1-2. Nand tɩ ned reeg lisgu, bõe la a segd n maane?

 YƲƲM a nu wã sẽn loogã pʋgẽ, neb milyõ la zak n deeg lisg n lebg a Zeova Kaset rãmba. B sʋkã neb wʋsg bãnga sɩdã b “yãadmẽ” wa a Tɩmote sẽn zĩnd pipi kiris-nebã wakatẽ wã. (2 Tɩm. 3:14, 15) Sãnda bãnga a Zeova b sẽn wa n yaa kãsemba, tɩ kẽer yaa b kʋʋlem wakate. Sẽn nan pa kaoose, pag a ye sẽn zãms Biiblã ne a Zeova Kaset rãmbã reega lisg a sẽn wa n tar yʋʋm 97.

² Y sã n zãmsda Biiblã, wall y roagdbã yaa a Zeova Kaset rãmba, y magdame n na n wa reeg lisg bɩ? Sã n yaa woto yaa sõma wʋsgo. La nand tɩ y reeg lisgu, y segd n dɩka y meng n kõ a Zeova. Sõs-kãngã pʋgẽ, d na n yãa rɩk f meng n kõ a Zeova wã sẽn dat n yɛɛlga. A leb n na n sõng-y lame tɩ y bãng bũmb ning sẽn kɩt tɩ y pa segd n yɛɛsdẽ, n pa rat n dɩk y meng n kõ Wẽnnaam n deeg lisgu, sã n mikame tɩ y segl n saa rẽ yĩng ye.

RƖK F MENG N KÕ A ZEOVA WÃ RAT N YEELAME TƖ BÕE?

3. Ãnd dãmb n dɩk b mens n kõ a Zeova tɩ b gomd b yell Biiblã pʋgẽ?

³ Biiblã pʋgẽ, b sã n yeel tɩ ned rɩka a meng n kõ a Zeova, rat n yeelame tɩ b welg-a-la toor bũmb takɩ wall tʋʋmd takɩ yĩnga. Israyɛll nebã ra yaa buud sẽn dɩk b mens n kõ a Zeova. La Israyɛll neb kẽer da rɩka b mens n kõ a Zeova tʋʋmd takɩ yĩnga. Wala makre, a Aarõ ra tara bãnd “sẽn yaa sõng” sẽn wilgd t’a rɩka a meng n kõ Wẽnnaam. Yaa sãnem bõn-paklg sẽn da be a zu-vindgã taoore. Sãnem bõn-paklgã ra wilgdame tɩ b welg-a-la toor tʋʋmd takɩ yĩnga, rat n yeel tɩ b yãk-a  lame t’a lebg Israyɛll maan-kʋʋdb kãsma. (Maan. 8:9) Nazireyẽ-rãmbã me ra rɩka b mens n kõ a Zeova, n pa maand bũmb kẽer neb a taabã sẽn maand ye. Gom-bil ning sẽn yaa “Nazireyẽ” wã yita Ebre wã gom-bil ning sẽn yaa naziirã pʋgẽ, t’a võorã yaa “ned b sẽn welg toore,” bɩ “ned b sẽn dɩk n kõ.” Nazirẽye-rãmbã ra segd n tũu noy takɩ a Moyiiz Tõogã sẽn wilgi.—Sõd. 6:2-8.

4. a) Yãmb sã n dɩk y meng n kõ a Zeova, bõe n tar yõod ne yãmb n yɩɩd masã? b) Kɩɩs f meng raabã rat n yeelame tɩ bõe? (Ges-y fotã me.)

