ZÃMSGÃ YĨNGA 51
YƖƖLL A 3 Foo la tõnd pãng zĩiga, foo la tõnd teeg-yã
A Zeova mii bũmb nins sẽn kɩtd tɩ y daagd nintãmã
“Kok-y mam nintãmã n sui y ko-waoogẽ wã. Rẽ pa gʋls yãmb sebrã pʋgẽ sɩda?”—YƖƖN. 56:8.
D SẼN NA N BÃNGE
Sõs-kãngã wilgdame tɩ d sũur sã n mi n sãam wʋsgo, a Zeova wʋmda rẽ võore, la t’a na n bels-d lame.
1-2. Bõe n tõe n wa kɩt tɩ d raag nintãm?
D FÃA mi n daaga nintãm wakat ninga. Bũmb sã n mi n maan tɩ noog d sũur wʋsgo, d tõe n daaga sũ-noog nintãm. Tõe tɩ y zoe n daaga nintãm bũmb sẽn tar yõod wʋsg ne-y yĩnga. Wala makre, y biig rogem yĩnga, wall y sẽn lebg n tẽeg bũmb sẽn noog y sũur wʋsg yĩnga. Tõe me tɩ yɩɩ y sẽn le yã y zoa y sẽn da maan yʋʋm wʋsg n pa yã yĩnga.
2 La naoor wʋsgo, d sã n wa raagd nintãm yaa d sũur sẽn sãam wall d sẽn namsd yĩnga. Wala makre ned d sẽn da kɩs sɩd ne sã n maan bũmb n sãam d sũur wʋsgo, d tõe n daaga nintãm. Bã-kɛgeng sã n namsd tõndo, wall d nin-nongr sã n maan kaalem d tõe n daaga nintãm. Toog a woto buud sasa d manesem tõe n yɩɩ wa a Zeremi manesem sẽn yɩ to-to, Babilon nebã sẽn wa n sãam Zerizalɛmmã. A yeelame yaa: “Mam nintãmã zoeta wʋsg wa kʋɩlg koom. . . . Mam yãbdame n pa basdẽ ye. Mam yãbdame n pa sĩndedẽ” ye.—Wiis. 3:48, 49.
3. A Zeova sã n wa ne tõnd sẽn namsde, a tagsg yaa wãn to? (Ezayi 63:9)
3 A Zeova mii zu-loees nins fãa sẽn kɩt tɩ d raag nintãmã sõore. Biiblã wilgdame tɩ sẽn wa n yaa zu-loɛɛg ning fãa la d tara a miime, la tɩ d sã n kelemd n kot sõngre a wʋmdame. (Yɩɩn. 34:15) La a Zeova sẽn ne d zu-loeesã la a wʋmd d kosgã sẽn yãk a toogo, a maanda bũmb n sõngd tõndo. A yaa d Ba sẽn nong-d wʋsgo. Rẽ n so t’a sã n wa yã tɩ d yãbda a sũur sãamda wʋsgo, t’a tʋll n sõng-do.—Karm-y Ezayi 63:9.
4. Biiblã kiba-bʋs yell la d na n gome, la b wilgda tõnd bõe a Zeova zugu?
4 A Zeova Gomdã pʋgẽ, a wilgda tõnd a tagsg sẽn yaa a soaba, neb nins sẽn tũud-a wã sã n wa namsdẽ. A Ann ne a Davɩɩd la rĩm a Ezekɩyaas kibayã wilgda rẽ. Bõe n kɩt tɩ b raag nintãm? B sẽn kelem n kos a Zeova sõngrã, bõe la a maan-yã? Wãn to la b kibayã tõe n bels tõndo, d sã n wa raagd nintãm sũ-sãams yĩnga, b sẽn zãmb-d yĩnga, wall d sẽn pa le tẽed manegr yĩnga?
D SÃ N WA RAAGD NINTÃAM SŨ-SÃAMS YĨNGA
5. Wãn to la a Ann zu-loeesã ra namsd-a?
5 A Ann ra tara zu-loees wʋsg tɩ kɩt t’a ra raagd nintãm. Pipi, a sɩdã ra tara pagb a yiibu, t’a pʋg-to a Penina ra kis-a. La sẽn maneg n zẽn yɛlã yaa t’a Ann ra pa tar biiga, t’a Penina yaool n tar kamb wʋsgo. (1 Sãm. 1:1, 2) A Penina ra yaanda a Ann wakat fãa a sẽn yaa kirã yĩnga. Yãmb sã n da be yell a woto buud pʋgẽ, y manesem na n yɩɩ wãna? A Ann sũurã ra sãamdame, “hal t’a yãbd n pa rat rɩɩb ye.” ‘Sũ-toog n da tar-a wʋsgo.’—1 Sãm. 1:6, 7, 10.
