1. Biiblã pʋgẽ b sã n gomd bur yelle wae n yaa bõe yell la b gomda?

 PĨND wẽndẽ wã, bur n da yaa rɩɩb ning neb wʋsg sẽn da nong n dɩtẽ wã. (Sɩng. 14:18; Luk 9:3) Sɩd me, bur da tara yõod wʋsgo, hal tɩ b sã n da na n gom rɩɩb yell Biiblã pʋgẽ, bɩ b wae n yetẽ tɩ “buri.” (Mat. 6:11, notã) Sẽn paase, neb wʋsg miime t’a Zeezi maana yel-solemd naoor a yiib tɩ neb paam bur n wãbe. (Mat. 16:9, 10) B gomda yel-solem-kãens a ye yell Zã sak a 6 pʋgẽ. D sã n wa gomd yel-solem-kãng yelle, d na n bao n bãnga yam ning d sẽn tõe n dɩk rẽ pʋgẽ.

2. Bõe n wa n kɩt tɩ yaa tɩlɛ tɩ neb paam rɩɩbo?

² A Zeezi tẽn-tʋmdbã gilg n moona koɛɛgã n lebg n wa, t’a kɩt tɩ b kẽ koom-koglg n na n pasg Galile mogrã, sẽn na yɩl tɩ b paam n vʋʋse. (Mark 6:7, 30-32; Luk 9:10) B kẽnga Betsayida sɛɛga, zĩig neb sẽn da kae. La pa yã n kaoos la neb tusa wa be ye. A Zeezi pa maan wa a pa ne-b ye. Ne nonglem, a zams-b-la bũmb wʋsg Wẽnnaam Rĩungã zugu, la a maag bãad-rãmbã. Zĩigã sẽn wa n kolg sobgrã, karen-biisã ra sokda b mens nin-kãensã fãa sẽn na n maan to-to n paam dɩɩbo. Tõe tɩ b kẽer ra tara rɩɩb bilfu, la b fãa la bal ra segd n kẽnga tẽn-bõonesẽ wã n tɩ ra rɩɩbo. (Mat. 14:15; Zã 6:4, 5) Bõe la a Zeezi na n maane?

A MAANA YEL-SOLEMD TƖ NEB PAAM BURI

3. A Zeezi sẽn yã tɩ kom n tar kʋʋngã, a yeela a tẽn-tʋmdbã tɩ b maan bõe? (Ges-y fotã me.)

³ A Zeezi yeela a tẽn-tʋmdbã yaa: “Pa tɩlɛ tɩ b loog ye. Bɩ yãmb mensã bao bũmb n kõ-b tɩ b rɩ.” (Mat. 14:16) Ra yaa  zu-loɛɛga, bala rapã sõor da taa bãmb tus a nu. B sã n da na n sõd pagbã la kambã n naage, tõe tɩ ra taa neb tus-piig la a nu. (Mat. 14:21) A Ãndere yeelame yaa: “Bi-bilf n be ka n tar bur a nu b sẽn maan ne orz zom, n paas zĩm-bõoneg a yiibu. La rẽ zema bõe ne neb wʋsg woto?” (Zã 6:9) Neb wʋsg ra nong n wãbda bur sẽn maan ne orz zom. Sẽn yɩɩd fãa naong rãmbã. Tõe tɩ zĩm-bõonegã yaa b sẽn ning yamsem n kʋɩɩse. La biigã sẽn da tar rɩɩb ningã pa sekd neb wʋsg woto fãa ye. Bɩ bõe?

4. Yam-bʋg la d tõe n dɩk Zã 6:11-13 pʋgẽ? (Ges-y fot-rãmbã me.)

⁴ A Zeezi sẽn da rat n maan kʋʋngã neerã yĩngã, a yeelame tɩ b zĩnd moodã zug sul-sula. (Mark 6:39, 40; karm-y Zã 6:11-13.) Kibarã yeelame t’a Zeezi pʋʋsa a Ba wã bark burã la zĩmã yĩnga. Ra zemsame t’a pʋʋs Wẽnnaam barka, bala sɩd-sɩda, yaa yẽ nengẽ la rɩɩbã yita. Woto pa tẽegd tõnd tɩ d segd n dɩka a Zeezi togs-n-tare, n pʋʋsd nand tɩ d rɩ sɩda? D yaa d yembr tɩ d bee ne neb me, d segd n maana woto. Rẽ poore, a Zeezi kɩtame tɩ b pʋɩ rɩɩbã, tɩ nebã rɩ n tɩge. Gɩrs meng n kelle, t’a Zeezi ra pa rat tɩ b bas tɩ sãam ye. Rẽ n so t’a kɩt tɩ b tigs gɩrsã. Tõe tɩ yaa sẽn na n wa wãb nindaare. A Zeezi sẽn maan woto wã, a kõo tõnd mak-sõng d sẽn tõe n tũ, n da sãam bũmb nins d sẽn tarã ye. Roagdba, y tõe n naaga y kambã n zãms kiba-kãnga, n bao n bãng a sẽn wilgd tõnd bũmb ning pʋʋsgã wɛɛngẽ, sãamb reegrã, la yɩ kõatbã wɛɛngẽ.

