1. Bõe yĩng tɩ d segd n tũ sor ning a Zeova sẽn wilgd tõndã? Rɩk-y makre.

 MAMS-Y wa y sẽn na n menem we-raoogẽ. Bũmb toor-toor n be be n tõe n maan-y yelle. Wala makre, we-rũn-toose, wiisi, gõos la bog-bɛda. Y sã n paam tɩ ned sẽn mi weoogã sõma na n wilg-y sore, n sõng-y tɩ y gil bõn-kãense pa na n yɩ-y noog sɩda? Dũni-kãngã yaa wa weoog a woto. A pida ne bũmb toor-toor sẽn tõe n wa ne yelle, sẽn yɩɩd fãa sẽn tõe n sãam tõnd ne a Zeova zoodã. La d paamame t’a Zeova sẽn zems zãngã wilgd-d sore. A wilgd-d-la sor tɩ d gind zu-loeese, la a tar-d n dabd dũni-paalgã pʋgẽ tɩ d na n paam vɩɩm sẽn kõn sa.

2. Wãn to la a Zeova wilgd-d sore?

² Wãn to la a Zeova wilgd-d sore? Pipi, a tũnugda ne Biiblã sẽn yaa a Gomdã, la a tũnugd ne ninsaalb me. Wala makre, a tũnugda ne “tʋm-tʋmd sẽn tũud sɩd la sẽn tar yamã” n kõt tõnd bũmb toor-toor sẽn kengd d tẽebã, tɩ sõngd-d tɩ d bãngd n yãkd yam. (Mat. 24:45) Sẽn paase, a Zeova tũnugda ne rap sẽn tar minim n wilgd-d sore. Wala makre, tigims sull yel-gɛtbã la kãsem-dãmbã kengda d raoodo, la b kõt-d sagls sẽn tõe n sõng-d tɩ d mao ne zu-loeese. D sẽn paam t’a Zeova wilgd-d sor yaoolem wakatã sẽn pa nana wã, pa noom-d wʋsg sɩda? Sõngda tõnd tɩ d ket n tat a yam, la d kẽnd vɩɩmã sor zugu.

3. Bõe yell la d na n gom sõs-kãngã pʋgẽ?

³ Baa ne rẽ, wakat ninga d tõe n getame tɩ sor ning a Zeova sẽn wilgd tõndã tũub yaa toogo, sẽn yɩɩd fãa a sã n wa tũnugd ne rap sẽn pa zems zãng n na n wilg-d sore. Bõe yĩnga? Bala sagls nins b sẽn kõt tõndã tõeeme n pa noom-d ye. Wall d tõe n getame tɩ saglg ning b sẽn kõt tõndã pa  zemse, n maand sãmbs a sã n sɩd yita a Zeova nengẽ. Sã n wa yaa woto, d segd n modg n tẽegdame tɩ yaa a Zeova n wilgd a nin-buiidã sore, la tɩ d sã n tũ sor ning a sẽn wilgd tõndã d na n paama barka. Sẽn na yɩl tɩ d maneg n kɩs sɩd ne a Zeova, sõs-kãngã pʋgẽ d na n goma bũmb a tãab yelle: 1) A Zeova sẽn wilg a nin-buiidã sor to-to pĩnd wẽndẽ wã. 2) A sẽn wilgd a nin-buiidã sor to-to rũndã-rũndã, la 3) bark nins d sẽn na n paame, d sã n kell n tũ sor ning a sẽn wilgd tõndã.

A ZEOVA SẼN DA WILGD ISRAYƐLL NIN-BUIIDÃ SOR TO-TO

4-5. Wãn to la a Zeova wilg t’a ra tũnugda ne a Moyiiz n wilgd Israyɛll nebã sore? (Ges-y fotã.)

⁴ A Zeova yãka a Moyiiz t’a lʋɩ Israyɛll nebã taoor n tall-b n yɩ Ezɩpti. A kɩtame tɩ Israyɛll nebã ra ne vẽeneg tɩ yẽ n tũnugd ne a Moyiiz n wilgd-b sore. Wala makre, a ra kɩtame tɩ sawadg be b taoor wĩndga, tɩ bugum be b taoor yʋngo. (Yik. 13:21) A Moyiiz pʋga sawadgã ne bugmã tɩ b tall yẽ ne Israyɛll nebã n kẽng Mog-miuugẽ wã. Ezɩpt nebã pʋgla nin-buiidã n tɩ paam-b Mog-miuugẽ wã, tɩ b tags tɩ b pa tar b sẽn kẽedẽ, tɩ rabeem yõk-ba. B tagsame t’a Moyiiz sẽn tall-b n wa Mog-miuugẽ wã a tudgame. La ra pa tudgr ye. Yaa a Zeova n yãk yam n tũnug ne a Moyiiz n tall a nin-buiidã n kẽng be. (Yik. 14:2) Rẽ poore, Wẽnnaam maana yel-solem-kãseng n fãag-ba.—Yik. 14:​26-28.