6. Bõe la a Ann maan n paam belsgo?
6 Bõe la a Ann maan n paam belsgo? Bũmb a ye a sẽn maan tɩ sõng-a yaa a sẽn kẽng sɛk-roogẽ wã, zĩig ning nebã sẽn kẽnd n waoogd Wẽnnaamã. Be, a “sɩnga a Zeova pʋʋsgo, n yãbd n pa satẽ ye.” Tõe tɩ yaa sɛk-roogã samandã noor la a yals n pʋʋse. A yeela a Zeova yaa: “Ges mam nimbãanegã . . . n tẽeg mam sẽn yaa fo tʋm-tʋmd-poakã yelle.” (1 Sãm. 1:10b, 11) A Ann pelga a pʋg n togs a Zeova bũmb ning sẽn namsd-a wã. Mams-y n ges-y-yã a Zeova sũur sẽn sãam to-to, a sẽn wa n get a Ann sẽn yaa a bi-pugl-nongrã sẽn daagd nintãmã!
7. A Ann sẽn pelg a pʋg n pʋʋs a Zeova wã, wãn to la bels-a?
7 A Ann sẽn pelg a pʋg n pʋʋs a Zeova tɩ maan-kʋʋdb kãsem a Eli me keng a raoodã, wãn to la naf-a? Biiblã yeelame: “A loogame n tɩ rɩ, la a pa le gãnem a neng ye.” (1 Sãm. 1:17, 18) Baa a Ann zu-loeesã sẽn da nan pa sa wã, a paama belsgo. A basa a sũ-sãamsã ne a Zeova. A Zeova yãa a sũ-sãamsã, n kelg a sẽn yãbd n kot sõngrã, la a wa ning-a bark t’a paam kamba.—1 Sãm. 1:19, 20; 2:21
8-9. Sã n yaa ne Ebre-rãmb 10:24, 25 wã, bõe yĩng tɩ d segd n maand d sẽn tõe fãa n kẽnd tigissã? (Ges-y fotã me.)
8 Rẽ sẽn wilgd tõnd bũmb ninga. Yãmb maooda ne zu-loɛɛg rũndã-rũndã, tɩ kɩt tɩ y mi n daagd nintãm bɩ? Tõe tɩ yaa y zakã ned wall y zoa n maan kaalem tɩ sãamd y sũur wʋsgo. Yɛlã woto taoore d wae n dat n bee d yembre. La a Ann sẽn kẽng sɛk-roogẽ wã, a paama belsg la raood kengre. Woto me, y sã n kẽnd tigissã baa y zu-loeesã sã n wa kɩt tɩ y yam kae y menga, y na n paama belsgo. (Karm-y Ebre-rãmb 10:24, 25.) D sẽn kelgd vɛrse-rãmb goam sẽn kengd raood tigissã sasa wã, a Zeova tõe n tũnuga ne rẽ n kɩt tɩ d bas tags-kɛgã, n tagsd bõn-sõma yelle. Rẽ tõe n sõngame tɩ d sũ-sãamsã booge, baa d yellã sã n pa paam tɩɩm zĩig pʋgẽ.
9 D tigissã sasa, d paamdame me n be ne d tẽed-n-taasã sẽn kʋmd tõndã, tɩ b wilgdẽ tɩ d yell pak-b lame la tɩ b nong-d lame tɩ kengd d raoodo. (1 Tes. 5:11, 14) Saam-biig a ye sẽn yaa zall so-pakd t’a pagã maan kaalem paama belsg a woto. A yeelame: “Hal n tãag rũndã m ket n daagda nintãm. M mi n baoo pẽk n zĩnd n yãbe. La m paama raood kengr wʋsg tigissã sasa. M saam-biisã la m saam-bi-pogsã no-goamã bels-m-la wʋsgo. M sã n ta tigissã zĩigẽ fãa m paamda raood kengre, baa m sũurã sẽn da sãam tɩ m maand yɩɩr to-to.” D sã n wa be d tigissã zĩigẽ, a Zeova tõe n tũnuga ne d tẽed-n-taasã n sõng-do.