⁴ Yãmb sã n dɩk y meng n kõ a Zeova, y yãka yam n na n lebg a Zeezi Kirist karen-biiga, la y lʋɩɩsd Wẽnnaam daabã taoore. Y sã n dɩk y meng n kõ a Zeova n lebg kiris-neda, rẽ baoodame tɩ y maan bõe? A Zeezi yeelame: “Ned sã n dat n tũ maam, bɩ a kɩɩs a mengã raabo.” (Mat. 16:24) Gɛrk gom-biis nins b sẽn lebg tɩ “kɩɩs a meng raabã” tõe n dat n yeelame me t’a “pa segd n le vɩ a meng yĩng ye.” Y sã n dɩk y meng n kõ a Zeova, y segd n zãaga y meng ne bũmb ning fãa sẽn pa noom-a. (2 Kor. 5:14, 15) Wala makre, y segd n zãaga y meng ne “yĩngã tʋʋma,” wala makre yoobo. (Gal. 5:19-21; 1 Kor. 6:18) Noy a woto tũub na n kɩtame tɩ y vɩɩmã pa noomẽ bɩ? Y sã n nong a Zeova la y kɩs sɩd t’a noyã yaa y neer yĩnga, y pa na n getẽ t’a weoogd-y lame ye. (Yɩɩn. 119:97; Eza. 48:17, 18) Saam-biig a ye yʋʋr sẽn boond t’a Nikola goma rẽ yell n yeel yaa: “Y tõe n gesa a Zeova noyã wa bãens roog bãens sẽn kɩt tɩ y pa tõe n maan y sẽn datã, wall bãens sẽn be yãmb ne bõn-yẽes sʋka, tɩ kɩt tɩ bõn-yẽesã pa tõe n maan-y bũmb ye.”

5. a) Wãn to la ned rɩkd a meng n kõ a Zeova? b) Welg-bʋg n be rɩk f meng n kõ a Zeova wã ne lisgã reegr sʋka? (Ges-y fotã me.)

⁵ Wãn to la y tõe n dɩk y meng n kõ a Zeova? Y pʋʋsda a Zeova, n pʋlm-a tɩ yaa  yẽ a ye bal la y na n tũ, la tɩ y na n lʋɩɩsa a raabã taoore. Sɩd-sɩda y pʋlemda a Zeova tɩ y na n kell n nong-a-la “ne y sũurã fãa, ne y sɩɩgã fãa, ne y yamã fãa, la ne y pãngã fãa.” (Mark 12:30) Rɩk f meng n kõ a Zeova wã yaa yãmb ne yẽ sʋk bala. La lisgã reegrã yaa zãma sʋka. A wilgda neb a taabã tɩ y rɩka y meng n kõ a Zeova. Y sã n dɩk y meng n kõ a Zeova, pa reem bũmb ye. A Zeova ratame tɩ y pids bũmb ning y sẽn pʋlm-a wã. Yãmb me raabã segd n yɩɩ woto.—Koɛ. 5:4, 5.

BÕE YĨNG TƖ Y SEGD N DƖK Y MENG N KÕ A ZEOVA?

6. Bõe n kɩtd tɩ ned rɩk a meng n kõ a Zeova?

⁶ Pipi bʋʋmã yaa y sẽn nong a Zeova wã yĩnga. Nonglem-kãng pa tik vɩʋʋgẽ ye. Y ‘bãnga Wẽnnaam la a raabã’ tɩ kɩt tɩ y sẽn nong-a to-to wã paase. (Kolo. 1:9) Y sẽn zãms Biiblã, y kɩsa sɩd 1) t’a Zeova sɩd beeme, 2) tɩ Biiblã yaa a Gomd a sẽn vẽneg tɩ b gʋlse, la 3) t’a tũnugda ne a siglgã n pidsd a raabã.

7. Nand tɩ y rɩk y meng n kõ Wẽnnaam, bõe la y segd n maane?

⁷ Neb nins sẽn dɩk b mens n kõ a Zeova wã segd n mii Wẽnnaam Gomdã zãms-nana wã, la b tũud a noyã b vɩɩmã nens fãa pʋsẽ. B maanda b sẽn tõe fãa n wilgd neb a taabã bũmb nins b sẽn zãmsdã. (Mat. 28:19, 20) B sẽn nong a Zeova to-to wã pãng paasdame, tɩ b rat ne b sũur fãa n tũ yẽ a ye tãa. Pa woto ne yãmb sɩda? Y sã n tar nonglem a woto, y pa na n dɩk y meng n kõ a Zeova n deeg lisgu, y sẽn dat n noog y Biibl karen-saambã wall y roagdbã sũuri, pa rẽ bɩ y sẽn dat n wõneg y zo-rãmbã yĩng ye.

