sõng-y lame tɩ y kell n pʋg a Zeezi y lisgã poore. Y tẽed-n-taasã sã n ne y sẽn modgd n tũud a Zeova wã, kengda b raoodo.—1 Tes. 5:11.

“FEESD-Y Y MENSE, . . . MAKD-Y Y MENSE”

14. D segd n mi n feesda d meng bõe wɛɛngẽ, la bõe yĩnga? (2 Korẽnt rãmbã 13:5)

¹⁴ Y lisgã poore, yɩta sõma me tɩ y mi n feesd y menga. (Karm-y 2 Korẽnt rãmb 13:5.) Wakat-wakate, maag-y y yĩng n tags y sẽn vɩ to-to wã, la y sẽn maand bũmb ninsã yelle. Tags-y n ges-y y sã n pʋʋsda daar fãa, y sã n karemda Biiblã la y zãmsd-a, y sã n kẽnda tigissã la y moond koɛɛgã. Bao-y n bãng-y y sẽn tõe n maan to-to tɩ bõn-kãensã yɩ-y noogo, la naf-y n paase. Wala makre y tõe n soka y meng yaa: ‘Mam tõe n bilga neb a taabã Biiblã zãms-nana wã võor bɩ? Bũmb bee m sẽn tõe n maan tɩ koɛɛgã mooneg maneg n yɩ noog ne-m n paas bɩ? M wae n pʋʋsdame n kot bũmb takɩ, la m sẽn pʋʋsd to-to wã wilgdame tɩ m teega a Zeova zãng-zãng bɩ? M kẽnda tigissã n pa vaandẽ bɩ? Bõe la m tõe n maan n maneg n kelgd sõma tigissã sasa, la m kẽesd m toogo?’

15-16. Tõog n kell n maan sɩd ne Wẽnnaam makr taoorã wɛɛngẽ, yam-bʋg la y rɩk saam-biig a ye kibar pʋgẽ?

¹⁵ Yɩta sõma me tɩ y fees y meng ne pʋ-peelem, n bãng y pãn-komsmã sõma. Saam-biig a ye yʋʋr sẽn boond t’a Robɛɛr togsa kibar sẽn wilgd rẽ. A yeelame: “Mam sẽn wa n zems yʋʋm 20 wã, mam da tara tʋʋmd sẽn pa rɩt sẽk wʋsg ye. Daar a ye tʋʋmã sigb poore, m tʋmd-n-taag a ye sẽn yaa pag n bool-m tɩ m wa a zakẽ wã. A yeelame tɩ na n yɩɩ tõnd d yiibã bala, la tɩ ‘d na n nooga d yõore.’ Sɩngrẽ wã m padmame sẽn na yɩl n da kẽnge, la m wa n baas n zãgsa vẽenega, la m togs-a bũmb ning sẽn kɩt tɩ m pa na n sakã.” A Robɛɛr tõogame n pa maan yel-wẽnd makrã taoor ye. Rẽ zemsa ne pẽgre. La kaoosg zugẽ, a lebg n tagsa bũmb ning sẽn maanã yelle, n bãng t’a manesem sẽn yɩ to-to wã pa yɩ sõma zãng ye. A paasame: “M pa zãgs vẽenega, wall m yɩ tao-tao n zãgs wa a Zozɛf sẽn maan to-to ne a Potifaar pagã ye. (Sɩng. 39:7-9) Sɩd-sɩda, sẽn pa yɩ nana ne maam tɩ m  zãgsã ling-m lame. Yel-kãngã sõnga maam tɩ m bãng tɩ m da segd n paasa maam ne a Zeova zoodã pãnga.”

¹⁶ Yɩta sõma tɩ yãmb me feesd y meng wa a Robɛɛre. Baa y sã n tõog n kell n maan sɩd ne Wẽnnaam makr taoore, bɩ y sok y meng yaa: ‘Kaoosa bilf tɩ m yaool n wa tõog n zãgs bɩ?’ Y sã n mik tɩ bũmb la y segd n toeeme, bɩ y ra koms raood ye. Maan-y sũ-noogo, y sẽn mi masã tɩ y tara pãn-komsem-kãngã yĩnga. Pʋʋs-y-yã a Zeova n kos t’a sõng-y tɩ y mao ne y pãn-komsmã, la y maan bũmb toor-toor sẽn na n kɩt tɩ y tʋll n sak-a ne y sũur fãa.—Yɩɩn. 139:23, 24.

17. Bõe yĩng tɩ d tõe n yeel t’a Robɛɛr manesmã kɩtame t’a Zeova yʋʋrã paam waoogre?

¹⁷ Bũmb a to me la d tõe n bãng a Robɛɛr kibarã pʋgẽ. A yeelame: “Mam sẽn zãgs m tʋmd-n-taagã boollã poore, a yeelame yaa: ‘M pa tõog tɩ f lʋɩ ye.’ Mam sok-a-la a gomdã sẽn dat n yɛɛlga. A yeelame t’a zoa a ye sẽn da yaa a Zeova Kaset soab n yeel yẽ tɩ kom-bɩɩs nins sẽn yaa a Zeova Kaset rãmbã fãa sã n paam segbo, b soosd n tʋma tʋʋm-yoodo. Rẽ n so t’a yeel a zoa wã t’a na n maka maam n ges m sã n yaa woto. M sũur yɩɩ noog wʋsgo, m sẽn kɩt t’a Zeova yʋʋrã paam waoogrã.”

18. Bõe la y yãk yam ne y sũurã fãa n na n maan y lisgã poore? (Ges-y zĩ-gũbrã: “ Sõss sẽn na n yɩ-y noogo.”)

¹⁸ Y sã n dɩk y meng n kõ a Zeova n deeg lisgu, y wilgdame tɩ y ratame tɩ Wẽnnaam yʋʋrã paam waoogre, baa sẽn wa n yaa a soaba. La y tõe n basa y yam t’a Zeova mii zu-loees nins la makr nins fãa y sẽn segdã. A na n ning-y-la bark y sẽn modgd n na n kell n maan sɩd ne-a wã yĩnga. Y leb n tõe n basa y yam t’a na n tũnuga ne a vʋʋsem sõngã n kõ-y raood tɩ y tõog n maan dẽ. (Luk 11:11-13) Ne a Zeova sõngre, y na n tõog n kell n pʋga a Zeezi y lisgã poore.