5. A Zeezi sẽn maan yel-solemdã poore, bõe la kʋʋngã da rat n maane, la a Zeezi manesem yɩɩ wanã?

 ⁵ Nebã sũur da nooma ne a Zeezi sẽn zãmsd-b to-to wã, la a sẽn da maand yel-soalmã. B sẽn da mi t’a Moyiiz pĩnd n togsame tɩ Wẽnnaam na n tʋma no-rɛɛs-kãsengã, tõe tɩ b ra sokda b mees yaa: ‘Pa a Zeezi la no-rɛɛs-kãng sɩda?’ (Tõo. 18:15-18) Sã n yaa woto, tõe tɩ b tagsame t’a na n yɩɩ na-kãsenga, n tõe n kõ buudã tõr rɩɩb tɩ seke. Rẽ n so tɩ kʋʋngã ra rat n “yõk [a Zeezi] n kɩt t’a lebg rĩmã.” (Zã 6:14, 15) A Zeezi sã n da bas tɩ b maan woto, a ra na n kẽesa a toog Zʋɩf-rãmbã politikã yɛlẽ, tɩ yaool n da yaa Rom nebã n so-ba. A sakame bɩ? Ayo. Kibarã wilgame t’a Zeezi yãka yam n ‘kẽng tãngã zugu.’ Baa nebã sẽn pẽdg-a wã, a pa sak n kẽes a toog politikã yɛlẽ ye. Rẽ wilgda tõnd bũmb sẽn tar yõod wʋsgo.

6. Wãn to la d tõe n wilg tɩ d rɩkda a Zeezi togs-n-taare? (Ges-y fotã me.)

⁶ Yaa vẽneg tɩ nebã pa na n kos-d tɩ d maan yel-solemd tɩ b paam buri, wall tɩ d maag bãad-rãmb ye. B leb n pa na n bao tɩ d lebg rĩm wall tẽng naab ye. La b tõe n pẽdgd-d lame n dat tɩ d kẽes d toog politikã yɛl n vot ned b sẽn tagsd t’a na n manega yɛlã, wall n wilg tɩ d teend-a lame. La a Zeezi pa sak n maan a buud ye. A zãgsame t’a kõn n kẽes a toog  politikã yɛlẽ ye. Kaoosg zugẽ, a yeelame meng yaa: “Mam Rĩungã pa dũni-kãngã rẽnd ye.” (Zã 17:14; 18:36) Rũndã-rũndã, d segd n talla a Zeezi tagsgã buudu, la d rɩk a togs-n-taare. D teenda a Rĩungã, n gomd rẽ yelle, la d pʋʋsdẽ tɩ Rĩungã wa. (Mat. 6:10) Bɩ d le gom a Zeezi sẽn maan yel-solemd tɩ nebã paam burã yelle, tɩ d na n yãa rẽ sẽn zãmsd tõnd bũmb a to.

“YEL-SOLEMD NING A SẼN MAAN N PƲƖ BURÃ VÕORE”

