1. Bark-bʋs la d paamda, d sẽn be a Zeova siglgã pʋgẽ wã?

 D SẼN paam n be a Zeova siglgã pʋgẽ yaoolem wakatã sẽn pa nana wã, yaa bark tɛkẽ! Baa ne dũniyã yɛl sẽn tar sãoong n dabdã, a Zeova sõnga tõnd tɩ d tar saam-biis la saam-bi-pogse, n zemsd taab wa zag-yɛng neba. (Yɩɩn. 133:1) A sõngda tõnd tɩ d zagsã pʋsẽ vɩɩm noomẽ. (Efɛɛ. 5:33–6:1) Sẽn paase a kõta tõnd yam tɩ d maood ne d zu-loeesã, la d tar sũ-noogo.

2. Bõe la d segd n maane, la bõe yĩnga?

² La sẽn na yɩl n kell n tũ a Zeova ne d sũur fãa, d segd n modga wʋsgo. Bõe yĩnga? Bala d fãa sẽn pa zems zãngã yĩnga, neb a taabã tõe n maana bũmb n sãam d sũuri. Tõnd mengã pãn-komsmã me tõe n komsda d raoodo, sẽn yɩɩd fãa d sã n maand yel-wẽnd ning n yɩlemdẽ. D segd n modgame n kell n tũ a Zeova baa 1) d tẽed-n-taag sã n maan bũmb tɩ sãam d sũuri, 2) d pag wall d sɩd sã n maan bũmb tɩ sãam d sũuri, la 3) tõnd mengã pãn-komsmã sã n sãamd d sũuri. Sõs-kãngã pʋgẽ, d na n goma bõn-kãensã b tãabã yelle. D na n yãa yam ning d sẽn tõe n dɩk neb sẽn maan sɩd ne a Zeova tɩ Biiblã gomd b yell nengẽ.

KELL-Y N MAAN-Y SƖD NE A ZEOVA, BAA Y TẼED-N-TAAG SÃ N MAAN BŨMB N SÃAM Y SŨURI

3. Zu-loe-bʋs la neb nins sẽn tũud a Zeova wã paamda?

³ Sẽn kɩt tɩ pa nana wã. D tẽed-n-taas kẽer tara manesem sẽn pa noom-do. Sãnda tõe n maana bũmb n sãam d sũuri, wall b tall manesem tɩ yaa wa b pa nong-d ye. Sẽn lʋɩt-b taoorã me tõe n wa tudgame. Bõn-kãensã tõe n kɩtame tɩ kẽer wa sãmbd sã n sɩd yaa Wẽnnaam siglgã la woto. Wall  tɩ b naag b tẽed-n-taasã “yam a yembr” n tũ Wẽnnaamã, b lakda b mens ne neb nins sẽn maan bũmb n sãam b sũurã, wall b tolg n bas tigissã kẽnde. (Sof. 3:9) Rẽ yaa yam tʋʋmd sɩda? Ned n paam zu-loees a woto buud tɩ Biiblã gomd a yelle. Bɩ d ges yam ning d sẽn tõe n dɩk a soabã nengẽ.

4. Zu-loe-bʋs la tẽn-tʋmd a Poll paam-yã?

⁴ Ned Biiblã sẽn gomd a yelle. Tẽn-tʋmd a Poll ra miime t’a tẽed-n-taasã pa zems zãng ye. Wala makre, a sẽn wa n lebg kiris-ned paalmã, tigingã neb kẽer da pa tẽed t’a sɩd lebga kiris-ned ye. (Tʋʋ. 9:26) Kaoosg zugẽ, sãnda n da wɩt-a n dat n sãam a yʋʋrã. (2 Kor. 10:10) A Poll yãa saam-biig a ye sẽn da lʋɩt taoor sẽn yãk yam n maan bũmb sẽn pa sõma, tɩ ra tõe n sãam neb kẽer tẽebo. (Gal. 2:11, 12) Sẽn paase, a Mark sẽn da yaa a Poll tũud-n-taagã maana bũmb n sãam a sũur wʋsgo. (Tʋʋ. 15:37, 38) A Poll ra tõe n basame tɩ bõn-kãensã a ye meng kɩt t’a lak a meng ne neb nins sẽn sãam a sũurã. Baasgo a ra ket n nanda a saam-biisã la a saam-bi-pogsã, n da ket n tũud a Zeova ne a sũur fãa me. Bõe n sõng a Poll t’a pa koms raoodo?