⁵ Yʋʋm 40 pʋgẽ, a Moyiiz kell n pʋga sawadgã ne bugmã, n wilg Wẽnnaam nin-buiidã sor we-raoogẽ wã. a Wakat n zĩnd t’a Zeova kɩt tɩ sawadgã tɩ be a Moyiiz fu-roogã zugẽ, tɩ Israyɛll nebã fãa neẽ. (Yik. 33:​7, 9, 10) A Zeova ra paada sawadgẽ wã n gom ne a Moyiizi, t’a rɩk n taas nin-buiidã. (Yɩɩn. 99:7) Israyɛll nebã ra tõe n yãa vẽeneg t’a Zeova ra tũnugda ne a Moyiiz n wilgd-b sore.

6. Israyɛll nebã manesem yɩɩ wãn to ne a Zeova sẽn da wilgd-b sorã? (Sõdbo 14:​2, 10, 11)

⁶ Zu-bʋko, baa ne Israyɛll nebã sẽn da ne kasetã vẽenegã, wʋsg pa sak n deeg t’a Zeova ra tũnugda ne a Moyiiz n wilgd-b sor ye. (Karm-y Sõdb 14:​2, 10, 11.) B zãgsa naoor wʋsg tɩ b kõn sak n deeg t’a Zeova tũnugda ne a Moyiiz n wilgd-b sor ye. Rẽ kɩtame t’a Zeova pa bas tɩ nin-kãensã kẽ kãabg tẽngẽ wã ye.—Sõd. 14:30.

7. Togs-y kibay sẽn wilgd neb sẽn sak n tũ sor ning a Zeova sẽn wilg-bã. (Sõdbo 14:24) (Ges-y fotã me.)

⁷ La Israyɛll neb kẽer n sak n tũ sorã a Zeova sẽn da wilgd-bã. Wala makre a Zeova yeelame yaa: “A Kalɛɛb . . . kell n tũu maam ne a sũur fãa.” (Karm-y Sõdb 14:24.) Wẽnnaam keoo a Kalɛɛbe, hal n kɩt t’a yãk zĩig ning a sẽn dat Kanaã soolmẽ wã. (Zoz. 14:​12-14) Israyɛll neb nins sẽn paam n kẽ kãabg tẽngẽ wã me sak n tũu sor ning a Zeova sẽn da wilgd-bã tɩ yaa mak-sõngo. A Zozuwe sẽn wa n ledg a Moyiiz n lʋɩ Israyɛll nin-buiidã taoorã, “b waoog-a-la neer a yõor tɛka.” (Zoz. 4:14) Yaa rẽ yĩng la a Zeova sẽn ning-b barka, n kɩt tɩ b kẽ soolem ning a sẽn da pʋlem-bã pʋgẽ wã.—Zoz. 21:​43, 44.

8. Wãn to la a Zeova ra wilgd a nin-buiidã sor rĩm-dãmbã wakatẽ? (Ges-y fotã me.)

⁸ Yʋʋm wʋsg poore, a Zeova tũnuga ne bʋ-kaoodb n wilg a nin-buiidã sore. Rĩm-dãmbã wakatẽ, a Zeova yãka no-rɛɛsdb tɩ b ra wilgd a nin-buiidã sore.  Rĩm-dãmb nins sẽn da maand sɩdã tũu sagls nins no-rɛɛsdbã sẽn da kõt-bã. Wala makre, rĩm a Davɩɩd sika a meng n sak no-rɛɛs a Natã kiblgã. (2 Sãm. 12:​7, 13; 1 Kib 17:​3, 4) Rĩm a Zozafat kelga no-rɛɛs a Yahaziyɛll saglsã, la a sagl nin-buiidã tɩ b “tẽ [Wẽnnaam] no-rɛɛsdbã.” (2 Kib 20:​14, 15, 20) Rĩm a Ezekɩyaas sẽn wa n segd zu-loe-kɛgemsã, a kosa no-rɛɛs a Ezayi sõngre. (Eza. 37:​1-6) Rĩm-dãmbã sã n da tũud sor ning a Zeova sẽn wilgd-bã, b ra paamda barka, tɩ nin-buiidã me paamd koglgo. (2 Kib 20:​29, 30; 32:22) Tog n da yaa vẽeneg t’a Zeova tũnugda ne a no-rɛɛsdbã n wilgd nin-buiidã sore. Zu-bʋko rĩm-dãmb wʋsgo, la nin-buiidã fãa la bal pa kelg a Zeova no-rɛɛsdbã ye.—Zer. 35:​12-15.