7. Bõe la a Zeezi maan-yã, la a tẽn-tʋmdbã manesem yɩɩ wãna? (Zã 6:16-20)

⁷ A Zeezi sẽn maan yel-solemd n dɩlg kʋʋngã poore, a kɩtame t’a tẽn-tʋmdbã kẽ koom-koglg n leb Kapɛrnawum, tɩ yẽ mengã kẽng tãngã zugu, sẽn na yɩl tɩ kʋʋngã ra tõog n kɩt t’a lebg rĩm ye. (Karm-y Zã 6:16-20.) Tẽn-tʋmdbã sẽn kẽ koom-koglgã pʋgẽ n loogdẽ wã, sob-kãseng n yik n zẽkd mogrã ko-pɛma. Rẽ poore a Zeezi babs-b lame, n da kẽnd koomã zugu. A yeela tẽn-tʋmd a Pɩyɛɛr me t’a kẽn koomã zugu. (Mat. 14:22-31) A Zeezi sẽn wa n kẽ koom-koglgã pʋgẽ wã, sobgã yõkame. Rẽ linga karen-biisã tɩ b yeel yaa: “Yãmb sɩd yaa Wẽnnaam Bi-ribla.” a (Mat. 14:33) Baasgo, b ra pa ne tɩ loees n be yel-solem-kãng ne bũmb ning a sẽn maan kʋʋngã yĩngã sʋk ye. A Mark goma kiba-kãng yell n yeel yaa: “Rẽ linga [tẽn-tʋmdbã] wʋsgo, bala b ra pa wʋm yel-solemd ning a sẽn maan n pʋɩ burã võor ye. La ra ket n yaa toog ne-b tɩ b wʋm yɛlã võore.” (Mark 6:50-52) B ra pa mi tõog ning a Zeova sẽn kõ a Zeezi t’a maand yel-soalmã sẽn yaa kãseng to-to wã ye. La rẽ poor bilfu, a Zeezi goma yel-solemd ning a sẽn maan n kõ kʋʋngã burã yelle, n wilg yam d sẽn tõe n dɩk rẽ pʋgẽ.

8-9. Bõe yĩng tɩ neb kʋʋngã a Zeezi sẽn dɩlgã pʋg-a? (Zã 6:26, 27)

⁸ Sẽn da pak neb nins a Zeezi sẽn dɩlgã n yɩɩd yaa noorã rɩɩbo, la b ratmã pidsgu. Wãn to? Vẽkembeoogã, b yãame t’a Zeezi ne a tẽn-tʋmdbã loogame. Rẽ n so tɩ kʋʋngã kẽ koom-kogend a taab sẽn yi Tiberyaad n wa, n na n kẽng Kapɛrnawum sẽnes n tɩ gẽes a Zeezi. (Zã 6:22-24) B maana woto, b sẽn da rat t’a maneg n gom ne-b Rĩungã yell yĩng bɩ? Ayo. Sẽn da pak-b n yɩɩd yaa b le paam bur n wãbe. Bõe n kɩt tɩ d bãng rẽ?

⁹ Ges-y bũmb ning sẽn maane, b sẽn wa n paam a Zeezi Kapɛrnawum sɛɛgẽ wã. A Zeezi yeel-b-la vẽeneg tɩ sẽn pak-b n yɩɩdã yaa b wee n paam b noorã rɩɩb bala. Baa b sẽn “wãb burã n tɩgã,” a Zeezi yeelame tɩ yaa ‘rɩɩb sẽn sãamde.’ A sagl-b lame tɩ b tʋm “rɩɩb ning sẽn pa sãamde, n kõt vɩɩm sẽn ka sɛtã yĩnga.” (Karm-y Zã 6:26, 27.) A Zeezi yeelame t’a Ba wã na n kõ-b-la rɩ-kãnga. Tõe tɩ b sẽn wʋm tɩ rɩɩb n be n tõe n kõ vɩɩm sẽn ka sɛtã ling-b-la wʋsgo. Rɩ-bʋg n tõe n kõ vɩɩm sẽn ka sɛta, la wãn to la a Zeezi kɛlgdbã tõe n paam-a?

10. Sẽn na yɩl n “paam vɩɩm sẽn ka sɛta,” bõe la ninsaalbã segd n maane?

¹⁰ Tõe tɩ nin-kãens sẽn yaa Zʋɩf-rãmbã tagsame tɩ tʋʋm n be b sẽn tõe n tʋm n paam rɩ-kãnga. Tõe tɩ b ra tagsda tʋʋm nins a Moyiiz Tõogã sẽn yeel tɩ b tʋmã yelle. La a Zeezi yeel-b lame yaa: “Sẽn na yɩl n tʋm Wẽnnaam tʋʋmdã, y segd n tẽe soab ning a sẽn tʋmã.” (Zã 6:28, 29) Sẽn na yɩl n “paam vɩɩm sẽn ka sɛta,” ninsaalbã segd n tẽe soab ning Wẽnnaam sẽn tʋmã. Sɩd me, a Zeezi ra goma rẽ yell  pĩnda. (Zã 3:16-18, 36) A le wa n goma d sẽn tõe n maan to-to n paam vɩɩm sẽn ka sɛtã yell n paase.—Zã 17:3.