8. Y sã n tags bũmb nins a Zeova sẽn maan n kõ-yã yelle, bõe yĩng tɩ na n sõng-y tɩ y rɩk y meng n kõ-a? (Yɩɩn-sõamyã 116:12-14)

 ⁸ Y sã n tags bũmb nins fãa a Zeova sẽn maan n kõ-yã yelle, y na n dat n dɩka y meng n kõ-a. (Karm-y Yɩɩn-sõamyã 116:12-14.) Sɩd me Biiblã yetame tɩ “kũun sẽn yaa sõma buud fãa, la kũun sẽn zems zãng buud fãa” yita a Zeova nengẽ. (Zak 1:17) Kũun nins a sẽn kõ-dã sʋka, sẽn yaa-a kãseng n yɩɩd yaa a sẽn kɩt t’a Zeezi sẽn yaa a Biigã wa ki tɩ yɩ maoongã. Tags-y n ges-y kũun-kãng yõodã sẽn ta zĩig ningã. A Zeezi sẽn ki tɩ yɩ maoongã kɩtame tɩ y tõe n paam zood sõma ne a Zeova. Leb n kɩtame tɩ y tõe n wa paam vɩɩm sẽn kõn sa. (1 Zã 4:9, 10, 19) Bũmb y sẽn tõe n maan n wilg tɩ y sũur nooma ne a Zeova kũun ning sẽn yaa sõma n yɩɩdã, n paas bõn-sõma a taabã a sẽn kõ-yã, yaa y sẽn na n dɩk y meng n kõ-a. (Tõo. 16:17; 2 Kor. 5:15) Vɩɩmd-y wakat sẽn kõn sa! sebrã sak 46 nimero a 4 zĩigẽ, b wilga d sẽn tõe n maan to-to n wilg tɩ d sũur nooma ne bõn-sõma nins a Zeova sẽn kõ-dã. Be, b ninga video sẽn kaoosd minit a tãabo. A gom-zugã yaa: D kõ Wẽnnaam kũuni.

YÃMB SEGL N SAAME N NA N DƖK Y MENG N KÕ WẼNNAAM N DEEG LISG BƖ?

9. Bõe yĩng tɩ ned pa segd n yɩ yãg-yãg n dɩk a meng n kõ Wẽnnaam?

⁹ Y tõe n getame tɩ y pa segl y meng n sa n na n dɩk y meng n kõ a Zeova n deeg lisg ye. Tõe tɩ bũmb kẽer la y segd n toeem sẽn na yɩl tɩ y vɩɩmã zems ne a Zeova noyã, wall tõe tɩ y segd n paasa y tẽebã pãnga. (Kolo. 2:6, 7) Biibl karen-biisã bɩʋʋng tʋʋlem pa yembr ye. Sẽn paase, b pa yãk yʋʋm takɩ tɩ kom-bɩɩsã sã n ta rẽ bɩ b segd n dɩk b mens n kõ Wẽnnaam n deeg lisg ye. Tikd-y bũmb nins y sẽn tõogd n maandẽ wã, n get y bɩʋʋngã sẽn yaa to-to, la y ra mak y meng ne ned a to ye.—Gal. 6:4, 5.

10. Y sã n getẽ tɩ y nan pa segl y meng n sa n na n dɩk y meng n kõ Wẽnnaam n deeg lisgu, bõe la y segd n maane? (Ges-y zĩ-gũbrã me: “ Kom-bɩɩs nins roagdb sẽn yaa a Zeova Kaset rãmbã yĩnga.”)

¹⁰ Baa y sã n getẽ tɩ y nan pa segl y meng n sa n na n dɩk y meng n kõ a Zeova, bɩ y ket n modgdẽ sẽn na yɩl n wa maan dẽ. Kos-y-yã a Zeova t’a sõng-y tɩ y toeem bũmb nins fãa y sẽn segd n toeemã. (Fili. 2:13; 3:16) Y tõe n basa y yam t’a na n kelga y pʋʋsgã, la t’a na n deegame.—1 Zã 5:14.