A ZEOVA SẼN DA WILGD PIPI KIRIS-NEBÃ SOR TO-TO

9. Ãnd rãmb la a Zeova ra tũnugd ne n wilgd pipi kiris-nebã sore? (Ges-y fotã me.)

⁹ A Zeezi vʋʋgrã poore, a Zeova lugla pipi kiris-neb tigingã. Wãn to la a ra wilgd pipi kiris-nebã sore? A yãka a Zeezi t’a yaa tigingã zu-soaba. (Efɛɛ. 5:23) La a Zeezi ra pa gomd ne a karen-biisã ned kam fãa n wilgd-a sor ye. A ra tũnugda ne tẽn-tʋmdbã la kãsem-dãmbã sẽn be Zerizalɛmmã n wilgd-b sore. (Tʋʋ. 15:​1, 2) Sẽn paase, b ra yãkda kãsem-dãmb tɩ b lʋɩt tigimsã taoore.—1 Tes. 5:12; Tɩt 1:5.

10. a) Pipi kiris-nebã wʋsg manesem yɩɩ wãn ne sagls nins b sẽn da kõt-bã? (Tʋʋma 15:​30, 31) b) Bõe yĩng tɩ pĩnd wẽndẽ neb kẽer pa sak n kelg neb nins a Zeova sẽn yãk tɩ b ra wilgd-b sorã? (Ges-y zĩ-gũbrã:  “Bũmb ning sẽn kɩt tɩ neb kẽer pa sak n tẽ, baa kasetã sẽn da yaa vẽenegã.”)

¹⁰ Pipi kiris-nebã manesem yɩɩ wãn ne a Zeova sẽn da wilgd-b sor to-to wã? B wʋsgã sũur da nooma ne sagls nins b sẽn paamdã. Sɩd me, “b sũy yɩɩ noog wʋsg b sẽn paam raood kengrã yĩnga.” (Karm-y Tʋʋm 15:​30, 31.) La wãn to la a Zeova wilgd a nin-buiidã sor rũndã-rũndã?

A ZEOVA SẼN WILGD-D SOR TO-TO RŨNDÃ-RŨNDÃ

11. Mak-bʋg n wilgd t’a Zeova wilgda neb nins sẽn lʋɩt taoorã sore?

¹¹ A Zeova ket n wilgda a nin-buiidã sor rũndã-rũndã. A tũnugda ne a Gomdã la  ne a Bi-riblã sẽn yaa tigingã zu-soabã. Yãmb nee kaset sẽn wilgd tɩ Wẽnnaam tũnugda ne ninsaalb n wilgd-d sor bɩ? N-ye. Wala makre, tẽeg-y bũmb nins sẽn maan yʋʋmd 1870 soabã poorã. A Charles Russell ne a tʋmd-n-taasã bãngame tɩ yʋʋmd 1914 na n yɩɩ yʋʋmd sẽn tar yõod wʋsg Wẽnnaam Rĩungã luglg wɛɛngẽ. (Dãn. 4:​25, 26) Yaa Biiblã bãngr-goam la b zãms n bãng rẽ. A Zeova ra sõngd-b-la Biiblã zãmsg pʋgẽ bɩ? Yaa vẽenega. Bũmb ning sẽn maan dũniyã gill zug yʋʋmd 1914 wilgame tɩ Wẽnnaam Rĩungã sɩnga naam dɩɩbo. Dũni gill pipi zabrã sɩngame, tɩ rẽ poore, bã-longdse, tẽn-digimds la kom zĩndi. (Luk 21:​10, 11) A Zeova sɩd ra tũnugda ne nin-kãensã sẽn yaa pʋ-peelem dãmbã n sõngd a nin-buiidã.