11. Wãn to la Zʋɩf-rãmbã wilg tɩ ket n yaa noorã rɩɩb yell bal n pak-ba? (Yɩɩn-sõamyã 78:24, 25)

¹¹ Zʋɩf-kãens pa sak a Zeezi sẽn gom “Wẽnnaam tʋʋmdã” yelle, tɩ yaa toor ne bãmb sẽn sɩng n mi a soabã ye. B sok-a lame yaa: “Bõe la yãmb maand tɩ yaa bãnd sẽn na yɩl tɩ d yã n tẽ yãmba?” (Zã 6:30) B yeelame t’a Moyiiz wakatẽ wã, b yaab-rãmbã paamame tɩ b kõ-b mannã d sẽn tõe n dɩk n mak ne burã. (Nee. 9:15; karm-y Yɩɩn-sõamyã 78:24, 25.) Yaa vẽeneg tɩ sẽn ket n pak-bã yaa b paam bur n wãbe. A Zeezi sẽn wa n gom “bur meng-mengã sẽn yit saasẽ” yellã, bur sẽn yaa wa mannã n yaool n tõe n kõ vɩɩm sẽn ka sɛtã, b pa kos-a meng t’a wilg a gomdã võor ye. (Zã 6:32) Yaa rɩɩbã yell bal n da pak-ba, hal tɩ b toog ra ka be ne bũmb nins a Zeezi sẽn da baood n zãms-b vɩɩm sẽn ka sɛtã wɛɛngẽ wã ye. Yam-bʋg la d tõe n dɩk kiba-kãngã pʋgẽ?

BŨMB NING SẼN SEGD N PAK TÕND N YƖƖDÃ

12. Bõe la a Zeezi yeel n wilg bũmb ning sẽn tar yõod n yɩɩdã?

¹² Ad bũmb sẽn tar yõod wʋsg Zã sak a 6 sẽn wilgd tõndo: Yaa bũmb nins sẽn paasd tõnd ne a Zeova zoodã pãngã n segd n pak tõnd n yɩɩda. Tẽeg-y t’a Sʋɩtãan sẽn wa n na n mak a Zeezi wã, a Zeezi yeela gomd sẽn wilgd rẽ. (Mat. 4:3, 4) A sẽn wa n zãmsd nebã tãngã zugã me, a wilgame tɩ tara yõod tɩ d yɩ neb sẽn mi tɩ b segd n baoo Wẽnnaam. (Mat. 5:3) Rẽ n so tɩ d segd n sok d meng yaa: ‘Mam sẽn vɩ to-to wã wilgdame tɩ sẽn pak maam n yɩɩdã yaa maam ne a Zeova zoodã bɩ, bɩ yaa mam mengã raabã?’

13. a) Bõe yĩng tɩ pa wẽng tɩ d maan sũ-noog ne rɩɩbo? b) Sagl-bʋg la d segd n kelge? (1 Korẽnt rãmbã 10:6, 7, 11)

¹³ Pa wẽng tɩ d pʋʋs n kos bũmb nins sẽn yaa tɩlɛ ne-dã, la d maan sũ-noog ne bõn-kãens ye. (Luk 11:3) Tʋʋm-toog sẽn kɩtd tɩ d paam n ‘dɩ la d yũ’ wata ne sũ-noogo, n leb n “yaa Wẽnnaam kũuni.” (Koɛ. 2:24; 8:15; Zak 1:17) Baasgo, pa segd n yɩ noorã rɩɩb baoob n pak tõnd n yɩɩd ye. Tẽn-tʋmd a Poll wilga rẽ a sẽn wa n gʋls lɛtr n tool kiris-nebã. Rẽ tɩ Zerizalɛm la a wẽnd-doogã sãoong kolgame. A tẽeg-b-la bũmb kẽer Israyɛll nebã sẽn maan pĩnd wẽndẽ, wala makre, bũmb ning b sẽn maan Sinayi tãngã sɛɛgã. A yeela kiris-nebã tɩ b “ra yɩ wa [Israyɛll] neb nins sẽn tʋlg bõn-wẽnsã ye.” (Karm-y 1 Korẽnt rãmb 10:6, 7, 11.) A Zeova ra maanda yel-soalem tɩ Israyɛll nebã paamd rɩɩbo. La b yão-beedã wa n kɩtame tɩ b get rẽ wa ‘bõn-wẽnga.’ (Sõd. 11:4-6, 31-34) Sẽn paase, b sẽn wa waoogd sãnem nag-bilã, b rɩɩme, n yũ la b reeme. (Yik. 32:4-6) A Poll goma rẽ yell n yeel tɩ yaa keoogr n kõ kiris-neb nins sẽn da be yʋʋmd 70 soabã sẽn wa n kolgdẽ wã, yʋʋmd ning b sẽn sãam Zerizalɛm wẽnd-doogã. Dũniyã saab sẽn kolgdã, tõnd me segd n tũu a Poll saglgã ne d sũur fãa.