BÕE YĨNG TƖ KẼER MAAND SÃMB-SÃMBE?

11. Bõe la a Zeova na n maan n sõng tõnd tɩ d kell n maan sɩd ne-a?

¹¹ Neb kẽer segl n saame n tõe n dɩk b mens n kõ a Zeova n deeg lisgu, la b yɛɛsda ne rẽ maanego. B tõe n sokda b mens yaa: ‘La m sã n wa maan yel-wẽn-kãseng tɩ b yiis-m tigingã pʋgẽ?’ Yãmb me sã n sokda y meng woto, bɩ y bas y yam t’a Zeova na n kõ-y-la bũmb nins fãa sẽn yaa tɩlɛ “sẽn na yɩl tɩ y sẽn kẽnd to-to wã waoogd-a.” (Kolo. 1:10) Sẽn paase, a na n kõ-y-la raood tɩ y maan sẽn yaa tɩrga. A sẽn sõngd neb wʋsg tɩ b maand sẽn yaa tɩrgã wilgdame t’a tõe n maana rẽ. (1 Kor. 10:13) Yaa woto yĩng la neb nins b sẽn yiisd tigingã pʋgẽ wã sõor sẽn pa waoogã. A Zeova sõngda neb nins sẽn tũud-a wã tɩ b maand sɩd ne-a.

12. Bõe n tõe n sõng-d tɩ d ra wa maan yel-wẽn-kãsenga?

¹² Ninsaalbã fãa sẽn pa zems zãngã yamã mi n bee wẽng maanego. (Zak 1:14)  La makr taoore, yaa yãmb n yãkd y sẽn na n maanega. Sɩd-sɩda, yaa yãmb n yãkd y sẽn na n zã y meng to-to wã. Neb kẽer yetame tɩ yɛl sãnda taoore, f pa tõe n tõog f meng ye. La pa sɩd ye. Y tõe n maoo ne y tʋls-wẽnsã. Baa y sã n wa tar tʋls-wẽnse, y tõe n tõoga y meng n pa maan sẽn yaa wẽng ye. Sẽn na yɩl n tõog n maan dẽ bɩ y pʋʋsd daar fãa. Zãmsd-y Wẽnnaam Gomdã n pa vaandẽ ye. Kẽnd-y tigissã. Gomd-y bũmb nins y sẽn tẽedã yell ne neb a taabã. Y sã n maand bõn-kãensã n pa vaandẽ, y na n paama pãng n tõog n pids bũmb ning y sẽn pʋlem Wẽnnaamã. Sẽn paase, ra n tol-y n yĩm-y t’a Zeova na n sõng-y lame ye.—Gal. 5:16.

13. Mak-sõng-bʋg la a Zozɛf kõ tõndo?

¹³ Y sã n zoe n yãk y sẽn na n maan to-to makr taoore, na n yɩɩ nana tɩ y pids bũmb ning y sẽn pʋlem Wẽnnaamã. Biiblã gomda neb wʋsg sẽn tõog n maan dẽ yelle, baa bãmb me sẽn da yaa neb sẽn pa zems zãngã. Wala makre, a Potifaar pagã maka naoor wʋsg n na n kɩt t’a Zozɛf gãand-a. La a Zozɛf pa maan sãmbs baa bilf yel-kãngã taoor ye. Biiblã yeelame t’a “zãgsame,” la t’a yeelame yaa: “Mam na n yɩɩ wãn n maan bõn-wẽng a woto fãa, n beeg Wẽnnaam?” (Sɩng. 39:8-10) Yaa vẽeneg t’a Zozɛf ra mii a sẽn na n maan to-to, nand tɩ pagã mak-a. Rẽ kɩtame tɩ yɩ nana ne-a t’a pa maan sẽn yaa wẽng ye.