12-13. Bõe la b maan dũni gill zabr a yiib-n-soabã sasa sẽn na yɩl tɩ koɛɛgã mooneg la nebã zãmsg paam pãnga?

¹² Tẽeg-y bũmb ning sẽn maan dũni gill zabr a yiib-n-soabã sasa wã yell me. Saam-biis nins sẽn da lʋɩt taoor d biru-kãsengẽ wã maana vaeesg Vẽnegr 17:8 wã zug n bãng tɩ zabrã ra pa na n baas ne Armagedõ, la tɩ zabrã poore laafɩ n na n zĩndi, tɩ b paam n moon koɛɛgã wʋsgo. Rẽ n so tɩ baa yɛlã sẽn da pa nana wakat kãngã, a Zeova siglgã lugla Galaad lekollã n zãms misioneer-dãmb sẽn na yɩl tɩ b moon koɛɛgã la b zãms nebã Biiblã dũniyã gill zugu. B tʋma misioneer-dãmbã baa zabrã wakate. Sẽn paase, tʋm-tʋmd sẽn tũud sɩdã lugla Cours pour le ministère théocratique b tigimsã fãa pʋsẽ, sẽn na yɩl n sõng saam-biisã tɩ b lebg koe-moondb la karen-saam-dãmb sẽn tar minim. Woto, b sõnga Wẽnnaam nin-buiidã tɩ b segl b mens tʋʋmd ning b sẽn da segd n tʋmã yĩnga.

¹³ Rũndã-rũndã d nee vẽeneg t’a Zeova ra wilgda a nin-buiidã sor wakat kãng sẽn da pa nana wã. Dũni gill zabr a yiib-n-soabã saab tɛka, tẽns wʋsg pʋsẽ a Zeova nin-buiidã zĩi bãane, n tar lohorem n moond koɛɛgã. Sɩd me, tʋʋmdã woma biis wʋsgo.

14. Bõe yĩng tɩ d tõe n bas d yam ne sor ning a Zeova siglgã la kãsem-dãmbã sẽn wilgd tõndã? (Vẽnegre 2:1) (Ges-y fotã me.)

 ¹⁴ Rũndã-rũndã, Siglgã taoor lʋɩtb Sull neb teega Kiristã t’a wilgd-b sore. B ratame tɩ sagls nins b sẽn kõt saam-biisã zems ne a Zeova raabã. Sẽn paase, b tũnugda ne tigims sull yel-gɛtbã la kãsem-dãmbã n wilgd tigimsã sore. c Kãsem-dãmb nins sẽn paam vʋʋsem sõng zaeebã bee Kiristã “nug-rɩtgẽ.” (Karm-y Vẽnegr 2:1.) Yaa sɩd tɩ kãsem-dãmbã fãa pa zems zãnga, n mi n tudgdẽ. A Moyiiz ne a Zozuwe ra mi n tudgame. Yɩɩ woto me ne tẽn-tʋmdbã. (Sõd. 20:12; Zoz. 9:​14, 15; Rom. 3:23) Baasgo, Kiristã ket n wilgda tʋm-tʋmd sẽn tũud sɩdã la kãsem-dãmbã b sẽn yãkã sore, n na n kell n maan woto “daar fãa hal tɩ ta dũniyã saabo.” (Mat. 28:20) Dẽnd bʋʋm-tɩrg bee d sẽn tõe n tik n kɩs neb nins a sẽn tũnugd ne n wilgd-d sorã sɩda.

D SÃ N TŨUD SOR NING A ZEOVA SẼN WILGD TÕNDÃ NAFD-D LAME

15-16. Yam-bʋg la y tõe n dɩk neb nins sẽn tũud sor ning a Zeova sẽn wilgd tõndã nengẽ?