5. Bõe n sõng a Poll t’a pa lak a meng ne a tẽed-n-taasã? (Kolos rãmbã 3:13, 14) (Ges-y fotã me.)

⁵ A Poll ra nonga a tẽed-n-taasã. A sẽn da nong a taabã sõng-a lame t’a zʋʋg b pãn-komsmã, n get b zʋg-sõma wã. Nonglmã sõnga a Poll t’a maan bũmb ning yẽ mengã sẽn gʋls tɩ be Kolos rãmb 3:13, 14. (Karm-y-yã.) D ges a sẽn tall manesem ning ne a Markã. Baa ne a Mark sẽn lebg n bas a Poll a pipi so-toakã sasa wã, a Poll pa kell n tall sũ-kẽk ye. Kaoosg zugẽ, a sẽn wa n gʋls lɛtr ne nonglem n tool Kolos tigingã, a pẽga a Mark n yeel t’a yaa a tʋmd-n-taag sẽn ‘bels yẽ wʋsgo.’ (Kolo. 4:10, 11) B sẽn wa n yõk a Poll n pag bãens roog Rommã, a yeelame t’a ratame t’a Mark wa sõng-a. (2 Tɩm. 4:11) Vẽenega, a Poll kõo a saam-biisã sugri, n pa lak a meng ne-b ye. Yam-bʋg la d tõe n dɩk a Poll nengẽ?

6-7. Bõe n tõe n sõng tɩ d ket n nong d tẽed-n-taasã baa ne b sẽn pa zems zãngã? (1 Zã 4:7)

⁶ Yam ning d sẽn tõe n dɩkã. A Zeova ratame tɩ d ket n wilgd d tẽed-n-taasã tɩ d nong-b lame. (Karm-y 1 Zã 4:7.) Ned sã n wa pa maan tõnd wa kiris-ned sẽn tog n maanã, d segd n kɩsa sɩd t’a pa maan ne pʋ-toogo, la t’a maoodame n na n maan sẽn yaa tɩrg a Zeova nifẽ. (Yel. 12:18) Wẽnnaam nonga neb nins sẽn maand sɩd ne-a wã, baa ne b sẽn pa zems zãngã. D sã n wa maan yel-wẽnde, a pa yɩt  tao-tao n sãam d zoodã ye. A sũurã pa yikd ne tõnd n pa sigd me ye. (Yɩɩn. 103:9) D sũur yaa noog wʋsg d Ba wã sẽn kõt-d sugrã, tɩ d rat n dɩkd a togs-n-taar n kõt d taabã sugri.—Efɛɛ. 4:32–5:1.

⁷ Tẽeg-y me tɩ saabã sẽn kolgdã, d segd n modgame tɩ tõnd ne d tẽed-n-taasã zemsd taab sõma. D miime tɩ b sẽn namsd tõnd d tũudmã yĩngã tõe n kengame. B tõe n yõk-d lame meng n kẽes bãens roog d tũudmã yĩnga. Yaa wakat a woto la d rat d tẽed-n-taasã sõngr n tɩ yɩɩda. (Yel. 17:17) D ges bũmb ning sẽn paam a Zozɛf a sẽn yaa kãsem-soab n be Ɛspayn wã. B yõka yẽ ne saam-biis a taab n kẽes bãens roogo, b sẽn zãgs tɩ b kõn kẽ sodaarã yĩnga. A yeelame: “Bãensã roogẽ, d fãa sẽn da be zĩ-yɛngã kɩtame tɩ d tõe n maan bũmb n sãam d to sũur nana-nana. D ra segd n maanda sũ-mar ne taaba, la d sakd n kõt taab sugri. Rẽ sõng-d lame tɩ d kell n zems taaba, la d ra kogend taab ne bãensã roogẽ neb a taabã sẽn pa tũud a Zeova wã. Vugri, mam nugã poglame tɩ b sẽb hal tɩ m pa tõe n maan bũmb m toor ye. La saam-biig a ye n peg mam futã la a maan bũmb toor-toor n sõng-ma. Mam paamame tɩ neb wilg tɩ b nong-m lame, wakat ning m sẽn da rat rẽ n tɩ yɩɩdã.” Rẽ pa kɩt tɩ d rat n modg masã menga, n welg zu-loɛɛg buud fãa sẽn be tõnd ne d to sʋk sɩda?