14. Rɩɩbã sẽn na n yɩ to-to dũni-paalgã pʋgẽ wã wɛɛngẽ, bõe la Biiblã yeta?

¹⁴ A Zeezi sẽn wa n na n yeel tɩ d tõe n pʋʋsa Wẽnnaam n kos t’a “kõ tõnd rɩɩb rũndã daarã yĩngã,” a goma wakat Wẽnnaam daabã sẽn na n maan “tẽngã zugu, wa sẽn maand saasẽ wã” yell me. (Mat. 6:9-11) Rẽ kɩtdame tɩ y tags bõe yelle? Biiblã wilgame tɩ Wẽnnaam daabã sã n wa maand tẽngã zugu, rɩɩb na n zĩndame. Ezayi 25:6-8 wã wilgdame  t’a Zeova Rĩungã naam sasa, rɩ-nood na n zĩndame. Yɩɩn-sõamyã 72:16 yetame: “Kood wʋsg na n zĩnda tẽngã zugu. Tãensã zut na n pida ne koodo.” Yãmb yãgdame n na n wa yãk koodã n segl rɩɩb ning y sẽn nong n yɩɩdã, wall rɩɩb y sẽn zɩ n segl bɩ? Y na n tõogame me n sel viyn tɩɩs n dɩ b biisã la y maan divẽ. (Eza. 65:21, 22) Sẽn paase, dũniyã nebã fãa na n tõog n maana woto.

15. Kũum vʋʋgrã sẽn wata sasa, bõe la b na n zãms nebã? (Zã 6:35)

¹⁵ Karm-y Zã 6:35. Bõe la neb nins sẽn wãb burã la zĩmã a Zeezi sẽn maan yel-solemd n kõ-bã na n wa paame? Kũum vʋʋgrã sẽn watã sasa, tõe tɩ y na n yãa kẽere. Baa b sẽn da pa tẽed a Zeezi pĩndã, tõe tɩ b na n vʋʋg-b lame. (Zã 5:28, 29) Na n yɩɩ tɩlɛ tɩ neb a woto buudã bao n wʋm a Zeezi goamã võore, a sẽn yeele: “Mam yaa bur ning sẽn kõt vɩɩmã. Ned ning fãa sẽn wat mam nengẽ, kom pa na n tol n yõk-a ye.” Na n yɩɩ tɩlɛ tɩ b tẽ a Zeezi sẽn ki tɩ yɩ maoongã, rat n yeel tɩ b tẽ t’a kõo a vɩɩmã bãmb yĩnga. Wakat kãnga, b na n sigla zãmsg n sõng neb nins sẽn na n vʋʋgã la kamb nins sẽn na n dogã, tɩ b bãng Wẽnnaam la a raabã. Y sã n paam n na n naag n zãms-ba, y sũur kõn yɩ noog sɩda? Rẽ maaneg na n kõ-y-la sũ-noog n yɩɩd rɩɩbo. Sõng nebã tɩ bao a Zeova zoodã na n kõ-d-la sũ-noog n yɩɩd rɩɩbã d sẽn na n dɩ dũni-paalgã pʋgẽ wã.

16. Bõe yell la d na n gom sõsg ning sẽn pʋgdã pʋgẽ?

¹⁶ D goma kibar ning sẽn be Zã sak a 6 pʋgẽ wã yell bilfu. La bũmb a taab la a Zeezi ra tar n na n zãms nebã “vɩɩm sẽn ka sɛtã” wɛɛngẽ. Ra zemsame tɩ Zʋɩf-rãmb nins a Zeezi sẽn da gomd ne wã kelg sõma, tɩ tõnd me segd n kelg rẽ sõma rũndã-rũndã. D na n kell n goma Zã sak a 6 yell sõsg ning sẽn pʋgdã pʋgẽ.