1-2. Bõe n tõe n sõng-d tɩ d bãng a Zeova tagsg sẽn yaa a soaba, b sẽn sãamd a yʋʋrã yĩnga?

 MAMS-Y n ges-y ned y sẽn nong sẽn na n yeel bũmb sẽn pa sɩd y zugu. Yãmb miime tɩ yaa ziri. La neb kẽer n tẽeda. Sẽn yaa wẽng n yɩɩda, b yelgda zirẽ-kãng tɩ neb wʋsg tẽeda. Y tagsg na n yɩɩ wãna? Y sã n pa maand y toog kae ne nebã, la y rat n kell n tall yʋ-noogo, yaa vẽeneg tɩ y sũur na n sãama wʋsgo. Bɩ boe?—Yel. 22:1.

² Mak-kãngã tõe n sõng-d lame tɩ d bãng a Zeova tagsg sẽn yɩ a soab b sẽn wa n sãam a yʋʋrã. A Zeova malɛk a ye n gom ne d yaab a Awa, n dõd a Zeova. A Awa tẽe zirẽ-beedã. Rẽ kɩtame tɩ d yaab a Ãdem ne a Awa kɩɩs a Zeova. Rẽ n so tɩ ninsaalbã fãa lebg yel-wẽn-maandb la kiidba. (Sɩng. 3:​1-6; Rom. 5:12) Yaa zirẽ-beed ning a Sʋɩtãan sẽn sɩng yelgr Edɛn zẽedẽ wã n wa ne zu-loees nins fãa d sẽn ne rũndã-rũndã wã. Wala makre kũumã, zabã la namsgã. La rẽ yĩnga, a Zeova sũur sãamda ne b sẽn kãnd-a woto wã, la zu-loees nins rẽ sẽn wat ne wã bɩ? Yaa vẽenega. Baasgo, a Zeova pa lebg sũ-kẽk soab ye. Sɩd me, a ket n yaa “Wẽnnaam sẽn yaa sũ-noog soaba.”—1 Tɩm. 1:11.

3. Bõe la d tõe n maane?

³ D tõe n sõng n wilgame t’a Sʋɩtãan sẽn yet bũmb ning a Zeova zugã yaa ziri. Sẽn na yɩl n maan woto, d segd n saka noor ning sẽn yeele: “Pẽg-y-yã a Zeova yʋʋrã.” (Yɩɩn. 113:1) Pẽg a Zeova yʋʋrã yaa d sẽn na n gomd a yell ne neb a taabã, n togsd sɩd a zugu. Yãmb na n maana woto bɩ? D na n yãa bʋʋm-tɩrs a tãab sẽn na n kɩt tɩ d rat n pẽg d Wẽnnaamã yʋʋr ne d sũur fãa.

 D SÃ N PẼGD A ZEOVA YƲƲRÃ, NOOM-A LAME

4. Bõe yĩng tɩ d sã n pẽgd a Zeova bɩ noom-a? Rɩk-y makre. (Ges-y fotã me.)

⁴ D sã n pẽgd d saasẽ Ba wã yʋʋre, noom-a lame. (Yɩɩn. 119:108) La woto rat n yeelame tɩ Wẽnnaam Sẽn-tõe-a-fãa wã yaa wa ninsaalbã sẽn pa zems zãngã sẽn dat pẽgre, rẽ sẽn kengd b raoodã yĩng bɩ? Ayo. D rɩk makre: Mams-y wa bi-bilf sẽn na n wudg n tɩ mobg a baaba, n yeel-a yaa: “Papa, fo ka to ye.” Ba wã sũur nooma wʋsgo, t’a yõgemd a noore. Bõe yĩnga? D na n tagsame tɩ yaa rao sẽn pa nand a menga, n dat t’a biig pẽg-a n keng a raood bɩ? Ayo. D miime tɩ yaa ned sẽn kɩs a meng sɩda, la a sũurã sẽn noomã yaa a biigã sẽn wilg t’a nong-a lame, la t’a sũur nooma ne-a wã. A miime t’a biigã sẽn yaa sõm-mit la a tõe n wilg a nonglmã, a sã n wa lebg kãsma a vɩɩmã na n yɩɩ noogo. Yaa woto me n kɩt tɩ d sã n pẽgd a Zeova sẽn yaa Ba sẽn ka to wã, bɩ a sũur noome.