KELL-Y N TŨ-Y-YÃ A ZEOVA, BAA Y PAGÃ WALL Y SƖDÃ SÃ N MAAN BŨMB N SÃAM Y SŨURI

8. Zu-loe-bʋs la sẽn kẽ-b kãadmã paamda?

⁸ Sẽn kɩt tɩ pa nana wã. Kãadem buud fãa tara zu-loeese. Biiblã yeela vẽeneg tɩ “neb nins sẽn kẽed kãadmã na n paama zu-loeese.” (1 Kor. 7:28) Bõe yĩnga? Bala pagã ne a sɩdã fãa yaa neb sẽn pa zems zãnga, n tar zʋg toor-toore, tɩ b ned kam fãa tar a sẽn nong la a sẽn pa nonge. B minimdã wall b sẽn wub-b to-to wã me tõe n yaa toor-toore. B kãadmã poore b nin-yɛng tõe n wa talla manesem sẽn wilgd t’a tara zʋg-wẽnga, t’a to wã ra pa miẽ ye. Bõn-kãensã a ye meng tõe n waa ne zu-loeese. Sã n wa yaa woto, wall tɩ b ned kam fãa sak n deeg t’a tara taal zu-loɛɛgã pʋgẽ n segd n bao a tɩɩmã, ned kam fãa ningda a to taale. B tõe n wa tagsdame meng tɩ yellã tɩɩm yaa b sẽn na n welg taab wall b kao kãadmã. La yellã tɩɩm yaa b sẽn na n welg taab wall b kao kãadmã sɩda? b Bɩ d ges yam ning d sẽn tõe n dɩk pag a ye Biiblã sẽn gomd a yell nengẽ. A kell n maana sɩd ne Wẽnnaam, baa a sɩdã sẽn da kɩt tɩ yɛlã yaa toog ne-a wã.

9. Zu-loe-bʋg la a Abigayɩll ra tara?

⁹ Ned Biiblã sẽn gomd a yelle. A Abigayɩll sɩdã yaa a Naball sẽn da yaa nin-toaag la tʋʋm-yood soabã. (1 Sãm. 25:3) Ra segd n yaa toog ne a Abigayɩll t’a zĩnd ne rao a woto. A Abigayɩll wa n paama sor n tõe n paam a meng ne a sɩdã bɩ? N-ye. Yɩɩ wakat ning a Davɩɩd sẽn da na n wa lebg Israyɛll rĩmã sẽn yãk yam n na n kʋ a Abigayɩll sɩdã, a sẽn tʋ yẽ ne a nebã yĩngã. (1 Sãm. 25:9-13) A Abigayɩll ra tõe n zoeeme n looge, n bas t’a Davɩɩd wa kʋ a Naballe. La a pa maan woto ye. A pʋd n kosa a Davɩɩd t’a ra kʋ a Naball ye. (1 Sãm. 25:23-27) Tõe tɩ yaa bõe n kɩt t’a maan woto?