D tõe n paama belsg d tẽed-n-taasã nengẽ (Ges-y sull a 8-9)
10. D sũur sã n wa sãam wʋsgo, wãn to la d tõe n dɩk a Ann togs-n-taare?
10 A Ann paama belsg me, a sẽn pelg a pʋg n togs a Zeova bũmb ning sẽn namsd-a wã. Yãmb me tõe n ‘sika y yɩɩrã fãa n bas ne a Zeova,’ n kɩs sɩd t’a na n kelga y kosgã n sõng-yã. (1 Pɩy. 5:7) Saam-bi-poak a ye sɩd la bi-bees kʋ ne bug-raoogo. A yeelame: “M sũurã ra sãama wʋsgo, tɩ m da tagsdẽ tɩ m pa na n tol n le paam sũ-noog baa bilf ye. Mam sẽn da pʋʋsd m saasẽ Ba a Zeova sẽn nong-mã kɩtame tɩ m paam belsg la yolsgo. Wakat ninga m pa mi m sẽn na n gom to-to ye. La a mii sẽn be mam sũurẽ wã. Sũ-sãamsã sã n wa loog-ma, m pʋʋsdame n kos sũur pʋgẽ bãane. Rẽ poore m sũ-sãamsã boogdame, tɩ m le tõe n mao ne m zu-loeesã.” Y sã n wa pelg y pʋg n togsd a Zeova bũmb ning sẽn be y sũurẽ wã a nee y nintãmã, la a wʋmd y sẽn namsdã võore. Baa zu-loɛɛg ning sẽn sãamd y sũurã sã n ket n nan pa sa, a Zeova tõe n bels-y lame la a kɩt tɩ y yamã gãand bãane. (Yɩɩn. 94:19; Fili. 4:6, 7) Sẽn paase a na n ning-y-la bark y sẽn tõogd toogã yĩnga.—Ebre. 11:6.
Y SŨUR SÃ N WA SÃAM B SẼN ZÃMB-Y YĨNGA
11. Zu-loees nins a Davɩɩd sẽn da tarã kɩtame t’a tagsg yaa wãna?
11 A Davɩɩd paama zu-loe-kɛgems sẽn kɩt t’a raag nintãm. Neb n da kis-a, tɩ neb a sẽn da kɩs sɩd meng zãmb-a. (1 Sãm. 19:10, 11; 2 Sãm. 15:10-14, 30) A wa n kong n yeelame yaa: “Mam sirã kɩtame tɩ m pãngã sa. Yʋngã tõre, mam madgda m gãagã ne nintãm. Mam limda m gãagã ne nintãm.” Bõe n kɩt t’a Davɩɩd ra tagsd woto? A yeelame: “[Yaa] neb nins sẽn namsd maamã fãa yĩnga.” (Yɩɩn. 6:6, 7) Neb a taabã manesmã namsa a Davɩɩd wʋsgo, hal t’a ra raagd nintãm.
12. A Davɩɩd ra kɩsa sɩd ne bõe wa Yɩɩn-sõamyã 56:8 sẽn wilgdã?
12 Baa ne a Davɩɩd sẽn da tar zu-loees wʋsgã, a ra kɩsa sɩd t’a Zeova nong-a lame. A yeelame yaa: “A Zeova na n wʋma mam yãbrã.” (Yɩɩn. 6:8) Daar a ye, a Davɩɩd togsa gom-nood nins sẽn be Yɩɩn-sõamyã 56:8 wã. (Karm-y-yã.) Gom-kãens wilgdame t’a Zeova sɩd geta neb nins sẽn tũud-a wã yell ne nonglem. A Davɩɩd ra getame tɩ yaa wa a Zeova kokda a nintãmã n suiid ko-waoogẽ, wall t’a gʋlsda rẽ sebr zugu. A Davɩɩd ra kɩsa sɩd t’a Zeova nee a sẽn namsd to-to wã, la t’a pa na n tol n yĩm rẽ yell ye. A ra kɩsa sɩd t’a saasẽ Ba wã sẽn nong-a wã mii zu-loees nins a sẽn maood ne wã, la a mi rẽ sẽn namsd-a to-to wã.