5. D sã n pẽgd a Zeova, d wilgdame t’a Sʋɩtãan gom-bʋg n yaa ziri?

⁵ D sã n pẽgd d saasẽ Ba wã, d sõngd n wilgdame tɩ gomd a Sʋɩtãan sẽn togs ninsaalbã zug n yaa ziri. A Sʋɩtãan yeelame tɩ ninsaal baa a ye pa na n gom n teel Wẽnnaam ne a sũur fãa ye. A yeelame tɩ tõnd ned baa a ye pa na n kell n maan sɩd ne a Zeova namsg taoor ye. A paasame tɩ ninsaalbã fãa na n kɩɩsa Wẽnnaam, b sã n wa getẽ tɩ rẽ na n naf-b lame. (Zoob 1:​9-11; 2:4) La a Zoob maana sɩd ne a Zeova, n wilg t’a Sʋɩtãan yaa pʋ-yagda. Yãmb me na n kell n maana sɩd ne Wẽnnaam bɩ? Tõnd ned kam fãa tõe n yãka yam n teel d Ba wã, la d tũ-a ne d sũur fãa, tɩ kɩt t’a sũur yɩ noogo. (Yel. 27:11) D sẽn paam n tõe n maan woto wã yaa zu-zẽkr tɛkẽ!

6. Wãn to la d tõe n dɩk rĩm a Davɩɩd la Levi buudã neb togs-n-taare? (Neemi 9:5)

⁶ Neb nins sẽn nong Wẽnnaamã rat n pẽga a yʋʋrã ne b sũy fãa. Rĩm a Davɩɩd yeelame: “Bɩ m pẽg a Zeova. Bɩ bũmb nins fãa sẽn be mam pʋgẽ wã pẽg a yʋʋrã sẽn yaa sõngã.” (Yɩɩn. 103:1) A Davɩɩd ra miime tɩ f sã n pẽgd a Zeova yʋʋrã, yaa a Zeova mengã la f pẽgda. D sã n wʋm a Zeova yʋʋrã, d tagsda a sẽn yaa Wẽnnaam ning buudã yelle, la bõn-kãsems nins a sẽn maanã yelle. A Davɩɩd sẽn da rat yaa a wilg t’a Ba wã yʋʋr yaa sõngo, la a pẽg-a. A ra ratame tɩ ‘bũmb nins fãa sẽn be a pʋgẽ wã’ pẽg a Zeova, rat n yeel t’a ra rat n pẽg-a-la ne a sũur fãa. Levi buudã neb me lʋɩɩ taoor n pẽg a  Zeova. B sika b mens n yeel tɩ b pa tol n tõe n paam gom-biis n pẽg a Zeova yʋʋrã sẽn yaa sõngã tɩ zems ne pẽgr ning a sẽn segd ne wã ye. (Karm-y Neemi 9:5.) Sãmbg sẽn kae, d sã n sik d meng n pẽg a Zeova woto, noom-a lame.

7. D sã n wa moond nebã koɛɛgã, wall n naag-b n maand bũmb toor-toore, wãn to la d tõe n pẽg a Zeova?

⁷ Rũndã-rũndã, d tõe n nooga a Zeova sũuri, d sẽn na n gomd a yell ne nonglem, la d wilgdẽ tɩ d sũur nooma ne-a. D sã n wa moond koɛɛgã, d segd n tẽegame tɩ d sẽn datã yaa sõng nebã tɩ b kolg a Zeova, la b nong-a wa tõnd sẽn nong-a wã. (Zak 4:8) D sõngda nebã ne sũ-noog tɩ b bãngd Biiblã sẽn bilgd a Zeova to-to wã. Wala makre, a nonglmã, a tɩrlmã, a yamã, a pãngã, la a zʋg-sõma a taaba. D sã n maand d sẽn tõe fãa n dɩkd a Zeova togs-n-taare, d pẽgd-a lame tɩ noom-a. (Efɛɛ. 5:1) Dẽ, neb a taabã na n neeme tɩ d yaa toor ne dũni-kãngã nebã, n sokd b meng bõe yĩng tɩ yaa woto. (Mat. 5:​14-16) D sã n wa naag-b n maand bũmb kẽere, d tõe n wilg-b-la bũmb ning sẽn kɩt tɩ d yaa toorã. Rẽ tõe n kɩtame tɩ pʋ-peelem dãmbã bao n bãng Wẽnnaam. D sã n maand woto n pẽgd a Zeova, d noogda a sũuri.—1 Tɩm. 2:​3, 4.