10. Tõe tɩ bõe n kɩt t’a Abigayɩll kell n sak Wẽnnaam, baa ne a sẽn da tar zu-loees a kãadmã pʋgẽ wã?

 ¹⁰ A Abigayɩll ra nonga a Zeova, n da tũud noy nins a sẽn gãneg kãadmã wɛɛngẽ wã. Sãmbg sẽn kae, a ra mii bũmb ning a Zeova sẽn yeel a Ãdem ne a Awa, a sẽn wa n na n lugl kãadmã. (Sɩng. 2:24) A Abigayɩll ra miime t’a nifẽ, kãadmã yaa sõngo. A ra rat n taa Wẽnnaam yam, tɩ kɩt t’a ra maand a sẽn tõe fãa n na n kogl a sɩdã ne a zakã rãmba. A yɩɩ tao-tao n maan bũmb sẽn na yɩl t’a Davɩɩd ra kʋ a Naball ye. A sakame me n kos sugr bũmb a sẽn pa maan yĩnga. Yaa vẽeneg t’a Zeova ra nonga pʋg-kãngã sẽn tall raoodo, la sẽn da pa rat-m-ye soabã. Yam-bʋg la pagbã ne rapã tõe n dɩk a Abigayɩll nengẽ?

11. a) Bõe la a Zeova rat tɩ neb nins sẽn kẽ kãadmã maane? (Efɛɛz rãmbã 5:33) b) Yam-bʋg la y tõe n dɩk a Karmen sẽn maan to-to sẽn na yɩl t’a kãadmã ra sãamã pʋgẽ? (Ges-y fotã me.)

¹¹ Yam ning d sẽn tõe n dɩkã. A Zeova ratame tɩ ned sẽn kẽ kãadem tũ noy nins a sẽn gãneg kãadmã wɛɛngẽ wã, baa a to wã sã n kɩt tɩ yɛlã pa nana. Wẽnnaam sã n ne neb sẽn kẽ kãadem sẽn maand b sẽn tõe fãa n na n welg b zu-loeesã, la b wilgdẽ tɩ b nonga taab la b waoogd taaba, noom-a-la wʋsgo. (Karm-y Efɛɛz rãmb 5:33.) D gom a Karmen yelle. Na maan yʋʋm a yoob a kãadmã poore, a sɩnga Biiblã zãmsg ne a Zeova Kaset rãmbã n wa reeg lisgu. A Karmen yeelame: “Rẽ ra pa noom m sɩdã baa bilfu. Mam sẽn da kẽnd tigissã la m tʋmd a Zeova tʋʋm a taabã ra yikda a sũur wʋsgo. A ra wae n tʋʋda maam, la a yetẽ t’a na n loog n bas-m lame.” Baa ne rẽ, a Karmen kell n zĩnda ne a sɩdã. Yʋʋm pis-nu pʋgẽ, a modgame sẽn na yɩl t’a sɩdã neẽ t’a nong-a lame la a waoogd-a. A paasame: “Tar-n-tarẽ, m wa n bãnga m sẽn tõe n wʋm m sɩdã tagsg võor to-to, la m sẽn tõe n gom ne-a ne waoogr to-to. M sẽn mi tɩ kãadmã yaa sõng a Zeova nifẽ wã yĩnga, m maana m sẽn tõe fãa sẽn na yɩl tɩ m kãadmã ra sãam ye. M zɩ n bao n na n loog n bas m sɩdã, bala m nonga a Zeova.” c Y sã n wa tar zu-loees y kãadmã pʋgẽ y tõe n kɩsa sɩd t’a Zeova na n teel-y lame, la t’a na n sõng-y lame tɩ y ra kao y kãadmã ye.