13. Neb a taab sã n wa maan bũmb n sãam d sũur wʋsgo, bõe yell la d tõe n tags tɩ bels-do? (Ges-y fotã me.)
13 Rẽ sẽn wilgd tõnd bũmb ninga. Yãmb zĩi ne sũ-sãams la yɩɩre, ned y sẽn da kɩs sɩd ne sẽn maan bũmb n sãam y sũur wʋsgo, wall sẽn zãmb-y yĩng bɩ? Tõe tɩ y ra baooda ned n na n kẽ kãadem tɩ pa yãk nenga, wall y pag bɩ y sɩd n zãmb-yã, pa rẽ bɩ ned y sẽn nong n bas a Zeova tũub tɩ sãamd y sũur wʋsgo. Saam-biig a ye pag sẽn yo la a loog n bas-a yeelame: “Linga maam wʋsgo. M da pa tagsd t’a buud tõe n paam-m lame ye. Mam sũurã ra sãama wʋsgo, tɩ m getẽ tɩ m ka võor ye. Yellã ra zabd-m-la wʋsgo.” Ned sã n maana bũmb n sãam y sũur wʋsgo, wall a zãmb-y lame, y sã n tẽeg t’a Zeova pa na n tol n daag-y n base, tõe n bels-y lame. Saam-biigã yeelame: “M wa n bãngame tɩ ninsaal tõe n zãmb-d lame, la a Zeova yaa d Pĩiga. Baa sẽn wa n yaa a soaba, a bee ne-d wakat fãa. A pa na n daag sẽn maand-b sɩd ne-a wã n bas ye.” (Yɩɩn. 37:28) Tẽeg-y me t’a Zeova nonglmã yɩɩda ninsaalbã nonglmã hal zĩig sẽn zãre. Ned sã n zãmb-yã, baa rẽ sẽn sãamd sũur wʋsgã, pa kɩtd t’a Zeova pa le nong-y ye. (Rom. 8:38, 39) Bũmb ning y sẽn segd n ning y yamẽ wã yaa tɩ baa nebã sẽn maan-y bũmb ninga, y saasẽ Ba wã nong-y lame.
Yɩɩn-sõamyã sebrã wilgdame t’a Zeova pẽe sũ-sãams rãmbã (Ges-y sull 13)
14. Yɩɩn-sõamyã 34:18 wã kɩtame tɩ d tõe n bas d yam ne bõe?
14 D sũur sã n wa sãam b sẽn zãmb-d yĩnga, a Davɩɩd goam nins sẽn be Yɩɩn-sõamyã 34:18 wã tõe n bels-d lame. (Karm-y-yã.) Sebr a yembr yeelame tɩ “neb nins raood sẽn komsã” tõe n yaa “neb sẽn pa le saagd manegr ye.” Bõe la a Zeova maand n sõngd neb nins sẽn pa le tẽed manegre, b sũy sẽn sãam wʋsgã yĩnga? Biig sũur sã n sãame, a roagd tõe n mobg-a lame n bels-a. Tõnd me sũur sã n wa sãam ned sẽn zãmb-d wall a sẽn daag-d n bas yĩnga, a Zeova pẽe tõndo, n zoet d nimbãaneg la a segl n sa n na n sõng-do. A tʋll n bels-d lame la a sõng-d tɩ d sũ-sãamsã booge. A pʋlma tõnd bõn-sõma wʋsgo, tɩ d sã n tagsd rẽ yell bɩ tõe n sõng-d tɩ d tõog toog zu-loees nins d sẽn tar rũndã-rũndã pʋgẽ.—Eza. 65:17.
Y SŨUR SÃ N SÃAM Y SẼN PA LE TẼED MANEGR YĨNGA
15. Bõe n wa n kɩt t’a Ezekɩyaas yãbe?
15 Zida rĩm a Ezekɩyaas sẽn wa n tar yʋʋm 39 wã, a wʋmame t’a bẽeda a yõor bãaga. No-rɛɛs a Ezayi taas-a-la a Zeova koɛɛga, n yeel t’a bãagã na n tũu ne a yõore. (2 Rĩm. 20:1) Ra wõnda saagr pa le be ye. Kibarã sãama a Ezekɩyaas sũur wʋsgo, t’a yãb wʋsgo. A pelga a pʋg n pʋʋs a Zeova.—2 Rĩm. 20:2, 3.
16. A Ezekɩyaas sẽn pʋʋs a Zeova ne nintãmã, wãn to la a leok-a?
16 A Ezekɩyaas sẽn pʋʋs a Zeova ne nintãmã, a nimbãaneg yõk-a lame t’a yeel-a yaa: “Mam wʋma fo pʋʋsgã. Mam yãa fo nintãmã. Mam na n sãooga foom.” A Zeova tũnuga ne a Ezayi n pʋlem a Ezekɩyaas t’a na n paasa a yõorã woglem, la t’a na n fãaga Zerizalɛm Asiiri nebã nugẽ.—2 Rĩm. 20:4-6.