D SÃ N PẼGD A ZEOVA YƲƲRÃ, NOOMA A ZEEZI

8. Bõe yĩng tɩ d tõe n yeel tɩ yaa a Zeezi n pẽg a Zeova yʋʋrã n yɩɩd bõn-naandsã fãa?

⁸ Malɛgsã la ninsaalbã fãa sʋka, ned baa a ye pa be n mi a Zeova wa a Zeezi sẽn mi-a to-to wã ye. (Mat. 11:27) A Zeezi nonga a Ba wã. Yẽ n pẽgd a Zeova yʋʋrã n yɩɩd bõn-naandsã fãa. (Zã 14:31) A yõkrã yʋngo, a pʋʋsa a Ba wã n kʋms bũmb ning a sẽn maan tẽngã zugã n yeel yaa: “Mam kɩtame tɩ b bãng fo yʋʋrã.” (Zã 17:26) A Zeezi gomdã võor yaa bõe?

9. Wãn to la a Zeezi tũnug ne yel-bũnd n sõng nebã tɩ b bãng a Ba wã sõma?

⁹ A Zeezi sẽn maanã yɩɩda yeel nebã tɩ Wẽnnaam yʋʋr la a Zeova bala. Zʋɩf-rãmb nins sẽn da kelgd a Zeezi wã ra zoe n mii Wẽnnaam yʋʋrã. La a Zeezi wilg-b-la “Wẽnnaam sẽn yaa a soaba.” (Zã 1:​17, 18) Wala makre Biiblã babg ning b sẽn da gʋls ne Ebre wã wilgame t’a Zeova yaa nimbaan-zoɛt la sõmblem soaba. (Yik. 34:​5-7) A Zeezi maneg n wilga rẽ võor sõma, a sẽn wa n wẽ biig sẽn sãam a ba paoong yel-bũndã. Yel-bũndã wilgame tɩ ba wã sẽn wa n yã a biigã t’a “ket n be hal yɩɩg” n watẽ wã, a wudgame n seg-a n mok-a sõma, la a kõ-a sugr ne a sũur fãa. D sã n karem kibarã, d maneg n neeme t’a Zeova yaa nimbãan-zoɛt la sõmblem soaba. (Luk 15:​11-32) A Zeezi sõnga nebã tɩ b bãng a Ba wã sẽn sɩd yaa Wẽnnaam ning buudã.

10. a) Bõe n wilgd t’a Zeezi ra pʋta a Ba wã yʋ-peellã, la t’a ratame tɩ neb a taabã me maan woto? (Mark 5:19) (Ges-y fotã me.) b) Bõe la a Zeezi rat tɩ d maan rũndã-rũndã?

¹⁰ A Zeezi ra ratame me tɩ nebã pʋt a Ba wã yʋ-peellã bɩ? Vẽenega. A Zeezi wakatẽ wã, tũudum taoor dãmb kẽer da tagsdame tɩ Wẽnnaam yʋʋrã yaa sõng wʋsgo, hal tɩ b pa segd n pʋd-a ye. La a Zeezi pa bas tɩ minund a woto sẽn pa zems ne Biiblã sẽn yetã kɩt t’a pa waoog a Ba wã yʋʋrã ye. Tẽeg-y bũmb ning sẽn maan a Zeezi sẽn wa n dig zĩn-dãmb tɩ b yi n bas rao Gerasa nebã soolmẽ wã. Rabeem yõka nebã, tɩ b kos a Zeezi t’a yi bãmb soolmẽ wã, t’a pa tõog n pa soolem-kãng ye. (Mark 5:​16, 17) La a Zeezi yaool n da ratame tɩ nebã bãng a Zeova yʋʋrã beenẽ. Rẽ n so t’a yeel rao ning a sẽn dig zĩn- dãmbã tɩ b yi n basã t’a tɩ togs nebã bũmb ning a Zeova sẽn maan n kõ-a wã, la pa yẽ sẽn maan n kõ-a wã ye. (Karm-y Mark 5:19.) a Rũndã-rũndã me, a ket n data woto. A ratame tɩ d sõng nebã dũniyã gill zug tɩ b bãng a Ba wã yʋʋrã. (Mat. 24:14; 28:​19, 20) D sã n maand woto, d noogda d Rĩm a Zeezi sũuri.