¹⁵ D sã n tũud sor ning a Zeova sẽn wilgd tõndã d paamda bark masã menga. Wala makre, a Ãndi ne a Robin tũu tʋm-tʋmd sẽn tũud sɩdã sẽn sagl-d tɩ d ra gĩd d vɩɩmã ne bũmb wʋsgã. (Mat. 6:22) Woto kɩtame tɩ b tõog n tɩ sõng n me siglgã roto. A Robin yeelame: “Wakat ninga d gãee ro-bil pʋga, tɩ zĩig sẽn segend meng kae ye. Yɩɩ tɩlɛ tɩ m koos teed nins m sẽn da tar n yõgd fot-rãmbã. M yaool n da nonga fot-rãmb yõgb wʋsgo. Rẽ kɩtame tɩ m daag nintam. La m dɩka a Abrahaam pag a Saara togs-n-taar n da get bũmb ning sẽn be taoorã, la pa bũmb ning sẽn be poorẽ wã ye.” (Ebre. 11:15) A Ãndi ne a Robin sẽn maan woto wã wãn to la naf-ba? A Robin yeelame: “D sũur nooma ne d mense, d sẽn mi tɩ d kõta a Zeova bũmb ning fãa d sẽn tarã. D sã n wa tʋmd tʋʋm a Zeova sẽn kõ-do, sõngda tõnd tɩ d ne vɩɩmã sẽn na n yɩ to-to dũni-paalgã pʋgẽ wã.” A Ãndi paasame: “D sũur yaa noogo, bala d kẽesa d sẽkã la d pãngã fãa a Zeova tʋʋmdã pʋgẽ.”

¹⁶ D sã n tũud sor ning a Zeova sẽn wilgd tõndã, wãn to me la nafd tõndo? A  Marsiya sẽn paam a bakã poore a tũu b sẽn sagend-d tɩ d bao n tʋm a Zeova tʋʋmã n paasã. (Mat. 6:33; Rom. 12:11) A yeelame: “M da paamame n tõe n karem Inivɛrsite wã yʋʋm a naas zaalem. La m da rat n tʋma a Zeova tʋʋmã n paase. Rẽ n so tɩ m yãk yam n zãms nug-tʋʋmd sẽn na n sõng-m tɩ m get m meng yell la m moond koɛɛgã wʋsgo. M kɩsa sɩd tɩ yaa yam-yãkr sẽn yaa sõma wʋsgo. Rũndã-rũndã m yaa wakat fãa so-pakda. Sẽn paase, m tʋʋmã sẽn pa rɩt m sẽkã kɩtame tɩ m tõe n mi n tɩ sõng Betɛllẽ wã, la m tʋmd tʋʋm a taab a Zeova yĩnga.”

17. D sã n tũud sor ning a Zeova sẽn wilgd tõndã, wãn to me la nafd tõndo? (Ezayi 48:​17, 18)

¹⁷ Wakat-wakate, siglgã kõt-d-la sagls sẽn kogend tõndo. Wala makre, b keoogd-d lame tɩ d gũus d mens ne ligdã nonglem, la bũmb toor-toor sẽn tõe n wa kɩt tɩ d kɩɩs Wẽnnaam noyã. D sã n tũ sagl-kãens me, nafd-d lame. D na n kell n talla sũur-kaset sẽn yaa yɩlemde, la d gil yɛl kẽer sẽn tõe n wa kɩt tɩ d maand yɩɩre. (1 Tɩm. 6:​9, 10) Woto, d tõogd n tũu a Zeova ne d sũur fãa. Bũmb ka be n kõt sũ-noog la bãan n ta rẽ ye.—Karm-y Ezayi 48:​17, 18.

18. Bõe yĩng tɩ y yãk yam n na n kell n tũ sor ning a Zeova sẽn wilgd tõndã?

¹⁸ Sãmbg sẽn kae, a Zeova na n kell n tũnuga ne ninsaalb n wilg tõnd sor to-kãsengã sasa, n tãag Kirist naamã sẽn na n kaoos yʋʋm tusrã sasa. (Yɩɩn. 45:16) D na n kell n tũu sor ning b sẽn wilgd tõndã, baa d sã n wa getẽ tɩ b sẽn dat tɩ d maan yɛlã to-to wã yaa toor ne d sẽn datã bɩ? Rẽ bee ne d manesem sẽn yaa to-to ne sor ning a Zeova sẽn wilgd tõnd rũndã-rũndã wã. Woto wã, bɩ d tũud sor ning a Zeova sẽn wilgd tõndã wakat fãa. Wala makre, sagls nins rap nins a sẽn yãk tɩ b lʋɩt d taoorã sẽn kõt tõndã. (Eza. 32:​1, 2; Ebre. 13:17) D tõe n basa d yam n tũ sor ning a Zeova sẽn wilgd tõndã, bala a sõngd-d lame tɩ d gind bũmb toor-toor sẽn tõe n sãam d tẽebã, la a tar-d n dabd dũni-paalgã pʋgẽ tɩ d na n vɩɩmd wakat sẽn kõn sa.