KELL-Y N TŨ-Y-YÃ A ZEOVA, BAA Y PÃN-KOMSMÃ SÃ N SÃAMD Y SŨURI

12. D sã n maan yel-wẽn-kãsenga, d tagsg tõe n yɩɩ wãna?

¹² Sẽn kɩt tɩ pa nana wã. D sã n maan yel-wẽn-kãsenga, d tõe n komsa raood wʋsgo. Biiblã wilga vẽeneg tɩ d yel-wẽnã tõe n kɩtame tɩ d sũurã sãam hal tɩ d  ‘maand d bãngẽ.’ (Yɩɩn. 51:17) Saam-biig a ye yʋʋr sẽn boond t’a Robɛɛr maoo yʋʋm wʋsg sẽn na yɩl tɩ b yãk-a t’a lebg kãsem-sõangda. La a wa n maana yel-wẽn-kãsenga, n bãng t’a sãama a Zeova sũur wʋsgo. A yeelame: “Mam sũur-kasetã ra namsda maam wʋsgo. M da getame tɩ m ka võor ye. M pʋʋsa a Zeova ne nintãm. M tẽrame tɩ wakat kãnga m da tagsdame tɩ Wẽnnaam pa na n tol n le kelg maam ye. Bõe yĩng t’a na n le kelg-ma? Bala m sãama a sũur wʋsgo.” D sã n maan yel-wẽn-kãsenga, d sũur tõe n sãama wʋsg hal tɩ d tagsdẽ t’a Zeova raag-d lame n base, la tɩ d sẽn tũud-a wã lebga zaalem. (Yɩɩn. 38:4) Y sã n tagsda woto, bɩ y ges ned a ye Biiblã sẽn gomd a yell kibare. A kell n maana sɩd ne a Zeova, baa ne a sẽn maan yel-wẽn-kãsengã.

13. Yel-wẽn-bʋg la a Pɩyɛɛr maan tɩ yaa kãsenga, la bõe n kɩt t’a wa maan yel-wẽndã?

¹³ Ned Biiblã sẽn gomd a yelle. A Zeezi yõkrã yʋngo, tẽn-tʋmd a Pɩyɛɛr maana yel-wẽn toor-toore, tɩ rẽ wa kɩt t’a maan yel-wẽnd sẽn yɩɩd rẽ. Pipi, a Pɩyɛɛr teega a meng tɩ looge, n wuk a meng n yeel tɩ baa tẽn-tʋmdb a taabã fãa sã n bas a Zeezi, yẽ na n kell n maana sɩd ne-a. (Mark 14:27-29) Yiibu, b sẽn wa n be Gɛtsemane zẽedã zĩigẽ wã a Zeezi kos-a-la naoor wʋsg t’a gũ t’a pa tõog n gũ ye. (Mark 14:32, 37-41) Rẽ poore, neb kʋʋngã sẽn wa n na n yõk a Zeezi wã, a Pɩyɛɛr zoeeme n bas-a. (Mark 14:50) Sẽn na n baase, a Pɩyɛɛr kɩɩsa naoor a tãab t’a pa mi a Zeezi, hal n wẽene. (Mark 14:66-71) A Pɩyɛɛr sẽn wa n bãng t’a maana yel-wẽn-kãsengã, a manesem yɩɩ wãna? A yãba ne sũ-sãang wʋsgo, tɩ tõe tɩ yaa a sẽn da ningd a meng taal yĩnga. (Mark 14:72) Mams-y n ges-y-yã a Pɩyɛɛr sũurã sẽn sãam to-to, b sẽn wa n kʋ a Zeezi sẽn yaa a zoa wã lɛɛr a wãn poorã. Yaa vẽeneg tɩ wakat kãnga, a Pɩyɛɛr tagsame t’a ka võor ye!