11. Bõe la a Zeezi yeel a karen-biisã tɩ b pʋʋs n kose, la bõe yĩng tɩ rẽ tar yõodo? (Ezekɩyɛll 36:23)

¹¹ A Zeezi ra miime t’a Zeova raabã yaa t’a yʋʋrã paam waoogre, rat n yeel tɩ n wilg tɩ b sẽn dõt-a bũmb ninsã fãa yaa ziri. Rẽ n kɩt tɩ d Zu-soabã wilg a karen-biisã b sẽn segd n pʋʋs to-to, n yeel yaa: “Tõnd Ba sẽn be saasẽ, bɩ yãmb yʋʋr paam waoogre.” (Mat. 6:9) A Zeezi ra miime tɩ yaa bũmb sẽn pak bõn-naandsã fãa. (Karm-y Ezekɩyɛll 36:23.) Malɛk wall ninsaal kae n waoog a Zeova yʋʋrã n ta a Zeezi ye. La b sẽn wa n yõk a Zeezi wã, bõe la a bɛɛbã rõd-a? B yeelame t’a yaa wẽn-tʋʋsa. Yaa vẽeneg t’a Zeezi sẽn kis yel-wẽnd ning n yɩɩd yaa ned sẽn na n tʋʋs a Ba wã, wall n sãam a yʋʋrã sẽn yaa sõngã. A sũur da sãama wʋsgo, a sẽn da mi tɩ b na n dõd-a-la yel-wẽn-kãng n kʋ-a wã. Tõe tɩ yaa rẽ n kɩt t’a ra be “sũ-sãan-kãseng pʋgẽ,” a yõkrã sẽn wa n kolgdẽ wã.—Luk 22:​41-44.

12. A Zeova yʋʋrã waoogr wɛɛngẽ, bõe la a Zeezi maan tɩ yaa kãseng n yɩɩda?

¹² A Zeezi tõoga toog namsg taoore, tʋya, la kãnegr buud toor-toor taoor sẽn na yɩl n waoog a Ba wã yʋʋre. A ra miime t’a saka a Ba wã bũmb fãa pʋgẽ, tɩ yãnd ra pa tar-a ye. (Ebre. 12:2) A ra miime me tɩ yaa a Sʋɩtãan n namsd-a wakat kãng sẽn da pa nana wã. (Luk 22:​2-4; 23:​33, 34) Yaa vẽeneg t’a Sʋɩtãan ra saagdame t’a na n tõogame t’a Zeezi kãsg a burkĩndã. La a modgrã yɩɩ faoore! A Zeezi wilgame t’a Sʋɩtãan yaa ziri yagda, la t’a Zeova tara neb sẽn sakd-a ne b sũy fãa, tɩ baa zu-loe-kɛgems taoor bɩ b pa kãsgd b burkĩndã ye.

13. Wãn to la y tõe n noog y Rĩmã sũuri?

¹³ Y rat n nooga y Rĩmã sũur bɩ? Sã n yaa rẽ bɩ y kell n waoog a Zeova yʋʋrã, n sõngd nebã tɩ b bãngd tõnd Wẽnnaamã  sẽn sɩd yaa a soaba. Y sã n maand woto, y rɩkda a Zeezi togs-n-taare. (1 Pɩy. 2:21) Yãmb me noogda a Zeova sũuri, la y wilgdẽ t’a Sʋɩtãan sẽn yaa a bɛ wã yaa pʋ-yagd meng-menga!

D SÃ N PẼGD A ZEOVA YƲƲRÃ, D SÕNGD N FÃAGDA YÕYA

14-15. D sã n sõng nebã tɩ b bãng a Zeova, wãn to la na n naf-ba?

¹⁴ D sã n pẽgd a Zeova yʋʋrã, d sõngd n fãagda yõya. Wãn to? Yaa t’a Sʋɩtãan luda “sẽn ka tẽed-bã yam.” (2 Kor. 4:4) Rẽ kɩtame tɩ b tẽed zirẽ-beed nins a Sʋɩtãan sẽn yelgdã. Wala makre, b tẽedame tɩ Wẽnnaam kae, t’a zãra ne tõndo, la t’a toog ka be ne-do, tɩ Wẽnnaam yaa wẽnem soab n namsd yel-wẽn-maandbã wakat sẽn kõn sa yĩnga. Zirẽ-be-kãensã yaa sẽn na n sãam a Zeova yʋʋrã bala, n kɩt tɩ nebã pa rat n bao n pẽneg-a ye. La d sã n moond koɛɛgã, d kɩtdame t’a Sʋɩtãan raabã pa pidsdẽ ye. D sõngda nebã tɩ b bãngd sɩdã d Ba wã zugu, n pẽgd d Wẽnnaamã yʋʋrã sẽn yaa sõngã. Rẽ wata ne nafa-bʋse?