17. D sã n wa bẽed bã-kɛgenga, wãn to la a Zeova teend tõndo? (Yɩɩn-sõamyã 41:3) (Ges-y fotã me.)
17 Rẽ sẽn wilgd tõnd bũmb ninga. Yãmb maooda ne bãag tɩ yaa wa sẽn maand kae bɩ? Pelg-y y pʋg n pʋʋs a Zeova, baa y na n pʋʋsdame la y yãbda. Biiblã yeta tõnd tɩ d bas d yam tɩ d ‘Ba sẽn tar nimbãan-zoeer wʋsgo, la sẽn yaa belsg fãa Wẽnnaamã’ na n belsa tõnd d zu-loeesã fãa pʋgẽ. (2 Kor. 1:3, 4) Rũndã-rũndã, d miime t’a Zeova pa na n kɩt tɩ d zu-loeesã fãa sa ye. La d kɩsa sɩd t’a na n teel-d lame. (Karm-y Yɩɩn-sõamyã 41:3.) A Zeova tũnugda ne a vʋʋsem sõngã n kõt tõnd pãnga, yam la sũur pʋgẽ bãan tɩ d tõogd n maood ne d zu-loeesã. (Yel. 18:14; Fili. 4:13) Sẽn paase a sẽn pʋlem Biiblã pʋgẽ tɩ bãasã fãa na n wa saame wã me belsd-d lame.—Eza. 33:24.
A Zeova na n leoka d pʋʋsgã, n kõ-d pãnga, yam la sũur pʋgẽ bãane (Ges-y sull 17)
18. Vɛrse-bʋg la y tagsd tɩ tõe n bels-y lame, y sã n wa maood ne zu-loe-kɛgenga? (Ges-y zĩ-gũbrã: “ Goam sẽn tõe n bels-d la boog d sũ-sãamse.”)
18 A Zeova goamã belsa a Ezekɩyaase. Tõnd me tõe n paama belsg Wẽnnaam Gomdã pʋgẽ. A Zeova kɩtame tɩ b gʋls belsg goam Biiblã pʋgẽ, tɩ d sã n wa tar zu-loees bɩ tõe n keng d raoodo. (Rom. 15:4) Logtoɛɛmbã sẽn yeel saam-bi-poak a ye sẽn be Afirik deluwɛst t’a bẽeda kãnsɛɛrã bãag poore, a ra yãbda wakat fãa. A yeelame: “Vɛrse goam sẽn belsd maam wʋsg yaa Ezayi 26:3. Baa naoor wʋsgo d sẽn pa tar d sẽn na n maan zu-loees nins d sẽn maood ne wã taoorã, vɛrse-kãngã goamã kɩtame tɩ d tõe n bas d yam t’a Zeova na n kõ-d-la sũur pʋgẽ bãane tɩ d tõog n mao ne zu-loɛɛg buud fãa.” Vɛrse bee y sẽn tagsd tɩ tõe n bels-y-la wʋsg y sã n wa maood ne zu-loe-kɛgemse, baa zu-loees sẽn pa tar tɩɩm bɩ?
19. Bõe la a Zeova pʋlem-do?
19 Yaoolem wakatã sẽn kolg saabã, d miime tɩ bũmb nins sẽn tõe n kɩt tɩ d raag nintãmã sõor na n tara paasg bala. La d sũur sã n wa sãam tɩ d yãbda, a Zeova nee rẽ la a kʋmd tõndo, wa a Ann ne a Davɩɩd la rĩm a Ezekɩyaas kibayã sẽn wilgdã. A Zeova sã n ne d sẽn ket n maand sɩd ne-a baa ne nintãmã, noom-a lame. Rẽ n so tɩ d sã n wa tar zu-loe-kɛgems bɩ d tõe n pelg d pʋg n pʋʋs a Zeova. Bɩ d ra tol n lak d meng ne d saam-biisã la d saam-bi-pogsã sẽn nong-dã ye. Sẽn paase, bɩ d ket n baood belsg Biiblã pʋgẽ. D tõe n kɩsa sɩd tɩ d sã n kell n tõog toog n maan sɩd ne a Zeova, a na n keo-d lame. Wala makre, a pʋlmame t’a na n yẽesa nintãm fãa tõnd ninẽ wã, tɩ d ra le yãb sũ-sãang yĩnga, b sẽn zãmb-d yĩnga, wall d sẽn pa le tẽed manegr yĩng ye. (Vẽn. 21:4) Rẽ poore, d sã n wa na n daag nintãm, na n yɩɩ sũ-noog nintãm bala.
YƖƖLL A 4 A Zeova yaa mam pe-kɩɩma