14. Bõe n sõng a Pɩyɛɛr t’a kell n tũ a Zeova? (Ges-y fotã.)

¹⁴ Bũmb kẽer n sõng a Pɩyɛɛr t’a tõog n kell n tũ a Zeova. A pa lak a meng ne a tẽed-n-taasã ye. A tɩ bʋʋga karen-biis a taabã, tɩ b keng a raoodo. (Luk 24:33) Sẽn paase, a Zeezi vʋʋgrã poore a vẽnega a meng ne a Pɩyɛɛre, la tõe tɩ yaa a sẽn da rat n keng a raood yĩnga. (Luk 24:34; 1 Kor. 15:5) Rẽ poor bilfu a Zeezi le vẽnega a meng ne-a, la a pa ning-a taal a kongrã yĩng ye. A pʋd n yeela a Pɩyɛɛr sẽn yaa a zoa wã t’a na n kõ-a-la tʋʋm n paase. (Zã 21:15-17) A Pɩyɛɛr da miime t’a maana yel-wẽn-kãsenga, la a pa koms raood n bas sẽn yaa sõma maaneg ye. Bõe yĩnga? A ra  kɩsa sɩd t’a Zu-soab a Zeezi ra ket n nong-a lame. Sẽn paase, a Pɩyɛɛr tẽed-n-taasã kell n teel-a lame. Yam-bʋg la d tõe n dɩk a Pɩyɛɛr kibarã pʋgẽ?

15. A Zeova ratame tɩ d kɩs sɩd ne bõe? (Yɩɩn-sõamyã 86:5; Rom dãmbã 8:38, 39) (Ges-y fotã me.)

¹⁵ Yam ning d sẽn tõe n dɩkã. A Zeova ratame tɩ d bas d yam t’a nong-d lame, la t’a kõta sugr wʋsgo. (Karm-y Yɩɩn-sõamyã 86:5; Rom dãmb 8:38, 39.) D sã n maan yel-wẽnde, d ningda d meng taale. Woto yaa bũmb sẽn zemse, la sẽn segde. La d pa segd n tagsdẽ t’a Zeova pa le nong tõndo, wall t’a pa tõe n kõ-d sugr ye. D segd n yɩɩ tao-tao n bao sõngre. A Robɛɛr sẽn yaa saam-biig ning yell d sẽn zoe n gomã yeelame: “Yaa mam sẽn da teeg m meng makr taoorã n kɩt tɩ mam lʋɩ yel-wẽndã pʋgẽ.” A wa n bãngame t’a segd n tɩ togsa kãsem-dãmbã. A yeelame: “Mam sẽn tɩ togs kãsem-dãmbã, zĩig pʋgẽ m yãame t’a Zeova tũnugda ne-b n wilgdẽ t’a nong-m lame. M da neeme tɩ kãsem-dãmbã me nong-m lame. B sõng-m lame tɩ m bãng t’a Zeova pa raag-m n bas ye.” Tõnd me sã n tek yam n kos sugr d yel-wẽnã yĩnga, n kos sõngr la d maand d sẽn tõe fãa sẽn na yɩl n da le maan yel-wẽn-kãense, d tõe n basa d yam t’a Zeova ket n nong-d lame, la t’a kõ-d-la sugri. (1 Zã 1:8, 9) D sã n kɩs sɩd ne rẽ, baa d sã n wa maan yel-wẽn-kãsenga d pa na n bas a Zeova tũub ye.

16. Bõe yĩng tɩ y rat n kell n tũ a Zeova ne y sũur fãa?

¹⁶ D sẽn modgd n tũud a Zeova yaoolem wakatã sẽn pa nana wã noom-a-la wʋsgo. Ne a Zeova sõngre, d tõe n kell n tũ-a-la ne d sũur fãa, baa sẽn wa n yaa bũmb ning fãa n sãamd d sũuri. D tõe n ket n nonga d tẽed-n-taasã la d kõt-b sugri, baa b sã n wa maan bũmb n sãam d sũuri. D tõe n wilgame tɩ d nonga Wẽnnaam ne d sũur fãa la tɩ d tũuda noy nins a sẽn gãneg kãadmã wɛɛngẽ wã, d sẽn na n maand d sẽn tõe fãa n welgd zu-loees nins d sẽn paamd d kãadmã pʋgẽ wã. La d sã n wa maan yel-wẽn-kãsenga, d tõe n baoo a Zeova sõngre, n kɩs sɩd t’a nong-d lame la t’a kõta sugri, la d kell n tũ-a ne d sũur fãa. D tõe n kɩsa sɩd tɩ d sã n pa “koms raood n bas sẽn yaa sõma maanego,” a Zeova na n ning-d-la bark wʋsgo.—Gal. 6:9.