¹⁵ Sɩdã sẽn be Wẽnnaam Gomdã pʋgẽ wã tara pãng wʋsgo. D sã n gomd a Zeova yell ne nebã, la d sõngd-b tɩ b bãngd a sẽn sɩd yaa Wẽnnaam ning buudã, d yãta rẽ sẽn nafd-b to-to. Ziri nins a Sʋɩtãan sẽn yelgdã pa na n le lud b yamã ye. Sẽn paase, b na n bãnga d saasẽ Ba wã sẽn nong-dã zʋg-sõma wã. B sũur na n yɩɩ noog wʋsg ne a Zeova pãngã sẽn ka koakã. (Eza. 40:26) B na n kɩs-a-la sɩda, a tɩrlmã sẽn zems zãngã yĩnga. (Tõo. 32:4) A Zeova yam-kãsengã na n kɩtame tɩ b yamã vẽnege. (Eza. 55:9; Rom. 11:33) B na n bãngame t’a yaa nonglem, tɩ bels-ba. (1 Zã 4:8) B sẽn pẽnegd a Zeova n paasdẽ wã, b manegd n kɩsa sɩd tɩ b na n wa lebga a kamba, n vɩɩmd wakat sẽn kõn sa. D sẽn paam n tõe n sõng neb a taabã tɩ b pẽneg b saasẽ Ba wã yaa zu-zẽkr tɛkẽ! D sã n maand woto, a Zeova getame tɩ d yaa a “tʋmd-n-taase.”—1 Kor. 3:​5, 9.

16. Neb kẽer sã n bãng Wẽnnaam yʋ-peellã, b manesem yaa wãna? Togs-y kibare.

¹⁶ Sɩngrẽ wã, d tõe n wilga nebã tɩ  Wẽnnaam yʋʋr la a Zeova. Rẽ bal tõe n nafa pʋ-peelem soab wʋsgo. Wala makre, pag a ye yʋʋr sẽn boond t’a Aliya b roagdbã ra pa kiris-neb ye. A tũudmã ra pa tat a yam zãnga, a leb n da pa get tɩ sõngd-a lame t’a pẽnegd Wẽnnaam ye. La a sẽn sɩng Biiblã zãmsg ne a Zeova Kaset rãmbã, pa le yaa woto ye. Rẽ tɛka, a neeme tɩ Wẽnnaam lebga a zoa. A sẽn bãng tɩ b yãka Wẽnnaam yʋ-peellã Biibl-dãmb wʋsg pʋgẽ n ledg-a ne naam yʋy wala Zu-soabã, ling-a lame. A sẽn bãng a Zeova yʋʋrã toeema a vɩɩmã. A yeelame: “Mam zoa wã tara yʋʋre!” Wãn to la rẽ naf-a? A paasame: “Masã, m tara sũur pʋgẽ bãan hakɩɩka. M getame tɩ yaa zu-zẽkr tɛkẽ.” Rao a ye yʋʋr sẽn boond t’a Stiiv ra yaa yɩɩn-yɩɩnda, t’a roagdbã be Zʋɩf-rãmbã tũudum sẽn yaa dem-dem pʋgẽ. A ra pa rat n naag tũudum baa a ye, bala a ra neeme tɩ zãmbã yaa wʋsg tũudmã pʋgẽ. La a ma wã kũum poore, daar a ye, a Zeova Kaset soab n da zãmsd ned Biiblã, t’a sak n zĩnd n na n kelge. A sẽn bãng Wẽnnaam yʋʋrã yɩ-a-la noog wʋsgo. Ad a sẽn yeele: “M da zɩ n wʋm Wẽnnaam yʋ-peellã ye.” A paasame yaa: “Pipi la woto m sẽn ne tɩ Wẽnnaam sɩd beeme! M yãame tɩ pa belgr ye. Rẽ tɛka, m paama zoa.”

17. Bõe yĩng tɩ y yãk yam n na n kell n pẽg a Zeova yʋʋrã? (Ges-y fotã me.)

¹⁷ Yãmb sã n wa moond koɛɛgã la y zãmsd nebã Biiblã, yãmb wilgd-b-la Wẽnnaam yʋʋrã sẽn yaa Zeova wã bɩ? Y sõngd-b lame tɩ b bãng a sẽn yaa Wẽnnaam ning buudã bɩ? Y sã n maand woto, y pẽgda Wẽnnaam yʋʋrã. Bɩ y ket n pẽgd a Zeova yʋʋrã sẽn yaa sõngã, n sõngd nebã tɩ b bãngd a sẽn yaa Wẽnnaam ning buudã. Woto, y na n fãaga yõya. Y rɩkda y Rĩm a Zeezi Kirist togs-n-taare. La sẽn yɩɩd fãa, y na n nooga y Ba a Zeova sũuri. Bɩ y ‘pẽg a yʋʋrã wakat sẽn kõn sa yĩnga.’—Yɩɩn. 145:2.