14. Bõe n tõe n sõng-y tɩ y ra wa maan yel-wẽnde?

¹⁴ Wãn to la y tõe n dɩk a Zozɛf togs-n-taar n kell maan sɩd ne Wẽnnaam? Y tõe n zoe n yãka y sẽn na n maan to-to makr taoore. Yɩt-y tao-tao n zãagd y meng ne bũmb ning fãa a Zeova sẽn kisi, la y ra tol n tags b yell ye. (Yɩɩn. 97:10; 119:165) Woto makr taoore, y pa na n maan yel-wẽnd ye. Rẽ tɩ y zoe n mii y sẽn na n maanega. Y zoe n yãka y sẽn na n maanã.

15. Wãn to la ned tõe n wilg t’a baooda a Zeova ne a sũur fãa? (Ebre-rãmbã 11:6)

¹⁵ Tõe tɩ y kɩsa sɩd t’a Zeova Kaset rãmbã tũudmã la sɩda, la tɩ y rat n tũu a Zeova ne y sũur fãa. Baa ne rẽ, y ket n maanda sãmbs n pa rat n dɩk y meng n kõ a Zeova n deeg lisg ye. Sã n yaa rẽ, y tõe n dɩka rĩm a Davɩɩd togs-n-taare. Y tõe n pʋʋsa a Zeova n yeel yaa: “Mam Wẽnnaam, fees-y maam neer n bãng mam  sũurã. Fees-y maam n bãng mam tagsa nins sẽn wat ne yɩɩrã. Ges-y bõn-wẽng sã n pa be mam pʋgẽ, la y wilg-m sor wakat sẽn kõn sa wã sor zugu.” (Yɩɩn. 139:23, 24) A Zeova ningda neb nins sẽn “baood-a ne b sũy fãa wã” barka. Yãmb sẽn modgd n na n wa rɩk y meng n kõ-a n deeg lisgã wilgdame tɩ y baood-a lame.—Karm-y Ebre-rãmb 11:6.

KET-Y N KOLGD-Y-YÃ A ZEOVA

16-17. Wãn to la a Zeova takd kom-bɩɩs nins roagdb sẽn tũud-a wã? (Zã 6:44)

¹⁶ A Zeezi yeelame tɩ yaa a Zeova n takd a karen-biisã n wat a nengẽ. (Karm-y Zã 6:44.) Tags-y n ges-y gom-kãensã sẽn be rasãnd to-to, la bũmb ning sẽn kɩt t’a Zeova tak yãmbã. A Zeova sã n tak ned n wa a nengẽ, yaa t’a yãa bũmb sẽn yaa sõma nin-kãng nengẽ. A geta nin-kãng wa a ned “sẽn yaa toor zalle.” (Tõo. 7:6) Yaa woto me ne yãmba.

¹⁷ La tõe tɩ y yaa bi-bɩɩga, tɩ y roagdbã yaa a Zeova Kaset rãmba. Y tõe n getame tɩ y tũuda a Zeova y roagdbã sẽn tũud-a wã yĩnga. La Biiblã yetame yaa: “Bɩ y kolg Wẽnnaam, tɩ yẽ me na n kolga yãmba.” (Zak 4:8; 1 Kib 28:9) Yãmb sã n maand bũmb sẽn na yɩl n kolg a Zeova, yẽ me kolgd-y lame. A Zeova pa get yãmb wa ned sẽn naag a nin-buiidã bal ye. A takda nebã yembr-yembre, baa neb nins roagdb sẽn tũud-a wã. Ned a woto sã n maan bũmb sẽn na yɩl n kolg a Zeova, yẽ me kolgd-a-la wa Zak 4:8 sẽn yetã.—Ges-y 2 Tesalonik rãmb 2:13.

18. Bõe yell la d na n gom sõsg ning sẽn pʋgdã pʋgẽ? (Yɩɩn-sõamyã 40:8)

¹⁸ Y sã n dɩk y meng n kõ a Zeova n deeg lisgu, y rɩka a Zeezi togs-n-taare. A pʋlma a Ba wã ne yamleoog t’a na n maana bũmb ning fãa a sẽn dat t’a maane. (Karm-y Yɩɩn-sõamyã 40:8; Ebre. 10:7) Sõsg ning sẽn pʋgdã pʋgẽ, d na n yãa bũmb ning y sẽn tõe n maane, n kell n maan sɩd ne a Zeova y lisgã poore.