Yaa a Zeezi zɩɩmã sẽn daag tɩ yɩ maoongã maasem yĩng bal la d tõe n paam d yel-wẽnã sugri. (Efɛɛ. 1:7) La Biiblã yetame yaa: “[Wẽnnaam] sũ-marã yĩnga, a ra kõta neb nins sẽn da maan yel-wẽn pĩnd wẽndẽ wã sugri,” rat n yeel tɩ nand t’a Zeezi ki tɩ yɩ maoongã. (Rom. 3:25) Wãn to la a Zeova tõog n maan woto, n pa kɩɩs noy nins a sẽn gãneg tɩrlmã wɛɛngẽ wã?

A Zeova nifẽ, a sẽn pʋlem tɩ “yageng” n da na n wa ki tɩ yɩ maoong n fãag neb nins sẽn na n tẽ-a wã tɛka, yaa wa yagengã zoe n kiime tɩ yɩ maoongo. (Sɩng. 3:15; 22:18) Wẽnnaam da kɩsa sɩd zãng tɩ wakat ning a sẽn yãkã sã n ta, a Bi-ribl-yendã na n sakame n ki tɩ yɩ maoongo. (Gal. 4:4; Ebre. 10:7-10) A Zeezi sẽn wa n be tẽngã zug n gomd Wẽnnaam yʋʋr yĩngã, a ra tara sor n na n kõ yel-wẽnã sugr nand t’a ki tɩ yɩ maoongo. A ra tõe n kõo neb nins sẽn tẽed yẽ wã yel-wẽn sugri, bala a ra miime t’a maoongã ra na n wa luda b yel-wẽnã.—Mat. 9:2-6.